Gaˇ hu ba neh Iˇsaˬleˬlaˆ deuˬ maˇ maˇ ni uˬ duˬ tahˬ˗eu jeˬ˗ahˇ caw ba˗eu gʼaˇ duˬ, pyuˇ biꞈ˗eu meh. Ehˇ kʼawꞈ Yeˬsuˇ˗euˬ saˇ ka˗ahˇ keuˆ laˇ ngeh˗aˬ, Yuˇdaˆ tsawˇ haˬ deuˬ kawˬ ya doˆ˗eu myaˬ laˇ˗euˬ miˇ neh kʼaˆ behˆ pyeuꞈ nya lehˇ noeˬ laˇ˗euˬ meh.

Zaˬ maˬ paˇ ngeuˇ˗euˬ Yuˇdaˆ tsawˇ haˬ yawˬ gʼaˬ na luꞈ uˬ duˬ tahˬ nymˇ nymˇ ma˗ahˇ caw ba˗eu gʼaˇ duˬ, Daˇ˗laˇmaꞈ pyuˇ mehˇ byaˆ 2 byaˆ ya biꞈ˗eu meh. Yeˬsuˇ˗euˬ saˇ ka˗ahˇ kawˬ taꞈ za˗euˬ pyuˇ heu naˇ, lawˇ˗eu shehˇ˗eu gʼaˇ duˬ hawˇ˗eu Heˬloˆ neh tsoˆ taˬ˗euˬ uˬ duˬ tahˬ nymˇ nymˇ ma˗ahˇ haw saˆ˗eu gʼaˇ duˬ zmˬ˗eu meh. Yuˇdaˆ tsawˇ haˬ tiˬ gʼaˬ na Yeˬsuˇ uˬ duˬ tahˬ nymˇ nymˇ ma˗euˬ kawˬ maˬ doˆ˗a loˇ lehˇ Beˬtuˆluˆ˗ahˇ naˇ haˬ˗eu meh. Yeˬsuˇ uˬ duˬ tahˬ nymˇ nymˇ ma˗euˬ kawˬ doˆ˗eu heu naˇ yaw lehˬ˗a lehˇ maˬ ehˇ˗eu uˬ taꞈ, Beˬtuˆluˆ˗ahˇ mehˇ byaˆ tiˬ byaˆ doˆ nehˬ lehˇ jiˇ paˇ ehˇ nehˬ˗euˬ meh.—Maꞈtehˬ 17:24-27.

Miˬyehˇ˗euˬ tsawˇ haˬ deuˬ aˬ yawꞈ maꞈ neh mˇ za˗euˬ dzaˬ la gʼo cehˇ maˬ ehˇ, aˇ siˬ aˇ lu maˬ ehˇ, pyuˇ maˬ ehˇ, tseˇ bymˇ tiˬ bymˇ ya biꞈ˗eu meh. (Uˬduˬtahˬ˗eu 27:30-32; Bawˇtsahˬ 18:26-28) Zahˇ dawˬ kʼoꞈ dawˬ mehˬ˗eu aˬ yuiꞈ deuˬ zaˬ lahˇ deuˬ˗ahˇ aˬ yawꞈ maꞈ “deh ma yaˇ sawˇ, jaˬ gu lu myahˬ, yaˇ sawˇ” heu deuˬ˗ahˇ keuˆ ni tseˇ bymˇ tiˬ bymˇ biꞈ lehˇ ka tiˇ˗eu meh. Yeˬsuˇ tseˇ bymˇ tiˬ bymˇ biꞈ˗eu jeˬ˗ahˇ iˬ baˇ maˬ taˬ kʼawꞈ, zahˇ dawˬ kʼoꞈ dawˬ mehˬ˗eu saˬ laˬ deuˬ hawˇ˗eu Paˬliˬsehˇ deuˬ˗euˬ awꞈ˗aꞈ tahˬ kʼoˬ loꞈ˗ehˇ duˇ˗eu jeˬ˗ahˇ nmˇ pah doˆ nehˬ˗euˬ meh.—Maꞈtehˬ 23:23.

Yuˇdaˆ tsawˇ haˬ deuˬ teu ngeh yamˬ˗ahˇ uˆ lahˇ luꞈ˗eu Loˇmaˆ deuˬ˗ahˇ jiˇ kawˬ ya doˆ nehˬ˗eu meh. Ya doˆ˗eu kawˬ tiˬ jeˬ naˇ, miˇ tsaˬ yaw sahˇ deuˬ, pyuˇ, maˬ ngeuˇ naˇ dzaˬ la gʼo cehˇ, aˇ siˬ aˇ lu lawˬ muˇ ya biꞈ˗eu meh. Ka za˗euˬ jeˬ 20 bymˇ˗ahˇ neh 25 bymˇ keuˆ ni˗ahˇ ya biꞈ˗eu meh. Kʼoeˇ uˬ taꞈ, Yuˇdaˆ tsawˇ haˬ yawˬ gʼaˬ na luꞈ tsawˇ haˬ˗euˬ kawˬ jiˇ ya doˆ˗eu meh. Paˬliˬsehˇ deuˬ Yeˬsuˇ˗ahˇ kawˬ heu hmˬ nehˬ˗ehˇ taꞈ leˇ˗awˇ naˇ haˬ tseˇ˗eu meh. Teu ngeh Yeˬsuˇ neh “Toˆ˗ehˇ ngeuˇ naˇ, Loˇmaˆ sahˬ paˬ˗euˬ myawˬ Loˇmaˆ sahˬ paˬ˗ahˇ biꞈ˗awˇ, Miˬyehˇ˗euˬ myawˬ Miˬyehˇ˗ahˇ biꞈ˗awˬ” lehˇ ehˇ˗euˬ dawˬ˗ahˇ haw ngeh, kawˬ taꞈ˗eu gaˇ kawˆ˗ahˇ aˬ joˆ˗ehˇ ya haw˗eu lehˇ siˬ laˇ˗eu meh.—Maꞈtehˬ 22:15-22.

Kʼoeˇ naˇ jeˬ gaꞈ jeˬ ka mˇ˗eu deuˬ jiˇ, iˇ doˆ laˇ doˆ poeˬ kawˬ ya doˆ˗eu meh. Saˇ baoˬ naˬ duˬ kawˬ maˬ ehˇ, lawˇ dzmˇ kawˬ maˬ ehˇ, gaˇ ma kawˬ maˬ ehˇ, meuˬ˗ahˇ ahˇ leˇ˗eu kawˬ maˬ ehˇ, lehˆ kawˬ maˬ ehˇ, ya doˆ˗eu meh.

Loˇmaˆ uˆ lahˇ˗eu uˬ moˆ jawˇ˗eu tsawˇ haˬ deuˬ ya biꞈ˗eu kawˬ naˇ, aˇ dzehˬ˗ehˇ myaˬ˗eu meh. Loˇmaˆ˗euˬ tsawˇ haˬ tiˬ gʼaˬ pyeuꞈ˗eu gaˇ hu˗euˬ gaˇ kawˆ pyehˆ tseˇ˗eu Taˇshiꞈdeꞈ Yeˬsuˇ dehꞈ le˗eu aˇ yamˬ˗ahˇ hawˇ˗eu sahˬ paˬ Deˬbeˬliˇ uˆ lahˇ˗eu aˇ yamˬ˗ahˇ “Kawˬ aˇ dzehˬ˗ehˇ myaˬ˗eu miˇ neh, kawˬ ui cuiˆ teˬ nehˬ laꞈ lehˇ Suˇliˆ tsawˇ haˬ hawˇ˗eu Yuˇdaˆ tsawˇ haˬ deuˬ shaˇ˗eu meh” lehˇ ehˇ˗eu meh.

Kʼoeˇ uˬ taꞈ, kawˬ gʼoˆ jeˬ gʼoˆ kawˆ jiˇ zaˬ lahˇ deuˬ˗ahˇ kʼaˆ behˆ paˇ bi kah˗eu meh. Kawˬ gʼoˆ˗eu gaˇ heu˗ahˇ pyuˇ biꞈ dzehˬ nya˗eu gʼaˬ za˗eu meh. Kʼoeˇ naˇ aˬ yawꞈ maꞈ kawˬ gʼoˆ˗iˇ˗eu tsawˇ haˬ dzaˇ˗i tiˬ tiˆ paˇ ngaˬ˗eu meh. Aˬ yawꞈ maꞈ yawˬ ha˗euˬ gʼaˇ duˬ jiˇ jeuˬ ahˇ ni pyuˇ gʼoˆ dzehˬ˗eu meh. Saˬgehˇ˗euˬ laꞈ˗ahˇ teu loꞈ˗ehˇ kawˬ gʼoˆ˗eu tsawˇ haˬ cu taˬ˗euˬ gaˇ duˇ˗eu meh. (Luˇkaꞈ 19:1, 2) Teu miˇ neh tsawˇ haˬ deuˬ kawˬ taꞈ˗eu deuˬ˗ahˇ maˬ ya leˇ˗eu teu naˇ teu baˬ daˬ neh meh.