Ehˇ kʼawꞈ nah paˇ paˇ taˬ˗euˬ aˇ yamˬ tsaˬ laˇ ngeh, Yeˬhawˇbaˬ maˬ muiˬ˗eu yaw haiˬ yaw doeˇ dawˬ tawˆ luꞈ˗ahˇ laˆ byoˆ jiˇ nehˬ˗eu meh. Yeˬhawˇbaˬ aˬ dui˗ahˇ aˬ jeˬ miˇ neh aˇ yamˬ teu˗ahˇ nui ma gʼawˬ mahˇ ni taˬ˗awˇ bi dawˬ mawꞈ˗eu nga? Dawˬ luꞈ˗eu aˇ yamˬ teu laꞈ kʼoeˇ laˬ kʼaˬ tiˬ cehˇ dehꞈ nya ni caw ba nehˬ˗eu jeˬ naˇ aˬ jeˬ nga?

Yeˬhawˇbaˬ aˬ jeˬ miˇ neh bi dawˬ mawꞈ˗eu nga?

Jaˇliꞈ˗ahˇ “Naw maꞈ˗ahˇ gʼawˬ shaˬ gaˬ nehˬ˗eu gʼaˇ duˬ, Sahˬpaˬ Miˬyehˇ loꞈ luꞈ˗eu meh. Aˬ yawꞈ aˬ myah luꞈ yaw tsaˬ yaw dawˇ miˇ neh, naw maꞈ˗ahˇ gʼawˬ shaˬ gaˬ˗eu lehˬ hmˬ taˬ˗euˬ meh. Sahˬpaˬ Miˬyehˇ˗ahˇ gʼoe˗eu tsawˇ haˬ guiˬ lahˬ huiˬ˗eu meh” lehˇ ehˇ taˬ˗euˬ meh. (Iˇsaˬyaˇ 30:18) Iˇsaˬyaˇ˗euˬ dawˬ heu, nui ma gʼahˇ nui ma huiˬ˗eu Yuˇdaˆ˗euˬ tsawˇ haˬ deuˬ˗ahˇ boꞈ nehˬ˗euˬ jeˬ pyeuꞈ meh. (Iˇsaˬyaˇ 30:1) Ehˇ kʼawꞈ ni Yuˇdaˆ tsawˇ haˬ deuˬ laꞈ kʼoeˇ saˇ jaˇ ziꞈ˗eu deuˬ jiˇ jawˇ˗eu meh. Dawˬ heu naˇ teu deuˬ˗ahˇ noeˬ tmˬ˗eu jeˬ biꞈ˗awˇ, nymˬ˗mˇ iˬ nah˗euˬ Miˬyehˇ˗euˬ gaˇ mˇ zaˬ deuˬ˗ahˇ jiˇ noeˬ tmˬ˗eu jeˬ biꞈ˗eu meh.

Yeˬhawˇbaˬ nui ma gʼawˬ mahˇ ni taˬ˗awˇ dawˬ˗eu loꞈ˗ehˇ, aˬ dui jiˇ nui ma gʼawˬ mahˇ ni taˬ˗awˇ ya dawˬ˗eu meh. Yeˬhawˇbaˬ haiˬ˗eu miˇ tsaˬ heu˗ahˇ laˆ cawˆ˗eu aˇ yamˬ nah paˇ paˇ taˬ dzeuˇ˗euˬ meh. Teu ngeh nah teu ngeh yamˬ keuˆ le gaˇ dawˬ luꞈ˗eu meh. (Maꞈtehˬ 24:36) Yeˬhawˇbaˬ hawˇ˗eu aˬ yawꞈ˗ahˇ uˬ duˬ tahˬ˗eu deuˬ˗ahˇ, Saˬdaˬ neh ja bu taˬ˗euˬ jeˬ maˬ tsaˬ˗eu lehˇ teu ngeh ya siˬ duˬ meh. Yeˬhawˇbaˬ Saˬdaˬ hawˇ˗eu aˬ yawꞈ paw pyawˬ˗eu deuˬ dawˬ tawˆ luꞈ˗ahˇ laˆ cawˆ jiˇ˗eu meh. Kʼoeˇ naˇ ‘aˬ dui˗ahˇ gʼawˬ shaˬ gaˬ nehˬ˗euʼ meh.

Yeˬhawˇbaˬ nymˬ˗mˇ mehˬ kʼehˬ˗ahˇ˗euˬ aˬ dui˗euˬ shaˬ zahˬ˗ahˇ maˬ laˆ piˇ maˬ laˆ byoˆ nehˬ˗a. Ehˇ kʼawꞈ dawˬ luꞈ˗eu aˇ yamˬ teu laꞈ kʼoeˇ laˬ kʼaˬ cehˇ nya meh lehˇ kamˬ taˬ˗euˬ meh. Iˇsaˬyaˇ neh boꞈ taˬ˗euˬ loꞈ˗ehˇ muiˬ˗eu tiˬ jeˬ jeˬ pyeuꞈ laˇ meh lehˇ noeˬ tmˬ˗awˇ dawˬ luꞈ ngeh laˬ kʼaˬ cehˇ cehˇ˗ehˇ dehꞈ nya˗eu meh. (Iˇsaˬyaˇ 30:18) a Aˬ joˆ˗ehˇ jahˇ˗awˇ neh cehˇ nya˗eu nga? Gaˇ kawˆ oeˬ kawˆ˗ahˇ ja sawˇ ma.

Dawˬ luꞈ˗eu aˇ yamˬ laꞈ kʼoeˇ laˬ kʼaˬ cehˇ cehˇ˗ehˇ dawˬ nya ni aˬ joˆ˗ehˇ ya jahˇ˗eu nga?

Yaw muiˬ jeˬ˗ahˇ haw tsoˆ taˬ. Daˬbiˇ˗euˬ dehꞈ ziˇ laꞈ kʼoeˇ maˬ muiˬ˗eu yaw doeˇ gʼawˬ mya jeˬ˗ahˇ ya tahˬ puˬ˗eu meh. (Ja ceuˬ 37:35) Ehˇ kʼawꞈ aˬ yawꞈ, “nui ma gʼawˬ mahˇ ni taˬ˗awˇ, Sahˬpaˬ Miˬyehˇ˗ahˇ dawˬ tawˬ˗awˬ. Aˬ cawˬ dehꞈ dzaˬ gaˇ taˬ noeˬ shaˬ. Yaw haiˬ jeˬ mˇ gaˇ myaˆ taˬ naˆ” lehˇ ehˇ taˬ˗euˬ meh. (Ja ceuˬ 37:7) Daˬbiˇ  aˬ yawꞈ neh ngehˬ˗euˬ loꞈ˗ehˇ mˇ caw˗euˬ meh. Aˬ yawꞈ Miˬyehˇ neh ka kʼoꞈ nehˬ ma lehˇ saˇ jaˇ dzaˬ taˬ˗euˬ dawˬ˗ahˇ haw tsoˆ taˬ˗euˬ meh. Kʼoeˇ naˇ Miˬyehˇ neh biꞈ nehˬ laꞈ˗euˬ guiˬ lahˬ yawˬ jeˬ na luꞈ˗euˬ gʼaˇ duˬ, guiˬ lahˬ huiˬ˗eu meh. (Ja ceuˬ 40:5) Aˬ dui jiˇ yaw doeˇ jeˬ˗ahˇ maˬ ngeuˇ˗eu yaw muiˬ jeˬ˗ahˇ haw tsoˆ taˬ naˇ, Yeˬhawˇbaˬ˗ahˇ dawˬ˗eu yaw awˬ meh.

Kʼaˇ yehꞈ laˇ gaˇ Yeˬhawˇbaˬ˗ahˇ ja ceuˬ˗eu gʼaˇ duˬ leh jeh. Ja ceuˬ yaw huiˬ 71-ahˇ boꞈ˗euˬ Daˬbiˇ, Yeˬhawˇbaˬ˗ahˇ “Nawˬ˗ahˇ ngaˇ aˬ myah luꞈ noeˬ tmˬ ma. Tiˬ nah taꞈ˗ehˇ tiˬ nah nawˬ˗ahˇ ngaˇ ja ceuˬ ma” lehˇ ehˇ nehˬ˗euˬ meh. (Ja ceuˬ 71:14) Daˬbiˇ Yeˬhawˇbaˬ˗ahˇ aˬ joˆ˗ehˇ ja ceuˬ˗euˬ nga? Aˬ yawꞈ Yeˬhawˇbaˬ˗euˬ gaˇ kawˆ aˬ cawˬ deuˬ˗ahˇ dzawˇ nehˬ˗awˇ, ja ceuˬ˗eu dawˬ caˇ caˇ˗eu meh. (Ja ceuˬ 71:16, 23) Aˬ dui jiˇ ni tsaꞈ gaˬ˗iˇ ngeh maˬ ehˇ, yawˬ nah na luꞈ tsawˇ haˬ deuˬ nehˬ˗ehˇ uiˬ leˇ˗awˇ dawˬ ja ja ngeh maˬ ehˇ, Yeˬhawˇbaˬ˗euˬ gaˇ kawˆ ja nya˗awˇ, ja ceuˬ˗eu dawˬ caˇ caˇ nya˗eu meh. Nyaˆ taꞈ poˆ Miˬyehˇ Miˇkʼahˬ˗euˬ dawˬ caˇ caˇ ngeh, dawˬ tsuiꞈ deuˬ˗ahˇ yaw muiˬ˗ehˇ haw tsoˆ taˬ. Teu loꞈ˗ehˇ jahˇ naˇ Daˬbiˇ loꞈ˗ehˇ Yeˬhawˇbaˬ˗ahˇ loꞈ ba jawˬ˗ehˇ laˬ kʼaˬ cehˇ nya˗eu meh.

Mehˇ nmˇ deuˬ˗ahˇ neh gʼaˬ yuˇ geuꞈ. Daˬbiˇ shaˬ zahˬ ya puˬ kʼawꞈ ni, aˬ yawꞈ Yeˬhawˇbaˬ˗ahˇ “Nawˬ˗euˬ tsawˇ haˬ deuˬ jawˇ˗eu mehˬ shi, nawˇ muiˬ˗eu gaˇ kawˆ ngaˇ ja mehˬ ma” lehˇ ehˇ nehˬ˗euˬ meh. (Ja ceuˬ 52:9) Aˬ dui jiˇ ni mehˇ nmˇ deuˬ˗ahˇ neh, gʼaˬ yuˇ nya meh. Bawˬ dzaˬ ngeh hawˇ˗eu tsaꞈ gaˬ˗iˇ ngeh tehꞈ˗ehˇ maˬ ngeuˇ˗eu, cawˬ cawˬ taꞈ ngeh yamˬ˗ahˇ jiˇ gʼaˬ yuˇ geuꞈ nya˗eu meh.—Loˇmaˆ 1:11, 12.

Noeˬ tmˬ˗eu jeˬ bya cehˆ ni bi jaˆ˗awˬ. Ja ceuˬ 62:5 “Miˬyehˇ˗ahˇ tehꞈ˗ehˇ ngaˇ gʼoe˗eu ma. Aˬ yawꞈ laꞈ kʼoeˇ ngaˇ noeˬ tmˬ kʼaˇ za˗eu ma” lehˇ ehˇ taˬ˗euˬ meh. Miˬyehˇ˗euˬ aˇ nah noeˬ taˬ˗euˬ aˇ yamˬ˗ahˇ maˬ keuˆ le ngeh ngehˬ˗ehˇ dzehˬ aˬ dui noeˬ tmˬ˗eu jeˬ ziꞈ dah ni bi jaˆ˗eu aˇ yeˇ huiˬ˗eu meh. Aˇ myah ni ya dawˬ˗eu maˬ kaˬ, aˬ dui Yeˬhawˇbaˬ˗euˬ saˇ jaˇ dawˬ maˇ diˇ byah laˇ meh lehˇ ya jah ziꞈ˗eu meh. Aˬ dui noeˬ tmˬ˗eu jeˬ bya cehˆ ni bi jaˆ˗eu gʼaˇ duˬ, Jaˇliꞈ gui˗awˇ yaw muiˬ˗ehˇ ya pyehˆ tseˇ˗eu meh. Yaw jeˬ ma jeˬ, Jaˇliꞈ laꞈ kʼoeˇ˗euˬ maˬ keuˆ laˇ miˇ ehˇ taˬ˗euˬ dawˬ deuˬ byah laˇ˗euˬ gaˇ kawˆ hawˇ˗eu Jaˇliꞈ mehˬ shi naˇ kʼah tiˬ gaˇ tsaˬ leˇ jiˇ˗eu gaˇ kawˆ uˬ taꞈ, Yeˬhawˇbaˬ˗euˬ gaˇ kawˆ heu deuˬ duꞈ yawˇ ni pah mehˬ taˬ˗euˬ jeˬ˗ahˇ yaw muiˬ˗ehˇ ya pyehˆ tseˇ˗eu meh. (Ja ceuˬ 1:2, 3) Kʼoeˇ uˬ taꞈ, mˬ maˬ maˬ byaˆ zaˇ ziˇ dehꞈ˗eu saˇ jaˇ dawˬ byah laˇ gaˇ dawˬ ba jawˬ˗ehˇ Yeˬhawˇbaˬ nehˬ˗ehˇ muiˬ˗eu cawˬ cawˬ˗eu jeˬ jaˆ daˆ leꞈ˗eu gʼaˇ duˬ, ‘muiˬ˗eu shawˇ˗eu yaw sahˇ baoˬ laꞈ kʼoeˇ guiˬ lahˬ ya shaˇ˗eu’ meh. Dawˬ luꞈ˗eu deuˬ˗ahˇ Yeˬhawˇbaˬ haw luꞈ˗awˇ, ziꞈ dah ni gʼeh˗eu nui gaˬ mˇ mawˇ meh lehˇ Daˬbiˇ loꞈ˗ehˇ ya jah˗eu meh.—Yuˇdaˆ 20, 21.

Sahˬ paˬ Daˬbiˇ loꞈ˗ehˇ duˇ ni, Yeˬhawˇbaˬ aˬ yawꞈ˗ahˇ dawˬ˗eu deuˬ˗ahˇ haw piˇ luꞈ˗awˇ, aˬ yawꞈ˗euˬ gaˇ mˇ zaˬ deuˬ˗ahˇ maˬ tsehˆ leˇ˗eu nui gaˬ mˇ mawˇ meh lehˇ jah ziꞈ luꞈ˗uˇ. (Ja ceuˬ 33:18, 22) Yaw muiˬ jeˬ˗ahˇ haw tsoˆ taˬ˗awˇ Miˬyehˇ˗ahˇ ja ceuˬ˗eu uˬ taꞈ, mehˇ nmˇ deuˬ˗ahˇ neh gʼaˬ yuˇ geuꞈ˗awˇ, poeˬ˗eu noeˬ tmˬ˗eu jeˬ bya cehˆ ni bi jaˆ˗eu heu neh, nui ma gʼawˬ mahˇ ni taˬ˗awˇ dawˬ daˆ leꞈ luꞈ˗uˇ.