“Yeˬhawˇbaˬ˗euˬ Saˇ kiˇ deuˬ naˇ tsawˇ haˬ deuˬ˗ahˇ tehꞈ˗ehˇ maˬ ngeuˇ˗eu, ngaˬ˗euˬ aˬ kuiˬ˗ahˇ jiˇ gʼawˬ shaˬ gaˬ˗eu meh. Tiˬ nah sahˬ boꞈ laˆ lawˬ gaˇ dzeˇ yawꞈ luꞈ˗eu Iˬleˬ ngaˬ˗euˬ aˬ kuiˬ˗ahˇ Biˇsaꞈkiꞈ kaˬ muˇ bi dzaˬ˗euˬ meh. Teu gaˇ neh taꞈ naˇ ngaˇ teu gaˇ kʼaˇ iˇ tsehˆ ngeh, ngaˬ˗euˬ aˬ kuiˬ aˬ yawꞈ maꞈ jawˇ gaˇ theꞈ˗ehˇ iˇ mawꞈ˗eu meh.

“Ba la gʼawˬ mya siˬ byah laˇ˗euˬ meh. Ngaˇ aˬ yawꞈ maꞈ nehˬ˗ehˇ tiˬ kʼehˬ maˬ taˬ ya mawˇ˗awˇ, ngaˬ˗euˬ aˬ kuiˬ jiˇ aˬ yawꞈ maꞈ˗euˬ Biˇsaꞈ˗kiꞈ kaˬ muˇ ya dzaˬ gaˇ ya leˇ˗eu meh. Kʼoeˇ naˇ ngaˇ jiˇ aˬ yawꞈ maꞈ nehˬ˗ehˇ dawˬ ya ngehˬ cawˬ gaˇ ya leˇ miˇ˗a. Ehˇ kʼawꞈ ngaˇ aˬ yawꞈ maꞈ nehˬ˗ehˇ yaw kʼaˆ˗ehˇ maˬ gʼoeˇ peuˬ nya. Aˬ jeˬ miˇ neh ehˇ naˇ, ngaˇ 70 kʼoꞈ dzehˬ iˇ˗euˬ uˬ taꞈ, aˬ yawꞈ maꞈ˗euˬ nui jah nehˬ˗ehˇ taꞈ leˇ˗awˇ yaw kʼaˆ˗ehˇ maˬ siˬ nya˗eu miˇ neh. Kʼoeˇ naˇ ngaˇ ka li zaˬ deuˬ˗euˬ uˬ duˬ tahˬ nymˇ˗ahˇ iˇ˗euˬ kʼawꞈ, ngaˇ noeˬ˗eu loꞈ˗ehˇ maˬ pyeuꞈ˗eu miˇ neh yawˬ haˇ yawˬ ha Jaˇliꞈ gui˗eu heu naˇ kʼaˇ muiˬ˗eu jeˬ pyeuꞈ ngaˇ˗a lehˇ noeˬ˗euˬ ma.

“Aˇ yamˬ teu laꞈ kʼoeˇ ngaˇ meuˬ laꞈ kʼoeˇ iˇ ngeh, yawˬ gaˇ yawˬ˗ahˇ jiˇ Yeˬhawˇbaˬ˗euˬ Saˇ kiˇ deuˬ sahˬ boꞈ laˆ lawˬ gaˇ dzeˇ yawꞈ luꞈ gaˇ ya mawˇ˗euˬ ma. Aˬ yawꞈ maꞈ naˇ aˬ myahˬ luꞈ yaw gʼoeˇ gʼoeˇ lehˇ gʼeh˗awˇ, ngaˇ naˇ haˬ ngeh jiˇ Jaˇliꞈ laꞈ kʼoeˇ neh dawˬ kʼoꞈ biꞈ nehˬ laꞈ˗eu meh. Teu miˇ neh ngaˇ aˬ yawꞈ maꞈ˗ahˇ nui ma taˬ dzehˬ laˇ nyaˬ.

“Tiˬ nah Iˬleˬ ngaˬ˗ahˇ ‘Aˬ bawˇ˗oˇ, nawˬ˗ahˇ jeˬ zaˬ heu naˇ Miˬyehˇ neh aˬ dui˗ahˇ biꞈ˗euˬ laꞈ sawˬ pyeuꞈ˗eu lehˇ noeˬ miˇ˗a laˬ?’ lehˇ naˇ haˬ˗eu meh. Ngaˇ jiˇ ‘Euˬ, noeˬ miˇ˗a’ lehˇ ehˇ kʼoꞈ nehˬ˗euˬ ma. Teu ngeh aˬ yawꞈ ngaˬ˗ahˇ Iˇsaˬyaˇ 11:6-9-ahˇ keuˆ ni gui nehˬ laꞈ˗euˬ meh. Teu gaˇ neh naˇ ngaˇ Jaˇliꞈ˗ahˇ siˬ nya mawꞈ dzehˬ laˇ˗euˬ ma. Ehˇ kʼawꞈ ngaˇ aˬ yawꞈ maꞈ˗euˬ paˇ dmˬ maˬ yuˇ mawꞈ nya siˬ.

“Teu gaˇ neh naˇ, ngaˇ Iˬleˬ hawˇ˗eu aˬ yawꞈ˗euˬ kʼaˬ dzeˇ zaˬ Baˬ˗lehˬ nehˬ˗ehˇ Jaˇliꞈ gaˇ kawˆ tiˬ poˆ cuiˆ cuiˆ˗ehˇ ja sawˇ pyeuꞈ laˇ˗euˬ ma. Aˬ yawꞈ nyaꞈ ngaˬ˗ahˇ Ka li zaˬ maˇ diˇ deuˬ naˇ aˬ joˆ˗ehˇ gʼeh˗eu lehˇ siˬ nya˗eu gʼaˇ duˬ, Maꞈtehˬ sahˬ boꞈ˗ahˇ neh Gʼaˬkʼehˇ sahˬ boꞈ˗ahˇ keuˆ ni gui lehˇ gʼaˬ biꞈ˗eu meh. Ngaˇ jiˇ gui haw˗euˬ ma. Tiˬ kʼehˬ naˇ ngaˇ aˬ yawꞈ nyaꞈ nehˬ˗ehˇ Jaˇliꞈ dzaw laˇ˗euˬ ma. Teu naˇ 2016 kʼoꞈ jawˇ la yamˬ˗ahˇ meh.

“Ngaˬ˗ahˇ yawˬ jaw na luꞈ Jaˇliꞈ dzaw˗eu aˇ yamˬ˗ahˇ hawˇ˗eu mehˬ bawˬ˗ahˇ iˇ˗eu aˇ yamˬ kawˇ maˇ˗ehˇ bi keuˆ laˇ mawꞈ nya. Ngaˬ˗euˬ gʼaˇ duˬ Jaˇliꞈ aˬ jeˬ mehˬ˗eu lehˇ ya siˬ˗eu heu naˇ, guiˬ lahˬ tiˬ jeˬ pyeuꞈ˗awˇ laˬ kʼaˬ jiˇ cehˇ˗eu lehˇ miˇ˗a. Teu gaˇ neh tiˬ kʼoꞈ dzehˬ ni naˇ, ngaˇ iˇ cuꞈ shawˇ˗euˬ ma. Nymˬ˗mˇ ngaˇ 79 kʼoꞈ kʼawˆ laˇ˗euˬ ma. Ngaˇ tsaˬ˗eu gaˇ ma˗ahˇ cah luꞈ˗awˇ, Yeˬhawˇbaˬ ngaˬ˗ahˇ aˬ yawꞈ˗euˬ nymˇ jiˇ laꞈ kʼoeˇ˗euˬ tiˬ gʼaˬ bi pyeuꞈ laˇ˗euˬ miˇ neh ngaˬ˗ahˇ laˬ kʼaˬ cehˇ˗awˇ, guiˬ lahˬ jiˇ huiˬ˗eu lehˇ miˇ˗a.”