Dzaw˗eu gaˇ kawˆ 17
Dawˬ caˇ 111 Aˬ dui laˬ kʼaˬ cehˇ paˬ˗ehˇ gʼeh˗eu jeˬ jaˆ
Yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ daˆ leꞈ
“Ngaˬ neh beh˗euˬ jeˬ˗ahˇ, mˬ maˬ maˬ byaˆ zaˇ ziˇ laˬ kʼaˬ cehˇ˗awˬ.”—Iˇsaˬyaˇ 65:18.
Yaw muiˬ˗ehˇ ya haw˗eu tsahˇ
Aˬ dui yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ luꞈ ngeh, aˬ jeˬ˗euˬ muiˬ˗eu jeˬ˗ahˇ za˗eu nga lehˇ haw˗awˇ, aˬ cawˬ deuˬ˗ahˇ jiˇ teu gaˇ jawˇ laˇ nya ni aˬ joˆ˗ehˇ caw ba nehˬ nya˗eu nga lehˇ haw.
1. Yaw jeˬ ma jeˬ˗euˬ Baˬlaˬdiˇsuˆ heu naˇ, aˬ jeˬ˗ahˇ ehˇ mawꞈ˗eu nga? Aˬ dui aˬ jeˬ noeˬ tsehˆ taˬ paˬ˗ehˇ gʼeh˗eu nga?
Nymˬ˗mˇ iˬ nah miˇ tsaˬ kʼoeˇ taˆ nui saˇ oꞈ˗eu jeˬ tehꞈ˗ehˇ jaˆ˗awˇ caˇ dui dui˗eu Baˬlaˬdiˇsuˆ tiˬ hmˬ jaˆ˗eu meh. Teu gaˇ jawˇ˗eu yaw myaˬ lam gʼaˬ muiˬ˗eu yaw myaˬ jeˬ mˇ luꞈ˗eu meh. Aˬ yawꞈ maꞈ teu gaˇ neh maˬ doˆ˗iˇ ni aˬ myah luꞈ jawˇ daˆ leꞈ˗eu lehˇ noeˬ tsehˆ taˬ˗euˬ meh. Kʼoeˇ naˇ aˬ yawꞈ maꞈ tsawˇ haˬ gʼawˬ mya ni˗ahˇ teu gaˇ bi jawˇ laˇ mawꞈ˗eu meh. Teu naˇ aˬ jeˬ nga? Teu naˇ yaw jeˬ ma jeˬ˗euˬ Baˬlaˬdiˇsuˆ pyeuꞈ meh. a
2. Yaw jeˬ ma jeˬ˗euˬ Baˬlaˬdiˇsuˆ heu naˇ, aˬ jeˬ miˇ neh zahˬ leˇ paˬ˗ehˇ gʼeh˗eu nga?
2 Yaw haiˬ yaw doeˇ jeˬ, bye˗eu jeˬ hawˇ˗eu guˆ laˇ paˬ˗ehˇ gʼeh˗eu jeˬ tehꞈ˗ehˇ byah jiˇ taˬ˗euˬ Saˬdaˬ˗euˬ miˇ tsaˬ heu siˬ˗ahˇ Yeˬhawˇbaˬ aˬ yawꞈ˗euˬ tsawˇ haˬ deuˬ˗ahˇ nui saˇ oꞈ˗awˇ, mehˬ bawˬ gm ni jahˇ nehˬ taˬ˗euˬ heu naˇ zahˬ dui dui leˇ paˬ˗ehˇ gʼeh˗eu jeˬ pyeuꞈ meh. (1 Yoˇhaˬ 5:19; Pah mehˬ˗eu 12:12) Yeˬhawˇbaˬ Saˬdaˬ˗euˬ miˇ tsaˬ heu naˇ, aˬ dui˗ahˇ aˇ naˆ ni deuˬ˗eu lehˇ siˬ nya˗eu meh. Teu miˇ neh Yeˬhawˇbaˬ aˬ yawꞈ˗euˬ tsawˇ haˬ deuˬ˗ahˇ aˬ yawꞈ˗euˬ gaˇ˗ahˇ laˬ kʼaˬ tiˬ cehˇ mˇ nya˗eu gʼaˇ duˬ, nui saˇ oꞈ˗awˇ mehˬ bawˬ gm˗eu jawˇ duˬ tiˬ tsahˇ lehˬ hmˬ nehˬ taˬ˗euˬ meh. Jaˇliꞈ˗ahˇ yaw jeˬ ma jeˬ˗euˬ Baˬlaˬdiˇsuˆ heu˗ahˇ “guˆ˗eu gaˆ˗eu jeˬ” maˬ jaˆ ni, “iˇ cuꞈ tiˬ byah za˗eu yaˇ kmˇ” pyeuꞈ meh lehˇ ngehˬ keuˆ taˬ˗euˬ meh. (Iˇsaˬyaˇ 4:6; 58:11) Shaˬ dui zahˬ dui dui˗eu aˇ yamˬ laꞈ kʼoeˇ ya dehꞈ kʼawꞈ, yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ˗eu deuˬ naˇ, Yeˬhawˇbaˬ guiˬ lahˬ biꞈ˗eu miˇ neh guˆ˗eu gaˆ˗eu jeˬ maˬ jaˆ ni laˬ kʼaˬ cehˇ˗awˇ nui saˇ oꞈ˗eu meh.—Iˇsaˬyaˇ 54:14; 2 Tiˆmoˇseˬ 3:1.
3. Iˇsaˬleˬlaˆ saˇ ka˗ahˇ Iˇsaˬyaˇ yaw huiˬ 65 laꞈ kʼoeˇ˗euˬ maˬ keuˆ laˇ miˇ ehˇ taˬ˗euˬ dawˬ aˬ joˆ˗ehˇ byah laˇ˗euˬ nga?
3 Yeˬhawˇbaˬ bawˇlawˇpeh Iˇsaˬyaˇ˗ahˇ neh tiˬ tiˆ yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ˗eu deuˬ˗euˬ dehꞈ ziˇ aˬ joˆ˗ehˇ gʼeh˗eu lehˇ ehˇ nehˬ taˬ˗euˬ meh. Gaˇ kawˆ teu Iˇsaˬyaˇ gaˬ naˇ yaw huiˬ 65-ahˇ ahˇ˗eu meh. Iˇsaˬyaˇ˗euˬ maˬ keuˆ laˇ miˇ ehˇ taˬ˗euˬ dawˬ B.C. 537-ahˇ dahˬ beh˗eu poˆ byah laˇ˗euˬ meh. Teu ngeh noeˬ poˆ noeˬ paˇ˗euˬ Yuˇdaˆ tsawˇ haˬ deuˬ Baˬbuˇloˬ˗ahˇ zaˬ kʼaˆ maˬ paˇ ya geuꞈ ni Yeˬluˇsaˬlehˬ meuˬ˗ahˇ gʼoꞈ laˇ˗euˬ meh. Yeˬhawˇbaˬ aˬ yawꞈ maꞈ˗ahˇ Yeˬluˇsaˬlehˬ meuˬ tsoˆ muiˬ kʼoꞈ gaˇ maˬ ehˇ, maˇ maˇ ni gʼeh˗eu uˬ duˬ tahˬ˗eu jawˇ duˬ pyeuꞈ˗eu uˬ duˬ tahˬ nymˇ nymˇ ma tsoˆ muiˬ kʼoꞈ gaˇ maˬ ehˇ, caw ba nehˬ˗awˇ guiˬ lahˬ biꞈ˗euˬ meh.—Iˇsaˬyaˇ 51:11; Zaˬkaˬliˇ 8:3.
4. Iˇsaˬyaˇ yaw huiˬ 65 laꞈ kʼoeˇ˗euˬ maˬ keuˆ laˇ miˇ ehˇ taˬ dawˬ nymˬ˗mˇ saˇ ka˗ahˇ aˬ joˆ˗ehˇ byah laˇ˗euˬ nga?
4 Iˇsaˬyaˇ˗euˬ maˬ keuˆ laˇ mi ehˇ taˬ dawˬ nymˬ˗mˇ saˇ ka Yeˬhawˇbaˬ˗euˬ tsawˇ haˬ deuˬ huiˬ dui dui˗eu Baˬbuˇloˬ˗ahˇ neh doˆ laˇ˗euˬ A.D. 1919-ahˇ nyiˬ poˆ aˬ yawꞈ poˆ byah laˇ˗euˬ meh. Teu gaˇ neh naˇ yaw jeˬ ma jeˬ˗euˬ Baˬlaˬdiˇsuˆ miˇ tsaˬ tahˬ kʼawˇ doe ni iˇ byaˆ dahˬ beh laˇ˗euˬ meh. Yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ˗eu deuˬ Miˬyehˇ Miˇkʼahˬ gaˇ kawˆ laˬ kʼaˬ cehˇ˗eu guiˬ lahˬ dawˬ leh jeh˗awˇ tsaꞈ gaˬ˗eu uˬ taꞈ, miˇ kʼahˬ deuˬ˗ahˇ aˇ muˇ yaw shuiꞈ deuˬ beh˗euˬ meh. Kʼoeˇ naˇ Ka li zaˬ˗euˬ seuˆ dzeuꞈ aˇ gʼehˇ deuˬ mˇ mawˇ˗euˬ meh. Yaw beh aˬ yawꞈ maꞈ dehꞈ bahˬ dehꞈ muˆ˗awˇ, yaw haiˬ yaw doeˇ jeˬ mˇ˗euˬ kʼawꞈ, dehꞈ poˆ dehꞈ paˇ˗awˇ “Miˬyehˇ˗euˬ aˇ gʼeh˗ahˇ duˇ leˇ ni beh taˬ˗euˬ yaw dehꞈ dehꞈ˗eu yaw shuiꞈ jeˬ˗ahˇ dm”˗euˬ meh. (Eˇpeˇsu 4:24) Miˇ shuiꞈ˗ahˇ naˇ Iˇsaˬyaˇ neh maˬ keuˆ laˇ miˇ ehˇ taˬ˗euˬ dawˬ heu sahˬ boꞈ kʼaˇ boꞈ taˬ˗euˬ loꞈ˗ehˇ maˇ diˇ byah laˇ˗eu meh. Ehˇ kʼawꞈ aˬ dui yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ˗eu miˇ neh, nymˬ˗mˇ neh yaw muiˬ gʼawˬ mya jeˬ za luꞈ˗eu ma. Aˬ dui aˬ jeˬ jeˇ˗euˬ muiˬ˗eu jeˬ za luꞈ˗eu nga lehˇ haw˗awˇ, yaw jeˬ ma jeˬ˗euˬ Baˬlaˬdiˇsuˆ heu˗ahˇ neh aˬ jeˬ miˇ neh doˆ iˇ paˬ˗ehˇ maˬ gʼeh˗eu nga lehˇ jiˇ haw ma.
Yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ˗eu deuˬ aˬ jeˬ˗euˬ guiˬ lahˬ za˗eu nga?
5. Iˇsaˬyaˇ 65:13-ahˇ saˇ jaˇ dzaˬ taˬ˗euˬ loꞈ˗ehˇ aˬ dui yaw jeˬ ma jeˬ˗euˬ Baˬlaˬdiˇsuˆ˗ahˇ aˬ jeˬ za˗eu nga?
5 Jawˇ saˇ doˆ˗awˇ shiˬ keuˇ ni gʼeh. Iˇsaˬyaˇ yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ˗eu deuˬ hawˇ˗eu teu gaˇ maˬ jawˇ˗eu deuˬ aˇ naˆ ni beu gaˇ˗eu lehˇ ehˇ mawˇ taˬ yaꞈ˗euˬ meh. (Iˇsaˬyaˇ 65:13-ahˇ gui.) Yeˬhawˇbaˬ yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ˗eu deuˬ˗ahˇ aˬ yawꞈ nehˬ˗ehˇ gʼoeˇ nya ni caw ba nehˬ˗eu gʼaˇ duˬ loˬ˗eu yawˬ jeˬ na luꞈ lehˬ hmˬ nehˬ taˬ˗euˬ meh. Yeˬhawˇbaˬ aˬ dui˗ahˇ muiˬ˗eu shawˇ˗eu yaw sahˇ hawˇ˗eu Jaˇliꞈ uˬ taꞈ, Jaˇliꞈ˗ahˇ dawˬ pehˬ taˬ˗eu paˇ dmˬ hawˇ˗eu biˬdiˬoˬ deuˬ lehˬ hmˬ nehˬ taˬ˗euˬ meh. Teu miˇ neh aˬ dui ‘maˬ dzaˬ maˬ dawˇ jiˇ coeˇ ni jaˆ˗awˇ laˬ kʼaˬ cehˇ luꞈ’˗eu ma. (Pah mehˬ˗eu 22:17 nehˬ˗ehˇ sheu cehˆ.) Yaw jeˬ ma jeˬ˗euˬ Baˬlaˬdiˇsuˆ˗ahˇ maˬ jawˇ˗eu deuˬ naˇ, Yeˬhawˇbaˬ˗ahˇ maˬ siˬ nya˗eu miˇ neh aˬ yawꞈ maꞈ ‘ya mehꞈ ya shuꞈ˗awˇ noeˬ shaˬ˗awˇ daˬ ya ga’˗eu meh.—Aˬmoˆ 8:11.
6. Yeˬhawˇbaˬ neh aˬ dui˗ahˇ lehˬ hmˬ nehˬ taˬ˗euˬ jeˬ nehˬ˗ehˇ taꞈ leˇ˗awˇ, Yawˇlaˆ 2:21-24 aˬ joˆ˗ehˇ ngehˬ keuˆ taˬ˗euˬ nga? Teu naˇ aˬ dui˗ahˇ aˬ joˆ˗ehˇ gaˇ dahˇ tsoeˬ˗eu nga?
6 Yawˇlaˆ˗euˬ maˬ keuˆ laˇ miˇ ehˇ taˬ˗euˬ dawˬ˗ahˇ aˬ yawꞈ Yeˬhawˇbaˬ cehˇ hawˇ˗eu aˬ gaꞈ dzaˇ uiˇ uˬ taꞈ, saˬ loˬ tsiˇ lawˬ muˇ biꞈ meh lehˇ ngehˬ keuˆ taˬ˗euˬ meh. Teu naˇ Yeˬhawˇbaˬ aˬ yawꞈ˗euˬ tsawˇ haˬ deuˬ loˬ˗eu jeˬ˗ahˇ maˬ ehˇ, nui jah paw˗euˬ dzaˇ maˬ ehˇ, tiˬ byah tiˬ loꞈ biꞈ˗eu lehˇ ehˇ mawꞈ˗eu jeˬ pyeuꞈ meh. (Yawˇlaˆ 2:21-24) Yeˬhawˇbaˬ aˬ dui˗ahˇ Jaˇliꞈ uˬ taꞈ, Jaˇliꞈ˗ahˇ dawˬ pehˬ taˬ˗eu paˇ dmˬ hawˇ˗eu biˬdiˬoˬ, jw.org gʼoeˇsaiˇ, aˇ muˇ˗euˬ mehˬ bawˬ hawˇ˗eu huiˬ˗eu mehˬ bawˬ deuˬ lehˬ hmˬ nehˬ taˬ˗euˬ meh. Aˬ dui heu deuˬ˗ahˇ neh yawˬ nah na luꞈ gaˇ dahˇ tsoeˬ˗eu jeˬ za luꞈ˗eu miˇ neh, jawˇ saˇ doˆ˗awˇ shiˬ keuˇ ni gʼeh˗eu ma.
7. Aˬ dui˗ahˇ ‘laˬ kʼaˬ bi cehˇ’ laˇ˗eu jeˬ naˇ, aˬ jeˬ nga? (Iˇsaˬyaˇ 65:14)
7 Laˬ kʼaˬ cehˇ˗awˇ nui kʼahˇ shiˇ˗eu. Miˬyehˇ˗euˬ tsawˇ haˬ deuˬ Miˬyehˇ˗ahˇ guiˬ lahˬ huiˬ˗eu miˇ neh, ‘laˬ kʼaˬ cehˇ˗awˇ caˇ luꞈ’˗eu meh. (Iˇsaˬyaˇ 65:14-ahˇ gui.) Aˬ dui˗ahˇ gʼaˬ bi ahˇ laˇ˗eu yaw tsaˬ yaw dawˇ jeˬ hawˇ˗eu Jaˇliꞈ laꞈ kʼoeˇ˗euˬ saˇ jaˇ dawˬ deuˬ uˬ taꞈ, Yeˬsuˇ˗euˬ ka kʼoꞈ˗eu jeˬ baˬ da neh za˗euˬ noeˬ tmˬ˗eu jeˬ, aˬ dui˗ahˇ ‘laˬ kʼaˬ bi cehˇ’ laˇ˗eu meh. Gaˇ kawˆ heu deuˬ nehˬ˗ehˇ taꞈ leˇ˗awˇ aˬ dui mehˇ nmˇ deuˬ nehˬ˗ehˇ ya ja cawˬ ngeh laˬ kʼaˬ cehˇ dui dui˗eu ma.—Ja ceuˬ 34:8; 133:1-3.
8. Yaw jeˬ ma jeˬ˗euˬ Baˬlaˬdiˇsuˆ laꞈ kʼoeˇ jaˆ˗eu aˇ yeˇ huiˬ˗eu nyiˬ jeˬ naˇ, aˬ jeˬ nga?
8 Yaw jeˬ ma jeˬ˗euˬ Baˬlaˬdiˇsuˆ laꞈ kʼoeˇ neh aˇ yeˇ huiˬ˗eu nyiˬ jeˬ naˇ, Yeˬhawˇbaˬ˗euˬ tsawˇ haˬ deuˬ˗euˬ nui gaˬ hawˇ˗eu mehˬ bawˬ gm˗eu jeˬ heu pyeuꞈ meh. Mehˬ bawˬ gm˗eu jeˬ heu naˇ, miˇ shuiꞈ˗ahˇ aˬ dui˗euˬ dehꞈ ziˇ aˬ joˆ˗ehˇ gʼeh˗eu lehˇ bi noeˬ mawˇ laˇ˗eu meh. Miˇ shuiꞈ˗ahˇ Yeˬhawˇbaˬ˗euˬ gaˇ mˇ zaˬ deuˬ nymˬ˗mˇ naˆ maˬ tseˇ mehˬ bawˬ gm˗awˇ, tiˬ gʼaˬ tiˇ gʼaˬ gaˬ˗eu meh. (Gawˇlawˇsehˇ 3:14) Mehˇ nmˇ zaˬ miˬ aˬ buˇ tiˬ gʼaˬ Yeˬhawˇbaˬ˗euˬ Saˇ kiˇ deuˬ nehˬ˗ehˇ ya mawˇ dahˬ beh˗euˬ poˆ nehˬ˗ehˇ taꞈ leˇ˗awˇ heu loꞈ˗ehˇ ehˇ˗eu meh. “Yaw beh ngaˬ˗ahˇ laˬ kʼaˬ cehˇ˗eu jeˬ heu naˇ, aˬ joˆ˗ehˇ gʼeh˗eu lehˇ maˬ siˬ nya nya. Aˬ jeˬ miˇ neh ehˇ naˇ, ngaˬ˗euˬ nymˇ jiˇ laꞈ kʼoeˇ kʼawꞈ laˬ kʼaˬ cehˇ˗eu jeˬ maˬ jaˆ˗eu miˇ neh. Ehˇ kʼawꞈ ngaˇ Yeˬhawˇbaˬ˗euˬ Saˇ kiˇ deuˬ nui gaˬ mˇ mawˇ gaˇ ya mawˇ ngeh, maˇ maˇ ni gʼeh˗eu nui gaˬ heu naˇ aˬ joˆ˗ehˇ gʼeh˗eu lehˇ ya mawˇ dahˬ beh˗euˬ ma.” Laˬ kʼaˬ cehˇ mawꞈ˗awˇ nui kʼahˇ shiˇ˗eu jeˬ za mawꞈ˗eu aˬ suˇ gʼaˬ maˬ kaˬ yaw jeˬ ma jeˬ˗euˬ Baˬlaˬdiˇsuˆ˗ahˇ ya jawˇ laˇ˗eu meh. Yeˬhawˇbaˬ˗euˬ Saˇ kiˇ deuˬ˗ahˇ miˇ tsaˬ zaˬ deuˬ aˬ jeˬ lehˇ noeˬ kʼawꞈ, aˬ yawꞈ maꞈ Yeˬhawˇbaˬ hawˇ˗eu nui jah taꞈ˗eu mehˇ nmˇ deuˬ˗euˬ mehˬ shi muiˬ˗eu tsawˇ myahˇ jaˆ luꞈ˗eu meh.—Iˇsaˬyaˇ 65:15.
9. Aˬ dui dehꞈ ziˇ laꞈ kʼoeˇ ya puˬ˗eu shaˬ zahˬ nehˬ˗ehˇ taꞈ leˇ˗awˇ Iˇsaˬyaˇ 65:16, 17 saˇ jaˇ aˬ joˆ˗ehˇ dzaˬ taˬ˗euˬ nga?
9 Lawˬ ka ni gʼeh˗awˇ nui ma saˇ. Iˇsaˬyaˇ 65:14-ahˇ yaw jeˬ ma jeˬ˗euˬ Baˬlaˬdiˇsuˆ laꞈ nyiˇ jawˇ˗eu deuˬ “nui ma tsawˬ paˆ˗awˇ ya ngoeˇ tehꞈ˗a” lehˇ ehˇ taˬ˗euˬ meh. Miˬyehˇ˗euˬ tsawˇ haˬ deuˬ˗ahˇ shaˬ zahˬ bi mˇ leˇ˗eu jeˬ˗ahˇ tawˇ neh? Jaˇliꞈ laꞈ kʼoeˇ aˇ saˬ saˬ leˇ ngeh “dzeuˇ laˇ ngeh kʼaˇ ya tahˬ puˬ˗euˬ shaˬ zahˬ dawˬ tawˆ, dzeuˇ˗iˇ jiˇ˗awˇ ya ngehˇ byoˆ jiˇ tehꞈ˗a” lehˇ ehˇ taˬ˗euˬ meh. (Iˇsaˬyaˇ 65:16, 17-ahˇ gui.) Yeˬhawˇbaˬ aˬ dui˗euˬ shaˬ zahˬ dawˬ tawˆ luꞈ˗ahˇ laˆ byoˆ jiˇ˗awˇ aˬ dui shaˬ zahˬ teu deuˬ˗ahˇ maˬ paˇ noeˬ mawˇ meh.
10. Nawˬ˗ahˇ mehˇ nmˇ deuˬ nehˬ˗ehˇ tiˬ kawˆ loꞈ˗ehˇ ya jawˇ˗eu heu naˇ, guiˬ lahˬ pyeuꞈ nga lehˇ aˬ jeˬ miˇ neh noeˬ nya? (Aˇ baˇ˗ahˇ jiˇ haw.)
10 Nymˬ˗mˇ neh aˬ dui mehˇ nmˇ deuˬ nehˬ˗ehˇ mehˬ bawˬ˗ahˇ yaw muiˬ˗ehˇ iˇ˗eu heu naˇ, nui ma lawˬ ka ni bi gʼeh laˇ˗awˇ Saˬdaˬ˗euˬ miˇ tsaˬ haiˬ dui doeˇ dui dui kʼawꞈ maˬ noeˬ shaˬ maˬ kʼahˬ lahˇ ni nui ma bi saˇ˗eu meh. Aˬ dui Miˬyehˇ˗euˬ muiˬ˗eu shawˇ˗eu yaw sahˇ˗ahˇ neh oe˗euˬ jeˬ pyeuꞈ˗eu gʼoeˇ˗eu gaˬ˗eu jeˬ, laˬ kʼaˬ cehˇ˗eu jeˬ, nui saˇ oꞈ˗eu jeˬ, gʼawˬ shaˬ gaˬ˗eu jeˬ, nui ma nahˬ yu ni gʼeh˗eu jeˬ, heu deuˬ mˇ mawˇ naˇ mehˇ nmˇ deuˬ˗ahˇ lawˬ ka ni nui ma saˇ leˇ˗eu meh. (Gaˬlaˬtiˆ 5:22, 23) Miˬyehˇ˗euˬ aˇ maꞈ aˇ muˇ laꞈ kʼoeˇ ya jawˇ˗eu heu naˇ, maˬ ehˇ jiˇ coeˇ ni muiˬ˗eu jeˬ pyeuꞈ meh. Aˬ dui yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ naˇ, “mˬ yaw shuiꞈ miˇ yaw shuiꞈ” nehˬ˗ehˇ taꞈ˗eu Miˬyehˇ˗euˬ saˇ jaˇ dawˬ dawˬ tawˆ luꞈ byah laˇ jiˇ gaˇ ya mawˇ˗eu meh.
Gaˬ˗eu mehˇ nmˇ deuˬ nehˬ˗ehˇ yaw jeˬ ma jeˬ˗euˬ Baˬlaˬdiˇsuˆ˗ahˇ ya jawˇ gaˇ laˬ kʼaˬ cehˇ (Aˇ deuˆ 10-ahˇ haw) c
11. Iˇsaˬyaˇ 65:18, 19-ahˇ ehˇ taˬ˗euˬ loꞈ˗ehˇ Yeˬhawˇbaˬ neh beh˗euˬ yaw jeˬ ma jeˬ˗euˬ Baˬlaˬdiˇsuˆ heu naˇ, aˬ dui˗ahˇ aˬ joˆ˗ehˇ bi gʼeh laˇ˗eu nga?
11 Nui ma cehˇ tahˬ tahˬ˗awˇ guiˬ lahˬ huiˬ. Aˬ dui yaw jeˬ ma jeˬ˗euˬ Baˬlaˬdiˇsuˆ˗ahˇ ya jawˇ˗eu miˇ neh, aˬ jeˬ miˇ neh “laˬ kʼaˬ cehˇ” paˬ˗ehˇ gʼeh˗eu gaˇ kawˆ˗ahˇ Iˇsaˬyaˇ paˇ ehˇ taˬ˗euˬ meh. Yaw jeˬ ma jeˬ˗euˬ Baˬlaˬdiˇsuˆ heu naˇ, Yeˬhawˇbaˬ neh beh˗euˬ jeˬ pyeuꞈ meh. (Iˇsaˬyaˇ 65:18, 19-ahˇ gui.) Teu miˇ neh Yeˬhawˇbaˬ aˬ dui˗ahˇ zmˬ˗awˇ, tsawˇ haˬ deuˬ˗ahˇ Miˬyehˇ nehˬ˗ehˇ taꞈ leˇ˗eu yaw tsaˬ yaw dawˇ jeˬ˗ahˇ maˬ mehˬ˗eu miˇ tsaˬ heu siˬ˗euˬ aˇ maꞈ aˇ muˇ deuˬ˗ahˇ neh sheuˬ doˆ˗awˇ, muiˬ dui dui˗eu yaw jeˬ ma jeˬ˗euˬ Baˬlaˬdiˇsuˆ˗ahˇ sheuˬ ahˇ˗eu meh. Aˬ dui yaw tsaˬ yaw dawˇ laꞈ kʼoeˇ ya jawˇ˗eu miˇ neh, guiˬ lahˬ gʼawˬ mya ni za˗euˬ ma. Aˬ dui gaˇ kawˆ heu˗ahˇ aˬ cawˬ deuˬ˗ahˇ ya dzawˇ gaˬ nehˬ gaˇ laˬ kʼaˬ cehˇ˗eu ma.—Yeˬlaˬmiˇ 31:12.
12. Iˇsaˬyaˇ 65:20-24 laꞈ kʼoeˇ˗euˬ saˇ jaˇ dawˬ nawˬ˗ahˇ aˬ joˆ˗ehˇ bi gʼeh laˇ˗eu nya? Aˬ jeˬ miˇ neh?
12 Yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ˗eu aˬ dui, noeˬ tmˬ˗eu jeˬ jaˆ˗eu miˇ neh guiˬ lahˬ huiˬ˗awˇ, laˬ kʼaˬ cehˇ˗eu ma. Miˇ shuiꞈ˗ahˇ aˬ dui aˬ jeˬ jeˇ ya mawˇ˗awˇ, aˬ jeˬ jeˇ ya mˇ˗eu gaˇ kawˆ˗ahˇ noeˬ mawˇ haw sheˇ. Jaˇliꞈ˗ahˇ “zaˬ nahˬ aˬ coeˇ dawˇ zaˬ deuˬ shiˇ˗eu maˬ baw˗ehˇ, tsawˇ haˬ dawˬ tawˆ ziˇ ya dehꞈ jiˇ tehꞈ˗a.” Kʼoeˇ naˇ aˬ dui “yawˬ ha neh tsoˆ˗euˬ nymˇ laꞈ kʼoeˇ. . . . ya jawˇ˗awˇ, yawˬ ha neh mˇ˗euˬ aˬ gaꞈ yaˇ kmˇ aˇ siˬ ya dzaˬ tehꞈ˗a.” Yawˬ ha neh “kʼaˇ mˇ˗euˬ jeˬ guiˬ lahˬ baw”˗eu meh lehˇ saˇ jaˇ dzaˬ taˬ˗euˬ meh. Yeˬhawˇbaˬ aˬ dui˗ahˇ guˆ˗eu gaˆ˗eu jeˬ maˬ jaˆ ni nui kʼahˇ shiˇ laˇ paˬ˗ehˇ gʼeh˗eu dehꞈ ziˇ biꞈ ma lehˇ saˇ jaˇ dzaˬ taˬ˗euˬ meh. Aˬ dui “guiˬ lahˬ shaˇ gʼaˬ˗euˬ maˬ dah ni” Yeˬhawˇbaˬ aˬ dui aˬ yawꞈ gʼaˬ yawꞈ loˬ˗eu jeˬ˗ahˇ siˬ nya˗awˇ, “dawˬ tawˆ luꞈ˗ahˇ kʼaˇ loˬ˗eu jeˬ biꞈ nehˬ˗eu meh.”—Iˇsaˬyaˇ 65:20-24; Ja ceuˬ 145:16.
13. Iˇsaˬyaˇ 65:25-ahˇ Yeˬhawˇbaˬ˗euˬ gaˇ mˇ zaˬ deuˬ˗euˬ dehꞈ poˆ dehꞈ paˇ˗eu jeˬ˗ahˇ aˬ joˆ˗ehˇ ngehˬ keuˆ taˬ˗euˬ nga?
13 Guˆ˗eu gaˆ˗eu jeˬ maˬ jaˆ ni nui saˇ oꞈ. Jeˬ zaˬ loꞈ˗ehˇ gʼeh˗eu nui ma ahˇ˗eu deuˬ kʼawꞈ, Miˬyehˇ˗euˬ muiˬ˗eu shawˇ˗eu yaw sahˇ baˬ da neh aˬ yawꞈ maꞈ˗euˬ dehꞈ ziˇ dehꞈ poˆ dehꞈ paˇ nya˗euˬ meh. (Iˇsaˬyaˇ 65:25-ahˇ gui.) Aˬ yawꞈ maꞈ maˬ muiˬ˗eu seuˆ dzeuꞈ aˇ gʼehˇ deuˬ˗ahˇ byehˇ dzeh˗euˬ meh. (Loˇmaˆ 12:2; Eˇpeˇsu 4:22-24) Miˬyehˇ˗euˬ tsawˇ haˬ deuˬ maˬ byah kuꞈ˗eu miˇ neh yaw lehˬ nmˇ mˇ luꞈ meh siˬ. Yeˬhawˇbaˬ aˬ yawꞈ neh kuˇ taˬ˗euˬ “tsawˇ haˬ zaˬ dawˬ tawˆ luꞈ”˗ahˇ nui gaˬ hawˇ˗eu mehˬ bawˬ gm˗eu jeˬ neh gahˇ dzahˬ taˬ˗euˬ miˇ neh, aˬ dui guˆ˗eu gaˆ˗eu jeˬ maˬ jaˆ ni nui saˇ oꞈ˗eu jeˬ jaˆ˗eu ma. (Tiˇtuˆ 2:11) Heu naˇ zahˬ leˇ paˬ˗ehˇ gʼeh˗eu jeˬ pyeuꞈ˗awˇ, huiˬ dui mahˇ dui dui˗eu Miˬyehˇ tiˬ gʼaˬ tehꞈ˗ehˇ jahˇ nya˗eu jeˬ pyeuꞈ meh.
14. Iˇsaˬyaˇ 65:25 mehˇ nmˇ zaˬ yo aˬ li tiˬ gʼaˬ˗euˬ dehꞈ ziˇ nehˬ˗ehˇ aˬ joˆ˗ehˇ tsaˬ leˇ˗eu nga?
14 Tsawˇ haˬ tiˬ gʼaˬ maˇ diˇ dehꞈ poˆ dehꞈ paˇ nya ngaˇ laˬ? Aˬ dui puˬ haw mawˇ haw laꞈ˗euˬ tiˬ kawˆ˗ahˇ haw ma. 20 kʼoꞈ ehˇ gʼaˬ ni kʼawˆ˗eu aˬ li zaˬ guˬ tiˬ gʼaˬ tawˬ˗ahˇ uˇ leˇ doˆ le lehˇ yaw myaˬ poˆ gʼeh haw˗euˬ meh. Aˬ yawꞈ dehꞈ bahˬ dehꞈ muˇ˗awˇ aˬ cawˬ nehˬ˗ehˇ diˬ˗eu ceh˗eu meh. Aˬ yawꞈ lawˬ liˬ kʼoeˬ˗eu miˇ neh maˬ ehˇ, tahˇ joe deh˗eu miˇ neh maˬ ehˇ, haiˬ˗eu nui jeˬ mˇ˗eu miˇ neh maˬ ehˇ, tawˬ˗ahˇ bi nyehꞈ uˇ˗euˬ meh. Aˬ yawꞈ aˬ suˇ gʼaˬ nehˬ˗ehˇ aˬ geu ngeh kʼawꞈ ceh nya˗eu meh. Aˬ yawꞈ Jaˇliꞈ laꞈ kʼoeˇ˗euˬ yaw tsaˬ yaw dawˇ˗ahˇ ya gaˬ dahˬ beh˗awˇ, Yeˬhawˇbaˬ˗euˬ Saˇ kiˇ deuˬ˗euˬ mehˬ bawˬ˗ahˇ ya oe ngeh, aˬ yawꞈ dehꞈ ziˇ˗euˬ dawˬ tsuiꞈ˗ahˇ poˆ mawˇ maˬ lehˇ jah ziꞈ˗eu meh. Teu naˇ yaw jeˬ ma jeˬ˗euˬ Baˬlaˬdiˇsuˆ laꞈ kʼoeˇ Yeˬhawˇbaˬ˗ahˇ uˬ duˬ ya tahˬ˗eu heu pyeuꞈ meh. Aˬ yawꞈ iˇ cuꞈ shawˇ˗awˇ Yeˬhawˇbaˬ˗euˬ Saˇ kiˇ tiˬ gʼaˬ pyeuꞈ laˇ gʼaˬ ngeh, aˬ yawꞈ tiˬ kʼehˬ maˬ kaˬ Iˇsaˬyaˇ 65:25 heu deuˆ naˇ, aˬ yawꞈ˗euˬ dehꞈ ziˇ nehˬ˗ehˇ tsaˬ leˇ˗eu lehˇ miˇ˗a lehˇ noeˬ˗eu meh. Aˬ yawꞈ aˇ laˬ jaˬ shiˇ loꞈ˗ehˇ guˆ dui dui laˇ paˬ˗ehˇ gʼeh˗eu haiˬ dui dui˗eu tiˬ gʼaˬ pyeuꞈ gaˇ neh yawˇ zaˬ loꞈ˗ehˇ yehˇ ju ni pyeuꞈ laˇ˗awˇ, nui saˇ oꞈ˗eu jeˬ˗ahˇ gaˬ laˇ˗euˬ meh.
15. Aˬ dui tsawˇ haˬ deuˬ˗ahˇ aˬ jeˬ miˇ neh yaw jeˬ ma jeˬ˗euˬ Baˬlaˬdiˇsuˆ laꞈ kʼoeˇ bi jawˇ laˇ mawꞈ˗eu nga? Aˬ dui teu loꞈ˗ehˇ jahˇ nya˗eu gʼaˇ duˬ aˬ jeˬ ya jahˇ˗eu nga?
15 Iˇsaˬyaˇ yaw huiˬ 65 laꞈ kʼoeˇ˗euˬ dawˬ˗ahˇ haw ngeh, ngehˬ˗eu gʼaˬ naˇ Yeˬhawˇbaˬ pyeuꞈ˗eu lehˇ siˬ laˇ˗eu meh. Aˬ yawꞈ˗euˬ dawˬ naˇ aˬ myah luꞈ tsaˬ˗eu meh. (Iˇsaˬyaˇ 55:10, 11) Nymˬ˗mˇ iˬ nah yaw jeˬ ma jeˬ˗euˬ Baˬlaˬdiˇsuˆ maˇ diˇ pyeuꞈ laˇ shaw˗euˬ meh. Yeˬhawˇbaˬ aˬ cawˬ˗ahˇ maˬ duˇ˗eu aˬ yawꞈ˗ahˇ uˬ duˬ tahˬ˗eu deuˬ˗euˬ nymˇ jiˇ beh˗euˬ meh. Aˬ dui yaw haiˬ yaw doeˇ jeˬ tehꞈ˗ehˇ byah jiˇ taˬ˗euˬ miˇ tsaˬ heu siˬ˗ahˇ ya jawˇ luꞈ kʼawꞈ, nymˇ jiˇ heu hmˬ laꞈ kʼoeˇ jawˇ naˇ nui saˇ oꞈ˗awˇ shaˬ zahˬ guˆ gaˆ maˬ jaˆ ni lmˇ boˬ ni gʼeh˗eu meh. (Ja ceuˬ 72:7) Teu miˇ neh aˬ dui tsawˇ haˬ deuˬ˗ahˇ kʼaˇ gʼeh nya gaˇ neh nymˇ jiˇ heu jiˇ laꞈ kʼoeˇ jawˇ laˇ nya ni caw ba nehˬ mawꞈ˗eu ma. Aˬ dui teu loꞈ˗ehˇ jahˇ nya˗eu gʼaˇ duˬ, zaˬ lahˇ pyeuꞈ laˇ ni mˇ˗eu gaˇ heu˗ahˇ ya leh jeh dui dui˗eu meh.—Maꞈtehˬ 28:19, 20.
Tsawˇ haˬ deuˬ˗ahˇ yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ laˇ nya ni aˬ joˆ˗ehˇ caw ba nehˬ nya˗eu nga?
16. Tsawˇ haˬ deuˬ yaw jeˬ ma jeˬ˗euˬ Baˬlaˬdiˇsuˆ˗ahˇ aˬ jeˬ baˬ da neh jawˇ laˇ mawꞈ˗eu nga?
16 Tsawˇ haˬ deuˬ yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ laˇ mawꞈ ni aˬ dui yawˬ gʼaˬ na luꞈ tiˬ jeˬ jeˬ jahˇ nya˗eu meh. Teu naˇ Yeˬhawˇbaˬ˗ahˇ dzaw geuꞈ˗eu jeˬ heu pyeuꞈ meh. Yeˬhawˇbaˬ tsawˇ haˬ deuˬ˗ahˇ aˬ yawꞈ˗euˬ aˇ maꞈ aˇ muˇ˗ahˇ ahˇ laˇ ni maˬ ka tiˇ˗a. Ehˇ kʼawꞈ Miˬyehˇ aˬ yawꞈ maꞈ˗ahˇ nahˬ yu ni aˬ yawꞈ jawˇ gaˇ “sheuˬ laꞈ”˗eu meh. (Yoˇhaˬ 6:44; Yeˬlaˬmiˇ 31:3) Nui ma yaw sui yaw dawˇ deuˬ Yeˬhawˇbaˬ˗euˬ nui gaˬ gaˇ kawˆ hawˇ˗eu muiˬ˗eu seuˆ dzeuꞈ aˇ gʼehˇ deuˬ˗euˬ gaˇ kawˆ˗ahˇ ya dzaw ngeh, aˬ yawꞈ maꞈ Yeˬhawˇbaˬ jawˇ gaˇ yawˬ haˇ yawˬ ha laˇ mawꞈ laˇ˗eu meh. Toˆ˗ehˇ naˇ aˬ dui tsawˇ haˬ deuˬ˗ahˇ yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ laˇ nya ni aˬ joˆ˗ehˇ caw ba nehˬ nya˗eu nga?
17. Aˬ dui aˬ cawˬ deuˬ˗ahˇ yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ laˇ nya ni aˬ joˆ˗ehˇ caw ba nehˬ nya˗eu nga?
17 Aˬ dui aˬ cawˬ˗ahˇ yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ laˇ nya ni caw ba nehˬ nya˗eu tiˬ jeˬ naˇ, mehˇ nmˇ deuˬ˗ahˇ nui gaˬ hawˇ˗eu gʼawˬ shaˬ gaˬ˗eu jeˬ mˇ mawˇ nehˬ˗eu heu meh. Daˬ yah deuˬ mehˬ bawˬ˗ahˇ oe ngeh aˬ dui aˬ yawꞈ maꞈ˗ahˇ gaˇ hu Gawˇliˬtu meuˬ˗ahˇ mehˬ bawˬ˗ahˇ oe˗euˬ daˬ yah deuˬ˗ahˇ gʼehˇ leˇ˗euˬ loꞈ˗ehˇ bi gʼeh leˇ mawꞈ˗eu ma. Gaˇ hu ba mehˬ bawˬ˗ahˇ oe˗euˬ heu deuˬ “naw maꞈ nehˬ˗ehˇ Miˬyehˇ maˇ maˇ ni jawˇ˗eu ngaˇ” lehˇ ehˇ˗eu meh. (1 Gawˇliˬtu 14:24, 25; Zaˬkaˬliˇ 8:23) Teu miˇ neh aˬ dui “tsaˬ leˇ dzoeˇ leˇ˗eu jeˬ bi jaˆ˗awˬ” lehˇ ehˇ˗eu nui noeˬ nui duˇ˗ahˇ ya mˇ caw˗eu meh.—1 Teˇsaˬloˇni 5:13.
18. Tsawˇ haˬ deuˬ aˬ dui˗euˬ aˇ maꞈ aˇ muˇ˗ahˇ aˬ jeˬ baˬ da neh ahˇ laˇ mawꞈ laˇ˗eu nga?
18 Aˬ dui mehˇ nmˇ deuˬ˗ahˇ leh jeh˗awˇ Yeˬhawˇbaˬ haw˗eu loꞈ˗ehˇ haw paˬ˗ehˇ gʼeh˗eu meh. Aˬ dui teu loꞈ˗ehˇ jahˇ nya˗eu gʼaˇ duˬ, mehˇ nmˇ deuˬ˗euˬ maˬ muiˬ˗eu gʼaˬ baˬ˗eu jeˬ˗ahˇ maˬ haw ni yaw muiˬ jeˬ˗ahˇ ya haw˗eu meh. Maˬ muiˬ˗eu gʼaˬ baˬ˗eu teu jiˇ tiˬ nah byoˆ iˇ˗eu laꞈ kʼoeˇ tehꞈ meh. Aˬ dui mehˇ nmˇ deuˬ nehˬ˗ehˇ gaˇ kawˆ doˆ laˇ ngeh, aˬ dui nui gaˬ keuˆ˗awˇ “nui nahˬ nui yu ahˇ˗eu laꞈ kʼoeˇ tiˬ gʼaˬ tiˇ gʼaˬ gʼawˬ shaˬ gaˬ˗awˇ iˬ baˇ pyehˬ”˗eu ma. (Eˇpeˇsu 4:32) Aˬ dui teu loꞈ˗ehˇ jahˇ naˇ, teu loꞈ˗ehˇ mˇ nehˬ laꞈ˗eu jeˬ˗ehˇ geuꞈ mawꞈ˗eu deuˬ jiˇ yaw jeˬ ma jeˬ˗euˬ Baˬlaˬdiˇsuˆ˗ahˇ ahˇ laˇ mawꞈ˗eu meh. b
Yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ daˆ leꞈ
19. (a) “ Aˬ yawꞈ maꞈ doˆ˗iˇ˗awˇ ahˇ kʼoꞈ laˇ” lehˇ ehˇ˗eu oeˬ coeˇ oeˬ bawˬ˗ahˇ ehˇ taˬ˗euˬ loꞈ˗ehˇ, yaw jeˬ ma jeˬ˗euˬ Baˬlaˬdiˇsuˆ˗ahˇ gʼoꞈ kʼoꞈ laˇ˗euˬ tiˬ gʼaˬ na aˬ jeˬ lehˇ ehˇ˗eu nga? (b) Aˬ dui aˬ jeˬ mˇ˗eu gʼaˇ duˬ leh jeh daˆ leꞈ paˬ˗ehˇ gʼeh˗eu nga? (Aˇ baˇ˗ahˇ jiˇ haw.)
19 Aˬ dui yaw jeˬ ma jeˬ˗euˬ Baˬlaˬdiˇsuˆ˗ahˇ aˇ poeˬ taˬ baw dui dui˗eu ma. Baˬlaˬdiˇsuˆ heu hmˬ naˇ yaw beh naˆ maˬ tseˇ muiˬ dzehˬ laˇ˗awˇ, tsawˇ haˬ deuˬ jiˇ yaw beh naˆ maˬ tseˇ jawˇ laˇ luꞈ˗eu meh. Aˬ dui yawˬ gʼaˬ na luꞈ Yeˬhawˇbaˬ neh beh nehˬ˗euˬ Baˬlaˬdiˇsuˆ˗ahˇ aˇ poeˬ taˬ baw luꞈ˗uˇ. Shiˬ keuˇ ni, laˬ kʼaˬ cehˇ taˆ ni, nui ma saˇ lehˆ ni, guˆ˗eu gaˆ˗eu jeˬ maˬ jaˆ ni, lmˇ boˬ ni jawˇ mawꞈ˗eu aˬ suˇ gʼaˬ maˬ kaˬ yaw jeˬ ma jeˬ˗euˬ Baˬlaˬdiˇsuˆ heu laꞈ kʼoeˇ ya jawˇ laˇ˗awˇ, maˬ doˆ˗iˇ ni ya jawˇ daˆ leꞈ˗eu meh. Ehˇ kʼawꞈ aˬ dui ya yahˇ meh. Aˬ jeˬ miˇ neh ehˇ naˇ, Saˬdaˬ aˬ dui˗ahˇ yaw jeˬ ma jeˬ˗euˬ Baˬlaˬdiˇsuˆ heu˗ahˇ neh bi doˆ˗iˇ˗eu gʼaˇ duˬ, maˬ tsehˆ leˇ ni leh jeh luꞈ˗eu meh. (1 Beˬtuˆluˆ 5:8; Pah mehˬ˗eu 12:9) Aˬ dui aˬ yawꞈ neh maˬ ya bi gʼaˬ leˇ˗a. Teu miˇ neh aˬ dui yaw jeˬ ma jeˬ˗euˬ Baˬlaˬdiˇsuˆ heu muiˬ ni shawˇ ni nui saˇ jaˆ ni kʼaˇ gʼeh nya gaˇ neh haw piˇ daˆ leꞈ luꞈ˗uˇ.
Yaw jeˬ ma jeˬ˗euˬ Baˬlaˬdiˇsuˆ˗ahˇ aˬ myah luꞈ jawˇ˗eu deuˬ naˇ, miˇ shuiꞈ˗ahˇ maˇ maˇ ni gʼeh˗eu Baˬlaˬdiˇsuˆ˗ahˇ ya jawˇ (Aˇ deuˆ 19-ahˇ haw)
Nawˇ dawˬ kʼoꞈ aˬ joˆ˗ehˇ biꞈ le?
-
Yaw jeˬ ma jeˬ˗euˬ Baˬlaˬdiˇsuˆ heu naˇ, aˬ jeˬ nga?
-
Aˬ dui yaw jeˬ ma jeˬ˗euˬ Baˬlaˬdiˇsuˆ laꞈ kʼoeˇ aˬ jeˬ jeˇ˗euˬ guiˬ lahˬ˗ahˇ laˬ kʼaˬ cehˇ˗eu nga?
-
Aˬ dui aˬ cawˬ deuˬ˗ahˇ yaw jeˬ ma jeˬ˗euˬ Baˬlaˬdiˇsuˆ laꞈ kʼoeˇ ahˇ laˇ nya ni aˬ joˆ˗ehˇ caw ba nehˬ nya˗eu nga?
Dawˬ caˇ 144 Laꞈ sawˬ˗ahˇ haw tsoˆ taˬ
a Dzawˇ lahˬ: “Yaw jeˬ ma jeˬ˗euˬ Baˬlaˬdiˇsuˆ” heu naˇ, Yeˬhawˇbaˬ˗ahˇ uˬ duˬ ya tahˬ˗eu miˇ neh nui saˇ oꞈ˗eu jeˬ tehꞈ˗ehˇ jaˆ˗eu jawˇ duˬ˗ahˇ ehˇ mawꞈ˗eu meh. Aˬ dui yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ luꞈ ngeh, Yeˬhawˇbaˬ hawˇ˗eu mehˇ nmˇ deuˬ nehˬ˗ehˇ ya gʼoeˇ ya gaˬ gaˇ laˬ kʼaˬ cehˇ˗eu meh.
b jw.org gʼoeˇsaiˇ laꞈ kʼoeˇ Nymˬ˗mˇ aˬ yawꞈ maꞈ aˬ joˆ˗ehˇ nga? Aˬleˇnaˬ Ziˇniˬkoˬbaˬ: Ngaˬ˗euˬ yuꞈ maˆ aˬ joˆ˗ehˇ byah laˇ˗euˬ nga lehˇ ehˇ˗eu biˬdiˬoˬ˗ahˇ haw˗awˇ, Aˬleˇnaˬ yaw jeˬ ma jeˬ˗euˬ Baˬlaˬdiˇsuˆ˗ahˇ jawˇ ngeh guiˬ lahˬ aˬ joˇ joˆ˗ehˇ za˗euˬ nga lehˇ haw.
c Aˇ baˇ˗euˬ gaˇ kawˆ.: Mehˇ nmˇ gʼawˬ mya gʼaˬ Bawˬdzaˬnymˇ laꞈ kʼoeˇ mehˇ nmˇ deuˬ nehˬ˗ehˇ ya ngehˬ cawˬ gaˇ laˬ kʼaˬ cehˇ luꞈ. Ehˇ kʼawꞈ mehˇ nmˇ zaˬ yo aˬ li tiˬ gʼaˬ, tiˬ gʼaˬ tehꞈ˗ehˇ yaw ceuˆ ceuˆ lehˇ nuiˇ luꞈ.
