Jaˇliꞈ boꞈ˗euˬ deuˬ tiˬ poˆ na˗aˬ, dawˬ aˬ yawꞈ tiˬ dawˬ˗ahˇ tehꞈ˗ehˇ aˬ jeˬ miˇ neh gʼawˬ mya poˆ boꞈ poˆ taˬ˗euˬ nga? Aˬ jeˬ baˬ da neh pyeuꞈ nya paˬ˗ehˇ gʼeh˗eu gaˇ kawˆ 3 kawˆ˗ahˇ ja sawˇ ma.

Boꞈ˗euˬ saˇ ka. Gaˇ hu Iˇsaˬleˬlaˆ saˇ ka˗ahˇ zaˬ lahˇ deuˬ myaˬ tiˬ paˆ boꞈ taˬ˗euˬ Moˇseˬ˗euˬ zahˇ dawˬ kʼoꞈ dawˬ yawˬ ha˗euˬ aˬ laꞈ laꞈ kʼoeˇ maˬ jaˆ˗a. Iˇsaˬleˬlaˆ tsawˇ haˬ deuˬ sehˬ gʼawˆ˗ahˇ uiˬ laˇ˗awˇ neh tehꞈ˗ehˇ Moˇseˬ˗euˬ zahˇ dawˬ kʼoꞈ dawˬ teu gui gaˇ ya gaˬ˗eu meh. (Dawˬmehˬmehˬ˗eu 31:10-12) Aˬ yawꞈ maꞈ tsawˇ haˬ gʼawˬ mya ni uiˬ leˇ˗awˇ naˬ liˬ gʼawˬ mya laꞈ yawꞈ˗awˇ ya naˇ haˬ˗eu miˇ neh maˬ noeˬ tsoˆ taˬ nya ni pyeuꞈ˗iˇ˗eu meh. (Neˬhaˬmiˇ 8:2, 3, 7) Teu miˇ neh aˇ yeˇ huiˬ˗eu dawˬ˗ahˇ ngehˬ poˆ poˆ˗eu heu naˇ, zaˬ lahˇ deuˬ˗ahˇ Jaˇliꞈ aˇ deuˆ˗ahˇ yaw muiˬ˗ehˇ noeˬ taˬ nya˗awˇ, dehꞈ ziˇ laꞈ kʼoeˇ zmˬ˗iˇ ni caw ba nehˬ˗eu meh. Heu loꞈ˗ehˇ jahˇ˗eu heu naˇ, aˬ yawꞈ maꞈ˗ahˇ aˇ yeˇ huiˬ˗eu gaˇ kawˆ pyeuꞈ˗eu Miˬyehˇ˗euˬ zahˇ dawˬ kʼoꞈ dawˬ˗ahˇ maˬ ngehˇ ni caw ba nehˬ˗eu meh.—Uˬduˬtahˬ˗eu 18:4-22; Dawˬmehˬmehˬ˗eu 5:1.

Boꞈ jeˬ boꞈ kawˆ. Jaˇliꞈ laꞈ kʼoeˇ boꞈ taˬ˗euˬ dawˬ heu naˇ, aˇ bymˇ bymˇ leꞈ ngeh 10 bymˇ naˇ dawˬ caˇ pyeuꞈ meh. Yaw jeˬ ma jeˬ, Ja ceu˗euˬ sahˬ boꞈ, Dawˬ caˇ sahˬ boꞈ, Yeˬlaˬmiˇ ngoeˇ dawˬ, heu deuˬ pyeuꞈ meh. Tiˬ poˆ na dawˬ caˇ laꞈ kʼoeˇ jiˇ dawˬ aˬ yawꞈ tiˬ dawˬ˗ahˇ gʼawˬ mya poˆ ngehˬ poˆ taˬ˗euˬ meh. Teu naˇ, dawˬ tsuiꞈ˗ahˇ noeˬ taˬ nya ni caw ba nehˬ˗eu meh. Yaw jeˬ ma jeˬ, Ja ceuˬ 115:9-11-ahˇ “Iˇsaˬleˬlaˆ tsawˇ haˬ deuˬ˗oˇ, Sahˬpaˬ Miˬyehˇ˗ahˇ gʼoe˗awˬ. Aˬ yawꞈ naw maꞈ˗ahˇ bo saˆ haw piˇ˗eu meh. Miˬyehˇ˗euˬ piˇ ma deuˬ˗oˇ, Sahˬpaˬ Miˬyehˇ˗ahˇ gʼoe˗awˬ. Aˬ yawꞈ naw maꞈ˗ahˇ ngehˬ gʼeh dah teˬ˗eu meh. Aˬ yawꞈ˗ahˇ uˬ duˬ kʼaˇ tahˬ˗eu deuˬ, Sahˬpaˬ Miˬyehˇ˗ahˇ gʼoe˗awˬ. Aˬ yawꞈ naw maꞈ˗ahˇ bo saˆ haw piˇ˗eu meh” lehˇ ehˇ taˬ˗euˬ meh. Dawˬ heu loꞈ˗ehˇ zmˬ poˆ taˬ˗euˬ heu naˇ, dawˬ caˇ caˇ˗eu deuˬ˗ahˇ dawˬ caˇ˗ahˇ yaw muiˬ˗ehˇ noeˬ taˬ nya ni caw ba nehˬ˗eu meh.

Aˇ yeˇ huiˬ˗eu gaˇ kawˆ˗ahˇ bi siˬ mawꞈ. Jaˇliꞈ boꞈ˗euˬ deuˬ aˇ yeˇ huiˬ˗eu gaˇ kawˆ˗ahˇ ngehˬ poˆ poˆ taˬ˗euˬ meh. Yaw jeˬ ma jeˬ, Yeˬhawˇbaˬ Moˇseˬ˗ahˇ neh tiˬ tiˆ Iˇsaˬleˬlaˆ tsawˇ haˬ deuˬ˗ahˇ shiˬ taˬ dzaˬ lehˇ dawˬ biꞈ ngeh, aˬ jeˬ miˇ neh maˬ ya dzaˬ˗eu gaˇ kawˆ˗ahˇ yaw myaˬ poˆ bi ngehˬ poˆ˗euˬ meh. Dehꞈ ziˇ˗aˬ, shiˬ laꞈ kʼoeˇ ahˇ˗awˇ shiˬ˗aˬ, dehꞈ ziˇ pyeuꞈ meh lehˇ bi siˬ mawꞈ˗eu miˇ neh meh. (Uˬduˬtahˬ˗eu 17:11, 14) Aˇ nah naˇ, Yeˬluˇsaˬlehˬ meuˬ˗ahˇ˗euˬ aˇ muˇ˗ahˇ sheuˬ gʼeh˗eu deuˬ hawˇ˗eu gʼaˬ kʼehˇ deuˬ Ka li zaˬ deuˬ Miˬyehˇ nui kʼahˇ shiˇ˗eu jeˬ mˇ˗eu gʼaˇ duˬ aˬ jeˬ˗ahˇ ya yahˇ˗eu gaˇ kawˆ˗ahˇ ngehˬ keuˆ ngeh, aˬ yawꞈ maꞈ shiˬ˗ahˇ ya yahˇ meh lehˇ paˇ ngehˬ poˆ taˬ˗euˬ meh.—Gʼaˬkʼehˇ 15:20, 29.

Jaˇliꞈ laꞈ kʼoeˇ dawˬ aˬ yawꞈ tiˬ dawˬ˗ahˇ yaw myaˬ poˆ boꞈ poˆ taˬ˗euˬ kʼawꞈ, Yeˬhawˇbaˬ aˬ dui˗ahˇ lawˇ ciꞈ zaˬ deuˬ toˇ˗eu loꞈ˗ehˇ maˬ bi toˇ mawꞈ˗a. Yeˬsuˇ “Naw maꞈ guiˬ lahˬ shaˇ ngeh, lawˇ ciꞈ zaˬ deuˬ guiˬ lahˬ shaˇ˗eu loꞈ˗ehˇ, gaˇ dahˇ maˬ tsoeˬ˗eu dawˬ gʼawˬ mya ni taˬ ngehˬ” lehˇ ehˇ˗eu meh. (Maꞈtehˬ 6:7) Kʼoeˇ naˇ Yeˬsuˇ aˬ dui Yeˬhawˇbaˬ nui ma tsaˬ˗eu jeˬ˗ehˇ guiˬ lahˬ aˬ joˇ joˆ˗ehˇ shaˇ nya˗eu nga lehˇ jiˇ ehˇ˗eu meh. (Maꞈtehˬ 6:9-13) Aˬ dui guiˬ lahˬ shaˇ ngeh lawˇ ciꞈ zaˬ deuˬ loꞈ˗ehˇ aˬ yawꞈ tiˬ dawˬ˗ahˇ tehꞈ˗ehˇ maˬ shaˇ poˆ kʼawꞈ, gaˇ kawˆ tiˬ kawˆ na˗ahˇ naˇ tiˬ kʼehˬ maˬ kaˬ shaˇ nya˗eu meh.—Maꞈtehˬ 7:7-11.

Aˬ dui˗euˬ Huiˬ dui dui˗eu saˬ laˬ Yeˬhawˇbaˬ muiˬ˗eu jeˬ baˬ da neh Jaˇliꞈ laꞈ kʼoeˇ dawˬ aˬ yawꞈ tiˬ dawˬ˗ahˇ yaw myaˬ poˆ bi boꞈ ahˇ taˬ˗euˬ meh. Teu naˇ aˬ dui˗ahˇ gaˇ dahˇ tsoeˬ˗eu gʼaˇ duˬ Yeˬhawˇbaˬ neh mehˬ˗euˬ mehˬ jeˬ mehˬ kawˆ yaw myaˬ jeˬ laꞈ kʼoeˇ neh tiˬ jeˬ pyeuꞈ meh.—Iˇsaˬyaˇ 48:17, 18.