Jaˇliꞈ˗euˬ dawˬ kʼoꞈ˗ahˇ haw ma.

Gʼaˬkʼehˇ 24:15-ahˇ “Tsawˇ muiˬ tsawˇ doeˇ dawˬ tawˆ luꞈ˗ahˇ shiˇ˗euˬ gaˇ paˇ bi gʼoꞈ dehꞈ laˇ tehꞈ˗a” lehˇ ehˇ taˬ˗euˬ meh. Heu gaˇ tsawˇ muiˬ lehˇ ehˇ˗eu heu naˇ, ziˇ jiˇ ngeh keuˆ ni Miˬyehˇ˗euˬ dawˬ˗ahˇ naˇ haˬ˗euˬ deuˬ˗ahˇ ehˇ˗eu meh. Aˬ yawꞈ maꞈ˗euˬ tsawˇ myahˇ dehꞈ˗eu jeˬ biꞈ˗eu sahˬ boꞈ laꞈ kʼoeˇ boꞈ ahˇ taˬ˗euˬ meh. (Maˬlaˬkiˇ 3:16) Tsawˇ doeˇ lehˇ ehˇ˗eu heu laꞈ kʼoeˇ naˇ Yeˬhawˇbaˬ˗euˬ gaˇ kawˆ˗ahˇ yaw muiˬ˗ehˇ maˬ ya dzaw ni shiˇ˗euˬ deuˬ jiˇ keuˬ˗eu meh. Aˬ yawꞈ maꞈ˗euˬ tsawˇ myahˇ dehꞈ˗eu jeˬ biꞈ˗eu sahˬ boꞈ laꞈ kʼoeˇ maˬ ahˇ˗a.

Yoˇhaˬ 5:28, 29-ahˇ jiˇ Gʼaˬkʼehˇ 24:15 laꞈ kʼoeˇ˗euˬ aˇ muˇ heu nyiˬ muˇ˗ahˇ paˇ ngehˬ keuˆ taˬ˗euˬ meh. Teu gaˇ Yeˬsuˇ “yaw muiˬ jeˬ mˇ˗euˬ tsawˇ haˬ˗aˬ, gʼoꞈ dehꞈ laˇ˗awˇ dehꞈ˗eu jeˬ za tehꞈ˗a. Yaw doeˇ jeˬ mˇ˗euˬ tsawˇ haˬ˗aˬ, gʼoꞈ dehꞈ laˇ˗awˇ yaˇ kʼaˬ daˇ˗eu gaˇ ya daˬ tehꞈ˗a” lehˇ ehˇ taˬ˗euˬ meh. Tsawˇ muiˬ deuˬ aˬ yawꞈ maꞈ ziˇ jiˇ ngeh keuˆ ni yaw muiˬ jeˬ mˇ˗euˬ meh. Aˬ yawꞈ maꞈ˗euˬ tsawˇ myahˇ dehꞈ˗eu jeˬ biꞈ˗eu sahˬ boꞈ laꞈ kʼoeˇ boꞈ ahˇ taˬ˗euˬ miˇ neh aˬ yawꞈ maꞈ ya gʼoꞈ dehꞈ laˇ˗eu meh. Tsawˇ doeˇ deuˬ naˇ aˬ yawꞈ maꞈ dehꞈ luꞈ ngeh yaw haiˬ yaw doeˇ jeˬ mˇ˗euˬ meh. Aˬ yawꞈ maꞈ yaˇ kʼaˬ bi daˇ˗eu gʼaˇ duˬ gʼoꞈ dehꞈ laˇ˗eu meh. Aˬ yawꞈ maꞈ˗euˬ tsawˇ myahˇ dehꞈ˗eu jeˬ biꞈ˗eu sahˬ boꞈ laꞈ kʼoeˇ maˬ boꞈ ahˇ taˬ˗a siˬ. Teu ngeh aˬ yawꞈ maꞈ˗ahˇ yaw muiˬ˗ehˇ haw˗awˇ pyehˆ tseˇ˗eu meh. Aˇ yamˬ teu laꞈ kʼoeˇ aˬ yawꞈ maꞈ Yeˬhawˇbaˬ˗euˬ gaˇ kawˆ ya dzaw˗awˇ, dehꞈ˗eu jeˬ biꞈ˗eu sahˬ boꞈ laꞈ kʼoeˇ aˬ yawꞈ maꞈ˗euˬ tsawˇ myahˇ ahˇ˗eu geuˇ maˬ geuˇ˗eu lehˇ mˇ mawˇ˗euˬ aˬ kawˬ˗aˬ za˗eu meh.

Pah mehˬ˗eu 20:12, 13-ahˇ gʼoꞈ dehꞈ laˇ˗eu yawˬ gʼaˬ na luꞈ ‘sahˬ boꞈ laꞈ kʼoeˇ boꞈ ahˇ taˬ˗euˬ’ jeˬ˗ahˇ ya mˇ caw meh lehˇ pah mehˬ taˬ˗euˬ meh. Teu naˇ miˇ shuiꞈ˗ahˇ Miˬyehˇ˗euˬ zahˇ dawˬ yaw shuiꞈ˗ahˇ ya mˇ caw gaˇ ehˇ mawꞈ˗eu meh. Maˬ mˇ caw˗eu deuˬ naˇ bi laˆ cawˆ meh.—Iˇsaˬyaˇ 65:20.

Daˬyeˬlaˇ 12:2-ahˇ “Shiˇ dzeuˇ˗euˬ tsawˇ haˬ gʼawˬ mya ni paˇ gʼoꞈ dehꞈ laˇ tehꞈ˗a. Tiˬ paˆ na deuˬ mˬ maˬ maˬ byaˆ zaˇ ziˇ dehꞈ˗eu jeˬ za˗awˇ, tiˬ paˆ na deuˬ mˬ maˬ maˬ byaˆ zaˇ ziˇ daˬ ga˗eu jeˬ za tehꞈ˗a” lehˇ ehˇ taˬ˗euˬ meh. Heu naˇ gʼoꞈ dehꞈ laˇ˗eu deuˬ uˬ duˬ duˬ leˇ ngeh “mˬ maˬ maˬ byaˆ zaˇ ziˇ dehꞈ˗eu jeˬ hawˇ˗eu mˬ maˬ maˬ byaˆ zaˇ ziˇ daˬ ga˗eu jeˬ” heu nyiˬ hmˬ laꞈ kʼoeˇ neh aˬ geu hmˬ za˗eu gaˇ kawˆ˗ahˇ ngehˬ luꞈ˗eu jeˬ pyeuꞈ meh. Teu miˇ neh tiˬ heˇ kʼoꞈ aˇ yamˬ jiˇ ngeh tiˬ deuˬ na˗aˬ, mˬ maˬ maˬ byaˆ zaˇ ziˇ dehꞈ˗eu jeˬ za˗awˇ, tiˬ deuˬ na˗aˬ mˬ maˬ maˬ byaˆ zaˇ ziˇ bi laˆ cawˆ˗eu meh.—Pah mehˬ˗eu 20:15; 21:3, 4.

Yaw jeˬ ma jeˬ tiˬ hmˬ˗ahˇ haw kaˇ˗euˇ. Gʼoꞈ dehꞈ laˇ˗eu aˇ muˇ heu nyiˬ muˇ naˇ, aˬ cawˬ˗euˬ miˇ kʼahˬ˗ahˇ jawˇ˗iˇ mawꞈ˗eu deuˬ nehˬ˗ehˇ duˇ leˇ˗eu meh. Tsawˇ muiˬ deuˬ naˇ, gaˇ mˇ˗eu biˇsaˬ maˬ ngeuˇ naˇ, jawˇ˗eu biˇsaˬ za taˬ˗euˬ deuˬ loꞈ˗ehˇ duˇ˗awˇ, teu gaˇ˗euˬ miˇ kʼahˬ zaˬ deuˬ loꞈ˗ehˇ aˬ kawˬ˗aˬ tiˬ jeˬ na za taˬ˗awˇ, ui cuiˆ gʼawˬ myahˇ ni jawˇ nya˗eu meh. Tsawˇ doeˇ deuˬ naˇ, tiˬ kʼehˬ laˇ kʼehˬ tehꞈ˗ehˇ jawˇ nya˗eu dawˬ deh gʼa˗eu biˇsaˬ za taˬ˗euˬ deuˬ loꞈ˗ehˇ duˇ˗eu meh. Ehˇ kʼawꞈ aˬ yawꞈ maꞈ miˇ kʼahˬ teu kʼahˬ˗ahˇ jawˇ daˆ leꞈ mawꞈ naˇ, teu gaˇ˗euˬ zahˇ sahˇ kʼoꞈ hawˇ˗eu aˬ yawꞈ maꞈ neh bi mˇ˗eu jeˬ˗ahˇ yaw muiˬ˗ehˇ mˇ caw˗eu lehˇ jeˬ hu ya mˇ mawˇ˗eu meh. Teu gaˇ duˇ ni gʼoꞈ dehꞈ laˇ˗eu tsawˇ doeˇ deuˬ jiˇ aˬ yawꞈ maꞈ miˇ shuiꞈ˗ahˇ jawˇ daˆ leꞈ mawꞈ naˇ, Yeˬhawˇbaˬ˗euˬ zahˇ dawˬ˗ahˇ ya mˇ caw˗awˇ miˇ shuiꞈ˗ahˇ jawˇ geuˇ˗eu tiˬ gʼaˬ pyeuꞈ˗eu lehˇ ya mˇ mawˇ˗eu meh. Aˬ jeˬ˗euˬ biˇsaˬ neh ahˇ laˇ˗euˬ maˬ kaˬ, uˬ duˬ duˬ leˇ ngeh aˬ yawꞈ maꞈ˗euˬ nui noeˬ nui ma hawˇ˗eu dehꞈ jeˬ dehꞈ kawˆ˗ahˇ haw˗awˇ tiˬ deuˬ na˗ahˇ naˇ miˇ kʼahˬ zaˬ bi pyeuꞈ laˇ˗awˇ, tiˬ deuˬ na˗ahˇ naˇ miˇ kʼahˬ˗ahˇ neh teh doˆ˗eu meh. Teu gaˇ duˇ ni miˇ shuiꞈ˗ahˇ gʼoꞈ dehꞈ laˇ˗eu yawˬ gʼaˬ na luꞈ˗ahˇ jiˇ ni aˬ yawꞈ maꞈ˗euˬ saˇ jaˇ ziꞈ˗eu jeˬ hawˇ˗eu dehꞈ jeˬ dehꞈ kawˆ˗ahˇ haw˗awˇ, miˇ shuiꞈ˗ahˇ aˬ geu deuˬ˗ahˇ bi jawˇ˗awˇ aˬ geu deuˬ˗ahˇ maˬ bi jawˇ˗eu lehˇ noeˬ tsehˆ˗eu meh.

Yeˬhawˇbaˬ naˇ gʼawˬ shaˬ gaˬ˗eu Miˬyehˇ tehꞈ˗ehˇ maˬ gʼaˬ ni, tsaˬ˗eu dawˇ˗eu Miˬyehˇ jiˇ pyeuꞈ˗eu meh. (Dawˬmehˬmehˬ˗eu 32:4; Ja ceuˬ 33:5) Yeˬhawˇbaˬ tsawˇ muiˬ tsawˇ doeˇ deuˬ˗ahˇ bi gʼoꞈ dehꞈ laˇ˗eu heu neh gʼawˬ shaˬ gaˬ˗eu jeˬ mˇ mawˇ˗euˬ meh. Ehˇ kʼawꞈ Yeˬhawˇbaˬ yawˬ gʼaˬ na luꞈ˗ahˇ aˬ yawꞈ˗euˬ goˇ˗eu tsaˬ˗eu dawˇ˗eu zahˇ˗ahˇ bi mˇ caw˗eu meh. Yeˬhawˇbaˬ aˬ yawꞈ˗ahˇ gaˬ˗awˇ, aˬ yawꞈ˗euˬ zahˇ˗ahˇ mˇ caw˗eu deuˬ˗ahˇ tehꞈ˗ehˇ miˇ shuiꞈ˗ahˇ jawˇ daˆ leꞈ˗eu aˬ kawˬ˗aˬ biꞈ˗eu meh.