Ngaˇ 1934 kʼoꞈ˗ahˇ dehꞈ le˗euˬ ma. Ngaˬ da ngaˬ ma naˇ Soiˇsaꞈ˗lehˬ tsawˇ haˬ pyeuꞈ˗awˇ, Kehˇnaˬdaˬ miˇ kʼahˬ Awˬtehˇliˬ˗oˬ˗ahˇ jaˆ˗eu kʼaˬ lo kʼaˬ gʼeuˬ duˬ˗eu meuˬ pyeuꞈ˗eu Tiˇmeˬ˗suiꞈ meuˬ˗ahˇ pawˇ laˇ˗euˬ meh. 1939 kʼoꞈ heu kaˬ˗ahˇ ngaˬ ma Loꞈ˗eu nymˇgoˇ paˇ gmˬ gui dahˬ beh laˇ˗awˇ, Yeˬhawˇbaˬ˗euˬ Saˇ kiˇ deuˬ˗euˬ mehˬ bawˬ˗ahˇ daˆ laˇ˗euˬ meh. Ngaˬ ma ngaˬ ha shiꞈ mehˇ nmˇ˗ahˇ kʼawꞈ mehˬ bawˬ˗ahˇ sheuˬ gʼeh˗eu meh. Tiˬ kʼehˬ naˇ ngaˬ ma Yeˬhawˇbaˬ˗euˬ Saˇ kiˇ tiˬ gʼaˬ pyeuꞈ laˇ˗euˬ meh.

Ngaˬ ma Yeˬhawˇbaˬ˗euˬ Saˇ kiˇ pyeuꞈ˗iˇ˗euˬ gaˇ ngaˬ da tiˬ pawꞈ˗iˬ maˬ ya leˇ˗a. Ehˇ kʼawꞈ ngaˬ ma yaw tsaˬ yaw dawˇ jeˬ˗ahˇ gaˬ˗awˇ, yaw tsaˬ yaw dawˇ jeˬ˗ahˇ tuˆ tehˬ taˬ˗euˬ meh. 1940 kʼoꞈ dahˬ beh laˇ dzaˬ˗ahˇ Kehˇnaˬdaˬ miˇ kʼahˬ˗ahˇ Yeˬhawˇbaˬ˗euˬ Saˇ kiˇ deuˬ˗euˬ gaˇ bi laˆ naˬ˗euˬ aˇ yamˬ˗ahˇ kʼawꞈ ngaˬ ma yaw tsaˬ yaw dawˇ jeˬ˗ahˇ tuˆ tehˬ taˬ˗euˬ meh. Ngaˬ da ngaˬ ma˗ahˇ dawˬ doeˇ ngehˬ˗awˇ yaw muiˬ˗ehˇ maˬ mˇ nehˬ˗euˬ kʼawꞈ, ngaˬ ma aˬ myah luꞈ nahˬ yu ni ngaˬ da˗ahˇ yaw zeu baw˗awˇ yaw muiˬ˗ehˇ mˇ nehˬ˗eu meh. Ngaˬ ma yaw muiˬ˗ehˇ dehꞈ mehˬ˗eu miˇ neh, ngaˇ hawˇ˗eu ngaˬ˗euˬ mehˇ nmˇ deuˬ jiˇ yaw tsaˬ yaw dawˇ jeˬ˗ahˇ ha geuꞈ˗euˬ ma. Laˬ kʼaˬ cehˇ laˇ paˬ˗ehˇ gʼeh˗eu jeˬ naˇ, ngaˬ da aˇ nah naˇ nui ma ga dzuˬ le˗awˇ, nymˇ jiˇ laꞈ kʼoeˇ˗euˬ deuˬ˗ahˇ yaw muiˬ˗ehˇ mˇ nehˬ laꞈ˗eu meh.

1950 kʼoꞈ, jawˇ la yamˬ˗ahˇ ngaˇ Niˬ˗yuˬ Yawˇ˗ahˇ Miˬyehˇ˗euˬ gaˇ huiˬ laˇ mahˇ laˇ lehˇ ehˇ˗eu huiˬ˗eu mehˬ bawˬ˗ahˇ iˇ˗euˬ ma. Ngaˬ˗ahˇ miˇ kʼahˬ doe ni jawˇ˗eu mehˇ nmˇ deuˬ nehˬ˗ehˇ mehˬ bawˬ teu poˆ˗ahˇ ya daˆ ngeh hawˇ˗eu, Giˇlaˆ dzaw nymˇ˗ahˇ neh dzaw jiˇ˗euˬ dzaw zaˬ deuˬ˗ahˇ naˇ haˬ tseˇ gaˇ ya gaˬ ngeh, ngaˬ˗ahˇ Miˬyehˇ˗euˬ gaˇ˗ahˇ aˇ yamˬ tiˬ byah ni mˇ mawꞈ laˇ˗euˬ meh. Ngaˇ iˇ kahˇ˗ahˇ gʼoˆ keuˆ˗iˇ ngeh, taˆ lehˇ aˬ myah luꞈ huˬ mehˬ mehˬ˗eu gʼaˬ geuꞈ˗eu jaˇ laˇ dawˆ˗euˬ ma. Ehˇ kʼawꞈ ngaˬ˗ahˇ iˇ cuꞈ jeˬ hu shawˇ lehˇ Kehˇnaˬdaˬ˗euˬ saˇ naˇ˗ahˇ neh sahˬ boꞈ boꞈ kʼoꞈ laꞈ˗euˬ meh. Ngaˇ 1950 kʼoꞈ, Tseˇ siˬ ba la 1 nah˗ahˇ iˇ cuꞈ shawˇ˗euˬ ma. Teu gaˇ neh ba la tiˬ siˬ naˇ, ngaˇ aˬ myah luꞈ huˬ mehˬ mehˬ˗eu gʼaˬ geuꞈ˗euˬ ma. Ngaˬ  neh ya mˇ beh beh˗iˇ˗euˬ meuˬ naˇ, ngaˬ˗euˬ iˇ kahˇ nehˬ˗ehˇ gaˇ mahˇ kaˬ gaˇ jaˆ˗eu Kaˇpuˇsaꞈ˗kiˇseˬ meuˬ pyeuꞈ meh.

1951 kʼoꞈ jawˇ la doˆ le ngeh yamˬ˗ahˇ, Paˇlaˬ dawˬ ngehˬ nya˗eu mehˇ nmˇ deuˬ˗ahˇ Ku behˆ˗ahˇ Miˬyehˇ˗euˬ gaˇ mˇ iˇ lehˇ saˇ naˇ gʼaˬ biꞈ˗eu meh. Teu gaˇ˗euˬ tsawˇ haˬ deuˬ Paˇlaˬ dawˬ ngehˬ˗awˇ, tsaꞈ gaˬ˗eu mehˇ nmˇ deuˬ loˬ˗eu meh. Ngaˇ naˇ Paˇlaˬ dawˬ hawˇ˗eu Gaˬ laˬ pyuˇ dawˬ ngehˬ˗eu nymˇ jiˇ laꞈ kʼoeˇ huiˬ laˇ˗euˬ ma. Teu miˇ neh ngaˇ teu gaˇ ya mˇ˗iˇ˗awˇ, Luˬahˬ meuˬ˗ahˇ Miˬyehˇ˗euˬ gaˇ ya mˇ˗iˇ˗euˬ ma. Ngaˇ teu gaˇ tiˬ gʼaˬ˗ahˇ˗iˬ maˬ siˬ nya nya. Uˬ soe dahˬ beh laˇ gaˇ ngehˬ keuˆ taˬ˗euˬ loꞈ˗ehˇ, za taˬ˗euˬ iˇ kahˇ˗euˬ naˬ ba kʼoeˇ jaˆ˗eu tehꞈ ma. Ehˇ kʼawꞈ kʼoeˇ gaˇ iˇ keuˆ ngeh, yawˬ jeˬ na luꞈ tiˬ sheuˇ meh. Maˇsehˬ˗oˬ hawˇ˗eu ngaˇ gʼoeˇ˗eu cawˬ pyeuꞈ laˇ˗awˇ, ngaˇ Ku behˆ˗ahˇ 4 kʼoꞈ byah ni Miˬyehˇ˗euˬ gaˇ˗ahˇ laˬ kʼaˬ tiˬ cehˇ mˇ˗euˬ ma. Aˇ nah naˇ ngaˇ dzehˬ˗eu huˬ mehˬ mehˬ˗eu gʼaˬ ya geuꞈ˗euˬ ma.

Ku behˆ˗ahˇ jawˇ ngeh ngaˇ Niˬ˗yuˬ Yawˇ gahˬ kaˬ, Saoˇ Lehˬsiˬ˗ahˇ jahˇ˗eu Giˇlaˆ dzaw nymˇ 26 poˆ aˬ yawꞈ poˆ˗ahˇ ya daˆ˗iˇ˗euˬ miˇ neh laˬ kʼaˬ cehˇ˗eu lehˇ miˇ˗a. Ngaˇ dzaw nymˇ heu˗ahˇ 1956 kʼoꞈ, Nyiˬ siˬ ba la 12 nah˗ahˇ dzaw jiˇ˗awˇ, Ehˇpa˗li kaˆ nahˇ ma ga kʼehˬ paw jaˆ˗eu nymˬ˗mˇ iˬ nah Gaˬnaˬ b lehˇ kuˇ˗eu miˇ kʼahˬ˗ahˇ Miˬyehˇ˗euˬ gaˇ ya mˇ˗iˇ˗euˬ ma. Ehˇ kʼawꞈ ngaˇ maˬ iˇ mi naˆ˗ehˇ Gaˬnaˬ miˇ kʼahˬ˗ahˇ jawˇ nya˗eu gʼaˇ duˬ, Kehˇnaˬdaˬ miˇ kʼahˬ˗ahˇ “2 jaw 3 jaw” gʼoꞈ˗iˇ˗awˇ, biˇsaˬ jahˇ˗iˇ˗euˬ ma.

Ehˇ kʼawꞈ ngaˇ biˇsaˬ teu za˗eu gʼaˇ duˬ Toˬloˇtoˬ meuˬ˗ahˇ ba la 7 siˬ ya dawˬ˗euˬ ma. Aˇ yamˬ teu laꞈ kʼoeˇ Kiˇliˇ˗suiꞈ nymˇ jiˇ ngaˬ˗ahˇ aˬ yawꞈ pehˬ nehˬ˗ehˇ bi jawˇ nehˬ laꞈ˗euˬ meh. Ngaˇ aˬ yawꞈ nyaꞈ˗euˬ aˬ buˇ Sheˬlaˇ nehˬ˗ehˇ ya siˬ nya˗awˇ, nga nyaꞈ tiˬ gʼaˬ tiˇ gʼaˬ mawꞈ leˇ˗euˬ ma. Ngaˇ aˬ yawꞈ˗ahˇ sheuˬ dahˬ dzaˬ˗eu gʼaˇ duˬ shaˇ˗eu lehˇ gʼeh ngeh, biˇsaˬ za˗euˬ ma. Sheˬlaˇ nga nyaꞈ gaˇ kawˆ heu nehˬ˗ehˇ taꞈ leˇ˗awˇ guiˬ lahˬ shaˇ˗awˇ, ngaˬ˗ahˇ biˇ doˇ nehˬ laꞈ˗euˬ gaˇ˗ahˇ jeˬ hu mˇ˗iˇ˗eu lehˇ noeˬ tsehˆ˗euˬ ma. Ehˇ kʼawꞈ nga nyaꞈ mehˬ hu paw tiˬ kawˆ loꞈ˗ehˇ sheuˬ dahˬ dzaˬ nya ngaˇ laˬ lehˇ haw˗eu gʼaˇ duˬ, sahˬ boꞈ boꞈ boꞈ˗ehˇ ngehˬ cawˬ˗euˬ ma. Shaˬ dui dui˗eu laꞈ kʼoeˇ noeˬ tsehˆ˗euˬ kʼawꞈ, aˇ nah paˇ haw kʼoꞈ gʼeh ngeh noeˬ tsehˆ tsaˬ dui dui law hawˇ ngaˬ˗aˇ lehˇ ya siˬ˗euˬ ma.

Ngaˇ miˬ dzaˬ laˆ lawˬ˗ahˇ neh, saˇ baoˬ˗ahˇ neh, saˇ pawˇ˗ahˇ neh ba la 1 siˬ byah ni cah˗awˇ, aˇ nah naˇ Gaˬnaˬ miˇ kʼahˬ Ehˇgaˬlaˬ meuˬ˗ahˇ laˇ keuˆ˗euˬ ma. Ngaˇ teu gaˇ gahˬ kaˬ˗ahˇ sheuˬ gʼeh˗eu gʼaˬ ya geuꞈ˗euˬ ma. Gaˇ heu baˬ da neh ngaˇ Gaˬnaˬ miˇ kʼahˬ doe ni ya cah˗awˇ, gaˇ dahˬ gaˇ dzeˇ jaˆ˗eu miˇ kʼahˬ pyeuꞈ˗eu Aiˇbaˬ˗liˬkoˆ (nymˬ˗mˇ naˇ Koˇdiˬgʼawˬ lehˇ kuˇ) hawˇ˗eu Toꞈgoˬlehˬ (nymˬ˗mˇ naˇ Toꞈgoˬ lehˇ kuˇ)˗ahˇ jiˇ ya iˇ˗euˬ ma. Myaˬ tiˬ paˆ naˇ ngaˇ tiˬ gʼaˬ tehꞈ˗ehˇ ya cah˗awˇ, saˇ naˇ˗euˬ lawˬ liˬ pyeuꞈ˗eu Jiˬ lawˬ liˬ  neh cah˗euˬ ma. Aˇ yamˬ teu yamˬ laꞈ kʼoeˇ ngaˬ˗ahˇ laˬ kʼaˬ zawˇ˗ehˇ cehˇ nya.

Koꞈ nah jawˇ nah˗ahˇ ngaˬ˗ahˇ huiˬ˗eu mehˬ bawˬ bi jahˇ laꞈ˗euˬ meh. Ehˇ kʼawꞈ huiˬ˗eu mehˬ bawˬ jahˇ˗eu gʼaˇ duˬ, Bawˬdzaˬnymˇ maˬ jaˆ˗a. Teu miˇ neh mehˇ nmˇ deuˬ tiˬ kʼehˬ tiˬ yamˬ mehˬ bawˬ jahˇ nya˗eu gʼaˇ duˬ, zaꞈ bawˇ kʼahˬ tuˇ˗awˇ maˇ baˬ˗euˬ uˬ pyaˬ deuˬ joe shmˇ nehˬ˗euˬ meh. Kʼoeˇ naˇ iˇ tsehꞈ bahˬ keuˆ maˬ jaˆ˗eu miˇ neh, mehˬ bawˬ˗ahˇ daˆ laˇ˗euˬ daˬ yah deuˬ˗ahˇ bi dzaˬ˗eu gʼaˇ duˬ, aˬ yawꞈ nah yawꞈ loꞈ leˇ ni jeˬ zaˬ sehꞈ˗eu meh.

Mehˬ bawˬ teu laꞈ kʼoeˇ uiˇ yoeˇ laˇ paˬ˗ehˇ gʼeh˗eu gaˇ kawˆ deuˬ jiˇ jaˆ˗eu meh. Dzaˇ˗i Miˇshaˬnaˬliˬ tiˬ gʼaˬ pyeuꞈ˗eu mehˇ nmˇ Heuˇ˗beuˬ Jehˇniˬ˗suiꞈ c dawˬ mehˬ mehˬ luꞈ ngeh, dawˬ mehˬ mehˬ˗eu gʼaˬ hawˇ˗eu naˇ haˬ luꞈ˗eu deuˬ˗euˬ yaw kaˬ˗ahˇ mawˇ neˇ tiˬ mawˇ cehˆ ahˇ laꞈ˗euˬ meh. Teu ngeh mehˇ nmˇ Heuˇ˗beuˬ dawˬ mehˬ mehˬ˗eu tiˬ kʼehˬ naˬ leˇ˗awˇ, mawˇ neˇ teu mawˇ jiˇ aˬ geu paw ya cehˆ˗eu maˬ siˬ ni zahˬ leˇ taˬ˗awˇ jawˇ˗eu meh. Maˬ gaˇ˗a siˬ gʼaˬ kʼaˆ˗eu mehˇ nmˇ zaˬ yo aˬ li 4 gʼaˬ laˇ˗awˇ, mawˇ neˇ teu mawˇ nyehꞈ mi˗awˇ dzaˬ˗eu dawˇ˗eu laˆ saˆ˗eu paw tsahˇ gʼeh˗euˬ miˇ neh. Mehˇ nmˇ nui deuˬ jiˇ laꞈ kawˆ paˇ tehˆ caw nehˬ˗eu meh.

Huiˬ˗eu mehˬ bawˬ jaˆ˗eu aˇ yamˬ˗ahˇ jawˇ nah yaw kaˬ˗ahˇ ngaˇ Mˇ luꞈ shaˇ luꞈ˗eu Miˇ shuiꞈ˗euˬ aˇ maꞈ lehˇ ehˇ˗eu aˇ maꞈ aˇ muˇ neh jahˇ doˆ taˬ˗euˬ biˬdiˬoˬ teu gaˇ˗euˬ dawˬ peh jaˆ˗eu pu deuˬ˗ahˇ iˇ˗awˇ byaˬ˗iˇ˗eu ma. Kʼawˇ zeuˇ nyiˬ zeuˇ maˬ ngeuˇ naˇ, aˇ bawˇ nyiˬ bawˇ kʼoeˇ paw ma paw shaˬ paˇ paˇ pyuˇ˗ahˇ aˇ caˆ paꞈ tawꞈ˗awˇ, miˬ dzaˬ tahˬ bya˗awˇ biˬdiˬoˬ teu ya byaˬ˗euˬ ma. Pu zaˬ deuˬ ya leˇ˗eu lehˇ meh. Gʼawˬ mya gʼaˬ˗euˬ gʼaˇ duˬ heu naˇ, dehꞈ ziˇ laꞈ kʼoeˇ neh biˬdiˬoˬ ya haw beh beh˗euˬ poˆ pyeuꞈ meh. Iˇ cuꞈ shawˇ˗eu aˇ baˇ byaˬ gaˇ iˇ keuˆ ngeh, aˬ yawꞈ maꞈ laꞈ kʼawˆ tehˆ dui dui˗eu meh. Biˬdiˬoˬ teu naˇ aˬ yawꞈ maꞈ˗ahˇ aˬ dui˗euˬ aˇ maꞈ aˇ muˇ naˇ, miˇ kʼahˬ doe ni jawˇ˗eu mehˇ nmˇ deuˬ keuˬ˗awˇ mehˬ bawˬ gm˗eu lehˇ bi siˬ leˇ˗euˬ meh.

Ehˇpa˗li kaˆ˗ahˇ 2 kʼoꞈ ehˇ gʼaˬ ni jawˇ byah laꞈ ngeh, ngaˇ 1958 kʼoꞈ˗ahˇ Niˬ˗yuˬ Yawˇ˗ahˇ miˇ kʼahˬ deuˬ uiˬ laˇ˗eu mehˬ bawˬ˗ahˇ ya daˆ˗iˇ˗euˬ miˇ neh laˬ kʼaˬ cehˇ dui dui miˇ˗a. Ngaˇ Sheˬlaˇ˗ahˇ tiˬ poˆ paˇ ya mawˇ˗euˬ miˇ neh laˬ kʼaˬ cehˇ˗eu lehˇ miˇ˗a. Aˬ yawꞈ naˇ Ku behˆ˗ahˇ dzehˬ˗eu huˬ mehˬ mehˬ˗eu gaˇ mˇ luꞈ gaˇ neh laˇ˗euˬ meh. Dzeuˇ laꞈ ngeh nga nyaꞈ tiˬ gʼaˬ tiˇ gʼaˬ sahˬ boꞈ boꞈ boꞈ˗ehˇ ngehˬ cawˬ˗euˬ ma. Ehˇ kʼawꞈ nymˬ˗mˇ poˆ naˇ mawˇ do ya mawˇ dzoeˇ˗euˬ ma. Ngaˇ aˬ yawꞈ˗ahˇ ngaˬ˗ahˇ dahˬ dzaˬ le ma laˬ lehˇ naˇ haˬ ngeh, aˬ yawꞈ euˬ lehˇ ehˇ˗eu meh. Ngaˇ mehˇ nmˇ Naw d jawˇ gaˇ sahˬ boꞈ boꞈ gʼeh˗awˇ, Sheˬlaˇ Giˇlaˆ dzaw nymˇ˗ahˇ bi daˆ leˇ˗awˇ, daˆ gʼaˬ naˇ Ehˇpa˗li kaˆ˗ahˇ ngaˬ nehˬ˗ehˇ Miˬyehˇ˗euˬ gaˇ bi mˇ le nya meh laˬ lehˇ naˇ haˬ˗euˬ ma. Mehˇ nmˇ Naw euˬ, za meh lehˇ ehˇ˗eu meh. Uˬ duˬ duˬ leˇ ngeh, Sheˬlaˇ Gaˬnaˬ meuˬ˗ahˇ Miˬyehˇ˗euˬ gaˇ ya mˇ le˗euˬ meh. Kʼoeˇ naˇ nga nyaꞈ 1959 kʼoꞈ, Tseˇ siˬ ba la 3 nah˗ahˇ Ehˇgaˬlaˬ meuˬ˗ahˇ jiˇ cehˇ baˇ˗euˬ ma. Nga nyaꞈ Miˬyehˇ˗euˬ gaˇ˗ahˇ dehꞈ ziˇ laꞈ kʼoeˇ naˬ ba tiꞈ taˬ˗eu miˇ neh, Miˬyehˇ nga nyaꞈ˗ahˇ guiˬ lahˬ biꞈ dui dui˗eu lehˇ siˬ laˇ nya.

1961 kʼoꞈ˗ahˇ nga nyaꞈ Kehˇmaˬlmˬ˗ahˇ Miˬyehˇ˗euˬ gaˇ ya mˇ˗iˇ˗euˬ ma. Teu gaˇ ngaˇ saˇ naˇ yaw shuiꞈ beh gaˇ ya caw ba nehˬ˗eu miˇ neh gaˇ myaˬ dui dui˗eu meh. Saˇ naˇ˗euˬ gaˇ˗ahˇ nymˬ˗mˇ hawˇ ya mˇ dahˬ beh˗eu miˇ neh ya dzaw geuꞈ˗eu jeˬ gʼawˬ mya ni jaˆ miˇ˗a. 1965 kʼoꞈ˗ahˇ Sheˬlaˇ zaˬ pi leˇ˗euˬ meh. Ngaˇ tiˬ nah aˬ da ya pyeuꞈ˗eu paˬ lehˇ tiˬ jawˇ˗i maˬ noeˬ haw˗aˬ. Ehˇ kʼawꞈ nga nyaꞈ aˬ da aˬ ma ya pyeuꞈ˗eu lehˇ gʼeh˗eu miˇ neh nui ma cehˇ tahˬ tahˬ luꞈ ngeh, Kehˇnaˬdaˬ miˇ kʼahˬ˗ahˇ gʼoꞈ˗iˇ˗eu lehˇ lehˬ hmˬ luꞈ ngeh, nga nyaꞈ˗ahˇ deuˬ dui dui laˇ˗eu gaˇ kawˆ˗ahˇ ya puˬ˗euˬ ma.

Sheˬlaˇ zaˬ dzeh˗euˬ meh. Saˬ laˬ gʼoˬ uˬ maˆ laꞈ kʼoeˇ ahˇ˗eu zaˬ teu gʼaˬ naˇ, aˬ li pyeuꞈ nga lehˇ ehˇ˗eu meh. 50 kʼoꞈ dzehˬ ni dzehˬ˗iˇ˗euˬ kʼawꞈ, nga nyaꞈ gaˇ kawˆ teu˗ahˇ nymˬ˗mˇ iˬ nah keuˆ ni maˬ ngehˇ leˇ nya. Nga nyaꞈ nui ma cawˆ dui dui kʼawꞈ, aˬ cawˬ˗euˬ miˇ kʼahˬ˗ahˇ nga nyaꞈ gaˬ˗eu Miˬyehˇ˗euˬ gaˇ˗ahˇ mˇ daˆ leꞈ˗euˬ ma.

Kehˇmaˬlmˬ miˇ kʼahˬ˗ahˇ˗euˬ mehˇ nmˇ deuˬ tiˬ paw tiˇ paw gʼaˬ baꞈ maˬ baꞈ˗eu miˇ neh, tiˬ kʼehˬ maˬ kaˬ kʼehˬ laˇ kʼaˆ laˇ˗eu jeˬ˗ahˇ ya tahˬ puˬ˗eu meh. Uˆ lahˇ˗eu aˬ yuiꞈ deuˬ tseˇ ngeh ngehˬ˗ehˇ dzehˬ nyehꞈ suꞈ laˇ˗eu jeˬ˗ahˇ ya daˬ˗eu meh. 1970 kʼoꞈ, Ngaˬ siˬ ba la 13 nah˗ahˇ nga maꞈ neh maˬ bi pyeuꞈ laˇ mawꞈ˗eu gaˇ kawˆ pyeuꞈ laˇ˗euˬ meh. Kehˇmaˬlmˬ miˇ kʼahˬ˗ahˇ Yeˬhawˇbaˬ˗euˬ Saˇ kiˇ deuˬ˗euˬ gaˇ deuˬ bi laˆ naˬ˗euˬ meh. Tsoˆ˗euˬ saˇ naˇ yaw shuiꞈ˗ahˇ nga maꞈ jawˇ ahˇ leˇ˗euˬ ba la 5 siˬ byah laˇ˗euˬ tehꞈ de siˬ. Ehˇ kʼawꞈ uˆ lahˇ˗eu aˬ yuiꞈ deuˬ neh bi yuˇ geuꞈ˗euˬ meh. Teu gaˇ neh tiˬ jaw laꞈ kʼoeˇ tehꞈ˗ehˇ nga nyaꞈ dzeˇ zaˬ hawˇ˗eu Miˇshaˬnaˬliˬ yawˬ gʼaˬ na luꞈ miˇ kʼahˬ˗ahˇ neh bi teh doˆ˗euˬ ma. Nga maꞈ gaˬ˗eu mehˇ nmˇ deuˬ nehˬ˗ehˇ ya gʼawˬ˗iˇ˗eu miˇ neh nui ma cawˆ dui dui nya. Aˬ yawꞈ maꞈ˗euˬ gʼaˇ duˬ jiˇ kʼahˬ lahˇ dui dui miˇ˗a.

Nga nyaꞈ Kehˇmaˬlmˬ miˇ kʼahˬ˗ahˇ neh ya doˆ˗iˇ˗euˬ taꞈ naˇ, Paˇlaˬ miˇ kʼahˬ˗ahˇ˗euˬ saˇ naˇ˗ahˇ ba la 6 siˬ ya jawˇ˗euˬ ma. Ngaˇ Kehˇmaˬlmˬ miˇ kʼahˬ˗ahˇ˗euˬ mehˇ nmˇ deuˬ loˬ˗eu jeˬ˗ahˇ kʼaˇ gʼeh nya gaˇ neh caw ba nehˬ˗euˬ ma. Teu ngeh kʼoꞈ, Tseˇ nyiꞈ siˬ ba la˗ahˇ ngaˬ˗ahˇ Naiˬjiˇliˬ˗yaˬ saˇ naˇ˗ahˇ bi mˇ˗iˇ laꞈ˗euˬ meh. Naiˬjiˇliˬ˗yaˬ miˇ kʼahˬ˗ahˇ˗euˬ Beˬdeˬlaˇ teu ngeh, Kehˇmaˬlmˬ miˇ kʼahˬ˗ahˇ˗euˬ tsaꞈ gaˬ˗eu gaˇ˗ahˇ haw saˆ dahˬ beh laˇ˗euˬ meh. Naiˬjiˇliˬ˗yaˬ miˇ kʼahˬ˗ahˇ˗euˬ mehˇ nmˇ deuˬ nga nyaꞈ˗ahˇ lmˇ boˬ ni yaw muiˬ˗ehˇ ha nehˬ laꞈ˗euˬ meh. Nga nyaꞈ teu gaˇ gʼawˬ mya kʼoꞈ ya mˇ˗euˬ miˇ neh laˬ kʼaˬ cehˇ dui dui nya.

1973 kʼoꞈ˗ahˇ nga nyaꞈ shaˬ dui dui˗eu gaˇ kawˆ tiˬ kawˆ˗ahˇ ya noeˬ tsehˆ˗euˬ ma. Sheˬlaˇ kʼaˆ dui dui˗eu naˇ gawˇ˗ahˇ ya daˬ luꞈ˗eu meh. Nga nyaꞈ Niˬ˗yuˬ Yawˇ˗ahˇ huiˬ˗eu mehˬ bawˬ˗ahˇ daˆ luꞈ ngeh, Sheˬlaˇ ngoeˇ ngoeˇ˗ehˇ ngaˬ˗ahˇ “Heu loꞈ˗ehˇ tehꞈ˗ehˇ naˇ naˇ˗ehˇ jawˇ naˇ, ngaˬ˗ahˇ Miˬyehˇ˗euˬ gaˇ˗ahˇ maˬ paˇ mˇ daˆ leꞈ nya˗eu jeˬ miˇ˗a” lehˇ ehˇ˗eu meh. Aˬ yawꞈ ngaˬ nehˬ˗ehˇ Ehˇpa˗li kaˆ nahˇ ma ga kʼehˬ paw 14 kʼoꞈ dzehˬ ni Miˬyehˇ˗euˬ gaˇ˗ahˇ tiˬ kawˆ loꞈ˗ehˇ mˇ˗euˬ meh. Aˬ yawꞈ teu loꞈ˗ehˇ Miˬyehˇ˗euˬ gaˇ˗ahˇ saˇ jaˇ ziꞈ˗eu laꞈ kʼoeˇ mˇ˗eu miˇ neh, ngaˬ˗ahˇ nui kʼahˇ shiˇ˗eu lehˇ miˇ˗a. Ehˇ kʼawꞈ nymˬ˗mˇ naˇ nga nyaꞈ laˆ poˆ laˆ paˇ ya mˇ ngaˇ. Gaˇ kawˆ teu nehˬ˗ehˇ taꞈ leˇ˗awˇ nga nyaꞈ tiˬ kawˆ loꞈ˗ehˇ ja sawˇ˗awˇ, Miˬyehˇ˗ahˇ guiˬ lahˬ shaˇ dui dui˗euˬ ma. Sheˬlaˇ˗ahˇ yaw muiˬ˗ehˇ haw saˆ nya˗eu gʼaˇ duˬ, nga nyaꞈ Kehˇnaˬdaˬ˗ahˇ gʼoꞈ iˇ˗eu lehˇ noeˬ tsehˆ˗euˬ ma. Miˇshaˬnaˬliˬ gaˇ hawˇ˗eu aˇ yamˬ tiˬ byah ni mˇ˗eu gaˇ heu˗ahˇ ya byehˇ˗eu heu naˇ, nga nyaꞈ˗euˬ dehꞈ ziˇ laꞈ kʼoeˇ neh noeˬ tsehˆ˗eu kʼaˇ shaˬ˗eu jeˬ pyeuꞈ miˇ˗a.

Nga nyaꞈ Kehˇnaˬdaˬ miˇ kʼahˬ˗ahˇ gʼoꞈ keuˆ laˇ ngeh, Toˬloˇtoˬ˗ahˇ˗euˬ laꞈ taˆ paw pyawˬ˗ahˇ jaˆ˗eu meuˬ meuˬ zaˬ tiˬ meuˬ˗ahˇ lawˬ liˬ ahˬ laꞈ zeuˇ laꞈ mˇ˗eu cawˬ tiˬ gʼaˬ nehˬ˗ehˇ gaˇ mˇ˗euˬ ma. Sheˬlaˇ nga nyaꞈ jiˇ dzoˆ maˬ daˆ mawꞈ˗eu miˇ neh, kuˆ lawˆ lawˆ zaˬ tiˬ lawˆ ngaˬ˗awˇ aˬ cawˬ neh tiˬ poˆ zmˬ dzeuˇ˗euˬ myawˬ deuˬ zeuˇ˗awˇ, aˇ dahˬ paˇ beh daˆ˗euˬ ma. Nga nyaꞈ Miˬyehˇ˗euˬ gaˇ˗ahˇ aˇ yamˬ tiˬ byah ni paˇ mˇ kʼoꞈ nya laˇ˗eu maˬ siˬ lehˇ noeˬ tmˬ˗awˇ, yaw  awˬ awˬ lehˇ dehꞈ˗euˬ ma. Nga nyaꞈ neh noeˬ taˬ˗euˬ loꞈ˗ehˇ aˇ yamˬ maˬ ga leˇ ni gaˇ teu˗ahˇ paˇ ya mˇ kʼoꞈ˗euˬ miˇ neh zahˬ leˇ˗eu lehˇ miˇ˗a.

Ngaˇ jawˇ nah dzeuˇ koꞈ nah˗ahˇ Awˬtehˇliˬ˗oˬ, Nawˬbaˬ meuˬ˗ahˇ huiˬ˗eu mehˬ bawˬ jahˇ˗eu gʼaˇ duˬ, nymˇ tsoˆ gaˇ caw ba˗iˇ˗euˬ ma. Aˇ nah naˇ ngaˬ˗ahˇ huiˬ˗eu Bawˬdzaˬnymˇ heu hmˬ˗ahˇ haw saˆ˗eu gʼaˬ geuꞈ nya ma laˬ lehˇ naˇ haˬ˗eu meh. Teu ngeh Sheˬlaˇ jiˇ maˬ gaˇ laˇ˗euˬ miˇ neh, nga nyaꞈ gaˇ teu˗ahˇ mˇ nya˗eu paˬ lehˇ noeˬ˗euˬ ma. Teu miˇ neh nga nyaꞈ 1974 kʼoꞈ, Koꞈ siˬ ba la˗ahˇ yaw shuiꞈ tsoˆ˗euˬ huiˬ˗eu mehˬ bawˬ heu hmˬ˗ahˇ jaˆ˗eu kuˆ lawˆ˗ahˇ pawˇ˗iˇ˗euˬ ma. Nga nyaꞈ Miˬyehˇ˗euˬ gaˇ˗ahˇ aˇ yamˬ tiˬ byah ni paˇ ya mˇ kʼoꞈ laˇ˗euˬ miˇ neh, laˬ kʼaˬ cehˇ˗eu lehˇ miˇ˗a.

Sheˬlaˇ˗euˬ naˇ gawˇ tiˬ nah saˇ˗i tiˬ nah maˬ gaˇ laˇ˗eu miˇ neh, teu gaˇ neh 2 kʼoꞈ naˇ nga nyaꞈ aˇ maꞈ˗ahˇ sheuˬ gʼeh˗eu gaˇ mˇ˗eu ha geuꞈ nya˗euˬ ma. Nga nyaꞈ ya cah˗iˇ˗eu meuˬ naˇ, tsahˬ gaˆ yamˬ˗ahˇ aˇ dzehˬ dzeuˇ ni tsehˆ˗eu Kehˇnaˬdaˬ miˇ kʼahˬ˗ahˇ˗euˬ Mehˇniˬtoˬbaˬ meuˬ pyeuꞈ meh. Ehˇ kʼawꞈ teu gaˇ˗euˬ mehˇ nmˇ deuˬ˗euˬ nui gaˬ naˇ, lmˇ boˬ ni gʼeh˗eu meh. Nga nyaꞈ aˬ geu gaˇ jawˇ˗awˇ neh ya mˇ˗eu maˬ kaˬ, aˇ yeˇ huiˬ˗eu jeˬ naˇ Yeˬhawˇbaˬ˗euˬ gaˇ mˇ daˆ leꞈ˗eu heu pyeuꞈ meh lehˇ ya siˬ˗euˬ ma.

Aˇ maꞈ˗ahˇ sheuˬ gʼeh˗eu gaˇ myaˆ kʼoꞈ mˇ gʼaˬ ngeh tiˬ jawˇ, nga nyaꞈ˗ahˇ 1978 kʼoꞈ˗ahˇ Kehˇnaˬdaˬ Beˬdeˬlaˇ˗ahˇ mˇ laˇ lehˇ kuˇ˗eu meh. Teu gaˇ neh tiˬ kʼehˬ naˇ ngaˇ ngaˬ˗euˬ gʼaˇ duˬ shaˬ˗eu gaˇ kawˆ pyeuꞈ kʼawꞈ, aˇ yeˇ huiˬ˗eu gaˇ kawˆ˗ahˇ ya dzaw geuꞈ˗euˬ ma. Ngaˇ Mawˇtaˬ˗liˬawˬ meuˬ˗ahˇ jahˇ˗eu huiˬ˗eu mehˬ bawˬ tiˬ hmˬ˗ahˇ Paˇlaˬ dawˬ paw neh naˬ liˬ tiˬ laꞈ kʼawˬ˗iˬ dawˬ mehˬ ya mehˬ˗euˬ ma. Teu ngeh ngaˇ naˇ haˬ luꞈ˗eu deuˬ nui ma ahˇ leˇ paˬ˗ehˇ maˬ mehˬ nya˗aˬ. Teu miˇ neh tsaꞈ gaˬ˗eu paw˗euˬ gawˬmiˬtiꞈ˗ahˇ˗euˬ mehˇ nmˇ tiˬ gʼaˬ ngaˬ˗ahˇ nui noeˬ nui duˇ biꞈ laˇ˗euˬ meh. Ngaˇ nymˬ˗mˇ dawˬ mehˬ mehˬ˗eu paw maˬ nya nga lehˇ ya siˬ˗eu loꞈ˗ehˇ, yaw beh ba neh siˬ nya paˬ law hawˇ ngaˬ. Ehˇ kʼawꞈ ngaˇ mehˇ nmˇ teu gʼaˬ˗euˬ nui noeˬ nui duˇ˗ahˇ maˬ ha geuꞈ˗aˬ. Nga nyaꞈ dawˬ ja ui cuiˆ myaˬ˗euˬ ma. Aˬ yawꞈ ngaˬ˗ahˇ maˬ ja ceuˬ˗eu uˬ taꞈ, iˬ baˇ poˆ nga lehˇ tehꞈ˗ehˇ noeˬ nya. Ngaˇ nui noeˬ nui duˇ biꞈ laˇ˗euˬ mehˇ nmˇ teu gʼaˬ˗ahˇ nui ma baw˗iˇ˗awˇ, aˬ yawꞈ neh nui noeˬ nui duˇ biꞈ˗eu biˬ jeˬ biꞈ kawˆ˗ahˇ maˬ ya leˇ˗eu miˇ neh lehˬ˗iˇ miˇ˗a.

Teu gaˇ neh myaˆ nah naˇ Saˇ naˇ˗euˬ Gawˬmiˬtiꞈ tiˬ gʼaˬ gaˇ kawˆ teu nehˬ˗ehˇ taꞈ leˇ˗awˇ ngaˬ˗ahˇ ngehˬ cawˬ laˇ˗euˬ meh. Ngaˇ mehˇ nmˇ kʼoeˇ gʼaˬ˗euˬ nui noeˬ nui duˇ˗ahˇ maˬ ha geuꞈ˗euˬ miˇ neh, nui ma tiˬ pawꞈ˗iˬ maˬ saˇ nya. Teu gaˇ neh naˇ ngaˇ ngaˬ˗ahˇ nui noeˬ nui duˇ biꞈ˗euˬ mehˇ nmˇ kʼoeˇ gʼaˬ jawˇ gaˇ iˇ˗awˇ, tahˬ shaˇ˗iˇ˗euˬ ma. Aˬ yawꞈ jiˇ ngaˬ˗ahˇ iˬ baˇ pyehˬ nehˬ laꞈ˗euˬ meh. Gaˇ kawˆ heu˗ahˇ neh ngaˇ tiˬ jawˇ˗iˬ maˬ ngehˇ leˇ˗eu taˬ aw˗eu jeˬ heu naˇ, aˇ naˆ ni aˇ yeˇ huiˬ˗eu gaˇ kawˆ pyeuꞈ˗eu lehˇ ya siˬ˗euˬ ma. (Dawˬdaˬ 16:18) Ngaˬ˗ahˇ taˬ aw˗eu tiˬ gʼaˬ pyeuꞈ nya ni caw ba nehˬ laꞈ lehˇ Yeˬhawˇbaˬ˗ahˇ guiˬ lahˬ gʼawˬ mya poˆ shaˇ˗euˬ ma. Kʼoeˇ naˇ ngaˇ nui noeˬ nui duˇ biꞈ nehˬ laꞈ˗eu jeˬ˗ahˇ maˬ muiˬ paw dzeˇ dzaˬ˗ahˇ maˬ haw lehˇ noeˬ tsehˆ˗euˬ ma.

Nymˬ˗mˇ ngaˇ Kehˇnaˬdaˬ Beˬdeˬlaˇ˗ahˇ mˇ laꞈ˗euˬ 40 kʼoꞈ dzehˬ˗iˇ˗euˬ ma. Kʼoeˇ naˇ 1985 kʼoꞈ˗ahˇ neh naˇ, ngaˇ Saˇ naˇ˗euˬ Gawˬmiˬtiꞈ gaˇ jiˇ ya mˇ˗euˬ ma. 2021 kʼoꞈ, Nyiˬ siˬ ba la˗ahˇ ngaˇ zawˇ˗ehˇ gaˬ˗eu ngaˬ˗euˬ miˇ zaˬ Sheˬlaˇ shiˇ˗euˬ meh. Ngaˇ aˬ yawꞈ˗ahˇ ya smˇ˗iˇ˗euˬ tehꞈ˗ehˇ maˬ gʼaˬ ni, ngaˇ jiˇ jawˇ saˇ yaw kʼaˆ˗ehˇ maˬ doˆ ni pyeuꞈ luꞈ˗eu ma. Ehˇ kʼawꞈ Yeˬhawˇbaˬ˗euˬ gaˇ laꞈ kʼoeˇ gaˇ myaˬ myaˬ˗ehˇ jawˇ˗eu heu naˇ, ngaˬ˗ahˇ laˬ kʼaˬ bi cehˇ laˇ˗awˇ, “yaw dehꞈ dehꞈ˗eu aˇ yamˬ nymˇ gaˇ” ya puˬ˗eu shaˬ zahˬ deuˬ˗ahˇ maˬ shaˇ noeˬ ni caw ba nehˬ˗eu meh. (Dawˬtsoˆ 5:20) Ngaˬ˗euˬ dehꞈ ziˇ laꞈ kʼoeˇ shaˬ zahˬ gʼawˬ mya jeˬ˗ahˇ ya tahˬ puˬ kʼawꞈ, shaˬ zahˬ naˆ maˬ tseˇ laˬ kʼaˬ cehˇ˗eu jeˬ myaˬ dzehˬ˗eu meh. Ngaˇ dehꞈ ziˇ laꞈ kʼoeˇ Yeˬhawˇbaˬ˗ahˇ naˬ ba tiꞈ taˬ˗awˇ, Miˬyehˇ˗euˬ gaˇ˗ahˇ aˇ yamˬ tiˬ byah ni 70 kʼoꞈ mˇ laꞈ˗euˬ miˇ neh, laˬ kʼaˬ cehˇ dui dui˗awˇ za˗euˬ guiˬ lahˬ deuˬ˗ahˇ maˬ ja ceuˬ jiˇ coeˇ nya. Ngaˇ zaˬ guˬ deuˬ dehꞈ ziˇ laꞈ kʼoeˇ Yeˬhawˇbaˬ˗ahˇ naˬ ba tiꞈ taˬ nya ni, caw ba nehˬ lehˇ Yeˬhawˇbaˬ˗ahˇ guiˬ lahˬ shaˇ˗eu ma. Aˬ jeˬ miˇ neh ehˇ naˇ ngaˇ Yeˬhawˇbaˬ˗euˬ gaˇ mˇ˗eu heu neh tehꞈ˗ehˇ, guiˬ lahˬ deuˬ za˗awˇ dehꞈ ziˇ laꞈ kʼoeˇ laˬ kʼaˬ cehˇ nui saˇ oꞈ˗eu jeˬ za˗eu meh lehˇ jah ziꞈ˗eu miˇ neh ma.