Gui˗eu deuˬ naˇ haˬ˗eu jeˬ
2020 kʼoꞈ, Koꞈ siˬ ba la˗euˬ Loꞈ˗eu nymˇgoˇ laꞈ kʼoeˇ “Nawˬ˗euˬ tsawˇ myahˇ˗ahˇ yaw zeu baw luꞈ˗uˇ” lehˇ ehˇ˗eu gaˇ kawˆ aˬ dui˗ahˇ Yeˬhawˇbaˬ˗euˬ tsawˇ myahˇ gaˇ kawˆ hawˇ˗eu Yeˬhawˇbaˬ dawˬ tawˆ kʼoeˇ taˆ uˆ lahˇ˗eu geuˇ˗eu gaˇ kawˆ nehˬ˗ehˇ taꞈ leˇ˗awˇ gʼoˆ shaw dzehˬ laˇ ni aˬ joˆ˗ehˇ caw ba nehˬ˗eu nga?
Teu kawˆ laꞈ kʼoeˇ aˬ dui mˬ taˆ gʼaˬ kʼehˇ hawˇ˗eu tsawˇ haˬ zaˬ yawˬ gʼaˬ na luꞈ nehˬ˗ehˇ taꞈ˗eu Yeˬhawˇbaˬ˗euˬ tsawˇ myahˇ aˬ myah luꞈ muiˬ ni shawˇ ni jahˇ˗eu aˇ yeˇ huiˬ˗eu gaˇ kawˆ heu˗ahˇ ya siˬ˗euˬ ma. Aˇ yeˇ huiˬ˗eu gaˇ kawˆ teu˗ahˇ Yeˬhawˇbaˬ dawˬ tawˆ kʼoeˇ taˆ uˆ lahˇ˗eu geuˇ˗eu gaˇ kawˆ hawˇ˗eu tsawˇ haˬ zaˬ deuˬ aˬ yawꞈ˗ahˇ saˇ jaˇ ziꞈ maˬ ziꞈ˗eu gaˇ kawˆ nehˬ˗ehˇ jiˇ taꞈ˗eu meh.
Aˬ dui Yeˬhawˇbaˬ˗euˬ tsawˇ myahˇ hawˇ˗eu aˬ yawꞈ˗euˬ tsawˇ myahˇ aˬ myah luꞈ muiˬ ni shawˇ ni jahˇ˗eu aˇ yeˇ huiˬ˗eu lehˇ aˬ jeˬ miˇ neh ehˇ˗eu nga? Aˬ jeˬ miˇ neh nga lehˇ gaˇ kawˆ smˬ kawˆ˗ahˇ haw kaˇ˗euˇ.
Saˬdaˬ Eˬdeˬ yaˇ kmˇ˗ahˇ puiˬ ngeh neh nymˬ˗mˇ iˬ nah keuˆ ni Yeˬhawˇbaˬ˗euˬ tsawˇ myahˇ˗ahˇ ja bu
Dahˬ beh˗eu kawˆ naˇ, Saˬdaˬ Yeˬhawˇbaˬ˗euˬ tsawˇ myahˇ˗ahˇ laˆ cawˆ. Saˬdaˬ Eˬdeˬ yaˇ kmˇ˗ahˇ Eˇbaˆ nehˬ˗ehˇ ngehˬ˗euˬ jeˬ teu naˇ, Yeˬhawˇbaˬ tsawˇ tsiˇ tsiˇ˗eu Miˬyehˇ pyeuꞈ˗awˇ, gaˇ kahˇ maˬ dahˇ˗eu zahˇ jahˇ doˆ˗eu Miˬyehˇ pyeuꞈ˗eu lehˇ ja bu luꞈ gaˇ duˇ˗eu meh. Saˬdaˬ neh ngehˬ˗euˬ jeˬ teu naˇ, Yeˬhawˇbaˬ neh ngehˬ˗euˬ jeˬ nehˬ˗ehˇ beu gaˇ dui dui˗eu meh. Aˬ yawꞈ Miˬyehˇ jaˬ myawꞈ myawꞈ˗eu lehˇ ehˇ luꞈ˗eu jeˬ pyeuꞈ meh. Aˬ yawꞈ neh mˇ˗euˬ jeˬ teu naˇ, Yeˬhawˇbaˬ˗euˬ tsawˇ myahˇ˗ahˇ ja bu˗eu jeˬ pyeuꞈ˗eu miˇ neh, aˬ yawꞈ “ja bu˗eu gʼaˬ” lehˇ ehˇ mawꞈ˗eu “nehꞈ sahˬ paˬ” pyeuꞈ˗iˇ˗euˬ meh. (Yoˇhaˬ 8:44) Eˇbaˆ Saˬdaˬ˗euˬ jaˬ myawꞈ mehˇ shuiˇ dawˬ˗ahˇ jah leˇ˗euˬ miˇ neh, aˬ yawꞈ Yeˬhawˇbaˬ˗euˬ ehˇ dawˬ˗ahˇ maˬ naˇ haˬ˗euˬ uˬ taꞈ, Miˬyehˇ˗euˬ uˆ lahˇ˗eu jeˬ˗ahˇ jiˇ maˬ ha geuꞈ lehˇ mˇ mawˇ˗euˬ jeˬ pyeuꞈ meh. (Aˇdahˬbeh˗eu 3:1-6) Saˬdaˬ nymˬ˗mˇ iˬ nah keuˆ ni Yeˬhawˇbaˬ˗euˬ tsawˇ myahˇ˗ahˇ ja bu luꞈ˗awˇ, Yeˬhawˇbaˬ˗euˬ gaˇ kawˆ nehˬ˗ehˇ taꞈ leˇ˗awˇ maˬ ngeuˇ˗eu jeˬ˗ehˇ pyehˬ kʼawˬ˗eu meh. Jaˬ myawꞈ mehˇ shuiˇ dawˬ teu˗ahˇ jah leˇ˗euˬ deuˬ Yeˬhawˇbaˬ˗euˬ ehˇ dawˬ˗ahˇ maˬ naˇ haˬ mawꞈ˗a. Yeˬhawˇbaˬ˗euˬ muiˬ˗eu shawˇ˗eu tsawˇ myahˇ˗ahˇ ja bu˗eu jeˬ heu naˇ, Miˬyehˇ˗euˬ tsawˇ haˬ deuˬ˗euˬ gʼaˇ duˬ doeˇ dui dui˗eu jeˬ pyeuꞈ meh. Teu naˇ miˇ tsaˬ kʼoeˇ taˆ˗euˬ yaw haiˬ yaw doeˇ jeˬ hawˇ˗eu shaˬ zahˬ dawˬ tawˆ luꞈ˗ahˇ bi pyeuꞈ doˆ laˇ˗euˬ dahˬ beh˗eu jeˬ pyeuꞈ meh.
Nyiˬ kawˆ aˬ yawꞈ kawˆ naˇ, kʼaˇ beh taˬ˗euˬ jeˬ yawˬ jeˬ na luꞈ˗ahˇ muiˬ˗eu gʼaˇ duˬ Yeˬhawˇbaˬ aˬ yawꞈ˗euˬ tsawˇ myahˇ˗ahˇ ja bu taˬ˗euˬ dawˬ tawˆ luꞈ˗ahˇ yuˇ dzeh jiˇ˗awˇ, aˬ yawꞈ˗euˬ tsawˇ myahˇ˗ahˇ aˬ myah luꞈ muiˬ ni shawˇ ni jahˇ˗eu meh. Teu naˇ Yeˬhawˇbaˬ˗euˬ gʼaˇ duˬ aˇ yeˇ huiˬ dui dui˗eu jeˬ pyeuꞈ meh. Teu miˇ neh aˬ yawꞈ ‘Ngaˬ˗euˬ tsawˇ myahˇ kʼoeˇ muiˬ˗eu shawˇ˗eu gaˇ kawˆ, aˬ yawꞈ maꞈ siˬ duˬ leˇ ni ngaˇ jahˇ ma’ lehˇ ehˇ˗eu meh. (Yeˬsaˬgeˬlaˇ 36:23) Yeˬsuˇ Yeˬhawˇbaˬ˗euˬ gaˇ mˇ zaˬ deuˬ yawˬ gʼaˬ na luꞈ guiˬ lahˬ shaˇ ngeh, “Nawˬ˗euˬ tsawˇ myahˇ˗ahˇ yaw zeu baw luꞈ˗uˇ” lehˇ ehˇ˗eu aˇ yeˇ huiˬ˗eu gaˇ kawˆ heu˗ahˇ shaˇ ahˇ lehˇ yaw kʼaˆ˗ehˇ ngehˬ keuˆ taˬ˗euˬ meh. (Maꞈtehˬ 6:9) Jaˇliꞈ laꞈ kʼoeˇ jiˇ Yeˬhawˇbaˬ˗euˬ tsawˇ myahˇ˗ahˇ ciˬ huiˬ ciˬ mahˇ˗eu heu naˇ, aˇ yeˇ huiˬ dui dui˗eu jeˬ pyeuꞈ˗eu lehˇ yaw myaˬ poˆ pah mehˬ laꞈ˗eu meh. Yaw jeˬ ma jeˬ, ‘yaw shehꞈ kʼahˬ sehˇ huiˬ dui dui˗eu, yawꞈ˗euˬ tsawˇ myahˇ˗ahˇ ja ceuˬ yawˬ’ lehˇ ehˇ taˬ˗euˬ meh. (1 Laˬsaˬbaˬ 16:29; Ja ceuˬ 96:8) “Aˬ yawꞈ˗euˬ tsawˇ myahˇ yaw shehꞈ kʼahˬ sehˇ huiˬ˗eu gaˇ kawˆ caˇ˗awˬ” lehˇ jiˇ ehˇ taˬ˗euˬ meh. (Ja ceuˬ 66:2) “Aˇ saˬ saˬ˗eu maˬ baw ni ngaˇ, nawˬ˗euˬ tsawˇ myahˇ˗ahˇ ja ceuˬ ma” lehˇ jiˇ ehˇ taˬ˗euˬ meh. (Ja ceuˬ 86:12, Yaw shawˇ Yehˇ boꞈ 2018) Yeˬsuˇ Yeˬluˇsaˬlehˬ meuˬ˗euˬ uˬ duˬ tahˬ nymˇ nymˇ ma laꞈ kʼoeˇ jawˇ ngeh, tiˬ poˆ Yeˬhawˇbaˬ mˬ˗ahˇ neh ngehˬ ka leꞈ ngeh gaˇ kawˆ teu nehˬ˗ehˇ taꞈ leˇ˗awˇ ngehˬ keuˆ˗euˬ meh. Yeˬsuˇ “Aˬ da˗oˇ, nawˬ˗euˬ tsawˇ myahˇ yaw shehꞈ kʼahˬ sehˇ za ni mˇ˗awˬ” lehˇ ehˇ ngeh, Yeˬhawˇbaˬ mˬ˗ahˇ neh “Ngaˇ, ngaˬ˗euˬ tsawˇ myahˇ yaw shehꞈ kʼahˬ sehˇ za ni mˇ gʼaˬ˗awˇ, yaw shehꞈ kʼahˬ sehˇ za ni paˇ mˇ le siˬ” lehˇ ehˇ˗eu meh.—Yoˇhaˬ 12:28, YB18. a
Smˬ kawˆ aˬ yawꞈ kawˆ naˇ, Yeˬhawˇbaˬ neh noeˬ taˬ˗euˬ jeˬ˗aˬ, aˬ yawꞈ˗euˬ tsawˇ myahˇ nehˬ˗ehˇ taꞈ. Tiˬ heˇ kʼoꞈ uˆ lahˇ˗eu aˇ yamˬ laꞈ kʼoeˇ aˇ saˬ saˬ˗eu poˆ lawˬ haw˗eu jeˬ jiˇ ngeh aˬ jeˬ pyeuꞈ laˇ˗eu nga lehˇ shaˇ noeˬ haw sheˇ. Teu ngeh Yeˬhawˇbaˬ˗euˬ tsawˇ myahˇ nehˬ˗ehˇ taꞈ leˇ˗awˇ mˬ taˆ gʼaˬ kʼehˇ hawˇ˗eu tsawˇ haˬ zaˬ deuˬ aˬ joˆ˗ehˇ noeˬ˗eu nga? Dawˬ kʼoꞈ teu˗ahˇ za˗eu gʼaˇ duˬ aˇ yeˇ huiˬ˗eu teu nehˬ˗ehˇ taꞈ˗eu nyiˬ kawˆ˗ahˇ ja sawˇ ma. Teu naˇ tsawˇ haˬ zaˬ˗euˬ saˇ jaˇ ziꞈ˗eu jeˬ hawˇ˗eu Yeˬhawˇbaˬ uˆ lahˇ˗eu geuˇ˗eu jeˬ heu pyeuꞈ meh. Saˇ jaˇ ziꞈ˗eu lehˇ mˇ mawˇ dzeuˇ˗euˬ tsawˇ haˬ deuˬ, saˇ jaˇ ziꞈ˗eu gaˇ kawˆ nehˬ˗ehˇ taꞈ leˇ˗awˇ lawˬ haw laˇ˗eu jeˬ˗ahˇ paˇ ya tahˬ puˬ ngaˇ siˬ laˬ? Maˬ. Teu ngeh aˬ yawꞈ maꞈ byah kuꞈ˗eu tsawˇ haˬ pyeuꞈ laˇ˗awˇ, lawˬ haw laˇ˗eu jeˬ˗ahˇ dzeuˇ˗iˇ nya˗euˬ uˬ taꞈ, mˬ maˬ maˬ byaˆ zaˇ ziˇ dehꞈ gʼeh˗eu jeˬ za˗eu meh. Kʼoeˇ naˇ Yeˬhawˇbaˬ˗euˬ uˆ lahˇ˗eu jeˬ kʼaˇ muiˬ˗eu jeˬ pyeuꞈ˗eu lehˇ mˇ mawˇ daˆ leꞈ˗eu loˬ ngaˇ siˬ laˬ? Maˬ. Teu ngeh mˬ kʼoeˇ taˆ hawˇ˗eu miˇ tsaˬ kʼoeˇ taˆ mehˬ bawˬ gm˗awˇ, dawˬ tawˆ luꞈ Yeˬhawˇbaˬ˗euˬ uˆ lahˇ˗eu jeˬ˗ahˇ laꞈ daˬ˗eu meh. Kʼoeˇ naˇ Yeˬhawˇbaˬ˗euˬ tsawˇ myahˇ tawˇ neh?
Teu ngeh Yeˬhawˇbaˬ˗euˬ tsawˇ myahˇ tiˬ byah tiˬ loꞈ muiˬ laˇ shawˇ laˇ˗awˇ, tiˬ gʼaˬ˗i aˬ yawꞈ˗euˬ tsawˇ myahˇ˗ahˇ maˬ paˇ ja bu nya meh. Ehˇ kʼawꞈ mˬ kʼoeˇ taˆ hawˇ˗eu miˇ tsaˬ kʼoeˇ taˆ jawˇ˗eu Miˬyehˇ˗euˬ gaˇ mˇ zaˬ deuˬ˗euˬ gʼaˇ duˬ Yeˬhawˇbaˬ˗euˬ tsawˇ myahˇ˗ahˇ nui ma ahˇ dui dui luꞈ˗a siˬ. Aˬ jeˬ miˇ neh? Aˬ jeˬ miˇ neh ehˇ naˇ, aˬ yawꞈ maꞈ Yeˬhawˇbaˬ neh zahˬ leˇ paˬ˗ehˇ gʼeh˗eu jeˬ jahˇ˗euˬ jeˬ˗ahˇ ya mawˇ daˆ leꞈ˗eu miˇ neh meh. Shaˇ noeˬ haw sheˇ. Teu ngeh Yeˬsuˇ uˆ lahˇ˗eu jeˬ Yeˬhawˇbaˬ˗ahˇ a kʼoꞈ nehˬ˗awˇ, Yeˬhawˇbaˬ ‘dawˬ tawˆ luꞈ kʼoeˇ taˆ uˆ lahˇ jiˇ˗eu’ meh. (1 Gawˇliˬtu 15:28) Teu gaˇ neh naˇ miˇ tsaˬ kʼoeˇ taˆ˗euˬ tsawˇ haˬ zaˬ deuˬ “Miˬyehˇ˗euˬ zaˬ deuˬ nehˬ˗ehˇ tiˬ kawˆ loꞈ˗ehˇ yaw shehꞈ kʼahˬ sehˇ huiˬ˗eu buˬ˗iˇ law˗iˇ˗eu jeˬ˗ahˇ za˗eu” miˇ neh laˬ kʼaˬ cehˇ˗eu meh. (Loˇmaˆ 8:21) Kʼoeˇ naˇ Yeˬhawˇbaˬ mˬ kʼoeˇ taˆ hawˇ˗eu miˇ tsaˬ kʼoeˇ taˆ jawˇ˗eu aˬ yawꞈ˗euˬ gaˇ mˇ zaˬ deuˬ˗ahˇ mehˬ bawˬ gm˗eu nymˇ jiˇ tiˬ jiˇ bi pyeuꞈ˗eu lehˇ dahˬ beh ngeh neh noeˬ taˬ˗euˬ jeˬ heu˗ahˇ mˇ byah˗eu meh.—Eˇpeˇsu 1:10.
Gaˇ kawˆ teu deuˬ byah laˇ ngeh tiˬ jawˇ mˬ kʼoeˇ taˆ hawˇ˗eu miˇ tsaˬ kʼoeˇ taˆ jawˇ˗eu Yeˬhawˇbaˬ˗euˬ nymˇ jiˇ deuˬ aˬ joˆ˗ehˇ noeˬ˗eu nga? Teu ngeh aˬ dui Yeˬhawˇbaˬ˗euˬ muiˬ˗eu shawˇ˗eu tsawˇ myahˇ˗ahˇ ja ceuˬ daˆ leꞈ mawꞈ˗eu yaw duˬ baw meh. Ja ceuˬ sahˬ boꞈ boꞈ˗eu tiˬ gʼaˬ pyeuꞈ˗eu Daˬbiˇ “Sahˬpaˬ Miˬyehˇ˗ahˇ ja ceuˬ˗awˬ. . . . Yaw shehꞈ kʼahˬ sehˇ huiˬ˗eu aˬ yawꞈ˗euˬ tsawˇ myahˇ˗ahˇ, mˬ maˬ maˬ byaˆ zaˇ ziˇ ja ceuˬ˗awˬ” lehˇ boꞈ taˬ˗euˬ meh. (Ja ceuˬ 72:18, 19) Aˬ dui teu loꞈ˗ehˇ mˬ maˬ maˬ byaˆ zaˇ ziˇ ja ceuˬ daˆ leꞈ nya˗eu laˬ kʼaˬ cehˇ laˇ paˬ˗ehˇ gʼeh˗eu jeˬ gʼawˬ mya ni jaˆ˗eu meh.
Yeˬhawˇbaˬ˗euˬ tsawˇ myahˇ heu naˇ, aˬ yawꞈ nehˬ˗ehˇ taꞈ˗eu yawˬ jeˬ na luꞈ˗ahˇ ehˇ mawꞈ˗eu meh. Aˇ yeˇ kʼaˇ huiˬ˗eu jeˬ naˇ, Miˬyehˇ˗euˬ tsawˇ myahˇ aˬ dui˗ahˇ aˬ yawꞈ˗euˬ nui gaˬ˗ahˇ bi noeˬ mawˇ laˇ˗eu meh. (1 Yoˇhaˬ 4:8) Yeˬhawˇbaˬ aˬ dui˗ahˇ gaˬ dui dui˗eu miˇ neh beh˗euˬ uˬ taꞈ, Yeˬsuˇ bi ka kʼoꞈ le˗awˇ, aˬ myah luꞈ nui gaˬ hawˇ˗eu yaw tsaˬ yaw dawˇ jeˬ laꞈ kʼoeˇ neh uˆ lahˇ meh lehˇ aˬ dui aˬ myah luꞈ noeˬ taˬ nya˗eu meh. Kʼoeˇ naˇ Yeˬhawˇbaˬ aˬ dui˗ahˇ nui gaˬ aˬ joˆ˗ehˇ mˇ mawˇ˗eu nga lehˇ ya mawˇ daˆ leꞈ˗eu meh. Aˬ dui mˬ maˬ maˬ byaˆ zaˇ ziˇ mˬ taˆ Aˬda Yeˬhawˇbaˬ nehˬ˗ehˇ gʼoeˇ dzehˬ laˇ˗awˇ, aˬ yawꞈ˗euˬ huiˬ dui dui˗eu tsawˇ myahˇ˗ahˇ caˇ˗awˇ ya ja ceuˬ daˆ le˗eu meh.—Ja ceuˬ 73:28.
a Jaˇliꞈ laꞈ kʼoeˇ Yeˬhawˇbaˬ “aˬ yawꞈ˗euˬ tsawˇ myahˇ baˬ da neh” tiˬ jeˬ paˬ mˇ˗euˬ lehˇ pah mehˬ taˬ˗euˬ meh. Yaw jeˬ ma jeˬ, Yeˬhawˇbaˬ aˬ yawꞈ˗euˬ tsawˇ haˬ deuˬ˗ahˇ sheuˬ gʼeh nehˬ˗eu, caw ba nehˬ˗eu, ka kʼoꞈ nehˬ˗eu, iˬ baˇ pyehˬ nehˬ˗eu, haw piˇ nehˬ˗eu, heu deuˬ dawˬ tawˆ luꞈ˗ahˇ aˬ yawꞈ˗euˬ tsawˇ myahˇ˗ahˇ gʼoe˗awˇ mˇ˗euˬ meh.—Ja ceuˬ 23:3; 31:3; 79:9; 106:8; 143:11.
