Yeˬsuˇ aˬ dui tiˬ gʼaˬ tiˇ gʼaˬ tsaˬ leˇ tsahˇ leˇ ni dehꞈ˗awˬ lehˇ mehˬ yaꞈ˗euˬ meh. Yeˬsuˇ aˬ yawꞈ˗euˬ zaˬ lahˇ deuˬ˗ahˇ “Miˇ tsaˬ kʼoeˇ taˆ nui saˇ oꞈ˗eu jeˬ hehˇ leꞈ˗eu gʼaˇ duˬ ngaˇ oe˗euˬ meh lehˇ taˬ noeˬ. Nui saˇ oꞈ˗eu jeˬ hehˇ leꞈ˗eu lehˇ oe˗euˬ maˬ ngeuˇ. Mi cehˇ yuˇ leꞈ˗eu lehˇ ngaˇ oe˗euˬ ma. Aˬ li deuˬ aˬ da˗ahˇ muiˇ ni maˬ ehˇ, aˬ buˇ deuˬ aˬ ma˗ahˇ muiˇ ni maˬ ehˇ, kuiˬ ma deuˬ boeˇ miˬ aˬ ma˗ahˇ muiˇ ni maˬ ehˇ, ngaˇ oe˗euˬ ma” lehˇ ehˇ nehˬ˗euˬ meh. (Maꞈtehˬ 10:34, 35) Yeˬsuˇ aˬ jeˬ˗ahˇ ehˇ mawꞈ˗eu nga?

Yeˬsuˇ nymˇ jiˇ laꞈ kʼoeˇ˗euˬ deuˬ˗ahˇ maˬ bi pyaˆ maˬ bi shaˆ˗iˇ mawꞈ˗a. Ehˇ kʼawꞈ Yeˬsuˇ aˬ yawꞈ neh mehˬ˗euˬ jeˬ heu naˇ, nymˇ jiˇ tiˬ jiˇ na˗ahˇ teu loꞈ˗ehˇ bi pyeuꞈ laˇ luꞈ˗eu meh lehˇ siˬ nya˗eu meh. Teu miˇ neh Yeˬsuˇ˗euˬ zaˬ lahˇ pyeuꞈ mawꞈ˗awˇ iˇ cuꞈ shawˇ mawꞈ˗eu deuˬ, yawˬ ha neh heu loꞈ˗ehˇ noeˬ tsehˆ˗euˬ jeˬ baˬ da neh aˬ jeˬ˗ahˇ ya puˬ˗eu lehˇ siˬ nya˗eu loˬ meh. Nui jah maˬ ahˇ˗eu nymˇ jiˇ laꞈ kʼoeˇ˗euˬ deuˬ laˆ tsoeˬ laˇ˗eu kʼawꞈ pyeuꞈ nya˗eu miˇ neh Yeˬsuˇ Ka li neh mehˬ˗euˬ dawˬ˗ahˇ caw teh˗eu maˬ awˬ˗eu kʼawꞈ pyeuꞈ nya meh.

Jaˇliꞈ laꞈ kʼoeˇ Ka li zaˬ deuˬ˗ahˇ “tsawˇ haˬ yawˬ gʼaˬ na luꞈ nehˬ˗ehˇ tsaˬ leˇ ni” dehꞈ˗awˬ lehˇ gʼaˬ biꞈ taˬ˗euˬ meh. (Loˇmaˆ 12:18) Ehˇ kʼawꞈ Yeˬsuˇ neh mehˬ˗euˬ jeˬ heu naˇ, nymˇ jiˇ tiˬ jiˇ na˗ahˇ bi pyaˆ bi shaˆ laˇ nya˗eu meh. Nymˇ jiˇ laꞈ kʼoeˇ˗euˬ deuˬ tiˬ gʼaˬ na Yeˬsuˇ neh mehˬ˗euˬ jeˬ˗ahˇ mˇ caw ngeh, dzeˇ luꞈ˗eu nui deuˬ laˆ tsoeˬ laˇ˗eu kʼawꞈ pyeuꞈ nya meh. Teu loꞈ˗ehˇ laˆ tsoeˬ˗eu deuˬ naˇ, Jaˇliꞈ laꞈ kʼoeˇ˗euˬ yaw tsaˬ yaw dawˇ dzaw˗eu gʼaˬ˗euˬ ‘muiˇ˗eu’ gʼaˬ pyeuꞈ laˇ nya˗eu meh.—Maꞈtehˬ 10:36.

Nui jah maˬ duˇ leˇ˗eu nymˇ jiˇ laꞈ kʼoeˇ jawˇ˗eu Yeˬsuˇ˗euˬ zaˬ lahˇ deuˬ Yeˬhawˇbaˬ hawˇ˗eu Yeˬsuˇ nui kʼahˇ shiˇ ni mˇ de laˬ? Nymˇ jiˇ laꞈ kʼoeˇ˗euˬ deuˬ nui kʼahˇ shiˇ ni mˇ de laˬ lehˇ ya noeˬ tsehˆ˗eu meh. Yaw jeˬ ma jeˬ, nui jah maˬ ahˇ˗eu yuiꞈ nyiˇ deuˬ zahˇ nehˬ˗ehˇ taꞈ˗eu bawˬ˗iˬ deuˬ˗ahˇ jahˇ lehˇ ka tiˇ laˇ nya˗eu meh. Teu ngeh aˬ suˇ gʼaˬ nui kʼahˇ shiˇ ni mˇ˗eu lehˇ ya noeˬ tsehˆ˗eu meh. Yeˬsuˇ “Ngaˬ˗ahˇ gaˬ˗eu naˆ maˬ tseˇ, yawˬ ha˗euˬ aˬ da aˬ ma˗ahˇ gaˬ dzehˬ˗eu tsawˇ haˬ aˬ geu gʼaˬ maˬ kaˬ, ngaˬ˗euˬ gʼaˬ kʼehˇ geuꞈ˗eu maˬ geuˇ˗a” lehˇ lehˇ ehˇ˗eu meh. (Maꞈtehˬ 10:37) Teu naˇ Yeˬsuˇ aˬ yawꞈ˗euˬ zaˬ lahˇ pyeuꞈ mawꞈ˗eu deuˬ aˬ da aˬ ma˗ahˇ gʼawˬ naˆ ni maˬ ya gaˬ˗a lehˇ ehˇ mawꞈ˗eu maˬ ngeuˇ˗a. Ehˇ kʼawꞈ dehꞈ ziˇ laꞈ kʼoeˇ neh aˇ yeˇ kʼaˇ huiˬ˗eu jeˬ naˇ, aˬ jeˬ nga lehˇ noeˬ tsehˆ nya ni mehˬ luꞈ˗eu jeˬ pyeuꞈ meh. Yeˬhawˇbaˬ˗ahˇ uˬ duˬ tahˬ gaˇ laˆ tsoeˬ˗eu nui jah maˬ ahˇ˗eu nymˇ jiˇ laꞈ kʼoeˇ˗euˬ deuˬ˗ahˇ ya gaˬ daˆ leꞈ kʼawꞈ, aˬ dui Yeˬhawˇbaˬ˗ahˇ ya gaˬ dzehˬ meh lehˇ ya si nya taˬ˗eu meh.

Nymˇ jiˇ laꞈ kʼoeˇ˗euˬ deuˬ laˆ tsoeˬ laˇ ngeh, aˬ dui˗euˬ nui ma˗ahˇ deuˬ laˇ˗eu meh. Ehˇ kʼawꞈ aˬ dui Yeˬsuˇ neh “Yawˬ ha˗euˬ laꞈ yaꞈ baꞈ˗awˇ ngaˬ˗euˬ mehˬ nah maˬ caw teh laˇ˗eu tsawˇ haˬ aˬ geu gʼaˬ maˬ kaˬ, ngaˬ˗euˬ gʼaˬ kʼehˇ geuꞈ˗eu maˬ geuˇ˗a” lehˇ ehˇ˗euˬ dawˬ˗ahˇ ya noeˬ mawˇ˗eu meh. (Maꞈtehˬ 10:38) Aˬ dui Yeˬsuˇ˗euˬ zaˬ lahˇ deuˬ naˇ nymˇ jiˇ laꞈ kʼoeˇ˗euˬ deuˬ neh laˆ tsoeˬ laˇ gaˇ ya daˬ meh lehˇ siˬ nya˗eu ma. Ehˇ kʼawꞈ aˬ dui aˬ dui neh mˇ˗euˬ jeˬ teu baˬ da neh, nui jah maˬ ahˇ˗eu nymˇ jiˇ laꞈ kʼoeˇ˗euˬ deuˬ nui ma paˇ laˇ˗awˇ, Jaˇliꞈ dzaw laˇ gaˇ noeˬ tmˬ luꞈ˗eu ma.—1 Beˬtuˆluˆ 3:1, 2.