Nawˇ siˬ nya ma loˇ?
Jaˇliꞈ saˇ ka˗ahˇ˗euˬ deuˬ lawˬ, huˇ seu neh jahˇ˗euˬ ngaˇ laˬ?
Huˇ seu aˇ bawˬ
Gaˇ hu˗euˬ Iˇjiˇtuˆ˗ahˇ˗euˬ tsawˇ haˬ deuˬ sahˬ boꞈ boꞈ˗eu gʼaˇ duˬ huˇ seu aˇ bawˬ neh jahˇ˗euˬ seuˬ gʼaˬ˗ahˇ zmˬ˗euˬ meh. Gaˬliˇ hawˇ˗eu Loˇmaˆ tsawˇ haˬ deuˬ jiˇ sahˬ boꞈ boꞈ ngeh huˇ seu aˇ bawˬ neh jahˇ˗euˬ seuˬ gʼaˬ˗ahˇ zmˬ˗euˬ meh. a Ehˇ kʼawꞈ aˇ bawˬ heu naˇ, seuˬ gʼaˬ jahˇ gaˇ tehꞈ˗ehˇ maˬ ngeuˇ˗eu lawˬ jahˇ gaˇ jiˇ zmˬ˗eu lehˇ tsawˇ haˬ deuˬ yaw kʼaˆ˗ehˇ maˬ siˬ nya˗a.
Iˇjiˇtuˆ˗euˬ lmˬ bymˇ lo kʼahˬ˗ahˇ ya mawˇ˗eu huˇ seu neh dzeuꞈ taˬ˗euˬ lawˬ nyiˬ laˇ˗euˬ aˇ baˇ
Dzeuˇ laꞈ˗euˬ 2,500 kʼoꞈ dzehˬ ni˗ahˇ, bawˇlawˇpeh Iˇsaˬyaˇ ‘Suˬdaˬ miˇ kʼahˬ lawˇ baˬ doe ni jawˇ˗eu tsawˇ haˬ deuˬ’ ‘tsawˇ kaˬ˗ahˇ, huˇ seu neh dzeuꞈ˗euˬ lawˬ dziˬ˗awˇ, Niˬlaˇ lawˇ baˬ gawˆ cawˬ bi oe ka˗euˬ meh’ lehˇ boꞈ taˬ˗euˬ meh. Kʼoeˇ naˇ, bawˇlawˇpeh Yeˬlaˬmiˇ jiˇ Meˬdiˇ hawˇ˗eu Paˇshaˇ Baˬbuˇloˬ meuˬ˗ahˇ deuˆ le ngeh, Baˬbuˇloˬ tsawˇ haˬ deuˬ maˬ bi cehˆ dzeuˇ˗eu gʼaˇ duˬ aˬ yawꞈ maꞈ “huˇ seu neh dzeuꞈ˗euˬ lawˬ”˗ahˇ keuˬ puiˆ˗euˬ meh lehˇ maˬ keuˆ laˇ miˇ ehˇ taˬ˗euˬ meh.—Iˇsaˬyaˇ 18:1, 2; Yeˬlaˬmiˇ 51:32, MS.
Jaˇliꞈ˗aˬ Miˬyehˇ˗euˬ muiˬ˗eu shawˇ˗eu yaw sahˇ sheuˬ gʼeh˗eu laꞈ kʼoeˇ boꞈ˗euˬ miˇ neh gaˇ hu˗euˬ gaˇ kawˆ˗ahˇ pyehˆ tseˇ˗eu deuˬ Jaˇliꞈ saˇ ka˗ahˇ˗euˬ deuˬ, lawˬ˗ahˇ huˇ seu neh dzeuꞈ˗eu lehˇ poˆ mawˇ duˬ˗euˬ gaˇ, Jaˇliꞈ˗ahˇ pyehˆ tseˇ˗eu deuˬ maˬ zahˬ leˇ˗a. (2 Tiˆmoˇseˬ 3:16) Gaˇ hu˗euˬ gaˇ kawˆ˗ahˇ pyehˆ tseˇ˗eu deuˬ aˬ jeˬ jeˇ poˆ mawˇ˗euˬ nga? Aˬ yawꞈ maꞈ Iˬjiˇtuˆ˗euˬ tsawˇ haˬ deuˬ lawˬ˗ahˇ huˇ seu aˇ bawˬ neh dzeuꞈ taˬ˗euˬ gaˇ kawˆ˗ahˇ poˆ mawˇ duˬ˗euˬ meh.
Lawˬ˗ahˇ huˇ seu aˇ bawˬ neh aˬ joˆ˗ehˇ jahˇ˗eu nga?
Iˇjiˇtuˆ˗euˬ lmˬ bymˇ lo kʼahˬ deuˬ˗euˬ kaˇ pyawˇ deuˬ˗ahˇ huˇ seu yehˬ˗eu aˇ baˇ hawˇ˗eu lawˬ dzeuꞈ˗eu aˇ baˇ boꞈ taˬ˗euˬ meh. Kʼaˬ dzeˇ zaˬ deuˬ naˇ, huˇ seu aˇ bawˬ deuˆ˗awˇ kaꞈ dzahˬ˗eu meh. Kʼoeˇ naˇ aˇ dzahˬ deuˬ˗ahˇ dzaˇ˗i tiˬ poˆ paˇ kaꞈ dzahˬ˗eu meh. Aˇ bawˬ teu naˇ, smˬ coeˇ smˇ bawˬ lehˇ gʼeh˗eu miˇ neh, kaꞈ dzahˬ ngeh tiˬ jawˇ ziꞈ dah ni pyeuꞈ laˇ˗eu meh. Paˇ dmˬ tiˬ dmˬ˗ahˇ huˇ seu aˇ bawˬ neh dzeuꞈ˗euˬ lawˬ teu naˇ, tsawˇ kʼaˆ aˬ da˗euˬ aˇ lmˇ yehꞈ lmˇ tiˬ paˆ ehˇ gʼaˬ naˆ ni mahˇ˗awˇ, lawˬ daˇ laˆ kʼoeˇ paw ma paˆ˗ehˇ 10 hmˬ˗ahˇ neh maˬ ngeuˇ naˇ 12 hmˬ˗ahˇ keuˆ ni taˬ nya nga lehˇ ehˇ taˬ˗euˬ meh.
Huˇ seu aˇ bawˬ neh lawˬ dzeuꞈ˗euˬ aˇ baˇ Iˇjiˇtuˆ˗euˬ kaˇ pyawˇ˗ahˇ boꞈ taˬ
Lawˬ jahˇ˗eu deuˬ aˬ jeˬ miˇ neh huˇ seu aˇ bawˬ˗ahˇ zmˬ˗eu nga?
Niˬlaˇ lawˇ baˬ˗ahˇ huˇ seu aˇ bawˬ dehꞈ dui dui˗eu meh. Kʼoeˇ naˇ huˇ seu aˇ bawˬ neh lawˬ dzeuꞈ˗euˬ yawˇ diˇ ma˗ehˇ awˬ˗eu meh. Aˇ nah naˇ saˇ baoˬ baoˬ ma˗ahˇ daˇ kawˬ neh tsoˆ laˇ˗euˬ kʼawꞈ, teu ngeh keuˆ ni ngaˬ shaˬ poˆ˗eu deuˬ hawˇ˗eu shaˬ teh˗eu deuˬ huˇ seu neh dzeuꞈ˗euˬ lawˬ lawˬ zaˬ˗ahˇ zmˬ luꞈ˗a siˬ.
Gaˇ hu˗euˬ tsawˇ haˬ deuˬ huˇ seu neh dzeuꞈ˗euˬ lawˬ˗ahˇ gʼawˬ mya kʼoꞈ zmˬ˗euˬ meh. A.D. 100 ahˇ neh 200 yaw kaˬ˗ahˇ dehꞈ laꞈ˗euˬ Gaˬliˇ tsawˇ haˬ sahˬ boꞈ boꞈ˗euˬ tiˬ gʼaˬ pyeuꞈ˗eu Puˬ˗luˇtaꞈ aˬ yawꞈ˗euˬ saˇ ka˗ahˇ tsawˇ haˬ deuˬ huˇ seu neh dzeuꞈ˗euˬ lawˬ˗ahˇ zmˬ luꞈ meh siˬ lehˇ ehˇ˗eu meh.
a Huˇ seu aˇ bawˬ heu naˇ, lah yaˬ hawˇ˗eu iˇ hawˇ maˬ kʼaˆ gaˇ dehꞈ˗eu meh. Aˇ bawˬ heu naˇ tsawˇ kʼaˆ aˬ da˗euˬ aˇ lmˇ smˬ lmˇ ehˇ gʼaˬ naˆ ni goˇ˗awˇ, yaw huiˬ paw naˇ laꞈ du hui ni ehˇ gʼaˬ ni huiˬ˗eu meh.
