1. Aˬ dui Yeˬhawˇbaˬ˗ahˇ guiˬ lahˬ shaˇ˗eu jeˬ heu˗ahˇ aˬ joˆ˗ehˇ haw paˬ˗ehˇ gʼeh˗eu nga?

 Mˬ hawˇ˗eu miˇ beh˗euˬ Yeˬhawˇbaˬ Miˬyehˇ aˬ dui˗ahˇ aˬ yawꞈ˗ahˇ guiˬ lahˬ shaˇ˗eu muiˬ dui dui˗eu laꞈ sawˬ biꞈ nehˬ taˬ˗euˬ meh. Shaˇ noeˬ haw sheˇ, aˬ dui jeˬ hu ehˇ taˬ˗eu maˬ loˬ ni aˬ geu ngeh yamˬ˗ahˇ maˬ kaˬ, aˬ jeˬ˗euˬ dawˬ neh maˬ kaˬ, nui ma laꞈ kʼoeˇ pyeuꞈ luꞈ˗eu jeˬ Yeˬhawˇbaˬ˗ahˇ guiˬ lahˬ shaˇ˗awˇ dzawˇ nehˬ nya meh. Aˬ dui naˇ gawˇ laˆ saˆ duˬ˗ahˇ yuꞈ luꞈ˗eu maˬ kaˬ, tawˬ laꞈ kʼoeˇ uˇ luꞈ˗eu maˬ kaˬ, aˬ dui˗euˬ shaˇ dawˬ˗ahˇ Yeˬhawˇbaˬ naˇ haˬ nehˬ laꞈ meh lehˇ jah ziꞈ˗eu laꞈ kʼoeˇ guiˬ lahˬ shaˇ nya meh. Aˬ dui laꞈ sawˬ heu˗ahˇ aˇ poeˬ taˬ baw dui dui˗eu ma.

2. Sahˬ paˬ Daˬbiˇ guiˬ lahˬ shaˇ˗eu jeˬ˗ahˇ aˇ poeˬ aˬ joˆ˗ehˇ taˬ baw˗euˬ nga?

² Sahˬ paˬ Daˬbiˇ guiˬ lahˬ shaˇ˗eu jeˬ˗ahˇ aˇ poeˬ taˬ baw dui dui˗eu meh. Aˬ yawꞈ Yeˬhawˇbaˬ˗ahˇ “Tsiˇ yaw saw doꞈ damˬ˗euˬ gaˇ ha geuꞈ˗eu loꞈ˗ehˇ, ngaˬ˗euˬ shaˇ dawˬ˗ahˇ ha geuꞈ nehˬ laꞈ˗awˬ” lehˇ caˇ keuˆ˗euˬ meh. (Ja ceuˬ 141:1, 2) Daˬbiˇ˗euˬ saˇ ka˗ahˇ piˇ ma deuˬ Yeˬhawˇbaˬ˗ahˇ lawˇ gaˇ zmˬ˗eu tsiˇ yaw saw heu˗ahˇ, yaw muiˬ˗ehˇ ya lehˬ hmˬ˗eu meh. (Doˆ˗iˇ˗eu 30:34, 35) Tsiˇ yaw saw˗ahˇ jeˬ hu yaw muiˬ˗ehˇ lehˬ hmˬ˗awˇ lawˇ˗eu loꞈ˗ehˇ, Daˬbiˇ jiˇ mˬ taˆ Aˬda˗ahˇ aˬ jeˬ ngehˬ˗eu lehˇ jeˬ hu yaw muiˬ˗ehˇ shaˇ sawˇ˗eu meh. Aˬ dui jiˇ teu loꞈ˗ehˇ jahˇ mawꞈ˗awˇ, Yeˬhawˇbaˬ nui kʼahˇ shiˇ˗eu jeˬ˗ehˇ shaˇ mawꞈ˗eu ma.

3. Aˬ dui Yeˬhawˇbaˬ˗ahˇ guiˬ lahˬ aˬ joˆ˗ehˇ shaˇ paˬ˗ehˇ gʼeh˗eu nga? Aˬ jeˬ miˇ neh?

³ Aˬ dui Yeˬhawˇbaˬ˗ahˇ guiˬ lahˬ shaˇ ngeh, yehˬ bawˬ sehˇ lu˗ehˇ maˬ ngeuˇ ni yaw zeu baw dui dui˗eu laꞈ kʼoeˇ ya shaˇ˗eu meh. Aˬ dui Iˇsaˬyaˇ, Yeˬsaˬgeˬlaˇ, Daˬyeˬlaˇ, Yoˇhaˬ, aˬ ha oeˬ gʼaˬ neh yaw sahˇ laꞈ kʼoeˇ mawˇ˗euˬ jeˬ˗ahˇ shaˇ noeˬ haw sheˇ. Aˬ yawꞈ maꞈ neh yaw sahˇ laꞈ kʼoeˇ ya mawˇ˗euˬ jeˬ laꞈ kʼoeˇ duˇ leˇ˗eu tiˬ jeˬ na jaˆ˗eu meh. Aˬ yawꞈ maꞈ yawˬ gʼaˬ na luꞈ Yeˬhawˇbaˬ naˇ huiˬ dui mahˇ dui dui˗eu Sahˬpaˬ pyeuꞈ meh lehˇ ehˇ˗eu meh. Yaw jeˬ ma jeˬ, Iˇsaˬyaˇ ‘Sahˬpaˬ Miˬyehˇ huiˬ dui mahˇ dui dui˗eu nuiˇ mahˬ˗ahˇ nuiˇ luꞈ gaˇ’ ya mawˇ˗euˬ meh. (Iˇsaˬyaˇ 6:1-3) Yeˬsaˬgeˬlaˇ Yeˬhawˇbaˬ ‘aˇ deˇ leˇ kʼah loꞈ˗ehˇ gʼeh˗eu  yaw shehꞈ bya˗eu’ mˬ taˆ laˆ lawˬ kʼoeˇ taˆ nuiˇ luꞈ gaˇ ya mawˇ˗euˬ meh. (Yeˬsaˬgeˬlaˇ 1:26-28) Daˬyeˬlaˇ mehˬ tsoeˬ pyuˇ deuˬ ni dm taˬ˗euˬ “mˬ bymˬ miˇ bymˬ bymˬ ngeh neh dehꞈ luꞈ˗eu gʼaˬ”˗euˬ dzoˬ dzaˬ nuiˇ mahˬ miˬ lmˇ nyehˆ oˬ ni jaˆ gaˇ ya mawˇ˗euˬ meh. (Daˬyeˬlaˇ 7:9, 10) Gʼaˬ kʼehˇ Yoˇhaˬ jiˇ Yeˬhawˇbaˬ nyoeˇ naˆ naˆ˗eu kʼaˬ lo sehˇ˗ahˇ duˇ˗eu aˇ deˇ leˇ kʼah neh jaˆ jawˬ taˬ˗euˬ dzoˬ dzaˬ nuiˇ mahˬ kʼoeˇ taˆ nuiˇ luꞈ gaˇ ya mawˇ˗euˬ meh. (Pah mehˬ˗eu 4:2-4) Aˬ dui Yeˬhawˇbaˬ˗euˬ yaw shehꞈ kʼahˬ sehˇ heu˗ahˇ noeˬ mawˇ ngeh tiˬ jawˇ, Yeˬhawˇbaˬ˗ahˇ yaw zeu baw˗eu laꞈ kʼoeˇ guiˬ lahˬ shaˇ˗eu heu naˇ, aˇ naˆ ni aˇ yeˇ huiˬ˗eu jeˬ pyeuꞈ˗eu lehˇ siˬ laˇ˗eu meh. Toˆ˗ehˇ naˇ aˬ dui guiˬ lahˬ aˬ joˆ˗ehˇ shaˇ paˬ˗ehˇ gʼeh˗eu nga?

4. Maꞈtehˬ 6:9, 10 laꞈ kʼoeˇ˗euˬ Yeˬsuˇ˗euˬ guiˬ lahˬ shaˇ dawˬ laꞈ kʼoeˇ˗euˬ dahˬ beh˗eu jeˬ˗ahˇ neh aˬ jeˬ ya siˬ˗eu nga?

⁴ Maꞈtehˬ 6:9, 10-ahˇ gui. Yeˬsuˇ zaˬ lahˇ deuˬ˗ahˇ Miˬyehˇ nui kʼahˇ shiˇ˗eu jeˬ˗ehˇ guiˬ lahˬ aˬ joˆ˗ehˇ ya shaˇ˗eu lehˇ gawˬ jawˬ kʼoeˇ taˆ dawˬ mehˬ mehˬ ngeh mehˬ yaꞈ˗euˬ meh. Yeˬsuˇ “Naw maꞈ guiˬ lahˬ shaˇ ngeh, heu loꞈ˗ehˇ shaˇ˗awˬ” lehˇ ehˇ gʼaˬ naˇ, Yeˬhawˇbaˬ neh noeˬ taˬ˗euˬ jeˬ laꞈ kʼoeˇ neh aˇ yeˇ huiˬ˗eu jeˬ˗ahˇ jeˬ hu ngehˬ keuˆ˗euˬ meh. Teu naˇ Miˬyehˇ˗euˬ tsawˇ myahˇ yaw zeu bi baw˗eu gʼaˇ duˬ, muiˇ˗eu deuˬ dawˬ tawˆ luꞈ˗ahˇ laˆ cawˆ˗eu Miˬyehˇ Miˇ kʼahˬ bi oe˗eu gʼaˇ duˬ, miˇ tsaˬ hawˇ˗eu tsawˇ haˬ zaˬ˗euˬ gʼaˇ duˬ mehˬ hu paw muiˬ˗eu jeˬ bi keuˆ le˗eu gʼaˇ duˬ, pyeuꞈ meh. Aˬ dui guiˬ lahˬ shaˇ ngeh gaˇ kawˆ heu deuˬ shaˇ ahˇ˗eu heu naˇ, Miˬyehˇ neh noeˬ taˬ˗euˬ jeˬ heu naˇ aˬ dui˗euˬ gʼaˇ duˬ aˇ yeˇ huiˬ˗eu jeˬ pyeuꞈ˗eu lehˇ bi mawˇ˗eu jeˬ pyeuꞈ meh.

5. Aˬ dui guiˬ lahˬ shaˇ ngeh yawˬ ha˗euˬ gaˇ kawˆ shaˇ nya ngaˇ laˬ?

⁵ Kʼoeˇ naˇ Yeˬsuˇ˗euˬ guiˬ lahˬ shaˇ dawˬ˗ahˇ haw ngeh, aˬ dui yawˬ ha˗euˬ gaˇ kawˆ jiˇ shaˇ nya˗eu lehˇ siˬ laˇ˗eu meh. Aˬ dui Yeˬhawˇbaˬ˗ahˇ aˬ yawꞈ nah yawꞈ dzaˬ byawˇ biꞈ nehˬ laꞈ, iˬ baˇ pyehˬ nehˬ laꞈ, muˇ juˇ˗euˬ mehˬ nah maˬ ya cah teh˗iˇ ni caw ba nehˬ laꞈ, muiˇ˗eu gʼaˬ˗euˬ laꞈ˗ahˇ neh ka kʼoꞈ nehˬ laꞈ lehˇ shaˇ nya meh. (Maꞈtehˬ 6:11-13) Aˬ dui heu loꞈ˗ehˇ shaˇ˗eu heu naˇ, aˬ dui Yeˬhawˇbaˬ˗ahˇ gʼoe mawꞈ˗awˇ, aˬ yawꞈ nui kʼahˇ shiˇ˗eu jeˬ˗ehˇ dehꞈ mawꞈ˗eu lehˇ bi mawˇ˗eu jeˬ pyeuꞈ meh.

6. Aˬ dui Yeˬsuˇ neh shaˇ mehˬ yaꞈ˗euˬ loꞈ˗ehˇ tehꞈ˗ehˇ ya shaˇ caw nga laˬ?

⁶ Yeˬsuˇ aˬ yawꞈ˗euˬ zaˬ lahˇ deuˬ aˬ yawꞈ neh guiˬ lahˬ shaˇ mehˬ˗euˬ loꞈ˗ehˇ duˇ duˇ dehꞈ dehꞈ shaˇ caw gaˇ maˬ noeˬ tmˬ˗a. Yawˬ poˆ yawˬ Yeˬsuˇ guiˬ lahˬ shaˇ ngeh teu ngeh ya puˬ luꞈ˗eu gaˇ kawˆ˗ahˇ jiˇ shaˇ˗euˬ meh. (Maꞈtehˬ 26:39, 42; Yoˇhaˬ 17:1-26) Aˬ dui jiˇ yawˬ ha laꞈ kʼoeˇ noeˬ shaˬ kʼahˬ lahˇ˗eu jeˬ˗euˬ gʼaˇ duˬ shaˇ nya  meh. Aˬ dui tiˬ jeˬ paˬ˗ahˇ maˬ noeˬ tsehˆ mi naˆ˗ehˇ zaˬ siˬ nui gahˇ hawˇ˗eu noeˬ siˬ noeˬ mawˇ nya˗eu jeˬ jiˇ shaˇ nya meh. (Ja ceuˬ 119:33, 34) Aˬ dui shaˬ˗eu gaˇ ya mˇ ngeh jiˇ aˬ joˆ˗ehˇ ya mˇ˗eu lehˇ siˬ nya ni caw ba nehˬ laꞈ lehˇ shaˇ nya meh. (Dawˬdaˬ 2:6) Aˬ da aˬ ma deuˬ zaˬ deuˬ˗euˬ gʼaˇ duˬ guiˬ lahˬ shaˇ nehˬ nya˗eu loꞈ˗ehˇ, zaˬ deuˬ jiˇ aˬ da aˬ ma deuˬ˗euˬ gʼaˇ duˬ guiˬ lahˬ shaˇ nehˬ nya meh. Kʼoeˇ naˇ aˬ dui Jaˇliꞈ dzaw zaˬ hawˇ˗eu aˬ dui neh tsaꞈ gaˬ˗euˬ deuˬ˗euˬ gʼaˇ duˬ jiˇ guiˬ lahˬ shaˇ nehˬ nya meh. Shaˇ jiˇ shaˇ nehˬ paˬ˗ehˇ gʼeh˗eu meh. Ehˇ kʼawꞈ aˬ dui guiˬ lahˬ shaˇ ngeh, biꞈ nehˬ laꞈ lehˇ tehꞈ˗ehˇ shaˇ paˬ˗ehˇ maˬ gʼeh˗a.

7. Aˬ dui guiˬ lahˬ shaˇ ngeh aˬ jeˬ miˇ neh Yeˬhawˇbaˬ˗ahˇ ja ceuˬ paˬ˗ehˇ gʼeh˗eu nga?

⁷ Aˬ dui guiˬ lahˬ shaˇ ngeh Yeˬhawˇbaˬ˗ahˇ ja ceuˬ˗eu jiˇ maˬ ya ngehˇ˗a. Miˬyehˇ loꞈ˗ehˇ ja ceuˬ˗eu jeˬ˗ahˇ za geuˇ˗eu tiˬ gʼaˬ˗iˬ maˬ paˇ jawˇ meh. Aˬ yawꞈ naˇ “gʼawˬ shaˬ gaˬ nya˗awˇ, gʼoeˇ˗eu gaˬ˗eu jeˬ byah˗eu Miˬyehˇ pyeuꞈ˗eu uˬ taꞈ, nui ma gʼawˬ mahˇ ni taˬ nya˗awˇ gʼawˬ shaˬ gaˬ˗eu laꞈ kʼoeˇ, saˇ jaˇ ziꞈ˗eu meh.” (Ja ceuˬ 86:5, 15) Aˬ dui Yeˬhawˇbaˬ˗ahˇ yaw muiˬ gʼawˬ mya jeˬ baˬ da neh ja ceuˬ paˬ˗ehˇ gʼeh˗eu meh.

8. Aˬ dui Yeˬhawˇbaˬ˗ahˇ aˬ jeˬ jeˇ˗euˬ gʼaˇ duˬ guiˬ lahˬ huiˬ paˬ˗ehˇ gʼeh˗eu nga? (Ja ceuˬ 104:12-15, 24)

⁸ Aˬ dui guiˬ lahˬ shaˇ ngeh Yeˬhawˇbaˬ˗ahˇ ja ceuˬ˗eu uˬ taꞈ, guiˬ lahˬ jiˇ huiˬ paˬ˗ehˇ gʼeh˗eu meh. Yaw jeˬ ma jeˬ, aˬ yawꞈ muiˬ dui saw dui dui˗eu aˇ yehˆ gʼawˬ mya jeˬ biꞈ nehˬ taˬ˗awˇ, kuiˇ dui dui˗eu dzaˬ dzaˬ dawˇ dawˇ deuˬ jiˇ biꞈ nehˬ taˬ˗euˬ uˬ taꞈ, muiˬ˗eu cawˬ deuˬ jiˇ biꞈ nehˬ laꞈ˗euˬ meh. Aˬ dui heu˗euˬ gʼaˇ duˬ guiˬ lahˬ huiˬ nya meh. Nui gaˬ Aˬda Yeˬhawˇbaˬ aˬ dui laˬ kʼaˬ bi cehˇ˗eu gʼaˇ duˬ, loˬ˗eu taꞈ˗ehˇ dzehˬ ni biꞈ taˬ˗euˬ meh. (Ja ceuˬ 104:12-15, 24-ahˇ gui.) Teu naˆ maˬ tseˇ aˇ yeˇ huiˬ dzehˬ˗eu jeˬ naˇ, aˬ dui˗euˬ nui jah ziꞈ dah ni bi gʼeh˗eu gʼaˇ duˬ nui jah paw˗euˬ dzaˇ tiˬ byah tiˬ loꞈ biꞈ nehˬ laꞈ˗euˬ gʼaˇ duˬ hawˇ˗eu mehˬ hu paw za˗eu muiˬ dui dui˗eu noeˬ tmˬ˗eu jeˬ biꞈ nehˬ laꞈ˗euˬ gʼaˇ duˬ jiˇ guiˬ lahˬ ya huiˬ˗eu meh.

9. Yeˬhawˇbaˬ˗ahˇ guiˬ lahˬ huiˬ˗eu maˬ bi ngehˇ ni caw ba nehˬ˗eu jeˬ naˇ aˬ jeˬ nga? (1 Teˇsaˬloˇni 5:17, 18)

⁹ Aˬ dui˗ahˇ Yeˬhawˇbaˬ neh mˇ nehˬ laꞈ˗euˬ yaw muiˬ jeˬ˗euˬ gʼaˇ duˬ, guiˬ lahˬ huiˬ˗eu yaw awˬ˗ehˇ ngehˇ laˇ nya˗eu meh. Aˬ dui˗ahˇ teu loꞈ˗ehˇ maˬ bi ngehˇ ni caw ba nehˬ˗eu jeˬ naˇ aˬ jeˬ nga? Aˬ dui Yeˬhawˇbaˬ˗ahˇ guiˬ lahˬ aˬ jeˬ jeˇ˗euˬ gaˇ kawˆ shaˇ˗euˬ lehˇ sahˬ boꞈ boꞈ doˆ laꞈ˗awˇ, Yeˬhawˇbaˬ aˬ dui˗euˬ shaˇ dawˬ˗ahˇ dawˬ kʼoꞈ aˬ joˆ˗ehˇ biꞈ˗eu nga lehˇ tiˬ kʼehˬ maˬ taˬ ya haw˗eu meh. Kʼoeˇ naˇ aˬ yawꞈ neh caw ba nehˬ laꞈ˗euˬ jeˬ˗euˬ gʼaˇ duˬ, guiˬ lahˬ ya huiˬ˗eu meh. (1 Teˇsaˬloˇni 5:17, 18-ahˇ  gui.) Shaˇ noeˬ haw sheˇ, tiˬ gʼaˬ paˬ aˬ dui˗ahˇ guiˬ lahˬ huiˬ miˇ˗a lehˇ ehˇ laˇ naˇ laˬ kʼaˬ cehˇ laˇ˗eu maˬ ngeuˇ nya loˇ? Heu gʼaˬ naˇ guiˬ lahˬ˗ahˇ siˬ nya nga lehˇ noeˬ laˇ˗eu maˬ ngeuˇ nya loˇ? Teu gaˇ duˇ ni aˬ dui Yeˬhawˇbaˬ˗ahˇ, guiˬ lahˬ shaˇ dawˬ˗ahˇ dawˬ kʼoꞈ biꞈ nehˬ laꞈ˗euˬ gʼaˇ duˬ guiˬ lahˬ huiˬ miˇ˗a lehˇ ehˇ nehˬ ngeh, aˬ yawꞈ˗ahˇ jiˇ laˬ kʼaˬ cehˇ leˇ˗eu meh. (Gawˇlawˇsehˇ 3:15) Aˬ dui Yeˬhawˇbaˬ˗ahˇ guiˬ lahˬ huiˬ paˬ˗ehˇ gʼeh˗eu aˇ yeˇ huiˬ˗eu nui jeˬ paˇ jaˆ˗a siˬ.

10. 1 Beˬtuˆluˆ 2:21-ahˇ haw ngeh, Yeˬsuˇ˗ahˇ miˇ tsaˬ kʼoeˇ taˆ kʼehˇ gʼeh leꞈ˗euˬ gʼaˇ duˬ, aˬ dui Yeˬhawˇbaˬ˗ahˇ aˬ jeˬ miˇ neh guiˬ lahˬ huiˬ paˬ˗ehˇ gʼeh˗eu nga?

¹⁰ 1 Beˬtuˆluˆ 2:21-ahˇ gui. Aˬ dui˗ahˇ mehˬ nehˬ tsoˆ nehˬ˗eu gʼaˇ duˬ gaˬ˗eu Zaˬmaˇ pyehˬ leꞈ˗euˬ miˇ neh, aˬ dui Yeˬhawˇbaˬ˗ahˇ guiˬ lahˬ huiˬ paˬ˗ehˇ gʼeh˗eu meh. Aˬ dui Yeˬsuˇ˗euˬ gaˇ kawˆ pyehˆ tseˇ ngeh tiˬ jawˇ Yeˬhawˇbaˬ˗euˬ gaˇ kawˆ hawˇ˗eu aˬ yawꞈ nui kʼahˇ shiˇ ni aˬ joˆ˗ehˇ ya jahˇ˗eu gaˇ kawˆ jiˇ siˬ nya laˇ˗eu meh. Aˬ dui Ka li˗euˬ ka kʼoꞈ˗eu jeˬ˗ahˇ maˇ diˇ jah˗eu lehˇ bi mawˇ naˇ, aˬ dui hawˇ˗eu Yeˬhawˇbaˬ yaw kaˬ lmˇ boˬ ni gʼeh˗eu cawˬ cawˬ˗eu jeˬ jaˆ laˇ˗eu meh.—Loˇmaˆ 5:1.

11. Aˬ dui aˬ jeˬ miˇ neh Yeˬsuˇ˗euˬ tsawˇ myahˇ gʼoe˗awˇ ya shaˇ˗eu nga?

¹¹ Kʼoeˇ naˇ aˬ dui Zaˬmaˇ Yeˬsuˇ˗ahˇ neh tiˬ tiˆ Yeˬhawˇbaˬ˗ahˇ guiˬ lahˬ shaˇ nya˗eu miˇ neh jiˇ guiˬ lahˬ huiˬ paˬ˗ehˇ gʼeh˗eu meh. Yeˬhawˇbaˬ Yeˬsuˇ˗ahˇ neh tiˬ tiˆ aˬ dui˗euˬ guiˬ lahˬ shaˇ dawˬ˗ahˇ dawˬ kʼoꞈ biꞈ˗eu meh. Aˬ dui Yeˬsuˇ˗euˬ tsawˇ myahˇ gʼoe˗awˇ shaˇ naˇ, Yeˬhawˇbaˬ naˇ haˬ nehˬ˗awˇ dawˬ kʼoꞈ biꞈ nehˬ laꞈ˗eu meh. “Zaˬmaˇ laꞈ kʼoeˇ Aˬda˗euˬ yaw shehꞈ kʼahˬ sehˇ ya mawˇ ni, naw maꞈ ngaˬ˗euˬ tsawˇ myahˇ laꞈ kʼoeˇ kʼaˇ shaˇ˗eu yawˬ jeˬ na luꞈ ngaˇ mˇ byah nehˬ ma” lehˇ Yeˬsuˇ ehˇ˗eu meh.—Yoˇhaˬ 14:13, 14.

12. Zaˬmaˇ biꞈ nehˬ laꞈ˗euˬ poeˬ Yeˬhawˇbaˬ˗ahˇ aˬ jeˬ baˬ da neh guiˬ lahˬ paˇ huiˬ paˬ˗ehˇ gʼeh nga siˬ?

¹² Yeˬhawˇbaˬ aˬ dui˗ahˇ Yeˬsuˇ˗euˬ ka kʼoꞈ˗eu jeˬ baˬ da neh iˬ baˇ pyehˬ nehˬ laꞈ˗eu meh. Jaˇliꞈ laꞈ kʼoeˇ Yeˬsuˇ˗ahˇ “mˬ kʼoeˇ taˆ uˆ lahˇ luꞈ˗eu Sahˬpaˬ pyeuꞈ˗eu Miˬyehˇ˗euˬ dzoeˬ dzaˬ nuiˇ mahˬ˗euˬ aˇ maˇ paw nuiˇ luꞈ˗eu Piˇma Yaw huiˬ tiˬ gʼaˬ” pyeuꞈ˗eu lehˇ pah mehˬ taˬ˗euˬ meh. (Heˬbyehˇ 8:1) Yeˬsuˇ naˇ “aˬ dui˗euˬ dah zaˇ Aˬda Miˬyehˇ˗ahˇ tahˬ shaˇ leˇ˗eu gʼaˬ” jiˇ pyeuꞈ˗eu meh. (1 Yoˇhaˬ 2:1) Aˬ dui˗euˬ gʼaˬ baˬ˗eu jeˬ˗ahˇ gʼawˬ shaˬ gaˬ˗eu “aˬ dui˗euˬ gʼaˇ duˬ Miˬyehˇ˗ahˇ shaˇ luꞈ˗eu gʼaˬ pyeuꞈ˗eu” Piˇma yaw huiˬ gʼaˬ biꞈ nehˬ taˬ˗euˬ miˇ neh guiˬ lahˬ huiˬ dui dui miˇ˗a. (Loˇmaˆ 8:34; Heˬbyehˇ 4:15) Aˬ dui maˬ byah kuˆ˗eu tsawˇ haˬ zaˬ pyeuꞈ˗eu miˇ neh Yeˬsuˇ˗euˬ ka kʼoꞈ˗eu jeˬ maˬ jaˆ naˇ, guiˬ lahˬ shaˇ˗awˇ Yeˬhawˇbaˬ˗euˬ dawˬ peh maˬ jiˆ leˇ nya˗a. Yeˬhawˇbaˬ aˬ dui˗ahˇ muiˬ dui dui˗eu laꞈ sawˬ pyeuꞈ˗eu gaˬ˗eu Zaˬmaˇ biꞈ nehˬ laꞈ˗euˬ miˇ neh guiˬ lahˬ huiˬ dui dui miˇ˗a.

13. Yeˬsuˇ dehꞈ saˬ saˬ ngeh miˇ zaˬ lahˇ deuˬ˗ahˇ gaˬ˗eu lehˇ aˬ joˆ˗ehˇ mˇ mawˇ˗euˬ nga?

¹³ Yeˬsuˇ dehꞈ saˬ saˬ ngeh miˇ zaˬ lahˇ deuˬ˗ahˇ “haiˬ dui dui˗eu Gʼaˬ˗euˬ laꞈ˗ahˇ maˬ ya bi ahˇ˗iˇ ni haw lahˇ nehˬ˗awˬ” lehˇ guiˬ lahˬ gʼawˬ myahˇ ni shaˇ˗euˬ meh. (Yoˇhaˬ 17:15) Haw sheˇ, Yeˬsuˇ zaˬ lahˇ deuˬ˗ahˇ aˇ naˆ ni gaˬ˗eu nga? Maˇ diˇ naˇ aˬ yawꞈ gʼawˬ myahˇ maˬ gʼeh˗ehˇ kʼaˆ dui dui˗eu lawˬ haw laˇ˗eu jeˬ˗ahˇ ya tahˬ puˬ˗eu lehˇ gʼeh˗eu meh. Ehˇ kʼawꞈ Yeˬsuˇ zaˬ lahˇ deuˬ˗euˬ gʼaˇ duˬ kʼahˬ lahˇ dui dui˗eu meh.

14. Aˬ dui mehˇ nmˇ deuˬ˗ahˇ gaˬ˗eu lehˇ aˬ joˆ˗ehˇ mˇ mawˇ nya˗eu nga?

¹⁴ Aˬ dui Yeˬsuˇ˗ahˇ dzaw geuꞈ˗eu laꞈ kʼoeˇ yawˬ ha˗euˬ gaˇ kawˆ˗ahˇ tehꞈ˗ehˇ maˬ ya kʼaˆ gʼa˗a. Aˬ dui mehˇ nmˇ deuˬ˗ahˇ noeˬ keuˆ˗eu laꞈ kʼoeˇ aˬ yawꞈ maꞈ˗euˬ gʼaˇ duˬ aˬ myah luꞈ guiˬ lahˬ shaˇ nehˬ nya˗eu meh. Aˬ dui teu loꞈ˗ehˇ shaˇ caw nehˬ˗eu heu naˇ, tiˬ gʼaˬ tiˇ gʼaˬ gaˬ˗awˬ lehˇ ehˇ˗eu Yeˬsuˇ neh biꞈ yaꞈ˗euˬ dawˬ˗ahˇ mˇ caw luꞈ˗eu jeˬ pyeuꞈ meh. Kʼoeˇ naˇ aˬ dui nui jah taꞈ˗eu mehˇ nmˇ deuˬ˗ahˇ aˇ naˆ ni gaˬ˗eu lehˇ Yeˬhawˇbaˬ˗ahˇ mˇ mawˇ luꞈ˗eu jeˬ jiˇ pyeuꞈ meh. (Yoˇhaˬ 13:34) Mehˇ nmˇ deuˬ˗euˬ gʼaˇ duˬ guiˬ lahˬ shaˇ˗eu heu naˇ, yawˬ ngehꞈ maˬ ngeuˇ˗a. Jaˇliꞈ laꞈ kʼoeˇ “yaw tsaˬ yaw dawˇ tsawˇ haˬ tiˬ gʼaˬ neh guiˬ lahˬ shaˇ˗euˬ˗aˬ, baoˬ jaˆ˗eu meh” lehˇ ehˇ taˬ˗euˬ meh.—Yaˬkoˆ 5:16.

15. Aˬ dui mehˇ nmˇ deuˬ˗euˬ gʼaˇ duˬ aˬ jeˬ miˇ neh guiˬ lahˬ shaˇ nehˬ paˬ˗ehˇ gʼeh˗eu nga?

 ¹⁵ Aˬ dui˗euˬ mehˇ nmˇ deuˬ lawˬ haw laˇ˗eu yaw myaˬ jeˬ˗ahˇ ya puˬ luꞈ˗eu miˇ neh, aˬ dui aˬ yawꞈ maꞈ˗euˬ gʼaˇ duˬ guiˬ lahˬ shaˇ nehˬ˗eu loˬ meh. Aˬ dui Yeˬhawˇbaˬ˗ahˇ mehˇ nmˇ deuˬ˗ahˇ naˇ˗eu gawˇ˗eu, uˬ jeˬ jaˬ lehˇ˗euˬ shaˬ zahˬ, guiˇ deuˆ˗eu, kʼehˬ˗eu kʼaˆ˗eu, shaˬ zahˬ nui jeˬ, heu deuˬ˗ahˇ kamˬ daˬ coeˇ ni caw ba nehˬ laꞈ lehˇ shaˇ nya meh. Kʼoeˇ naˇ aˬ dui yawˬ ha˗euˬ gʼaˇ duˬ maˬ shaˇ noeˬ ni mehˇ nmˇ deuˬ˗ahˇ caw ba nehˬ luꞈ˗eu, mehˇ nmˇ deuˬ˗euˬ gʼaˇ duˬ jiˇ shaˇ nehˬ nya meh. Aˬ dui shaˬ zahˬ puˬ luꞈ˗eu mehˇ nmˇ tiˬ gʼaˬ na˗ahˇ siˬ nya naˇ, aˬ yawꞈ˗euˬ tsawˇ myahˇ kuˇ˗awˇ guiˬ lahˬ shaˇ nehˬ nya meh. Aˬ dui Yeˬhawˇbaˬ˗ahˇ mehˇ nmˇ deuˬ˗ahˇ kamˬ daˬ coeˇ ni caw ba nehˬ laꞈ lehˇ shaˇ˗eu heu naˇ, aˬ yawꞈ maꞈ˗ahˇ maˇ diˇ gaˬ˗eu lehˇ mˇ mawˇ˗eu jeˬ pyeuꞈ meh.

16. Aˬ dui sheuˬ gʼeh˗eu aˬ yuiꞈ deuˬ˗euˬ gʼaˇ duˬ aˬ jeˬ miˇ neh guiˬ lahˬ shaˇ nehˬ paˬ˗ehˇ gʼeh˗eu nga?

¹⁶ Aˇ muˇ˗ahˇ sheuˬ gʼeh˗eu aˬ yuiꞈ deuˬ, mehˇ nmˇ deuˬ aˬ yawꞈ maꞈ˗euˬ gʼaˇ duˬ guiˬ lahˬ shaˇ nehˬ ngeh guiˬ lahˬ huiˬ dui dui˗awˇ, teu˗ahˇ neh gaˇ dahˇ tsoeˬ˗eu jeˬ jiˇ za˗eu meh. Gʼaˬ kʼehˇ Pawˇluˆ jiˇ “Laˬ kʼaˬ cehˇ˗eu guiˬ lahˬ dawˬ gaˇ kawˆ zaꞈ taˬ˗euˬ jeˬ˗ahˇ aˬ cawˬ siˬ nya laˇ ni kʼaˬ duˬ ni dawˬ ngehˬ nya˗eu gʼaˇ duˬ, ngaˇ dawˬ ngehˬ˗eu lehˇ kʼaˇ gʼeh ngeh Miˬyehˇ˗euˬ dawˬ ngaˬ˗ahˇ biꞈ laꞈ ni ngaˬ˗euˬ gʼaˇ duˬ kʼawꞈ aˬ myah luꞈ guiˬ lahˬ shaˇ˗awˬ” lehˇ ehˇ˗eu meh. (Eˇpeˇsu 6:19) Nymˬ˗mˇ iˬ nah gaˇ˗ahˇ leh jeh dui dui˗awˇ sheuˬ gʼeh˗eu mehˇ nmˇ aˬ yuiꞈ deuˬ gʼawˬ mya ni jawˇ˗eu meh. Aˬ dui Yeˬhawˇbaˬ˗ahˇ aˬ yawꞈ maꞈ neh mˇ˗euˬ jeˬ˗ahˇ guiˬ lahˬ biꞈ laꞈ lehˇ shaˇ˗eu heu naˇ, aˬ yawꞈ maꞈ˗ahˇ gaˬ˗eu lehˇ mˇ mawˇ˗eu jeˬ pyeuꞈ meh.

17-18. Aˬ dui guiˬ lahˬ ya shaˇ nehˬ ngeh, aˬ jeˬ noeˬ taˬ paˬ˗ehˇ gʼehˬ˗eu nga?

¹⁷ Tiˬ poˆ na aˬ dui aˬ cawˬ˗euˬ dah zaˇ guiˬ lahˬ ya shaˇ nehˬ˗eu lehˇ baw˗eu meh. Yaw jeˬ ma jeˬ, Jaˇliꞈ mehˬ caw le˗euˬ mehˇ nmˇ gʼaˬ˗ahˇ guiˬ lahˬ bi shaˇ nya˗eu meh. Ehˇ kʼawꞈ aˬ yawꞈ dzaw zaˬ˗euˬ gaˇ kawˆ yaw kʼaˆ˗ehˇ maˬ siˬ nya˗eu miˇ neh, jiˇ ngeh tehꞈ˗ehˇ shaˇ nehˬ mawꞈ˗eu kʼawꞈ pyeuꞈ nya meh. Toˆ˗ehˇ jahˇ naˇ, dzaw zaˬ˗euˬ gʼaˇ duˬ aˬ geu jeˬ shaˇ nehˬ paˬ˗ehˇ gʼeh˗eu nga lehˇ siˬ nya laˇ˗eu meh.

¹⁸ Mehˇ nmˇ zaˬ yo aˬ li tiˬ gʼaˬ na tsaꞈ gaˬ˗iˇ˗eu gʼaˇ duˬ bawˬ dzaˬ ngeh maˬ ehˇ, aˇ muˇ˗euˬ mehˬ bawˬ jahˇ ngeh maˬ ehˇ, guiˬ lahˬ ya shaˇ nehˬ˗eu kʼawꞈ pyeuꞈ nya meh. Teu ngeh aˬ jeˬ˗euˬ gʼaˇ duˬ shaˇ paˬ˗ehˇ gʼeh˗eu lehˇ siˬ nya paˬ˗ehˇ gʼeh˗eu meh. Guiˬ lahˬ shaˇ˗eu heu naˇ, dawˬ mehˬ mehˬ˗eu aˇ yamˬ maˬ ngeuˇ˗a. Tiˬ jeˬ  paˬ tsaꞈ gaˬ˗eu aˇ yamˬ maˬ ngeuˇ˗a. Aˬ myah myah naˇ aˇ muˇ˗euˬ mehˬ bawˬ mˇ ngeh, dawˬ caˇ caˇ˗awˇ guiˬ lahˬ shaˇ˗eu aˇ yamˬ 5 peu jaˆ˗eu tehꞈ meh. Teu miˇ neh guiˬ lahˬ shaˇ˗eu doˇ˗eu mehˇ nmˇ deuˬ mehˬ bawˬ dahˬ beh˗eu guiˬ lahˬ shaˇ ngeh, “dawˬ gʼawˬ mya ni” ngehˬ ngehˬ˗ehˇ guiˬ lahˬ gʼawˬ mahˇ ni shaˇ paˬ˗ehˇ maˬ gʼeh˗a.—Maꞈtehˬ 6:7.

19. Aˬ dui˗ahˇ Yeˬhawˇbaˬ˗euˬ yaˇ kʼaˬ daˇ˗eu aˇ nah˗ahˇ dah laˇ taˬ ni caw ba nehˬ˗eu jeˬ naˇ aˬ jeˬ nga?

¹⁹ Yeˬhawˇbaˬ˗euˬ yaˇ kʼaˬ daˇ˗eu aˇ nah peh le luꞈ˗eu loꞈ˗ehˇ, aˬ dui guiˬ lahˬ shaˇ˗eu jeˬ˗ahˇ yaw kʼaˆ˗ehˇ aˇ yeˇ taˬ huiˬ˗eu loˬ meh. Yeˬsuˇ “Keuˆ le teuˇ le˗eu gaˇ kawˆ kʼoeˇ deuˬ dawˬ tawˆ luꞈ˗ahˇ, naw maꞈ dehꞈ dzeuˇ jawˇ dzeuˇ nya ni gʼaˬ tiˬ byah ahˇ˗awˇ. . . aˬ myah luꞈ yaw beuˇ beuˇ˗ehˇ jawˇ˗awˇ guiˬ lahˬ shaˇ˗awˬ” lehˇ ehˇ taˬ˗euˬ meh. (Luˇkaꞈ 21:36) Aˬ dui guiˬ lahˬ maˬ tsehˆ leˇ ni shaˇ naˇ, nui jah ziꞈ dah ni gʼeh laˇ˗eu meh. Toˆ˗ehˇ naˇ Miˬyehˇ yaˇ kʼaˬ daˇ le˗eu aˇ nah˗ahˇ aˬ dui dah laˇ taˬ˗eu meh.

20. Aˬ dui˗euˬ guiˬ lahˬ shaˇ dawˬ saw keuꞈ ni gʼeh˗eu tsiˇ yaw saw loꞈ˗ehˇ bi gʼeh˗eu gʼaˇ duˬ, aˬ jeˬ ya jahˇ˗eu nga?

²⁰ Aˬ dui aˬ jeˬ jeˇ ya siˬ˗euˬ nga? Aˬ dui guiˬ lahˬ shaˇ˗eu jeˬ˗ahˇ aˇ poeˬ yaw kʼaˆ˗ehˇ taˬ baw˗eu ma. Aˬ dui guiˬ lahˬ shaˇ ngeh, Yeˬhawˇbaˬ neh noeˬ taˬ˗euˬ gaˇ kawˆ˗ahˇ shaˇ ahˇ˗eu aˇ yeˇ huiˬ dui dui˗eu meh. Kʼoeˇ naˇ aˬ dui Zaˬmaˇ biꞈ nehˬ laꞈ˗euˬ gʼaˇ duˬ hawˇ˗eu Miˬyehˇ Miˇkʼahˬ gʼaˇ duˬ guiˬ lahˬ huiˬ˗awˇ, ja ceuˬ paˬ˗ehˇ gʼeh˗eu meh. Aˬ dui mehˇ nmˇ deuˬ˗euˬ gʼaˇ duˬ jiˇ guiˬ lahˬ shaˇ nehˬ paˬ˗ehˇ gʼeh˗eu meh. Kʼoeˇ naˇ aˬ dui shiˬ shaˬ jiˇ paw loˬ˗eu jeˬ˗euˬ gʼaˇ duˬ maˬ ehˇ, nui jah paw loˬ˗eu jeˬ˗euˬ gʼaˇ duˬ maˬ ehˇ, guiˬ lahˬ shaˇ nya˗eu meh. Aˬ dui guiˬ lahˬ shaˇ ngeh aˬ jeˬ jeˇ gaˇ kawˆ shaˇ˗eu lehˇ yaw muiˬ˗ehˇ shaˇ noeˬ˗eu heu naˇ, guiˬ lahˬ shaˇ˗eu jeˬ˗ahˇ aˇ poeˬ taˬ baw˗eu jeˬ pyeuꞈ meh. Aˬ dui teu loꞈ˗ehˇ jahˇ naˇ, aˬ dui˗euˬ guiˬ lahˬ shaˇ dawˬ saw keuꞈ ni gʼeh˗eu tsiˇ yaw saw˗ahˇ duˇ˗awˇ, Yeˬhawˇbaˬ “nui kʼahˇ shiˇ”˗eu meh.—Dawˬdaˬ 15:8.