Miˇ tsaˬ heu siˬ aˇ saˬ saˬ ngaˇ laˬ?
Miˇ tsaˬ heu aˇ saˬ saˬ meh lehˇ Jaˇliꞈ mehˬ˗eu jeˬ˗ahˇ nawˇ ya gaˬ haw˗euˬ paˬ. (1 Yoˇhaˬ 2:17) Heu naˇ, tsawˇ haˬ zaˬ dawˬ tawˆ luꞈ miˇ tsaˬ kʼoeˇ taˆ maˬ paˇ ya jawˇ gaˇ ehˇ mawꞈ˗eu nga laˬ? Miˇ tsaˬ kʼoeˇ taˆ dehꞈ˗eu jeˬ maˬ paˇ jawˇ ni, miˇ tsaˬ tiˬ siˬ siˬ lah ni˗ahˇ laˆ cawˆ gaˇ ehˇ mawꞈ˗eu nga loˇ?
Teu loꞈ˗ehˇ maˬ ngeuˇ˗a lehˇ Jaˇliꞈ mehˬ˗eu meh
Aˬ geu jeˬ˗ahˇ maˬ laˆ cawˆ˗eu nga?
Tsawˇ haˬ zaˬ
Jaˇliꞈ mehˬ˗eu jeˬ: Miˬyehˇ “miˇ tsaˬ˗ahˇ yawꞈ ngehꞈ˗ehˇ beh taˬ˗euˬ maˬ ngeuˇ˗ehˇ, tsawˇ haˬ bi jawˇ˗eu gʼaˇ duˬ beh˗euˬ meh.”—Iˇsaˬyaˇ 45:18.
Miˇ tsaˬ tahˬ kʼawˇ
Jaˇliꞈ mehˬ˗eu jeˬ: “Tiˬ ziˇ jiˇ˗awˇ tiˬ yehˆ juˬ kʼawꞈ, miˇ tsaˬ tahˬ kʼawˇ maˬ paˇ laˇ˗a.”—Dawˬtsoˆ 1:4.
Heu aˬ jeˬ˗ahˇ ehˇ mawꞈ˗eu nga?: Miˇ tsaˬ heu siˬ˗ahˇ tiˬ jawˇ˗iˬ maˬ laˆ cawˆ˗a. Tsawˇ haˬ zaˬ jiˇ aˬ myah luꞈ miˇ tsaˬ kʼoeˇ taˆ jawˇ gʼeh˗eu meh lehˇ Jaˇliꞈ mehˬ˗eu meh. Toˆ˗ehˇ naˇ miˇ tsaˬ heu aˇ saˬ saˬ˗eu lehˇ ehˇ˗eu heu naˇ, aˬ jeˬ˗ahˇ ehˇ mawꞈ˗eu nga?
Shaˇ noeˬ haw: Jaˇliꞈ miˇ tsaˬ heu aˇ saˬ saˬ˗eu jeˬ˗ahˇ Noˇaˬ˗euˬ saˇ ka˗ahˇ pyeuꞈ yaꞈ˗euˬ jeˬ nehˬ˗ehˇ sheu cehˆ taˬ˗euˬ meh. Teu ngeh miˇ tsaˬ kʼoeˇ taˆ ‘yaw haiˬ jeˬ tehꞈ˗ehˇ byah jiˇ taˬ˗euˬ meh.’ (Aˇdahˬbeh˗eu 6:13) Ehˇ kʼawꞈ Noˇaˬ naˇ, yaw tsaˬ yaw dawˇ dawˇ˗ehˇ dehꞈ˗eu miˇ neh, Miˬyehˇ yaw haiˬ yaw doeˇ deuˬ˗ahˇ laˆ cawˆ ngeh, Noˇaˬ pehˬ˗euˬ nymˇ jiˇ˗ahˇ bi buˬ bi law˗iˇ˗euˬ meh. Teu ngeh˗euˬ gaˇ kawˆ˗ahˇ Jaˇliꞈ heu loꞈ˗ehˇ ehˇ˗eu meh. “Iˇ cuꞈ bi dahˬ pymˬ˗eu laꞈ kʼoeˇ, iˇ cuꞈ˗ahˇ gʼoe˗awˇ miˇ tsaˬ heu˗ahˇ laˆ cawˆ˗euˬ” meh. (2 Beˬtuˆluˆ 3:6) Teu naˇ teu ngeh saˇ ka˗ahˇ˗euˬ miˇ tsaˬ aˇ saˬ saˬ˗euˬ jeˬ pyeuꞈ meh. Toˆ˗ehˇ naˇ aˬ jeˬ˗ahˇ laˆ cawˆ˗euˬ nga? Miˇ tsaˬ tahˬ kʼawˇ˗ahˇ maˬ ngeuˇ˗eu, haiˬ˗eu tsawˇ haˬ deuˬ˗ahˇ laˆ cawˆ˗euˬ meh. Teu miˇ neh Jaˇliꞈ miˇ tsaˬ heu aˇ saˬ saˬ˗eu lehˇ ehˇ ngeh, miˇ tsaˬ heu siˬ˗ahˇ laˆ cawˆ gaˇ ehˇ mawꞈ˗eu maˬ ngeuˇ˗a. Miˇ tsaˬ kʼoeˇ taˆ jawˇ˗eu yaw haiˬ yaw doeˇ deuˬ hawˇ˗eu maˬ muiˬ˗eu yawˬ jeˬ na luꞈ˗ahˇ laˆ cawˆ jiˇ gaˇ ehˇ mawꞈ˗eu meh.
Aˬ geu jeˬ˗ahˇ laˆ cawˆ˗eu lehˇ gʼeh˗eu nga?
Shaˬ˗eu zahˬ˗eu jeˬ hawˇ˗eu yaw haiˬ yaw doeˇ jeˬ
Jaˇliꞈ mehˬ˗eu jeˬ: “Aˇ yamˬ tiˬ kʼehˇ laˇ kʼehˬ laꞈ kʼoeˇ, haiˬ˗eu tsawˇ haˬ byoˆ jiˇ tehꞈ˗a. Aˬ yawꞈ maꞈ˗ahˇ nawˇ poˆ doe kʼawꞈ, iˇ zaˇ laˇ zaˇ maˬ paˇ siˬ meh. Nui nahˬ nui yu ahˇ˗eu deuˬ˗aˬ, miˇ kʼahˬ jeˬ biˇ oꞈ˗eu laꞈ kʼoeˇ, baw dui za dui dui le tehꞈ˗a.”—Ja ceuˬ 37:10, 11.
Heu aˬ jeˬ˗ahˇ ehˇ mawꞈ˗eu nga?: Noˇaˬ˗euˬ saˇ ka˗ahˇ iˇ cuꞈ dahˬ pymˬ laˇ ngeh, yaw haiˬ yaw doeˇ jeˬ˗ahˇ laˆ byoˆ tsehˆ tsehˆ˗euˬ maˬ ngeuˇ˗a. Iˇ cuꞈ dahˬ pymˬ laˇ gʼaˬ˗awˇ aˇ nah naˇ, yaw haiˬ yaw doeˇ deuˬ doˆ laˇ˗euˬ meh. Ehˇ kʼawꞈ gʼawˬ myahˇ maˬ gʼeh˗ehˇ yaw haiˬ yaw doeˇ deuˬ˗ahˇ Miˬyehˇ laˆ byoˆ jiˇ˗eu meh. “Haiˬ˗eu tsawˇ haˬ byoˆ jiˇ tehꞈ˗a” lehˇ ja ceuˬ sahˬ boꞈ boꞈ˗euˬ tiˬ gʼaˬ ehˇ˗eu meh. Miˬyehˇ aˬ yawꞈ˗euˬ Miˇkʼahˬ neh yaw haiˬ yaw doeˇ jeˬ˗ahˇ laˆ byoˆ jiˇ˗eu meh. Miˇkʼahˬ heu hmˬ naˇ mˬ kʼoeˇ taˆ jaˆ˗eu uˆ lahˇ˗eu aˇ maꞈ pyeuꞈ˗awˇ, miˇ tsaˬ kʼoeˇ taˆ jawˇ˗eu Miˬyehˇ ehˇ dawˬ naˇ haˬ˗eu deuˬ˗ahˇ uˆ lahˇ˗eu meh.
Shaˇ noeˬ haw: Miˇ tsaˬ kʼoeˇ taˆ˗euˬ sahˬ paˬ sahˬ ma deuˬ Miˬyehˇ Miˇkʼahˬ˗ahˇ gʼaˬ biꞈ ngaˇ laˬ? Gʼaˬ maˬ biꞈ˗eu uˬ taꞈ, yaw kʼaˆ˗ehˇ laˆ tsoeˬ˗eu meh lehˇ Jaˇliꞈ ehˇ˗eu meh. (Ja ceuˬ 2:2) Teu miˇ neh aˬ jeˬ jahˇ˗eu nga? Miˬyehˇ Miˇkʼahˬ tsawˇ haˬ zaˬ uˆ lahˇ˗eu jeˬ dawˬ tawˆ luꞈ˗ahˇ laˆ cawˆ jiˇ˗awˇ, Miˬyehˇ Miˇkʼahˬ tehꞈ˗ehˇ “mˬ maˬ maˬ byaˆ zaˇ ziˇ ziꞈ”˗eu meh. (Daˬyeˬlaˇ 2:44) Tsawˇ haˬ zaˬ uˆ lahˇ˗eu jeˬ˗ahˇ aˬ jeˬ miˇ neh laˆ cawˆ˗eu nga?
Tsawˇ haˬ zaˬ uˆ lahˇ˗eu jeˬ˗ahˇ aˇ saˬ ya bi saˬ
Jaˇliꞈ mehˬ˗eu jeˬ: ‘Tsawˇ haˬ zaˬ yaw dehꞈ dehꞈ˗eu˗aˬ, yawˬ ha˗euˬ gaˇ kawˆ yawˬ ha maˬ gʼaˬ leˇ˗ehˇ, yawˬ ha˗euˬ saꞈ laˇ˗ahˇ maˬ tuˆ tehꞈ nya˗a.’—Yeˬlaˬmiˇ 10:23.
Heu aˬ jeˬ˗ahˇ ehˇ mawꞈ˗eu nga?: Tsawˇ haˬ zaˬ˗ahˇ yawˬ haˇ yawˬ ha bi uˆ lahˇ˗eu lehˇ beh˗euˬ maˬ ngeuˇ˗a. Tsawˇ haˬ cawˬ cawˬ uˆ lahˇ˗eu heu, tiˬ gʼaˬ tiˇ gʼaˬ laˆ shaˬ˗awˇ shaˬ zahˬ˗ahˇ jiˇ maˬ laˆ piˇ nya˗a.
Shaˇ noeˬ haw: Sahˬ paˬ sahˬ ma deuˬ “Iˇ shaˬ shaˬ˗eu jeˬ, mehꞈ˗eu shuꞈ˗eu jeˬ, naˇ˗eu gawˇ˗eu jeˬ, uˬ jeˬ jaˬ lehˇ˗euˬ shaˬ zahˬ, guiˇ deuˆ˗eu jeˬ, yaw haiˬ yaw doeˇ jeˬ, heu deuˬ˗ahˇ maˬ laˆ byoˆ nehˬ nya˗a” lehˇ paˇ dmˬ tiˬ dmˬ˗ahˇ ehˇ taˬ˗euˬ meh. (Britannica Academic) “Tiˬ deuˬ na miˇ tsaˬ tiˬ siˬ siˬ lah ni˗ahˇ uˆ lahˇ˗eu aˇ maꞈ tiˬ maꞈ tehꞈ˗ehˇ uˆ lahˇ naˇ, shaˬ zahˬ dawˬ tawˆ luꞈ˗ahˇ laˆ byoˆ jiˇ nehˬ nya meh lehˇ jah˗eu meh” lehˇ jiˇ paˇ ehˇ taˬ˗euˬ meh. Ehˇ kʼawꞈ sahˬ paˬ sahˬ ma dawˬ tawˆ luꞈ gm leˇ˗awˇ paˇ uˆ lahˇ˗euˬ kʼawꞈ, maˬ byah kuꞈ˗eu tsawˇ haˬ pyeuꞈ˗eu miˇ neh, shaˬ zahˬ dawˬ tawˆ luꞈ˗ahˇ maˬ laˆ byoˆ nehˬ nya˗a. Miˬyehˇ Miˇkʼahˬ tehꞈ˗ehˇ tsawˇ haˬ zaˬ˗euˬ shaˬ zahˬ dawˬ tawˆ luꞈ˗ahˇ laˆ byoˆ nehˬ jiˇ nya˗eu baoˬ ahˇ˗eu meh.
Jaˇliꞈ mehˬ˗eu jeˬ˗ahˇ haw ngeh miˇ tsaˬ heu aˇ saˬ saˬ˗eu lehˇ ehˇ˗eu heu naˇ, yaw haiˬ yaw doeˇ jeˬ aˇ saˬ saˬ gaˇ ehˇ mawꞈ˗eu meh. Teu miˇ neh tsawˇ muiˬ deuˬ miˇ tsaˬ heu aˇ saˬ saˬ gaˇ guˆ˗eu maˬ loˬ˗a. Aˬ yawꞈ maꞈ teu loꞈ˗ehˇ pyeuꞈ laˇ gaˇ dawˬ paˬ˗ehˇ gʼeh˗eu meh. Aˬ jeˬ miˇ neh ehˇ naˇ, miˇ tsaˬ yaw oeˇ siˬ˗ahˇ laˆ cawˆ˗awˇ, laˬ kʼaˬ cehˇ nui saˇ oꞈ˗eu jeˬ tehꞈ˗ehˇ jaˆ˗eu miˇ shuiꞈ jaˆ laˇ˗eu miˇ neh meh.
Teu aˬ geu ngeh pyeuꞈ laˇ˗eu nga? Jaˇliꞈ aˬ joˆ˗ehˇ mehˬ˗eu nga lehˇ nyaˆ taꞈ kawˆ˗ahˇ ja sawˇ nehˬ taˬ˗euˬ meh.
