Aˬ dui Jaˇliꞈ gui ngeh poeˬ˗eu zaˬ siˬ nui gahˇ za˗eu gʼaˇ duˬ, poˆ tseˇ lahˬ nya˗eu meh. Ehˇ kʼawˬ aˬ dui gaˇ dahˇ tsoeˬ˗eu jeˬ tiˬ byah tiˬ loꞈ za˗eu gʼaˇ duˬ aˬ jeˬ paˇ jahˇ nya nga siˬ?

Naꞈ suiˇ ni poˆ tseˇ. Nawˇ Jaˇliꞈ laꞈ kʼoeˇ˗euˬ gaˇ kawˆ deuˬ˗ahˇ naꞈ suiˇ ni poˆ tseˇ nya meh. Yaw jeˬ ma jeˬ, aˬ suˇ gʼaˬ neh boꞈ˗euˬ, aˬ suˇ gʼaˬ˗ahˇ boꞈ keuˆ˗euˬ, aˇ myah boꞈ˗euˬ, gaˇ kawˆ aˬ joˆ˗ehˇ pyeuꞈ luꞈ˗eu, teu˗euˬ jeˬ hu aˬ jeˬ pyeuꞈ laˇ˗awˇ, teu˗euˬ jeˬ nah aˬ jeˬ pyeuꞈ laˇ˗euˬ lehˇ poˆ tseˇ nya meh.

Aˬ jeˬ ya siˬ˗euˬ lehˇ haw. Poˆ tseˇ ngeh, naˇ haˬ˗eu jeˬ heu deuˬ˗ahˇ noeˬ keuˆ nya meh. ‘Aˬ dui gui luꞈ˗eu heu gʼaˬ aˬ joˆ˗ehˇ noeˬ luꞈ˗eu nga? Aˬ yawꞈ aˬ jeˬ jeˇ˗euˬ seuˆ dzeuꞈ aˇ gʼehˇ mˇ mawˇ˗euˬ nga? Aˬ yawꞈ˗euˬ muiˬ˗eu seuˆ dzeuꞈ aˇ gʼehˇ˗ahˇ aˬ joˆ˗ehˇ dzaw geuꞈ nya˗eu nga? Maˬ muiˬ˗eu seuˆ dzeuꞈ aˇ gʼehˇ˗ahˇ aˬ joˆ˗ehˇ yahˇ nya˗eu nga?ʼ

Ya siˬ˗euˬ jeˬ zmˬ˗iˇ. Tsaꞈ gaˬ˗eu gaˇ mˇ ngeh maˬ ehˇ, aˬ cawˬ nehˬ˗ehˇ cawˬ ngeh maˬ ehˇ, zmˬ˗iˇ. Toˆ˗ehˇ jahˇ naˇ, nawˇ Jaˇliꞈ laꞈ kʼoeˇ “zaˬ siˬ tsawˇ gahˇ kʼaˇ ahˇ˗eu tsawˇ haˬ deuˬ, gaˇ kawˆ kʼoeˇ shaˇ sawˇ haw luꞈ˗uˇ” lehˇ ehˇ taˬ˗euˬ loꞈ˗ehˇ, Miˬyehˇ jawˇ gaˇ neh oe˗euˬ zaˬ siˬ nui gahˇ ahˇ˗eu tiˬ gʼaˬ pyeuꞈ meh.—Ja ceuˬ 107:43.

• Caw ba nehˬ˗eu jeˬ: Jaˇliꞈ laꞈ kʼoeˇ˗euˬ poeˬ˗eu zaˬ siˬ nui gahˇ lehˇ ehˇ˗eu jawˇ nah yaw kaˬ mehˬ bawˬ˗ahˇ ja sawˇ jeˬ ja sawˇ kawˆ heu naˇ, aˬ dui˗ahˇ Jaˇliꞈ˗ahˇ neh ya siˬ˗euˬ jeˬ aˬ joˆ˗ehˇ zmˬ˗iˇ nya˗eu lehˇ siˬ laˇ ni aˬ joˆ˗ehˇ caw ba nehˬ˗eu nga lehˇ haw. Teu laꞈ kʼoeˇ, aˬ dui yawˬ ha˗ahˇ naˇ haˬ nya˗eu, shaˇ noeˬ shaˇ sawˇ nya˗eu, ja sawˇ nya˗eu, aˇ baˇ lawˬ muˇ jiˇ ahˇ meh.