Gaˇ hu Iˇsaˬleˬlaˆ˗euˬ zahˇ sahˇ kʼoꞈ laꞈ kʼoeˇ deuˇ˗mˬ hawˇ˗eu dawˬ caˇ heu naˇ, aˇ yeˇ huiˬ dui dui˗eu meh. Jaˇliꞈ˗ahˇ tsawˇ haˬ deuˬ deuˇ˗mˬ diˬ˗awˇ dawˬ caˇ caˇ˗eu gaˇ kawˆ boꞈ ahˇ taˬ˗euˬ meh. Jaˇliꞈ˗euˬ tseˇ bymˇ tiˬ bymˇ ehˇ gʼaˬ ni dawˬ caˇ pyeuꞈ meh. Yaw jeˬ ma jeˬ, Ja ceuˬ sahˬ boꞈ, Dawˬcaˇ sahˬ boꞈ, Yeˬlaˬmiˇ ngoeˇ dawˬ, heu deuˬ pyeuꞈ meh. Jaˇliꞈ saˇ ka˗ahˇ˗euˬ deuˇ˗mˬ (Gaˬlaˬpyuˇ dawˬ) lehˇ ehˇ˗eu paˇ dmˬ˗ahˇ ehˇ taˬ˗euˬ loꞈ˗ehˇ, “deuˇ˗mˬ hawˇ˗eu dawˬ caˇ heu naˇ gaˇ hu Iˇsaˬleˬlaˆ tsawˇ haˬ deuˬ˗euˬ dehꞈ jeˬ dehꞈ kawˆ laꞈ kʼoeˇ aˇ yeˇ huiˬ dui dui˗eu jeˬ pyeuꞈ meh.”

Yawˬ nah na luꞈ dehꞈ ziˇ laꞈ kʼoeˇ zmˬ˗eu deuˇ˗mˬ. Iˇsaˬleˬlaˆ tsawˇ haˬ deuˬ nui ma laꞈ kʼoeˇ pyeuꞈ luꞈ˗eu jeˬ bi mawˇ˗eu gʼaˇ duˬ deuˇ˗mˬ lawˬ muˇ diˬ diˬ˗ehˇ dawˬ caˇ caˇ˗eu meh. (Iˇsaˬyaˇ 30:29) Sahˬ paˬ geuꞈ leˇ ngeh maˬ ehˇ, uˬ duˬ tahˬ˗eu bawˬ˗iˬ deuˬ jahˇ ngeh maˬ ehˇ, yehˇ deuˬ guiˇ deuˆ gʼaˬ ngeh maˬ ehˇ, Iˇsaˬleˬlaˆ˗euˬ zaˬ miˬ aˬ buˇ deuˬ tahˬ diˬ cehˇ lehˇ ciˆ ciˆ˗ehˇ, gaˇ nyeh nyeh nyeh˗ehˇ, dawˬ caˇ caˇ˗eu meh. (Yaˇkʼaˬdaˇ˗eu 11:34; 1 Saˬmeuˬlaˆ 18:6, 7; 1 Sahˬpaˬ 1:39, 40) Iˇsaˬleˬlaˆ˗euˬ tsawˇ haˬ deuˬ tiˬ gʼaˬ paˬ shiˇ ngeh jiˇ tsawˇ ngoeˇ ngoeˇ˗eu dawˬ caˇ caˇ˗eu meh. (2 Laˬsaˬbaˬ 35:25) Mehˇkaˇ˗liˇtawˬ Ehˬ Saꞈtawˬ˗lawˬ lehˇ kuˇ˗eu dawˬ tsuiꞈ puiˇ kʼawˬ˗eu paˇ dmˬ tiˬ dmˬ˗ahˇ, “Heˬbyehˇ tsawˇ haˬ deuˬ deuˇ˗mˬ diˬ˗awˇ dawˬ caˇ caˇ gaˇ ya leˇ dui dui˗eu meh” lehˇ ehˇ taˬ˗euˬ meh.

Sahˬ paˬ˗euˬ hawˇ nymˇ˗ahˇ zmˬ˗eu deuˇ˗mˬ. Iˇsaˬleˬlaˆ˗euˬ sahˬ paˬ deuˬ naˇ deuˇ˗mˬ˗ahˇ ya leˇ˗eu meh. Yaw jeˬ ma jeˬ, Daˬbiˇ naˇ sahˬ paˬ Sawˇluˆ˗euˬ hawˇ nymˇ˗ahˇ deuˇ˗mˬ ya diˬ nehˬ˗eu meh. (1 Saˬmeuˬlaˆ 16:18, 23) Daˬbiˇ sahˬ paˬ keuˆ leˇ ngeh jiˇ deuˇ˗mˬ diˬ˗eu keu ka deuˬ jahˇ doˆ˗awˇ, dawˬ caˇ boꞈ˗awˇ dawˬ caˇ caˇ˗eu meh. Yeˬhawˇbaˬ˗euˬ uˬ duˬ tahˬ nymˇ nymˇ ma laꞈ kʼoeˇ deuˇ˗mˬ diˬ˗awˇ, dawˬ caˇ caˇ˗eu aˇ muˇ laˆ baw˗euˬ meh. (2 Laˬsaˬbaˬ 7:6; Aˬmoˆ 6:5) Sahˬ paˬ Sawˇlaˬmoˬ˗euˬ hawˇ nymˇ˗ahˇ jiˇ dawˬ caˇ caˇ˗eu zaˬ miˬ aˬ buˇ deuˬ hawˇ˗eu zaˬ yo aˬ li deuˬ jawˇ˗eu meh.—Dawˬtsoˆ 2:8.

Uˬ duˬ tahˬ gaˇ zmˬ˗eu deuˇ˗mˬ. Iˬsaˬleˬlaˆ deuˬ Yeˬhawˇbaˬ˗ahˇ uˬ duˬ tahˬ gaˇ aˇ yeˇ huiˬ dui dui˗eu tiˬ jeˬ naˇ, deuˇ˗mˬ diˬ˗awˇ dawˬ caˇ caˇ˗eu heu meh.Yeˬluˇsaˬlehˬ meuˬ˗euˬ uˬ duˬ tahˬ nymˇ nymˇ ma˗ahˇ deuˇ˗mˬ diˬ˗awˇ dawˬ caˇ caˇ˗eu deuˬ 4,000 gʼaˬ byah ni jawˇ˗eu meh. (1 Laˬsaˬbaˬ 23:5) Aˬ yawꞈ maꞈ cehˇ lehˇ ciˆ˗awˇ, deuˇ˗mˬ diˬ˗awˇ, daˇ heh lawˬ muˇ baw˗eu meh. (2 Laˬsaˬbaˬ 5:12) Nya˗eu deuˬ tehꞈ˗ehˇ deuˇ˗mˬ diˬ˗awˇ Yeˬhawˇbaˬ˗ahˇ uˬ duˬ tahˬ˗eu maˬ ngeuˇ˗a. Iˇsaˬleˬlaˆ tsawˇ haˬ deuˬ gʼawˬ mya ni yawˬ kʼoꞈ na luꞈ Yeˬluˇsaˬlehˬ meuˬ˗ahˇ bawˬ˗iˬ jahˇ gaˇ iˇ ngeh, gaˇ pehˇ gaˇ la daˆ leˇ˗eu dawˬ caˇ caˇ caˇ˗ehˇ cah˗eu meh. (Ja ceuˬ 120-134) Kʼoeˇ naˇ Iˇsaˬleˬlaˆ tsawˇ haˬ deuˬ Baˬsaˬkaˬ bawˬ˗iˬ jahˇ leˇ ngeh, Hehˬlehˇ a caˇ dawˬ caˇ˗eu meh lehˇ Yuˇdaˆ˗euˬ sahˬ boꞈ deuˬ˗ahˇ pah mehˬ taˬ˗euˬ meh.

Deuˇ˗mˬ heu naˇ nymˬ˗mˇ iˬ nah keuˆ ni Miˬyehˇ˗euˬ tsawˇ haˬ deuˬ˗euˬ gʼaˇ duˬ aˇ yeˇ huiˬ luꞈ meh siˬ. (Yaˬkoˆ 5:13) Dawˬ caˇ caˇ˗awˇ neh ja ceuˬ˗eu heu naˇ uˬ duˬ tahˬ˗eu tiˬ jeˬ pyeuꞈ meh. (Eˇpeˇsu 5:19) Dawˬ caˇ heu naˇ, miˇ kʼahˬ doe ni jawˇ˗eu mehˇ nmˇ deuˬ nehˬ˗ehˇ mehˬ bawˬ bi gm˗eu meh. (Gawˇlawˇsehˇ 3:16) Dawˬ caˇ heu naˇ, shaˬ zahˬ ya puˬ ngeh jiˇ gʼaˬ biꞈ nehˬ nya˗eu meh. (Gʼaˬkʼehˇ 16:25) Deuˇ˗mˬ heu naˇ, aˬ dui Yeˬhawˇbaˬ˗ahˇ gaˬ˗awˇ jah˗eu lehˇ mˇ mawˇ nya˗eu muiˬ dui dui˗eu tiˬ jeˬ pyeuꞈ meh.