“Tsawˇ haˬ˗euˬ Zaˬmaˇ zaꞈ ka le˗eu aˇ nah aˇ yamˬ naw maꞈ maˬ siˬ duˬ nya˗eu miˇ neh, yaw beuˇ beuˇ˗ehˇ dehꞈ˗awˬ.”—Maꞈtehˬ 25:13.

“Aˇ yamˬ kʼoeˇ aˬ geu ngeh keuˆ le˗eu naw maꞈ maˬ siˬ nya˗eu miˇ neh, yaw gahˇ gahˇ˗ehˇ dehꞈ˗awˇ, yaw beuˇ beuˇ˗ehˇ jawˇ˗awˬ.”—Maˬkuˆ 13:33.

Teu miˇ neh miˇ tsaˬ heu siˬ aˬ geu ngeh aˇ saˬ saˬ˗eu lehˇ tiˬ gʼaˬ˗iˬ yaw duˬ duˬ˗ehˇ maˬ siˬ nya˗a. Miˬyehˇ aˇ saˬ saˬ˗eu “aˇ nah aˇ yamˬ”˗ahˇ ‘aˬ geu ngeh bi keuˆ le˗eu’ lehˇ nah paˇ paˇ taˬ dzeuˇ˗euˬ meh. (Maꞈtehˬ 24:36) Toˆ˗ehˇ naˇ aˬ dui aˇ saˬ saˬ˗eu aˇ nah aˇ yamˬ aˬ geu ngeh keuˆ le˗eu lehˇ tiˬ jeˬ gʼeh neh˗iˬ maˬ siˬ nya˗a lehˇ ehˇ mawꞈ˗eu nga laˬ? Maˬ ngeuˇ˗a, Yeˬsuˇ zaˬ lahˇ deuˬ˗ahˇ aˇ saˬ saˬ˗eu aˇ nah aˇ yamˬ peh le luꞈ˗eu lehˇ aˬ jeˬ jeˇ˗ahˇ haw˗awˇ neh siˬ laˇ˗eu lehˇ ehˇ nehˬ˗euˬ meh.

‘Miˇ tsaˬ heu aˇ saˬ saˬ˗eu dawˬ peh peh laˇ˗euˬ’ lehˇ aˬ dui˗ahˇ bi siˬ laˇ˗eu gʼawˬ mya jeˬ jaˆ˗eu meh. Yeˬsuˇ “Miˇ kʼahˬ tiˬ kʼahˬ tiˇ kʼahˬ guiˇ deuˆ˗awˇ, tsawˇ jeuˬ tiˬ jeuˬ tiˇ jeuˬ ceh tehꞈ˗a. Mehꞈ˗eu shuꞈ˗eu jeˬ hawˇ˗eu miˇ luˆ luˆ˗eu jeˬ, yawˬ gaˇ na luꞈ keuˆ le tehꞈ˗a” lehˇ ehˇ˗eu meh. (Maꞈtehˬ 24:3, 7) Kʼoeˇ naˇ, “yaw jaw naˇ˗eu naˇ gawˇ gawˇ ma keuˆ le tehꞈ˗a” lehˇ jiˇ ehˇ˗eu meh. (Luˇkaꞈ 21:11) Nawˇ Yeˬsuˇ neh ehˇ taˬ˗euˬ loꞈ˗ehˇ pyeuꞈ laˇ gaˇ mawˇ maˬ loˇ?

Nymˬ˗mˇ iˬ nah˗euˬ tsawˇ haˬ deuˬ, guiˇ deuˆ˗eu, mehꞈ˗eu shuꞈ˗eu, miˇ luˆ luˆ˗eu, nyawˬ iˇ nya˗eu naˇ gawˇ gawˇ ma, heu deuˬ baˬ da neh shaˬ dui dui luꞈ˗eu meh. Yaw jeˬ ma jeˬ, 2004 kʼoꞈ˗ahˇ, Iˇdiˬ˗yaˬ Iˬ ma laˆ shaˆ˗ahˇ miˇ luˆ luˆ dui dui laˇ˗euˬ miˇ neh, suˬnaˇmiˬ pyeuꞈ laˇ˗awˇ, tsawˇ haˬ 225,000 gʼaˬ ehˇ gʼaˬ ni shiˇ˗euˬ meh. Kʼoeˇ uˬ taꞈ, Koˇbiˬ 19 naˇ gawˇ baˬ da neh tiˬ kʼoꞈ laꞈ kʼoeˇ tehꞈ˗ehˇ miˇ tsaˬ kʼoeˇ taˆ tsawˇ haˬ, nyiˬ lam koꞈ seh gʼaˬ ehˇ gʼaˬ ni shiˇ˗euˬ meh. Yeˬsuˇ gaˇ kawˆ heu deuˬ naˇ, miˇ tsaˬ heu aˇ saˬ saˬ˗eu dawˬ peh peh laˇ˗euˬ lehˇ bi siˬ˗eu jeˬ pyeuꞈ meh lehˇ ehˇ˗eu meh.

Miˇ tsaˬ heu siˬ maˬ bi laˆ cawˆ mi naˆ˗ehˇ˗euˬ aˇ yamˬ˗ahˇ, Jaˇliꞈ “aˇ saˬ saˬ˗eu aˇ nah aˇ yamˬ” lehˇ kuˇ taˬ˗euˬ meh. (2 Beˬtuˆluˆ 3:3, 4) 2 Tiˆmoˇseˬ 3:1-5-ahˇ, aˇ saˬ saˬ˗eu aˇ nah aˇ yamˬ˗ahˇ˗euˬ tsawˇ haˬ deuˬ, yaw tsaˬ yaw dawˇ dawˇ˗ehˇ maˬ dehꞈ˗a lehˇ ehˇ taˬ˗euˬ meh. (“ Aˇ saˬ maˬ saˬ mi naˆ˗ehˇ pyeuꞈ laˇ˗eu jeˬ” lehˇ ehˇ˗eu oeˬ coeˇ oeˬ bawˬ˗ahˇ haw.) Nymˬ˗mˇ iˬ nah yawˬ ha˗euˬ gʼaˇ duˬ tehꞈ˗ehˇ shaˇ noeˬ˗eu, nui kʼahˇ huiˬ˗eu, dawꞈ˗eu ceh˗eu sehꞈ˗eu, tiˬ gʼaˬ tiˇ gʼaˬ gʼawˬ shaˬ maˬ gaˬ˗eu, heu loꞈ˗ehˇ gʼeh˗eu tsawˇ haˬ tehꞈ˗ehˇ jawˇ luꞈ˗eu maˬ ngeuˇ nga loˇ? Heu deuˬ jiˇ aˬ dui miˇ tsaˬ heu aˇ saˬ saˬ˗eu dawˬ peh peh laˇ˗euˬ aˇ yamˬ˗ahˇ jawˇ luꞈ˗eu lehˇ bi siˬ laˇ˗eu jeˬ pyeuꞈ meh.

Aˇ saˬ saˬ˗eu aˇ nah aˇ yamˬ aˇ myah ni nga? “Aˇ yamˬ ui cuiˆ maˬ ngeuˇ naˇ maˬ paˇ jaˆ meh” lehˇ Jaˇliꞈ ehˇ˗eu meh. Gʼawˬ myahˇ maˬ gʼeh˗ehˇ Miˬyehˇ “miˇ tsaˬ˗ahˇ laˆ cawˆ˗eu deuˬ˗ahˇ laˆ cawˆ”˗eu meh.—Pah mehˬ˗eu 11:15-18; 12:12.

Miˬyehˇ haiˬ˗eu miˇ tsaˬ˗ahˇ aˬ geu ngeh laˆ cawˆ˗eu lehˇ nah paˇ paˇ taˬ dzeuˇ˗euˬ meh. (Maꞈtehˬ 24:36) Aˬ yawꞈ ‘tsawˇ haˬ tiˬ gʼaˬ˗iˬ maˬ bi luˬ maˬ bi seˇ˗iˇ mawꞈ˗a.’ Teu naˇ, laˬ kʼaˬ cehˇ laˇ paˬ˗ehˇ gʼeh˗eu meh. (2 Beˬtuˆluˆ 3:9) Miˬyehˇ tsawˇ haˬ zaˬ˗ahˇ aˬ yawꞈ˗euˬ zahˇ dawˬ˗ahˇ siˬ nya laˇ˗awˇ, dehꞈ caw nya ni aˇ yamˬ biꞈ nehˬ taˬ˗euˬ meh. Aˬ jeˬ miˇ neh ehˇ naˇ, aˬ yawꞈ miˇ tsaˬ heu siˬ˗ahˇ laˆ cawˆ ngeh, aˬ dui˗ahˇ bi buˬ bi law˗iˇ mawꞈ˗awˇ, miˇ shuiꞈ laꞈ kʼoeˇ muiˬ dui dui˗eu Baˬlaˬdiˇsuˆ˗ahˇ bi jawˇ mawꞈ˗eu miˇ neh meh.

Miˬyehˇ Miˇkʼahˬ uˆ lahˇ˗eu uˬ moˆ miˇ shuiꞈ˗ahˇ jawˇ nya ni aˬ joˆ˗ehˇ ya jahˇ˗eu lehˇ tsawˇ haˬ zaˬ˗ahˇ bi siˬ nya˗eu gʼaˇ duˬ, Miˬyehˇ miˇ tsaˬ kʼoeˇ taˆ jawˇ˗eu aˬ yawꞈ˗euˬ tsawˇ haˬ deuˬ˗ahˇ gaˇ kawˆ teu bi mehˬ iˇ˗euˬ meh. Yeˬsuˇ Miˬyehˇ Miˇkʼahˬ gaˇ kawˆ laˬ kʼaˬ cehˇ˗eu guiˬ lahˬ dawˬ “miˇ tsaˬ tahˬ kʼawˇ heu doe ni” tsaꞈ gaˬ tehꞈ˗a lehˇ ehˇ˗eu meh. (Maꞈtehˬ 24:14) 2019 kʼoꞈ˗ahˇ, miˇ kʼahˬ doe ni jawˇ˗eu Yeˬhawˇbaˬ˗euˬ Saˇ kiˇ deuˬ, Jaˇliꞈ laꞈ kʼoeˇ˗euˬ noeˬ tmˬ˗eu jeˬ biꞈ˗eu gaˇ kawˆ, naˬ liˬ nyiˬ heˇ lam laꞈ dzehˬ ni tsaꞈ gaˬ˗awˇ mehˬ˗euˬ meh. Tsaꞈ gaˬ˗eu gaˇ heu aˇ saˬ saˬ˗eu aˇ nah aˇ yamˬ maˬ keuˆ le mi naˆ˗ehˇ, miˇ kʼahˬ doe ni tsaꞈ gaˬ doe tehꞈ˗a lehˇ Yeˬsuˇ ehˇ˗eu meh.

Tsawˇ haˬ zaˬ uˆ lahˇ˗eu jeˬ aˇ saˬ saˬ˗eu keuˆ laˇ shaw˗iˬ meh. Ehˇ kʼawꞈ laˬ kʼaˬ cehˇ laˇ paˬ˗ehˇ gʼeh˗eu jeˬ naˇ, miˇ tsaˬ heu aˇ saˬ saˬ ngeh nawˇ buˬ˗iˇ law˗iˇ nya˗awˇ, Miˬyehˇ neh saˇ jaˇ dzaˬ taˬ˗euˬ muiˬ dui dui˗eu miˇ tsaˬ Baˬlaˬdiˇsuˆ˗ahˇ ya jawˇ˗eu meh. Miˇ shuiꞈ˗ahˇ jawˇ nya ni aˬ jeˬ ya jahˇ˗eu nga lehˇ nyaˆ taꞈ kawˆ˗ahˇ ja sawˇ ma.