“Mehˇ nmˇ deuˬ˗euˬ nahˬ yu ni gʼeh˗eu jeˬ heu naˇ, ngaˬ˗euˬ nui ma˗ahˇ zaw laˇ˗eu lehˇ miˇ˗a” lehˇ Liˇsaˬ a ehˇ˗eu meh. Teu naˇ aˬ yawꞈ˗ahˇ Jaˇliꞈ dzaw mawꞈ laˇ ni caw ba dahˬ beh˗euˬ jeˬ pyeuꞈ meh. Mehˇ nmˇ Ehˆ jiˇ, “Ngaˬ˗ahˇ nui ma ahˇ laˇ˗euˬ teu naˇ, mehˬ˗eu jeˬ naˆ maˬ tseˇ mehˇ nmˇ deuˬ˗euˬ nahˬ yu ni gʼeh˗eu jeˬ˗ahˇ ya mawˇ˗euˬ miˇ neh ma” lehˇ ehˇ˗eu meh. Nymˬ˗mˇ mehˇ nmˇ zaˬ miˬ aˬ buˇ heu nyiˬ gʼaˬ luꞈ Jaˇliꞈ gui˗awˇ shaˇ noeˬ shaˇ sawˇ gaˇ ya leˇ˗eu meh. Ehˇ kʼawꞈ nahˬ yu ni gʼeh˗eu jeˬ heu naˇ, aˬ yawꞈ nyaꞈ˗euˬ nui ma˗ahˇ byah luꞈ˗a siˬ.

Aˬ dui nahˬ yu ni gʼeh˗eu jeˬ heu naˇ, aˬ dui˗euˬ gaˇ dahˬ gaˇ dzeˇ jawˇ˗eu tsawˇ haˬ deuˬ˗euˬ nui ma˗ahˇ zaw leˇ˗eu lehˇ ya mawˇ˗euˬ ma. Toˆ˗ehˇ naˇ aˬ dui nahˬ yu ni gʼeh˗eu jeˬ teu˗ahˇ aˬ joˆ˗ehˇ mˇ mawˇ nya˗eu nga? Nymˬ˗mˇ aˬ dui nahˬ yu ni gʼeh˗eu jeˬ mˇ mawˇ nya˗eu nyiˬ jeˬ˗ahˇ ja sawˇ ma. Teu naˇ, mehˬ˗eu jeˬ hawˇ˗eu mˇ˗eu shaˇ˗eu jeˬ heu pyeuꞈ meh. Kʼoeˇ naˇ aˬ dui nahˬ yu ni gʼeh˗eu jeˬ aˬ suˇ suˇ gʼaˬ˗ahˇ mˇ mawˇ paˬ˗ehˇ gʼeh˗eu nga lehˇ jiˇ ja sawˇ ma.

Dawˬdaˬ yaw huiˬ 31 laꞈ kʼoeˇ ngehˬ keuˆ taˬ˗euˬ bym˗eu byehˆ˗eu miˬ zaˬ deuˬ naˇ “nahˬ yu ni gʼeh˗eu” laꞈ kʼoeˇ ngehˬ˗eu meh. (Dawˬdaˬ 31:26) Aˬ yawꞈ aˬ yawꞈ ngehˬ˗eu dawˬ hawˇ˗eu teˇ saˇ˗ahˇ neh nahˬ yu ni gʼeh˗eu jeˬ mˇ mawˇ˗eu meh. Aˬ da deuˬ jiˇ nahˬ yu ni gʼeh˗eu laꞈ kʼoeˇ ya ngehˬ meh. Aˬ da aˬ ma myaˬ tiˬ paˆ zaˬ˗ahˇ guˇ guˇ˗ehˇ ngehˬ˗eu, maˬ ngeuˇ naˇ dawˬ kʼaˆ ngehˬ˗eu heu naˇ, zaˬ deuˬ˗euˬ nui ma˗ahˇ deuˬ leˇ˗eu lehˇ siˬ nya˗eu meh. Toˆ˗ehˇ jahˇ naˇ, zaˬ deuˬ jiˇ aˬ da aˬ ma˗euˬ ehˇ dawˬ˗ahˇ maˬ naˇ haˬ mawꞈ˗a. Ehˇ kʼawꞈ aˬ da aˬ ma deuˬ nahˬ yu ni gʼeh˗eu laꞈ kʼoeˇ ngehˬ naˇ, zaˬ deuˬ jiˇ aˬ yawꞈ maꞈ˗euˬ ehˇ dawˬ˗ahˇ naˇ haˬ˗eu meh.

Aˬ dui aˬ da aˬ ma pyeuꞈ maˬ pyeuꞈ kʼawꞈ, aˬ dui yawˬ gʼaˬ na luꞈ nahˬ yu ni gʼeh˗eu laꞈ kʼoeˇ aˬ joˆ˗ehˇ ngehˬ nya˗eu nga? Teu˗ahˇ Dawˬdaˬ 31:26-ahˇ haw ngeh siˬ laˇ˗eu meh. Teu deuˆ laꞈ kʼoeˇ bym˗eu byehˆ˗eu miˬ zaˬ˗ahˇ ‘zaˬ siˬ tsawˇ gahˇ ahˇ˗eu dawˬ ngehˬ doˆ le˗eu meh’ lehˇ ehˇ taˬ˗euˬ meh. Teu naˇ aˬ dui dawˬ maˬ ngehˬ mi naˆ˗ehˇ aˬ jeˬ ngehˬ paˬ nya, teˇ saˇ aˬ joˆ˗ehˇ zmˬ paˬ nya, lehˇ jeˬ hu yaw muiˬ˗ehˇ shaˇ noeˬ gaˇ ehˇ mawꞈ˗eu meh. Teu miˇ neh aˬ dui yawˬ ha˗ahˇ ‘Ngaˇ ngehˬ˗eu dawˬ heu naˇ aˬ cawˬ˗ahˇ nui ma bi pehˇ leˇ nga laˬ? maˬ ngeuˇ naˇ, nui ma bi saˇ leˇ nga laˬ?’ lehˇ naˇ haˬ˗eu heu naˇ aˬ dui˗ahˇ cawˬ ba nehˬ nya˗eu meh. (Dawˬdaˬ 15:1) Dawˬ maˬ ngehˬ mi naˆ˗ehˇ jeˬ hu shaˇ noeˬ˗eu heu naˇ nui gahˇ ahˇ˗eu jeˬ pyeuꞈ meh.

Dawˬdaˬ sahˬ boꞈ laꞈ kʼoeˇ ‘dawˬ doeˇ ngehˬ˗eu mi cehˇ coeˇ gaˇ duˇ˗eu’ meh lehˇ paˇ ehˇ taˬ˗euˬ meh. (Dawˬdaˬ 12:18) Aˬ dui yawˬ ha ngehˬ˗eu dawˬ hawˇ eu teˇ saˇ heu naˇ, aˬ cawˬ˗ahˇ aˬ joˆ˗ehˇ bi gʼeh leˇ˗eu nga lehˇ jeˬ hu shaˇ noeˬ˗eu heu naˇ, aˬ dui˗ahˇ dawˬ yaw muiˬ muiˬ lehˇ ngehˬ nya ni caw ba nehˬ˗eu meh. “Nahˬ yu ni gʼeh˗eu” jeˬ heu naˇ, aˬ dui˗ahˇ aˬ cawˬ˗ahˇ dawˬ doeˇ maˬ ngehˬ ni maˬ ehˇ, teˇ saˇ yaw kʼaˆ kʼaˆ˗ehˇ maˬ ngehˬ ni maˬ ehˇ, caw ba nehˬ laꞈ˗eu meh. (Eˇpeˇsu 4:31, 32) Aˬ dui aˬ cawˬ˗ahˇ maˬ muiˬ paw dzeˇ dzaˬ˗ahˇ ngehˬ˗awˇ noeˬ ngeh to˗aˬ, nahˬ yu ni gʼeh˗eu laꞈ kʼoeˇ yaw muiˬ paw dzeˇ dzaˬ˗ahˇ lmˇ boˬ ni gʼeh˗eu teˇ saˇ neh ya ngehˬ nehˬ˗eu meh. Gaˇ kawˆ teu nehˬ˗ehˇ taꞈ leˇ˗awˇ Yeˬhawˇbaˬ naˇ, aˬ dui dzaw geuꞈ dui dui paˬ˗ehˇ gʼeh˗eu tiˬ gʼaˬ pyeuꞈ meh. Yeˬhawˇbaˬ Eˇliˇyaˆ guˆ luꞈ ngeh yamˬ˗ahˇ mˬ taˆ gʼaˬ kʼehˇ˗ahˇ neh tiˬ tiˆ aˬ yawꞈ˗ahˇ “nahˬ yu ni gʼeh˗eu dawˬ” ngehˬ nehˬ˗euˬ meh. (1 Sahˬpaˬ 19:12) Aˬ dui nahˬ yu ni gʼeh˗eu tiˬ gʼaˬ pyeuꞈ˗eu lehˇ dawˬ neh tehꞈ˗ehˇ maˬ ngeuˇ˗eu, mˇ˗eu shaˇ˗eu jeˬ neh jiˇ ya mˇ mawˇ˗eu meh. Aˬ dui teu loꞈ˗ehˇ aˬ joˆ˗ehˇ mˇ mawˇ nya˗eu nga?

Aˬ dui nahˬ yu ni gʼeh˗eu laꞈ kʼoeˇ ngehˬ˗awˇ, mˇ˗eu shaˇ˗eu heu neh Yeˬhawˇbaˬ˗ahˇ dzaw geuꞈ˗eu ma. (Eˇpeˇsu 4:32; 5:1, 2) Dahˬ beh laˇ gaˇ ngehˬ keuˆ taˬ˗euˬ Liˇsaˬ Yeˬhawˇbaˬ˗euˬ Saˇ kiˇ deuˬ nahˬ yu ni  gʼeh˗eu jeˬ mˇ mawˇ˗eu jeˬ nehˬ˗ehˇ taꞈ leˇ˗awˇ, heu loꞈ˗ehˇ ehˇ˗eu meh. “Nga pehˬ˗euˬ nymˇ jiˇ maˬ noeˬ˗euˬ gaˇ ya pawˇ˗iˇ nga lehˇ ya siˬ˗euˬ ma. Aˇ muˇ laꞈ kʼoeˇ˗euˬ miˬ sawˇ yo zaˬ nyiˬ gu gaˇ shaˇ naˬ˗awˇ, nga pehˬ˗ahˇ myawˬ lawˬ muˇ laˆ luiˆ caw nehˬ laˇ˗euˬ meh. Teu ngeh ngaˇ Jaˇliꞈ jiˇ maˬ dzaw laˇ˗aˬ siˬ.” Teu loꞈ˗ehˇ gʼeh˗eu nahˬ yu ni gʼeh˗eu jeˬ teu naˇ, Liˇsaˬ˗ahˇ Jaˇliꞈ dzaw mawꞈ laˇ ni laˆ noeˬ nehˬ˗euˬ meh.

Dahˬ beh laˇ gaˇ ngehˬ keuˆ taˬ˗euˬ Ehˆ jiˇ Yeˬhawˇbaˬ˗euˬ Saˇ kiˇ deuˬ neh nahˬ yu ni mˇ nehˬ laꞈ˗euˬ jeˬ˗ahˇ aˇ poeˬ taˬ bawˬ˗eu meh. Ehˆ heu loꞈ˗ehˇ ehˇ˗eu meh. “Miˇ tsaˬ kʼoeˇ taˆ pyeuꞈ luꞈ˗eu jeˬ baˬ da neh ngaˇ tsawˇ haˬ deuˬ˗ahˇ maˬ jah coeˇ ni, nui ma maˬ taˬ coeˇ ni gʼeh luꞈ˗eu ma. Ngaˇ Yeˬhawˇbaˬ˗euˬ Saˇ kiˇ deuˬ nehˬ˗ehˇ ya mawˇ beh beh ngeh jiˇ aˬ yawꞈ maꞈ˗ahˇ maˬ jah coeˇ nya. Aˬ yawꞈ maꞈ ‘Ngaˬ˗ahˇ aˬ jeˬ miˇ neh mˇ muiˬ nehˬ laꞈ˗eu nga? Ngaˬ˗ahˇ aˬ jeˬ miˇ neh teu naˆ naˆ˗ehˇ nui ma ahˇ˗eu nga?’ lehˇ noeˬ laˇ nya. Ehˇ kʼawꞈ ngaˬ˗ahˇ Jaˇliꞈ mehˬ˗eu gʼaˬ nui ma keuˆ˗eu laꞈ kʼoeˇ nui gaˬ hawˇ˗eu nahˬ yu ni gʼeh˗eu jeˬ mˇ mawˇ nehˬ laꞈ˗euˬ miˇ neh, aˬ yawꞈ˗ahˇ nui ma taˬ laˇ˗euˬ ma.” Teu baˬ da neh aˬ jeˬ pyeuꞈ laˇ˗euˬ nga? Ehˆ “Aˇ nah naˇ ngaˇ Jaˇliꞈ dzaw˗eu jeˬ˗ahˇ haw tsoˆ taˬ nya dzehˬ laˇ˗euˬ ma” lehˇ ehˇ˗eu meh.

Aˇ muˇ laꞈ kʼoeˇ˗euˬ deuˬ neh nui gaˬ keuˆ˗eu laꞈ kʼoeˇ nahˬ yu ni mˇ nehˬ laꞈ˗euˬ jeˬ heu naˇ, Liˇsaˬ hawˇ˗eu Ehˆ˗euˬ nui ma˗ahˇ zaw leˇ˗euˬ meh. Kʼoeˇ naˇ aˬ yawꞈ nyaꞈ Jaˇliꞈ laꞈ kʼoeˇ˗euˬ yaw tsaˬ yaw dawˇ jeˬ˗ahˇ siˬ nya mawꞈ dzehˬ laˇ˗awˇ, Yeˬhawˇbaˬ hawˇ˗eu mehˇ nmˇ deuˬ˗ahˇ nui ma taˬ dzehˬ laˇ˗euˬ meh.

Tiˬ deuˬ na˗euˬ gʼaˇ duˬ aˬ cawˬ˗ahˇ nahˬ yu ni yaw bya yaw lawˬ lawˬ˗ehˇ ngehˬ cawˬ˗eu heu naˇ, yaw shaˬ maˬ ngeuˇ˗a. Aˬ jeˬ miˇ neh ehˇ naˇ, aˬ yawꞈ maꞈ teu loꞈ˗ehˇ gʼeh˗eu nymˇ jiˇ, maˬ ngeuˇ naˇ teu loꞈ˗ehˇ gʼeh˗eu jawˇ kʼahˬ˗ahˇ huiˬ laˇ˗euˬ miˇ neh meh. Teu naˇ ja ceuˬ paˬ˗ehˇ gʼeh˗eu jeˬ pyeuꞈ meh. Ehˇ kʼawꞈ zahˇ sahˇ kʼoꞈ teu baˬ da neh nahˬ yu ni gʼeh nya˗eu heu naˇ, Miˬyehˇ˗euˬ nahˬ yu ni gʼeh˗eu jeˬ˗ahˇ dzaw geuꞈ˗eu jeˬ pyeuꞈ meh lehˇ maˬ ehˇ nya˗a.—Gʼaˬkʼehˇ 28:2-ahˇ sheu cehˆ.

Maˇ diˇ nahˬ yu ni gʼeh˗eu jeˬ heu naˇ Miˬyehˇ˗euˬ muiˬ˗eu shawˇ˗eu yaw sahˇ laꞈ kʼoeˇ siˬ le˗euˬ aˇ siˬ tiˬ jeˬ pyeuꞈ meh. (Gaˬlaˬtiˆ 5:22, 23) Teu miˇ neh aˬ dui nahˬ yu ni gʼeh˗eu jeˬ mˇ mawˇ nya˗eu gʼaˇ duˬ naˇ, Miˬyehˇ˗euˬ muiˬ˗eu shawˇ˗eu yaw sahˇ neh ya bi caw ba˗eu meh. Aˬ dui toˆ˗ehˇ jahˇ˗awˇ neh hawˇ˗eu Yeˬhawˇbaˬ hawˇ˗eu Yeˬsuˇ loꞈ˗ehˇ nahˬ yu ni gʼeh˗eu jeˬ mˇ mawˇ nya˗eu meh. Ka li zaˬ pyeuꞈ˗eu aˬ dui aˬ cawˬ˗ahˇ nui ma ahˇ˗awˇ, Yeˬhawˇbaˬ hawˇ˗eu tsawˇ haˬ deuˬ˗ahˇ gaˬ˗eu miˇ neh nahˬ yu ni gʼeh˗eu jeˬ mˇ mawˇ˗eu ma. Aˬ dui mˇ mawˇ˗eu nahˬ yu ni gʼeh˗eu jeˬ heu naˇ, nui ma laꞈ kʼoeˇ neh doˆ laˇ˗euˬ jeˬ pyeuꞈ˗eu miˇ neh baoˬ jaˆ˗awˇ, Miˬyehˇ jiˇ nui kʼahˇ shiˇ˗eu meh.

Aˬ dui yawˬ ha˗ahˇ nahˬ yu ni mˇ nehˬ laꞈ˗eu deuˬ˗ahˇ maˬ ehˇ, yawˬ ha siˬ nya˗eu deuˬ˗ahˇ maˬ ehˇ, nahˬ yu ni gʼeh˗eu jeˬ mˇ mawˇ˗eu heu naˇ yaw awˬ meh. (2 Saˬmeuˬlaˆ 2:6) Nahˬ yu ni gʼeh˗eu jeˬ mˇ mawˇ nya˗eu tiˬ jeˬ naˇ, guiˬ lahˬ huiˬ nehˬ˗eu heu meh. (Gawˇlawˇsehˇ 3:15) Ehˇ kʼawꞈ tiˬ gʼaˬ na˗ahˇ naˇ nahˬ yu ni mˇ nehˬ paˬ˗ehˇ maˬ gʼeh nga lehˇ noeˬ laˇ naˇ tawˇ neh?

Shaˇ noeˬ haw sheˇ, Yeˬhawˇbaˬ naˇ nahˬ yu ni gʼeh˗eu jeˬ mˇ mawˇ˗eu jeˬ nehˬ˗ehˇ taꞈ leˇ˗awˇ, aˬ dui dzaw geuꞈ dui dui paˬ˗ehˇ gʼeh˗eu tiˬ gʼaˬ pyeuꞈ meh. Jaˇliꞈ laꞈ kʼoeˇ nahˬ yu ni gʼeh˗eu jeˬ mˇ mawˇ˗eu jeˬ nehˬ˗ehˇ taꞈ leˇ˗awˇ, aˇ yeˇ huiˬ˗eu jeˬ˗ahˇ mehˬ nehˬ taˬ˗euˬ meh. ‘Gʼawˬ shaˬ gaˬ˗eu guiˬ lahˬ yaw dzahˇ’ lehˇ ehˇ˗eu dawˬ˗ahˇ Ka li zaˬ Gaˬliˇ Jaˇliꞈ laꞈ kʼoeˇ yaw myaˬ poˆ zmˬ taˬ˗euˬ meh. Miˬyehˇ aˬ dui˗ahˇ nahˬ yu ni gʼeh˗eu jeˬ aˬ joˆ˗ehˇ mˇ mawˇ˗eu nga?

Yeˬhawˇbaˬ dehꞈ ziˇ laꞈ kʼoeˇ loˬ˗eu jeˬ˗ahˇ lehˬ hmˬ nehˬ˗eu heu neh, tsawˇ haˬ deuˬ˗ahˇ gʼawˬ shaˬ gaˬ˗eu jeˬ mˇ mawˇ˗eu meh. (Maꞈtehˬ 5:45) Yeˬhawˇbaˬ tsawˇ haˬ deuˬ aˬ yawꞈ˗ahˇ maˬ siˬ nya laˇ ngeh neh aˬ yawꞈ maꞈ˗ahˇ gʼawˬ shaˬ gaˬ nehˬ˗euˬ meh. (Eˇpeˇsu 2:4, 5, 8) Yaw jeˬ ma jeˬ, Yeˬhawˇbaˬ tsawˇ haˬ deuˬ˗euˬ gʼaˇ duˬ tiˬ gʼaˬ tehꞈ˗ehˇ gʼeh˗eu aˬ yawꞈ gaˬ dui dui˗eu aˬ yawꞈ˗euˬ Zaˬmaˇ bi kamˇ shiˇ le˗euˬ meh. Gʼaˬ kʼehˇ Pawˇluˆ “Miˬyehˇ gʼawˬ shaˬ gaˬ˗eu guiˬ lahˬ kʼoeˇ aˇ naˆ ni huiˬ˗eu nga?” lehˇ ehˇ˗eu meh. (Eˇpeˇsu 1:7) Kʼoeˇ naˇ aˬ dui tiˬ kʼehˬ maˬ kaˬ mˇ lehˬ˗awˇ Miˬyehˇ˗ahˇ nui ma laˆ cawˆ nehˬ kʼawꞈ, aˬ yawꞈ aˬ dui˗ahˇ aˬ myah luꞈ sheuˬ gʼeh˗awˇ mehˬ nehˬ laꞈ˗eu meh. Miˬyehˇ˗euˬ dawˬ mehˬ dawˬ tsoˆ heu naˇ, “uˬ yehˇ yehˇ muˆ muˆ” gaˇ duˇ˗eu meh. (Dawˬmehˬmehˬ˗eu 32:2) Aˬ dui aˇ naˆ ni leh jeh kʼawꞈ Miˬyehˇ neh gʼawˬ shaˬ gaˬ nehˬ laꞈ˗euˬ jeˬ˗euˬ gʼaˇ duˬ guiˬ lahˬ maˬ kʼoꞈ nehˬ jiˇ coeˇ˗a. Yeˬhawˇbaˬ aˬ dui˗ahˇ gʼawˬ shaˬ maˬ gaˬ nehˬ law nmˇ˗aˬ, aˬ dui mehˬ hu paw noeˬ tmˬ˗eu jeˬ maˬ jaˆ˗eu yaw duˬ baw meh.—1 Beˬtuˆluˆ 1:13-ahˇ sheu cehˆ.

Yeˬhawˇbaˬ˗euˬ nahˬ yu ni gʼeh˗eu jeˬ heu naˇ, muiˬ dui dui˗awˇ aˬ dui˗euˬ nui ma˗ahˇ zaw laˇ˗eu meh. Aˬ dui tiˬ gʼaˬ na˗ahˇ tehꞈ˗ehˇ nahˬ yu ni mˇ nehˬ ngeh to˗aˬ, yawˬ nah na luꞈ yawˬ gʼaˬ na luꞈ˗ahˇ nahˬ yu ni mˇ nehˬ˗eu heu neh Yeˬhawˇbaˬ˗ahˇ dzaw geuꞈ˗eu leh jeh paˬ˗ehˇ gʼeh˗eu meh. (1 Teˇsaˬloˇni 5:15) Aˬ dui aˬ myah luꞈ nahˬ yu ni gʼeh˗eu jeˬ mˇ mawˇ naˇ, aˬ dui tsehꞈ teuˆ ni gʼeh˗eu aˇ nah tiˬ nah˗ahˇ lmˇ boˬ ni bi gʼeh laˇ˗eu miˬ dzaˬ tsawˬ bu˗ahˇ duˇ˗eu meh. Aˬ dui nymˇ jiˇ laꞈ kʼoeˇ˗euˬ deuˬ˗ahˇ maˬ ehˇ, nui jah taꞈ˗eu mehˇ nmˇ deuˬ˗ahˇ maˬ ehˇ, gaˇ mˇ cawˬ deuˬ˗ahˇ maˬ ehˇ, sahˬ boꞈ dzaw cawˬ deuˬ˗ahˇ maˬ ehˇ, nymˇ kaˬ taꞈ˗eu deuˬ˗ahˇ maˬ ehˇ, gʼaˬ biꞈ nya˗eu meh.

Nymˇ jiˇ laꞈ kʼoeˇ maˬ ehˇ, aˇ muˇ laꞈ kʼoeˇ maˬ ehˇ, ngehˬ˗eu jeˬ hawˇ˗eu mˇ˗eu shaˇ˗eu jeˬ neh nahˬ yu ni gʼeh˗eu jeˬ mˇ mawˇ nehˬ paˬ˗ehˇ gʼeh˗eu aˬ suˇ suˇ gʼaˬ jawˇ˗eu nga lehˇ shaˇ noeˬ haw sheˇ. Aˇ muˇ laꞈ kʼoeˇ˗euˬ mehˇ nmˇ tiˬ gʼaˬ na iˇ kahˇ˗euˬ gaˇ deuˬ mˇ gaˇ maˬ ehˇ, myawˬ lawˬ muˇ zeuˇ gaˇ maˬ ehˇ, bi caw ba mawꞈ˗eu kʼawꞈ pyeuꞈ nya meh. Nawˇ tsaꞈ gaˬ˗iˇ ngeh, caw ba˗eu jeˬ loˬ˗eu tiˬ gʼaˬ na˗ahˇ ya mawˇ ngeh, aˬ yawꞈ˗ahˇ caw ba nehˬ nya ma laˬ?

Aˬ dui Yeˬhawˇbaˬ˗ahˇ dzaw geuꞈ˗eu laꞈ kʼoeˇ dawˬ neh maˬ ehˇ, mˇ˗eu shaˇ˗eu jeˬ neh maˬ ehˇ, “nahˬ yu ni gʼeh˗eu jeˬ mˇ mawˇ luꞈ˗uˇ.”