Muiˬ dui dui˗eu miˇ shuiꞈ keuˆ le luꞈ
Miˬyehˇ yaw tsaˬ yaw dawˇ dawˇ˗ehˇ dehꞈ˗eu deuˬ˗ahˇ mˬ maˬ maˬ byaˆ zaˇ ziˇ bi jawˇ˗eu gʼaˇ duˬ, miˇ tsaˬ heu siˬ˗ahˇ beh˗euˬ meh. (Ja ceuˬ 37:29) Aˬ yawꞈ dahˬ beh˗euˬ nyiꞈ dzeˇ zaˬ pyeuꞈ˗eu Aˬdaˬ hawˇ˗eu Eˇbaˆ˗ahˇ muiˬ dui dui˗eu Eˬdeˬ ya kmˇ˗ahˇ bi jawˇ˗awˇ, aˬ yawꞈ nyaꞈ hawˇ˗eu aˬ yawꞈ nyaꞈ˗ahˇ neh jeuˬ le˗euˬ zaˬ deuˬ˗ahˇ miˇ tsaˬ heu siˬ˗ahˇ bi ngehˬ gʼeh bi haw piˇ˗eu lehˇ noeˬ taˬ˗euˬ meh.—Aˇdahˬbeh˗eu 1:28; 2:15.
Nymˬ˗mˇ iˬ nah miˇ tsaˬ heu siˬ Miˬyehˇ neh noeˬ taˬ˗euˬ loꞈ˗ehˇ maˬ pyeuꞈ˗a. Ehˇ kʼawꞈ Miˬyehˇ neh noeˬ taˬ˗euˬ jeˬ maˬ paˇ iˇ˗aˬ siˬ. Miˬyehˇ yaw beh aˬ yawꞈ neh noeˬ taˬ˗euˬ jeˬ˗ahˇ aˬ joˆ˗ehˇ mˇ byah˗eu nga? Miˬyehˇ miˇ tsaˬ heu siˬ˗ahˇ maˬ laˆ cawˆ˗a lehˇ dzeuˇ yaꞈ˗euˬ kawˆ˗ahˇ aˬ dui ya siˬ˗euˬ ma. Aˬ yawꞈ saˇ jaˇ ziꞈ˗eu tsawˇ haˬ deuˬ˗ahˇ miˇ tsaˬ kʼoeˇ taˆ aˬ myah luꞈ bi jawˇ˗eu meh. Miˬyehˇ neh noeˬ taˬ˗euˬ jeˬ byah laˇ ngeh, miˇ tsaˬ heu siˬ aˬ joˆ˗ehˇ gʼeh˗eu nga?
Uˆ lahˇ˗eu aˇ maꞈ tiˬ maꞈ tehꞈ˗ehˇ miˇ tsaˬ tiˬ siˬ siˬ lah ni˗ahˇ uˆ lahˇ
Gʼawˬ myahˇ maˬ gʼeh˗ehˇ mˬ taˆ jaˆ˗eu Miˬyehˇ Miˇkʼahˬ tsawˇ haˬ zaˬ˗ahˇ uˆ lahˇ le ngeh, miˇ tsaˬ kʼoeˇ taˆ laˬ kʼaˬ cehˇ nui saˇ oꞈ˗eu jeˬ tehꞈ˗ehˇ jaˆ˗eu meh. Teu ngeh yawˬ gʼaˬ na luꞈ mehˬ bawˬ gm˗awˇ yawˬ ha ya leˇ˗eu gaˇ ya mˇ˗eu meh. Miˬyehˇ miˇ tsaˬ heu siˬ˗ahˇ bi uˆ lahˇ˗eu gʼaˇ duˬ, Yeˬsuˇ˗ahˇ tseˇ taˬ˗euˬ meh. Yeˬsuˇ nymˬ˗mˇ iˬ nah˗euˬ sahˬ paˬ sahˬ ma deuˬ nehˬ˗ehˇ maˬ duˇ˗a. Aˬ yawꞈ˗euˬ uˆ lahˇ˗eu uˬ moˆ jawˇ˗eu deuˬ˗ahˇ yaw muiˬ˗ehˇ ngehˬ gʼeh haw piˇ nehˬ˗eu meh. Yeˬsuˇ uˆ lahˇ˗eu jeˬ nui gaˬ˗ahˇ dawˬ pehˬ taˬ˗awˇ, aˬ yawꞈ˗aˬ nui ma muiˬ˗awˇ gʼawˬ shaˬ gaˬ˗eu uˬ taꞈ, yaw tsaˬ yaw dawˇ dawˇ˗ehˇ uˆ lahˇ˗eu Sahˬ paˬ pyeuꞈ meh.—Iˇsaˬyaˇ 11:4.
Miˇ tsaˬ tiˬ siˬ siˬ lah ni mehˬ bawˬ gm
Miˇ shuiꞈ˗ahˇ tsawˇ jeuˬ tsawˇ ca maˬ paˇ tseˇ paˆ meh. Yawˬ gʼaˬ na luꞈ mehˬ bawˬ gm˗awˇ tsawˇ jeuˬ tiˬ jeuˬ loꞈ˗ehˇ tehꞈ˗ehˇ pyeuꞈ laˇ˗eu meh. (Pah mehˬ˗eu 7:9, 10) Teu ngeh tsawˇ haˬ yawˬ gʼaˬ na luꞈ Miˬyehˇ˗ahˇ gaˬ˗awˇ, tiˬ gʼaˬ tiˇ gʼaˬ jiˇ gaˬ˗eu meh. Aˬ yawꞈ maꞈ mehˬ bawˬ gm˗eu laꞈ kʼoeˇ Miˬyehˇ neh yaw beh noeˬ taˬ˗euˬ loꞈ˗ehˇ, miˇ tsaˬ heu siˬ˗ahˇ tiˬ kawˆ loꞈ˗ehˇ ngehˬ gʼeh bo saˆ˗eu meh.—Ja ceuˬ 115:16.
Uˬ jeˬ jaˬ lehˇ shawˇ jehˆ ni gʼeh˗awˇ, sahˬ lahˬ aˇ bawˇ tiˬ byah tiˬ loꞈ dehꞈ
Miˬyehˇ Miˇkʼahˇ miˇ tsaˬ˗ahˇ uˆ lahˇ le ngeh Beh˗euˬ yaw sahˇ pyeuꞈ˗eu Miˬyehˇ uˬ jeˬ jaˬ lehˇ muiˬ daˆ laˇ ni jahˇ˗awˇ, yawˬ jeˬ na luꞈ˗ahˇ yaw tsaˬ tsaˬ˗ehˇ bi jaˆ˗eu meh. (Ja ceuˬ 24:1, 2) Yeˬsuˇ miˇ tsaˬ kʼoeˇ taˆ jawˇ ngeh, jaˬ lehˇ lehˇ ma˗ahˇ Miˬyehˇ neh biꞈ˗euˬ baoˬ neh laˆ naˬ nya˗euˬ meh. Teu naˇ uˬ jeˬ jaˬ lehˇ˗ahˇ Miˬyehˇ nyehꞈ tehˬ nya ngaˇ lehˇ siˬ laˇ˗eu meh. (Maˬkuˆ 4:39, 41) Teu miˇ neh Yeˬsuˇ uˆ lahˇ˗eu uˬ moˆ jawˇ˗eu deuˬ, uˬ jeˬ jaˬ lehˇ˗euˬ shaˬ zahˬ˗ahˇ guˆ˗eu maˬ paˇ loˬ meh. Miˬyehˇ Miˇkʼahˬ uˆ lahˇ le ngeh, tsawˇ haˬ hawˇ˗eu jeˬ zaˬ tiˬ kawˆ loꞈ˗ehˇ jawˇ nya˗awˇ, tsawˇ haˬ zaˬ jiˇ sahˬ lahˬ aˇ bawˇ˗ahˇ maˬ paˇ laˆ cawˆ meh.—Hawˇseˬ 2:18.
Yaw muiˬ jawˇ saˇ doˆ˗awˇ, dzaˬ dzaˬ dawˇ dawˇ tiˬ byah tiˬ loꞈ jaˆ
Yawˬ gʼaˬ na luꞈ yaw muiˬ jawˇ saˇ doˆ˗awˇ, naˇ˗eu gawˇ˗eu jeˬ, mawˬ iˇ˗eu jeˬ, shiˇ˗eu jeˬ maˬ paˇ jaˆ meh. (Iˇsaˬyaˇ 35:5, 6) Tsawˇ haˬ deuˬ Aˬdaˬ hawˇ˗eu Eˇbaˆ neh jawˇ˗euˬ Eˬdeˬ ya kmˇ loꞈ˗ehˇ gʼeh gaˇ muiˬ dui shawˇ dui dui˗eu miˇ tsaˬ kʼoeˇ taˆ laˬ kʼaˬ tiˬ cehˇ ya jawˇ˗eu meh. Miˇ shuiꞈ˗ahˇ Eˬdeˬ ya kmˇ loꞈ˗ehˇ dzaˬ la gʼo cehˇ dehꞈ laˇ mehˇ laˇ˗awˇ, maˬ dzaˬ maˬ dawˇ jiˇ coeˇ ni jaˆ˗eu meh. (Aˇdahˬbeh˗eu 2:9) Gaˇ hu Miˬyehˇ˗euˬ tsawˇ haˬ pyeuꞈ˗eu Iˇsaˬleˬlaˆ deuˬ loꞈ˗ehˇ, Baˬlaˬdiˇsuˆ˗ahˇ jawˇ˗eu yawˬ gʼaˬ na luꞈ “yawˬ ha kʼaˇ dzaˬ mawꞈ˗eu jeˬ tiˬ byah tiˬ loꞈ jaˆ” meh.—Uˬduˬtahˬ˗eu 26:4, 5.
Maˇ diˇ nui saˇ oꞈ˗awˇ guˆ kʼaˇ maˬ za
Miˬyehˇ Miˇkʼahˬ uˆ lahˇ˗eu uˬ moˆ jawˇ˗eu tsawˇ haˬ yawˬ gʼaˬ na luꞈ, tsaˬ leˇ dzoeˇ leˇ˗awˇ tiˬ gʼaˬ tiˇ gʼaˬ gʼawˬ shaˬ gaˬ˗eu uˬ taꞈ, myaˆ pyawˬ huiˬ nyiˇ maˬ tseˇ˗a. Guiˇ deuˆ˗eu jeˬ, nawˬ dzaˬ kʼaˆ dzaˬ˗eu jeˬ maˬ paˇ jaˆ meh. Mˇ dzaˬ kʼawꞈ dawˇ˗eu gʼaˇ duˬ jiˇ kʼahˬ lahˇ˗eu maˬ paˇ loˬ meh. ‘Tsawˇ haˬ zaˬ yawˬ gʼaˬ na luꞈ, yawˬ ha˗euˬ aˬ gaꞈ baw duˆ uˬ moˆ, yawˬ ha˗euˬ siˬ guˬ aˇ bawˇ uˬ moˆ, nui saˇ oꞈ˗awˇ ya nuiˇ meh’ lehˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ meh.—Miˇkaˬ 4:3, 4.
Yawˬ gʼaˬ na luꞈ yawˬ ha˗euˬ iˇ kahˇ baw˗awˇ, yawˬ ha mˇ mawꞈ˗eu gaˇ ya mˇ
Nymˇ jiˇ yawˬ jiˇ na luꞈ jawˇ duˬ jawˇ zaˇ yaw ziꞈ ziꞈ˗ehˇ maˬ jaˆ nya lehˇ kʼahˬ lahˇ˗eu maˬ paˇ loˬ meh. Teu ngeh aˬ dui neh leh jeh˗awˇ mˇ˗euˬ jeˬ yawˬ ngehꞈ˗ehˇ maˬ paˇ pyeuꞈ meh. Miˇ shuiꞈ˗ahˇ jawˇ˗eu deuˬ neh “kʼaˇ mˇ˗euˬ jeˬ guiˬ lahˬ baw” meh lehˇ Jaˇliꞈ ehˇ˗eu meh.—Iˇsaˬyaˇ 65:21-23.
Kʼaˇ muiˬ˗eu zaˬ siˬ nui gahˇ ya dzaw
“Sahˬpaˬ Miˬyehˇ˗ahˇ siˬ nya˗eu jeˬ, miˇ tsaˬ kʼoeˇ taˆ byah” meh lehˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ meh. (Iˇsaˬyaˇ 11:9) Miˬyehˇ Miˇkʼahˬ uˆ lahˇ˗eu uˬ moˆ jawˇ˗eu deuˬ, maˬ ehˇ jiˇ coeˇ ni jaˆ˗eu Beh˗euˬ yaw sahˇ pyeuꞈ˗eu Yeˬhawˇbaˬ˗euˬ gaˇ kawˆ˗ahˇ dzaw˗awˇ, aˬ yawꞈ neh beh taˬ˗euˬ jeˬ˗euˬ gaˇ kawˆ˗ahˇ jiˇ dzaw˗eu meh. Aˬ yawꞈ maꞈ yawˬ ha˗euˬ zaˬ siˬ nui gahˇ˗ahˇ guiˇ deuˆ˗eu keu ka jahˇ gaˇ maˬ ehˇ, tsawˇ haˬ˗ahˇ laˆ deuˬ laˆ naˇ˗eu jeˬ jahˇ gaˇ maˬ ehˇ, maˬ paˇ zmˬ meh. (Iˇsaˬyaˇ 2:4) Aˬ yawꞈ maꞈ tiˬ kawˆ loꞈ˗ehˇ mehˬ bawˬ gm gm˗ehˇ jawˇ˗awˇ, miˇ tsaˬ heu siˬ˗ahˇ yaw muiˬ˗ehˇ ngehˬ gʼeh nya˗eu zaˬ siˬ nui gahˇ deuˬ dzaw˗eu meh.—Ja ceuˬ 37:11.
Mˬ maˬ maˬ byaˆ zaˇ ziˇ ya dehꞈ
Miˬyehˇ aˬ dui˗ahˇ yawˬ nah na luꞈ laˬ kʼaˬ tiˬ cehˇ bi dehꞈ˗eu gʼaˇ duˬ, miˇ tsaˬ heu siˬ˗ahˇ yaw muiˬ˗ehˇ beh nehˬ taˬ˗awˇ, tsawˇ haˬ zaˬ˗ahˇ mˬ maˬ maˬ byaˆ zaˇ ziˇ bi jawˇ ma lehˇ noeˬ taˬ˗euˬ meh. (Ja ceuˬ 37:29; Iˇsaˬyaˇ 45:18) Miˬyehˇ aˬ yawꞈ neh yaw beh noeˬ taˬ˗euˬ jeˬ˗ahˇ mˇ byah˗eu gʼaˇ duˬ, ‘shiˇ˗eu jeˬ˗ahˇ mˬ maˬ maˬ byaˆ zaˇ ziˇ laˆ cawˆ˗eu’ meh. (Iˇsaˬyaˇ 25:8) “Shiˇ˗eu jeˬ maˬ paˇ jaˆ˗ehˇ, noeˬ shaˬ noeˬ zahˬ˗eu jeˬ, ngoeˇ˗eu jeˬ hawˇ˗eu, naˇ˗eu gawˇ˗eu jeˬ maˬ paˇ jaˆ meh” lehˇ Jaˇliꞈ laꞈ kʼoeˇ saˇ jaˇ dzaˬ taˬ˗euˬ meh. (Pah mehˬ˗eu 21:4) Miˬyehˇ haiˬ˗eu miˇ tsaˬ˗ahˇ laˆ cawˆ ngeh buˬ iˇ˗euˬ deuˬ˗ahˇ maˬ ehˇ, miˇ shuiꞈ˗ahˇ aˬ yawꞈ neh bi gʼoꞈ dehꞈ laˇ˗euˬ deuˬ˗ahˇ maˬ ehˇ, yawˬ gʼaˬ na luꞈ˗ahˇ miˇ tsaˬ kʼoeˇ taˆ mˬ maˬ maˬ byaˆ zaˇ ziˇ bi dehꞈ˗eu meh.—Yoˇhaˬ 5:28, 29; Gʼaˬkʼehˇ 24:15.
Miˇ kʼahˬ doe ni jawˇ˗eu tsawˇ haˬ gʼawˬ mya lam gʼaˬ, keuˆ le luꞈ˗eu miˇ shuiꞈ˗ahˇ jawˇ nya ni nymˬ˗mˇ neh lehˬ hmˬ luꞈ˗eu meh. Aˬ yawꞈ maꞈ maˬ byah kuꞈ˗eu tsawˇ haˬ pyeuꞈ kʼawꞈ, miˇ shuiꞈ˗ahˇ Miˬyehˇ bi jawˇ leˇ mawꞈ˗eu tiˬ gʼaˬ pyeuꞈ nya ni leh jeh luꞈ˗eu meh. Aˬ joˆ˗ehˇ leh jeh luꞈ˗eu nga? Aˬ yawꞈ maꞈ Yeˬhawˇbaˬ Miˬyehˇ˗euˬ gaˇ kawˆ hawˇ˗eu aˬ yawꞈ neh kʼehˇ gʼeh leꞈ˗euˬ Yeˬsuˇ Ka li˗euˬ gaˇ kawˆ˗ahˇ siˬ nya laˇ ni leh jeh luꞈ˗eu meh.—Yoˇhaˬ 17:3.
Miˇ tsaˬ heu aˇ saˬ saˬ ngeh nawˇ buˬ˗iˇ law˗iˇ˗awˇ, muiˬ dzehˬ˗eu miˇ tsaˬ˗ahˇ jawˇ leˇ nya˗eu gʼaˇ duˬ aˬ joˆ˗ehˇ ya jahˇ˗eu nga lehˇ heu naˆ maˬ tseˇ siˬ nya mawꞈ naˇ, pyuˇ maˬ jiˇ ni Yeˬhawˇbaˬ˗euˬ Saˇ kiˇ tiˬ gʼaˬ nehˬ˗ehˇ Jaˇliꞈ dzaw nya meh. Maˬ ngeuˇ naˇ jw.org gʼoeˇsaiˇ laꞈ kʼoeˇ ahˇ leˇ˗awˇ neh jiˇ Jaˇliꞈ shaˇ dzaw nya meh.
You May Also Like
LOꞈ˗EU NYMˇGOˇ
Miˬyehˇ˗euˬ Miˇkʼahˬ aˬ jeˬ jeˇ jahˇ˗eu nga?
Yeˬsuˇ Miˬyehˇ˗euˬ Miˇkʼahˬ tehꞈ˗ehˇ miˇ tsaˬ kʼoeˇ taˆ˗euˬ shaˬ zahˬ˗ahˇ laˆ piˇ nehˬ nya meh lehˇ siˬ nya˗eu meh. Aˬ dui teu˗ahˇ jah nya ni Miˬyehˇ˗euˬ Miˇkʼahˬ aˬ jeˬ jeˇ mˇ byah dzeuˇ˗euˬ nga?
