1. Gaˇ mˇ duˬ˗ahˇ maˬ ehˇ, sahˬ boꞈ dzaw nymˇ˗ahˇ maˬ ehˇ, aˬ jeˬ naˇ haˬ laˇ nya˗eu nga?

 Gaˇ mˇ cawˬ deuˬ, sahˬ boꞈ dzaw cawˬ deuˬ, nawˬ˗euˬ nui jah gaˇ kawˆ˗ahˇ naˇ haˬ laˇ ngeh, aˬ joˆ˗ehˇ gʼeh laˇ nya? Kʼahˬ lahˇ miˇ˗a laˬ? Myaˬ tiˬ paˆ naˇ kʼahˬ lahˇ meh. Ehˇ kʼawꞈ aˬ yawꞈ naˇ haˬ˗eu jeˬ teu naˇ, aˬ yawꞈ˗euˬ nui jah hawˇ˗eu aˬ yawꞈ˗euˬ gaˇ kawˆ ui cuiˆ bi si laꞈ˗eu miˇ neh tsaꞈ gaˬ˗eu awˬ dzehˬ meh. Tsawˇ pyehˇ pyehˇ mawꞈ˗eu miˇ neh naˇ haˬ laˇ˗eu deuˬ jiˇ jawˇ˗eu meh. Ehˇ kʼawꞈ aˬ dui maˬ zahˬ leˇ. Aˬ jeˬ miˇ neh nga? Teu naˇ aˬ yawꞈ maꞈ aˬ dui˗euˬ nui jah nehˬ˗ehˇ taꞈ leˇ˗awˇ maˬ ngeuˇ˗eu jeˬ˗ehˇ gaˬ taˬ˗euˬ miˇ neh kʼawꞈ pyeuꞈ nya meh. (Gʼaˬkʼehˇ 28:22) Kʼoeˇ uˬ taꞈ “aˬ cawˬ˗ahˇ maˬ dehꞈ tsaˬ˗eu” “guˆ laˇ paˬ˗ehˇ zuiˆ˗eu” tsawˇ haˬ deuˬ tehꞈ˗ehˇ byah jiˇ taˬ˗euˬ “aˇ saˬ saˬ˗eu aˇ nah aˇ yamˬ˗ahˇ” aˬ dui dehꞈ luꞈ˗eu miˇ neh meh.—2 Tiˆmoˇseˬ 3:1, 3.

2. Aˬ jeˬ miˇ neh nahˬ yu ni ya gʼeh˗eu nga?

² ‘Nawˬ˗ahˇ aˬ cawˬ nui jah gaˇ kawˆ nehˬ˗ehˇ taꞈ leˇ˗awˇ tsawˇ pyehˇ pyehˇ laˇ ngeh yaw zeu baw˗eu laꞈ kʼoeˇ aˬ joˆ˗ehˇ ngehˬ kʼoꞈ nya paˬ nga’ lehˇ noeˬ laˇ nya˗eu meh. Nahˬ yu ni gʼeh˗eu jeˬ heu naˇ nawˬ˗ahˇ caw ba nehˬ nya meh. Nahˬ yu ni gʼeh˗eu deuˬ naˇ, aˬ cawˬ ngehˬ deuˬ laˇ ngeh, nyehꞈ suꞈ laˇ ngeh yaw awˇ laꞈ˗ehˇ nui ma maˬ pehˇ ni, nui ma mahˇ nya˗eu meh. (Dawˬdaˬ 16:32) Nahˬ yu ni lehˇ ehˇ˗eu heu naˇ, kʼaˬ meh ehˇ˗eu loꞈ˗ehˇ maˬ awˬ˗a. Toˆ˗ehˇ naˇ, aˬ dui nahˬ yu ni gʼeh˗eu tiˬ gʼaˬ aˬ joˆ˗ehˇ pyeuꞈ nya˗eu nga? Tiˬ gʼaˬ na nawˬ˗ahˇ nui jah gaˇ kawˆ nehˬ˗ehˇ taꞈ leˇ˗awˇ pyehˇ laˇ naˇ nahˬ yu ni aˬ joˆ˗ehˇ ngehˬ kʼoꞈ nya˗eu nga? Aˬ da aˬ ma deuˬ yawˬ ha˗euˬ zaˬ deuˬ˗ahˇ nui jah˗euˬ gaˇ kawˆ nahˬ yu ni dzawˇ nehˬ nya ni aˬ joˆ˗ehˇ caw ba nehˬ nya˗eu nga?

3. Nahˬ yu ni gʼeh˗eu jeˬ heu naˇ gʼaˬ byehˆ byehˆ˗eu jeˬ maˬ ngeuˇ ni, gʼaˬ kʼaˆ˗eu jeˬ pyeuꞈ meh lehˇ aˬ jeˬ miˇ neh ehˇ nya˗eu nga? (2 Tiˆmoˇseˬ 2:24, 25)

³ Nahˬ yu ni gʼeh˗eu deuˬ naˇ gʼaˬ byehˆ byehˆ˗eu tsawˇ haˬ maˬ ngeuˇ ni, ziꞈ dah ni gʼeh˗eu deuˬ pyeuꞈ meh. Uˬ duˬ kawꞈ laˇ paˬ˗ehˇ gʼeh˗eu gaˇ kawˆ˗ahˇ ya puˬ ngeh, nui ma coꞈ ngehˇ ni gʼeh nya˗eu gʼaˇ duˬ ziꞈ dah ni ya gʼeh˗eu meh. Nui ma nahˬ yu ni gʼeh˗eu jeˬ heu naˇ ‘muiˬ˗eu shawˇ˗eu  yaw sahˇ laꞈ kʼoeˇ siˬ le˗euˬ aˇ siˬ’ tiˬ jeˬ pyeuꞈ meh. (Gaˬlaˬtiˆ 5:22, 23) Tiˬ poˆ na Gaˬliˇ dawˬ “nahˬ yu” ni gʼeh˗eu lehˇ ehˇ˗eu heu dawˬ˗ahˇ, laˆ yah taˬ˗euˬ bawˇ tsahˬ˗euˬ mahˬ˗ahˇ ngehˬ keuˆ ngeh zmˬ˗eu meh. Bawˇ tsahˬ˗euˬ mahˬ teu naˇ laˆ yah taˬ dzeuˇ˗euˬ kʼawꞈ gʼaˬ nmˇ ahˇ dui dui luꞈ meh siˬ. Teu gaˇ duˇ ni nahˬ yu ni gʼeh kʼawꞈ ziꞈ dah ni gʼeh˗eu tsawˇ haˬ pyeuꞈ nya meh. Ehˇ kʼawꞈ aˬ dui˗euˬ gʼaˬ neh nmˇ teu loꞈ˗ehˇ maˬ pyeuꞈ leˇ nya˗a. Nahˬ yu ni gʼeh˗eu tiˬ gʼaˬ pyeuꞈ nya˗eu gʼaˇ duˬ muiˬ˗eu shawˇ˗eu yaw sahˇ biꞈ laꞈ lehˇ Yeˬhawˇbaˬ˗ahˇ ya shaˇ˗eu meh. Teu loꞈ˗ehˇ jahˇ˗awˇ neh nahˬ yu ni gʼeh˗eu tiˬ gʼaˬ pyeuꞈ laˇ˗euˬ gʼawˬ mya ni jawˇ˗eu meh. Yeˬhawˇbaˬ˗euˬ Saˇ kiˇ deuˬ yaw myaˬ gʼaˬ aˬ cawˬ deuˬ ngehˬ doeˇ mˇ doeˇ laˇ kʼawꞈ nahˬ yu ni mˇ kʼoꞈ nehˬ˗eu mehˬ. Teu˗ahˇ ya mawˇ˗euˬ deuˬ Yeˬhawˇbaˬ˗euˬ Saˇ kiˇ deuˬ˗ahˇ noeˬ muiˬ laˇ˗eu meh. (2 Tiˆmoˇseˬ 2:24, 25-ahˇ gui.) Nawˇ nawˬ˗euˬ nahˬ yu ni gʼeh˗eu jeˬ gʼaˬ kʼaˆ˗eu jeˬ aˬ joˆ˗ehˇ bi pyeuꞈ laˇ nya˗eu nga?

4. Aˬ dui nahˬ yu ni gʼeh˗eu gaˇ kawˆ nehˬ˗ehˇ taꞈ leˇ˗awˇ Iˇtsaˆ˗ahˇ neh aˬ jeˬ dzaw geuꞈ nya˗eu nga?

⁴ Nahˬ yu ni gʼeh˗eu jeˬ heu naˇ, aˇ poeˬ baw˗eu seuˆ dzeuꞈ aˇ gʼehˇ pyeuꞈ˗eu lehˇ bi siˬ laꞈ˗eu Jaˇliꞈ laꞈ kʼoeˇ˗euˬ gaˇ kawˆ gʼawˬ mya ni ahˇ˗eu meh. Iˇtsaˆ˗euˬ gaˇ kawˆ˗ahˇ shaˇ noeˬ haw sheˇ. Piˇliˇtiˆ miˇ kʼahˬ Geˬlawˬ gahˬ kaˬ˗ahˇ aˬ yawꞈ˗euˬ aˬ da˗euˬ zaˬ kʼaˆ deuˬ neh duˬ taˬ˗euˬ lah duˬ deuˬ˗ahˇ gaˇ dahˬ gaˇ dzeˇ jawˇ˗eu muiˇ˗eu deuˬ miˇ tsaˬ duˬ dzm laˇ˗euˬ meh. Teu ngeh Iˇtsaˆ laꞈ poˆ maˬ mˇ ni, maˬ ceh dzaˬ ni, aˬ yawꞈ˗euˬ nymˇ jiˇ˗ahˇ sheuˬ˗awˇ yawˬ gaˇ yawˬ jawˇ paˇ˗iˇ˗euˬ meh. Kʼoeˇ naˇ teu gaˇ lah duˬ yaw shuiꞈ duˬ˗euˬ meh. (Aˇdahˬbeh˗eu 26:12-18) Yawˬ gaˇ yawˬ pawˇ˗iˇ˗awˇ lah duˬ paˇ duˬ paˇ˗euˬ kʼawꞈ, Piˇliˇtiˆ tsawˇ haˬ deuˬ oe˗awˇ aˬ yawꞈ maꞈ˗euˬ lah duˬ de lehˇ ceh˗eu meh. Ehˇ kʼawꞈ Iˇtsaˆ teu ngeh jiˇ nui ma maˬ pehˇ˗aˬ. (Aˇdahˬbeh˗eu 26:19-25) Aˬ cawˬ diˇ daˬ˗ehˇ ceh cawˬ shaˇ laˇ kʼawꞈ Iˇtsaˆ aˬ jeˬ miˇ neh nahˬ yu ni jawˇ nya˗eu nga? Teu naˇ aˬ yawꞈ gaˇ kawˆ doˆ laˇ ngeh ja tsaˬ geuꞈ nya˗eu aˬ yawꞈ˗euˬ aˬ da Aˬbyaˬhaˬ hawˇ˗eu “nui ma nahˬ yu ni taˬ˗awˇ ciˬ cuˇ ni dehꞈ˗eu” aˬ yawꞈ˗euˬ aˬ ma Saˬlaˇ˗ahˇ dzaw geuꞈ˗eu miˇ neh meh.—1 Beˬtuˆluˆ 3:4-6; Aˇdahˬbeh˗eu 21:22-34.

5. Ka li zaˬ aˬ da aˬ ma deuˬ zaˬ deuˬ˗ahˇ nahˬ yu ni gʼeh˗eu jeˬ˗euˬ aˇ poeˬ˗ahˇ siˬ nya laˇ ni mehˬ nehˬ nya˗eu lehˇ aˬ joˆ˗ehˇ siˬ laˇ˗eu nga?

⁵ Nymˬ˗mˇ iˬ nah Ka li zaˬ aˬ da aˬ ma deuˬ jiˇ zaˬ deuˬ˗ahˇ nahˬ yu ni gʼeh˗eu jeˬ˗euˬ aˇ poeˬ˗ahˇ siˬ nya laˇ ni mehˬ nehˬ nya meh. 17 kʼoꞈ kʼawˆ˗eu Mehˆseˬ˗euˬ gaˇ kawˆ˗ahˇ shaˇ noeˬ haw sheˇ. Aˬ yawꞈ dzaw nymˇ˗ahˇ hawˇ˗eu tsaꞈ gaˬ duˬ˗ahˇ maˬ ehˇ, nui ma pehˇ laˇ paˬ˗ehˇ gʼeh˗eu gaˇ kawˆ ya puˬ˗euˬ meh. Teu miˇ neh aˬ yawꞈ˗euˬ aˬ da aˬ ma aˬ yawꞈ˗ahˇ nahˬ yu ni gʼeh˗awˇ nui ma mahˇ nya ni mehˬ nehˬ˗euˬ meh. Aˬ yawꞈ nyaꞈ “Nymˬ˗mˇ ngaˬ li, nui ma pehˇ laˇ ngeh nui pehˇ laꞈ kʼoeˇ mˇ kʼoꞈ˗eu awˬ˗awˇ, yaw muiˬ jeˬ mˇ kʼoꞈ˗eu lehˇ ehˇ˗eu teu naˇ zawˇ˗ehˇ ya leh jeh nga lehˇ gʼoˆ shaw laˇ ngaˬ˗aˇ” lehˇ ehˇ˗eu meh. Nymˬ˗mˇ naˇ nahˬ yu ni gʼeh˗eu jeˬ Mehˆseˬ˗euˬ gʼaˇ duˬ yaw awˬ˗ehˇ mˇ mawˇ nya˗eu jeˬ pyeuꞈ laˇ˗euˬ meh.

6. Guiˬ lahˬ shaˇ˗eu jeˬ heu naˇ nahˬ yu ni gʼeh˗eu tiˬ gʼaˬ pyeuꞈ nya ni aˬ joˆ˗ehˇ caw ba nehˬ˗eu nga?

⁶ Tiˬ gʼaˬ na Yeˬhawˇbaˬ˗ahˇ hawˇ˗eu Jaˇliꞈ˗ahˇ nui ma pehˇ laˇ paˬ˗ehˇ ja bu laˇ naˇ tawˇ neh? Aˬ dui teu ngeh nahˬ yu ni mˇ kʼoꞈ nehˬ nya˗eu gʼaˇ duˬ muiˬ˗eu shawˇ˗eu yaw sahˇ hawˇ˗eu zaˬ siˬ nui gahˇ biꞈ laꞈ lehˇ Yeˬhawˇbaˬ˗ahˇ ya shaˇ˗eu meh. Teu ngeh aˬ dui nahˬ yu ni maˬ mˇ kʼoꞈ nehˬ˗euˬ naˇ tawˇ neh? Gaˇ kawˆ heu Yeˬhawˇbaˬ˗ahˇ guiˬ lahˬ shaˇ˗awˇ dzawˇ nehˬ. Nyaˆ taꞈ poˆ nahˬ yu ni aˬ joˆ˗ehˇ mˇ nehˬ nya paˬ nga lehˇ shaˇ noeˬ. Aˬ dui teu loꞈ˗ehˇ jahˇ naˇ Yeˬhawˇbaˬ aˬ dui˗ahˇ nui pehˇ˗ahˇ gʼaˬ leˇ nya ni maˬ ehˇ, nahˬ yu ni gʼeh nya ni maˬ ehˇ, muiˬ˗eu shawˇ˗eu yaw sahˇ biꞈ nehˬ laꞈ˗eu meh.

7. Jaˇliꞈ aˇ deuˆ tiˬ deuˆ na˗ahˇ noeˬ taˬ˗eu heu naˇ yawˬ ha˗euˬ mehˬ boeˬ˗ahˇ gʼaˬ leˇ ni aˬ joˆ˗ehˇ caw ba nehˬ˗eu nga? (Dawˬdaˬ 15:1, 18)

⁷ Aˬ cawˬ aˬ dui˗ahˇ nui ma laˆ pehˇ laˇ ngeh aˬ dui˗ahˇ kʼaˇ ngeuˇ˗eu jeˬ maˬ bi ngehˬ ni caw ba nehˬ˗eu Jaˇliꞈ aˇ deuˆ jaˆ˗eu meh. Aˬ dui Jaˇliꞈ aˇ deuˆ teu˗ahˇ noeˬ taˬ nya ni muiˬ˗eu shawˇ˗eu yaw sahˇ caw ba nehˬ nya meh. (Yoˇhaˬ 14:26) Yaw jeˬ ma jeˬ, nahˬ yu ni gʼeh nya ni caw ba nehˬ˗eu Jaˇliꞈ zahˇ deuˬ Dawˬdaˬ sahˬ boꞈ laꞈ kʼoeˇ ahˇ˗eu meh. (Dawˬdaˬ 15:1, 18-ahˇ gui.) Kʼoeˇ naˇ Dawˬdaˬ sahˬ boꞈ laꞈ kʼoeˇ aˬ dui yawˬ ha˗euˬ mehˬ boeˬ˗ahˇ gʼaˬ leˇ naˇ, aˬ joˆ˗ehˇ gaˇ dahˇ tsoeˬ˗eu lehˇ ngehˬ keuˆ taˬ˗euˬ Jaˇliꞈ aˇ deuˆ nui deuˬ jiˇ ahˇ˗eu meh.—Dawˬdaˬ 10:19; 17:27; 21:23; 25:15.

8. Tiˬ gʼaˬ paˬ aˬ dui˗euˬ nui jah gaˇ kawˆ naˇ haˬ laˇ ngeh aˬ yawꞈ aˬ jeˬ baˬ da neh naˇ haˬ˗eu lehˇ siˬ nya˗eu aˬ jeˬ miˇ neh aˇ yeˇ huiˬ˗eu nga?

⁸ Nahˬ yu ni gʼeh nya ni caw ba nehˬ˗eu dzaˇ˗i tiˬ jeˬ naˇ, naꞈ suiˇ ni gʼoˆ shaw˗eu jeˬ heu pyeuꞈ meh. (Dawˬdaˬ 19:11) Tsawˇ haˬ myaˬ tiˬ paˆ tiˬ jeˬ paˬ˗ahˇ noeˬ keuˆ˗eu miˇ neh maˬ ehˇ, kʼahˬ lahˇ˗eu miˇ neh maˬ ehˇ, naˇ haˬ˗eu meh. Aˬ yawꞈ maꞈ aˬ jeˬ miˇ neh naˇ haˬ˗eu lehˇ maˬ dzawˇ nehˬ˗a. Teu miˇ neh naꞈ suiˇ ni gʼoˆ shaw˗eu deuˬ naˇ, aˬ cawˬ nui jah˗euˬ gaˇ kawˆ naˇ haˬ laˇ ngeh yawˬ ha kʼaˇ noeˬ kʼaˇ doˆ laˇ˗eu jeˬ˗ehˇ maˬ ngehˬ˗a. Aˬ cawˬ aˬ jeˬ miˇ neh naˇ haˬ˗eu lehˇ maˬ siˬ nya nya lehˇ ha geuꞈ˗eu meh.—Dawˬdaˬ 16:23.

9. Eˇpaˬleˬ tsawˇ haˬ deuˬ ceh laˇ ngeh, Giˇdoˬ naꞈ suiˇ ni gʼeh˗eu jeˬ hawˇ˗eu nahˬ yu ni gʼeh˗eu jeˬ aˬ joˆ˗ehˇ mˇ mawˇ˗euˬ nga?

⁹ Giˇdoˬ˗euˬ gaˇ kawˆ˗ahˇ shaˇ noeˬ haw sheˇ. Giˇdoˬ muiˇ˗eu deuˬ˗ahˇ guiˇ deuˆ˗iˇ ngeh Eˇpaˬleˬ tsawˇ haˬ deuˬ˗ahˇ maˬ kuˇ gʼeh˗euˬ miˇ neh Eˇpaˬleˬ tsawˇ haˬ deuˬ nui ma pehˇ dui dui˗eu meh. Aˬ yawꞈ maꞈ aˬ jeˬ miˇ neh teu naˆ naˆ˗ehˇ nui ma pehˇ˗eu nga? Aˬ yawꞈ maꞈ yawˬ ha˗ahˇ taˬ huiˬ˗eu miˇ neh nga laˬ? Aˬ joˆ˗ehˇ gʼeh kʼawꞈ, Giˇdoˬ naˇ naꞈ suiˇ ni gʼoˆ shaw nya˗eu tiˬ gʼaˬ pyeuꞈ˗eu miˇ neh gaˇ kawˆ deuˬ hawˇ˗eu aˬ yawꞈ maꞈ noeˬ˗eu jeˬ˗ahˇ gʼoˆ shaw nehˬ˗eu gʼaˇ duˬ leh jeh˗eu meh. Aˬ yawꞈ dawˬ kʼoꞈ nahˬ yu ni biꞈ nehˬ˗euˬ meh. Teu miˇ neh Eˇpaˬleˬ tsawˇ haˬ deuˬ “nui ma pehˇ˗eu shuꞈ˗iˇ˗euˬ meh.”—Yaˇkʼaˬdaˇ˗eu 8:1-3.

10. Yawˬ ha˗euˬ nui jah gaˇ kawˆ nehˬ˗ehˇ taꞈ leˇ˗awˇ naˇ haˬ laˇ naˇ dawˬ kʼoꞈ aˬ joˆ˗ehˇ ya biꞈ˗eu nga? (1 Beˬtuˆluˆ 3:15)

¹⁰ Gaˇ mˇ cawˬ deuˬ hawˇ˗eu dzaw cawˬ deuˬ aˬ dui˗ahˇ  Jaˇliꞈ˗euˬ tsaˬ˗eu dawˇ˗eu zahˇ gaˇ kawˆ nehˬ˗ehˇ taꞈ leˇ˗awˇ naˇ haˬ laˇ nya˗eu meh. Teu ngeh aˬ dui˗euˬ nui jah gaˇ kawˆ˗ahˇ kʼaˇ gʼeh nya gaˇ neh ya dzawˇ nehˬ˗eu meh. Toˆ˗ehˇ nga lehˇ˗aˬ, aˬ dui aˬ yawꞈ maꞈ˗euˬ nui noeˬ˗ahˇ jiˇ yaw zeu ya baw˗eu meh. (1 Beˬtuˆluˆ 3:15-ahˇ gui.) Aˬ cawˬ tiˬ jeˬ paˬ naˇ haˬ laˇ˗eu nehˬ˗ehˇ ceh laˇ pyehˇ laˇ˗eu gʼeh nga lehˇ taˆ lehˇ taˬ noeˬ siˬ. Teu naˇ aˬ yawꞈ maꞈ˗euˬ nui ma laꞈ kʼoeˇ ahˇ˗eu jeˬ˗ahˇ ya siˬ nya˗eu aˬ kawˬ˗aˬ pyeuꞈ ngaˇ lehˇ shaˇ noeˬ. Aˬ yawꞈ maꞈ aˬ jeˬ lehˇ noeˬ˗awˇ naˇ haˬ laˇ˗eu maˬ kaˬ, nahˬ yu ni yaw zeu baw˗eu laꞈ kʼoeˇ ngehˬ kʼoꞈ nehˬ. Aˬ dui neh nahˬ yu ni ngehˬ kʼoꞈ nehˬ˗euˬ teu baˬ da neh, aˬ yawꞈ aˬ yawꞈ˗euˬ nui jah gaˇ kawˆ nehˬ˗ehˇ taꞈ leˇ˗awˇ yaw muiˬ˗ehˇ paˇ shaˇ noeˬ poˆ˗eu kʼawꞈ pyeuꞈ nya meh. Aˬ yawꞈ aˬ dui˗ahˇ yaw zeu maˬ baw ni yehˬ bawˬ sehˇ lu˗ehˇ ngehˬ laˇ kʼawꞈ, aˬ dui aˬ yawꞈ˗ahˇ nahˬ yu ni mˇ kʼoꞈ nehˬ paˬ˗ehˇ gʼeh˗eu meh.—Loˇmaˆ 12:17.

11-12. (a) Naˇ haˬ zahˬ laˇ ngeh dawˬ kʼoꞈ maˬ biꞈ mi naˆ˗ehˇ aˬ jeˬ˗ahˇ ya noeˬ keuˆ˗eu nga? (Aˇ baˇ˗ahˇ jiˇ haw.) (b) Naˇ haˬ laˇ˗eu jeˬ heu naˇ ngehˬ cawˬ leꞈ nya˗eu gaˇ ma aˬ joˆ˗ehˇ bi dahˇ laˇ˗eu nga?

¹¹ Aˬ cawˬ aˬ dui˗ahˇ naˇ haˬ laˇ ngeh aˬ jeˬ miˇ neh naˇ haˬ˗eu nga lehˇ shaˇ noeˬ˗eu aˇ yeˇ huiˬ˗eu meh. Yaw jeˬ ma jeˬ, nawˇ dehꞈ le˗euˬ aˇ nah˗euˬ bawˬ˗iˬ aˬ jeˬ miˇ neh maˬ jahˇ de lehˇ naˇ haˬ laˇ˗euˬ lehˇ ehˇ˗awˬ. Teu ngeh aˬ dui heu loꞈ˗ehˇ ya shaˇ noeˬ˗eu meh. Aˬ yawꞈ teu loꞈ˗ehˇ ehˇ˗eu teu naˇ Yeˬhawˇbaˬ˗euˬ Saˇ kiˇ deuˬ byawˬ gʼa cehˇ gʼa˗eu jeˬ maˬ jaˆ nga lehˇ noeˬ˗eu miˇ neh nga laˬ? Dehꞈ le˗euˬ aˇ nah bawˬ˗iˬ kʼawꞈ maˬ jahˇ, aˬ jeˬ kʼawꞈ maˬ jahˇ lehˇ gʼeh˗eu miˇ neh, gaˇ mˇ cawˬ deuˬ nehˬ˗ehˇ yaw gʼawˬ gʼawˬ lehˇ pyeuꞈ˗iˇ gaˇ guˆ˗eu miˇ neh naˇ haˬ nga laˬ? Teu ngeh aˬ dui aˬ yawꞈ˗ahˇ aˬ cawˬ˗euˬ gʼaˇ duˬ noeˬ keuˆ nehˬ˗euˬ guiˬ lahˬ hui ma lehˇ ja ceuˬ nehˬ nya˗awˇ, nawˇ kʼawꞈ gaˇ mˇ cawˬ deuˬ nehˬ˗ehˇ yaw gʼoeˇ gʼoeˇ lehˇ jawˇ mawꞈ˗eu gaˇ kawˆ dzawˇ nehˬ nya meh. Teu loꞈ˗ehˇ jahˇ naˇ, aˬ yawꞈ yaw kʼaˆ˗ehˇ maˬ paˇ kʼahˬ lahˇ ni pyeuꞈ˗iˇ˗eu uˬ taꞈ, dehꞈ le˗euˬ aˇ nah bawˬ˗iˬ nehˬ˗ehˇ taꞈ leˇ˗awˇ Jaˇliꞈ ehˇ˗eu jeˬ jiˇ dzawˇ nehˬ nya˗eu gaˇ ma dahˇ laˇ˗eu meh.

¹² Aˬ cawˬ aˬ dui˗ahˇ naˇ haˬ zahˬ laˇ ngeh, heu loꞈ˗ehˇ mˇ kʼoꞈ nehˬ nya meh. Yaw jeˬ ma jeˬ, sahˬ boꞈ dzaw cawˬ aˬ li aˬ buˇ cawˬ cawˬ gaˬ˗eu gaˇ kawˆ nehˬ˗ehˇ taꞈ leˇ˗awˇ Yeˬhawˇbaˬ˗euˬ Saˇ kiˇ deuˬ haw jeˬ haw kawˆ beˬ paˇ paˬ˗ehˇ gʼeh nga lehˇ ehˇ laˇ˗eu lehˇ ehˇ˗awˬ. Teu ngeh aˬ dui aˬ yawꞈ Yeˬhawˇbaˬ˗euˬ Saˇ kiˇ deuˬ˗ahˇ gʼoˆ shaw bahˬ taˬ nga laˬ, maˬ ngeuˇ naˇ aˬ yawꞈ˗euˬ yuiꞈ nyiˇ deuˬ laꞈ kʼoeˇ aˬ li aˬ buˇ cawˬ cawˬ gaˬ˗eu deuˬ jawˇ˗eu miˇ neh nga laˬ, maˬ ngeuˇ naˇ aˬ dui aˬ li aˬ buˇ cawˬ cawˬ gaˬ˗eu jeˬ˗ahˇ bye nga lehˇ noeˬ˗eu miˇ neh nga laˬ lehˇ ya shaˇ noeˬ˗eu meh. Aˬ dui aˬ yawꞈ˗ahˇ Yeˬhawˇbaˬ˗euˬ Saˇ kiˇ deuˬ naˇ tsawˇ haˬ yawˬ gʼaˬ na luꞈ˗ahˇ gaˬ˗eu gaˇ kawˆ hawˇ˗eu yawˬ gʼaˬ na luꞈ yawˬ ha naꞈ˗i tseˇ˗eu aˬ kawˬ˗aˬ jaˆ meh lehˇ dzawˇ nehˬ nya meh. b (1 Beˬtuˆluˆ 2:17) Teu gaˇ neh naˇ Jaˇliꞈ gaˇ kawˆ teu nehˬ˗ehˇ taꞈ leˇ˗awˇ aˬ joˆ˗ehˇ ehˇ˗eu nga, Jaˇliꞈ ehˇ˗eu jeˬ˗ahˇ mˇ caw naˇ muiˬ dui dui˗eu dahꞈ ziˇ aˬ joˆ˗ehˇ za nya˗eu nga lehˇ dzawˇ nehˬ nya meh.

13. Beh˗euˬ yaw sahˇ jawˇ˗eu lehˇ maˬ jah coeˇ ni gʼeh˗eu deuˬ˗ahˇ aˬ joˆ˗ehˇ caw ba nehˬ nya˗eu nga?

¹³ Yawˬ ha˗euˬ nui noeˬ ngeuˇ ma lehˇ noeˬ maˇ taˬ˗euˬ deuˬ nehˬ˗ehˇ ya mawˇ ngeh, aˬ dui aˬ yawꞈ aˬ jeˬ˗ahˇ jah˗eu lehˇ siˬ nya ma lehˇ taˆ lehˇ maˬ ya noeˬ˗a. (Tiˇtuˆ 3:2) Yaw jeˬ ma jeˬ, dzaw cawˬ deuˬ Miˬyehˇ˗euˬ gaˇ kawˆ˗ahˇ jah˗eu teu naˇ aˬ poeˬ dawˬ oeˇ tehꞈ meh lehˇ ehˇ laˇ naˇ, teu ngeh aˬ dui aˬ yawꞈ tiˬ jeˬ˗ahˇ neh tiˬ jeˬ pyeuꞈ laˇ˗euˬ gaˇ kawˆ˗ahˇ aˇ dzehˬ˗ehˇ jah˗awˇ, yaw kʼaˆ˗ehˇ siˬ nya nga lehˇ taˆ lehˇ maˬ ya noeˬ˗a. Maˇ diˇ naˇ aˬ yawꞈ teu loꞈ˗ehˇ ehˇ˗eu teu naˇ, aˬ cawˬ ehˇ gaˇ gaˬ˗awˇ ehˇ˗eu kʼawꞈ pyeuꞈ nya meh. Teu miˇ neh gaˇ kawˆ teu˗ahˇ pyehˇ pyehˇ˗ehˇ taˬ paˇ jawˇ. Dzaw cawˬ deuˬ˗ahˇ yaw muiˬ˗ehˇ shaˇ noeˬ leˇ ni nawˇ jahˇ nya meh. Aˬ yawꞈ˗ahˇ jw.org laꞈ kʼoeˇ ahˇ˗eu beh˗euˬ yaw sahˇ jawˇ˗eu gaˇ kawˆ˗ahˇ ja sawˇ taˬ˗euˬ gaˇ kawˆ liˆ˗kuiꞈ sha nehˬ nya meh. Aˇ nah naˇ aˬ yawꞈ gʼoeˇsaiˇ teu laꞈ kʼoeˇ˗euˬ sahˬ boꞈ maˬ ngeuˇ naˇ biˬdiˬoˬ tiˬ hmˬ˗ahˇ haw˗awˇ nawˬ nehˬ˗ehˇ ngehˬ cawˬ mawꞈ laˇ˗eu kʼawꞈ pyeuꞈ nya meh. Nawˇ yaw zeu baw˗eu laꞈ kʼoeˇ ngehˬ gaˇ tmˇ gaˇ haw˗awˇ Jaˇliꞈ˗ahˇ nui ma ahˇ laˇ˗eu kʼawꞈ pyeuꞈ nya meh.

14. Neˬ˗oˬ Yeˬhawˇbaˬ˗euˬ Saˇ kiˇ deuˬ nehˬ˗ehˇ taꞈ leˇ˗awˇ gʼoˆ shaw bahˬ taˬ˗euˬ dzaw cawˬ deuˬ˗ahˇ aˬ dui˗euˬ gʼoeˇsaiˇ zmˬ˗awˇ aˬ joˆ˗ehˇ caw ba nehˬ˗euˬ nga?

¹⁴ Neˬ˗oˬ lehˇ kuˇ˗eu mehˇ nmˇ zaˬ guˬ tiˬ gʼaˬ aˬ cawˬ deuˬ Yeˬhawˇbaˬ˗euˬ Saˇ kiˇ nehˬ˗ehˇ taꞈ leˇ˗awˇ  maˬ bi gʼoˆ shaw bahˬ˗eu gʼaˇ duˬ aˬ dui˗euˬ gʼoeˇsaiˇ zmˬ˗awˇ ja shaw nehˬ˗euˬ meh. Aˬ yawꞈ heu loꞈ˗ehˇ ehˇ˗eu meh. “Dzaw cawˬ tiˬ gʼaˬ aˬ yawꞈ aˬ poeˬ dawˬ oeˇ pyeuꞈ˗eu Jaˇliꞈ˗ahˇ jah˗eu miˇ neh, miˇ tsaˬ˗euˬ nui gahˇ gaˇ kawˆ nehˬ˗ehˇ taꞈ leˇ˗awˇ maˬ jah˗eu ma” lehˇ ehˇ˗eu meh. Neˬ˗oˬ yawˬ ha˗euˬ nui jah gaˇ kawˆ nehˬ˗ehˇ taꞈ leˇ˗awˇ ja nehˬ gaˇ jiˇ dzaw cawˬ teu gʼaˬ maˬ naˇ haˬ˗a. Teu miˇ neh aˬ yawꞈ dzaw cawˬ teu gʼaˬ˗ahˇ aˬ dui˗euˬ jw.org gʼoeˇsaiˇ laꞈ kʼoeˇ ahˇ˗eu “Miˇ tsaˬ˗euˬ nui gahˇ hawˇ˗eu Jaˇliꞈ” lehˇ ehˇ˗eu tsahˇ˗ahˇ bi haw˗euˬ meh. Aˇ nah naˇ Neˬ˗oˬ dzaw cawˬ teu gʼaˬ gʼoeˇsaiˇ laꞈ kʼoeˇ maˇ diˇ ahˇ leˇ˗awˇ haw gaˇ ya mawˇ˗euˬ meh. Teu miˇ neh aˬ yawꞈ dzaw cawˬ teu gʼaˬ nehˬ˗ehˇ dehꞈ ziˇ aˬ joˆ˗ehˇ pyeuꞈ doˆ laˇ˗euˬ gaˇ kawˆ ya ja sawˇ˗euˬ meh. Nawˇ jiˇ teu loꞈ˗ehˇ mˇ pyeuꞈ nya meh.

15. Nui jah gaˇ kawˆ nehˬ˗ehˇ taꞈ leˇ˗awˇ naˇ haˬ tseˇ laˇ gaˇ ya daˬ ngeh aˬ da aˬ ma deuˬ zaˬ deuˬ˗ahˇ nahˬ yu ni dzawˇ nehˬ nya ni aˬ joˆ˗ehˇ caw ba nehˬ nya˗eu nga?

¹⁵ Zaˬ deuˬ dzaw cawˬ deuˬ neh nui jah gaˇ kawˆ nehˬ˗ehˇ taꞈ leˇ˗awˇ ja doeˇ, ngehˬ doeˇ laˇ gaˇ ya puˬ ngeh, nahˬ yu ni aˬ joˆ˗ehˇ ngehˬ kʼoꞈ tmˇ kʼoꞈ nya˗eu nga lehˇ aˬ da aˬ ma deuˬ mehˬ nehˬ nya meh. (Yaˬkoˆ 3:13) Zaˬ deuˬ aˬ joˆ˗ehˇ ya ngehˬ kʼoꞈ tmˇ kʼoꞈ˗eu lehˇ dzaw nehˬ˗eu gʼaˇ duˬ, aˬ da aˬ ma tiˬ deuˬ na nymˇ jiˇ uˬ duˬ tahˬ ngeh jahˇ˗eu meh. Aˬ yawꞈ maꞈ sahˬ boꞈ dzaw nymˇ˗ahˇ ya puˬ paˬ˗ehˇ gʼeh˗eu gaˇ kawˆ deuˬ˗ahˇ tseˇ˗awˇ, aˬ joˆ˗ehˇ ngehˬ kʼoꞈ tmˇ kʼoꞈ nya˗eu nga lehˇ ja sawˇ˗eu meh. Kʼoeˇ naˇ naˇ haˬ muiˬ paˬ˗ehˇ nahˬ yu ni aˬ joˆ˗ehˇ ngehˬ kʼoꞈ tmˇ kʼoꞈ nya˗eu lehˇ aˇ baˇ jahˇ byaˬ˗awˇ mehˬ nehˬ˗eu meh.—“ Mˇ dzaw dzaw˗eu jeˬ nawˬ˗euˬ nymˇ jiˇ˗ahˇ caw ba nya” lehˇ ehˇ˗eu oeˬ coeˇ oeˬ bawˬ˗ahˇ haw.

16-17. Mˇ dzaw taˬ˗eu jeˬ heu naˇ zaˬ deuˬ˗ahˇ aˬ joˆ˗ehˇ caw ba nehˬ nya˗eu nga?

¹⁶ Dzaw taˬ˗euˬ Ka li zaˬ zaˬ guˬ deuˬ naˇ yawˬ ha jah˗eu jeˬ˗euˬ gaˇ kawˆ aˬ cawˬ pyehˇ laˇ ngeh yaw muiˬ˗ehˇ dzawˇ nehˬ nya˗awˇ yawˬ ha jah˗eu jeˬ˗ahˇ nui kʼaˬ tsmˬ˗eu meh. Zaˬ guˬ deuˬ˗ahˇ caw ba nya˗eu jeˬ naˇ, jw.org gʼoeˇsaiˇ laꞈ kʼoeˇ ahˇ˗eu “Zaˬ guˬ deuˬ naˇ haˬ˗eu jeˬ” lehˇ ehˇ˗eu jaˆ tawꞈ˗eu gaˇ kawˆ teu laꞈ kʼoeˇ zaˬ guˬ deuˬ˗ahˇ dzaw nehˬ˗eu jeˬ ahˇ˗eu meh.  Teu naˇ zaˬ guˬ deuˬ˗ahˇ yawˬ ha˗euˬ nui jah˗ahˇ nui kʼaˬ bi tsmˬ˗eu gʼaˇ duˬ hawˇ˗eu aˬ cawˬ deuˬ˗ahˇ yaw muiˬ˗ehˇ bi dzawˇ nehˬ nya˗eu gʼaˇ duˬ jahˇ doˆ laꞈ˗euˬ jeˬ pyeuꞈ meh. Gaˇ kawˆ teu˗ahˇ pehˬ za ma zaˬ luꞈ dzaw ngeh, nymˇ jiˇ laꞈ kʼoeˇ˗euˬ yawˬ gʼaˬ na luꞈ yawˬ ha˗euˬ nui jah gaˇ kawˆ aˬ cawˬ naˇ haˬ muiˬ paˬ˗ehˇ nahˬ yu ni aˬ joˆ˗ehˇ ya dzawˇ nehˬ˗eu lehˇ siˬ nya laˇ˗eu meh.

¹⁷ Mehˇtiˬ˗uˬ lehˇ kuˇ˗eu mehˇ nmˇ aˬ li zaˬ guˬ tiˬ gʼaˬ, mˇ dzaw dzaw˗eu jeˬ heu naˇ aˬ yawꞈ˗ahˇ aˬ joˆ˗ehˇ caw ba nehˬ˗euˬ lehˇ dzawˇ˗eu meh. Aˬ yawꞈ sahˬ boꞈ dzaw nymˇ˗ahˇ ya puˬ˗eu gaˇ kawˆ nehˬ˗ehˇ taꞈ leˇ˗awˇ nymˇ jiˇ uˬ duˬ tahˬ ngeh aˬ da aˬ ma deuˬ nehˬ˗ehˇ poˆ tseˇ˗eu meh. Mehˇtiˬ˗uˬ heu loꞈ˗ehˇ ehˇ˗eu meh. “Nga pehˬ dzaw cawˬ deuˬ aˬ joˇ joˆ˗ehˇ naˇ haˬ laˇ nya˗eu nga lehˇ shaˇ noeˬ˗awˇ, dawˬ kʼoꞈ aˬ joˆ˗ehˇ biꞈ nehˬ paˬ nga lehˇ tiˬ kawˆ loꞈ˗ehˇ poˆ tseˇ˗eu ma. Ngaˇ yawˬ ha jah˗eu jeˬ tsaˬ meh lehˇ nui ma laꞈ kʼoeˇ siˬ duˬ taˬ˗euˬ miˇ neh yawˬ ha jah˗eu jeˬ˗ahˇ nui kʼaˬ tsmˬ˗eu uˬ taꞈ, aˬ cawˬ deuˬ˗ahˇ nahˬ yu ni dzawˇ nehˬ˗eu jiˇ yaw awˬ miˇ˗a.”

18. Gawˇlawˇsehˇ 4:6-ahˇ haw ngeh, aˇ yeˇ huiˬ˗eu jeˬ naˇ aˬ jeˬ nga?

¹⁸ Aˬ dui maˇ jawˆ ni gaˇ kʼahˇ dahˇ˗eu laꞈ kʼoeˇ dzawˇ nehˬ nya˗awˇ neh tehꞈ˗ehˇ maˬ gʼaˬ˗a siˬ. Aˬ cawˬ naˇ haˬ muiˬ paˬ˗ehˇ nahˬ yu ni ya ngehˬ˗eu meh. (Gawˇlawˇsehˇ 4:6-ahˇ gui.) Yawˬ ha˗euˬ jah˗eu jeˬ aˬ cawˬ˗ahˇ dzawˇ nehˬ˗eu heu naˇ tiˬ gʼaˬ tiˇ gʼaˬ baw duiˇ biˬ miˇ nehˬ˗eu jeˬ nehˬ˗ehˇ duˇ leˇ˗eu meh. Aˬ za za lehˇ biˬ nehˬ nya˗eu loꞈ˗ehˇ, gʼaˬ shaˇ˗awˇ neh jiˇ biˬ nehˬ nya meh. Aˬ dui aˬ za za lehˇ biˬ nehˬ naˇ, nyehꞈ˗eu gʼaˬ yaw awˬ˗ehˇ nyehꞈ mi nya˗awˇ niˇ gʼa daˆ leꞈ nya˗eu meh. Teu gaˇ duˇ ni aˬ dui yawˬ ha˗euˬ jah˗eu jeˬ aˬ za za˗ehˇ nahˬ yu ni dzawˇ nehˬ naˇ, aˬ cawˬ naˇ haˬ mawꞈ dzehˬ˗eu miˇ neh paˇ ja tawꞈ leꞈ nya˗eu meh. Ehˇ kʼawꞈ aˬ dui˗ahˇ ngehˬ behˬ mawꞈ˗eu miˇ neh, aˬ dui˗euˬ nui jah˗ahˇ cehꞈ lehꞈ ka niˇ gʼa mawꞈ˗eu miˇ neh, ngehˬ cawˬ laˇ˗awˇ naˇ haˬ laˇ˗eu deuˬ jiˇ jawˇ˗eu meh. Aˬ dui teu deuˬ˗ahˇ dawˬ kʼoꞈ biꞈ biꞈ˗ehˇ jawˇ˗eu maˬ loˬ˗a. (Dawˬdaˬ 26:4) Ehˇ kʼawꞈ toˆ˗ehˇ gʼeh˗eu tsawˇ haˬ gʼawˬ mya ni maˬ jawˇ˗a. Tsawˇ haˬ myaˬ tiˬ paˆ aˬ dui nahˬ yu ni ngehˬ naˇ, naˇ haˬ mawꞈ˗eu meh.

19. Yawˬ ha˗euˬ nui jah gaˇ kawˆ nehˬ˗ehˇ taꞈ leˇ˗awˇ ja shaw nehˬ ngeh nahˬ yu ni gʼeh naˇ aˬ jeˬ gaˇ dahˇ tsoeˬ˗eu nga?

¹⁹ Aˬ dui nahˬ yu ni gʼeh naˇ gaˇ dahˇ tsoeˬ˗eu jeˬ gʼawˬ mya ni za gaˇ ya mawˇ˗eu meh. Aˬ cawˬ deuˬ ngehˬ doeˇ laˇ ngeh, maˬ ngeuˇ gaˇ ja bu laˇ ngeh, nahˬ yu ni ngehˬ kʼoꞈ nya˗eu gʼaˇ duˬ Yeˬhawˇbaˬ˗ahˇ gʼaˬ shaˇ. Noeˬ jeˬ noeˬ kawˆ maˬ duˇ leˇ kʼawꞈ nawˇ nahˬ yu ni gʼeh naˇ ceh dzaˬ˗eu jeˬ maˬ bi doˆ laˇ ni caw ba nehˬ meh lehˇ noeˬ taˬ luꞈ˗uˇ. Nawˬ neh nahˬ yu ni yaw zeu baw˗eu laꞈ kʼoeˇ ngehˬ kʼoꞈ nehˬ˗euˬ teu naˇ, naˇ haˬ˗eu deuˬ tiˬ gʼaˬ na˗ahˇ aˬ dui hawˇ˗eu Jaˇliꞈ laꞈ kʼoeˇ˗euˬ yaw tsaˬ yaw dawˇ˗ahˇ haw˗eu jeˬ muiˬ daˆ laˇ ni caw ba nehˬ nya˗eu meh. Yawˬ ha˗euˬ nui jah gaˇ kawˆ nehˬ˗ehˇ taꞈ leˇ˗awˇ “aˬ joˆ˗ehˇ ehˇ kʼoꞈ nehˬ˗eu lehˇ aˬ myah luꞈ yaw muiˬ˗ehˇ lehˬ hmˬ taˬ˗awˇ, nui ma nahˬ yu ni yaw zeu baw˗eu laꞈ kʼoeˇ ja shaw nehˬ˗awˬ.” (1 Beˬtuˆluˆ 3:15, YB18) Nahˬ yu ni gʼeh˗eu jeˬ nawˬ˗euˬ gʼaˬ kʼaˆ˗eu jeˬ bi pyeuꞈ laˇ˗awˬ.