Ngaˬ da naˇ Yuˬnaiˇtehˆ˗euˬ uˬ duˬ tahˬ nymˇ˗ahˇ saˬ laˬ yaw huiˬ gʼaˬ pyeuꞈ˗eu meh. Teu miˇ neh ngaˬ da ngaˬ nyiˇ hawˇ˗eu ngaˬ˗ahˇ yawˬ jaw na luꞈ Samˇde Saꞈ˗kuˆ˗ahˇ bi daˆ˗iˇ nehˬ laꞈ˗eu meh. Samˇde Saꞈ˗kuˆ daˆ gʼaˬ naˇ naˬ liˬ 11:00 laꞈ˗ahˇ ngaˬ da nehˬ˗ehˇ uˬ duˬ tahˬ˗iˇ˗eu ma. Nahˇ gahˇ paw keuˆ laˇ naˇ ngaˬ ma nehˬ˗ehˇ Bawˬdzaˬnymˇ˗ahˇ paˇ iˇ˗eu ma. Ngaˬ˗ahˇ zahˇ teu nyiˬ zahˇ zawˇ˗ehˇ beu gaˇ nga lehˇ noeˬ laˇ nya.

Ngaˬ ma aˬ yawꞈ˗euˬ cawˬ pyeuꞈ˗eu Bawꞈ hawˇ˗eu Mehˇliˬahˬ Haˇceˬsahˬ˗ahˇ aˬ yawꞈ neh ya dzaw˗euˬ jeˬ dzawˇ nehˬ˗awˇ teu gaˇ neh naˇ aˬ yawꞈ maꞈ jiˇ Saˇ kiˇ pyeuꞈ laˇ˗euˬ meh. 1958 kʼoꞈ˗ahˇ Haˇceˬsahˬ aˬ nyaꞈ dzeˇ zaˬ aˬ yawꞈ˗euˬ aˬ li 3 gʼaˬ hawˇ˗eu ngaˬ˗ahˇ sheuˬ˗awˇ Niˬ˗yuˬ Yawˇ meuˬ˗ahˇ jahˇ˗eu Miˬyehˇ neh noeˬ taˬ˗euˬ jeˬ lehˇ ehˇ˗eu 8 nah ga leˇ˗eu miˇ kʼahˬ deuˬ uiˬ laˇ˗eu mehˬ bawˬ˗ahˇ kuˇ gʼeh˗euˬ meh. Shaˇ noeˬ kʼoꞈ haw ngeh aˬ yawꞈ maꞈ ngaˬ˗ahˇ kuˇ gʼeh nehˬ˗euˬ heu naˇ, awˬ˗eu gaˇ kawˆ maˬ ngeuˇ nga. Ehˇ kʼawꞈ mehˬ bawˬ teu poˆ naˇ ngaˬ˗euˬ gʼaˇ duˬ maˬ ngehˇ leˇ coeˇ˗eu mehˬ bawˬ pyeuꞈ miˇ˗a.

Ngaˇ zaˬ guˬ guˬ dzawˇ dzawˇ laˇ ngeh, nga pehˬ jeˬ zaˬ cu˗eu yaˇ kʼmˇ˗ahˇ jawˇ luꞈ˗eu ma. Jeˬ zaˬ deuˬ˗ahˇ ya bo saˆ gaˇ ngaˬ˗ahˇ zawˇ˗ehˇ ya leˇ nya. Teu miˇ neh ngaˬ˗ahˇ jeˬ zaˬ˗ahˇ laˆ saˆ˗eu saˬ laˬ gʼoˬ aˇ dzehˬ˗ehˇ pyeuꞈ mawꞈ nya. Ngaˬ ma gaˇ kawˆ heu aˇ muˇ˗ahˇ sheuˬ gʼeh˗eu tiˬ gʼaˬ˗ahˇ ja nehˬ˗euˬ meh. Teu ngeh aˇ muˇ˗ahˇ sheuˬ gʼeh˗eu tiˬ gʼaˬ ngaˬ˗ahˇ aˬ dui “aˇ saˬ saˬ˗eu aˇ nah aˇ yamˬ” laꞈ kʼoeˇ dehꞈ luꞈ˗eu miˇ neh, uˬ taꞈ gʼawˬ mya kʼoꞈ sahˬ boꞈ dzaw goˇ dzaw goˇ˗ehˇ jawˇ naˇ Yeˬhawˇbaˬ nehˬ˗ehˇ cawˬ cawˬ˗eu jeˬ˗ahˇ deuˬ laˇ nga lehˇ gʼawˬ shaˬ gaˬ˗eu laꞈ kʼoeˇ saˇ tiˇ biꞈ  nehˬ laꞈ˗euˬ meh. (2 Tiˆmoˇseˬ 3:1) Teu miˇ neh ngaˇ sahˬ boꞈ maˬ paˇ dzaw goˇ iˇ˗eu lehˇ noeˬ tsehˆ˗euˬ ma.

Ehˇ kʼawꞈ sahˬ boꞈ 10 daˇ dzaw gʼaˬ naˇ aˬ jeˬ mˇ paˬ maˬ siˬ ngaˇ lehˇ tehꞈ˗ehˇ noeˬ laˇ nya. Yawˬ jaw na luꞈ koꞈ nah jawˇ nah keuˆ laˇ ngeh tsaꞈ gaˬ˗iˇ kʼawꞈ laˬ kʼaˬ yaw kʼaˆ˗ehˇ maˬ cehˇ laˇ nya. Huˬ mehˬ mehˬ˗eu gʼaˬ geuꞈ˗eu jiˇ nui ma maˬ ahˇ nya. Teu ngeh Saˇ kiˇ maˬ ngeuˇ˗eu ngaˬ da hawˇ˗eu ngaˬ zawˇ Toˬloˇtoˬ˗ahˇ jaˆ˗eu kamˬ nehˬ˗eu huiˬ dui dui˗eu gaˇ mˇ duˬ tiˬ tsahˇ˗ahˇ gaˇ aˇ yamˬ tiˬ byah ni mˇ le lehˇ gʼaˬ biꞈ˗eu meh. Ngaˬ zawˇ gaˇ mˇ duˬ teu tsahˇ˗ahˇ ui cuiˆ yaw huiˬ keuˆ leˇ taˬ˗euˬ meh. Teu miˇ ngeh ngaˇ jiˇ teu gaˇ mˇ˗iˇ˗euˬ ma.

Ngaˇ gaˇ aˇ dzehˬ jiˇ mˇ˗awˇ Saˇ kiˇ maˬ ngeuˇ˗eu deuˬ nehˬ˗ehˇ cawˬ aˇ dzehˬ˗ehˇ cawˬ˗eu miˇ neh nui jah paw˗euˬ gaˇ deuˬ yaw muiˬ˗ehˇ maˬ mˇ nya ni pyeuꞈ laˇ˗euˬ meh. Yaw beh ngaˇ Saˇ kiˇ maˬ ngeuˇ˗eu ngaˬ bawˇ nehˬ˗ehˇ jawˇ˗eu ma. Ngaˬ bawˇ shiˇ˗euˬ taꞈ naˇ jawˇ duˬ yaw shuiꞈ ya poˆ paˇ˗euˬ meh.

1958 kʼoꞈ˗ahˇ miˇ kʼahˬ deuˬ uiˬ laˇ˗euˬ mehˬ bawˬ˗ahˇ ngaˬ˗ahˇ kuˇ gʼeh nehˬ laꞈ˗euˬ Haˇceˬsahˬ aˬ nyaꞈ dzeˇ zaˬ naˇ ngaˬ˗euˬ gʼaˇ duˬ aˬ ma aˬ da˗ahˇ duˇ miˇ˗a. Ngaˬ˗ahˇ aˬ yawꞈ pehˬ kahˇ˗ahˇ bi jawˇ nehˬ laꞈ˗awˇ, nui jah ziꞈ laˇ ni caw ba nehˬ laꞈ˗euˬ meh. 1960 kʼoꞈ˗ahˇ ngaˇ aˬ yawꞈ nyaꞈ˗euˬ aˬ li Jawˬ nehˬ˗ehˇ tiˬ kawˆ loꞈ˗ehˇ iˇ cuꞈ shawˇ˗euˬ ma. Jawˬ huˬ mehˬ mehˬ˗eu gʼaˬ geuꞈ laˇ˗euˬ miˇ neh ngaˬ˗ahˇ jiˇ tsaꞈ gaˬ˗eu gaˇ˗ahˇ leh jeh mawꞈ laˇ nya. Aˇ muˇ laꞈ kʼoeˇ˗euˬ mehˇ nmˇ deuˬ ngaˇ huiˬ laˇ mahˇ laˇ luꞈ gaˇ haw mawˇ˗euˬ meh. Uˬ duˬ duˬ leˇ ngeh ngaˇ Miˬyehˇ gaˇ mˇ˗eu dzaw nymˇ˗ahˇ nyehꞈ tehˬ˗eu gʼaˬ ya geuꞈ˗euˬ ma. a

1966 kʼoꞈ˗ahˇ ngaˇ Miˬyehˇ˗euˬ gaˇ˗ahˇ leh jeh dui dui˗awˇ, huˬ mehˬ mehˬ˗eu tiˬ gʼaˬ pyeuꞈ˗eu mehˇ nmˇ Lehˇdiˬ Beuˇ˗cuiˬ nehˬ˗ehˇ yuˇ˗euˬ ma. Aˬ yawꞈ naˇ tsaꞈ gaˬ˗eu deuˬ loˬ˗eu jawˇ duˬ˗ahˇ gaˇ mˇ˗iˇ mawꞈ dui dui˗eu meh. Aˇ maꞈ˗ahˇ sheuˬ gʼeh˗eu gʼaˬ nga nyaꞈ˗ahˇ nui ma yaw kʼaˆ˗ehˇ ahˇ˗eu miˇ neh, Awˬtehˇliˬ˗oˬ gahˬ kaˬ Oˬleˇliˬ˗yaˬ aˇ muˇ˗ahˇ caw ba˗iˇ ma laˬ lehˇ naˇ haˬ˗eu meh. Nga nyaꞈ jiˇ pawˇ˗iˇ ma lehˇ ehˇ nehˬ˗awˇ taˆ lehˇ pawˇ˗iˇ˗euˬ ma.

Oˬleˇliˬ˗yaˬ meuˬ˗ahˇ iˇ keuˆ˗euˬ nehˬ˗ehˇ ngaˇ jiˇ Lehˇdiˬ nehˬ˗ehˇ aˬ myah luꞈ huˬ mehˬ mehˬ˗eu gaˇ mˇ dahˬ beh laˇ˗euˬ ma. Ngaˬ˗ahˇ jiˇ Lehˇdiˬ loꞈ˗ehˇ Miˬyehˇ˗euˬ gaˇ mˇ˗eu gʼaˬ kʼaˆ laˇ˗euˬ meh. Huˬ mehˬ mehˬ˗eu gaˇ˗ahˇ leh jeh˗awˇ mˇ laˇ ngeh tiˬ jawˇ Jaˇliꞈ zmˬ˗awˇ ya mehˬ˗eu heu naˇ, ngaˬ˗ahˇ laˬ kʼaˬ cehˇ laˇ˗eu lehˇ miˇ˗a. Tsawˇ haˬ deuˬ yaw tsaˬ yaw dawˇ siˬ nya laˇ gaˇ ya mawˇ ngehˬ ngehˬ˗ehˇ dzehˬ ngaˬ˗ahˇ laˬ kʼaˬ cehˇ laˇ˗eu lehˇ miˇ˗a. Kʼoeˇ naˇ Oˬleˇliˬ˗yaˬ  meuˬ˗ahˇ˗euˬ miˬ sawˇ yo zaˬ tiˬ gu˗ahˇ noeˬ paˇ laˇ˗awˇ Yeˬhawˇbaˬ˗euˬ gaˇ mˇ zaˬ tiˬ gʼaˬ pyeuꞈ laˇ ni ya caw ba nehˬ˗euˬ miˇ neh guiˬ lahˬ huiˬ˗eu lehˇ miˇ˗a.

Ngaˇ Toˬloˇtoˬ˗ahˇ gʼa˗iˇ ngeh Beˬdeˬlaˇ˗ahˇ huiˬ˗eu gaˇ mˇ˗eu tiˬ gʼaˬ pyeuꞈ˗eu mehˇ nmˇ Aˇnoˬ Mehˇnaˬmaˬlaˬ nehˬ˗ehˇ ya mawˇ dzoeˇ˗euˬ ma. Aˬ yawꞈ nga nyaꞈ˗ahˇ dzehˬ˗eu huˬ mehˬ mehˬ˗eu gaˇ mˇ mawꞈ miˇ˗a laˬ lehˇ naˇ haˬ˗eu meh. “Mˇ mawꞈ miˇ˗a. Ku behˆ˗ahˇ maˬ ngeuˇ naˇ aˬ geu gaˇ kʼawꞈ iˇ ma” lehˇ taˆ lehˇ ehˇ kʼoꞈ nehˬ˗euˬ ma. Teu ngeh naˇ Gaˬlaˬpyuˇ dawˬ ngehˬ˗eu Kehˇnaˬdaˬ tsawˇ haˬ deuˬ Paˇlaˬ dawˬ ngehˬ˗eu Kehˇnaˬdaˬ tsawˇ haˬ deuˬ˗ahˇ yaw kʼaˆ˗ehˇ maˬ ya leˇ˗a. Teu naˇ teu ngeh Ku behˆ gahˬ kaˬ Kehˇnaˬdaˬ miˇ kʼahˬ˗ahˇ neh doˆ˗iˇ˗eu gʼaˇ duˬ teuˆ˗eu miˇ neh meh.

Mehˇ nmˇ Aˇnoˬ ngaˬ˗ahˇ “Nymˬ˗mˇ kaˬ˗ahˇ naˇ Beˬdeˬlaˇ dzehˬ˗eu huˬ mehˬ mehˬ˗eu deuˬ˗ahˇ Ku behˆ gahˬ kaˬ˗ahˇ tehꞈ˗ehˇ bi iˇ luꞈ de” lehˇ ehˇ˗eu meh. Ngaˇ ngaˬ˗euˬ miˬ zaˬ Lehˇdiˬ teu gaˇ mˇ mawꞈ˗eu lehˇ siˬ nya˗eu miˇ neh taˆ lehˇ ha geuꞈ˗euˬ ma. Teu gaˇ iˇ˗eu lehˇ noeˬ tsehˆ˗euˬ teu naˇ, yaw duiˇ ma˗ehˇ noeˬ tsehˆ tsaˬ˗euˬ jeˬ pyeuꞈ ngaˇ lehˇ aˇ nah hawˇ˗eu siˬ nya laˇ˗euˬ ma.

Ngaˇ Paˇlaˬ dawˬ 5 jaw dzaw˗awˇ, dzaw gʼaˬ naˇ nga nyaꞈ dzaˇ˗i miˬ sawˇ yo zaˬ tiˬ gu nehˬ˗ehˇ Mawˇtaˬ˗liˬawˬ meuˬ˗euˬ nahˇ ma doˆ kʼehˬ laˆ taˆ paw 336 laˇ ehˇ gʼaˬ ni (540 kiˬloˬmiˬteuˬ) kaˬ gaˇ jaˆ˗eu Liˬmuˇsaꞈ˗kiꞈ meuˬ˗ahˇ bi sha gʼeh˗euˬ ma. Tiˬ poˆ ngaˬ˗ahˇ mehˬ bawˬ˗ahˇ tsaꞈ gaˬ˗eu jeˬ ya gui˗awˇ neh hawˇ˗eu dzaw paˬ˗ehˇ gʼeh˗eu jeˬ gʼawˬ mya ni jaˆ nga siˬ lehˇ siˬ laˇ nya. Ngaˇ keuˆ laˇ˗eu huiˬ˗eu mehˬ bawˬ˗euˬ sahˬ boꞈ gui ngeh, “Awˇsaˬ˗ti li˗ya tsawˇ haˬ” gʼawˬ mya ni daˬ yah daˆ laˇ meh lehˇ ehˇ jeˬ, “law taw aˇ jiˇ deuˬ” gʼawˬ mya ni laˇ meh lehˇ ngehˬ lehˬ˗euˬ meh.

Liˬmuˇsaꞈ˗kiꞈ˗ahˇ ngaˬ ha oeˬ gʼaˬ nehˬ˗ehˇ Miˬyehˇ˗euˬ gaˇ˗ahˇ leh jeh dui dui˗eu cawˬ maˬ shaˇ baw˗euˬ mehˇ nmˇ zaˬ miˬ aˬ buˇ oeˬ gʼaˬ hawˇ˗eu aˬ buˇ nyiˬ gʼaˬ jawˇ˗eu Huˬbehˇdoˬ˗suiꞈ aˬ nyaꞈ dzeˇ zaˬ gm laˇ˗euˬ meh. Huˬbehˇdoˬ˗suiꞈ pehˬ neh ngaˬ˗euˬ iˇ kahˇ kahˇ ma laꞈ kʼoeˇ yuꞈ˗eu kuˆ lawˆ 7 lawˆ ahˇ˗eu meh. Nga maꞈ teu gaˇ iˇ kahˇ˗euˬ aˇ poeˬ tiˬ kawˆ loꞈ˗ehˇ biꞈ˗awˇ jawˇ˗eu ma. Iˇ kahˇ teu kahˇ˗euˬ pyaˬ kʼawˬ hawˇ˗eu kʼawˇ zeuˇ deuˬ˗ahˇ yaw pyuˇ lehꞈ taˬ˗euˬ miˇ neh, nga maꞈ iˇ kahˇ teu kahˇ˗ahˇ iˇ kahˇ kahˇ pyuˇ lehˇ kuˇ˗eu ma. Iˇ kahˇ teu kahˇ˗ahˇ 12 gʼaˬ˗ahˇ neh 14 gʼaˬ˗ahˇ keuˆ ni jawˇ˗eu meh. Lehˇdiˬ nga nyaꞈ naˇ dzehˬ˗eu huˬ mehˬ mehˬ˗eu gʼaˬ pyeuꞈ˗eu miˇ neh, uˬ shawˬ, nah gʼahˇ, uˬ ciꞈ lehˇ aˬ myah luꞈ tsaꞈ gaˬ˗iˇ˗eu cah˗eu ma. Tsahˬ gaˆ yamˬ˗ahˇ yaw gaˆ gaˆ dui dui˗eu uˬ ciꞈ paw kʼawꞈ, nga nyaꞈ nehˬ˗ehˇ Miˬyehˇ˗euˬ gaˇ mˇ gaˇ oe caw nehˬ˗eu tiˬ gʼaˬ maˬ ngeuˇ naˇ tiˬ gʼaˬ aˬ myah luꞈ jawˇ˗eu miˇ neh guiˬ lahˬ huiˬ˗eu lehˇ miˇ˗a.

Nga nyaꞈ saˇ jaˇ ziꞈ˗eu huˬ mehˬ mehˬ˗eu heu deuˬ nehˬ˗ehˇ yawˬ nah na luꞈ tiˬ kawˆ loꞈ˗ehˇ ya jawˇ˗eu miˇ neh tiˬ pehˬ zaˬ loꞈ˗ehˇ pyeuꞈ laˇ shaw nyaˬ. Tiˬ poˆ na nga maꞈ miˬ dzaˬ bawˬ doꞈ˗awˇ byawˬ niˇ gʼa˗eu uˬ taꞈ, tiˬ poˆ na˗aˬ yawˬ gʼaˬ na luꞈ uiˬ leˇ˗awˇ toeˆ puꞈ lawˬ muˇ jahˇ dzaˬ˗eu ma. Nga maꞈ mehˇ nmˇ deuˬ laꞈ kʼoeˇ Giˬtaꞈ diˬ nya˗eu tiˬ gʼaˬ ahˇ˗eu meh. Teu miˇ neh koꞈ nah ngeh nah miˇ keuˆ laˇ naˇ, deuˇ˗mˬ diˬ˗awˇ dawˬ caˇ caˇ caˇ˗ehˇ gaˇ nyeh nyeh˗eu ma.

Liˬmuˇsaꞈ˗kiꞈ meuˬ˗ahˇ tsawˇ haˬ gʼawˬ mya ni Jaˇliꞈ˗ahˇ nui ma ahˇ˗eu meh. 5 kʼoꞈ aˇ yamˬ laꞈ kʼoeˇ Jaˇliꞈ dzaw zaˬ gʼawˬ mya gʼaˬ iˇ cuꞈ shawˇ gaˇ keuˆ ni huiˬ laˇ mahˇ laˇ˗euˬ meh. Aˇ muˇ laꞈ kʼoeˇ tsaꞈ gaˬ˗eu deuˬ 35 gʼaˬ ehˇ gʼaˬ ni myaˬ laˇ˗euˬ meh. Teu˗ahˇ ya mawˇ ngeh laˬ kʼaˬ cehˇ laˇ˗eu lehˇ miˇ˗a.

Ku behˆ˗ahˇ nga maꞈ˗ahˇ yaw muiˬ˗ehˇ tsaꞈ gaˬ nya˗eu gʼaˇ duˬ yaw muiˬ˗ehˇ dzaw nehˬ laꞈ˗euˬ meh. Nga maꞈ tsaꞈ gaˬ˗eu gaˇ˗ahˇ maˬ ehˇ, shiˬ shaˬ jiˇ paw loˬ˗eu jeˬ˗ahˇ maˬ ehˇ, Yeˬhawˇbaˬ caw ba nehˬ laꞈ gaˇ ya mawˇ˗euˬ ma. Kʼoeˇ naˇ nga maꞈ Paˇlaˬ dawˬ ngehˬ˗eu deuˬ˗ahˇ maˬ ehˇ, aˬ yawꞈ maꞈ˗euˬ dawˬ˗ahˇ maˬ ehˇ, zahˇ sahˇ kʼoꞈ˗ahˇ maˬ ehˇ, gaˬ nya laˇ˗euˬ ma. Heu naˇ nga maꞈ˗ahˇ zahˇ sahˇ kʼoꞈ nui deuˬ˗ahˇ jiˇ gaˬ nya laˇ ni caw ba nehˬ laꞈ˗euˬ meh.—2 Gawˇliˬtu 6:13.

Maˬ noeˬ maˬ duˇ˗ehˇ jawˇ gaˇ Beˬdeˬlaˇ saˇ naˇ nga nyaꞈ˗ahˇ Niˬ˗yuˇ Baˇ˗laˇsaꞈ˗gʼoiꞈ lawˇ deh˗euˬ nahˇ ma doˆ kʼehˬ paw jaˆ˗eu Taˬ˗laˬkaˬdiˬ meuˬ˗ahˇ ya pawˇ˗iˇ nga lehˇ ehˇ˗eu meh. Nga nyaꞈ˗ahˇ shaˬ laˇ˗euˬ lehˇ miˇ˗a. Nymˬ˗mˇ hawˇ˗eu iˇ kahˇ ngaˬ˗eu laꞈ ma dehˬ gʼaˬ˗euˬ tehꞈ de siˬ. Kʼoeˇ naˇ sahˬ boꞈ dzaw nymˇ tiˬ tsahˇ˗ahˇ jiˇ aˇ yamˬ tiˬ yamˬ na sahˬ boꞈ mehˬ laˇ ma lehˇ laꞈ ma dehˬ˗awˇ ja tsaˬ˗eu tiˬ dehˬ tehꞈ de siˬ. Kʼoeˇ naˇ Jaˇliꞈ dzaw zaˬ tiˬ deuˬ na jiˇ tsaꞈ gaˬ˗eu  gʼaˬ pyeuꞈ laˇ˗euˬ maˬ myahˇ laˇ˗aˬ siˬ. Bawˬdzaˬnymˇ jiˇ tsoˆ ngehˬ tsoˆ paˆ lehˆ˗ehˇ jaˆ luꞈ˗a siˬ. Teu miˇ neh noeˬ tsehˆ˗eu shaˬ˗eu lehˇ miˇ˗a.

Nga nyaꞈ pawˇ˗iˇ˗eu gaˇ kawˆ nehˬ˗ehˇ taꞈ leˇ˗awˇ, guiˬ lahˬ yaw kʼaˆ˗ehˇ shaˇ˗awˇ Taˬ˗laˬkaˬdiˬ meuˬ˗ahˇ jiˇ gʼa˗iˇ haw˗euˬ ma. Taˬ˗laˬkaˬdiˬ meuˬ naˇ nga nyaꞈ jawˇ˗eu Liˬmuˇsaꞈ˗kiꞈ meuˬ nehˬ˗ehˇ beu gaˇ dui dui nga. Ehˇ kʼawꞈ nga nyaꞈ Yeˬhawˇbaˬ bi iˇ mawꞈ ngeh to˗aˬ, iˇ ma lehˇ noeˬ tsehˆ˗euˬ ma. Teu gaˇ Yeˬhawˇbaˬ nga nyaꞈ˗ahˇ shaˬ zahˬ˗ahˇ laˆ piˇ nehˬ laꞈ gaˇ ya mawˇ˗euˬ ma. (Maˬlaˬkiˇ 3:10) Lehˇdiˬ naˇ nui jah ziꞈ dah ni gʼeh˗awˇ yawˬ ha˗euˬ gʼaˇ duˬ tehꞈ˗ehˇ maˬ shaˇ noeˬ˗eu uˬ taꞈ, laˆ byawˬ laˆ cehˇ nya˗eu tiˬ gʼaˬ pyeuꞈ˗eu miˇ neh aˬ gaˇ pawˇ˗iˇ kʼawꞈ yaw awˬ miˇ˗a.

Aˇ muˇ yaw shuiꞈ teu laꞈ kʼoeˇ aˇ muˇ˗ahˇ sheuˬ gʼeh˗eu tiˬ gʼaˬ jawˇ˗eu tehꞈ meh. Aˬ yawꞈ naˇ Lawˇbeuꞈ Lawˆ˗suiꞈ lehˇ kuˇ˗eu meh. Aˬ yawꞈ hawˇ˗eu aˬ yawꞈ˗euˬ nymˇ dahˬ Leˇdaˬ teu gaˇ huˬ mehˬ mehˬ˗eu gʼaˬ geuꞈ laˇ˗euˬ gaˇ neh aˬ li baw˗awˇ teu gaˇ jawˇ daˆ leꞈ˗euˬ meh. Aˬ yawꞈ nyaꞈ zaˬ bahˬ gʼa˗eu kʼawꞈ, daˬ yah ha˗eu nya˗eu lehˇ meh. Miˬyehˇ˗euˬ gaˇ˗ahˇ jiˇ leh jeh dui dui˗eu meh. Nga nyaꞈ˗ahˇ gʼaˬ ahˇ laˇ˗eu lehˇ miˇ˗a.

Nga nyaꞈ Taˬ˗laˬkaˬdiˬ meuˬ˗ahˇ huˬ mehˬ mehˬ˗eu gaˇ 2 kʼoꞈ mˇ gʼaˬ˗euˬ taꞈ naˇ, aˇ maꞈ˗ahˇ sheuˬ gʼeh˗eu gaˇ ya mˇ˗euˬ ma. Nga nyaꞈ gaˇ teu˗ahˇ ya mˇ˗eu paˬ lehˇ tiˬ pawꞈ˗iˬ maˬ noeˬ taˬ˗aˬ. Nga nyaꞈ Gaˬlaˬpyuˇ dawˬ ngehˬ˗eu aˇ maꞈ˗ahˇ 7 kʼoꞈ ya mˇ˗awˇ, kʼoeˇ gaˇ neh naˇ Ku behˆ˗ahˇ Paˇlaˬ dawˬ ngehˬ˗eu aˇ maꞈ˗ahˇ paˇ ya mˇ˗iˇ˗euˬ ma. Ku behˆ˗ahˇ˗euˬ gahˬ kaˬ˗ahˇ sheuˬ gʼeh˗eu gʼaˬ pyeuꞈ˗eu mehˇ nmˇ Liˬawˬ˗suiꞈ Kaˬ˗liˇpoꞈ ngaˇ dawˬ mehˬ zawˇ˗ehˇ mehˬ nya nya lehˇ ja ceuˬ˗eu meh. Ehˇ kʼawꞈ nyaˆ taꞈ poˆ naˇ “Mehˇ nmˇ deuˬ maˇ diˇ zmˬ˗iˇ nya˗eu jeˬ˗ehˇ mehˬ˗eu za meh laˬ” lehˇ naˇ haˬ˗eu meh. b Ngaˬ˗ahˇ teu loꞈ˗ehˇ toeˬ mehˬ nehˬ laꞈ˗eu miˇ neh ngaˇ yaw maˇ maˇ˗ehˇ, yaw awˬ awˬ˗ehˇ, yaw luiˆ luiˆ˗ehˇ mehˬ nya laˇ˗euˬ ma.

1978 kʼoꞈ˗ahˇ Mawˇtaˬ˗liˬawˬ meuˬ˗ahˇ “Gʼaˬ leˇ˗euˬ jah˗eu jeˬ” lehˇ ehˇ˗eu miˇ kʼahˬ deuˬ uiˬ laˇ˗eu mehˬ bawˬ˗ahˇ ya mˇ˗euˬ gaˇ˗ahˇ nymˬ˗mˇ keuˆ ni maˬ ngehˇ nyaˬ siˬ. Ngaˇ dzaˬ dzaˬ dawˇ dawˇ laˆ dawˆ˗eu paw ya mˇ˗euˬ ma. Mehˬ bawˬ teu poˆ˗ahˇ 80,000 gʼaˬ ehˇ gʼaˬ ni laˇ˗euˬ gaˇ duˇ˗eu meh. Teu poˆ naˇ dzaˬ˗eu dawˇ˗eu laˆ dawˆ˗eu yaw shuiꞈ jeˬ beˬ paˇ jiˇ˗euˬ meh. Dzaˬ dzaˬ dawˇ dawˇ laˆ dawˆ˗eu keu ka deuˬ kʼawꞈ yaw shuiꞈ beˬ paˇ jiˇ˗awˇ, gʼawˬ nyoeˇ jiˇ yawˬ jeˬ yawˬ bi jahˇ paˇ˗euˬ meh. Gʼawˬ nyoeˇ jahˇ jeˬ jahˇ kawˆ jiˇ laˆ paˇ jiˇ˗euˬ meh. Yawˬ jeˬ na luꞈ ngaˬ˗euˬ gʼaˇ duˬ yaw shuiꞈ shuiꞈ lehˇ miˇ˗a. Nga maꞈ huiˬ dui dui˗eu iˇ tsehꞈ bahˬ keuˆ 20 keuˆ jaˆ˗eu ma. Ehˇ kʼawꞈ tiˬ keuˆ na cawˆ˗iˇ˗euˬ meh. Mehˬ bawˬ˗euˬ jeˬ hu ngeh nah neh myawˬ deuˬ lehˬ hmˬ taˬ mawꞈ kʼawꞈ, teu ngeh nah mui niˇ gʼa˗eu jeˬ jaˆ˗eu miˇ neh sehˇ gʼahˇ ceh laˇ ngeh keuˆ ni maˬ bi ahˇ leˇ nehˬ laꞈ˗a. Toˆ˗ehˇ paˇ gʼeh gaˇ nga maꞈ uˬ shawˬ hawˬ byawˇ shaˇ dawˆ˗eu gʼaˇ duˬ ba˗eu keu ka deuˬ yaw naꞈ˗ehˇ ya lehˬ hmˬ taˬ˗eu miˇ neh, nga maꞈ neh shaˬ gʼeh˗euˬ lehˇ ma. Ehˇ kʼawꞈ ni gaˇ tiˬ kawˆ loꞈ˗ehˇ mˇ taꞈ˗eu mehˇ nmˇ deuˬ˗euˬ leh jeh˗eu  jeˬ hawˇ˗eu noeˬ dahˇ doe˗eu jeˬ˗ahˇ neh maˬ ehˇ, laˆ byawˬ niˇ gʼa nya˗eu jeˬ˗ahˇ neh maˬ ehˇ, ya dzaw geuꞈ˗euˬ ma. Nymˬ˗mˇ iˬ nah keuˆ ni ngaˬ ha gʼoeˇ luꞈ ma siˬ. 1940 kʼoꞈ˗ahˇ neh 1960 kʼoꞈ˗ahˇ keuˆ ni kʼehˬ˗eu kʼaˆ˗eu jeˬ jaˆ dui dui˗euˬ Ku behˆ gahˬ kaˬ˗ahˇ heu loꞈ˗ehˇ gʼeh˗eu huiˬ dui dui˗eu mehˬ bawˬ jahˇ nya˗euˬ heu naˇ, laˬ kʼaˬ cehˇ dui dui laˇ paˬ˗ehˇ gʼeh˗eu jeˬ pyeuꞈ meh.

Ngaˇ Mawˇtaˬ˗liˬawˬ˗ahˇ jahˇ˗eu huiˬ˗eu mehˬ bawˬ jahˇ˗euˬ teu poˆ˗ahˇ tiˬ kawˆ loꞈ˗ehˇ gaˇ ya mˇ taꞈ˗eu aˇ muˇ˗ahˇ sheuˬ gʼeh˗eu deuˬ˗ahˇ neh gʼawˬ mya jeˬ ya dzaw geuꞈ˗euˬ ma. Tiˬ kʼoꞈ nymˬ˗mˇ uˆ lahˇ˗eu aˇ muˇ laꞈ kʼoeˇ neh tiˬ gʼaˬ pyeuꞈ luꞈ˗eu mehˇ nmˇ Daˬbiˇ Saꞈpeꞈ˗leˬ mehˬ bawˬ˗ahˇ sheuˬ gʼeh˗eu gʼaˬ geuꞈ˗euˬ meh. Yawˬ kʼoꞈ yawˬ keuˆ laˇ ngeh gaˇ teu hmˬ ngaˬ˗ahˇ doˇ laˇ˗euˬ meh. Teu miˇ neh mehˇ nmˇ Daˬbiˇ ngaˬ˗ahˇ gʼawˬ naˆ ni caw ba nehˬ laꞈ˗euˬ meh.

2011 kʼoꞈ keuˆ laˇ ngeh˗aˬ, Lehˇdiˬ nga nyaꞈ aˇ maꞈ˗ahˇ sheuˬ gʼeh˗eu gaˇ mˇ luꞈ˗eu 36 kʼoꞈ byah laˇ shaw˗euˬ ma. Ngaˬ˗ahˇ aˇ muˇ˗ahˇ sheuˬ gʼeh˗eu deuˬ˗euˬ dzaw nymˇ˗ahˇ bi mehˬ˗eu gʼaˇ duˬ kuˇ˗eu meh. Teu miˇ neh ngaˇ 2 kʼoꞈ aˇ yamˬ laꞈ kʼoeˇ tehꞈ˗ehˇ uˬ zaˇ 75 tsahˇ ya paˇ˗euˬ ma. Ehˇ kʼawꞈ ni paˇ poeˬ kʼoꞈ miˇ˗a. Tiˬ jaw tiˬ jaw jiˇ ngeh aˇ muˇ˗ahˇ sheuˬ gʼeh˗eu deuˬ guiˬ lahˬ huiˬ dui dui˗eu meh. Teu naˇ aˇ muˇ˗ahˇ sheuˬ gʼeh˗eu deuˬ˗euˬ nui jah˗ahˇ uˆ lahˇ˗eu aˇ muˇ aˇ naˆ ni ngehˬ gʼeh˗eu lehˇ ya mawˇ˗euˬ miˇ neh meh.

Aˇ nah naˇ Miˬyehˇ Miˇkʼahˬ gaˇ kawˆ tsaꞈ gaˬ˗eu Dzaw nymˇ˗ahˇ paˇ ya mehˬ˗euˬ ma. Teu gaˇ˗euˬ dzaw zaˬ deuˬ gaˇ tiˬ byah ni jaˆ˗eu miˇ neh kʼahˬ lahˇ˗awˇ, gʼaˬ doeˇ doeˇ˗eu meh. Dzaw zaˬ teu deuˬ tiˬ nah naˬ liˬ 7 laꞈ dzaw nymˇ kuˆ lawˆ˗ahˇ ya nuiˇ˗awˇ, uˬ ciꞈ paw jiˇ naˬ liˬ 3 laꞈ ya lehˬ hmˬ˗eu meh. Kʼoeˇ naˇ tiˬ jaw laꞈ kʼoeˇ ya mˇ˗eu gaˇ jiˇ 4 hmˬ 5 hmˬ ehˇ gʼaˬ naˆ ni za˗eu meh. Ngaˇ hawˇ˗eu mehˬ˗eu dzaˇ˗i tiˬ gʼaˬ dzaw zaˬ deuˬ˗ahˇ naw maꞈ Yeˬhawˇbaˬ maˬ caw ba naˇ maˬ mˇ pyeuꞈ nya˗a lehˇ ehˇ nehˬ˗euˬ meh. Dzaw zaˬ deuˬ Yeˬhawˇbaˬ˗ahˇ gʼoe ngeh tiˬ jawˇ dzaw zaˬ deuˬ aˬ yawꞈ maꞈ neh noeˬ taˬ˗euˬ naˆ maˬ tseˇ mˇ nya gaˇ ya mawˇ˗euˬ miˇ neh laˬ kʼaˬ cehˇ gaˇ ngaˬ˗ahˇ nymˬ˗mˇ keuˆ ni noeˬ luꞈ nya siˬ.

Ngaˬ ma aˬ myah luꞈ aˬ cawˬ˗ahˇ nui ma ahˇ˗awˇ caw ba˗eu miˇ neh, dzaw zaˬ deuˬ huiˬ laˇ mahˇ laˇ˗awˇ ngaˬ da jiˇ maˬ paˇ laˆ tsoeˬ ni nui ma nahˬ laˇ˗euˬ meh. Ngaˬ ma shiˇ˗euˬ 3 nah naˇ ngaˬ da mehˬ bawˬ˗ahˇ oe˗awˇ dawˬ mehˬ mehˬ gaˇ naˇ haˬ le˗euˬ miˇ neh nga maꞈ˗ahˇ zahˬ leˇ˗eu lehˇ˗a. Kʼoeˇ naˇ mehˬ bawˬ˗ahˇ aˬ myah luꞈ 26 kʼoꞈ byah ni daˆ le˗euˬ meh. Ngaˬ da iˇ cuꞈ maˬ shawˇ˗euˬ kʼawꞈ mehˬ bawˬ˗ahˇ aˬ cawˬ˗euˬ mehˬ hu oe meh lehˇ aˇ muˇ˗ahˇ sheuˬ gʼeh˗eu deuˬ ehˇ˗eu meh.

Ngaˬ ma naˇ ngaˬ ha mehˇ nmˇ deuˬ˗euˬ gʼaˇ duˬ muiˬ dui dui˗eu dzaw geuꞈ paˬ˗ehˇ gʼeh˗eu tiˬ gʼaˬ pyeuꞈ meh. Ngaˬ nyiˇ 3 gʼaˬ luꞈ aˬ yawꞈ maꞈ˗euˬ kʼaˬ dzeˇ zaˬ nehˬ˗ehˇ Yeˬhawˇbaˬ˗euˬ gaˇ˗ahˇ saˇ jaˇ ziꞈ˗eu laꞈ kʼoeˇ mˇ luꞈ˗eu meh. Ngaˬ nyiˇ tiˬ gʼaˬ naˇ Pawˇtuˇgiˬ Beˬdeˬlaˇ˗ahˇ mˇ˗awˇ, dzaˇ˗i tiˬ gʼaˬ naˇ He tiꞈ Beˬdeˬlaˇ˗ahˇ mˇ˗eu meh.

Nymˬ˗mˇ Lehˇdiˬ nga nyaꞈ Awˬtehˇliˬ˗oˬ gahˬ kaˬ Hehˇmiˬtamˬ meuˬ˗ahˇ dzehˬ˗eu huˬ mehˬ mehˬ˗eu gʼaˬ geuꞈ luꞈ˗eu ma. Nga nyaꞈ aˇ maꞈ˗ahˇ sheuˬ gʼeh˗eu gaˇ mˇ ngeh, mehˇ nmˇ deuˬ nehˬ˗ehˇ Jaˇliꞈ mehˬ˗iˇ gaˇ ya iˇ˗eu heu laˬ kʼaˬ cehˇ laˇ˗eu lehˇ miˇ˗a. Nymˬ˗mˇ naˇ jiˇ yawˬ ha˗euˬ Jaˇliꞈ dzaw zaˬ deuˬ huiˬ laˇ mahˇ laˇ gaˇ ya mawˇ ngeh laˬ kʼaˬ cehˇ laˇ miˇ˗a. Aˇ muˇ yaw shuiꞈ laꞈ kʼoeˇ˗euˬ mehˇ nmˇ deuˬ nehˬ˗ehˇ gʼoeˇ laˇ˗awˇ, muiˬ ngeh maˬ ehˇ, doeˇ ngeh maˬ ehˇ, Yeˬhawˇbaˬ aˬ yawꞈ maꞈ˗ahˇ aˬ joˆ˗ehˇ caw ba nehˬ˗euˬ lehˇ ya siˬ nya ngeh gʼaˬ ahˇ laˇ˗eu lehˇ miˇ˗a.

Mehˇ nmˇ deuˬ nga nyaꞈ˗ahˇ nui ma keuˆ˗awˇ caw ba˗eu miˇ neh guiˬ lahˬ huiˬ˗eu lehˇ miˇ˗a. Teu miˇ neh nga nyaꞈ jiˇ mehˇ nmˇ deuˬ˗ahˇ “nui ma keuˆ”˗eu leh jeh˗awˇ, aˬ yawꞈ maꞈ Miˬyehˇ˗euˬ gaˇ˗ahˇ kʼaˇ gʼeh nya gaˇ neh mˇ nya ni gʼaˬ biꞈ˗eu ma. (2 Gawˇliˬtu 7:6, 7, YB18) Yaw jeˬ ma jeˬ, nymˇ jiˇ tiˬ jiˇ ngehˬ˗ehˇ dzehˬ aˬ ma gʼaˬ maˬ ehˇ, aˬ li gʼaˬ maˬ ehˇ, aˬ buˇ gʼaˬ maˬ ehˇ, aˇ yamˬ tiˬ byah ni huˬ mehˬ mehˬ˗eu gaˇ mˇ˗eu meh. Ngaˇ aˬ da gʼaˬ˗ahˇ huˬ mehˬ mehˬ˗eu gʼaˬ geuꞈ˗eu nui ma ahˇ miˇ˗a laˬ lehˇ naˇ haˬ ngeh, aˬ yawꞈ naˇ huˬ mehˬ mehˬ˗eu heu 3 gʼaˬ˗ahˇ ya caw ba˗eu beu leˇ lehˇ ehˇ˗eu meh. Ngaˇ aˬ yawꞈ˗ahˇ “Nawˇ aˬ yawꞈ maꞈ˗ahˇ Yeˬhawˇbaˬ naˆ maˬ tseˇ caw ba nehˬ nya de laˬ?” lehˇ naˇ haˬ˗euˬ ma. Ngaˇ aˬ yawꞈ˗ahˇ pehˬ zaˬ ma zaˬ huˬ mehˬ mehˬ˗eu gʼaˬ geuꞈ haw˗eu maˬ ngeuˇ maˇ˗i lehˇ ehˇ nehˬ˗euˬ ma. Teu gaˇ neh ba la koꞈ siˬ naˇ aˬ yawꞈ huˬ mehˬ mehˬ˗eu gʼaˬ pyeuꞈ laˇ˗euˬ meh.

Lehˇdiˬ nga nyaꞈ Yeˬhawˇbaˬ Miˬyehˇ neh “mˇ˗euˬ zahˬ leˇ paˬ˗ehˇ gʼeh˗eu gaˇ deuˬ” “nahˬ ziˇ” nahˬ zaˬ deuˬ˗ahˇ keuˆ ni ja nehˬ ma siˬ. Nga nyaꞈ aˬ yawꞈ maꞈ jiˇ nga nyaꞈ loꞈ˗ehˇ Miˬyehˇ˗euˬ gaˇ˗ahˇ gaˬ laˇ gaˇ noeˬ tmˬ˗eu ma.—Ja ceuˬ 71:17, 18.