Mehˇ nmˇ deuˬ ngehˬ˗ehˇ tsaꞈ gaˬ naˇ ngehˬ˗ehˇ tsaꞈ gaˬ gaˇ zmˬ˗eu paˇ dmˬ deuˬ loˬ laˇ luꞈ˗eu meh. Buˇkiˬ˗liˬ Beˬdeˬlaˇ˗ahˇ˗euˬ mehˇ nmˇ deuˬ maˬgaˬziˇ yawˬ haˇ yawˬ ha yaˬ doˆ luꞈ˗eu meh. Ehˇ kʼawꞈ aˬ yawꞈ maꞈ sahˬ boꞈ baˆ kʼoˆ yaw gʼahˇ paˇ dmˬ deuˬ yaˬ doˆ˗eu gʼaˇ duˬ sahˬ boꞈ yaˬ˗eu yaw myaˬ tsahˇ ya ngaˬ˗eu meh. Sahˬ boꞈ yaˬ doˆ duˬ teu deuˬ sahˬ boꞈ maˬ yaˬ doˆ dah nehˬ nya˗eu miˇ neh mehˇ nmˇ deuˬ yaw myaˬ siˬ tsaꞈ gaˬ gaˇ zmˬ˗eu paˇ dmˬ deuˬ maˬ jaˆ˗a. Teu miˇ neh mehˇ nmˇ Laˇdeuˇpawˬ sahˬ boꞈ yaˬ doˆ gaˇ haw˗eu gʼaˬ pyeuꞈ˗eu Lawˇbeuꞈ Maˇtiꞈ˗ahˇ aˬ dui sahˬ boꞈ baˆ kʼoˆ yaw gʼahˇ paˇ dmˬ deuˬ yawˬ haˇ yawˬ ha maˬ yaˬ doˆ nya˗a laˬ lehˇ naˇ haˬ˗eu meh.

Mehˇ nmˇ Maˇtiꞈ “Teu naˇ zawˇ˗ehˇ muiˬ zawˇ˗ehˇ caˇ˗eu nui noeˬ pyeuꞈ miˇ˗a. Aˬ jeˬ miˇ neh ehˇ naˇ, aˬ dui˗euˬ sahˬ boꞈ yaˬ duˬ byah kuꞈ˗eu sahˬ boꞈ yaˬ duˬ pyeuꞈ laˇ˗eu miˇ neh” lehˇ ehˇ nehˬ˗euˬ meh. Teu miˇ neh mehˇ nmˇ deuˬ Buˇkiˬ˗liˬ meuˬ˗ahˇ˗euˬ Kahˇkoˬ lehˇ kuˇ˗eu gaˇ ma˗ahˇ jaˆ˗eu iˇ kahˇ naˬ ba 18-ahˇ ngaˬ˗awˇ loˬ˗eu caˆ keu ka deuˬ jiˇ gʼawˬ mya ni zeuˇ˗euˬ meh.

Ehˇ kʼawꞈ heu loꞈ˗ehˇ huiˬ laˇ mahˇ laˇ gaˇ yawˬ gʼaˬ na luꞈ laˬ kʼaˬ cehˇ˗eu lehˇ maˬ ngeuˇ˗a. Aˬ dui neh sahˬ boꞈ bi yaˬ doˆ˗iˇ haw˗euˬ tiˬ tsahˇ˗ahˇ˗euˬ aˬ yuiꞈ tiˬ gʼaˬ aˬ dui˗euˬ sahˬ boꞈ yaˬ doˆ duˬ˗ahˇ gʼa laˇ˗awˇ aˬ yawꞈ “Naw maꞈ muiˬ dui dui˗eu caˆ keu ka deuˬ jaˆ kʼawꞈ zmˬ jeˬ zmˬ kawˆ maˬ siˬ nya gaˇ le. Nymˬ˗mˇ ba la koꞈ siˬ naˇ ya naˬ leˇ tehꞈ˗a” lehˇ ehˇ˗eu meh.

Mehˇ nmˇ Maˇtiꞈ “Pyeuꞈ leˇ nya tehꞈ˗a. Ehˇ kʼawꞈ aˬ dui gaˇ kawˆ heu Yeˬhawˇbaˬ˗ahˇ a nehˬ naˇ aˬ yawꞈ aˬ dui˗ahˇ aˬ myah luꞈ caw ba nehˬ meh” lehˇ ehˇ˗eu meh. Mehˇ nmˇ Maˇtiꞈ neh ehˇ˗euˬ loꞈ˗ehˇ maˇ diˇ pyeuꞈ laˇ˗euˬ meh. Tiˬ kʼehˬ naˇ, aˬ dui˗euˬ sahˬ boꞈ yaˬ doˆ duˬ sahˬ boꞈ baˆ kʼoˆ yaw gʼahˇ paˇ dmˬ tiˬ nah laꞈ kʼoeˇ tehꞈ˗ehˇ 2,000 dmˬ yaˬ doˆ nya laˇ˗euˬ meh.

Aˬ dui paˇ dmˬ deuˬ yawˬ haˇ yawˬ ha yaˬ doˆ nya laˇ˗euˬ tehꞈ˗ehˇ maˬ gʼaˬ ni, Yeˬhawˇbaˬ˗euˬ tsawˇ haˬ deuˬ guiˬ lahˬ dawˬ dzaˇ˗i nui jeˬ˗ehˇ jiˇ paˇ tsaꞈ gaˬ laˇ˗euˬ meh. Teu naˇ teˇ saˇ Leˬdiˬ˗oˬ paw neh biˇ kʼawˬ˗eu heu meh. 1922 kʼoꞈ, Nyiˬ siˬ ba la 26 nah jawˇ nah ngeh nah uˬ ciꞈ taw paw, mehˇ nmˇ Laˇdeuˇpawˬ Leˬdiˬ˗oˬ paw neh dawˬ mehˬ mehˬ dahˬ beh˗euˬ meh. Teu nah dawˬ mehˬ mehˬ˗euˬ gaˇ kawˆ uˬ dzah naˇ “Nymˬ˗mˇ dehꞈ luꞈ˗eu yaw myaˬ lam gʼaˬ tiˬ jawˇ˗iˬ maˬ ya shiˇ˗a” lehˇ meh. Teu ngeh pyehˬ kʼawˬ˗euˬ jeˬ teu naˇ Aˬmeˬliˇkaˬ miˇ kʼahˬ, Kehˇliˬpawˇniˬ˗yaˬ gahˬ kaˬ  Lawˇ˗suiꞈ Eˇjeuˬ˗leꞈ˗suiꞈ meuˬ˗ahˇ˗euˬ Keˬoˬjiˬ (KOG) Leˬdiˬ˗oˬ˗ahˇ neh pyehˬ kʼawˬ˗eu jeˬ pyeuꞈ meh.

Teu ngeh nah laꞈ kʼoeˇ tehꞈ˗ehˇ 25,000 gʼaˬ ehˇ gʼaˬ ni dawˬ mehˬ mehˬ gaˇ ya gaˬ˗euˬ meh. Tiˬ gʼaˬ na guiˬ lahˬ huiˬ miˇ˗a lehˇ sahˬ boꞈ boꞈ ahˇ leꞈ˗euˬ meh. Teu laꞈ kʼoeˇ neh tiˬ gʼaˬ naˇ Kehˇliˬpawˇniˬ˗yaˬ Saˇtaˬ Ehˇnaˬ˗ahˇ jawˇ˗eu Gʼoeˇleˬ Ehˇshuˬ˗peuˬ meh. Aˬ yawꞈ “byawˬ laˇ paˬ˗ehˇ, nui ma ahˇ laˇ paˬ˗ehˇ” dawˬ mehˬ mehˬ˗eu mehˇ nmˇ Laˇdeuˇpawˬ˗ahˇ guiˬ lahˬ huiˬ˗eu meh. Kʼoeˇ naˇ aˬ yawꞈ “Nga pehˬ˗euˬ nymˇ jiˇ laꞈ kʼoeˇ naˇ˗eu smˇ gʼaˬ jawˇ˗eu miˇ neh nawˇ Leˬdiˬ˗oˬ paw neh maˬ mehˬ law nmˇ˗aˬ, nawˇ nga pehˬ˗euˬ iˇ kahˇ dawˬ peh dawˬ dzeˇ paˇ mehˬ laˇ˗euˬ kʼawꞈ nga pehˬ nawˇ dawˬ mehˬ mehˬ gaˇ maˬ ya gaˬ˗eu laꞈ kʼoeˇ tehꞈ meh” lehˇ ehˇ˗eu meh.

Yawˬ jaw yawˬ˗ahˇ jiˇ Leˬdiˬ˗oˬ paw neh dawˬ mehˬ mehˬ˗eu doˆ laˇ˗eu meh. Loꞈ˗eu nymˇgoˇ˗ahˇ “1922 kʼoꞈ jiˇ leˇ ngeh Leˬdiˬ˗oˬ paw neh dawˬ mehˬ mehˬ gaˇ ya gaˬ˗euˬ yaw teˬ 300,000 gʼaˬ byah laˇ shaw˗euˬ meh” lehˇ ehˇ˗eu meh.

Leˬdiˬ˗oˬ paw neh dawˬ mehˬ mehˬ gaˇ ya leˇ˗eu deuˬ gʼawˬ mya ni jawˇ˗awˇ, tiˬ deuˬ na sahˬ boꞈ jiˇ boꞈ leꞈ˗eu miˇ neh Jaˇliꞈ dzaw zaˬ deuˬ Buˇkiˬ˗liˬ Beˬdeˬlaˇ dawˬ peh jaˆ˗eu Saꞈ˗tehˆteˬ iˇ jaw lahˇ˗ahˇ yawˬ ha˗euˬ Leˬdiˬ˗oˬ pyehˬ kʼawˬ duˬ jahˇ˗eu lehˇ noeˬ tsehˆ˗euˬ meh. Kʼoeˇ naˇ Jaˇliꞈ dzaw zaˬ deuˬ teˇ saˇ pyehˬ kʼawˬ˗eu leˬdiˬ˗oˬ heu hmˬ˗ahˇ Daˬbaˬ˗yuˬ Biˬ Biˬ Aˬ (WBBR) lehˇ myahˇ˗euˬ meh. Aˬ yawꞈ maꞈ teu˗ahˇ zmˬ˗awˇ Miˬyehˇ˗euˬ Miˇkʼahˬ laˬ kʼaˬ cehˇ˗eu guiˬ lahˬ dawˬ˗ahˇ gʼawˬ mya kʼoꞈ tsaꞈ gaˬ gʼeh˗euˬ meh.

1922 kʼoꞈ, Koꞈ siˬ ba la 15 nah˗ahˇ˗euˬ Loꞈ˗eu nymˇgoˇ˗ahˇ 1922 kʼoꞈ, Gʼoeˬ siˬ ba la 5 nah˗ahˇ neh 13 nah˗ahˇ keuˆ ni Oˬ˗haiˇ˗oˬ gahˬ kaˬ Siˇdeuˇ Paw˗tiˬ˗ahˇ huiˬ˗eu mehˬ bawˬ jahˇ ma lehˇ tsaꞈ gaˬ˗eu meh. Jaˇliꞈ dzaw zaˬ deuˬ Siˇdeuˇ Paw˗tiˬ˗ahˇ oe keuˆ ngeh laˬ kʼaˬ cehˇ dui dui˗eu meh.

Dahˬ beh˗eu dawˬ mehˬ mehˬ˗eu hmˬ˗ahˇ mehˇ nmˇ Laˇdeuˬpawˬ “Ngaˇ aˬ dui˗euˬ Sahˬpaˬ Yeˬsuˇ huiˬ˗eu mehˬ bawˬ heu poˆ˗ahˇ guiˬ lahˬ biꞈ˗eu yaw duˬ baw meh lehˇ jah ziꞈ˗eu ma. Kʼoeˇ naˇ aˇ hu aˇ nah aˇ yamˬ naˆ maˬ tseˇ tsaꞈ gaˬ laˇ˗eu yaw duˬ baw meh” lehˇ jiˇ ehˇ˗eu meh. Teu ngeh dawˬ mehˬ mehˬ˗eu nui deuˬ jiˇ tsaꞈ gaˬ˗eu gaˇ˗ahˇ yaw kʼaˆ˗ehˇ ngehˬ keuˆ˗eu meh.

Gʼoeˬ siˬ ba la 8 nah, jawˇ nah dzeuˇ ngaˬ nah˗ahˇ jahˇ˗eu huiˬ˗eu mehˬ bawˬ teu poˆ˗ahˇ 8,000 gʼaˬ ehˇ gʼaˬ ni laˇ˗euˬ meh. Yawˬ gʼaˬ na luꞈ mehˇ nmˇ Laˇdeuˬpawˬ dawˬ mehˬ mehˬ gaˇ ya naˇ haˬ gaˇ nui ma cehˇ tahˬ tahˬ dui dui˗eu meh. Aˬ yawꞈ maꞈ huiˬ˗eu mehˬ bawˬ˗euˬ kuˇ gaˬ˗eu sahˬ boꞈ aˇ taꞈ laꞈ kʼoeˇ ahˇ˗eu “Eˬdiˬbiˬ” (ADV) lehˇ ehˇ˗eu heu naˇ, aˬ jeˬ˗ahˇ ehˇ˗eu nga lehˇ yaw kʼaˆ˗ehˇ siˬ nya mawꞈ˗eu meh. Aˬ yawꞈ maꞈ dawˬ nuiˇ nuiˇ ngeh yaw myaˬ gʼaˬ seu geu kʼoeˇ taˆ jaˆ˗eu saˬ paˇ paˇ yoˆ yoˆ ma tiˬ hmˬ˗ahˇ ya mawˇ˗euˬ meh. Aˬmeˬliˇkaˬ miˇ kʼahˬ Oˇkaˇ˗laˇhoˇmaˬ  gahˬ kaˬ Taˇ˗uˇsaˬ meuˬ˗ahˇ neh laˇ˗euˬ mehˇ nmˇ Aˇteuˬ Kaw˗suiꞈ teˇ saˇ yaw muiˬ˗ehˇ gaˬ laˇ˗eu jawˇ duˬ˗ahˇ za taˬ˗euˬ miˇ neh laˬ kʼaˬ cehˇ˗eu meh. Aˬ jeˬ miˇ neh ehˇ naˇ teu ngeh˗euˬ saˇ ka˗ahˇ dawˬ mehˬ mehˬ˗eu jeˬ˗ahˇ bi gaˬ laˇ˗eu daˇ heh lawˬ muˇ maˬ jaˆ˗eu miˇ neh meh.

Mehˇ nmˇ Laˇdeuˬpawˬ dawˬ mehˬ mehˬ ngeh maˬ bi laˆ bahˬ˗eu gʼaˇ duˬ huiˬ˗eu mehˬ bawˬ˗ahˇ sheuˬ gʼeh˗eu aˬ yuiꞈ gʼaˬ, jeˬ nahˬ laˇ ga˗euˬ deuˬ˗ahˇ Bawˬdzaˬnymˇ˗ahˇ taˬ bi laˇ ahˇ lehˇ ehˇ˗eu meh. Uˬ shawˬ naˬ liˬ 9 laꞈ guiˬ byah laˇ ngeh mehˇ nmˇ Laˇdeuˬpawˬ Maꞈtehˬ 4:17 laꞈ kʼoeˇ˗euˬ “Mˬ taˆ Miˇ kʼahˬ peh le luꞈ meh” lehˇ ehˇ˗eu Yeˬsuˇ˗euˬ dawˬ heu neh aˬ yawꞈ˗euˬ dawˬ mehˬ mehˬ˗eu jeˬ˗ahˇ dahˬ beh˗euˬ meh. (Kiˇ Jeˬ Jaˇliꞈ) Mehˇ nmˇ Laˇdeuˬpawˬ tsawˇ haˬ deuˬ Miˬyehˇ Miˇkʼahˬ gaˇ kawˆ aˬ joˆ˗ehˇ jahˇ neh gaˬ nya nmˇ lehˇ dzawˇ ngeh aˬ yawꞈ “Yeˬsuˇ aˬ yawꞈ zaꞈ le ngeh yehˬ˗eu gaˇ mˇ˗awˇ yaw tsaˬ yaw dawˇ jeˬ˗ahˇ gaˬ˗awˇ saˇ jaˇ ziꞈ˗eu deuˬ˗ahˇ laˆ uiꞈ ma lehˇ ehˇ˗eu meh” lehˇ ehˇ˗eu meh.

Huiˬ˗eu mehˬ bawˬ teu poˆ laꞈ kʼoeˇ jawˇ luꞈ˗eu mehˇ nmˇ Aˇteuˬ “dawˬ mehˬ mehˬ˗eu yawˬ dawˬ na luꞈ ngaˬ˗euˬ nui ma˗ahˇ zaw laˇ˗eu lehˇ miˇ˗a” lehˇ ehˇ˗eu meh. Ehˇ kʼawꞈ aˬ yawꞈ saˇ suˬ ni jawˇ gaˇ neh jawˇ saˇ maˬ doˆ ni pyeuꞈ laˇ˗awˇ Bawˬdzaˬnymˇ˗ahˇ neh tiˬ pawꞈ˗iˬ maˬ iˇ doˆ mawꞈ gaˇ ya iˇ doˆ˗euˬ meh.

Aˬ yawꞈ laꞈ nyiˇ iˇ doˆ˗awˇ naˬ liˬ myaˆ peu naˇ maˬ gaˇ laˇ˗euˬ meh. Aˬ yawꞈ Bawˬdzaˬnymˇ˗ahˇ ahˇ kʼoꞈ laˇ ngeh kʼaˆ dui dui˗eu laꞈ kʼawˆ tehˆ˗eu teˇ saˇ ya gaˬ˗euˬ meh. Aˬ yawꞈ aˬ jeˬ ehˇ˗euˬ nga lehˇ yaw kʼaˆ˗ehˇ siˬ nya mawꞈ˗eu miˇ neh dawˬ mehˬ mehˬ gaˇ naˇ haˬ˗eu gʼaˇ duˬ gui ma˗ahˇ daˆ leˇ˗eu lehˇ noeˬ tsehˆ˗euˬ meh. Aˇ kʼoꞈ 23 kʼoꞈ kʼawˆ laˇ˗euˬ mehˇ nmˇ Aˇteuˬ tiˬ kʼehˬ naˇ gui ma˗ahˇ aˬ joˆ˗ehˇ ya daˆ leˇ˗eu lehˇ haw mawˇ˗euˬ meh. Teu ngeh gui ma˗ahˇ daˆ leˇ˗eu gʼoˆ kʼehˬ pah taˬ˗awˇ neh jaˆ˗eu meh. Aˬ yawꞈ gui ma˗ahˇ daˆ leˇ ngeh “dawˬ mehˬ mehˬ˗eu teˇ saˇ maˇ jawˆ ni ya gaˬ˗euˬ meh.”

Ehˇ kʼawꞈ gui ma˗ahˇ daˆ luꞈ˗eu naˇ Aˇteuˬ tehꞈ maˬ ngeuˇ˗a. Aˇteuˬ aˬ yawꞈ˗euˬ cawˬ deuˬ jiˇ teu gaˇ daˆ luꞈ gaˇ ya mawˇ˗euˬ meh. Teu laꞈ kʼoeˇ neh tiˬ gʼaˬ naˇ Peh˗leh Jawˇsahˬ meh. Peh˗leh Jawˇsahˬ naˇ Aˇteuˬ˗ahˇ ya mawˇ ngeh tiˬ jawˇ “Nawˇ mi cehˇ yaw taˆ ahˇ ma laˬ?” lehˇ naˇ haˬ˗euˬ meh.

Aˇteuˬ “Ahˇ ma” lehˇ ehˇ nehˬ˗euˬ meh.

Peh˗leh “Nawˬ˗ahˇ Miˬyehˇ neh bi laˇ˗euˬ ngaˇ. Nga maꞈ nymˬ˗mˇ gaˇ kawˆ teu nehˬ˗ehˇ taꞈ leˇ˗awˇ guiˬ lahˬ shaˇ˗euˬ tiˬ dehˬ tehꞈ de siˬ. Nawˬ˗ahˇ kʼoeˇ ba jaˆ˗eu saˬ paˇ paˇ yoˆ yoˆ ma˗ahˇ mawˇ laˇ miˇ˗a loˇ? Teu naˇ bi siˬ bi gaˬ˗eu saˬ paˇ  pyeuꞈ meh. Saˬ paˇ teu lehˬ yoˆ taˬ˗awˇ smˇ sehˬ˗ahˇ ciˬ ceuˬ taˬ ngaˬ. Nawˇ yaˇ kʼaˬ daˇ˗eu a mehˇ nmˇ Laˇdeuˬpawˬ ngehˬ gaˇ yaw muiˬ˗ehˇ naˇ haˬ de. Aˬ yawꞈ bi siˬ bi gaˬ˗eu jeˬ lehˇ ehˇ ngeh aˇ caˆ heu oeˬ caˆ yehˬ tsehˆ de” lehˇ ehˇ˗eu meh.

Aˇteuˬ mi cehˇ tuˆ tehˬ taˬ˗awˇ cawˬ deuˬ ehˇ gaˬ laꞈ gaˇ dawˬ luꞈ˗eu meh. Mehˇ nmˇ Laˇdeuˬpawˬ dawˬ mehˬ mehˬ˗eu aˇ yeˇ huiˬ˗eu tsahˇ˗ahˇ mehˬ keuˆ leꞈ ngeh aˬ yawꞈ nui ma cehˇ tahˬ tahˬ dui dui˗eu laꞈ kʼoeˇ heu loꞈ˗ehˇ guˇ guˇ˗ehˇ ehˇ˗eu meh. “Sahˬpaˬ Miˬyehˇ˗euˬ gʼaˇ duˬ maˇ maˇ ni saˇ kiˇ pyeuꞈ˗awˇ saˇ jaˇ ziꞈ˗awˬ. Baˬbuˇloˬ yaˇ saˬ maˬ pyeuꞈ˗iˇ jiˇ˗euˬ kʼoeˇ keuˆ ni deuˆ daˆ leꞈ˗awˬ. Dawˬ heu mˬ dzeˇ miˇ dzeˇ keuˆ ni tsaꞈ gaˬ gʼeh˗awˬ. Miˇ tsaˬ zaˬ deuˬ Yeˬhawˇbaˬ naˇ Miˬyehˇ pyeuꞈ˗eu gaˇ kawˆ hawˇ˗eu, Yeˬsuˇ Ka li naˇ sahˬ paˬ kʼoeˇ taˆ Sahˬpaˬ pyeuꞈ˗eu gaˇ kawˆ ya siˬ meh. Nymˬ˗mˇ naˇ aˇ yeˇ huiˬ dui dui˗eu aˇ yamˬ pyeuꞈ meh. Haw˗awˬ. Sahˬ paˬ uˆ lahˇ shaw. Miˬyehˇ˗euˬ do dah tsaꞈ gaˬ˗eu gʼaˬ pyeuꞈ meh. Teu miˇ neh Sahˬ paˬ hawˇ˗eu Miˬyehˇ Miˇkʼahˬ gaˇ kawˆ bi siˬ bi gaˬ˗awˬ. Bi siˬ bi gaˬ˗awˬ. Bi siˬ bi gaˬ˗aw.”

Aˇteuˬ aˬ yawꞈ hawˇ˗eu aˬ yawꞈ˗euˬ cawˬ deuˬ aˇ caˆ taˆ lehˇ yehˬ tsehˆ˗euˬ maˬ lehˇ ehˇ˗eu meh. Teu ngeh saˬ paˇ paˇ yoˆ zawˇ˗ehˇ haw muiˬ paˬ˗ehˇ ga ka le˗euˬ meh. Saˬ paˇ paˇ yoˆ teu laꞈ kʼoeˇ “Sahˬ paˬ hawˇ˗eu Miˬyehˇ Miˇkʼahˬ gaˇ kawˆ bi siˬ bi gaˬ˗awˬ” lehˇ boꞈ taˬ˗euˬ meh. Dawˬ teu naˇ “ADV” lehˇ ehˇ˗eu dawˬ teu nehˬ˗ehˇ tsaˬ˗eu meh. ADV teu naˇ bi siˬ bi gaˬ˗eu lehˇ ehˇ˗eu jeˬ pyeuꞈ˗eu Ehˇbeuˬtaiˬ˗suiꞈ lehˇ ehˇ˗eu gaˬ laˬ pyuˇ dawˬ˗ahˇ neh laˇ˗euˬ meh.

Siˇdeuˇ Paw˗tiˬ˗ahˇ jahˇ˗euˬ huiˬ˗eu mehˬ bawˬ heu poˆ naˇ mehˇ nmˇ deuˬ˗ahˇ aˇ yeˇ huiˬ dui dui˗eu gaˇ pyeuꞈ˗eu Miˬyehˇ Miˇkʼahˬ gaˇ kawˆ tsaꞈ gaˬ˗eu gaˇ heu˗ahˇ haw tsoˆ taˬ nya ni caw ba nehˬ˗euˬ meh. Kʼoeˇ naˇ mehˇ nmˇ deuˬ kʼawꞈ nui ma cehˇ tahˬ tahˬ dui dui˗awˇ gaˇ heu ya mˇ gaˇ laˬ kʼaˬ cehˇ˗eu meh. Oˇkaˇ˗laˇhoˇmaˬ˗ahˇ neh laˇ˗euˬ kawˇpawˇteuˬ tiˬ gʼaˬ (nymˬ˗mˇ iˬ nah naˇ huˬ mehˬ mehˬ˗eu gʼaˬ lehˇ kuˇ) “Nga maꞈ neh tsaꞈ gaˬ˗iˇ˗euˬ jawˇ duˬ naˇ kʼaˬ lo guˇ˗ahˇ duˇ˗eu meh. Teu gaˇ˗euˬ tsawˇ haˬ myaˬ tiˬ paˆ iˇ shaˬ shaˬ˗eu lehˇ meh” lehˇ boꞈ taˬ˗euˬ meh. Kʼoeˇ naˇ aˬ yawꞈ heu loꞈ˗ehˇ paˇ ehˇ˗eu meh. Yaw myaˬ poˆ tsawˇ haˬ deuˬ Deuˬ Goˇdeuˇ Eꞈ paˇ dmˬ laꞈ kʼoeˇ˗euˬ guiˬ lahˬ dawˬ gaˇ kawˆ˗ahˇ ya gaˬ ngeh “aˬ yawꞈ maꞈ myaˆ biˇ doˆ le˗euˬ meh” lehˇ ehˇ˗eu meh. Mehˇ nmˇ heu gʼaˬ “Nga maꞈ˗ahˇ aˬ yawꞈ maꞈ˗ahˇ gʼaˬ ya biꞈ˗euˬ miˇ neh laˬ kʼaˬ cehˇ˗eu lehˇ miˇ˗a” lehˇ ehˇ˗eu meh.

Jaˇliꞈ dzaw zaˬ heu deuˬ Luˇkaꞈ 10:2 laꞈ kʼoeˇ˗euˬ Yeˬsuˇ˗euˬ dawˬ heu naˇ, aˇ yeˇ huiˬ dui dui˗awˇ tehˬ dui dui nga lehˇ noeˬ˗eu meh. Yeˬsuˇ “Cehˇ yehˬ deˇ laˇ˗euˬ jaˆ dui dui meh. Ehˇ kʼawꞈ, yehˬ˗eu tsawˇ haˬ ui cuiˆ tehꞈ meh” lehˇ ehˇ taˬ˗euˬ meh. 1922 kʼoꞈ jiˇ leˇ dzaˬ˗ahˇ mehˇ nmˇ deuˬ Miˬyehˇ Miˇkʼahˬ gaˇ kawˆ mˬ dzeˇ miˇ dzeˇ keuˆ ni tsaꞈ gaˬ gʼeh˗eu gʼaˇ duˬ paˇ leh jeh dzehˬ laˇ˗euˬ meh.