Gaˇ hu˗euˬ gaˇ kawˆ˗ahˇ poˆ tseˇ˗eu zaˬ siˬ nui gahˇ ahˇ˗eu deuˬ gaˇ hu˗euˬ Baˬbuˇloˬ meuˬ meuˬ ma tsoˆ gaˇ zmˬ˗eu maˬ uꞈ aˇ lam aˇ lam siˬ˗ahˇ neh poˆ mawˇ˗euˬ meh. Gaˇ hu˗euˬ gaˇ kawˆ˗ahˇ poˆ tseˇ˗eu zaˬ siˬ nui gahˇ ahˇ˗eu tiˬ gʼaˬ pyeuꞈ˗eu Lawˇbeuꞈ Koˇdeˬgʼoeˬ maˬ uꞈ pahˬ “miˇ tsaˬ shaˬ jehˆ mui awˇ miˬ dzaˬ jaˆ dui dui˗eu meuˬ˗euˬ laꞈ nyiˇ paw jahˇ taˬ ngaˬ” lehˇ ehˇ˗eu meh.

Gaˇ hu˗eu gaˇ kawˆ˗ahˇ poˆ tseˇ˗eu paˇ dm tiˬ dmˬ˗ahˇ Baˬbuˇloˬ˗euˬ yaw huiˬ yaw mahˇ deuˬ yaw haiˬ yaw doeˇ jeˬ˗ahˇ mˇ˗eu gʼaˇ duˬ maˬ uꞈ pahˬ˗euˬ miˬ dzaˬ tsawˬ bu teu˗ahˇ zmˬ ngaˬ lehˇ pah mehˬ taˬ˗euˬ meh. Toˬloˇtoˬ sahˬ boꞈ dzaw goˇ dmˬ˗ahˇ˗euˬ gaˇ hu Aˬshuˇliˆ miˇ kahˬ˗euˬ gaˇ kawˆ hawˇ˗eu dawˬ paw nehˬ˗ehˇ taꞈ leˇ˗awˇ yaw kʼaˆ˗ehˇ siˬ nya˗eu nui gahˇ ahˇ˗eu tiˬ gʼaˬ pyeuꞈ˗eu Pawˇluˆ Ehˬlawˬ heu loꞈ˗ehˇ ehˇ˗eu meh. “Baˬbuˇloˬ miˇ kʼahˬ˗euˬ gaˇ kawˆ boꞈ taˬ˗euˬ paˇ dmˬ laꞈ kʼoeˇ sahˬ paˬ˗euˬ ehˇ dawˬ maˬ naˇ haˬ˗eu deuˬ hawˇ˗eu Baˬbuˇloˬ˗euˬ miˬ yehˇ˗ahˇ yaw zeu maˬ baw˗eu deuˬ˗ahˇ miˬ dzaˬ tsawˬ bu bu ma˗ahˇ baꞈ puiˆ˗eu meh.” Yaw jeˬ ma jeˬ, Neˬbuˬkaˬneˬzaˬ˗euˬ saˇ ka˗ahˇ˗euˬ sahˬ boꞈ tiˬ taꞈ˗ahˇ “Aˬ yawꞈ maꞈ˗ahˇ miˬ dzaˬ tsawˬ bu bu ma˗ahˇ dehˬ ahˇ gʼeh˗awˇ, miˬ dzaˬ tsawˬ bu bu ma˗ahˇ ba˗awˬ . . . Aˬ yawꞈ maꞈ˗ahˇ tiˬ pawꞈ˗iˬ maˬ bi dzeˇ laˇ ni puiˆ byoˆ jiˇ˗awˬ, uˬ kʼoeˬ kʼoeˬ dui dui laˇ ngeh keuˆ ni bi puiˆ˗awˬ” lehˇ ehˇ taˬ˗euˬ meh.

Dawˬ heu naˇ Daˬyeˬlaˇ gaˬ naˇ yaw huiˬ 3 laꞈ kʼoeˇ boꞈ taˬ˗euˬ gaˇ kawˆ˗ahˇ bi noeˬ mawˇ laˇ˗eu meh. Teu gaˇ boꞈ taˬ˗euˬ gaˇ kawˆ˗ahˇ haw ngeh Baˬbuˇloˬ meuˬ˗euˬ laꞈ nyiˇ paw jaˆ˗eu Duˇlaˬ deh ga˗ahˇ sahˬ paˬ Neˬbuˬkaˬneˬzaˬ shuiˇ mawˇ kawˇ kawˇ ma tiˬ hmˬ tehˆ taˬ˗euˬ meh. Heˬbyehˇ aˬ li zaˬ guˬ smˇ gʼaˬ pyeuꞈ˗eu Shaˬdaˬlaˆ, Meˬshaˆ, Aˬbeˬdaˬneˬgoˬ aˬ ha smˇ gʼaˬ shuiˇ mawˇ kawˇ teu˗ahˇ uˬ duˬ maˬ tahˬ˗eu miˇ neh sahˬ paˬ Neˬbuˬkaˬneˬzaˬ nui ma pehˇ dui dui˗eu meh. Teu miˇ neh miˬ dzaˬ tsawˬ bu bu ma teu “shiꞈ bymˇ lahˇ dzehˬ laˇ ni laˆ nyehˆ˗eu gʼaˇ duˬ” aˬ yawꞈ dawˬ biꞈ˗awˇ, ‘miˬ dzaˬ tsawˬ bu˗ahˇ bi biˬ ahˇ˗euˬ’ meh. Ehˇ kʼawꞈ mˬ taˆ gʼaˬ kʼehˇ tiˬ gʼaˬ caw ba le˗euˬ miˇ neh aˬ ha smˇ gʼaˬ maˬ ya shiˇ ni ya buˬ˗iˇ˗euˬ meh.—Daˬyeˬlaˇ 3:1-6, 19-28.

Gaˇ hu Baˬbuˇloˬ˗ahˇ poˆ mawˇ˗euˬ maˬ uꞈ heu jiˇ, Jaˇliꞈ heu naˇ tsaˬ˗eu jeˬ pyeuꞈ˗eu lehˇ gʼaˬ biꞈ˗eu meh. Maˬ uꞈ gʼawˬ mya siˬ˗ahˇ sahˬ paˬ˗ahˇ ciˬ huiˬ ciˬ mahˇ˗eu sahˬ boꞈ boꞈ taˬ˗euˬ meh. Maˬ uꞈ teu laꞈ kʼoeˇ boꞈ taˬ˗euˬ sahˬ boꞈ tiˬ hmˬ˗ahˇ “Baˬbuˇloˬ meuˬ meuˬ ma˗euˬ sahˬ paˬ Neˬbuˬkaˬneˬzaˬ . . . Ngaˇ jawˇ˗eu gʼaˇ duˬ tsoˆ˗euˬ hawˇ nymˇ . . . Hawˇ nymˇ heu˗ahˇ ngaˬ˗euˬ zaˬ ngaˬ˗euˬ uˆ deuˬ dzoeˬ dzaˬ daˆ leꞈ luꞈ˗uˇ” lehˇ boꞈ taˬ˗euˬ meh. Dawˬ heu naˇ Daˬyeˬlaˇ 4:30-ahˇ “Haw sheˇ, Baˬbuˇloˬ meuˬ heu aˇ naˆ ni huiˬ˗eu mahˇ˗eu meuˬ nga. Ngaˬ˗euˬ baoˬ hawˇ˗eu ngaˬ˗euˬ yaw shehꞈ kʼahˬ sehˇ bi doˆ laˇ˗eu gʼaˇ duˬ, sahˬ paˬ jawˇ˗eu meuˬ pyeuꞈ laˇ ni, ngaˬ neh tsoˆ˗euˬ ma” lehˇ Neˬbuˬkaˬneˬzaˬ neh kʼahˬ sehˇ jehˆ taˬ˗euˬ dawˬ nehˬ˗ehˇ duˇ dui dui leˇ˗eu meh.