1. Yeˬsuˇ Yeˬhawˇbaˬ˗ahˇ aˬ jeˬ miˇ neh aˬ yawꞈ˗euˬ zaˬ lahˇ deuˬ˗ahˇ haw piˇ nehˬ laꞈ lehˇ shaˇ˗eu nga?

 Yeˬsuˇ dehꞈ saˬ saˬ ngeh miˇ aˬ yawꞈ aˬ yawꞈ˗euˬ zaˬ lahˇ deuˬ aˬ joˇ joˆ˗ehˇ gʼeh˗eu lawˬ haw laˇ˗eu jeˬ˗ahˇ ya tahˬ puˬ˗eu lehˇ shaˇ noeˬ luꞈ˗eu meh. Yeˬsuˇ zaˬ lahˇ deuˬ˗ahˇ gaˬ dui dui˗eu miˇ neh, aˬ yawꞈ˗euˬ Aˬda˗ahˇ zaˬ lahˇ deuˬ˗ahˇ “haiˬ dui dui˗eu gʼaˬ˗euˬ laꞈ˗ahˇ maˬ ya bi ahˇ˗iˇ ni haw lahˇ nehˬ˗awˬ” lehˇ shaˇ˗eu meh. (Yoˇhaˬ 17:14, 15) Yeˬsuˇ mˬ taˆ gʼoꞈ daˆ leˇ gʼaˬ miˇ tsa, Yeˬhawˇbaˬ˗euˬ gaˇ mˇ˗eu deuˬ˗ahˇ deuˆ laˇ meh lehˇ siˬ nya˗eu meh. Yeˬhawˇbaˬ˗euˬ tsawˇ haˬ deuˬ haw piˇ nehˬ laꞈ˗eu jeˬ˗ahˇ loˬ meh.

2. Aˬ dui˗euˬ guiˬ lahˬ shaˇ dawˬ˗ahˇ Yeˬhawˇbaˬ dawˬ kʼoꞈ biꞈ˗eu yaw duˬ baw meh lehˇ aˬ jeˬ miˇ neh jah nya˗eu nga?

² Yeˬhawˇbaˬ Yeˬsuˇ˗ahˇ gaˬ˗eu miˇ neh Yeˬsuˇ˗euˬ shaˇ dawˬ˗ahˇ dawˬ kʼoꞈ biꞈ nehˬ˗euˬ meh. Teu miˇ neh aˬ dui Yeˬhawˇbaˬ nui kʼahˇ bi shiˇ˗eu gʼaˇ duˬ kʼaˇ gʼeh nya gaˇ neh leh jeh naˇ, Yeˬhawˇbaˬ aˬ dui˗ahˇ gaˬ˗eu meh. Aˬ dui caw ba nehˬ laꞈ, haw piˇ nehˬ laꞈ lehˇ guiˬ lahˬ shaˇ ngeh jiˇ naˇ haˬ nehˬ laꞈ˗eu meh. Yeˬhawˇbaˬ yaw muiˬ˗ehˇ ngehˬ gʼeh bo saˆ˗eu nymˇ sahˇ Aˬda pyeuꞈ˗eu miˇ neh, aˬ yawꞈ˗euˬ zaˬ deuˬ˗ahˇ nui gaˬ keuˆ˗eu laꞈ kʼoeˇ yaw muiˬ˗ehˇ bo saˆ nehˬ˗eu meh. Yeˬhawˇbaˬ teu loꞈ˗ehˇ maˬ bo saˆ naˇ aˬ yawꞈ˗euˬ tsawˇ myahˇ cawˆ˗eu meh.

3. Nymˬ˗mˇ iˬ nah aˬ dui Yeˬhawˇbaˬ neh haw piˇ nehˬ laꞈ˗eu jeˬ˗ahˇ aˬ jeˬ miˇ neh loˬ˗eu nga?

³ Nymˬ˗mˇ aˬ dui yaw beh naˆ maˬ tseˇ Yeˬhawˇbaˬ haw piˇ nehˬ laꞈ˗eu jeˬ˗ahˇ loˬ meh. Saˬdaˬ mˬ taˆ neh bi biˬ ka leꞈ˗awˇ “nui ma pehˇ dui dui” luꞈ˗eu miˇ neh. (Pah mehˬ˗eu 12:12) Aˬ dui˗ahˇ kʼehˬ˗eu kʼaˆ˗eu heu naˇ “Miˬyehˇ˗euˬ nui kʼahˇ mˇ˗eu jeˬ pyeuꞈ ma” lehˇ tsawˇ haˬ deuˬ˗ahˇ noeˬ leˇ ni Saˬdaˬ mˇ luꞈ˗eu meh. (Yoˇhaˬ 16:2) Miˬyehˇ˗ahˇ maˬ jah˗eu nui deuˬ jiˇ aˬ dui aˬ yawꞈ maꞈ˗ahˇ maˬ duˇ˗eu miˇ neh, kʼehˬ laˇ kʼaˆ laˇ˗eu meh. Aˬ suˇ gʼaˬ aˬ dui˗ahˇ aˬ jeˬ˗euˬ baˬ da neh maˬ kaˬ kʼehˬ laˇ kʼaˆ laˇ kʼawꞈ, aˬ dui maˬ guˆ. Jaˇliꞈ˗ahˇ ‘Sahˬpaˬ saˇ jaˇ ziꞈ˗eu meh. Aˬ yawꞈ naw maꞈ˗ahˇ gʼaˬ biꞈ nehˬ laꞈ˗awˇ, haiˬ dui dui˗eu gʼaˬ˗euˬ aˬ laꞈ laꞈ kʼoeˇ haw piˇ nehˬ laꞈ tehꞈ˗a’ lehˇ ehˇ taˬ˗euˬ miˇ neh ma. (2 Teˇsaˬloˇni 3:3) Yeˬhawˇbaˬ aˬ dui˗ahˇ aˬ joˆ˗ehˇ haw piˇ nehˬ˗eu nga? Aˬ joˆ˗ehˇ haw piˇ nehˬ˗eu 2 jeˬ˗ahˇ ja sawˇ ma.

4. Eˇpeˇsu 6:13-17-ahˇ haw ngeh Yeˬhawˇbaˬ aˬ dui˗ahˇ haw piˇ˗eu gʼaˇ duˬ aˬ jeˬ lehˬ hmˬ nehˬ taˬ˗euˬ nga?

⁴ Yeˬhawˇbaˬ aˬ dui˗ahˇ Saˬdaˬ deuˆ laˇ˗eu jeˬ˗ahˇ haw piˇ˗eu gʼaˇ duˬ, guiˇ deuˆ˗eu keu ka deuˬ lehˬ hmˬ nehˬ taˬ˗euˬ meh. (Eˇpeˇsu 6:13-17-ahˇ gui.) Miˬyehˇ neh biꞈ˗euˬ guiˇ deuˆ˗eu keu ka deuˬ ziꞈ dah ni gʼeh˗awˇ gaˇ dahˇ tsoeˬ dui dui meh. Ehˇ kʼawꞈ aˬ dui Miˬyehˇ˗euˬ guiˇ deuˆ˗eu keu ka dawˬ tawˆ luꞈ˗ahˇ dmˬ˗awˇ zmˬ˗awˇ neh tehꞈ˗ehˇ aˬ dui˗ahˇ haw piˇ nya˗eu meh. Aˬ dui guiˇ deuˆ˗eu keu ka aˬ yawꞈ hmˬ yawꞈ aˬ jeˬ˗ahˇ ehˇ mawꞈ nga lehˇ ja sawˇ ma.

5. Joꞈ paꞈ heu naˇ aˬ jeˬ nga? Aˬ dui aˬ jeˬ miˇ neh joꞈ paꞈ heu˗ahˇ ya paꞈ taˬ˗eu nga?

⁵ Joꞈ paꞈ heu naˇ, Jaˇliꞈ˗euˬ yaw tsaˬ yaw dawˇ˗ahˇ ehˇ mawꞈ˗eu meh. Aˬ dui aˬ jeˬ miˇ neh joꞈ paꞈ heu˗ahˇ ya paꞈ taˬ˗euˬ nga? Jaˇliꞈ˗euˬ yaw tsaˬ yaw dawˇ aˬ dui˗ahˇ “aˬ myawꞈ myawꞈ˗eu deuˬ dawˬ tawˆ luꞈ˗euˬ aˬ da yaw dzahˇ gʼaˬ” pyeuꞈ˗eu Saˬdaˬ˗euˬ mehˇ shuiˇ dawˬ˗ahˇ maˬ tawˆ leˇ ni caw ba nehˬ˗eu miˇ neh meh. (Yoˇhaˬ 8:44) Saˬdaˬ jaˬ myawꞈ myawꞈ luꞈ˗eu yaw myaˬ heˇ kʼoꞈ byah laˇ˗awˇ, “miˇ tsaˬ zaˬ dawˬ tawˆ luꞈ˗ahˇ sheuˬ bahˬ” luꞈ˗eu meh. (Pah mehˬ˗eu 12:9) Ehˇ kʼawꞈ, maˬ bi sheuˬ bahˬ ni Jaˇliꞈ˗euˬ yaw tsaˬ yaw dawˇ aˬ dui˗ahˇ haw piˇ nehˬ˗eu meh. Aˬ dui joꞈ paꞈ˗ahˇ aˬ joˆ˗ehˇ paꞈ taˬ nya˗eu nga? Yeˬhawˇbaˬ nehˬ˗ehˇ taꞈ˗eu yaw tsaˬ yaw dawˇ˗ahˇ dzaw geuꞈ˗awˇ, “Aˬ yawꞈ˗euˬ Yaw sahˇ˗euˬ baoˬ baˬ da neh tehꞈ˗ehˇ, aˬ yawꞈ˗ahˇ siˬ duˬ˗awˇ uˬ duˬ tahˬ nya˗eu” uˬ taꞈ, yawˬ jeˬ na luꞈ˗ahˇ yaw sui yaw dawˇ dawˇ mˇ˗eu heu neh joꞈ paꞈ paꞈ taˬ nya˗eu meh.—Yoˇhaˬ 4:24; Eˇpeˇsu 4:25; Heˬbyehˇ 13:18.

6. Kʼahˬ˗ahˇ dehˬ kaˬ˗eu jeˬ heu naˇ, aˬ jeˬ˗ahˇ ehˇ˗eu nga? Aˬ jeˬ miˇ neh ya dehˬ kaˬ˗eu nga?

⁶ Kʼahˬ˗ahˇ dehˬ ka˗eu jeˬ lehˇ ehˇ˗eu heu naˇ, Yeˬhawˇbaˬ˗euˬ tsaˬ˗euˬ dawˇ˗eu zahˬ˗ahˇ ehˇ mawꞈ˗eu meh. Aˬ dui kʼahˬ˗ahˇ aˬ jeˬ miˇ neh ya dehˬ kaˬ˗eu nga? Kʼahˬ˗ahˇ dehˬ kaˬ˗eu jeˬ yehˇ deuˬ˗euˬ nui ma˗ahˇ haw piˇ nehˬ˗eu loꞈ˗ehˇ, Yeˬhawˇbaˬ˗euˬ tsaˬ˗eu dawˇ˗eu zahˇ jiˇ miˇ tsaˬ˗euˬ maˬ muiˬ˗eu nui noeˬ deuˬ˗ahˇ aˬ dui˗euˬ nui ma laꞈ kʼoeˇ maˬ bi ahˇ laˇ ni haw piˇ nehˬ˗eu meh. (Dawˬdaˬ 4:23) Yeˬhawˇbaˬ aˬ dui aˬ yawꞈ˗ahˇ nui ma gʼawˇ mawˇ dawˬ tawˆ luꞈ gaˬ˗awˇ, uˬ duˬ tahˬ gaˇ noeˬ tmˬ˗eu meh. (Maꞈtehˬ 22:36, 37) Ehˇ kʼawꞈ, Saˬdaˬ naˇ aˬ dui˗ahˇ miˇ tsaˬ kʼoeˇ taˆ jaˆ˗eu Yeˬhawˇbaˬ bye˗eu jeˬ˗ahˇ gaˬ laˇ ni muˇ juˇ juˇ˗eu heu neh, aˬ dui˗ahˇ nui ma bi biˇ paˆ˗eu meh. (Yaˬkoˆ 4:4; 1 Yoˇhaˬ 2:15, 16) Teu jeˬ neh maˬ za naˇ, kʼehˬ˗eu kʼaˆ˗eu jeˬ lawˬ muˇ neh kʼawꞈ aˬ dui Yeˬhawˇbaˬ˗euˬ tsaˬ˗eu dawˇ˗eu zahˇ˗ahˇ maˬ mˇ caw ni jahˇ˗eu meh.

7. Aˬ dui kʼahˬ˗ahˇ aˬ geu jeˬ lehˇ ya dehˬ kaˬ taˬ nga?

⁷ Aˬ jeˬ tsaˬ˗eu hawˇ˗eu maˬ tsaˬ˗eu nehˬ˗ehˇ taꞈ leˇ˗eu Yeˬhawˇbaˬ˗euˬ tsaˬ˗eu dawˇ˗eu zahˇ˗ahˇ ha geuꞈ˗awˇ dehꞈ caw˗eu heu neh kʼahˬ˗ahˇ dehˬ kaˬ taˬ nya˗eu meh. (Ja ceuˬ 97:10) Tiˬ deuˬ na Yeˬhawˇbaˬ˗euˬ tsaˬ˗eu dawˇ˗eu zahˇ heu naˇ, caw teh˗eu aˇ dzehˬ˗ehˇ shaˬ nya lehˇ noeˬ˗eu meh. Ehˇ kʼawꞈ teu˗ahˇ maˬ dehꞈ caw naˇ, guiˇ deuˆ duˬ˗ahˇ le keuˆ˗awˇ kʼahˬ˗ahˇ dehˬ kaˬ˗eu jeˬ puiˇ dzeh˗euˬ yehˇ nehˬ˗ehˇ duˇ leˇ˗eu meh. Toˆ˗ehˇ jahˇ˗eu teu naˇ laiꞈ dui dui˗eu jeˬ pyeuꞈ meh. Yeˬhawˇbaˬ˗ahˇ gaˬ˗eu deuˬ˗euˬ gʼaˇ duˬ naˇ, Yeˬhawˇbaˬ˗euˬ zahˇ heu naˇ “maˬ caw teh nya paˬ˗ehˇ shaˬ˗eu jeˬ maˬ ngeuˇ” ni, dehꞈ ziˇ˗ahˇ ka kʼoꞈ nehˬ laꞈ˗eu jeˬ pyeuꞈ nya lehˇ noeˬ˗eu meh.—1 Yoˇhaˬ 5:3.

8. Guiˬ lahˬ dawˬ tsaꞈ gaˬ˗eu lehˬ hmˬ deuˇ taˬ˗eu sehˬ nawˆ lehˇ ehˇ˗eu heu naˇ, aˬ jeˬ˗ahˇ ehˇ mawꞈ˗eu nga?

⁸ Pawˇluˆ aˬ dui˗ahˇ biˬ tsaˬ bi dzoeˇ leˇ˗eu laˬ kʼaˬ cehˇ˗eu guiˬ lahˬ dawˬ sehˬ nawˆ nawˆ˗awˬ lehˇ gʼaˬ biꞈ taˬ˗euˬ meh. Heu naˇ tsaꞈ gaˬ˗eu gʼaˇ duˬ aˬ myah luꞈ ya lehˬ hmˬ dah taˬ gaˇ ehˇ mawꞈ˗eu meh. Aˬ dui Jaˇliꞈ˗euˬ gaˇ kawˆ aˬ cawˬ˗ahˇ ehˇ nehˬ ngeh, yawˬ ha˗euˬ nui jah jiˇ ziꞈ laˇ˗eu meh. Miˇ kʼahˬ doe ni jawˇ˗eu Yeˬhawˇbaˬ˗euˬ gaˇ mˇ zaˬ deuˬ tsaꞈ gaˬ˗eu gʼaˇ duˬ, kʼaˇ gʼeh nya gaˇ neh leh jeh gaˇ ya mawˇ ngeh, aˬ dui˗ahˇ jiˇ gʼaˬ ahˇ laˇ miˇ˗a. Aˬ yawꞈ maꞈ gaˇ mˇ duˬ hawˇ˗eu dzaw nymˇ˗ahˇ jawˇ ngeh maˬ ehˇ, jeˬ gaꞈ jeˬ ka tsahˬ hawˇ˗eu iˇ kahˇ doe ni tsaꞈ gaˬ ngeh maˬ ehˇ, lehꞈ˗ahˇ iˇ ngeh hawˇ˗eu yuiꞈ nyiˇ deuˬ jawˇ gaˇ iˇ ngeh maˬ ehˇ, cawˬ deuˬ nehˬ˗ehˇ ngehˬ cawˬ ngeh hawˇ˗eu iˇ kahˇ˗ahˇ neh maˬ iˇ doˆ nya ngeh maˬ ehˇ, tsaꞈ gaˬ˗eu meh. Aˬ dui guˆ˗awˇ maˬ paˇ tsaꞈ gaˬ naˇ, guiˇ deuˆ˗eu duˬ˗ahˇ sehˬ nawˆ lehˆ dzeh˗euˬ yehˇ  nehˬ˗ehˇ duˇ leˇ˗eu meh. Sehˬ nawˆ lehˆ naˇ aˬ kuiˇ yaw awˬ˗ehˇ laˆ naˇ laˇ nya˗awˇ, aˬ cawˬ jiˇ yaw awˬ˗ehˇ deuˆ laˇ nya˗eu uˬ taꞈ, yaw huiˬ gʼaˬ˗euˬ ehˇ dawˬ˗ahˇ jiˇ maˬ paˇ mˇ caw nya˗eu meh.

9. Aˬ dui dehˬ daˬ duˬ aˬ jeˬ miˇ neh ya tuˆ tehˬ taˬ˗eu nga?

⁹ Dehˬ daˬ duˬ lehˇ ehˇ˗eu heu naˇ, Yeˬhawˇbaˬ˗ahˇ jah˗eu jeˬ˗ahˇ ehˇ mawꞈ˗eu meh. Aˬ dui Yeˬhawˇbaˬ neh saˇ jaˇ kʼaˇ dzaˬ taˬ˗euˬ jeˬ mˇ byah meh lehˇ jah˗eu ma. Nui jah heu naˇ, “haiˬ dui dui˗eu gʼaˬ neh beuˆ laꞈ˗euˬ miˬ dzaˬ doꞈ˗eu kaˆ myaˬ deuˬ bi miˆ˗iˇ˗eu” meh. Aˬ dui dehˬ daˬ duˬ˗ahˇ aˬ jeˬ miˇ neh ya tuˆ tehˬ taˬ˗eu nga? Nui jah heu naˇ puiˬ˗eu deuˬ˗euˬ mehˬ bahˬ˗eu jeˬ˗ahˇ maˬ bi tawˆ leˇ ni maˬ ehˇ, aˬ dui˗euˬ jah˗eu jeˬ˗ahˇ ja bu laˇ ngeh nui ma gʼaˬ maˬ bi baˬ ni maˬ ehˇ, caw ba nehˬ˗eu miˇ neh meh. Nui jah maˬ ahˇ naˇ Yeˬhawˇbaˬ˗euˬ tsaˬ˗eu dawˇ˗eu zahˇ˗ahˇ mˇ bahˬ ni lawˬ haw laˇ ngeh, deuˆ gʼaˬ nya˗eu gʼaˬ maˬ ahˇ˗a. Gaˇ mˇ duˬ˗ahˇ maˬ ehˇ, sahˬ boꞈ dzaw nymˇ˗ahˇ maˬ ehˇ, aˬ dui yawˬ ha jah˗eu jeˬ nehˬ˗ehˇ taꞈ leˇ˗awˇ kʼaˬ duˬ ni dzawˇ nehˬ ngeh dehˬ daˬ duˬ˗ahˇ tuˆ tehˬ taˬ gaˇ duˇ˗eu meh. (1 Beˬtuˆluˆ 3:15) Miˬyehˇ˗euˬ gaˬ˗ahˇ yaw muiˬ˗ehˇ maˬ mˇ nya˗eu pyuˇ gʼawˬ mya ni za laˇ˗eu gaˇ˗ahˇ laꞈ maˬ daˬ˗eu heu jiˇ dehˬ daˬ duˬ˗ahˇ tuˆ tehˬ taˬ gaˇ duˇ˗eu meh. (Heˬbyehˇ 13:5, 6) Aˬ dui laˆ tsoeˬ laˇ˗eu jeˬ jaˆ kʼawꞈ Yeˬhawˇbaˬ˗euˬ gaˇ mˇ daˆ leꞈ˗eu heu jiˇ dehˬ daˬ duˬ˗ahˇ tuˆ tehˬ taˬ˗eu jeˬ pyeuꞈ meh.—1 Teˇsaˬloˇni 2:2.

10. Shmˇ uˬ kʼoˆ heu naˇ aˬ jeˬ˗ahˇ ehˇ mawꞈ˗eu nga? Aˬ dui aˬ jeˬ miˇ neh uˬ kʼoˆ heu˗ahˇ ya kʼoˆ taˬ˗eu nga?

¹⁰ Shmˇ uˬ kʼoˆ heu naˇ, Yeˬhawˇbaˬ neh aˬ dui˗ahˇ  biꞈ˗euˬ noeˬ tmˬ˗eu jeˬ˗ahˇ ehˇ mawꞈ˗eu meh. Noeˬ tmˬ˗eu jeˬ heu naˇ, Miˬyehˇ˗euˬ nui kʼahˇ mˇ˗eu deuˬ˗ahˇ laꞈ sawˬ biꞈ˗eu hawˇ˗eu shiˇ˗eu deuˬ˗ahˇ bi gʼoꞈ dehꞈ laˇ˗eu jeˬ˗ahˇ noeˬ tmˬ˗eu jeˬ pyeuꞈ meh. (1 Teˇsaˬloˇni 5:8; 1 Tiˆmoˇseˬ 4:10; Tiˇtuˆ 1:1, 2) Shmˇ uˬ kʼoˆ yehˇ deuˬ˗euˬ uˬ duˬ˗ahˇ haw piˇ nehˬ˗eu loꞈ˗ehˇ, ka kʼoꞈ˗eu jeˬ nehˬ˗ehˇ taꞈ˗eu noeˬ tmˬ˗eu jeˬ jiˇ aˬ dui˗euˬ nui noeˬ˗ahˇ haw piˇ nehˬ˗eu meh. Aˬ jeˬ lehˇ haw piˇ nehˬ˗eu nga? Noeˬ tmˬ˗eu jeˬ heu naˇ, Miˬyehˇ˗euˬ saˇ jaˇ dawˬ˗ahˇ bi haw tsoˆ˗eu uˬ taꞈ, shaˬ zahˬ˗ahˇ aˇ dzehˬ dzeuˇ ni maˬ kʼahˬ lahˇ ni jiˇ caw ba nehˬ laꞈ˗eu meh. Aˬ dui shmˇ uˬ kʼoˆ teu˗ahˇ aˬ joˆ˗ehˇ kʼoˆ taˬ nya˗eu nga? Aˬ dui˗euˬ nui noeˬ Miˬyehˇ˗euˬ nui noeˬ nehˬ˗ehˇ aˬ myah luꞈ bi duˇ leˇ˗eu heu neh kʼoˆ taˬ nya˗eu meh. Yaw jeˬ ma jeˬ, aˬ dui˗euˬ noeˬ tmˬ˗eu jeˬ tiˬ kʼehˇ laˇ kʼehˬ tehꞈ˗ehˇ byoˆ˗iˇ˗eu pyuˇ shuiˇ˗ahˇ maˬ taˬ ni Miˬyehˇ˗ahˇ taˬ˗eu ma.—Ja ceuˬ 26:2; 104:34; 1 Tiˆmoˇseˬ 6:17.

11. Mi cehˇ heu naˇ aˬ jeˬ nga? Aˬ dui aˬ jeˬ miˇ neh mi cehˇ heu˗ahˇ ya zmˬ˗eu nga?

¹¹ Mi cehˇ heu naˇ, Jaˇliꞈ laꞈ kʼoeˇ˗euˬ Miˬyehˇ˗euˬ dawˬ˗ahˇ ehˇ mawꞈ˗eu meh. Mi cehˇ heu naˇ, jaˬ myawꞈ mehˇ shuiˇ yawˬ jeˬ na luꞈ˗ahˇ pah doˆ laꞈ nya˗awˇ, tsawˇ haˬ deuˬ mehˬ bahˬ˗eu jeˬ hawˇ˗eu maˬ muiˬ˗eu mˇ jeˬ shaˇ kawˆ deuˬ˗ahˇ buˬ˗iˇ ni jiˇ caw ba nehˬ nya˗eu meh. (2 Gawˇliˬtu 10:4, 5; 2 Tiˆmoˇseˬ 3:16, 17; Heˬbyehˇ 4:12) Aˬ dui mi cehˇ heu˗ahˇ yawˬ haˇ yawˬ ha pyehˆ tseˇ˗eu jeˬ hawˇ˗eu aˇ maꞈ aˇ muˇ neh mehˬ nehˬ laꞈ˗euˬ jeˬ baˬ da neh yaw muiˬ˗ehˇ zmˬ nya laˇ˗eu meh. (2 Tiˆmoˇseˬ 2:15) Guiˇ deuˆ˗eu keu ka uˬ taꞈ Miˬyehˇ aˬ dui˗ahˇ haw piˇ˗eu dzaˇ˗i nui jeˬ˗ahˇ jiˇ paˇ lehˬ hmˬ nehˬ taˬ˗euˬ meh. Teu naˇ aˬ jeˬ nga?

12. Aˬ dui aˬ jeˬ paˇ loˬ nga siˬ? Aˬ jeˬ miˇ neh?

¹² Noeˬ dahˇ doe laˇ˗euˬ yehˇ deuˬ naˇ, huiˬ˗eu guiˇ maꞈ˗ahˇ yawˬ ha tehꞈ˗ehˇ maˬ deuˆ gʼaˬ nya˗a, yehˇ nui deuˬ neh jiˇ ya bi caw ba meh lehˇ siˬ nya˗eu meh. Teu gaˇ duˇ ni Saˬdaˬ hawˇ˗eu aˬ yawꞈ˗euˬ mehˬ nah caw teh˗eu deuˬ˗ahˇ aˬ dui tiˬ gʼaˬ tehꞈ˗ehˇ maˬ behˬ leˇ nya˗a, aˬ dui mehˇ nmˇ deuˬ neh ya bi caw ba meh. Teu miˇ neh Yeˬhawˇba aˬ dui˗ahˇ caw ba nehˬ nya˗eu miˇ kʼahˬ doe ni jawˇ˗eu “Ka li˗ahˇ jah˗eu tsawˇ haˬ” deuˬ lehˬ hmˬ nehˬ taˬ˗euˬ meh.—1 Beˬtuˆluˆ 2:17.

13. Heˬbyehˇ 10:24, 25-ahˇ haw ngeh mehˬ bawˬ aˬ dui˗ahˇ aˬ joˆ˗ehˇ caw ba nehˬ˗eu nga?

¹³ Aˬ dui caw ba˗eu jeˬ˗ahˇ za nya˗eu tiˬ jeˬ naˇ mehˬ bawˬ˗ahˇ iˇ˗eu heu meh. (Heˬbyehˇ 10:24, 25-ahˇ gui.) Gʼaˬ maˬ baˬ˗eu aˬ suˇ gʼaˬ jawˇ de, aˬ dui gʼaˬ baˬ ngeh mehˬ bawˬ heu naˇ, aˬ dui˗ahˇ caw ba nehˬ nya meh. Mehˇ nmˇ deuˬ˗euˬ dawˬ kʼoꞈ heu naˇ aˬ dui˗ahˇ gʼaˬ bi ahˇ laˇ˗awˇ, Jaˇliꞈ˗ahˇ dawˬ pehˬ taˬ˗eu dawˬ mehˬ mehˬ˗eu jeˬ hawˇ˗eu aˇ baˇ jahˇ byaˬ˗eu jeˬ heu jiˇ, Yeˬhawˇbaˬ˗euˬ gaˇ˗ahˇ aˬ myah myah naˆ maˬ tseˇ bi leh jeh laˇ˗eu meh. Aˬ dui mehˬ bawˬ dahˬ maˬ beh laˇ mi naˆ˗ehˇ maˬ ehˇ, jiˇ ngeh maˬ ehˇ, mehˇ nmˇ deuˬ nehˬ˗ehˇ ngehˬ cawˬ˗eu heu naˇ, aˬ dui˗ahˇ gʼaˬ za laˇ˗eu meh. (1 Teˇsaˬloˇni 5:14) Kʼoeˇ uˬ taꞈ, bawˬ dzaˬ ngeh aˬ cawˬ˗ahˇ ya caw ba˗eu heu jiˇ, aˬ dui˗ahˇ laˬ kʼaˬ bi cehˇ laˇ˗eu meh. (Gʼaˬkʼehˇ 20:35; Loˇmaˆ 1:11, 12) Mehˬ bawˬ heu naˇ, aˬ dui˗ahˇ nui jeˬ jiˇ paˇ caw ba nehˬ˗eu meh. Aˬ dui bawˬ dzaˬ ngeh guiˇ deuˆ nya dzehˬ laˇ ni ya dzaw˗eu yehˇ loꞈ˗ehˇ aˬ dui˗ahˇ jiˇ Miˬyehˇ˗euˬ gaˇ˗ahˇ bi bym laˇ˗eu meh. Yaw jeˬ ma jeˬ, mehˬ˗eu keu ka deuˬ˗ahˇ aˬ joˆ˗ehˇ ya zmˬ˗eu lehˇ siˬ nya dzehˬ laˇ˗eu meh. Teu miˇ neh, aˬ dui maˬ bawˬ dzaˬ mi naˆ˗ehˇ yaw muiˬ˗ehˇ ya lehˬ hmˬ˗eu uˬ taꞈ, bawˬ dzaˬ ngeh jiˇ yaw muiˬ˗ehˇ ya naˇ haˬ˗awˇ, bawˬ dzaˬ gʼaˬ ngeh jiˇ aˬ dui neh ya siˬ˗euˬ jeˬ yaw muiˬ˗ehˇ ya zmˬ˗iˇ˗eu meh. Toˆ˗ehˇ jahˇ naˇ “Yeˬsuˇ Ka li˗euˬ saˇ jaˇ ziꞈ˗eu yehˇ tiˬ gʼaˬ” pyeuꞈ laˇ˗eu meh.—2 Tiˆmoˇseˬ 2:3.

14. Aˬ dui aˬ suˇ gʼaˬ˗euˬ caw ba˗eu jeˬ˗ahˇ paˇ ya nga siˬ?

¹⁴ Kʼoeˇ uˬ taꞈ baoˬ huiˬ˗eu mˬ taˆ gʼaˬ kʼehˇ gʼawˬ mya lam gʼaˬ jiˇ aˬ dui˗ahˇ caw ba nehˬ˗eu meh. Shaˇ noeˬ haw sheˇ mˬ taˆ gʼaˬ kʼehˇ tiˬ gʼaˬ tehꞈ kʼawꞈ baoˬ aˇ naˆ ni ahˇ˗eu nga lehˇ. (Iˇsaˬyaˇ 37:36) Kʼoeˇ naˇ mˬ taˆ gʼaˬ kʼehˇ guiˇ maꞈ maꞈ lah ni naˇ ngehˬ˗ehˇ dzehˬ aˇ naˆ ni gʼeh paˬ nga. Tsawˇ haˬ maˬ ehˇ, nehꞈ maˬ ehˇ, tiˬ gʼaˬ˗iˬ Yeˬhawˇbaˬ˗euˬ guiˇ maꞈ˗ahˇ maˬ deuˆ gʼaˬ laˇ nya˗a. Saˇ jaˇ ziꞈ˗eu Saˇ kiˇ tiˬ gʼaˬ tehꞈ kʼawꞈ, Yeˬhawˇbaˬ nehˬ˗ehˇ gm leˇ naˇ muiˇ˗eu deuˬ dawˬ tawˆ luꞈ naˆ maˬ tseˇ gʼaˬ ahˇ dzehˬ˗eu meh. (Yaˇkʼaˬdaˇ˗eu 6:16) Aˬ dui gaˇ kawˆ heu˗ahˇ nui kʼaˬ  tsmˬ nya˗eu meh. Teu miˇ neh, gaˇ mˇ cawˬ deuˬ maˬ ehˇ, dzaw cawˬ deuˬ maˬ ehˇ, yuiꞈ nyiˇ deuˬ maˬ ehˇ, ngehˬ doeˇ mˇ doeˇ laˇ ngeh gaˇ kawˆ heu˗ahˇ noeˬ mawˇ luꞈ˗uˇ. Aˬ dui tiˬ gʼaˬ tehꞈ˗ehˇ deuˆ luꞈ˗eu maˬ ngeuˇ. Nymˬ˗mˇ aˬ dui Yeˬhawˇbaˬ˗euˬ dawˬ hawˇ˗eu aˬ yawꞈ sheuˬ gʼeh˗eu jeˬ˗ahˇ mˇ caw luꞈ˗eu miˇ neh, aˬ yawꞈ aˬ dui˗ahˇ caw ba nehˬ˗eu yaw duˬ baw meh.

15. Iˇsaˬyaˇ 54:15, 17-ahˇ haw ngeh, Miˬyehˇ˗euˬ tsawˇ haˬ deuˬ tsaꞈ gaˬ gaˇ aˬ jeˬ maˬ kaˬ aˬ jeˬ miˇ neh maˬ laˆ tsoeˬ laˇ nya˗eu nga?

¹⁵ Saˬdaˬ˗euˬ miˇ tsaˬ aˬ dui˗ahˇ gʼawˬ mya jeˬ baˬ da neh bye˗eu meh. Yaw jeˬ ma jeˬ, aˬ dui uˆ lahˇ˗eu gaˇ kawˆ˗ahˇ gʼaˬ baꞈ maˬ baꞈ˗eu miˇ neh maˬ ehˇ, guiˇ deuˆ gaˇ maˬ keuˬ˗eu baˬ da neh maˬ ehˇ, Miˬyehˇ˗euˬ Miˇkʼahˬ tehꞈ˗ehˇ miˇ tsaˬ˗ahˇ laˆ saˇ nehˬ nya meh lehˇ tsaꞈ gaˬ˗eu baˬ da neh maˬ ehˇ, Yeˬhawˇbaˬ˗euˬ tsawˇ myahˇ tsaꞈ gaˬ˗awˇ aˬ yawꞈ˗euˬ tsaˬ˗eu dawˇ˗eu zahˇ˗ahˇ dehꞈ caw˗eu baˬ da neh maˬ ehˇ, aˬ dui tsawˇ haˬ deuˬ˗ahˇ miˇ tsaˬ˗ahˇ uˆ lahˇ˗eu heu gʼaˬ naˇ tsawˇ haˬ˗ahˇ sehꞈ˗eu jaˬ myawꞈ mehˇ shuiˇ pyeuꞈ meh lehˇ tsaꞈ gaˬ˗eu baˬ da neh maˬ ehˇ, Saˬdaˬ˗euˬ miˇ tsaˬ gʼawˬ myahˇ maˬ gʼeh˗ehˇ bi laˆ cawˆ meh lehˇ tsaꞈ gaˬ˗eu baˬ da neh maˬ ehˇ, Saˬdaˬ˗euˬ miˇ tsaˬ aˬ dui˗ahˇ bye˗eu meh. (Yoˇhaˬ 8:44) Saˬdaˬ hawˇ˗eu aˬ yawꞈ˗euˬ jawˇ paw˗euˬ deuˬ aˬ dui˗ahˇ aˬ jeˬ lehˇ laˆ naˬ˗eu leh jeh kʼawꞈ, aˬ yawꞈ maꞈ˗euˬ leh jeh˗eu jeˬ gaˇ maˬ pyeuꞈ˗a. Aˬ dui Yeˬhawˇbaˬ˗ahˇ ciˬ huiˬ ciˬ mahˇ daˆ leꞈ˗eu gʼaˇ duˬ kʼaˇ jahˇ nya˗eu jeˬ jahˇ˗eu ma. Saˬdaˬ baoˬ aˇ naˆ ni ahˇ˗awˇ, miˇ tsaˬ kʼoeˇ taˆ laˬ kʼaˬ cehˇ˗eu guiˬ lahˬ dawˬ maˬ bi gaˬ doe iˇ˗eu gʼaˇ duˬ aˇ naˆ ni leh jeh kʼawꞈ gaˇ maˬ pyeuꞈ˗a. Heu naˇ Yeˬhawˇbaˬ aˬ dui˗ahˇ haw piˇ nehˬ luꞈ˗eu miˇ neh meh.—Iˇsaˬyaˇ 54:15, 17-ahˇ gui.

16. Yeˬhawˇbaˬ aˬ yawꞈ˗euˬ tsawˇ haˬ deuˬ˗ahˇ huiˬ dui dui˗eu shaˬ zahˬ aˇ yamˬ˗ahˇ aˬ joˆ˗ehˇ caw ba nehˬ˗eu nga?

¹⁶ Mehˬ hu paw aˬ jeˬ pyeuꞈ laˇ˗eu nga? Yeˬhawˇbaˬ huiˬ dui dui˗eu shaˬ zahˬ aˇ yamˬ˗ahˇ aˬ yawꞈ˗euˬ tsawˇ haˬ deuˬ˗ahˇ zahˬ leˇ paˬ˗ehˇ gʼeh˗eu heu nyiˬ jeˬ neh caw ba˗eu meh. Tiꞈ, saˇ jaˇ ziꞈ˗eu aˬ yawꞈ˗euˬ tsawˇ haˬ deuˬ˗ahˇ miˇ tsaˬ kʼoeˇ taˆ˗euˬ sahˬ paˬ deuˬ neh Huiˬ dui dui˗eu Baˬbuˇloˬ pyeuꞈ˗eu miˇ tsaˬ kʼoeˇ taˆ˗euˬ zahˇ kʼawꞈ dawˬ tawˆ luꞈ˗ahˇ laˆ cawˆ ngeh, buˬ˗iˇ ni caw ba nehˬ˗eu meh. (Pah mehˬ˗eu 17:16-18; 18:2, 4) Kʼoeˇ uˬ taꞈ Yeˬhawˇbaˬ aˬ yawꞈ˗euˬ tsawˇ haˬ deuˬ˗ahˇ Aˬmaˬgeˬdoˬ˗ahˇ dzeˇ luꞈ˗eu Saˬdaˬ˗euˬ miˇ tsaˬ˗ahˇ laˆ cawˆ ngeh jiˇ buˬ˗iˇ ni caw ba nehˬ˗eu meh.—Pah mehˬ˗eu 7:9, 10; 16:14, 16.

17. Aˬ dui Yeˬhawˇbaˬ nehˬ˗ehˇ aˬ myah luꞈ yaw gʼoeˇ gʼoeˇ lehˇ dehꞈ naˇ aˬ dui˗ahˇ aˬ jeˬ muiˬ˗eu nga?

¹⁷ Aˬ dui Yeˬhawˇbaˬ nehˬ˗ehˇ yaw gʼoeˇ gʼoeˇ˗ehˇ dehꞈ naˇ, Saˬdaˬ aˬ dui˗ahˇ aˬ myah luꞈ bi deuˬ gʼeh˗eu jeˬ˗ahˇ maˬ jahˇ laˇ nya˗a. Aˬ cawˬ maˬ ngeuˇ˗eu aˬ yawꞈ meh mˬ maˬ maˬ byaˆ zaˇ ziˇ bi laˆ cawˆ˗eu. (Loˇmaˆ 16:20) Teu miˇ neh, Miˬyehˇ neh biꞈ taˬ˗euˬ guiˇ deuˆ˗eu keu ka deuˬ˗ahˇ dm˗awˇ maˬ lehˆ ni jawˇ. Tiˬ gʼaˬ tehꞈ˗ehˇ taˬ teuˆ, mehˇ nmˇ deuˬ˗ahˇ caw ba. Kʼoeˇ naˇ Yeˬhawˇbaˬ neh sheuˬ gʼeh nehˬ laꞈ˗euˬ jeˬ˗ahˇ caw teh. Aˬ dui teu loꞈ˗ehˇ jahˇ naˇ mˬ taˆ jawˇ˗eu aˬ dui˗ahˇ gaˬ˗eu Aˬda aˬ dui˗ahˇ gʼaˬ biꞈ˗awˇ haw piˇ nehˬ˗eu yaw duˬ baw meh.—Iˇsaˬyaˇ 41:10.