1. Iˬ baˇ noeˬ poˆ˗eu lehˇ ehˇ˗eu heu naˇ, aˬ jeˬ˗ahˇ ehˇ˗eu nga?

 Iˬ baˇ mˇ ngeh tiˬ jawˇ, iˬ baˇ noeˬ poˆ˗eu aˇ yeˇ yaw kʼaˆ˗ehˇ huiˬ˗eu meh. Jaˇliꞈ laꞈ kʼoeˇ iˬ baˇ noeˬ poˆ˗eu lehˇ ehˇ˗eu heu naˇ, yawˬ ha neh mˇ bahˬ˗euˬ jeˬ˗ahˇ nui ma cawˆ gaˇ, iˬ baˇ maˬ paˇ mˇ gaˇ, iˬ baˇ maˬ paˇ mˇ kʼoꞈ˗iˇ ma lehˇ noeˬ tsehˆ gaˇ, ehˇ˗eu meh.

2. Iˬ baˇ noeˬ poˆ˗eu gaˇ kawˆ nehˬ˗ehˇ taꞈ leˇ˗awˇ aˬ dui yawˬ gʼaˬ na luꞈ aˬ jeˬ miˇ neh ya siˬ nya˗eu nga? (Neˬhaˬmiˇ 8:9-11)

² Iˬ baˇ noeˬ poˆ˗eu gaˇ kawˆ tsawˇ haˬ zaˬ yawˬ gʼaˬ na luꞈ siˬ nya˗eu loˬ meh. Aˬ jeˬ miˇ neh? Aˬ dui yawˬ nah na luꞈ iˬ baˇ mˇ˗eu miˇ neh meh. Aˬdaˬ hawˇ˗eu Eˇbaˆ˗euˬ zaˬ deuˬ uˆ deuˬ pyeuꞈ˗eu aˬ dui iˬ baˇ zaˬ pyeuꞈ˗eu miˇ neh ya shiˇ˗eu meh. (Loˇmaˆ 3:23; 5:12) Iˬ baˇ˗ahˇ neh tiˬ gʼaˬ˗iˬ maˬ cehˆ dzeuˇ nya˗a. Nui jah ziꞈ dah ni gʼeh˗eu gʼaˬ kʼehˇ Pawˇluˆ kʼawꞈ, iˬ baˇ maˬ ya mˇ˗eu gʼaˇ duˬ leh jeh˗awˇ deuˆ ceh ceh luꞈ˗eu meh. (Loˇmaˆ 7:21-24) Ehˇ kʼawꞈ heu naˇ, aˬ dui iˬ baˇ zaˬ pyeuꞈ˗eu miˇ neh aˬ myah luꞈ ya noeˬ shaˬ gaˇ ehˇ mawꞈ ngaˇ laˬ? Maˬ, maˬ ngeuˇ˗a. Yeˬhawˇbaˬ gʼawˬ shaˬ gaˬ˗eu Miˬyehˇ pyeuꞈ˗awˇ, laˬ kʼaˬ bi cehˇ mawꞈ˗eu meh. Neˬhaˬmiˇ saˇ ka˗ahˇ˗euˬ Yuˇdaˆ tsawˇ haˬ˗euˬ gaˇ kawˆ˗ahˇ shaˇ noeˬ haw sheˇ. (Neˬhaˬmiˇ 8:9-11-ahˇ gui.) Yeˬhawˇbaˬ aˬ yawꞈ maꞈ˗ahˇ dzeuˇ yaꞈ ngeh mˇ˗euˬ iˬ baˇ˗ahˇ nui ma cawˆ cawˆ˗ehˇ tehꞈ˗ehˇ maˬ bi jawˇ mawꞈ˗a. Ehˇ kʼawꞈ aˬ yawꞈ˗ahˇ laˬ kʼaˬ tiˬ cehˇ uˬ duˬ bi tahˬ mawꞈ˗eu meh. Yeˬhawˇbaˬ tsawˇ haˬ deuˬ iˬ baˇ noeˬ poˆ naˇ, laˬ kʼaˬ cehˇ meh lehˇ siˬ nya˗eu meh. Teu miˇ neh iˬ baˇ noeˬ poˆ˗eu gaˇ kawˆ nehˬ˗ehˇ taꞈ leˇ˗awˇ, aˬ dui˗ahˇ mehˬ nehˬ taˬ˗euˬ meh. Aˬ dui iˬ baˇ noeˬ poˆ ngeh, gʼawˬ shaˬ gaˬ nya˗eu mˬ taˆ Aˬda iˬ baˇ pyehˬ nehˬ meh lehˇ jah ziꞈ nya˗eu meh.

3. Aˬ dui heu kawˆ laꞈ kʼoeˇ aˬ jeˬ˗euˬ gaˇ kawˆ˗ahˇ ja sawˇ˗eu nga?

³ Iˬ baˇ noeˬ poˆ˗eu gaˇ kawˆ nehˬ˗ehˇ taꞈ leˇ˗awˇ paˇ dzaw daˆ leꞈ ma. Heu kawˆ laꞈ kʼoeˇ aˬ dui gaˇ kawˆ smˬ kawˆ˗ahˇ ja sawˇ ma. Tiꞈ, Yeˬhawˇbaˬ iˬ baˇ noeˬ poˆ˗eu gaˇ kawˆ nehˬ˗ehˇ taꞈ leˇ˗awˇ, Iˇsaˬleˬlaˆ tsawˇ haˬ deuˬ˗ahˇ aˬ jeˬ mehˬ nehˬ˗euˬ nga? Nyiꞈ, Yeˬhawˇbaˬ tsawˇ haˬ deuˬ˗ahˇ iˬ baˇ noeˬ poˆ˗eu gʼaˇ duˬ, aˬ joˆ˗ehˇ caw ba nehˬ˗eu nga? Smˇ, Yeˬsuˇ zaˬ lahˇ deuˬ˗ahˇ iˬ baˇ noeˬ poˆ˗eu gaˇ kawˆ nehˬ˗ehˇ taꞈ leˇ˗awˇ aˬ jeˬ mehˬ˗euˬ nga?

 Yeˬhawˇbaˬ iˬ baˇ noeˬ poˆ˗eu gaˇ kawˆ nehˬ˗ehˇ taꞈ leˇ˗awˇ, Iˇsaˬleˬlaˆ tsawˇ haˬ deuˬ˗ahˇ aˬ jeˬ mehˬ nehˬ˗euˬ nga?

4. Yeˬhawˇbaˬ iˬ baˇ noeˬ poˆ˗eu jeˬ nehˬ˗ehˇ taꞈ leˇ˗awˇ, Iˇsaˬleˬlaˆ tsawˇ haˬ deuˬ˗ahˇ aˬ jeˬ mehˬ˗euˬ nga?

⁴ Yeˬhawˇbaˬ Iˇsaˬleˬlaˆ tsawˇ haˬ deuˬ˗ahˇ tsawˇ jeuˬ lehˇ laˆ pyeuꞈ ngeh, aˬ yawꞈ maꞈ˗ahˇ zahˇ dawˬ kʼoꞈ dawˬ biꞈ˗euˬ meh. Iˇsaˬleˬlaˆ tsawˇ haˬ deuˬ Miˬyehˇ˗euˬ zahˇ dawˬ kʼoꞈ dawˬ˗ahˇ aˬ myah luꞈ caw teh naˇ, Miˬyehˇ aˬ yawꞈ maꞈ˗ahˇ haw piˇ nehˬ˗awˇ, guiˬ lahˬ biꞈ ma lehˇ saˇ jaˇ dzaˬ˗euˬ meh. Yeˬhawˇbaˬ “Iˬ nah ngaˇ nawˬ˗ahˇ biꞈ˗euˬ zahˇ dawˬ kʼoꞈ dawˬ heu˗aˬ, nawˬ˗euˬ gʼaˇ duˬ shaˬ dui dui˗awˇ laꞈ dzeh maˬ miˇ leˇ nya˗eu zahˇ dawˬ kʼoꞈ dawˬ maˬ ngeuˇ˗a” lehˇ ehˇ˗eu meh. (Dawˬmehˬmehˬ˗eu 30:11, 16) Ehˇ kʼawꞈ Iˇsaˬleˬlaˆ tsawˇ haˬ deuˬ Miˬyehˇ˗ahˇ saˇ jaˇ puiˬ˗awˇ, maˬ ngeuˇ˗eu miˬ yehˇ nui deuˬ˗ahˇ uˬ duˬ tahˬ˗iˇ naˇ, Yeˬhawˇbaˬ aˬ yawꞈ maꞈ˗ahˇ guiˬ lahˬ maˬ paˇ biꞈ meh. Aˬ yawꞈ maꞈ shaˬ zahˬ˗ahˇ ya puˬ meh. Ehˇ kʼawꞈ aˬ yawꞈ maꞈ mˇ lehˬ nga lehˇ˗aˬ, Yeˬhawˇbaˬ aˬ yawꞈ maꞈ˗ahˇ byehˇ dzeh˗eu lehˇ ehˇ mawꞈ˗eu maˬ ngeuˇ˗a. Aˬ yawꞈ maꞈ ‘[aˬ yawꞈ maꞈ˗euˬ] Sahˬpaˬ Miˬyehˇ jawˇ gaˇ paˇ gʼoꞈ poˆ laˇ˗awˇ, aˬ yawꞈ˗euˬ zahˇ dawˬ kʼoꞈ dawˬ deuˬ˗ahˇ nui ma laꞈ kʼoeˇ keuˆ ni naˇ haˬ geuꞈ’ nya meh. (Dawˬmehˬmehˬ˗eu 30:1-3, 17-20) Nui jeˬ˗ehˇ ya ehˇ naˇ, aˬ yawꞈ maꞈ iˬ baˇ noeˬ poˆ nya meh. Aˬ yawꞈ maꞈ iˬ baˇ noeˬ poˆ naˇ, Yeˬhawˇbaˬ aˬ yawꞈ maꞈ nehˬ˗ehˇ paˇ gʼoeˇ kʼoꞈ laˇ˗awˇ, guiˬ lahˬ tiˬ poˆ paˇ biꞈ nehˬ˗eu meh.

5. Yeˬhawˇbaˬ Iˇsaˬleˬlaˆ tsawˇ haˬ deuˬ˗ahˇ nui ma gʼawˬ mahˇ ni aˬ joˆ˗ehˇ taˬ nehˬ˗euˬ nga? (2 Sahˬpaˬ 17:13, 14)

⁵ Iˇsaˬleˬlaˆ tsawˇ haˬ deuˬ Yeˬhawˇbaˬ neh tseˇ doˆ taˬ˗euˬ tsawˇ jeuˬ pyeuꞈ kʼawꞈ, aˬ yawꞈ˗ahˇ saˇ jaˇ gʼawˬ mya poˆ puiˬ˗euˬ meh. Aˬ yawꞈ maꞈ tahˬ pahˬ aˬ ma mawˇ kawˇ˗ahˇ uˬ duˬ tahˬ˗euˬ meh. Jawꞈ dui doeˇ dui dui˗eu jeˬ mˇ˗euˬ meh. Teu miˇ neh aˬ yawꞈ maꞈ shaˬ zahˬ˗ahˇ ya puˬ˗euˬ meh. Ehˇ kʼawꞈ Yeˬhawˇbaˬ aˬ yawꞈ maꞈ˗ahˇ maˬ byehˇ dzeh˗aˬ. Aˬ yawꞈ maꞈ iˬ baˇ noeˬ poˆ˗awˇ, Yeˬhawˇbaˬ jawˇ gaˇ gʼoꞈ kʼoꞈ laˇ˗eu gʼaˇ duˬ, Yeˬhawˇbaˬ bawˇlawˇpeh deuˬ pyehˬ gʼeh˗awˇ, aˬ yawꞈ maꞈ jawˇ gaˇ gʼawˬ mya poˆ saˇ tiˇ bi biꞈ iˇ˗euˬ meh.—2 Sahˬpaˬ 17:13, 14-ahˇ gui.

6. Yeˬhawˇbaˬ bawˇlawˇpeh deuˬ˗ahˇ zmˬ˗awˇ iˬ baˇ noeˬ poˆ˗eu heu naˇ, aˇ yeˇ huiˬ˗eu lehˇ Iˇsaˬleˬlaˆ tsawˇ haˬ deuˬ˗ahˇ aˬ joˆ˗ehˇ bi mehˬ iˇ˗euˬ nga? (Aˇ baˇ˗ahˇ jiˇ haw.)

⁶ Yeˬhawˇbaˬ bawˇlawˇpeh deuˬ˗ahˇ pyehˬ gʼeh˗awˇ, Iˇsaˬleˬlaˆ tsawˇ haˬ deuˬ˗ahˇ saˇ tiˇ gʼawˬ mya poˆ bi biꞈ iˇ˗euˬ meh. Yaw jeˬ ma jeˬ, Yeˬhawˇba bawˇlawˇpeh Yeˬlaˬmiˇ˗ahˇ neh tiˬ tiˆ “Saˇ jaˇ maˬ ziꞈ˗eu Iˇsaˬleˬlaˆ˗oˇ, ngaˇ jawˇ gaˇ gʼoꞈ laˇ˗awˬ. Ngaˇ gʼawˬ shaˬ gaˬ nya˗awˇ nui ma maˬ pehˇ. Mˬ maˬ maˬ byaˆ zaˇ ziˇ nawˬ˗ahˇ nui ma maˬ paˇ pehˇ ma. Nawˬ˗euˬ Miˬyehˇ pyeuꞈ˗eu Sahˬpaˬ Miˬyehˇ˗ahˇ nawˇ puiˬ˗euˬ miˇ neh, nawˇ iˬ baˇ ahˇ˗eu ma lehˇ ehˇ doˆ naˇ gʼaˬ ma” lehˇ ehˇ nehˬ˗euˬ meh. (Yeˬlaˬmiˇ 3:12, 13) Kʼoeˇ naˇ Yeˬhawˇbaˬ bawˇlawˇpeh Yawˇlaˆ˗ahˇ neh tiˬ tiˆ aˬ yawꞈ maꞈ˗ahˇ “ngaˇ jawˇ gaˇ paˇ gʼoꞈ kʼoꞈ laˇ˗awˬ” lehˇ ehˇ nehˬ˗euˬ meh. (Yawˇlaˆ 2:12, 13) Yeˬhawˇbaˬ bawˇlawˇpeh Iˇsaˬyaˇ˗ahˇ neh tiˬ tiˆ “Yawˬ haˇ yawˬ ha mˇ shawˇ˗awˬ.  Ngaˬ˗euˬ mehˬ shi naw maꞈ kʼaˇ mˇ˗euˬ yaw haiˬ jeˬ, dawˬ tawˆ luꞈ byehˇ dzeh˗awˬ. Yaw haiˬ jeˬ maˬ mˇ ni dehꞈ paˇ˗awˬ” lehˇ bi ehˇ nehˬ iˇ˗euˬ meh. (Iˇsaˬyaˇ 1:16-19) Kʼoeˇ naˇ Yeˬhawˇbaˬ Yeˬsaˬgeˬlaˇ˗ahˇ neh tiˬ tiˆ aˬ yawꞈ maꞈ˗ahˇ “Haiˬ˗eu tsawˇ haˬ shiˇ gaˇ ngaˇ laˬ kʼaˬ cehˇ meh lehˇ naw maꞈ noeˬ te loˇ? Aˬ yawꞈ noeˬ poˆ noeˬ paˇ˗awˇ yaw dehꞈ ya dehꞈ gaˇ ngaˇ mawˇ mawꞈ˗eu ma. Tsawˇ haˬ tiˬ gʼaˬ˗iˬ maˬ bi shiˇ mawꞈ nya. Iˬ baˇ˗ahˇ byehˇ dzeh˗awˇ yaw dehꞈ dehꞈ˗awˬ” lehˇ bi ehˇ nehˬ iˇ˗euˬ meh. (Yeˬsaˬgeˬlaˇ 18:23, 32) Yeˬhawˇbaˬ tsawˇ haˬ deuˬ iˬ baˇ noeˬ poˆ gaˇ ya mawˇ ngeh, laˬ kʼaˬ cehˇ˗eu meh. Aˬ jeˬ miˇ neh ehˇ naˇ, Yeˬhawˇbaˬ aˬ yawꞈ maꞈ˗ahˇ mˬ maˬ maˬ byaˆ zaˇ ziˇ bi dehꞈ gʼeh mawꞈ˗eu meh. Yeˬhawˇbaˬ tsawˇ haˬ deuˬ iˬ baˇ jeˬ hu noeˬ poˆ˗awˇ neh tehꞈ˗ehˇ aˬ yawꞈ maꞈ˗ahˇ caw ba nehˬ˗eu maˬ ngeuˇ˗a. Teu nehˬ˗ehˇ taꞈ˗eu tiˬ kawˆ na˗ahˇ haw ma.

7. Yeˬhawˇbaˬ bawˇlawˇpeh Hawˇseˬ hawˇ˗eu aˬ yawꞈ˗euˬ miˬ zaˬ˗euˬ gaˇ kawˆ zmˬ˗awˇ, aˬ yawꞈ˗euˬ tsawˇ haˬ deuˬ˗ahˇ aˬ jeˬ mehˬ nehˬ˗euˬ nga?

⁷ Yeˬhawˇbaˬ Iˇsaˬleˬlaˆ tsawˇ haˬ deuˬ˗ahˇ, bawˇlawˇpeh Hawˇseˬ˗euˬ miˬ zaˬ Gawˬmaˬ˗euˬ gaˇ kawˆ zmˬ˗awˇ mehˬ nehˬ˗euˬ meh. Gawˬmaˬ aˬ cawˬ nehˬ˗ehˇ joe˗iˇ gʼaˬ ngeh Hawˇseˬ˗ahˇ byehˇ dzeh yaꞈ˗awˇ, aˬ cawˬ˗euˬ kʼaˬ dzeˇ zaˬ˗euˬ mehˬ nah caw teh gʼeh˗euˬ meh. Ehˇ kʼawꞈ Yeˬhawˇbaˬ Gawˬmaˬ˗ahˇ maˬ paˇ caw ba ngaˬ laˬ? Tsawˇ haˬ yawˬ gʼaˬ na luꞈ˗euˬ nui ma˗ahˇ siˬ nya˗eu Yeˬhawˇbaˬ, Hawˇseˬ˗ahˇ ‘Nawˇ tiˬ poˆ paˇ iˇ˗awˇ, zaˬ kʼaˬ tiˬ gʼaˬ nehˬ˗ehˇ yuꞈ luꞈ˗eu zaˬ miˬ zaˬ tiˬ gʼaˬ˗ahˇ paˇ gaˬ˗iˇ˗awˬ. Iˇsaˬleˬlaˆ tsawˇ haˬ deuˬ miˬ yehˇ nui deuˬ mehˬ nah caw teh gʼeh kʼawꞈ, aˬ yawꞈ maꞈ˗ahˇ ngaˇ gaˬ˗eu loꞈ˗ehˇ, zaˬ miˬ zaˬ kʼoeˇ gʼaˬ˗ahˇ nawˇ ya gaˬ mehʼ lehˇ ehˇ nehˬ˗euˬ meh. (Hawˇseˬ 3:1; Dawˬdaˬ 16:2) Hawˇseˬ˗euˬ miˬ zaˬ huiˬ˗eu iˬ baˇ mˇ luꞈ kʼawꞈ, Yeˬhawˇbaˬ Hawˇseˬ˗ahˇ aˬ yawꞈ˗euˬ miˬ zaˬ jawˇ gaˇ bi iˇ˗awˇ, aˬ yawꞈ˗ahˇ iˬ baˇ pyehˬ nehˬ, aˬ yawꞈ˗ahˇ tiˬ poˆ paˇ sheuˬ kʼoꞈ laꞈ lehˇ ehˇ nehˬ˗euˬ meh. a Teu gaˇ duˇ ni Yeˬhawˇbaˬ ehˇ dawˬ maˬ naˇ haˬ˗eu aˬ yawꞈ˗euˬ tsawˇ haˬ deuˬ˗ahˇ maˬ byehˇ dzeh˗aˬ. Yeˬhawˇbaˬ aˬ yawꞈ maꞈ˗ahˇ gaˬ˗awˇ, aˬ yawꞈ maꞈ iˬ baˇ noeˬ poˆ noeˬ paˇ ni caw ba nehˬ˗eu gʼaˇ duˬ, bawˇlawˇpeh deuˬ˗ahˇ pyehˬ gʼeh˗euˬ meh. Gaˇ kawˆ heu naˇ, Yeˬhawˇbaˬ tsawˇhaˬ zaˬ yawˬ gʼaˬ na luꞈ˗euˬ nui ma˗ahˇ siˬ nya˗awˇ, huiˬ˗eu iˬ baˇ mˇ˗euˬ deuˬ˗ahˇ noeˬ poˆ noeˬ paˇ ni caw ba nehˬ˗eu leh jeh˗eu lehˇ siˬ laˇ˗eu meh. (Dawˬdaˬ 17:3) Yeˬhawˇbaˬ toˆ˗ehˇ aˬ joˆ˗ehˇ jahˇ˗eu nga lehˇ haw ma.

Iˬ baˇ zaˬ deuˬ noeˬ poˆ ni Yeˬhawˇbaˬ aˬ joˆ˗ehˇ caw ba˗eu nga?

8. Yeˬhawˇbaˬ Gaˬiˇnaˆ˗ahˇ iˬ baˇ noeˬ poˆ ni aˬ joˆ˗ehˇ caw ba nehˬ˗euˬ nga? (Aˇdahˬbeh˗eu 4:3-7) (Aˇ baˇ˗ahˇ jiˇ haw.)

⁸ Gaˬiˇnaˆ naˇ Aˬdaˬ hawˇ˗eu Eˇbaˆ˗euˬ dehꞈ beh beh le˗euˬ aˬ li tiˬ gʼaˬ pyeuꞈ meh. Aˬ yawꞈ aˬ da aˬ ma jawˇ gaˇ neh iˬ baˇ jeˬ biˇ za taˬ˗euˬ meh. Jaˇliꞈ laꞈ kʼoeˇ “aˬ yawꞈ neh mˇ˗euˬ jeˬ lehˬ” meh lehˇ ehˇ taˬ˗euˬ meh. (1 Yoˇhaˬ 3:12) Teu miˇ neh “Gaˬiˇnaˆ˗ahˇ maˬ ehˇ, Gaˬiˇnaˆ neh lawˇ nehˬ˗euˬ jeˬ˗ahˇ maˬ ehˇ, Sahˬpaˬ Miˬyehˇ nui kʼahˇ maˬ shiˇ˗a.” Gaˬiˇnaˆ noeˬ poˆ noeˬ paˇ jeˬ, maˬ noeˬ poˆ maˬ noeˬ paˇ ni “nui ma pehˇ laˇ˗awˇ, myaˆ pyawˬ maˬ muiˬ˗a.” Teu miˇ neh Yeˬhawˇbaˬ aˬ jeˬ jahˇ˗euˬ nga? Yeˬhawˇbaˬ Gaˬiˇnaˆ˗ahˇ dawˬ ngehˬ cawˬ˗euˬ meh. (Aˇdahˬbeh˗eu 4:3-7-ahˇ gui.) Yeˬhawˇbaˬ gʼawˬ shaˬ gaˬ˗eu laꞈ kʼoeˇ Gaˬiˇnaˆ˗ahˇ noeˬ poˆ noeˬ paˇ˗awˇ yaw muiˬ jeˬ mˇ naˇ, guiˬ lahˬ biꞈ ma. Ehˇ kʼawꞈ nui ma pehˇ˗eu maˬ taˬ leˇ naˇ, iˬ baˇ mˇ laˇ nya meh lehˇ saˇ tiˇ biꞈ˗euˬ meh. Ehˇ kʼawꞈ Gaˬiˇnaˆ Yeˬhawˇbaˬ neh biꞈ˗euˬ saˇ tiˇ dawˬ˗ahˇ maˬ naˇ haˬ˗aˬ. Iˬ baˇ noeˬ poˆ˗eu gʼaˇ duˬ Yeˬhawˇbaˬ neh caw ba nehˬ˗eu jeˬ˗ahˇ aˬ yawꞈ laꞈ maˬ daˬ˗aˬ. Gaˬiˇnaˆ Yeˬhawˇbaˬ neh biꞈ˗euˬ saˇ tiˇ dawˬ˗ahˇ maˬ naˇ haˬ˗euˬ baˬ da neh, Yeˬhawˇbaˬ iˬ baˇ zaˬ nui deuˬ˗ahˇ iˬ baˇ noeˬ poˆ ni maˬ paˇ caw ba nehˬ nga laˬ? Maˬ, maˬ ngeuˇ˗eu.

9. Daˬbiˇ iˬ baˇ noeˬ poˆ˗eu gʼaˇ duˬ, Yeˬhawˇbaˬ aˬ joˆ˗ehˇ caw ba nehˬ˗euˬ nga?

⁹ Sahˬ paˬ Daˬbiˇ Yeˬhawˇbaˬ˗ahˇ gaˬ dui dui˗eu meh. Yeˬhawˇbaˬ Daˬbiˇ˗ahˇ “ngaˇ geuꞈ mawꞈ˗eu tsawˇ haˬ” lehˇ kuˇ taˬ˗euˬ meh. (Gʼaˬkʼehˇ 13:22) Ehˇ kʼawꞈ Daˬbiˇ aˬ cawˬ˗euˬ miˬ zaˬ˗ahˇ bahˬ˗awˇ, tsawˇ haˬ zaˬ˗ahˇ sehꞈ˗eu huiˬ˗eu iˬ baˇ mˇ˗euˬ meh. Moˇseˬ˗euˬ zahˇ dawˬ kʼoꞈ dawˬ˗ahˇ naˇ, Daˬbiˇ shiˇ˗eu geuˇ meh.  (Uˬduˬtahˬ˗eu 20:10; Bawˇtsahˬ 35:31) Ehˇ kʼawꞈ Yeˬhawˇbaˬ Daˬbiˇ iˬ baˇ noeˬ poˆ ni caw ba nehˬ mawꞈ˗eu meh. b Teu miˇ neh bawˇlawˇpeh Naˬdaˬ˗ahˇ kʼehˇ gʼeh˗awˇ, aˬ yawꞈ jawˇ gaˇ bi iˇ˗euˬ meh. Teu ngeh keuˆ ni Daˬbiˇ iˬ baˇ maˬ noeˬ poˆ ni tiˬ jeˬ˗iˬ maˬ ngeuˇ˗eu loꞈ˗ehˇ jawˇ˗eu meh. Ehˇ kʼawꞈ Naˬdaˬ neh ja˗euˬ yaw jeˬ ma jeˬ˗euˬ gaˇ kawˆ˗ahˇ ya gaˬ ngeh, Daˬbiˇ˗euˬ nui ma˗ahˇ zaw dui dui leˇ˗awˇ, iˬ baˇ noeˬ poˆ noeˬ paˇ˗euˬ meh. (2 Saˬmeuˬlaˆ 12:1-14) Daˬbiˇ maˇ diˇ noeˬ poˆ noeˬ paˇ˗euˬ lehˇ aˬ yawꞈ neh boꞈ˗euˬ ja ceuˬ gaˬ naˇ yaw huiˬ 51-ahˇ haw ngeh siˬ laˇ˗eu meh. (Ja ceuˬ 51 gaˇ kawˆ uˬ dzah) Ja ceuˬ shaˬ boꞈ teu hmˬ baˬ da neh, gʼaˬ za˗awˇ neh iˬ baˇ noeˬ poˆ˗euˬ deuˬ jiˇ gʼawˬ mya ni jawˇ˗eu meh. Daˬbiˇ iˬ baˇ bi noeˬ poˆ˗eu gʼaˇ duˬ Yeˬhawˇbaˬ nui gaˬ keuˆ˗eu laꞈ kʼoeˇ caw ba nehˬ˗eu heu naˇ, laˬ kʼaˬ cehˇ dui dui laˇ paˬ˗ehˇ gʼeh˗eu jeˬ pyeuꞈ ngaˇ.

10. Yeˬhawˇbaˬ nui ma mahˇ˗eu jeˬ hawˇ˗eu iˬ baˇ pyehˬ˗eu jeˬ˗ahˇ shaˇ noeˬ ngeh, nawˬ˗ahˇ aˬ joˆ˗ehˇ gʼeh laˇ nya?

¹⁰ Yeˬhawˇbaˬ iˬ baˇ hawˇ˗eu yaw haiˬ yaw doeˇ jeˬ dawˬ tawˆ luꞈ˗ahˇ bye˗eu meh. (Ja ceuˬ 5:4, 5) Ehˇ kʼawꞈ iˬ baˇ zaˬ pyeuꞈ˗eu aˬ dui yawˬ gʼaˬ na luꞈ˗ahˇ aˬ yawꞈ gaˬ dui dui˗eu meh. Teu miˇ neh aˬ dui˗ahˇ iˬ baˇ nehˬ˗ehˇ deuˆ ceh ceh nya ni caw ba nehˬ mawꞈ˗eu meh. Huiˬ˗eu iˬ baˇ mˇ˗eu deuˬ˗ahˇ kʼawꞈ, iˬ baˇ noeˬ poˆ ni aˬ yawꞈ nehˬ˗ehˇ gʼoeˇ kʼoꞈ laˇ ni caw ba nehˬ luꞈ˗eu lehˇ ya siˬ˗eu heu naˇ, gʼaˬ ahˇ dui dui laˇ paˬ˗ehˇ gʼeh˗eu jeˬ pyeuꞈ ngaˇ. Aˬ dui˗ahˇ Yeˬhawˇbaˬ˗euˬ nui ma mahˇ˗eu jeˬ hawˇ˗eu iˬ baˇ pyehˬ nehˬ laꞈ˗eu jeˬ˗ahˇ shaˇ noeˬ shaˇ sawˇ ngeh, iˬ baˇ maˬ mˇ˗eu gʼaˇ duˬ, paˇ mˇ˗euˬ naˇ jiˇ kawˇ kawˇ ma˗ehˇ iˬ baˇ noeˬ poˆ ni laˆ noeˬ nehˬ laꞈ˗eu meh. Iˬ baˇ noeˬ poˆ˗eu gaˇ kawˆ nehˬ˗ehˇ taꞈ leˇ˗awˇ, Yeˬsuˇ zaˬ lahˇ deuˬ˗ahˇ aˬ jeˬ mehˬ nehˬ˗eu nga lehˇ paˇ dzaw daˆ leꞈ ma.

Yeˬsuˇ zaˬ lahˇ deuˬ˗ahˇ iˬ baˇ noeˬ poˆ˗eu gaˇ kawˆ nehˬ˗ehˇ taꞈ leˇ˗awˇ aˬ jeˬ mehˬ˗eu nga?

11-12. Mˬ taˆ Aˬda iˬ baˇ pyehˬ nehˬ mawꞈ dui dui˗eu lehˇ Yeˬsuˇ aˬ joˆ˗ehˇ mˇ mawˇ˗euˬ nga? (Sahˬ boꞈ baˆ kʼoˆ˗euˬ aˇ baˇ˗ahˇ jiˇ haw.)

¹¹ Dzeuˇ laꞈ˗euˬ nyiˬ heˇ kʼoꞈ heu kaˬ˗ahˇ Meˬsiˇya doˆ laˇ˗euˬ meh. Dzeuˇ yaꞈ kawˆ˗ahˇ ja sawˇ˗euˬ loꞈ˗ehˇ, iˬ baˇ noeˬ poˆ noeˬ paˇ˗eu heu naˇ aˇ yeˇ huiˬ˗eu jeˬ pyeuꞈ˗eu lehˇ Yeˬhawˇbaˬ iˇ cuꞈ shawˇ˗eu Yoˇhaˬ hawˇ˗eu Yeˬsuˇ Ka li˗ahˇ zmˬ˗awˇ mehˬ˗euˬ meh.—Maꞈtehˬ 3:1, 2; 4:17.

¹² Yeˬsuˇ miˇ tsaˬ kʼoeˇ taˆ jawˇ ngeh, zaˬ lahˇ deuˬ˗ahˇ Yeˬhawˇbaˬ˗aˬ, iˬ baˇ pyehˬ nehˬ mawꞈ dui dui˗eu Aˬda pyeuꞈ˗eu lehˇ mehˬ˗eu meh. Yeˬsuˇ byoˆ˗iˇ˗euˬ aˬ li˗euˬ yaw jeˬ ma jeˬ gaˇ kawˆ˗ahˇ zmˬ˗awˇ mehˬ˗euˬ meh. Yaw jeˬ ma jeˬ gaˇ kawˆ teu laꞈ  kʼoeˇ aˬ li teu gʼaˬ iˇ kahˇ˗ahˇ neh doˆ˗iˇ˗awˇ, byawˬ gʼa muˆ gʼa˗eu mehˬ nah caw teh iˇ˗euˬ meh. Aˬ yawꞈ kʼaˇ jaˆ˗eu jeˬ dawˬ tawˆ luꞈ teu gaˇ laˆ byoˆ jiˇ˗euˬ meh. Aˇ nah naˇ, aˬ yawꞈ “noeˬ gahˇ laˇ˗awˇ” iˇ kahˇ˗ahˇ gʼoꞈ laˇ˗euˬ meh. Teu ngeh aˬ da teu gʼaˬ aˬ joˆ˗ehˇ jahˇ˗euˬ nga? “Aˬ yawꞈ gaˇ mahˇ kaˬ gaˇ gʼoꞈ laˇ luꞈ ngeh neh, aˬ yawꞈ˗euˬ aˬ da aˬ yawꞈ˗ahˇ haw mawˇ˗awˇ, gʼawˬ shaˬ gaˬ dui dui˗eu miˇ neh cehˆ coeˬ coeˬ gʼeh˗awˇ, aˬ yawꞈ˗ahˇ byaˇ cuꞈ˗awˇ ha˗eu laꞈ kʼoeˇ, mehˬ cuˇ cuˇ nehˬ˗euˬ meh.” Aˬ li teu gʼaˬ naˇ aˬ yawꞈ˗euˬ aˬ da iˬ baˇ pyehˬ nehˬ laꞈ˗eu paˬ lehˇ maˬ noeˬ˗eu miˇ neh, aˬ yawꞈ˗euˬ aˬ da jawˇ gaˇ zaˬ kʼaˆ tiˬ gʼaˬ loꞈ˗ehˇ kʼawꞈ bi jawˇ nehˬ laꞈ lehˇ tahˬ shaˇ˗euˬ meh. Ehˇ kʼawꞈ aˬ da gʼaˬ, aˬ yawꞈ˗ahˇ iˬ baˇ pyehˬ nehˬ˗eu lehˇ lehˬ hmˬ deuˇ taˬ˗euˬ meh. Aˬ da gʼaˬ aˬ yawꞈ˗ahˇ ‘ngaˬ li˗oˇ’ lehˇ kuˇ˗awˇ, “aˬ yawꞈ byoˆ˗iˇ˗euˬ kʼawꞈ, nymˬ˗mˇ paˇ mawˇ kʼoꞈ˗euˬ ma” lehˇ ehˇ˗eu meh. (Luˇkaꞈ 15:11-32) Yeˬsuˇ miˇ tsaˬ kʼoeˇ taˆ maˬ oe mi naˆ˗ehˇ mˬ kʼoeˇ taˆ jawˇ ngeh, nui gaˬ Aˬda noeˬ poˆ noeˬ paˇ˗euˬ iˬ baˇ zaˬ deuˬ˗ahˇ iˬ baˇ gʼawˬ mya poˆ pyehˬ nehˬ gaˇ ya mawˇ˗euˬ tehꞈ˗a. Teu miˇ neh Yeˬsuˇ mˬ taˆ Aˬda nui gaˬ tiˬ byah ni ahˇ˗eu lehˇ bi siˬ˗eu gʼaˇ duˬ, byoˆ˗iˇ˗euˬ aˬ li˗euˬ yaw jeˬ ma jeˬ gaˇ kawˆ teu˗ahˇ nui ma˗ahˇ zaw laˇ paˬ˗ehˇ dzawˇ nehˬ˗euˬ meh.

13-14. Iˬ baˇ noeˬ poˆ˗eu gaˇ kawˆ nehˬ˗ehˇ taꞈ leˇ˗awˇ gʼaˬ kʼehˇ Beˬtuˆluˆ aˬ jeˬ ya siˬ˗euˬ ngaˬ? Aˬ cawˬ deuˬ˗ahˇ aˬ jeˬ mehˬ˗euˬ nga? (Aˇ baˇ˗ahˇ jiˇ haw.)

¹³ Gʼaˬ kʼehˇ Beˬtuˆluˆ iˬ baˇ noeˬ poˆ noeˬ paˇ˗eu jeˬ hawˇ˗eu iˬ baˇ pyehˬ˗eu jeˬ nehˬ˗ehˇ taꞈ leˇ˗awˇ, Yeˬsuˇ jawˇ gaˇ neh gʼawˬ mya jeˬ ya dzaw˗euˬ meh. Beˬtuˆluˆ gʼawˬ mya poˆ mˇ lehˬ˗euˬ kʼawꞈ, Yeˬsuˇ aˬ yawꞈ˗ahˇ aˬ myah luꞈ iˬ baˇ pyehˬ nehˬ˗euˬ meh. Yaw jeˬ ma jeˬ, Beˬtuˆluˆ Yeˬsuˇ˗ahˇ maˬ siˬ nya nya lehˇ 3 poˆ pyehˇ gʼaˬ˗euˬ naˇ kʼah aˬ yawꞈ nui ma cawˆ dui dui˗eu meh. (Maꞈtehˬ 26:34, 35, 69-75) Ehˇ kʼawꞈ Yeˬsuˇ gʼoꞈ dehꞈ laˇ gʼaˬ ngeh, Beˬtuˆluˆ tiˬ gʼaˬ tehꞈ˗ehˇ jawˇ ngeh aˬ yawꞈ˗ahˇ bi mawˇ˗euˬ meh. (Luˇkaꞈ 24:33, 34; 1 Gawˇliˬtu 15:3-5) Yeˬsuˇ Beˬtuˆluˆ iˬ baˇ noeˬ poˆ dzeuˇ mehˬ lehˇ siˬ nya˗eu meh. Teu miˇ neh Yeˬsuˇ aˬ yawꞈ˗ahˇ maˇ diˇ iˬ baˇ pyehˬ nehˬ maˬ lehˇ bi jah ziꞈ mawꞈ˗eu meh.—Maˬkuˆ 16:7.

¹⁴ Beˬtuˆluˆ iˬ baˇ noeˬ poˆ˗eu jeˬ hawˇ˗eu iˬ baˇ pyehˬ nehˬ˗eu jeˬ heu naˇ, aˬ jeˬ˗ahˇ ehˇ mawꞈ˗eu lehˇ ya siˬ nya dzeuˇ˗euˬ miˇ neh aˬ cawˬ˗ahˇ jiˇ mehˬ nehˬ nya˗eu meh. Beˬdeˬgoˇdeˬ Bawˬ˗iˬ jiˇ˗euˬ naˇ kʼah Beˬtuˆluˆ nui jah maˬ ahˇ˗eu Yuˇdaˆ tsawˇ haˬ deuˬ˗ahˇ naw maꞈ Meˬsiˇya˗ahˇ sehꞈ˗euˬ meh lehˇ ehˇ nehˬ˗euˬ meh. Ehˇ kʼawꞈ Beˬtuˆluˆ aˬ yawꞈ maꞈ˗ahˇ nui gaˬ  keuˆ˗eu laꞈ kʼoeˇ “Naw maꞈ˗euˬ iˬ baˇ bi pyehˬ nehˬ˗eu gʼaˇ duˬ, iˬ baˇ noeˬ poˆ˗awˇ Miˬyehˇ jawˇ paw gʼoꞈ kʼoꞈ laˇ˗awˬ. Naw maꞈ kʼoeˇ loꞈ˗ehˇ jahˇ naˇ, guiˬ lahˬ saꞈ laˇ gʼaˬ byah˗eu aˇ yamˬ Sahˬpaˬ Miˬyehˇ biꞈ leꞈ” meh lehˇ laˆ noeˬ nehˬ˗euˬ meh. (Gʼaˬkʼehˇ 3:14, 15, 17, 19, 20) Beˬtuˆluˆ˗euˬ dawˬ˗ahˇ haw ngeh iˬ baˇ noeˬ poˆ˗eu lehˇ ehˇ˗eu heu naˇ, bahˬ˗eu muˆ˗eu gaˇ ma˗ahˇ neh gʼoꞈ laˇ˗awˇ, Yeˬhawˇbaˬ nui kʼahˇ shiˇ˗eu gaˇ ma˗ahˇ cah laˇ gaˇ ehˇ˗eu lehˇ siˬ laˇ˗eu meh. Beˬtuˆluˆ˗euˬ dawˬ heu naˇ, Yeˬhawˇbaˬ iˬ baˇ˗ahˇ jiˇ shiˆ dzeh nehˬ laꞈ meh lehˇ bi jah ziꞈ laꞈ˗eu meh. Yaw myaˬ tseˇ kʼoꞈ byah laˇ ngeh, Beˬtuˆluˆ Ka li zaˬ deuˬ˗ahˇ “Sahˬpaˬ Miˬyehˇ˗aˬ, tsawˇ haˬ tiˬ gʼaˬ˗iˬ maˬ bi luˬ maˬ bi seˇ˗iˇ mawꞈ˗eu miˇ neh, dawˬ tawˆ luꞈ iˬ baˇ bi noeˬ poˆ˗eu gʼaˇ duˬ aˬ yawꞈ oˇ luꞈ˗eu jeˬ pyeuꞈ˗eu meh” lehˇ kamˬ˗euˬ meh. (2 Beˬtuˆluˆ 3:9) Huiˬ dui dui˗eu iˬ baˇ mˇ˗euˬ kʼawꞈ, Yeˬhawˇbaˬ maˇ diˇ iˬ baˇ pyehˬ nehˬ˗eu lehˇ ya siˬ˗eu heu naˇ, gʼaˬ ahˇ dui dui laˇ paˬ˗ehˇ gʼeh˗eu jeˬ pyeuꞈ ngaˇ.

15-16. (a) Pawˇluˆ iˬ baˇ pyehˬ˗eu gaˇ kawˆ nehˬ˗ehˇ taꞈ leˇ˗awˇ, aˬ jeˬ ya siˬ˗euˬ ngaˬ? (1 Tiˆmoˇseˬ 1:12-15) (b) Aˬ dui nyaˆ taꞈ kawˆ˗ahˇ aˬ jeˬ˗euˬ gaˇ kawˆ ja sawˇ˗eu nga?

¹⁵ Daˬsuˆ meuˬ zaˬ Sawˇluˆ loꞈ˗ehˇ iˬ baˇ noeˬ poˆ˗awˇ iˬ baˇ bi pyehˬ paˬ˗ehˇ gʼeh˗eu tiˬ gʼaˬ˗iˬ maˬ paˇ jawˇ meh. Aˬ yawꞈ Yeˬsuˇ˗euˬ zaˬ lahˇ deuˬ˗ahˇ kʼehˬ dui kʼaˆ dui dui˗euˬ meh. Ka li zaˬ myaˬ tiˬ paˆ Sawˇluˆ loꞈ˗ehˇ gʼeh˗eu tsawˇ haˬ deuˬ iˬ baˇ noeˬ poˆ˗awˇ, dehꞈ poˆ dehꞈ paˇ˗eu lehˇ ehˇ˗eu heu naˇ maˬ pyeuꞈ leˇ nya˗eu lehˇ noeˬ tehꞈ˗aˬ. Ehˇ kʼawꞈ Yeˬsuˇ Sawˇluˆ iˬ baˇ noeˬ poˆ˗awˇ, dehꞈ poˆ dehꞈ paˇ laˇ nya meh lehˇ siˬ nya˗eu meh. Yeˬhawˇbaˬ hawˇ˗eu Yeˬsuˇ Sawˇluˆ˗euˬ yaw muiˬ jeˬ˗ahˇ haw mawˇ˗eu meh. Yeˬsuˇ “ngaˬ˗euˬ tsawˇ myahˇ˗ahˇ siˬ nya laˇ ni bi mˇ˗eu gʼaˇ duˬ, aˬ yawꞈ˗ahˇ ngaˇ tseˇ doˆ taˬ˗euˬ ma” lehˇ ehˇ˗eu meh. (Gʼaˬkʼehˇ 9:15) Sawˇluˆ iˬ baˇ noeˬ poˆ laˇ ni caw ba nehˬ˗eu gʼaˇ duˬ, Yeˬsuˇ zahˬ leˇ paˬ˗ehˇ gʼeh˗eu jeˬ zmˬ˗euˬ meh. (Gʼaˬkʼehˇ 7:58–8:3; 9:1-9, 17-20) Ehˇ˗euˬ loꞈ˗ehˇ Sawˇluˆ Ka li zaˬ tiˬ gʼaˬ pyeuꞈ laˇ˗euˬ meh. Aˇ nah naˇ, aˬ cawˬ deuˬ aˬ yawꞈ˗ahˇ gʼaˬ kʼehˇ Pawˇluˆ lehˇ siˬ nya˗eu meh. Aˬ yawꞈ Yeˬhawˇbaˬ hawˇ˗eu Yeˬsuˇ neh gʼawˬ shaˬ gaˬ nehˬ laꞈ˗euˬ jeˬ˗ahˇ guiˬ lahˬ huiˬ miˇ˗a lehˇ tiˬ kʼehˬ maˬ kaˬ ngehˬ keuˆ˗eu meh. (1 Tiˆmoˇseˬ 1:12-15-ahˇ gui.) Pawˇluˆ mehˇ nmˇ deuˬ˗ahˇ ‘Miˬyehˇ gʼawˬ shaˬ gaˬ˗awˇ, nawˇ iˬ baˇ noeˬ poˆ laˇ ni aˬ yawꞈ leh jeh luꞈ˗eu meh’ lehˇ mehˬ˗eu meh.—Loˇmaˆ 2:4.

¹⁶ Gʼaˬ kʼehˇ Pawˇluˆ Gawˇliˬtu aˇ muˇ laꞈ kʼoeˇ dehꞈ bahˬ dehꞈ muˆ˗eu gaˇ kawˆ jaˆ˗eu lehˇ ya gaˬ ngeh, aˬ joˆ˗ehˇ jahˇ˗euˬ nga? Pawˇluˆ gaˇ kawˆ teu˗ahˇ nyehꞈ tehˬ˗euˬ gaˇ neh, Yeˬhawˇbaˬ aˬ yawꞈ˗euˬ tsawˇ haˬ deuˬ˗ahˇ mehˬ ngeh tsoˆ ngeh nui gaˬ aˬ joˆ˗ehˇ mˇ mawˇ˗eu nga? Iˬ baˇ noeˬ poˆ ngeh gʼawˬ shaˬ gaˬ˗eu jeˬ aˬ joˆ˗ehˇ mˇ mawˇ˗eu nga lehˇ ya siˬ meh. Gaˇ kawˆ heu nehˬ˗ehˇ taꞈ leˇ˗awˇ nyaˆ taꞈ kawˆ˗ahˇ duꞈ yawˇ ni ja sawˇ˗eu meh.