Iˇsaˬyaˇ 60:1-ahˇ “Yeˬluˇsaˬlehˬ meuˬ˗oˇ, tuˇ˗awˬ. Nawˬ˗euˬ yaw shehꞈ keuˆ le˗euˬ meh. Sahˬpaˬ Miˬyehˇ˗euˬ yaw shehꞈ kʼahˬ sehˇ, nawˬ˗euˬ kʼoeˇ taˆ doˆ laˇ luꞈ meh” lehˇ ehˇ taˬ˗euˬ meh. Teu ngeh Yuˇdaˆ miˇ kʼahˬ˗ahˇ neh kʼaˇ huiˬ˗eu meuˬ pyeuꞈ˗eu Yeˬluˇsaˬlehˬ maˬ ngeuˇ naˇ Ziˇoˬ heu naˇ, tsawˇ jeuˬ tiˬ jeuˬ jeuˬ lah ni˗euˬ gʼaˇ duˬ pyeuꞈ meh. (Iˇsaˬyaˇ 60:14; 62:1, 2) Iˇsaˬyaˇ˗euˬ dawˬ heu naˇ, naˇ haˬ˗eu jeˬ 2 kawˆ bi doˆ laˇ˗euˬ meh. Dahˬ beh˗eu kawˆ naˇ, Yeˬluˇsaˬlehˬ meuˬ aˬ geu ngeh aˬ joˆ˗ehˇ “tuˇ” laˇ˗awˇ, yaw shehꞈ bya˗eu nga? Nyiˬ kawˆ aˬ yawꞈ kawˆ naˇ, Iˇsaˬyaˇ˗euˬ dawˬ heu nymˬ˗mˇ iˬ nah yaw beh naˆ maˬ tseˇ byah laˇ dzehˬ ngaˇ laˬ?

Yeˬluˇsaˬlehˬ meuˬ aˬ geu ngeh aˬ joˆ˗ehˇ “tuˇ” laˇ˗awˇ, yaw shehꞈ bya˗eu nga? Yuˇdaˆ tsawˇ haˬ deuˬ Baˬbuˇloˬ˗ahˇ uˬ taꞈ 70 kʼoꞈ bi nyehꞈ gʼeh ngeh, Yeˬluˇsaˬlehˬ meuˬ hawˇ˗eu uˬ duˬ tahˬ nymˇ nymˇ ma bi byehˇ dzeh taˬ˗euˬ meh. Ehˇ kʼawꞈ Baˬbuˇloˬ˗ahˇ Meˬdiˇ Paˇshaˇ neh deuˆ gʼaˬ ngeh, Baˬbuˇloˬ miˇ kʼahˬ˗ahˇ jawˇ˗eu Iˇsaˬleˬlaˆ tsawˇ haˬ deuˬ˗ahˇ aˬ yawꞈ maꞈ˗euˬ miˇ kʼahˬ˗ahˇ gʼoꞈ iˇ˗awˇ, maˇ maˇ ni gʼeh˗eu uˬ duˬ tahˬ˗eu jeˬ˗ahˇ laˆ muiˬ kʼoꞈ˗eu aˬ kawˬ˗aˬ biꞈ˗euˬ meh. (Eˇzaˬlaˬ 1:1-4) B.C. 537-ahˇ neh naˇ, Iˇsaˬleˬlaˆ 12 jeuˬ laꞈ kʼoeˇ neh saˇ jaˇ ziꞈ˗eu deuˬ Yeˬluˇsaˬlehˬ meuˬ˗ahˇ gʼoꞈ˗iˇ˗euˬ meh. (Iˇsaˬyaˇ 60:4) Kʼoeˇ naˇ aˬ yawꞈ maꞈ lawˇ˗eu shehˇ˗eu jeˬ jahˇ˗awˇ, bawˬ˗iˬ deuˬ jahˇ˗eu uˬ taꞈ, uˬ duˬ tahˬ nymˇ nymˇ ma jiˇ tsoˆ˗euˬ meh. (Eˇzaˬlaˬ 3:1-4, 7-11; 6:16-22) Yeˬhawˇbaˬ˗euˬ yaw shehꞈ aˬ yawꞈ˗euˬ tsawˇ haˬ deuˬ pyeuꞈ˗eu Yeˬluˇsaˬlehˬ meuˬ˗ahˇ bya doˆ laˇ˗euˬ meh. Miˬyehˇ˗euˬ tsawˇ haˬ deuˬ jiˇ Miˬyehˇ˗ahˇ maˬ siˬ nya˗eu aˬ cawˬ tawˇ jeuˬ deuˬ˗euˬ gʼaˇ duˬ yaw shehꞈ pyeuꞈ laˇ˗euˬ meh.

Ehˇ kʼawꞈ teu ngeh yamˬ˗ahˇ Iˇsaˬyaˇ˗euˬ dawˬ teu naˇ, tiˬ tsehˆ na tehꞈ˗ehˇ byah laˇ taˬ˗euˬ meh. Aˇ nah naˇ Iˇsaˬleˬlaˆ tsawˇ haˬ deuˬ myaˬ tiˬ paˆ Yeˬhawˇbaˬ˗euˬ ehˇ dawˬ˗ahˇ maˬ paˇ naˇ haˬ˗euˬ meh. (Neˬhaˬmiˇ 13:27; Maˬlaˬkiˇ 1:6-8; 2:13, 14; Maꞈtehˬ 15:7-9) Aˇ nah naˇ aˬ yawꞈ maꞈ Meˬsiˇya pyeuꞈ˗eu Yeˬsuˇ Ka li˗ahˇ jiˇ laꞈ maˬ daˬ˗a. (Maꞈtehˬ 27:1, 2) A.D. 70 keuˆ laˇ ngeh, Yeˬluˇsaˬlehˬ meuˬ hawˇ˗eu uˬ duˬ tahˬ nymˇ nymˇ ma nyiˬ poˆ aˬ yawꞈ poˆ paˇ bi laˆ cawˆ˗euˬ meh.

Yeˬhawˇbaˬ maˬ keuˆ laˇ mi naˆ˗ehˇ nui ma nyiˇ laˇ paˬ˗ehˇ gʼeh˗eu gaˇ kawˆ heu deuˬ pyeuꞈ laˇ meh lehˇ ehˇ taˬ˗euˬ meh. (Daˬyeˬlaˇ 9:24-27) Heu gaˇ haw ngeh, Yeˬhawˇbaˬ Iˇsaˬyaˇ sahˬ boꞈ yaw huiˬ 60 laꞈ kʼoeˇ˗euˬ laˆ saˆ muiˬ kʼoꞈ˗eu maˬ keuˆ laˇ miˇ ehˇ taˬ dawˬ˗ahˇ gaˇ hu˗euˬ Yeˬluˇsaˬlehˬ meuˬ˗ahˇ dawˬ tawˆ luꞈ maˬ bi byah laˇ jiˇ ngaˬ lehˇ siˬ laˇ˗eu meh.

Iˇsaˬyaˇ˗euˬ dawˬ heu naˇ aˬ dui˗euˬ saˇ ka˗ahˇ byah laˇ dzehˬ ngaˬ˗aˇ laˬ? Ngeuˇ meh. Ehˇ kʼawꞈ “mˬ taˆ˗euˬ Yeˬluˇsaˬlehˬ” nehˬ˗ehˇ taꞈ˗euˬ meh. Gʼaˬ kʼehˇ Pawˇluˆ teu naˇ “aˬ dui˗euˬ aˬ ma pyeuꞈ˗eu meh” lehˇ ehˇ˗eu meh. (Gaˬlaˬtiˆ 4:26) Mˬ taˆ˗euˬ Yeˬluˇsaˬlehˬ lehˇ ehˇ˗eu heu naˇ, Miˬyehˇ˗euˬ aˇ maꞈ aˇ muˇ mˬ taˆ jaˆ˗eu tsehˆ˗ahˇ ehˇ mawꞈ˗eu meh. Teu laꞈ kʼoeˇ saˇ jaˇ ziꞈ˗eu mˬ taˆ gʼaˬ kʼehˇ deuˬ jiˇ keuˬ˗awˇ, “zaˬ deuˬ” pyeuꞈ˗eu Yeˬsuˇ Ka li hawˇ˗eu Pawˇluˆ loꞈ˗ehˇ mˬ taˆ noeˬ tmˬ˗eu jeˬ jaˆ˗eu tseˇ doˆ taˬ˗euˬ 144,000 gʼaˬ jiˇ keuˬ˗eu meh. Tseˇ doˆ taˬ˗euˬ Ka li zaˬ deuˬ “muiˬ˗eu shawˇ˗eu tsawˇ haˬ” pyeuꞈ˗awˇ, “Miˬyehˇ˗euˬ Iˇsaˬleˬlaˆ˗euˬ tsawˇ jeuˬ” pyeuꞈ meh.—1 Beˬtuˆluˆ 2:9; Gaˬlaˬtiˆ 6:16, YB18.

Mˬ taˆ˗euˬ Yeˬluˇsaˬlehˬ heu naˇ, aˬ joˆ˗ehˇ “tuˇ” laˇ˗awˇ neh ‘yaw shehꞈ bya˗eu’ nga? Miˇ tsaˬ kʼoeˇ taˆ jawˇ˗eu zaˬ deuˬ pyeuꞈ˗eu tseˇ doˆ taˬ˗euˬ deuˬ˗ahˇ neh tiˬ tiˆ yaw shehꞈ tahˬ bya˗eu meh. Aˬ dui Iˇsaˬyaˇ sahˬ boꞈ yaw huiˬ 60 laꞈ kʼoeˇ˗euˬ maˬ keuˆ laˇ miˇ ehˇ taˬ˗euˬ dawˬ hawˇ˗eu aˬ yawꞈ maꞈ neh ya puˬ˗euˬ jeˬ nehˬ˗ehˇ sheu cehˆ ma.

Tseˇ doˆ taˬ˗euˬ Ka li zaˬ deuˬ aˬ jeˬ miˇ neh “tuˇ” laˇ˗euˬ nga? Aˬ jeˬ miˇ neh ehˇ naˇ, gʼaˬ kʼehˇ deuˬ shiˇ jiˇ ngeh mehˬ bahˬ˗eu jeˬ byah laˇ˗awˇ, zahˇ tsui ni pyeuꞈ˗iˇ˗euˬ miˇ neh meh. (Maꞈtehˬ 13:37-43) Teu miˇ neh aˬ yawꞈ maꞈ zahˇ kʼawꞈ dawˬ tawˆ luꞈ˗ahˇ ehˇ mawꞈ˗eu Baˬbuˇloˬ˗euˬ zaˬ kʼaˆ pyeuꞈ iˇ˗euˬ meh. Tseˇ doˆ taˬ˗euˬ deuˬ 1914 kʼoꞈ˗ahˇ “miˇ tsaˬ heu aˇ saˬ saˬ˗eu aˇ yamˬ” beh laˇ ngeh keuˆ ni zaˬ kʼaˆ pyeuꞈ luꞈ˗a siˬ. (Maꞈtehˬ 13:39, 40) Teu gaˇ neh tiˬ kʼehˬ naˇ, 1919 kʼoꞈ˗ahˇ aˬ yawꞈ maꞈ nui jah paw aˬ cawˬ˗euˬ zaˬ kʼaˆ geuꞈ luꞈ gaˇ neh ya buˬ˗iˇ˗euˬ meh. Kʼoeˇ naˇ tsaꞈ gaˬ˗eu gaˇ˗ahˇ tiˬ byah tiˬ  loꞈ leh jeh laˇ˗eu heu neh nui jah paw˗euˬ yaw shehꞈ bya˗eu meh. a Dzeuˇ laꞈ˗euˬ aˇ nah aˇ yamˬ heu laꞈ kʼoeˇ tsawˇ jeuˬ tsawˇ ca deuˬ laꞈ kʼoeˇ˗euˬ tsawˇ haˬ deuˬ yaw shehꞈ teu laꞈ kʼoeˇ jawˇ laˇ˗euˬ meh. Iˇsaˬyaˇ 60:3 laꞈ kʼoeˇ ngehˬ keuˆ taˬ˗euˬ “sahˬ paˬ” deuˬ jiˇ yaw shehꞈ teu laꞈ kʼoeˇ jawˇ laˇ˗euˬ meh. Sahˬ paˬ teu deuˬ naˇ dzeˇ luꞈ˗eu Miˬyehˇ˗euˬ Iˇsaˬleˬlaˆ tsawˇ haˬ deuˬ pyeuꞈ meh.—Pah mehˬ˗eu 5:9, 10.

Tseˇ doˆ taˬ˗euˬ deuˬ mehˬ hu paw heu naˆ maˬ tseˇ huiˬ˗eu yaw shehꞈ tahˬ bya laˇ˗a siˬ. Aˬ joˆ˗ehˇ tahˬ bya laˇ˗eu nga? Aˬ yawꞈ maꞈ miˇ tsaˬ kʼoeˇ taˆ ziˇ jiˇ ngeh, “Yeˬluˇsaˬlehˬ yaw shuiꞈ” laꞈ kʼoeˇ˗euˬ tiˬ deuˬ ya pyeuꞈ˗awˇ, Yeˬsuˇ˗euˬ miˬ shuiꞈ jiˇ ya pyeuꞈ˗eu meh. Aˬ yawꞈ maꞈ sahˬ paˬ hawˇ˗eu piˇ ma geuꞈ˗awˇ neh gaˇ mˇ˗eu 144,000 gʼaˬ laꞈ kʼoeˇ˗euˬ deuˬ pyeuꞈ laˇ˗eu meh.—Pah mehˬ˗eu 14:1; 21:1, 2, 24; 22:3-5, YB18.

Yeˬluˇsaˬlehˬ yaw shuiꞈ heu naˇ, Iˇsaˬyaˇ 60:1-ahˇ bi byah laˇ˗eu daˬ ma hmˬ pyeuꞈ meh. (Iˇsaˬyaˇ 60:1, 3, 5, 11, 19, 20 hawˇ˗eu Pah mehˬ˗eu 21:2, 9-11, 22-26 nehˬ˗ehˇ sheu cehˆ.) Miˇ tsaˬ kʼoeˇ taˆ jaˆ˗eu Yeˬluˇsaˬlehˬ meuˬ heu naˇ, gaˇ hu Iˇsaˬleˬlaˆ miˇ kʼahˬ˗euˬ sahˬ paˬ hawˇ nymˇ jaˆ˗eu meuˬ pyeuꞈ yaꞈ˗euˬ loꞈ˗ehˇ, Yeˬsuˇ hawˇ˗eu Yeˬluˇsaˬlehˬ yaw shuiꞈ jiˇ miˇ shuiꞈ˗euˬ uˆ lahˇ˗eu aˇ maꞈ pyeuꞈ laˇ˗eu meh. Yeˬluˇsaˬlehˬ yaw shuiꞈ heu naˇ, ‘mˬ˗ahˇ Miˬyehˇ jawˇ gaˇ neh aˬ joˆ˗ehˇ zaꞈ ka le˗euˬ’ nga? Miˇ tsaˬ kʼoeˇ taˆ gaˇ dahˇ tsoeˬ˗eu jeˬ mˇ˗eu heu neh zaꞈ ka le˗euˬ meh. Tsawˇ jeuˬ tsawˇ ca deuˬ laꞈ kʼoeˇ Miˬyehˇ˗ahˇ guˆ˗eu deuˬ “kʼoeˇ˗euˬ yaw shehꞈ˗ahˇ gʼoe˗awˇ cah tehꞈ˗a.” Aˬ yawꞈ maꞈ iˬ baˇ hawˇ˗eu shiˇ˗eu jeˬ˗ahˇ neh jiˇ ya buˬ˗iˇ˗eu meh. (Pah mehˬ˗eu 21:3, 4, 24) Bawˇlawˇpeh Iˇsaˬyaˇ hawˇ˗eu bawˇlawˇpeh nui deuˬ neh maˬ keuˆ laˇ miˇ ehˇ taˬ˗euˬ dawˬ dawˬ tawˆ luꞈ aˬ diˇ aˬ maˇ byah laˇ jiˇ˗awˇ, “yawˬ jeˬ na luꞈ yaw shuiꞈ beˬ paˇ jiˇ˗eu” meh. (Gʼaˬkʼehˇ 3:21) Yawˬ jeˬ na luꞈ yaw shuiꞈ beˬ paˇ jiˇ˗eu aˇ yamˬ heu naˇ, Yeˬsuˇ sahˬ paˬ geuꞈ˗awˇ uˆ lahˇ gaˇ neh dahˬ beh˗awˇ, tiˬ heˇ kʼoꞈ uˆ lahˇ˗eu aˇ yamˬ jiˇ ngeh aˇ saˬ saˬ˗eu meh.