Ja ceuˬ 12:7-ahˇ “Sahˬpaˬ Miˬyehˇ haw piˇ nehˬ” lehˇ ehˇ taˬ˗euˬ dawˬ heu naˇ, (yaw nyiˇ 5) laꞈ kʼoeˇ ehˇ taˬ˗euˬ “iˇ shaˬ zaˬ” deuˬ˗ahˇ ehˇ nga laˬ? (Yaw nyiˇ 6) laꞈ kʼoeˇ ehˇ taˬ˗euˬ “Sahˬpaˬ Miˬyehˇ˗euˬ saˇ jaˇ” dawˬ˗ahˇ ehˇ nga laˬ?

Laꞈ oˆ laꞈ taˆ˗euˬ dawˬ deuˬ˗ahˇ haw ngeh, Jaˇliꞈ heu deuˆ naˇ tsawˇ haˬ˗ahˇ ngehˬ keuˆ luꞈ˗eu lehˇ siˬ laˇ˗eu meh.

Ja ceuˬ 12:1-4 laꞈ kʼoeˇ “tsawˇ muiˬ tiˬ gʼaˬ˗iˬ maˬ jawˇ˗ehˇ, tsawˇ jaˬ maˬ paˇ poˆ mawˇ nya meh” lehˇ ehˇ taˬ˗awˇ, jiˇ naˇ Ja ceuˬ 12:5-7-ahˇ heu loꞈ˗ehˇ paˇ ehˇ taˬ˗euˬ meh.

Yaw nyiˇ 5-ahˇ Yeˬhawˇbaˬ shaˬ zahˬ puˬ luꞈ˗eu deuˬ˗ahˇ ka kʼoꞈ nehˬ ma lehˇ ehˇ taˬ˗euˬ meh.

Yaw nyiˇ 6-ahˇ “Sahˬpaˬ Miˬyehˇ˗euˬ saˇ jaˇ˗aˬ”, “baw guiˇ˗euˬ pyuˇ loꞈ˗ehˇ, maˇ jawˆ ni gʼeh˗eu saˇ jaˇ meh” lehˇ jiˇ paˇ ehˇ taˬ˗euˬ meh. Yeˬhawˇbaˬ˗euˬ gaˇ mˇ zaˬ yawˬ gʼaˬ na luꞈ dawˬ teu˗ahˇ nui ma tsaˬ˗eu yaw duˬ baw meh.—Ja ceuˬ 18:30; 119:140.

Nymˬ˗mˇ aˬ dui Ja ceuˬ 12:7 laꞈ kʼoeˇ “Sahˬpaˬ Miˬyehˇ haw piˇ nehˬ laꞈ. Haiˬ dui dui˗eu heu ziˇ laꞈ kʼoeˇ, nga maꞈ˗ahˇ nawˇ ha lahˇ nehˬ laꞈ” lehˇ ehˇ taˬ˗euˬ dawˬ˗ahˇ ja sawˇ ma. “Sahˬpaˬ Miˬyehˇ haw piˇ nehˬ” lehˇ ehˇ˗eu heu, aˬ geu deuˬ˗ahˇ haw piˇ nehˬ gaˇ ehˇ mawꞈ˗eu nga?

Yaw nyiˇ 6-ahˇ Sahˬpaˬ Miˬyehˇ˗euˬ saˇ jaˇ dawˬ gaˇ kawˆ ehˇ taˬ˗awˇ, yaw nyiˇ 7-ahˇ naˇ, “haw piˇ nehˬ” lehˇ paˇ ehˇ taˬ˗euˬ miˇ neh tiˬ deuˬ na˗aˬ, teu naˇ “Sahˬpaˬ Miˬyehˇ˗euˬ saˇ jaˇ” dawˬ˗ahˇ ehˇ mawꞈ˗eu nga lehˇ noeˬ nya˗eu meh. Yeˬhawˇbaˬ Jaˇliꞈ˗ahˇ tsawˇ haˬ deuˬ laˆ tsoeˬ˗awˇ laˆ cawˆ mawꞈ kʼawꞈ, maˬ bi laˆ cawˆ ni haw piˇ nehˬ˗eu nmˇ ngeuˇ meh.—Iˇsaˬyaˇ 40:8; 1 Beˬtuˆluˆ 1:25.

Ehˇ kʼawꞈ Yeˬhawˇbaˬ yaw nyiˇ 5-ahˇ ehˇ taˬ˗euˬ tsawˇ haˬ deuˬ˗ahˇ jiˇ haw piˇ nehˬ˗eu meh. Yeˬhawˇbaˬ˗aˬ, “bi kʼehˬ bi kʼaˆ”˗euˬ “iˇ shaˬ zaˬ” deuˬ˗ahˇ ka kʼoꞈ nehˬ meh. Nyaˆ taꞈ jiˇ paˇ ka kʼoꞈ nehˬ˗a siˬ.—Yawˇbaˆ 36:15; Ja ceuˬ 6:4; 31:1, 2; 54:7; 145:20.

Toˆ˗ehˇ naˇ aˬ dui yaw nyiˇ 7-ahˇ ehˇ taˬ˗euˬ teu naˇ, tsawˇ haˬ˗ahˇ ehˇ keuˆ mawꞈ˗eu lehˇ aˬ joꞈ˗ehˇ siˬ nya˗eu nga?

Laꞈ oˆ laꞈ taˆ˗euˬ dawˬ deuˬ˗ahˇ haw ngeh siˬ laˇ˗eu meh.

Ja ceuˬ 12:1-ahˇ Daˬbiˇ maˬ muiˬ maˬ ja˗eu deuˬ baˬ da neh, aˬ yawꞈ hawˇ˗eu nui deuˬ shaˬ zahˬ˗ahˇ ya puˬ˗euˬ gaˇ kawˆ˗ahˇ ehˇ taˬ˗euˬ meh. Teu jiˇ naˇ, Yeˬhawˇbaˬ dawˬ maˬ shaˇ noeˬ ni ngehˬ˗eu deuˬ˗ahˇ aˬ yawꞈ daˇ ma lehˇ ehˇ taˬ˗euˬ meh. Ja ceuˬ sahˬ boꞈ heu kawˆ naˇ, Yeˬhawˇbaˬ˗euˬ dawˬ muiˬ˗eu shawˇ˗eu miˇ neh Yeˬhawˇbaˬ aˬ yawꞈ˗euˬ tsawˇ haˬ deuˬ jawˇ paw jawˇ˗awˇ neh haw piˇ nehˬ meh lehˇ bi jah ziꞈ laꞈ˗eu meh.

Teu miˇ neh yaw nyiˇ 7-ahˇ Sahˬpaˬ Miˬyehˇ haw piˇ nehˬ lehˇ ehˇ˗eu heu naˇ, maˬ muiˬ˗eu tsawˇ haˬ deuˬ baˬ da neh ya shaˬ luꞈ˗eu deuˬ˗ahˇ ehˇ luꞈ˗eu jeˬ pyeuꞈ meh.

Maˬsoˇleꞈ˗tiꞈ deuˬ˗euˬ Heˬbyehˇ Jaˇliꞈ˗ahˇ, heu deuˆ˗ahˇ “aˬ yawꞈ maꞈ” lehˇ ehˇ˗eu dawˬ zmˬ taˬ˗euˬ meh. Heˬbyehˇ Jaˇliꞈ˗ahˇ Gaˬliˇ dawˬ paw neh yuˇ paˇ beh beh˗euˬ dmˬ˗ahˇ “nga maꞈ” lehˇ ehˇ˗eu dawˬ heu nyiˬ poˆ zmˬ taˬ˗euˬ meh. Teu miˇ neh shaˬ zahˬ puˬ luꞈ˗eu, kʼehˬ gaˇ kʼaˆ gaˇ ya daˬ luꞈ˗eu, saˇ jaˇ ziꞈ˗eu deuˬ˗ahˇ ehˇ luꞈ nga lehˇ siˬ laˇ˗eu meh. Yaw nyiˇ 7 jiˇ leˇ dzaˬ˗ahˇ Yeˬhawˇbaˬ tsawˇ haˬ yawˬ gʼaˬ na luꞈ˗ahˇ “haiˬ dui dui˗eu heu ziˇ laꞈ kʼoeˇ” neh ka kʼoꞈ nehˬ ma lehˇ ehˇ taˬ˗euˬ meh. (Ja ceuˬ 12:7, 8) Heˬbyehˇ Jaˇliꞈ˗ahˇ Aˬlaˬmiˇ dawˬ neh yuˇ paˇ taˬ˗euˬ paˇ dmˬ˗ahˇ yaw nyiˇ 7 heu deuˆ laꞈ kʼoeˇ heu loꞈ˗ehˇ boꞈ taˬ˗euˬ meh. “Sahˬ paˬ Miˬyehˇ yaw tsaˬ yaw dawˇ tsawˇ haˬ deuˬ˗ahˇ haw piˇ nehˬ meh. Miˬyehˇ aˬ yawꞈ maꞈ˗ahˇ haiˬ dui dui˗eu heu ziˇ laꞈ kʼoeˇ tsawˇ haˬ˗euˬ laꞈ˗ahˇ neh mˬ maˬ maˬ byaˆ zaˇ ziˇ haw piˇ nehˬ meh.” Heu loꞈ˗ehˇ yuˇ paˇ taˬ˗euˬ dawˬ heu baˬ da neh Ja ceuˬ 12:7 heu naˇ, Sahˬ paˬ Miˬyehˇ˗euˬ saˇ jaˇ dawˬ˗ahˇ ehˇ mawꞈ˗eu maˬ ngeuˇ˗eu lehˇ paˇ siˬ dzehˬ laˇ˗eu meh.

Teu miˇ neh Jaˇliꞈ heu deuˆ naˇ, “tsawˇ muiˬ” deuˬ˗euˬ gʼaˇ duˬ noeˬ tmˬ duˬ pyeuꞈ meh. Heu naˇ, Yeˬhawˇbaˬ aˬ yawꞈ maꞈ˗ahˇ ka kʼoꞈ nehˬ˗eu noeˬ tmˬ jeˬ heu pyeuꞈ meh.