1 Gawˇliˬtu 15:8-ahˇ, Pawˇluˆ “Ngaˇ˗aˬ, dehꞈ le yamˬ maˬ tsaˬ laˇ mi naˆ˗ehˇ dehꞈ le˗euˬ tsawˇ haˬ tiˬ gʼaˬ pyeuꞈ˗eu kʼawꞈ, aˇ saˬ saˬ laˇ ngeh aˬ yawꞈ ngaˬ˗ahˇ bi mawˇ le˗euˬ meh” lehˇ ehˇ taˬ˗euˬ meh. Teu˗ahˇ yaw beh aˬ dui Pawˇluˆ yaw sahˇ laꞈ kʼoeˇ Yeˬsuˇ mˬ kʼoeˇ taˆ jawˇ˗eu aˇ baˇ˗ahˇ ya mawˇ˗euˬ gaˇ ehˇ luꞈ˗eu jeˬ pyeuꞈ nga lehˇ dzawˇ nehˬ haw˗euˬ ma. Pawˇluˆ Yeˬsuˇ˗ahˇ teu loꞈ˗ehˇ mawˇ nya˗eu gʼaˇ duˬ naˇ, aˬ yawꞈ mˬ taˆ ya gʼoꞈ dehꞈ leˇ˗eu meh. Ehˇ kʼawꞈ gaˇ kawˆ teu maˇ diˇ pyeuꞈ laˇ˗eu gʼaˇ duˬ naˇ aˇ yamˬ gʼawˬ mya yaˇ kʼoꞈ ca˗a siˬ. Teu miˇ neh Pawˇluˆ yaw sahˇ laꞈ kʼoeˇ Yeˬsuˇ˗ahˇ teu loꞈ˗ehˇ ya mawˇ˗euˬ teu naˇ, dehꞈ le yamˬ maˬ tsaˬ laˇ mi naˆ˗ehˇ dehꞈ le˗euˬ tsawˇ haˬ maˬ ngeuˇ naˇ, aˇ yamˬ maˬ tsaˬ laˇ mi naˆ˗ehˇ mˬ taˆ ya gʼoꞈ daˆ leˇ˗euˬ loꞈ˗ehˇ duˇ˗eu meh. Ehˇ kʼawꞈ Jaˇliꞈ heu deuˆ˗ahˇ yaw muiˬ˗ehˇ pyehˆ tseˇ leꞈ ngeh tiˬ jawˇ gʼoˆ shaw paˇ˗eu loˬ nga lehˇ siˬ laˇ˗eu meh.

Aˬ dui Pawˇluˆ aˬ yawꞈ zahˇ beˬ paˇ ngeh pyeuꞈ laˇ˗euˬ gaˇ kawˆ deuˬ˗ahˇ ngehˬ keuˆ luꞈ˗eu lehˇ gʼoˆ shaw˗eu heu naˇ tsaˬ meh. Ehˇ kʼawꞈ Pawˇluˆ aˬ yawꞈ “dehꞈ le yamˬ maˬ tsaˬ laˇ mi naˆ˗ehˇ dehꞈ le˗euˬ” lehˇ ehˇ˗eu heu naˇ aˬ jeˬ˗ahˇ ehˇ mawꞈ˗eu nga? Pyeuꞈ leˇ nya˗eu yaw myaˬ jeˬ jaˆ˗eu meh.

Pawˇluˆ neh dehꞈ poˆ dehꞈ paˇ˗euˬ jeˬ heu naˇ, ja pyuˬ ni gʼeh˗awˇ zahˬ leˇ paˬ˗ehˇ gʼeh˗eu jeˬ pyeuꞈ. Dehꞈ le yamˬ maˬ tsaˬ gaˇ dehꞈ le˗eu heu naˇ ja pyuˬ ni gʼeh˗awˇ, zahˬ leˇ paˬ˗ehˇ gʼeh˗eu meh. Sawˇluˆ naˇ (aˇ nah naˇ aˬ cawˬ Pawˇluˆ lehˇ kuˇ) Daˬmaˬsehˇ meuˬ˗ahˇ Ka li zaˬ deuˬ˗ahˇ kʼehˬ˗eu kʼaˆ˗eu lehˇ gaˇ ma doˆ˗iˇ˗euˬ meh. Teu ngeh aˬ yawꞈ gʼoꞈ dehꞈ laˇ˗euˬ Yeˬsuˇ˗ahˇ yaw sahˇ laꞈ kʼoeˇ ya mawˇ˗eu paˬ lehˇ tiˬ pawꞈ˗iˬ maˬ noeˬ taˬ˗aˬ. Pawˇluˆ poˆ laˇ paˇ laˇ˗euˬ gaˇ kawˆ˗ahˇ aˬ yawꞈ tehꞈ˗ehˇ maˬ ngeuˇ˗eu aˬ yawꞈ kʼehˬ˗iˇ˗eu lehˇ gʼeh˗eu meuˬ teu meuˬ˗ahˇ˗euˬ Ka li zaˬ deuˬ jiˇ gaˇ kawˆ teu˗ahˇ ya gaˬ ngeh zahˬ dui dui leˇ˗eu meh. Pawˇluˆ teu poˆ aˇ dzehˬ˗ehˇ tsawˬ guˆ˗iˇ˗awˇ myaꞈ leˇ˗euˬ meh. Myaˆ nuiˆ jiˇ tiˬ kʼehˬ maˬ mawˇ laˇ ni pyeuꞈ˗iˇ˗euˬ meh.—Gʼaˬkʼehˇ 9:1-9, 17-19.

Pawˇluˆ “yamˬ law maˬ tsaˬ ngeh” poˆ laˇ paˇ laˇ. “Dehꞈ le yamˬ maˬ tsaˬ laˇ mi naˆ˗ehˇ dehꞈ le˗euˬ” lehˇ ehˇ˗eu aˬ yawꞈ yaw oeˇ dawˬ pyeuꞈ˗eu Gaˬliˇ dawˬ˗ahˇ “yamˬ law maˬ tsaˬ gaˇ dehꞈ le˗euˬ” lehˇ jiˇ yuˇ paˇ nya˗eu meh. Yeˬluˇsaˬlehˬ˗euˬ Jaˇliꞈ˗ahˇ (Gaˬ laˬ pyuˇ dawˬ) “Tiˬ gʼaˬ˗iˬ maˬ noeˬ˗euˬ gaˇ dehꞈ le˗euˬ tsawˇ haˬ” lehˇ ehˇ taˬ˗euˬ meh. Pawˇluˆ dehꞈ poˆ dehꞈ paˇ laˇ ngeh yamˬ˗ahˇ Yeˬsuˇ mˬ taˆ gʼoꞈ daˆ leˇ dzeuˇ˗euˬ meh. Teu deuˆ˗euˬ jeˬ hu jaˆ˗eu Jaˇliꞈ aˇ deuˆ deuˬ˗ahˇ Pawˇluˆ Yeˬsuˇ gʼoꞈ dehꞈ laˇ˗awˇ mˬ taˆ maˬ gʼoꞈ daˆ leˇ mi naˆ˗ehˇ Yeˬsuˇ˗ahˇ ya mawˇ˗euˬ tsawˇ haˬ deuˬ˗ahˇ ngehˬ keuˆ taˬ˗euˬ meh. Pawˇluˆ nmˇ maˬ ya mawˇ˗aˬ. (1 Gawˇliˬtu 15:4-8) Ehˇ kʼawꞈ maˬ noeˬ˗euˬ gaˇ Yeˬsuˇ Pawˇluˆ˗ahˇ bi mawˇ le˗euˬ meh. Teu naˇ Pawˇluˆ Yeˬsuˇ˗ahˇ mˬ taˆ gʼoꞈ daˆ leˇ dzeuˇ˗euˬ gaˇ ya mawˇ˗euˬ miˇ neh “yamˬ law maˬ tsaˬ ngeh” ya mawˇ˗euˬ jeˬ pyeuꞈ meh.

Pawˇluˆ yawˬ ha˗euˬ gaˇ kawˆ˗ahˇ taˬ aw˗eu laꞈ kʼoeˇ ngehˬ keuˆ luꞈ˗eu jeˬ pyeuꞈ. Jaˇliꞈ paw nui gahˇ ahˇ˗eu deuˬ tiˬ gʼaˬ na heu gaˇ Pawˇluˆ neh zmˬ taˬ˗euˬ dawˬ heu naˇ, noeˬ teˬ˗eu jeˬ˗ehˇ iˇ nya˗eu meh lehˇ ehˇ˗eu meh. Pawˇluˆ teu loꞈ˗ehˇ noeˬ luꞈ˗eu ngeuˇ naˇ, aˬ yawꞈ aˬ yawꞈ neh za taˬ˗euˬ muiˬ dui dui˗eu jeˬ teu˗ahˇ za˗eu maˬ geuˇ nya lehˇ ha geuꞈ luꞈ˗eu jeˬ pyeuꞈ meh. Pawˇluˆ “Gʼaˬ kʼehˇ dawˬ tawˆ luꞈ laꞈ kʼoeˇ ngaˇ aˬ cawˬ naˆ maˬ tseˇ teˬ˗eu gʼaˬ pyeuꞈ˗eu ma. Miˬyehˇ˗euˬ Ka li zaˬ aˇ muˇ˗ahˇ kʼehˬ haw kʼaˆ haw˗euˬ tsawˇ haˬ pyeuꞈ˗eu miˇ neh, gʼaˬ kʼehˇ lehˇ bi kuˇ˗eu kʼawꞈ maˬ geuˇ nya. Ehˇ kʼawꞈ, Miˬyehˇ˗euˬ guiˬ lahˬ baˬ da neh iˬ nah ngaˇ heu loꞈ˗ehˇ ya pyeuꞈ laˇ”˗euˬ ma lehˇ paˇ ehˇ tawꞈ taˬ˗euˬ meh.—1 Gawˇliˬtu 15:9, 10.

Pawˇluˆ “dehꞈ le yamˬ maˬ tsaˬ laˇ mi naˆ˗ehˇ dehꞈ le˗euˬ” lehˇ ehˇ˗eu heu naˇ, maˬ noeˬ˗euˬ gaˇ Yeˬsuˇ˗ahˇ ya mawˇ˗awˇ, maˬ noeˬ˗euˬ gaˇ yawˬ ha dehꞈ poˆ dehꞈ paˇ˗euˬ miˇ neh maˬ ehˇ, Pawˇluˆ yaw sahˇ laꞈ kʼoeˇ gaˇ kawˆ teu˗ahˇ mawˇ˗eu maˬ geuˇ nya lehˇ noeˬ˗eu miˇ neh maˬ ehˇ, teu loꞈ˗ehˇ ehˇ˗eu kʼawꞈ pyeuꞈ nya meh. Aˬ jeˬ lehˇ gʼeh kʼawꞈ Pawˇluˆ heu poˆ ya puˬ ya mawˇ˗euˬ jeˬ heu˗ahˇ aˇ poeˬ taˬ baw dui dui˗eu meh. Aˬ yawꞈ Yeˬsuˇ shiˇ˗awˇ gʼoꞈ dehꞈ laˇ˗euˬ yaw duˬ baw meh lehˇ jah˗eu meh. Pawˇluˆ Yeˬsuˇ gʼoꞈ dehꞈ laˇ˗euˬ gaˇ kawˆ heu aˬ cawˬ˗ahˇ tsaꞈ gaˬ ngeh tiˬ kʼehˬ maˬ kaˬ ngehˬ keuˆ˗eu meh.—Gʼaˬkʼehˇ 22:6-11; 26:13-18.