Yaw myaˬ gʼaˬ Yeˬsuˇ tahˇ joe nyiˬ gʼaˬ˗euˬ yaw kaˬ˗ahˇ zeuˇ liˬ kʼoeˇ taˆ bi taꞈ sehꞈ˗euˬ gaˇ kawˆ˗ahˇ siˬ nya˗eu meh. (Maꞈtehˬ 27:35-38) Ehˇ kʼawꞈ tiˬ deuˬ na Yeˬsuˇ˗ahˇ baꞈ pahˬ˗eu lehˇ lehˬ hmˬ taˬ˗euˬ lo kʼahˬ˗ahˇ, Yeˬsuˇ˗ahˇ baꞈ pahˬ˗iˇ˗euˬ lehˇ Jaˇliꞈ˗ahˇ maˇ jawˆ ni ehˇ taˬ˗euˬ maˬ jaˆ nga lehˇ pyehˇ˗eu meh.—Maˬkuˆ 15:42-46.

Laˬ kʼaˬ cehˇ˗eu guiˬ lahˬ dawˬ sahˬ boꞈ˗ahˇ poˆ tseˇ˗eu tiˬ gʼaˬ na, bi sehꞈ˗euˬ yaw haiˬ yaw doeˇ deuˬ˗ahˇ lmˬ bymˇ lo kʼahˬ˗ahˇ bi duˬ pahˬ˗eu lehˇ ehˇ˗eu gaˇ kawˆ heu˗ahˇ maˬ jah coeˇ ni gʼeh˗eu meh. Ehˇliˬ˗oˬ Saˇbaˬ lehˇ kuˇ˗eu sahˬ boꞈ boꞈ˗eu saˬ laˬ tiˬ gʼaˬ gaˇ kawˆ teu nehˬ˗ehˇ taꞈ leˇ˗awˇ, Saˬ˗miˇsoˇniˬ˗yaˬ lehˇ kuˇ˗eu paˇ dmˬ tiˬ dmˬ˗ahˇ heu loꞈ˗ehˇ boꞈ taˬ˗euˬ meh. “Zeuˇ liˬ kʼoeˇ taˆ taꞈ sehꞈ˗eu jeˬ heu naˇ, aˇ dzehˬ˗ehˇ doeˇ˗eu tsawˇ haˬ deuˬ˗ahˇ taꞈ sehꞈ˗eu jeˬ pyeuꞈ meh. Teu miˇ neh teu loꞈ˗ehˇ gʼeh˗eu tsawˇ haˬ deuˬ˗ahˇ Loˇmaˆ tsawˇ haˬ deuˬ lmˬ bymˇ lo kʼahˬ˗ahˇ yaw muiˬ˗ehˇ bi duˬ pahˬ˗eu lehˇ ehˇ˗eu heu naˇ, nui gahˇ ahˇ˗eu tiˬ deuˬ na˗euˬ gʼaˇ duˬ uiˇ yoeˇ laˇ paˬ˗ehˇ gʼeh˗eu jeˬ pyeuꞈ luꞈ˗eu meh.” Loˇmaˆ tsawˇ haˬ deuˬ yaw haiˬ yaw doeˇ deuˬ˗ahˇ aˇ saˬ saˬ leˇ ngeh keuˆ ni daˬ ga daˬ nyoeˇ siˬ ni jahˇ nehˬ mawꞈ˗eu meh. Teu miˇ neh aˬ myah myah naˇ aˬ yawꞈ maꞈ tsawˇ shiˇ˗euˬ gʼawˇ mawˇ teu˗ahˇ zeuˇ liˬ kʼoeˇ taˆ byehˇ dzeh taˬ˗awˇ, bawˇ tsahˬ˗euˬ jeˬ zaˬ neh bi dzaˬ˗eu meh. Bawˇ tsahˬ jeˬ zaˬ neh maˬ dzaˬ jiˇ˗euˬ deuˬ naˇ, lmˬ bymˇ tiˬ tsahˇ na˗ahˇ biˬ dzeh˗iˇ˗eu meh.

Ehˇ kʼawꞈ bi daˇ sehꞈ˗euˬ Yuˇdaˆ tsawˇ haˬ tiˬ deuˬ na˗ahˇ lmˬ bymˇ lo kʼahˬ˗ahˇ baꞈ pahˬ˗eu lehˇ, gaˇ hu˗euˬ gaˇ kawˆ˗ahˇ pyehˆ tseˇ˗eu deuˬ neh poˆ mawˇ taˬ˗euˬ jeˬ˗ahˇ haw ngeh siˬ laˇ˗eu meh. 1968 kʼoꞈ˗ahˇ dahˬ beh˗euˬ Ka li zaˬ saˇ ka˗ahˇ bi daˇ sehꞈ˗euˬ tsawˇ haˬ tiˬ gʼaˬ˗euˬ shaˬ yoeˬ˗ahˇ poˆ mawˇ˗euˬ meh. Shaˬ yoeˬ teu˗ahˇ Yeˬluˇsaˬlehˬ meuˬ˗euˬ dawˬ peh jaˆ˗eu Yuˇdaˆ tsawˇ haˬ tiˬ pehˬ˗euˬ lmˬ bymˇ lo kʼahˬ˗ahˇ poˆ mawˇ˗euˬ meh. Shaˬ yoeˬ teu˗ahˇ shaˬ yoeˬ dawˆ ahˇ˗eu bahˬ keuˆ˗ahˇ dawˆ ahˇ taˬ˗euˬ meh. Shaˬ yoeˬ teu deuˬ laꞈ kʼoeˇ kuiˇ nuiꞈ˗euˬ shaˬ yoeˬ jiˇ ahˇ˗eu meh. Kuiˇ nuiꞈ˗euˬ shaˬ yoeˬ teu˗ahˇ laꞈ zaˬ tiˬ daˬ ehˇ gʼaˬ naˆ ni mahˇ˗eu shmˇ sehˬ neh teˇ byaꞈ tiˬ byaꞈ taꞈ tsoˆ taˬ˗euˬ meh. Saˇbaˬ “Kuiˇ nuiꞈ shaˬ yoeˬ heu naˇ, Yeˬhoˬkaˬnaˬ lehˇ kuˇ˗eu zaˬ yo aˬ li tiˬ gʼaˬ˗euˬ kuiˇ nuiꞈ shaˬ yoeˬ pyeuꞈ meh. Teu gaˇ mawˇ˗euˬ kuiˇ nuiꞈ shaˬ yoeˬ heu naˇ, laˬ kʼaˬ cehˇ˗eu guiˬ lahˬ dawˬ sahˬ boꞈ laꞈ kʼoeˇ Yeˬsuˇ lmˬ bymˇ lo kʼahˬ˗ahˇ bi baꞈ pahˬ˗euˬ meh lehˇ ehˇ taˬ˗euˬ dawˬ heu maˇ diˇ ngeuˇ˗eu lehˇ bi siˬ laˇ˗eu jeˬ pyeuꞈ meh. Kʼoeˇ naˇ Yeˬhoˬkaˬnaˬ˗euˬ kuiˇ nuiꞈ shaˬ yoeˬ heu naˇ, Yeˬsuˇ˗euˬ saˇ ka˗ahˇ zeuˇ liˬ kʼoeˇ taˆ bi taꞈ sehꞈ˗euˬ deuˬ˗ahˇ Loˇmaˆ tsawˇ haˬ deuˬ Yuˇdaˆ˗euˬ zahˇ sahˇ kʼoꞈ jaˆ˗eu loꞈ˗ehˇ lmˬ bymˇ lo kʼahˬ˗ahˇ bi baꞈ pahˬ˗eu lehˇ siˬ laˇ˗eu jeˬ jiˇ pyeuꞈ meh” lehˇ ehˇ˗eu meh.

Kuiˇ nuiꞈ shaˬ yoeˬ heu baˬ da neh Yeˬsuˇ zeuˇ liˬ kʼoeˇ taˆ aˬ geu jeˬ lehˇ bi taꞈ tehˬ˗euˬ gaˇ kawˆ nehˬ˗ehˇ taꞈ leˇ˗awˇ, noeˬ˗eu jeˬ beu gaˇ˗eu kʼawꞈ pyeuꞈ nya meh. Ehˇ kʼawꞈ bi daˇ sehꞈ˗euˬ yaw haiˬ yaw doeˇ tiˬ deuˬ na˗ahˇ lmˬ bymˇ lo kʼahˬ˗ahˇ baꞈ pahˬ˗euˬ yaw duˬ baw˗eu lehˇ siˬ duˬ laˇ˗eu meh. Teu miˇ neh Jaˇliꞈ˗ahˇ Yeˬsuˇ˗euˬ gʼawˇ mawˇ lmˬ bymˇ lo kʼahˬ˗ahˇ bi baꞈ pahˬ˗euˬ meh lehˇ ehˇ taˬ˗euˬ dawˬ heu naˇ, maˇ diˇ ngeuˇ˗eu jeˬ pyeuꞈ˗awˇ, jah coeˇ paˬ˗ehˇ gʼeh˗eu saˇ kiˇ jaˆ˗eu jeˬ pyeuꞈ meh.

Teu naˆ maˬ tseˇ aˇ yeˇ huiˬ˗eu jeˬ naˇ, Yeˬhawˇbaˬ maˬ keuˆ laˇ miˇ Yeˬsuˇ smˇ muiˬ tiˬ gʼaˬ˗euˬ lmˬ bymˇ lo kʼahˬ˗ahˇ bi duˬ pahˬ meh lehˇ ehˇ taˬ˗euˬ meh. Yeˬhawˇbaˬ˗euˬ dawˬ heu maˬ byah laˇ ni tiˬ gʼaˬ˗iˬ ehˇ naˇ tiˬ gʼaˬ˗iˬ maˬ laˆ tsoeˬ laˇ nya˗a.—Iˇsaˬyaˇ 53:9; 55:11.