Gʼaˬ kʼehˇ Pawˇluˆ aˬ yawꞈ loꞈ˗ehˇ aˇ muˇ˗ahˇ sheuˬ gʼeh˗eu gʼaˬ pyeuꞈ˗eu Tiˆmoˇseˬ˗ahˇ “Nawˇ kʼaˇ mˇ kʼaˇ shaˇ˗eu yawˬ jeˬ na luꞈ laꞈ kʼoeˇ myaˆ pyawˬ huiˬ nyiˇ maˬ tseˇ ni, ngaˬ neh mehˬ˗euˬ tsoˆ˗euˬ dawˬ heu deuˬ˗ahˇ yaw muiˬ paˬ˗ehˇ naˇ haˬ geuꞈ˗awˬ lehˇ, Miˬyehˇ hawˇ˗eu Yeˬsuˇ Ka li mehˬ shi, muiˬ˗eu shawˇ˗eu mˬ taˆ gʼaˬ kʼehˇ deuˬ˗euˬ mehˬ shi, ngaˇ nawˬ˗ahˇ naꞈ suiˇ ni ehˇ˗eu ma” lehˇ boꞈ nehˬ˗euˬ meh.—1 Tiˆmoˇseˬ 5:21.

Mˬ taˆ gʼaˬ kʼehˇ heu deuˬ laꞈ kʼoeˇ tseˇ doˆ taˬ˗euˬ 144,000 gʼaˬ heu deuˬ maˬ keuˬ˗a lehˇ aˬ dui siˬ nya˗eu ma. Aˬ jeˬ miˇ neh ehˇ naˇ, Pawˇluˆ Tiˆmoˇseˬ˗ahˇ sahˬ boꞈ boꞈ nehˬ ngeh, tseˇ doˆ taˬ˗euˬ deuˬ tiˬ gʼaˬ˗iˬ mˬ taˆ maˬ ya gʼoꞈ dehꞈ leˇ˗aˬ siˬ. Kʼoeˇ naˇ gʼaˬ kʼehˇ deuˬ hawˇ˗eu tseˇ doˆ taˬ˗euˬ nui deuˬ mˬ taˆ˗euˬ gʼawˇ mawˇ maˬ paˇ˗iˇ˗aˬ siˬ. Teu miˇ neh “mˬ taˆ gʼaˬ kʼehˇ” teu deuˬ naˇ, tseˇ doˆ taˬ˗euˬ Ka li zaˬ deuˬ maˬ ngeuˇ˗a.—1 Gawˇliˬtu 15:50-54; 1 Teˇsaˬloˇni 4:13-17; 1 Yoˇhaˬ 3:2.

Kʼoeˇ naˇ Noˇaˬ˗euˬ saˇ ka˗ahˇ Yeˬhawˇbaˬ˗euˬ ehˇ dawˬ maˬ naˇ haˬ˗euˬ mˬ taˆ gʼaˬ kʼehˇ kʼoeˇ deuˬ jiˇ maˬ ngeuˇ˗a. Aˬ jeˬ miˇ neh ehˇ naˇ, aˬ yawꞈ maꞈ Saˬdaˬ paw pyawˬ˗eu lehˇ tseˇ˗awˇ, Yeˬsuˇ˗ahˇ muiˇ˗eu nehꞈ deuˬ pyeuꞈ˗iˇ˗euˬ miˇ neh meh. (Aˇdahˬbeh˗eu 6:2; Luˇkaꞈ 8:30, 31; 2 Beˬtuˆluˆ 2:4) Kʼoeˇ naˇ mehˬ hu paw aˬ yawꞈ maꞈ yaw li maˬ baw˗eu duˬ kʼahˬ˗ahˇ 1,000 kʼoꞈ bi kaꞈ lahˇ taˬ˗awˇ, Saˬdaˬ nehˬ˗ehˇ bi laˆ cawˆ˗eu meh.—Yuˇdaˆ 6; Pah mehˬ˗eu 20:1-3, 10.

Teu miˇ neh Pawˇluˆ neh ngehˬ keuˆ taˬ˗euˬ “mˬ taˆ gʼaˬ kʼehˇ” teu deuˬ naˇ, “Miˬyehˇ hawˇ˗eu Yeˬsuˇ Ka li”˗ahˇ saˇ jaˇ ziꞈ˗eu mˬ taˆ gʼaˬ kʼehˇ deuˬ ya pyeuꞈ meh.

Yeˬhawˇbaˬ˗ahˇ saˇ jaˇ ziꞈ˗eu mˬ taˆ gʼaˬ kʼehˇ deuˬ gʼawˬ mya ni jawˇ˗eu meh. (Heˬbyehˇ 12:22, 23) Yeˬhawˇbaˬ mˬ taˆ gʼaˬ kʼehˇ deuˬ˗ahˇ gaˇ aˬ yawꞈ tiˬ jeˬ tehꞈ˗ehˇ biꞈ taˬ˗euˬ maˬ ngeuˇ gaˇ duˇ˗eu meh. (Pah mehˬ˗eu 14:17, 18) Yaw jeˬ ma jeˬ, Yeˬhawˇbaˬ mˬ taˆ gʼaˬ kʼehˇ tiˬ gʼaˬ˗ahˇ tehꞈ˗ehˇ zmˬ˗awˇ Aˬshuˇliˆ˗euˬ guiˇ maꞈ 185,000 gʼaˬ˗ahˇ bi laˆ cawˆ˗euˬ meh. (2 Sahˬpaˬ 19:35) Ehˇ kʼawꞈ aˬ yawꞈ mˬ taˆ gʼaˬ kʼehˇ gʼawˬ mya gʼaˬ˗ahˇ zmˬ˗awˇ, “aˬ cawˬ iˬ baˇ mˇ ni jahˇ˗eu tsawˇ haˬ dawˬ tawˆ luꞈ hawˇ˗eu yaw haiˬ jeˬ kʼaˇ mˇ˗eu tsawˇ haˬ dawˬ tawˆ luꞈ˗ahˇ, [Yeˬsuˇ˗euˬ] Miˇkʼahˬ laꞈ kʼoeˇ neh bi sheuˬ doˆ”˗eu gaˇ bi mˇ taˬ˗euˬ gaˇ duˇ˗eu meh. (Maꞈtehˬ 13:39-41) Mˬ taˆ gʼaˬ kʼehˇ nui deuˬ naˇ, mˬ kʼoeˇ taˆ bi le˗eu gʼaˇ duˬ Miˬyehˇ neh “tseˆ doˆ˗euˬ tsawˇ haˬ deuˬ bi sheuˬ uiˬ laꞈ”˗eu meh. (Maꞈtehˬ 24:31) Kʼoeˇ naˇ aˬ dui “kʼaˇ iˇ kʼaˇ laˇ gaˇ bi haw piˇ˗eu gʼaˇ duˬ” gaˇ za taˬ˗euˬ mˬ taˆ gʼaˬ kʼehˇ gʼawˬ mya gʼaˬ jiˇ jawˇ˗eu meh.—Ja ceuˬ 91:11; Maꞈtehˬ 18:10; Maꞈtehˬ 4:11; Luˇkaꞈ 22:43 nehˬ˗ehˇ sheu cehˆ.

1 Tiˆmoˇseˬ 5:21-ahˇ ngehˬ keuˆ taˬ˗euˬ “mˬ taˆ gʼaˬ kʼehˇ” heu deuˬ naˇ, aˇ muˇ deuˬ˗ahˇ bi haw˗eu lehˇ gaˇ za taˬ˗euˬ mˬ taˆ gʼaˬ kʼehˇ deuˬ pyeuꞈ gaˇ duˇ˗eu meh. Jaˇliꞈ teu deuˆ˗euˬ laꞈ oˆ laꞈ taˆ˗ahˇ haw ngeh, Pawˇluˆ aˇ muˇ˗ahˇ sheuˬ gʼeh˗eu deuˬ, yawˬ ha˗ahˇ doˇ˗eu gaˇ˗ahˇ aˬ joˆ˗ehˇ ya mˇ˗eu lehˇ nui noeˬ nui duˇ biꞈ taˬ˗awˇ, aˇ muˇ laꞈ kʼoeˇ˗euˬ mehˇ nmˇ deuˬ jiˇ sheuˬ gʼeh˗eu deuˬ˗ahˇ yaw zeu ya baw meh lehˇ nui noeˬ nui duˇ biꞈ taˬ˗euˬ meh. Sheuˬ gʼeh˗eu deuˬ “myaˆ pyawˬ huiˬ nyiˇ maˬ tseˇ ni” ya mˇ˗eu meh. Yaw muiˬ˗ehˇ maˬ shaˇ noeˬ maˬ shaˇ sawˇ˗euˬ gaˇ, maˬ ya noeˬ tsehˆ˗a, maˬ ya daˇ˗a. Aˬ yawꞈ maꞈ Pawˇluˆ˗euˬ nui noeˬ nui duˇ˗ahˇ mˇ caw paˬ˗ehˇ gʼeh˗eu aˇ yeˇ huiˬ˗eu tiˬ jeˬ naˇ, aˬ yawꞈ maꞈ “Miˬyehˇ hawˇ˗eu Yeˬsuˇ Ka li mehˬ shi, muiˬ˗eu shawˇ˗eu mˬ taˆ gʼaˬ kʼehˇ deuˬ˗euˬ mehˬ shi” gaˇ mˇ luꞈ˗eu miˇ neh meh. Heu gaˇ haw ngeh, aˇ muˇ˗euˬ gaˇ bi mˇ˗eu lehˇ Miˬyehˇ neh tseˇ taˬ˗euˬ mˬ taˆ gʼaˬ kʼehˇ tiˬ deuˬ na jawˇ˗eu lehˇ siˬ laˇ˗eu meh. Aˬ yawꞈ maꞈ Miˬyehˇ˗euˬ tsawˇ haˬ deuˬ˗ahˇ haw piˇ˗awˇ tsaꞈ gaˬ˗eu gaˇ˗ahˇ sheuˬ gʼeh˗eu uˬ taꞈ, aˇ muˇ laꞈ kʼoeˇ˗euˬ gaˇ kawˆ deuˬ Yeˬhawˇbaˬ˗ahˇ tsaꞈ gaˬ˗eu meh.—Maꞈtehˬ 18:10; Pah mehˬ˗eu 14:6.