Pawˇluˆ “Ngaˇ˗aˬ zahˇ dawˬ kʼoꞈ dawˬ˗ahˇ taꞈ leˇ˗awˇ shiˇ gʼaˬ˗euˬ tsawˇ haˬ ma. Miˬyehˇ˗euˬ gʼaˇ duˬ dehꞈ nya ni zahˇ dawˬ kʼoꞈ dawˬ neh bi sehꞈ˗euˬ tsawˇ haˬ ma. Ngaˇ˗aˬ, Ka li nehˬ˗ehˇ laꞈ yaꞈ kʼoeˇ taˆ kamˇ shiˇ gʼaˬ˗euˬ ma” lehˇ boꞈ taˬ˗euˬ meh.—Gaˬlaˬtiˆ 2:19.

Pawˇluˆ neh ngehˬ˗euˬ dawˬ teu naˇ Gaˬlaˬtiˆ˗ahˇ˗euˬ aˇ muˇ deuˬ˗ahˇ boꞈ nehˬ˗euˬ aˇ yeˇ huiˬ˗eu kawˆ nehˬ˗ehˇ tsaˬ˗eu meh. Teu ngeh tiˬ deuˬ na ka kʼoꞈ˗eu jeˬ˗ahˇ za˗eu gʼaˇ duˬ, Moˇseˬ˗euˬ zahˇ dawˬ kʼoꞈ dawˬ˗ahˇ ya mˇ caw meh leh mehˬ˗eu meh. Ba kʼoˆ mehˬ dzaˬ yehˬ˗eu gaˇ kawˆ˗ahˇ ngehˬ˗ehˇ dzehˬ ya mˇ caw meh lehˇ mehˬ˗eu meh. Teu naˇ mehˇ nmˇ tiˬ deuˬ na˗ahˇ jiˇ deuˬ˗eu meh. Ehˇ kʼawꞈ Pawˇluˆ naˇ Miˬyehˇ ba kʼoˆ mehˬ dzaˬ yehˬ lehˇ maˬ paˇ shaˇ mehˬ lehˇ siˬ nya˗eu meh. Pawˇluˆ teu loꞈ˗ehˇ mehˬ˗eu jeˬ teu naˇ, mehˬ bahˬ˗eu jeˬ pyeuꞈ˗eu lehˇ maˇ jawˆ ni toeˬ mehˬ˗awˇ aˬ yawꞈ mehˇ nmˇ deuˬ˗ahˇ Yeˬsuˇ Ka li˗euˬ ka kʼoꞈ˗eu jeˬ˗ahˇ jah ziꞈ laˇ ni caw ba nehˬ˗eu meh.—Gaˬlaˬtiˆ 2:4; 5:2.

Jaˇliꞈ˗ahˇ tsawˇ haˬ tiˬ gʼaˬ shiˇ naˇ tiˬ jeˬ˗iˬ maˬ paˇ noeˬ meh lehˇ maˇ jawˆ ni ehˇ taˬ˗euˬ meh. (Dawˬtsoˆ 9:5) Teu miˇ neh Pawˇluˆ “Ngaˇ˗aˬ zahˇ dawˬ kʼoꞈ dawˬ˗ahˇ taꞈ leˇ˗awˇ shiˇ gʼaˬ˗euˬ tsawˇ haˬ ma” lehˇ ehˇ˗eu teu naˇ, aˬ yawꞈ Moˇseˬ˗euˬ zahˇ dawˬ kʼoꞈ dawˬ˗ahˇ maˬ paˇ taꞈ ma lehˇ ehˇ mawꞈ˗eu jeˬ pyeuꞈ meh. Kʼoeˇ uˬ taꞈ, Pawˇluˆ ka kʼoꞈ˗eu jeˬ˗ahˇ jah˗eu miˇ neh “Miˬyehˇ˗euˬ gʼaˇ duˬ” lehˇ jah ziꞈ˗eu meh.

Pawˇluˆ zahˇ dawˬ kʼoꞈ dawˬ˗ahˇ neh aˬ joˆ˗ehˇ paˇ˗iˇ˗euˬ nga? Pawˇluˆ “tsawˇ haˬ tiˬ gʼaˬ˗aˬ, zahˇ dawˬ kʼoꞈ dawˬ˗ahˇ mˇ byah˗eu miˇ neh maˬ ngeuˇ˗ehˇ, Yeˬsuˇ Ka li˗ahˇ jah˗eu baˬ da neh tehꞈ˗ehˇ Miˬyehˇ˗ahˇ tsaˬ leˇ tsahˇ leˇ nya˗eu meh lehˇ aˬ dui siˬ nya ma” lehˇ ehˇ˗eu meh. (Gaˬlaˬtiˆ 2:16) Zahˇ dawˬ kʼoꞈ dawˬ heu aˇ yeˇ huiˬ˗eu jeˬ mˇ byah yaꞈ˗euˬ meh. Pawˇluˆ Gaˬlaˬtiˆ˗euˬ mehˇ nmˇ deuˬ˗ahˇ ‘Zahˇ dawˬ kʼoꞈ dawˬ teu naˇ, mˇ lehˬ˗euˬ jeˬ˗ahˇ bi siˬ nya˗eu gʼaˇ duˬ biꞈ lahˬ laꞈ˗euˬ jeˬ pyeuꞈ˗awˇ, Miˬyehˇ neh saˇ jaˇ dzaˬ taˬ˗euˬ gʼaˬ pyeuꞈ˗eu Aˬbyaˬhaˬ˗euˬ zaˬ kʼoeˇ gʼaˬ oe keuˆ ngeh keuˆ ni bi zmˬ˗eu gʼaˇ duˬ biꞈ taˬ˗euˬ jeˬ pyeuꞈ˗eu meh’ lehˇ dzawˇ nehˬ˗euˬ meh. (Gaˬlaˬtiˆ 3:19) Zahˇ dawˬ kʼoꞈ dawˬ teu˗ahˇ haw ngeh maˬ byah kuꞈ˗eu iˬ baˇ zaˬ deuˬ zahˇ dawˬ teu˗ahˇ maˬ mˇ caw nya˗eu lehˇ siˬ laˇ˗awˇ, tiˬ poˆ tehꞈ˗ehˇ lawˇ˗awˇ neh jiˇ˗eu byah kuˆ˗eu lawˇ˗eu jeˬ loˬ˗eu lehˇ siˬ laˇ˗eu meh. Zahˇ dawˬ kʼoꞈ dawˬ teu Yeˬsuˇ naˇ “Miˬyehˇ neh saˇ jaˇ dzaˬ taˬ˗euˬ gʼaˬ pyeuꞈ˗eu Aˬbyaˬhaˬ˗euˬ zaˬ kʼoeˇ gʼaˬ” meh lehˇ siˬ nya ni caw ba nehˬ˗eu meh. Teu miˇ neh tsawˇ haˬ tiˬ gʼaˬ Yeˬsuˇ Ka li˗ahˇ jah˗eu baˬ da neh yawˬ tsaˬ yaw dawˇ tsawˇ haˬ pyeuꞈ laˇ˗eu meh. (Gaˬlaˬtiˆ 3:24) Zahˇ dawˬ kʼoꞈ dawˬ teu˗euˬ baˬ da neh Pawˇluˆ Yeˬsuˇ˗ahˇ jah laˇ˗awˇ, yaw tsaˬ yaw dawˇ tsawˇ haˬ pyeuꞈ laˇ˗euˬ meh. Pawˇluˆ “zahˇ dawˬ kʼoꞈ dawˬ˗ahˇ taꞈ leˇ˗awˇ” shiˇ˗awˇ “Miˬyehˇ˗euˬ gʼaˇ duˬ dehꞈ nya laˇ˗euˬ meh.” Pawˇluˆ zahˇ dawˬ kʼoꞈ dawˬ uˬ moˆ maˬ paˇ jawˇ niˇ Miˬyehˇ˗euˬ uˬ moˆ jawˇ˗iˇ shaw˗euˬ meh.

Loˇmaˆ˗euˬ aˇ muˇ˗ahˇ boꞈ gʼeh˗euˬ sahˬ boꞈ laꞈ kʼoeˇ kʼawꞈ Pawˇluˆ teu loꞈ˗ehˇ dzawˇ nehˬ taˬ˗euˬ meh. Pawˇluˆ ‘Aˬ yuiꞈ aˬ nyiˇ Ka li zaˬ deuˬ˗oˇ, naw maꞈ zahˇ dawˬ kʼoꞈ dawˬ˗ahˇ taꞈ leˇ˗eu jeˬ laꞈ kʼoeˇ, naw maꞈ shiˇ dzeuˇ jiˇ˗euˬ gaˇ duˇ˗eu meh. Aˬ jeˬ miˇ neh ehˇ naˇ, naw maꞈ Yeˬsuˇ Ka li˗euˬ gʼawˇ mawˇ˗ahˇ taꞈ leˇ gʼaˬ˗euˬ meh. Nymˬ˗mˇ poˆ jawˇ˗aˬ, zahˇ dawˬ kʼoꞈ dawˬ uˬ moˆ aˬ dui buˬ˗iˇ law˗iˇ gʼaˬ˗euˬ ma. Aˬ jeˬ miˇ neh ehˇ naˇ, dzeuˇ laˇ ngeh aˬ dui˗ahˇ paꞈ tawꞈ taˬ˗euˬ jeˬ˗ahˇ aˬ dui shiˇ dzeuˇ˗euˬ ma’ lehˇ boꞈ nehˬ˗euˬ meh. (Loˇmaˆ 7:4, 6) Jaˇliꞈ heu deuˆ hawˇ˗eu Gaˬlaˬtiˆ 2:19-ahˇ tsawˇ haˬ tiˬ gʼaˬ Moˇseˬ˗euˬ zahˇ dawˬ kʼoꞈ dawˬ˗ahˇ maˬ mˇ caw˗eu miˇ neh shiˇ˗eu gaˇ kawˆ˗ahˇ ehˇ luꞈ˗eu maˬ ngeuˇ˗a. Buˬ˗iˇ law˗iˇ˗eu jeˬ˗ahˇ ngehˬ keuˆ luꞈ˗eu jeˬ pyeuꞈ meh. Zahˇ dawˬ kʼoꞈ dahˬ heu naˇ, Pawˇluˆ hawˇ˗eu aˬ yawꞈ˗ahˇ duˇ˗eu Ka li zaˬ nui deuˬ˗ahˇ maˬ paˇ uˆ lahˇ˗euˬ meh. Pawˇluˆ hawˇ˗eu nui deuˬ Yeˬsuˇ Ka li˗euˬ ka kʼoꞈ˗eu jeˬ˗ahˇ jah˗eu miˇ neh, zahˇ dawˬ kʼoꞈ dawˬ uˬ moˆ neh buˬ˗iˇ law˗iˇ˗euˬ meh.