1-2. Miˬyehˇ˗euˬ gaˇ mˇ zaˬ deuˬ aˬ jeˬ miˇ neh laˬ kʼaˬ cehˇ˗eu nga? (Yaˬkoˆ 1:22-25)

 Yeˬhawˇbaˬ hawˇ˗eu Yeˬsuˇ aˬ dui˗ahˇ laˬ kʼaˬ bi cehˇ mawꞈ˗eu meh. Ja ceuˬ˗eu sahˬ boꞈ boꞈ˗eu tiˬ gʼaˬ Ja ceuˬ 119:2-ahˇ “Nui ma gʼawˇ mawˇ dawˬ tawˆ luꞈ aˬ yawꞈ˗ahˇ poˆ˗awˇ, aˬ yawꞈ˗euˬ dawˬ naˇ haˬ geuꞈ˗eu tsawˇ haˬ deuˬ guiˬ lahˬ huiˬ luꞈ˗uˇ” lehˇ boꞈ taˬ˗euˬ meh. Yeˬsuˇ jiˇ “Miˬyehˇ˗euˬ dawˬ kawˬ˗ahˇ ya gaˬ˗awˇ mˇ caw˗eu deuˬ, maˇ diˇ laˬ kʼaˬ cehˇ meh” lehˇ ehˇ˗eu meh.—Luˇkaꞈ 11:28, Miˇ shuiꞈ dawˬ paˇ Jaˇliꞈ.

² Yeˬhawˇbaˬ˗euˬ gaˇ mˇ zaˬ pyeuꞈ˗eu aˬ dui laˬ kʼaˬ cehˇ dui dui˗eu ma. Aˬ jeˬ miˇ neh nga? Yaw myaˬ jeˬ laꞈ kʼoeˇ neh tiˬ jeˬ naˇ, aˬ dui aˬ myah luꞈ Jaˇliꞈ gui˗awˇ ya siˬ˗euˬ jeˬ kʼaˇ gʼeh nya gaˇ neh dehꞈ ziˇ laꞈ kʼoeˇ zmˬ˗iˇ˗eu miˇ neh ma.—Yaˬkoˆ 1:22-25-ahˇ gui.

 3. Aˬ dui Jaˇliꞈ˗ahˇ neh ya siˬ˗euˬ jeˬ˗ahˇ mˇ caw ngeh, aˬ jeˬ gaˇ dahˇ tsoeˬ˗eu jeˬ za˗eu nga?

³ ‘Miˬyehˇ˗euˬ dawˬ˗ahˇ mˇ caw˗eu tsawˇ haˬ’ gaˇ dahˇ tsoeˬ˗eu jeˬ gʼawˬ mya jeˬ za˗eu meh. Za˗eu guiˬ lahˬ tiˬ jeˬ naˇ, Yeˬhawˇbaˬ nui kʼahˇ shiˇ˗eu heu meh. Yeˬhawˇbaˬ nui kʼahˇ shiˇ˗eu lehˇ ya siˬ˗eu heu naˇ, aˬ dui˗ahˇ laˬ kʼaˬ bi cehˇ laˇ˗eu meh. (Dawˬtsoˆ 12:13) Aˬ dui Jaˇliꞈ˗ahˇ neh ya siˬ˗euˬ jeˬ˗ahˇ mˇ caw ngeh, aˬ dui˗euˬ nymˇ jiˇ laꞈ kʼoeˇ laˬ kʼaˬ cehˇ dzehˬ laˇ˗awˇ, aˬ dui mehˇ nmˇ nui deuˬ nehˬ˗ehˇ jiˇ muiˬ˗eu cawˬ cawˬ˗eu jeˬ jaˆ laˇ˗eu meh. Nawˇ jiˇ gaˇ kawˆ teu˗ahˇ ya mawˇ haw˗euˬ paˬ. Kʼoeˇ naˇ aˬ dui Yeˬhawˇbaˬ˗euˬ tsaˬ˗eu dawˇ˗eu zahˇ˗ahˇ maˬ caw teh˗eu baˬ da neh shaˬ zahˬ gʼawˬ mya jeˬ˗ahˇ ya puˬ˗eu deuˬ loꞈ˗ehˇ maˬ ya puˬ ni yahˇ nya˗eu meh. Aˬ dui jiˇ sahˬ paˬ Daˬbiˇ neh Yeˬhawˇbaˬ˗euˬ zahˇ dawˬ kʼoꞈ dawˬ hawˇ˗eu yaˇ kʼaˬ daˇ˗eu gaˇ kawˆ nehˬ˗ehˇ taꞈ leˇ˗awˇ, aˬ yawꞈ neh boꞈ˗euˬ sahˬ boꞈ jiˇ leˇ dzaˬ˗ahˇ “dawˬ heu deuˬ˗ahˇ mˇ caw˗eu miˇ neh huiˬ˗eu mˇ poeˬ laꞈ sawˬ za˗eu meh” lehˇ boꞈ taˬ˗eu loꞈ˗ehˇ nui ma tsaˬ˗eu ma.—Ja ceuˬ 19:7-11, YB18.

 4. Aˬ myah luꞈ Miˬyehˇ˗euˬ dawˬ˗ahˇ mˇ caw˗eu aˬ jeˬ miˇ neh maˬ awˬ˗eu nga?

 ⁴ Aˬ dui Miˬyehˇ˗euˬ dawˬ˗ahˇ aˬ myah luꞈ caw teh˗eu lehˇ ehˇ˗eu heu naˇ, yaw awˬ nmˇ maˬ ngeuˇ˗a. Aˬ dui gaˇ myaˬ dui dui kʼawꞈ, Yeˬhawˇbaˬ aˬ dui˗ahˇ aˬ jeˬ bi mˇ mawꞈ˗eu nga lehˇ siˬ nya˗eu gʼaˇ duˬ, Jaˇliꞈ gui˗awˇ pyehˆ tseˇ˗eu aˇ yamˬ ya yuˇ doˆ taˬ˗eu meh. Teu miˇ neh aˬ dui Jaˇliꞈ aˬ myah luꞈ gui nya ni caw ba nehˬ˗eu nui noeˬ nui duˇ tiˬ kawˆ na˗ahˇ ja sawˇ ma. Kʼoeˇ naˇ aˬ dui neh ya gui˗euˬ jeˬ˗ahˇ shaˇ noeˬ shaˇ sawˇ ni maˬ ehˇ, dehꞈ ziˇ laꞈ kʼoeˇ maˇ diˇ zmˬ˗iˇ ni maˬ ehˇ, caw ba nehˬ˗eu jeˬ naˇ aˬ jeˬ nga lehˇ jiˇ ja sawˇ ma.

Jaˇliꞈ gui˗eu gʼaˇ duˬ aˇ yamˬ yuˇ doˆ taˬ

 5. Aˬ dui aˬ jeˬ baˬ da neh gaˇ myaˬ nya˗eu nga?

⁵ Miˬyehˇ˗euˬ gaˇ mˇ zaˬ deuˬ myaˬ tiˬ paˆ gaˇ myaˬ dui dui˗eu meh. Aˬ dui Jaˇliꞈ laꞈ kʼoeˇ ehˇ taˬ˗euˬ loꞈ˗ehˇ yawˬ ha˗ahˇ doˇ˗eu gaˇ deuˬ˗ahˇ mˇ˗eu gʼaˇ duˬ, aˇ yamˬ gʼawˬ mya ni ya zmˬ˗eu meh. Yaw jeˬ ma jeˬ, aˬ dui yawˬ ha˗ahˇ hawˇ˗eu nymˇ jiˇ laꞈ kʼoeˇ˗euˬ deuˬ˗ahˇ mˇ cu˗eu gʼaˇ duˬ gaˇ ya mˇ˗eu meh. (1 Tiˆmoˇseˬ 5:8) Kʼoeˇ naˇ mehˇ nmˇ yaw myaˬ gʼaˬ jiˇ, jawˇ saˇ maˬ doˆ˗eu yawˬ ha˗euˬ nymˇ jiˇ laꞈ kʼoeˇ˗euˬ deuˬ˗ahˇ maˬ ehˇ, aˇ kʼoꞈ kʼawˆ laˇ˗euˬ deuˬ˗ahˇ maˬ ehˇ, ya ngehˬ gʼeh˗eu meh. Kʼoeˇ naˇ aˬ dui yawˬ gʼaˬ na luꞈ yawˬ ha˗euˬ mawˇ do jawˇ saˇ doˆ ni ya ngehˬ gʼeh˗eu meh. Heu jiˇ aˇ yamˬ ya zmˬ˗eu jeˬ pyeuꞈ meh. Gaˇ heu deuˬ tehꞈ˗ehˇ maˬ gʼaˬ ni, aˬ dui aˇ muˇ laꞈ kʼoeˇ˗euˬ gaˇ deuˬ jiˇ jaˆ˗eu meh. Teu laꞈ kʼoeˇ neh gaˇ aˇ yeˇ huiˬ˗eu tiˬ jeˬ naˇ, tsaꞈ gaˬ˗eu gaˇ˗ahˇ leh jeh˗awˇ mˇ˗eu heu meh. Gaˇ teu myaˆ myaˆ˗ehˇ jaˆ kʼawꞈ, aˬ myah luꞈ Jaˇliꞈ gui˗eu gʼaˇ duˬ, shaˇ noeˬ shaˇ sawˇ˗eu gʼaˇ duˬ, ya siˬ˗euˬ jeˬ˗ahˇ zmˬ˗iˇ˗eu gʼaˇ duˬ, aˇ yamˬ aˬ joˆ˗ehˇ poˆ doˆ nya˗eu nga?

 6. Jaˇliꞈ gui˗eu jeˬ nawˬ˗euˬ gʼaˇ duˬ aˇ yeˇ aˬ joˆ˗ehˇ bi huiˬ nya˗eu nga? (Aˇ baˇ˗ahˇ jiˇ haw.)

⁶ Ka li zaˬ pyeuꞈ˗eu aˬ dui˗euˬ gʼaˇ duˬ, Jaˇliꞈ gui˗eu heu naˇ “muiˬ dzehˬ˗eu jeˬ” pyeuꞈ˗awˇ, aˇ yeˇ huiˬ dzehˬ˗eu jeˬ pyeuꞈ meh. Teu miˇ neh aˬ dui Jaˇliꞈ gui˗eu gʼaˇ duˬ, aˇ yamˬ yaw duˬ duˬ lehˇ ya laˆ baw taˬ˗eu meh. (Piˇliˇpiˆ 1:10) Laˬ kʼaˬ cehˇ˗eu tsawˇ haˬ deuˬ nehˬ˗ehˇ taꞈ leˇ˗awˇ ngehˬ keuˆ ngeh, Ja ceuˬ˗eu sahˬ boꞈ gaˬ naˇ yaw huiˬ 1 dahˬ beh laˇ gaˇ “Sahˬ paˬ Miˬyehˇ˗euˬ zahˇ dawˬ˗ahˇ naˇ haˬ geuꞈ gaˇ laˬ kʼaˬ cehˇ˗awˇ, uˬ ciꞈ nah gʼahˇ maˬ tsehˆ leˇ ni zahˇ dawˬ dzaw geuꞈ” lehˇ ehˇ taˬ˗euˬ meh. (Ja ceuˬ 1:1, 2) Heu deuˆ˗ahˇ haw ngeh aˬ dui Jaˇliꞈ gui˗eu gʼaˇ duˬ, aˇ yamˬ ya laˆ baw taˬ˗eu lehˇ maˇ jawˆ ni siˬ  laˇ˗eu meh. Jaˇliꞈ gui˗eu gʼaˇ duˬ, kʼaˇ muiˬ dzehˬ˗eu aˬ geu ngeh yamˬ nga? Tiˬ gʼaˬ tiˇ gʼaˬ˗euˬ dawˬ kʼoꞈ law nmˇ maˬ duˇ leˇ˗a. Ehˇ kʼawꞈ aˇ yeˇ huiˬ dzehˬ˗eu jeˬ naˇ, Jaˇliꞈ aˬ myah luꞈ gui˗eu gʼaˇ duˬ, aˇ yamˬ ya laˆ baw taˬ˗eu meh. Gʼoiˇteuˬ lehˇ kuˇ˗eu mehˇ nmˇ zaˬ yo aˬ li tiˬ gʼaˬ heu loꞈ˗ehˇ ehˇ˗eu meh. “Ngaˬ˗ahˇ uˬ shawˬ paw Jaˇliꞈ gui gaˇ ya leˇ˗eu lehˇ miˇ˗a. Ngaˇ yaw naꞈ˗ehˇ tuˇ˗eu tiˬ gʼaˬ maˬ ngeuˇ kʼawꞈ, uˬ shawˬ paw naˇ tiˬ jeˬ˗iˬ laˆ tsoeˬ laˇ˗eu maˬ jaˆ˗eu miˇ neh Jaˇliꞈ gui gaˇ yaw muiˬ˗ehˇ haw tsoˆ taˬ nya dzehˬ miˇ˗a.” Nawˬ˗euˬ gʼaˇ duˬ jiˇ Gʼoiˇteuˬ loꞈ˗ehˇ duˇ leˇ˗eu paˬ. Aˬ dui yaw haˬ˗ahˇ ‘Ngaˬ˗euˬ gʼaˇ duˬ, Jaˇliꞈ gui˗eu aˬ geu ngeh yamˬ˗ahˇ muiˬ dzehˬ nya?’ lehˇ naˇ haˬ nya meh.

Gui˗eu jeˬ˗ahˇ shaˇ noeˬ shaˇ sawˇ

7-8. Aˬ dui Jaˇliꞈ gui˗eu gaˇ neh gaˇ dahˇ tsoeˬ˗eu jeˬ tiˬ byah tiˬ loꞈ maˬ za˗eu teu naˇ, aˬ jeˬ baˬ da neh pyeuꞈ nya˗eu nga? Yaw jeˬ ma jeˬ ehˇ haw.

⁷ Nawˇ sahˬ boꞈ gʼawˬ mya ni gui˗euˬ kʼawꞈ, ya gui˗euˬ jeˬ˗ahˇ maˬ shaˇ noeˬ maˬ shaˇ sawˇ˗eu miˇ neh maˬ noeˬ taˬ nya ni pyeuꞈ haw maˬ loˇ? Aˬ dui yawˬ gʼaˬ na luꞈ pyeuꞈ haw˗euˬ meh. Aˬ dui Jaˇliꞈ gui ngeh kʼawꞈ toˆ˗ehˇ pyeuꞈ nya meh. Tiˬ poˆ na aˬ dui tiˬ nah laꞈ kʼoeˇ Jaˇliꞈ gaˬ naˇ yaw huiˬ aˇ myaˆ hmˬ gui˗eu lehˇ aˇ pyaˇ daˬ taˬ˗euˬ kʼawꞈ pyeuꞈ nya meh. Heu naˇ ja ceuˬ paˬ˗ehˇ gʼeh˗eu jeˬ pyeuꞈ meh. Maˇ diˇ naˇ aˬ dui yawˬ gʼaˬ na luꞈ, aˇ pyaˇ daˬ taˬ paˬ˗ehˇ gʼeh˗awˇ, daˬ taˬ˗euˬ loꞈ˗ehˇ mˇ keuˆ nya ni leh jeh paˬ˗ehˇ gʼeh˗eu meh. (1 Gawˇliˬtu 9:26) Aˬ dui Jaˇliꞈ gui˗eu tehꞈ˗ehˇ maˬ gʼaˬ ni, ya gui˗euˬ jeˬ˗ahˇ neh gaˇ dahˇ tsoeˬ˗eu jeˬ tiˬ byah tiˬ loꞈ za mawꞈ˗eu ma.

⁸ Yaw jeˬ ma jeˬ heu hmˬ˗ahˇ shaˇ noeˬ haw kaˇ˗euˇ. Aˇ bawˬ huiˬ laˇ˗eu gʼaˇ duˬ, uˬ yehˇ loˬ dui dui˗eu meh. Ehˇ kʼawꞈ ni aˇ yamˬ tiˬ kʼehˇ laˇ kʼehˬ laꞈ kʼoeˇ tehꞈ˗ehˇ uˬ yehˇ gʼawˬ mya ni yehˇ naˇ, iˇ cuꞈ dahˬ laˇ nya˗eu meh. Teu loꞈ˗ehˇ dahˬ laˇ˗eu shaw˗euˬ naˇ, uˬ yehˇ paˇ yehˇ ka leꞈ kʼawꞈ miˇ tsaˬ˗ahˇ maˬ˗iˇ uˇ˗eu miˇ neh aˇ bawˬ deuˬ˗euˬ gʼaˇ duˬ gaˇ dahˇ maˬ tsoeˬ˗a. Miˇ tsaˬ˗ahˇ iˇ cuꞈ bi˗iˇ uˇ˗eu gʼaˇ duˬ, aˇ yamˬ loˬ˗eu meh. Teu gaˇ duˇ ni aˬ dui Jaˇliꞈ gui˗eu jiˇ shaˇ noeˬ shaˇ sawˇ˗eu gʼaˇ duˬ, noeˬ taˬ nya˗eu gʼaˇ duˬ, maˇ diˇ zmˬ˗iˇ nya˗eu gʼaˇ duˬ, aˇ yamˬ maˬ jaˆ gaˇ keuˆ ni tehˬ law baw law˗ehˇ gui paˬ˗ehˇ maˬ gʼeh˗a.—Yaˬkoˆ 1:24.

 9. Jaˇliꞈ˗ahˇ tehˬ law baw law˗ehˇ gui˗eu tiˬ gʼaˬ pyeuꞈ naˇ, aˬ jeˬ jahˇ paˬ˗ehˇ gʼeh˗eu nga?

⁹ Nawˇ Jaˇliꞈ˗ahˇ tiˬ kʼehˬ maˬ kaˬ tehˬ law baw law˗ehˇ gui naˇ, aˬ jeˬ jahˇ paˬ˗ehˇ gʼeh˗eu nga? Gui luꞈ˗eu jeˬ hawˇ˗eu gui dzeuˇ˗euˬ jeˬ˗ahˇ shaˇ  noeˬ shaˇ sawˇ˗eu aˇ yamˬ bi doˆ laˇ˗eu gʼaˇ duˬ, a lawˆ lawˆ˗ehˇ ya gui˗eu meh. Shaˇ noeˬ shaˇ sawˇ˗eu lehˇ ehˇ˗eu teu naˇ, teu na na˗ehˇ shaˬ˗eu jeˬ maˬ ngeuˇ˗a. Gui˗eu jeˬ˗ahˇ shaˇ noeˬ˗eu heu tehꞈ meh. Aˬ dui shaˇ noeˬ shaˇ sawˇ˗eu aˇ yamˬ bi doˆ laˇ˗eu gʼaˇ duˬ, aˬ joˆ˗ehˇ jahˇ nya˗eu nga? Aˬ dui pyehˆ tseˇ˗eu aˇ yamˬ ui cuiˆ na laˆ myaˬ nya˗eu meh. Maˬ ngeuˇ naˇ, aˬ myah myah yawˬ ha gui˗eu Jaˇliꞈ aˇ deuˆ deuˬ laˆ cuiˆ nya˗eu meh. Uˬ soe dahˬ beh laˇ gaˇ ehˇ taˬ˗euˬ Gʼoiˇteuˬ heu loꞈ˗ehˇ ehˇ˗eu meh. “Ngaˇ Jaˇliꞈ gʼawˬ mya ni maˬ gui. Tiˬ poˆ tiˬ poˆ gui ngeh, gaˬ naˇ yaw huiˬ tiˬ hmˬ gui˗eu tehꞈ ma. Uˬ shawˬ paw gui ngeh, tiˬ nah nah ga ni yaw muiˬ˗ehˇ shaˇ noeˬ shaˇ sawˇ nya nya.” Aˬ dui aˇ myaˆ ni gui˗euˬ naˆ maˬ tseˇ shaˇ noeˬ shaˇ sawˇ˗eu aˇ yamˬ doˆ laˇ˗eu jeˬ˗ehˇ gui˗eu aˇ yeˇ huiˬ dzehˬ˗eu meh.—Ja ceuˬ 119:97; “ Shaˇ noeˬ shaˇ sawˇ paˬ˗ehˇ gʼeh˗eu naˇ haˬ˗eu jeˬ” lehˇ ehˇ˗eu oeˬ coeˇ oeˬ bawˬ˗ahˇ haw.

10. Ya siˬ˗euˬ jeˬ˗ahˇ maˇ diˇ mˇ caw nya˗eu gʼaˇ duˬ, aˬ joˆ˗ehˇ ya shaˇ noeˬ ya shaˇ sawˇ˗eu nga? Yaw jeˬ ma jeˬ ehˇ haw. (1 Teˇsaˬloˇni 5:17, 18)

¹⁰ Jaˇliꞈ˗ahˇ aˬ geu ngeh yamˬ˗ahˇ gui˗eu maˬ kaˬ, aˇ myaˆ ni gui˗eu maˬ kaˬ, aˇ yeˇ huiˬ˗eu jeˬ naˇ maˇ diˇ zmˬ˗iˇ nya˗eu jeˬ˗ahˇ yaw muiˬ˗ehˇ shaˇ noeˬ shaˇ sawˇ˗eu heu pyeuꞈ meh. Jaˇliꞈ aˇ tsehˆ tiˬ tsehˆ˗ahˇ kʼaˇ gui gʼaˬ ngeh, heu kawˆ naˇ, ‘Ngaˬ˗euˬ dehꞈ ziˇ laꞈ kʼoeˇ nymˬ˗mˇ maˬ ehˇ, mehˬ hu paw maˬ ehˇ, aˬ joˆ˗ehˇ zmˬ˗iˇ nya˗eu nga?’ lehˇ shaˇ noeˬ. Yaw jeˬ ma jeˬ, 1 Teˇsaˬloˇni 5:17, 18-ahˇ gui luꞈ˗eu lehˇ ehˇ˗awˬ. (Gui.) Teu nyiˬ deuˆ˗ahˇ gui gʼaˬ˗euˬ naˇ, tiˬ kʼehˬ naˬ leˇ˗awˇ aˬ jeˬ shaˇ noeˬ nya˗eu nga? Ngaˇ guiˬ lahˬ tiˬ kʼehˬ maˬ kaˬ shaˇ miˇ˗a laˬ? Guiˬ lahˬ shaˇ ngeh nui ma laꞈ kʼoeˇ naꞈ suiˇ ni gʼeh gaˇ jaˆ luꞈ˗eu jeˬ dzawˇ nehˬ miˇ˗a laˬ? lehˇ shaˇ noeˬ nya˗eu meh. Kʼoeˇ naˇ, guiˬ lahˬ huiˬ˗eu jeˬ hawˇ˗eu ciˬ huiˬ ciˬ mahˇ˗eu jeˬ gaˇ kawˆ kʼawꞈ shaˇ noeˬ nya˗eu meh. Teu loꞈ˗ehˇ shaˇ noeˬ shaˇ sawˇ gʼaˬ ngeh, gaˇ kawˆ smˬ kawˆ˗euˬ gʼaˇ duˬ, Yeˬhawˇbaˬ˗ahˇ guiˬ lahˬ huiˬ˗awˇ ja ceuˬ˗eu lehˇ noeˬ tsehˆ nya˗eu meh. Teu loꞈ˗ehˇ aˇ yamˬ ui cuiˆ biꞈ˗awˇ shaˇ noeˬ shaˇ sawˇ˗euˬ tehꞈ kʼawꞈ, Miˬyehˇ˗euˬ dawˬ˗ahˇ ya gaˬ˗awˇ maˇ diˇ mˇ caw˗eu deuˬ pyeuꞈ nya ni caw ba nehˬ nya˗eu meh. Yawˬ nah na luꞈ nawˇ Jaˇliꞈ kʼaˇ gui ngeh, teu loꞈ˗ehˇ jahˇ naˇ gaˇ dahˇ tsoeˬ˗eu jeˬ aˇ naˆ ni za˗eu nga? Ehˇ kʼawꞈ Jaˇliꞈ gui ngeh, laˆ saˆ paˬ˗ehˇ gʼeh˗eu jeˬ hawˇ˗eu huiˬ laˇ mahˇ laˇ paˬ˗ehˇ gʼeh˗eu jeˬ˗ahˇ gʼawˬ mya ni ya mawˇ naˇ tawˇ neh?

Yaw ha iˇ keuˆ nya˗eu aˇ pyaˇ daˬ

11. Tiˬ poˆ na aˬ jeˬ baˬ da neh nui ma gʼaˬ baˬ laˇ nya˗eu nga? Yaw jeˬ ma jeˬ ehˇ haw.

¹¹ Jaˇliꞈ gui˗awˇ maˇ diˇ zmˬ˗iˇ nya˗eu gaˇ kawˆ deuˬ˗ahˇ shaˇ noeˬ ngeh tiˬ jawˇ, tiˬ poˆ na nui ma gʼaˬ baˬ laˇ nya˗eu meh. Yaw jeˬ ma jeˬ, Jaˇliꞈ gui dahˬ beh˗eu nah˗ahˇ myaˆ pyawˬ huiˬ nyiˇ maˬ tseˇ˗eu gaˇ kawˆ ahˇ˗eu lehˇ ehˇ˗awˬ. (Yaˬkoˆ 2:1-8) Teu gaˇ neh naˇ nawˇ, aˬ cawˬ nehˬ˗ehˇ cawˬ cawˬ˗eu gaˇ kawˆ nehˬ˗ehˇ taꞈ leˇ˗awˇ, yawˬ ha laꞈ kʼoeˇ laˆ saˆ paˬ˗ehˇ gʼeh˗eu jeˬ, huiˬ laˇ mahˇ laˇ paˬ˗ehˇ gʼeh˗eu jeˬ, jaˆ luꞈ gaˇ ya mawˇ˗euˬ miˇ neh tiˬ jeˬ na laˆ poˆ laˆ paˇ mˇ˗eu lehˇ aˇ pyaˇ daˬ˗euˬ meh. Teu naˇ muiˬ dui dui˗eu aˇ pyaˇ pyeuꞈ meh. Nyaˆ taꞈ nah keuˆ laˇ ngeh naˇ, nawˇ dzaˇ˗i tiˬ tsahˇ paˇ gui ngeh yawˬ  ha˗euˬ mehˬ laˇ˗ahˇ gʼaˬ leˇ˗eu gaˇ kawˆ nehˬ˗ehˇ taꞈ leˇ˗awˇ ya gui mawˇ˗euˬ meh. (Yaˬkoˆ 3:1-12) Teu ngeh nawˇ yawˬ ha laꞈ kʼoeˇ aˬ cawˬ˗ahˇ nui gaˬ maˬ keuˆ˗eu, aˬ cawˬ˗ahˇ gʼaˬ maˬ ahˇ leˇ˗eu dawˬ deuˬ tiˬ poˆ na ngehˬ luꞈ gaˇ ya haw mawˇ˗euˬ meh. Teu miˇ neh nawˇ aˬ cawˬ˗ahˇ gʼaˬ ahˇ leˇ˗eu dawˬ deuˬ ngehˬ ma lehˇ aˇ pyaˇ daˬ˗euˬ meh. Smˬ nah aˬ yawꞈ nah˗ahˇ nawˇ paˇ gui ngeh, miˇ tsaˬ nehˬ˗ehˇ cawˬ maˬ cawˬ˗eu gaˇ kawˆ nehˬ˗ehˇ taꞈ leˇ˗awˇ saˇ tiˇ biꞈ taˬ˗euˬ gaˇ ya gui mawˇ˗euˬ meh. (Yaˬkoˆ 4:4-12) Teu miˇ neh yawˬ ha gui˗eu jeˬ, haw˗eu jeˬ, naˇ haˬ˗eu jeˬ, heu deuˬ˗ahˇ saˇ tiˇ taˬ˗eu lehˇ aˇ pyaˇ daˬ˗euˬ meh. Oeˬ nah aˬ yawꞈ nah keuˆ laˇ ngeh˗aˬ, laˆ saˆ paˬ˗ehˇ, laˆ poˆ laˆ paˇ paˬ˗ehˇ gʼeh˗eu jeˬ aˇ myaˆ myaˆ˗ehˇ myaˬ˗eu maˬ siˬ nga lehˇ noeˬ laˇ˗awˇ, nui ma gʼaˬ baˬ laˇ nya˗eu meh.

12. Aˬ dui Jaˇliꞈ gui ngeh laˆ saˆ paˬ˗ehˇ gʼeh˗eu jeˬ, huiˬ laˇ mahˇ laˇ paˬ˗ehˇ gʼeh˗eu jeˬ˗ahˇ ya mawˇ naˇ, aˬ jeˬ miˇ neh nui ma gʼaˬ baˬ paˬ˗ehˇ maˬ gʼeh˗eu nga? (Ehˇ lahˬ˗ahˇ jiˇ haw.)

¹² Laˆ saˆ paˬ˗ehˇ gʼeh˗eu jeˬ hawˇ˗eu huiˬ laˇ mahˇ laˇ paˬ˗ehˇ gʼeh˗eu jeˬ jaˆ gaˇ ya mawˇ naˇ, nui ma gʼaˬ taˬ baˬ siˬ. Teu loꞈ˗ehˇ haw mawˇ˗euˬ teu naˇ nawˇ taˬ aw˗eu tiˬ gʼaˬ pyeuꞈ˗awˇ, tsaˬ˗eu nui noeˬ nui ma ahˇ˗eu lehˇ bi mawˇ laˇ˗eu jeˬ pyeuꞈ meh. Taˬ aw˗eu tiˬ gʼaˬ naˇ Jaˇliꞈ gui ngeh, yawˬ ha laꞈ kʼoeˇ aˬ jeˬ laˆ saˆ paˬ˗ehˇ gʼeh˗eu nga? Aˬ geu tsahˇ˗ahˇ huiˬ laˇ mahˇ laˇ paˬ˗ehˇ gʼeh˗eu nga? lehˇ siˬ nya˗eu gʼaˇ duˬ, jahˇ ma lehˇ noeˬ˗awˇ gui˗eu meh. a Kʼoeˇ naˇ ‘nui ma yaw shuiꞈ’ laˆ paˇ˗eu gaˇ kawˆ heu naˇ, aˬ myah luꞈ ya mˇ˗eu jeˬ pyeuꞈ meh lehˇ noeˬ taˬ luꞈ˗uˇ. (Gawˇlawˇsehˇ 3:10) Miˬyehˇ˗euˬ dawˬ˗ahˇ maˇ diˇ zmˬ˗iˇ˗eu deuˬ aˬ myah luꞈ pyeuꞈ nya˗eu gʼaˇ duˬ caw ba nehˬ˗eu jeˬ naˇ aˬ jeˬ nga?

13. Mˇ keuˆ iˇ keuˆ nya paˬ˗ehˇ gʼeh˗eu aˇ pyaˇ deuˬ aˬ joˆ˗ehˇ taˬ nya˗eu nga? (Aˇ baˇ˗ahˇ jiˇ haw)

¹³ Kʼaˇ ya siˬ nya˗euˬ jeˬ˗ahˇ tiˬ poˆ tehꞈ˗ehˇ mˇ caw jiˇ˗eu lehˇ maˬ ya leh jeh˗a. Mˇ keuˆ iˇ keuˆ nya paˬ˗ehˇ gʼeh˗eu aˇ pyaˇ daˬ˗awˬ. (Dawˬdaˬ 11:2) Heu loꞈ˗ehˇ jahˇ haw nya˗eu meh. Laˆ saˆ paˬ˗ehˇ gʼeh˗eu jeˬ, huiˬ laˇ mahˇ laˇ paˬ˗ehˇ gʼeh˗eu jeˬ, aˬ jeˬ jeˇ  jaˆ˗eu nga lehˇ jaˇ laˇ boꞈ doˆ taˬ. Jeˬ hu hu saˬ mˇ keuˆ iˇ keuˆ mawꞈ˗eu aˇ pyaˇ tiˬ hmˬ nyiˬ hmˬ˗ahˇ tseˇ. Aˇ nah naˇ, dzeˇ˗eu aˇ pyaˇ deuˬ˗ahˇ iˇ keuˆ nya˗eu gʼaˇ duˬ tiˬ poˆ cuiˆ cuiˆ˗ehˇ leh jeh. Aˬ dui aˬ joˆ˗ehˇ gʼeh˗eu aˇ pyaˇ deuˬ˗ahˇ neh dahˬ beh paˬ˗ehˇ gʼeh˗eu nga?

14. Aˬ dui aˬ joˆ˗ehˇ gʼeh˗eu aˇ pyaˇ˗ahˇ neh dahˬ beh nya˗eu nga?

¹⁴ Iˇ keuˆ nya˗eu aw paˬ˗ehˇ gʼeh˗eu hmˬ˗ahˇ neh dahˬ beh nya˗awˇ, iˇ keuˆ˗eu loˬ dui dui˗eu aˇ pyaˇ hmˬ˗ahˇ neh kʼawꞈ dahˬ beh nya˗eu meh. Aˇ pyaˇ tseˇ dzeuˇ shaw˗euˬ naˇ, Loꞈ˗eu nymˇgoˇ sahˬ boꞈ taˬ duˬ˗ahˇ zmˬ˗awˇ neh maˬ ehˇ, Yeˬhawˇbaˬ˗euˬ Saˇ kiˇ deuˬ˗euˬ poˆ tseˇ˗eu keu ka˗ahˇ zmˬ˗awˇ nehˬ maˬ ehˇ, ya pyehˆ tseˇ˗eu meh. Aˇ pyaˇ daˬ taˬ˗euˬ loꞈ˗ehˇ mˇ byah nya˗eu gʼaˇ duꞈ, Yeˬhawˇbaˬ˗ahˇ ‘nui ma keuˆ ni maˬ ehˇ, mˇ nya ni maˬ ehˇ, caw ba nehˬ laꞈ’ lehˇ guiˬ lahˬ ya shaˇ˗eu meh. (Piˇliˇpiˆ 2:13) Nawˬ neh ya siˬ˗euˬ jeˬ˗ahˇ maˇ diˇ zmˬ˗iˇ˗eu leh jeh. Daˬ taˬ˗euˬ aˇ pyaˇ dahˬ beh˗eu hmˬ˗ahˇ iˇ keuˆ nya shaw˗euˬ naˇ, dzaˇ˗i aˇ pyaˇ tiˬ hmˬ˗ahˇ jiˇ leh jeh mawꞈ˗eu nui ma ahˇ laˇ˗eu meh. Ka li zaˬ˗euˬ dehꞈ jeˬ dehꞈ kawˆ tiˬ hmˬ na˗ahˇ maˬ ehˇ, Ka li zaˬ˗euˬ seuˆ dzeuꞈ tiˬ hmˬ na˗ahˇ maˬ ehˇ, huiˬ laˇ mahˇ laˇ shaw˗euˬ naˇ, dzaˇ˗i nui jeˬ nui kawˆ˗ahˇ huiˬ laˇ mahˇ laˇ ni mˇ˗eu jiˇ awˬ dzehˬ laˇ˗eu meh.

Miˬyehˇ˗euˬ dawˬ ‘naw maꞈ˗euˬ laꞈ kʼoeˇ gaˇ mˇ luꞈ’

15. Tsawˇ haˬ gʼawˬ mya ni Jaˇliꞈ gui kʼawꞈ, Miˬyehˇ˗euˬ tsawˇ haˬ deuˬ nehˬ˗ehˇ aˬ joˆ˗ehˇ beu gaˇ˗eu nga? (1 Teˇsaˬloˇni 2:13)

¹⁵ Tiˬ deuˬ na aˬ yawꞈ maꞈ Jaˇliꞈ gui jiˇ˗eu gʼawˬ mya poˆ ma lehˇ ehˇ˗eu meh. Ehˇ kʼawꞈ aˬ yawꞈ maꞈ Jaˇliꞈ mehˬ˗eu jeˬ˗ahˇ maˇ diˇ jah ngaˇ laˬ? Dehꞈ ziˇ laꞈ kʼoeˇ zmˬ˗iˇ ngaˇ laˬ? Dehꞈ poˆ dehꞈ paˇ ngaˇ laˬ? Myaˬ tiˬ paˆ naˇ maˬ jah˗a. Maˇ diˇ maˬ zmˬ˗iˇ˗a. Dehꞈ poˆ dehꞈ paˇ maˬ mˇ˗a. Miˬyehˇ˗euˬ tsawˇ haˬ pyeuꞈ˗eu aˬ dui naˇ, dahˬ beh˗euˬ Ka li zaˬ deuˬ loꞈ˗ehˇ, Jaˇliꞈ˗ahˇ “Miˬyehˇ˗euˬ dawˬ loꞈ˗ehˇ sawˇ˗awˇ ha geuꞈ˗euˬ ma.” Kʼoeˇ uˬ taꞈ, dehꞈ ziˇ laꞈ kʼoeˇ maˇ diˇ zmˬ˗iˇ˗eu leh jeh˗eu ma.—1 Teˇsaˬloˇni 2:13-ahˇ gui.

16. Miˬyehˇ˗euˬ dawˬ˗ahˇ maˇ diˇ mˇ caw ni caw ba nehˬ˗eu jeˬ naˇ aˬ jeˬ nga?

¹⁶ Jaˇliꞈ gui˗awˇ ya siˬ˗euˬ jeˬ˗ahˇ zmˬ˗iˇ˗eu heu naˇ, aˬ myah luꞈ yaw awˬ nmˇ maˬ ngeuˇ˗a. Aˬ dui Jaˇliꞈ gui˗eu gʼaˇ duˬ, aˇ yamˬ poˆ doˆ˗eu yaw shaˬ kʼawꞈ pyeuꞈ nya meh. Maˬ ngeuˇ naˇ, shaˇ noeˬ shaˇ sawˇ˗eu aˇ yamˬ maˬ jaˆ ni kawˇ ma˗ehˇ ya gui˗eu kʼawꞈ pyeuꞈ nya meh. Maˬ ngeuˇ naˇ, aˬ dui laˆ poˆ laˆ paˇ paˬ˗ehˇ gʼeh˗eu jeˬ, huiˬ laˇ mahˇ laˇ paˬ˗ehˇ gʼeh˗eu jeˬ, gʼawˬ mya ni jaˆ gaˇ ya mawˇ ngeh, gʼaˬ baˬ laˇ nya˗eu meh. Nawˇ aˬ jeˬ˗euˬ shaˬ zahˬ˗ahˇ ya puˬ˗eu maˬ kaˬ, Yeˬhawˇbaˬ caw ba nehˬ˗eu miˇ neh gʼaˬ leˇ nya˗eu meh. Teu miˇ neh Yeˬhawˇbaˬ neh caw ba nehˬ laꞈ˗euˬ jeˬ˗ahˇ ha geuꞈ˗awˇ, Miˬyehˇ˗euˬ dawˬ˗ahˇ ya gaˬ˗awˇ, ngehˇ˗euˬ deuˬ maˬ pyeuꞈ ni maˇ diˇ mˇ caw˗eu deuˬ pyeuꞈ luꞈ˗uˇ. Jaˇliꞈ gui˗awˇ ngehˬ˗ehˇ mˇ caw naˇ ngehˬ˗ehˇ, aˬ dui˗euˬ dehꞈ ziˇ laˬ kʼaˬ cehˇ dzehˬ laˇ˗eu yaw duˬ bawˬ meh.—Yaˬkoˆ 1:25.