Nawˬ˗ahˇ Jaˇliꞈ aˬ myah luꞈ laˬ kʼaˬ tiˬ cehˇ pyehˆ tseˇ˗eu yaw shaˬ miˇ˗a laˬ? Tiˬ poˆ na aˬ dui˗ahˇ yaw shaˬ nya lehˇ noeˬ laˇ˗eu kʼawꞈ pyeuꞈ nya meh. Ehˇ kʼawꞈ aˬ dui yawˬ nah na luꞈ ya mˇ˗eu yaw jeˬ maˬ jeˬ, iˇ cuꞈ dzuiꞈ˗eu gaˇ kawˆ˗ahˇ shaˇ noeˬ haw sheˇ. Iˇ cuꞈ dzuiꞈ˗eu gʼaˇ duˬ aˇ yamˬ ga leˇ˗awˇ ya leh jeh kʼawꞈ, iˇ cuꞈ dzuiꞈ gʼaˬ ngeh aˬ dui˗ahˇ shiˬ keuˇ ni gʼeh laˇ˗eu meh. Yawˬ haˇ yawˬ ha Jaˇliꞈ pyehˆ tseˇ˗eu jeˬ heu jiˇ “iˇ cuꞈ neh tsiˬ shawˇ˗eu loꞈ˗ehˇ Yehˇ dawˬ˗ahˇ gʼoe˗awˇ neh laˆ shawˇ˗eu” miˇ neh, aˬ dui˗ahˇ shiˬ keuˇ ni bi gʼeh laˇ˗eu meh. (Eˇpeˇsu 5:26, YB18) Caw ba nya˗eu nui noeˬ nui duˇ tiˬ kawˆ na˗ahˇ haw ma.

• Aˇ yamˬ laˆ duˬ taˬ. Yawˬ haˇ yawˬ ha Jaˇliꞈ pyehˆ tseˇ˗eu jeˬ heu naˇ, Ka li zaˬ yawˬ gʼaˬ na luꞈ ya mˇ˗eu “dawˬ tawˆ luꞈ laꞈ kʼoeˇ muiˬ dzehˬ˗eu jeˬ” pyeuꞈ meh. (Piˇliˇpiˆ 1:10) Aˬ dui neh laˆ baw taˬ˗euˬ aˇ yamˬ˗ahˇ caw teh nya˗eu gʼaˇ duˬ, aˇ taꞈ teu˗ahˇ aˬ dui yaw muiˬ˗ehˇ haw mawˇ nya˗eu gʼaˇ duˬ, kaˇ pyawˇ˗ahˇ maˬ ehˇ, iˇ tsehꞈ bahˬ keuˆ˗ahˇ maˬ ehˇ, dehˬ myahˬ taˬ nya˗eu meh. Maˬ ngeuˇ naˇ Jaˇliꞈ pyehˆ tseˇ˗eu aˇ yamˬ keuˆ laˇ taˬ˗euˬ lehˇ laˆ noeˬ˗eu gʼaˇ duˬ, naˬ gaˬ lawˬ muˇ˗ahˇ jiˇ aˇ yamˬ toeˬ taˬ nya˗eu meh.

• Yawˬ ha˗ahˇ kʼaˇ tsaˬ leˇ˗eu loꞈ˗ehˇ laˆ paˇ. Nawˬ˗ahˇ aˬ joˆ˗ehˇ ya pyehˆ tseˇ gaˇ ya leˇ nya? Tiˬ poˆ tehꞈ˗ehˇ aˇ yamˬ gʼawˬ myahˇ ni pyehˆ tseˇ gaˇ ya leˇ nya laˬ? Aˇ yamˬ biˇ paˆ˗awˇ pyehˆ tseˇ gaˇ ya leˇ nya laˬ? Yawˬ ha˗euˬ gaˇ kawˆ˗ahˇ yawˬ ha siˬ nya dzehˬ˗eu miˇ neh, yawˬ ha nehˬ˗ehˇ kʼaˇ tsaˬ leˇ˗eu loꞈ˗ehˇ laˆ paˇ˗awˇ pyehˆ tseˇ˗awˬ. Pyehˆ tseˇ˗eu yamˬ tsaˬ laˇ˗euˬ kʼawꞈ, nui ma maˬ ahˇ naˇ tawˇ neh? Toˆ˗ehˇ naˇ 10 peu tehꞈ˗ehˇ kʼawꞈ pyehˆ tseˇ˗awˬ. Tiˬ pawꞈ˗iˬ maˬ pyehˆ tseˇ˗euˬ gaˇ sheu cehˆ naˇ, 10 peu tehꞈ˗ehˇ pyehˆ tseˇ˗euˬ kʼawꞈ maˬ gaˇ˗eu meh. Pyehˆ tseˇ dahˬ beh ngeh shaˬ neh maˬ ngeuˇ nmˇ, dawꞈ leˇ shaw˗euˬ naˇ pyehˆ tseˇ daˆ leꞈ˗eu nui ma ahˇ laˇ˗eu meh.—Piˇliˇpiˆ 2:13.

• Jeˬ hu neh aˬ jeˬ˗euˬ gaˇ kawˆ˗ahˇ pyehˆ tseˇ˗eu lehˇ tseˇ taˬ. Aˇ yamˬ keuˆ laˇ˗awˇ neh hawˇ˗eu aˬ jeˬ˗euˬ gaˇ kawˆ˗ahˇ pyehˆ tseˇ paˬ nga lehˇ shaˇ noeˬ shaˇ noeˬ˗ehˇ jawˇ˗eu heu naˇ, “aˇ yamˬ˗ahˇ gaˇ dahˇ tsoeˬ ni zmˬ” luꞈ˗eu maˬ ngeuˇ˗eu kʼawꞈ pyeuꞈ nya meh. (Eˇpeˇsu 5:16) Nawˇ aˬ jeˬ˗euˬ gaˇ kawˆ˗ahˇ pyehˆ tseˇ mawꞈ nya? Aˬ jeˬ˗euˬ gaˇ kawˆ˗ahˇ siˬ nya mawꞈ nya? lehˇ boꞈ doˆ taˬ nya˗eu meh. Yawˬ poˆ na luꞈ kʼaˇ pyehˆ tseˇ gʼaˬ ngeh, aˬ jeˬ˗euˬ gaˇ kawˆ˗ahˇ paˇ pyehˆ tseˇ mawꞈ nya siˬ lehˇ boꞈ taˬ nya˗eu meh.

• Kʼaˇ loˬ˗eu loꞈ˗ehˇ laˆ poˆ laˆ paˇ. Yawˬ haˇ yawˬ ha Jaˇliꞈ pyehˆ tseˇ˗eu jeˬ, loˬ naˇ aˇ yamˬ hawˇ˗eu gaˇ kawˆ laˆ poˆ laˆ paˇ nya ni jahˇ taˬ. Aˬ geu ngeh, aˇ myah ni, aˬ jeˬ˗euˬ gaˇ kawˆ pyehˆ tseˇ˗eu heu naˇ, aˇ yeˇ huiˬ dzehˬ˗eu jeˬ maˬ ngeuˇ˗a. Aˇ yeˇ huiˬ dzehˬ˗eu jeˬ naˇ, aˬ myah luꞈ maˬ tsehˆ leˇ ni pyehˆ tseˇ˗eu heu meh.

Aˬ dui yawˬ haˇ yawˬ ha Jaˇliꞈ pyehˆ tseˇ˗eu jeˬ aˬ myah luꞈ jahˇ naˇ, gaˇ dahˇ tsoeˬ˗eu jeˬ za˗eu yaw duˬ baw meh. Aˬ dui Yeˬhawˇbaˬ nehˬ˗ehˇ gʼoeˇ˗awˇ, yaw muiˬ˗ehˇ noeˬ tsehˆ nya˗eu uˬ taꞈ, shiˬ keuˇ ni gʼeh˗eu meh.—Yawˇshuˆ 1:8.