Nui ma nyiˇ laˇ paˬ˗ehˇ gʼeh˗eu jeˬ naˇ, ngaˇ 13 kʼoꞈ kʼawˆ laˇ ngeh Yeˬhawˇbaˬ nehˬ˗ehˇ cawˬ cawˬ˗eu jeˬ yaw kʼaˆ˗ehˇ maˬ muiˬ ni pyeuꞈ laˇ˗euˬ meh. Dzaw cawˬ deuˬ˗ahˇ haw ngeh, aˬ yawꞈ maꞈ naˇ yawˬ ha kʼaˇ jahˇ mawꞈ˗eu jeˬ jahˇ nya˗awˇ zaw˗ehˇ byawˬ gaˇ duˇ nga. Ngaˬ˗ahˇ jiˇ aˬ yawꞈ maꞈ loꞈ˗ehˇ dehꞈ mawꞈ nya. Aˬ da aˬ ma hawˇ˗eu Ka li zaˬ deuˬ neh jahˇ doˆ taˬ˗euˬ zahˇ heu naˇ ngaˬ˗ahˇ nyehꞈ suꞈ taˬ˗euˬ gaˇ duˇ˗awˇ, Yeˬhawˇbaˬ˗ahˇ uˬ duˬ tahˬ˗eu jiˇ gʼaˬ doeˇ doeˇ˗awˇ kʼaˆ behˆ kah gaˇ duˇ nya. Ngaˇ Yeˬhawˇbaˬ jawˇ meh laˬ leˇ heu lehˇ tiˬ jawˇ˗iˬ maˬ noeˬ kʼawꞈ, ngaˬ˗ahˇ aˬ yawꞈ nehˬ˗ehˇ yaw gʼoeˇ gʼoeˇ lehˇ maˬ paˇ gʼeh miˬ˗a.

Ngaˇ tiˬ pawꞈ˗iˬ maˬ paˇ tsaꞈ gaˬ˗iˇ˗euˬ nmˇ maˬ ngeuˇ. Ehˇ kʼawꞈ ui cuiˆ na maˬ ngeuˇ naˇ maˬ paˇ tsaꞈ gaˬ˗euˬ ma. Tsaꞈ gaˬ˗iˇ kʼawꞈ maˬ lehˬ hmˬ ni iˇ˗eu miˇ neh, nymˇ sahˇ deuˬ nehˬ˗ehˇ ngehˬ cawˬ˗eu jiˇ shaˬ˗eu lehˇ miˇ˗a. Teu miˇ neh laˬ kʼaˬ maˬ paˇ cehˇ ni pyeuꞈ laˇ˗awˇ, maˬ paˇ tsaꞈ gaˬ˗iˇ mawꞈ ni pyeuꞈ laˇ˗euˬ meh. Teu miˇ neh ngaˬ˗ahˇ ‘Tsawˇ haˬ tiˬ gʼaˬ tiˬ jaw saˇ˗iˬ tiˬ jaw, tiˬ siˬ saˇ˗iˬ tiˬ siˬ heu loꞈ˗ehˇ tehꞈ˗ehˇ gʼeh luꞈ naˇ, aˬ joˆ˗ehˇ jahˇ neh pyeuꞈ leˇ nya˗eu lehˇ noeˬ laˇ nya.’

Ngaˬ˗ahˇ 17 kʼoꞈ kʼawˆ laˇ ngeh yawˬ haˇ yawˬ ha dehꞈ mawꞈ laˇ˗euˬ meh. Teu miˇ neh ngaˇ iˇ kahˇ˗ahˇ neh doˆ˗iˇ˗awˇ, Awˇsaˬ˗ti li˗ya miˇ kʼahˬ˗ahˇ jawˇ iˇ˗euˬ ma. Ngaˬ da ngaˬ ma ngaˇ iˇ kahˇ˗ahˇ neh doˆ˗iˇ˗euˬ miˇ neh, nui ma cawˆ˗awˇ noeˬ shaˬ kʼahˬ lahˇ dui dui˗eu meh. Ehˇ kʼawꞈ  aˬ yawꞈ maꞈ ngaˇ Yeˬhawˇbaˬ˗euˬ gaˇ mˇ meh siˬ lehˇ noeˬ tmˬ˗eu meh.

Awˇsaˬ˗ti li˗ya miˇ kʼahˬ˗ahˇ iˇ keuˆ ngeh tiˬ jawˇ ngehˬ˗ehˇ dzehˬ nui jah paw paˇ doeˇ dzehˬ laˇ˗euˬ meh. Mehˬ bawˬ˗ahˇ jiˇ yaw kʼaˆ˗ehˇ maˬ paˇ iˇ ni pyeuꞈ laˇ˗euˬ uˬ taꞈ, ngaˇ loꞈ˗ehˇ mehˬ bawˬ˗ahˇ tiˬ miˇ iˇ, jiˇ naˇ uˬ ciꞈ paw cah gʼa duˬ˗ahˇ dzaˬ byawˬ dawˇ byawˬ iˇ lehˇ cah˗eu zaˬ guˬ deuˬ nehˬ˗ehˇ paˇ gm leˇ˗euˬ ma. Haw kʼoꞈ gʼeh ngeh jawˇ teu ngeh ngaˬ˗euˬ nui ma yaw tsaˬ yaw dawˇ paw tiˬ paˆ, miˇ tsaˬ paw tiˬ paˆ lehˇ jaˆ luꞈ˗eu meh. Ehˇ kʼawꞈ tiˬ paw˗iˬ gaˇ maˬ pyeuꞈ˗a.

Nyiˬ kʼoꞈ ehˇ gʼaˬ ni naˇ mehˇ nmˇ zaˬ miˬ aˬ buˇ tiˬ gʼaˬ nehˬ˗ehˇ mawˇ dzoeˇ˗euˬ ma. Aˬ yawꞈ˗euˬ baˬ da neh ngaˬ˗euˬ dehꞈ ziˇ poˆ laˇ paˇ laˇ˗euˬ gaˇ kawˆ˗ahˇ mehˇ nmˇ teu gʼaˬ jiˇ maˬ siˬ nya˗eu paˬ. Ngaˇ maˬ sheuˬ dahˬ dzaˬ˗euˬ mehˇ nmˇ zaˬ miˬ aˬ buˇ 5 gʼaˬ nehˬ˗ehˇ iˇ kahˇ tiˬ kahˇ laꞈ kʼoeˇ jawˇ˗euˬ ma. Tiˬ poˆ aˇ maꞈ˗ahˇ sheuˬ gʼeh˗eu gʼaˬ hawˇ˗eu aˬ yawꞈ˗euˬ miˬ zaˬ Taˬmaˬlaˬ˗ahˇ iˇ kahˇ˗ahˇ tiˬ jaw bi zaꞈ laˇ˗euˬ ma. Aˇ maꞈ˗ahˇ sheuˬ gʼeh˗eu gʼaˬ aˇ muˇ˗euˬ gaˇ kawˆ˗ahˇ kʼaꞈ gʼa luꞈ ngeh, aˬ yawꞈ˗euˬ miˬ zaˬ Taˬmaˬlaˬ naˇ nga maꞈ nehˬ˗ehˇ uiˇ law haˬ law˗ehˇ byawˬ gʼa˗awˇ cawˬ cawˬ taꞈ˗eu meh. Aˬ yawꞈ teu loꞈ˗ehˇ gʼeh gaˇ ngaˬ˗ahˇ ya leˇ˗eu lehˇ miˇ˗a. Taˬmaˬlaˬ naˇ taˬ aw dui dui˗eu tiˬ gʼaˬ pyeuꞈ˗awˇ, dawˬ ngehˬ cawˬ˗eu jiˇ awˬ˗eu lehˇ miˇ˗a. Ngaˇ Miˬyehˇ˗euˬ gaˇ˗ahˇ nui ma shaˬ dehꞈ dehꞈ dehꞈ˗ehˇ mˇ˗eu mehˇ nmˇ deuˬ jiˇ teu loꞈ˗ehˇ byawˬ gʼa cehˇ gʼa nya law hawˇ ngaˬ˗aˇ lehˇ ya mawˇ˗euˬ ma.

Taˬmaˬlaˬ naˇ leh jeh dui dui˗eu tiˬ gʼaˬ pyeuꞈ˗awˇ, yaw tsaˬ yaw dawˇ hawˇ˗eu tsaꞈ gaˬ˗eu gaˇ˗ahˇ gaˬ dui dui˗eu meh. Ngaˬ˗ahˇ jiˇ aˬ yawꞈ˗ahˇ haw˗awˇ, teu loꞈ˗ehˇ jahˇ mawꞈ laˇ nyaˬ. Ngaˇ Miˬyehˇ˗euˬ gaˇ˗ahˇ kʼaˇ deˬ maˬ deˬ tehꞈ˗ehˇ mˇ˗eu miˇ neh, laˬ kʼaˬ maˬ cehˇ ni pyeuꞈ luꞈ ngeh, Taˬmaˬlaˬ naˇ Miˬyehˇ˗euˬ gaˇ˗ahˇ leh jeh dui dui˗awˇ laˬ kʼaˬ cehˇ dui dui luꞈ˗eu meh. Taˬmaˬlaˬ˗euˬ yaw muiˬ paw dzeˇ dzaˬ˗ahˇ haw˗eu jeˬ hawˇ˗eu laˬ kʼaˬ cehˇ˗eu jeˬ ngaˬ˗euˬ dehꞈ ziˇ˗ahˇ yaw kʼaˆ˗ehˇ zaw laˇ nya. Ngaˇ Taˬmaˬlaˬ˗euˬ gaˇ kawˆ˗ahˇ neh Yeˬhawˇbaˬ aˬ yawꞈ˗euˬ gaˇ mˇ zaˬ yawˬ gʼaˬ na luꞈ˗ahˇ aˬ yawꞈ˗euˬ gaˇ˗ahˇ “laˬ kʼaˬ tiˬ cehˇ” bi mˇ mawꞈ nga lehˇ ya siˬ˗euˬ ma.—Ja ceuˬ 100:2.

Ngaˬ˗ahˇ kʼawꞈ Taˬmaˬlaˬ loꞈ˗ehˇ laˬ kʼaˬ tiˬ cehˇ dehꞈ mawꞈ miˇ˗a. Ehˇ kʼawꞈ ngaˇ teu loꞈ˗ehˇ laˬ kʼaˬ tiˬ cehˇ dehꞈ nya˗eu gʼaˇ duˬ, gʼawˬ mya jeˬ dehꞈ poˆ dehꞈ paˇ˗eu loˬ nga. Aˇ yamˬ jiˇ ui cuiˆ gʼawˬ myahˇ ga leˇ ngaˇ. Ngaˇ tiˬ poˆ cuiˆ cuiˆ˗ehˇ dehꞈ poˆ dehꞈ paˇ mˇ˗euˬ ma. Tsaꞈ gaˬ˗iˇ˗eu gʼaˇ duˬ jeˬ hu lehˬ hmˬ laˇ˗awˇ, tiˬ poˆ na˗aˬ, tiˬ poˆ na huˬ mehˬ mehˬ˗eu gʼaˬ jiˇ geuꞈ laˇ˗euˬ ma. Teu miˇ neh ngaˬ˗ahˇ guˆ˗eu nui ma tiˬ poˆ cuiˆ cuiˆ˗ehˇ byoˆ˗iˇ˗awˇ,  yawˬ haˇ yawˬ ha jah˗eu nui ma jaˆ laˇ˗euˬ meh. Tsaꞈ gaˬ˗eu gaˇ˗ahˇ Jaˇliꞈ tiˬ kʼehˬ maˬ kaˬ ya zmˬ˗eu miˇ neh laˬ kʼaˬ cehˇ nya. Tiˬ kʼehˬ naˇ ngaˇ yawˬ siˬ na luꞈ tiˬ poˆ na huˬ mehˬ mehˬ˗eu gʼaˬ geuꞈ laˇ˗euˬ ma.

Ngaˇ Yeˬhawˇbaˬ˗euˬ gʼaˇ duˬ kʼaˇ gʼeh nya gaˇ neh laˬ kʼaˬ tiˬ cehˇ mˇ luꞈ˗eu zaˬ guˬ deuˬ nehˬ˗ehˇ maˬ ehˇ, tsawˇ kʼaˆ deuˬ nehˬ˗ehˇ maˬ ehˇ, yawˬ gʼaˬ na luꞈ nehˬ˗ehˇ cawˬ cawˬ laˇ˗euˬ ma. Aˬ yawꞈ maꞈ˗euˬ dehꞈ jeˬ dehꞈ kawˆ teu naˇ ngaˬ˗ahˇ ngaˬ˗euˬ dehꞈ ziˇ laꞈ kʼoeˇ jeˬ hu taˬ˗eu jeˬ naˇ aˬ jeˬ nya lehˇ pyehˆ tseˇ ni maˬ ehˇ, nui jah paw˗euˬ mˇ jeˬ shaˇ kawˆ˗ahˇ leh jeh laˇ ni maˬ ehˇ, caw ba nehˬ laꞈ˗eu meh. Tsaꞈ gaˬ˗eu gaˇ˗ahˇ laˬ kʼaˬ cehˇ laˇ˗euˬ miˇ neh, aˬ myah luꞈ huˬ mehˬ mehˬ˗eu gʼaˬ geuꞈ dahˬ beh laˇ˗euˬ ma. Gʼawˬ mya kʼoꞈ aˇ yamˬ heu laꞈ kʼoeˇ heu poˆ naˇ dehꞈ ziˇ laꞈ kʼoeˇ laˬ kʼaˬ cehˇ nui saˇ oꞈ˗eu jeˬ jaˆ laˇ˗awˇ, aˇ muˇ nehˬ˗ehˇ jiˇ tsaˬ leˇ dzoeˇ leˇ laˇ miˬ˗aˇ.

Teu gaˇ neh tiˬ kʼoꞈ naˇ, ngaˇ Yeˬhawˇbaˬ hawˇ˗eu tsaꞈ gaˬ˗eu gaˇ˗ahˇ gaˬ˗eu uˬ taꞈ, nui ma muiˬ˗awˇ nahˬ yu ni gʼeh˗eu Aˬlehˇsiˬ nehˬ˗ehˇ ya mawˇ dzoeˇ˗euˬ ma. Aˬ yawꞈ aˇ muˇ˗ahˇ caw ba˗eu tiˬ gʼaˬ pyeuꞈ˗awˇ, huˬ mehˬ mehˬ˗eu gaˇ mˇ˗eu koꞈ kʼoꞈ byah laˇ˗euˬ meh. Aˬ yawꞈ tsaꞈ gaˬ˗eu deuˬ loˬ˗eu Maˬlaˬgʼoiˬ miˇ kʼahˬ˗ahˇ jiˇ myaˆ kʼoꞈ mˇ˗iˇ haw˗euˬ meh. Aˬ yawꞈ tsaꞈ gaˬ˗eu gaˇ˗ahˇ leh jeh dui dui˗eu Miˇshaˬnaˬliˬ gʼawˬ mya gʼaˬ nehˬ˗ehˇ ya mawˇ dzoeˇ˗awˇ, teu deuˬ maꞈ neh gʼaˬ biꞈ nehˬ˗euˬ baˬ da neh, Aˬlehˇsiˬ tsaꞈ gaˬ˗eu gaˇ˗ahˇ dehꞈ ziˇ laꞈ kʼoeˇ naˬ ba tiꞈ taˬ laˇ˗euˬ meh.

2003 kʼoꞈ˗ahˇ nga nyaꞈ yuˇ˗awˇ, Miˬyehˇ˗euˬ gaˇ˗ahˇ aˇ yamˬ tiˬ byah ni mˇ laˇ˗euˬ ma. Nga nyaꞈ gʼawˬ mya jeˬ ya dzaw geuꞈ˗awˇ, Yeˬhawˇbaˬ jiˇ nga nyaꞈ˗ahˇ guiˬ lahˬ gʼawˬ mya ni biꞈ nehˬ laꞈ˗euˬ meh.

Nga nyaꞈ 2009 kʼoꞈ˗ahˇ Eˬdoˬniˇshaˬ˗euˬ iˇ jaw lahˇ pyeuꞈ˗eu Tiˬmoˇ Lehˇsaꞈ˗teˆ miˇ kʼahˬ kʼahˬ zaˬ˗ahˇ ya jawˇ˗iˇ nga lehˇ ehˇ˗eu meh. Teu ngeh nga nyaꞈ˗ahˇ zahˬ kʼawꞈ zahˬ leˇ, nui ma cehˇ tahˬ kʼawꞈ tahˬ, kʼahˬ jiˇ lahˇ miˇ˗a. Ba la ngaˬ siˬ naˇ nga nyaꞈ, teu kʼahˬ˗euˬ meuˬ kʼaˇ huiˬ˗eu meuˬ˗ahˇ laˇ keuˆ˗euˬ ma.

Nga nyaꞈ teu gaˇ jawˇ˗iˇ ngeh tiˬ jawˇ gʼawˬ mya jeˬ laˆ poˆ laˆ paˇ ya mˇ˗euˬ ma. Zahˇ sahˇ kʼoꞈ hawˇ˗eu dawˬ maˬ ehˇ, dzaˬ dzaˬ dawˇ dawˇ hawˇ˗eu dehꞈ jeˬ dehꞈ kawˆ maˬ ehˇ, daˬ laˇ ni ya leh jeh˗euˬ ma. Tsaꞈ gaˬ˗iˇ ngeh teu gaˇ˗euˬ tsawˇ haˬ deuˬ, iˇ shaˬ shaˬ˗awˇ, sahˬ boꞈ yaw kʼaˆ˗ehˇ maˬ gui nya˗eu uˬ taꞈ, aˬ cawˬ neh bi behˬ dzaˬ luꞈ  gaˇ ya mawˇ˗euˬ ma. Kʼoeˇ naˇ guiˇ baˬ da neh gʼawˬ mya gʼaˬ nui ma paw maˬ ehˇ, gʼawˇ mawˇ paw maˬ ehˇ shaˬ zahˬ mˇ luꞈ gaˇ jiˇ ya mawˇ˗euˬ ma. a

Ehˇ kʼawꞈ teu gaˇ˗euˬ tsaꞈ gaˬ˗eu gaˇ naˇ muiˬ dui dui˗eu meh. Tiˬ poˆ Maˬliˬ˗yaˬ b lehˇ kuˇ˗eu tseˇ smˇ kʼoꞈ kʼawˆ laˇ˗euˬ aˬ buˇ zaˬ tiˬ gʼaˬ˗ahˇ ya mawˇ˗euˬ ma. Aˬ yawꞈ˗euˬ aˬ ma dzeuˇ laꞈ˗euˬ myaˆ kʼoꞈ˗ahˇ shiˇ˗euˬ meh. Aˬ yawꞈ aˬ yawꞈ˗euˬ aˬ da˗ahˇ kʼawꞈ yaw kʼaˆ˗ehˇ maˬ noeˬ taˬ nya nga. Maˬliˬ˗yaˬ jiˇ aˬ yawꞈ maꞈ˗euˬ shehˆ nui deuˬ loꞈ˗ehˇ dehꞈ ziˇ noeˬ tmˬ˗eu jeˬ maˬ jaˆ ni pyeuꞈ luꞈ˗eu meh. Tiˬ poˆ Maˬliˬ˗yaˬ aˬ yawꞈ˗euˬ nui ma laꞈ kʼoeˇ pyeuꞈ luꞈ˗eu jeˬ dzawˇ dzawˇ˗ehˇ ngoeˇ gaˇ noeˬ nya siˬ. Teu ngeh ngaˇ aˬ yawꞈ maꞈ˗euˬ dawˬ yaw muiˬ˗ehˇ maˬ siˬ nya˗euˬ siˬ miˇ neh, aˬ yawꞈ aˬ jeˬ ehˇ luꞈ˗eu ngaˬ˗ahˇ maˬ siˬ laˇ nya. Ngaˇ Yeˬhawˇbaˬ˗ahˇ Maˬliˬ˗yaˬ˗ahˇ caw ba nehˬ nya ni caw ba nehˬ laꞈ lehˇ guiˬ lahˬ shaˇ˗euˬ ma. Kʼoeˇ naˇ ngaˇ aˬ yawꞈ˗ahˇ gʼaˬ ahˇ laˇ˗eu Jaˇliꞈ aˇ deuˆ gui nehˬ˗euˬ ma. Teu gaˇ neh myaˆ kʼoꞈ naˇ Maˬliˬ˗yaˬ˗euˬ nui noeˬ nui ma, dehꞈ jeˬ dehꞈ kawˆ, yaw tsaˬ yaw dawˇ jeˬ baˬ da neh paˇ laˇ˗euˬ meh. Nymˬ˗mˇ naˇ aˬ yawꞈ iˇ cuꞈ shawˇ˗awˇ, dzaw zaˬ jiˇ jawˇ laˇ˗euˬ meh. Nymˬ˗mˇ aˬ yawꞈ huiˬ dui dui˗eu Ka li zaˬ nymˇ jiˇ laꞈ kʼoeˇ ya jawˇ gaˇ laˬ kʼaˬ cehˇ dui dui˗eu meh.

Tiˬmoˇ Lehˇsaꞈ˗teˆ miˇ kʼahˬ˗euˬ tsaꞈ gaˬ˗eu gaˇ˗ahˇ Yeˬhawˇbaˬ guiˬ lahˬ biꞈ˗eu meh. Teu gaˇ˗euˬ tsaꞈ gaˬ˗eu deuˬ myaˬ tiˬ paˆ iˇ cuꞈ shawˇ˗euˬ tseˇ kʼoꞈ jiˇ maˬ kʼawˆ laˇ˗aˬ siˬ. Ehˇ kʼawꞈ aˬ yawꞈ maꞈ tiˬ deuˬ na huˬ mehˬ mehˬ˗eu deuˬ geuꞈ˗awˇ, tiˬ deuˬ na˗aˬ aˇ muˇ˗ahˇ caw ba˗eu deuˬ pyeuꞈ˗eu uˬ taꞈ, tiˬ deuˬ na naˇ aˇ muˇ˗ahˇ sheuˬ gʼeh˗eu deuˬ pyeuꞈ˗eu meh. Tiˬ deuˬ na˗aˬ jawˇ kʼahˬ˗ahˇ˗euˬ dawˬ yuˇ paˇ gaˇ mˇ˗awˇ, gʼawˬ mya jeˬ˗euˬ dawˬ neh dawˬ yuˇ paˇ˗eu meh. Ngaˬ˗ahˇ mehˬ bawˬ˗ahˇ aˬ yawꞈ maꞈ˗euˬ dawˇ caˇ caˇ luꞈ˗eu teˇ saˇ˗ahˇ ya gaˬ ngeh maˬ ehˇ, aˬ yawꞈ maꞈ laˬ kʼaˬ cehˇ gaˇ ya mawˇ ngeh maˬ ehˇ, aˬ yawꞈ maꞈ Miˬyehˇ gaˇ laꞈ kʼoeˇ huiˬ laˇ mahˇ laˇ gaˇ ya mawˇ ngeh maˬ ehˇ, ngaˬ˗ahˇ laˬ kʼaˬ cehˇ laˇ˗eu lehˇ miˇ˗a.

Tiˬmoˇ Lehˇsaꞈ˗teˆ miˇ kʼahˬ˗ahˇ Miˬyehˇ gaˇ mˇ˗eu heu naˇ, Awˇsaˬ˗ti li˗ya miˇ kʼahˬ˗ahˇ mˇ˗eu nehˬ˗ehˇ beu gaˇ dui dui˗eu meh. Ngaˬ˗euˬ dehꞈ ziˇ˗ahˇ heu naˆ maˬ tseˇ laˬ kʼaˬ cehˇ laˇ˗eu jeˬ maˬ paˇ jaˆ miˇ˗a. Tiˬ poˆ na˗aˬ, lehˆ˗ahˇ ngaˬ shaˬ hawˇ˗eu gʼawˬ nyoeˇ lawˬ muˇ tawˬ˗eu lawˬ liˬ liˬ zaˬ˗ahˇ tahˬ tahˬ˗ehˇ ya dziˬ˗eu meh. Tiˬ nah na suꞈ ti ni gʼeh˗eu iˇ kahˇ kahˇ zaˬ˗ahˇ, ya ciˆ cah cah˗ehˇ jawꞈ laꞈ ni gʼeh˗eu miˇ tsa˗ahˇ nui taˬ˗awˇ, kuˬ pyuˇ ju ju˗ehˇ Jaˇliꞈ ya mehˬ˗eu jiˇ baw˗eu meh. Teu loꞈ˗ehˇ shaˬ zahˬ jaˆ kʼawꞈ ‘Toˆ˗ehˇ tiˬ sheuˇ yaw byawˬ miˇ˗a lehˇ noeˬ laˇ miˇ˗a.’

Cu˗eu shaˬ dui dui˗eu zaˬ guˬ guˬ dzawˇ dzawˇ laˇ˗euˬ aˇ yamˬ˗ahˇ kʼawꞈ, Yeˬhawˇbaˬ˗euˬ gaˇ ma˗ahˇ kʼaˇ gʼeh nya gaˇ neh mehˬ nehˬ laꞈ˗awˇ, ngehˬ gʼeh dah teˬ nehˬ laꞈ˗euˬ ngaˬ da ngaˬ ma˗ahˇ guiˬ lahˬ huiˬ˗eu lehˇ miˇ˗a. Dawˬdaˬ 22:6 laꞈ kʼoeˇ ahˇ˗eu dawˬ heu naˇ, ngaˬ nehˬ˗ehˇ aˇ dzehˬ˗ehˇ tsaˬ˗eu meh. Ngaˬ da ngaˬ ma Aˬlehˇsiˬ nga nyaꞈ˗ahˇ nui kʼahˇ shiˇ dui dui˗awˇ, nga nyaꞈ Yeˬhawˇbaˬ˗euˬ gaˇ˗ahˇ leh jeh˗awˇ neh mˇ gaˇ laˬ kʼaˬ cehˇ dui dui˗eu meh. 2016 kʼoꞈ˗ahˇ neh naˇ nga nyaꞈ, Awˇsaˬ te leˇ shaˬ˗ahˇ aˇ maꞈ˗ahˇ sheuˬ gʼeh˗eu gaˇ ya mˇ˗euˬ ma.

Ngaˬ neh tsaꞈ gaˬ˗eu gaˇ˗ahˇ laˬ kʼaˬ maˬ cehˇ ni pyeuꞈ yaꞈ˗euˬ heu naˇ, shaˇ noeˬ maˬ doˆ nya. Nymˬ˗mˇ ngaˬ˗ahˇ tsaꞈ gaˬ˗eu gaˇ˗ahˇ gaˬ dui dui laˇ˗awˇ, dehꞈ ziˇ laꞈ kʼoeˇ aˬ geu jeˬ˗ahˇ ya puˬ kʼawꞈ, Miˬyehˇ˗euˬ gaˇ˗ahˇ nui ma gʼawˇ mawˇ dawˬ tawˆ luꞈ mˇ˗eu heu maˬ ngeuˇ naˇ maˇ diˇ laˬ kʼaˬ cehˇ˗eu jeˬ maˬ biꞈ nya˗eu lehˇ ngaˬ˗ahˇ si laˇ miˬ˗a. Aˬlehˇsiˬ nehˬ˗ehˇ Miˬyehˇ gaˇ tiˬ kawˆ loꞈ˗ehˇ uˬ taꞈ 18 kʼoꞈ ya mˇ taꞈ˗euˬ aˇ yamˬ heu naˇ, ngaˬ˗euˬ dehꞈ ziˇ laꞈ kʼoeˇ neh laˬ kʼaˬ kʼaˇ cehˇ˗eu aˇ yamˬ pyeuꞈ miˇ˗a. Nymˬ˗mˇ ngaˬ˗ahˇ Daˬbiˇ neh Ja ceuˬ sahˬ boꞈ laꞈ kʼoeˇ Yeˬhawˇbaˬ˗ahˇ “Nawˬ˗euˬ laꞈ kʼoeˇ jaˆ˗eu, nui saˇ oꞈ˗eu jeˬ mawˇ˗euˬ deuˬ, aˬ myah caˇ˗awˇ ja ceuˬ tehꞈ˗a. Nawˬ˗ahˇ gaˬ˗eu tsawˇ haˬ deuˬ˗ahˇ . . . Maˇ maˇ ni laˬ kʼaˬ cehˇ˗eu jeˬ, nawˇ baˬ da neh yawꞈ maꞈ za meh” lehˇ ngehˬ˗euˬ dawˬ˗ahˇ gʼoˆ shaw laˇ miˬ˗a.—Ja ceuˬ 5:11.