Gʼaˬ kʼehˇ Pawˇluˆ Teˇsaˬloˇni meuˬ˗ahˇ˗euˬ Ka li zaˬ deuˬ˗ahˇ “Naw maꞈ jawˇ gaˇ boꞈ ahˇ laꞈ˗euˬ sahˬ boꞈ heu taꞈ laꞈ kʼoeˇ, nga maꞈ neh mehˬ˗euˬ dawˬ heu deuˬ˗ahˇ maˬ naˇ haˬ geuꞈ˗eu tsawˇ haˬ kʼawꞈ jawˇ˗eu baw tehꞈ˗a. Kʼoeˇ loꞈ˗ehˇ gʼeh˗eu tsawˇ haˬ˗ahˇ noeˬ taˬ”˗awˬ lehˇ boꞈ nehˬ˗euˬ meh. (2 Teˇsaˬloˇni 3:14) Dzeuˇ yaꞈ ngeh nui noeˬ nui duˇ teu, aˇ muˇ˗ahˇ sheuˬ gʼeh˗eu deuˬ˗ahˇ biꞈ˗euˬ nui noeˬ nui duˇ pyeuꞈ meh lehˇ ehˇ taˬ˗euˬ meh. Tiˬ gʼaˬ paˬ nui noeˬ nui duˇ gʼawˬ mya poˆ bi biꞈ˗euˬ kʼawꞈ, Jaˇliꞈ zahˇ˗ahˇ maˬ caw teh naˇ aˇ muˇ˗ahˇ sheuˬ gʼeh˗eu deuˬ, aˇ muˇ˗ahˇ bi yahˇ˗eu gʼaˇ duˬ saˇ tiˇ biꞈ˗eu dawˬ mehˬ mehˬ˗eu meh. Teu gaˇ neh naˇ, aˇ muˇ laꞈ kʼoeˇ˗euˬ mehˇ nmˇ deuˬ jiˇ, teu gʼaˬ nehˬ˗ehˇ bawˬ dzaˬ ngeh hawˇ˗eu tsaꞈ gaˬ˗iˇ ngeh maˬ ngeuˇ˗eu taꞈ naˇ, cawˬ maˬ paˇ cawˬ˗eu meh.

Ehˇ kʼawꞈ aˬ dui neh gʼoˆ shaw taˬ˗euˬ jeˬ heu˗ahˇ laˆ poˆ laˆ paˇ˗eu loˬ laˇ˗euˬ meh. Aˬ jeˬ miˇ neh ehˇ naˇ, Pawˇluˆ neh biꞈ˗euˬ nui noeˬ nui duˇ heu naˇ Ka li zaˬ mehˇ nmˇ aˬ yawꞈ gʼaˬ yawꞈ gaˇ kawˆ deuˬ˗ahˇ aˬ yawꞈ gaˇ yawꞈ haw haw˗ehˇ ya noeˬ tsehˆ gaˇ ehˇ luꞈ nga lehˇ ya gʼoˆ shaw˗euˬ miˇ neh ma. Teu miˇ neh aˇ muˇ˗ahˇ sheuˬ gʼeh˗eu deuˬ tiˬ gʼaˬ gʼaˬ˗ahˇ saˇ tiˇ biꞈ˗eu gʼaˇ duˬ dawˬ mehˬ mehˬ˗eu maˬ paˇ loˬ meh. Aˬ jeˬ miˇ neh heu loꞈ˗ehˇ laˆ poˆ laˆ paˇ˗euˬ nga? Pawˇluˆ neh ngehˬ˗euˬ, mehˬ shi naˇ kʼah dawˬ deuˬ˗ahˇ haw kaˇ˗euˇ.

Pawˇluˆ aˇ muˇ laꞈ kʼoeˇ˗euˬ tiˬ gʼaˬ na “maˬ mˇ maˬ shaˇ nahˇ˗eu deuˬ” pyeuꞈ gaˇ ya mawˇ˗euˬ meh. Aˬ yawꞈ maꞈ Jaˇliꞈ˗ahˇ neh laˇ˗euˬ nui noeˬ nui duˇ˗euˬ mehˬ nah maˬ caw teh˗a. Teu˗euˬ jeˬ hu Pawˇluˆ Teˇsaˬloˇni meuˬ˗ahˇ gʼa laˇ ngeh, aˬ yawꞈ “maˬ mˇ nahˇ˗eu tsawˇ haˬ˗ahˇ hawˬ taˬ bi dzaˬ” lehˇ nui noeˬ nui duˇ biꞈ yaꞈ haw˗euˬ meh. Ehˇ kʼawꞈ aˇ muˇ laꞈ kʼoeˇ˗euˬ tiˬ gʼaˬ na, yawˬ ha˗ahˇ mˇ cu˗eu gʼaˇ duˬ mˇ nya gaˇ neh maˬ mˇ ni jawˇ˗eu meh. Kʼoeˇ naˇ yawˬ ha˗ahˇ maˬ taꞈ˗eu aˬ cawˬ˗euˬ gaˇ kawˆ ja ja˗ehˇ cah˗eu meh. Teu loꞈ˗ehˇ gʼeh˗eu deuˬ˗ahˇ Ka li zaˬ deuˬ aˬ joˆ˗ehˇ ya mˇ nehˬ˗eu nga?—2 Teˇsaˬloˇni 3:6, 10-12.

Pawˆluˆ teu gʼaˬ˗ahˇ “noeˬ taˬ” lehˇ ehˇ˗eu meh. Noeˬ taˬ lehˇ ehˇ˗eu Gaˬliˇ dawˬ neh naˇ, teu loꞈ˗ehˇ gʼeh˗eu tsawˇ haˬ˗ahˇ haw doˆ nya˗awˇ yahˇ lehˇ dawˬ tsuiꞈ jaˆ˗eu meh. Pawˇluˆ dawˬ teu˗ahˇ aˇ muˇ˗ahˇ sheuˬ gʼeh˗eu deuˬ˗ahˇ tehꞈ˗ehˇ maˬ ngeuˇ˗eu, aˇ muˇ laꞈ kʼoeˇ˗euˬ yawˬ gʼaˬ na luꞈ˗ahˇ biꞈ˗euˬ meh. (2 Teˇsaˬloˇni 1:1; 3:6) Teu miˇ neh Ka li zaˬ mehˇ nmˇ aˬ yawꞈ gʼaˬ yawꞈ tiˬ gʼaˬ na Jaˇliꞈ˗euˬ nui noeˬ nui duˇ˗ahˇ maˬ caw teh gaˇ ya mawˇ ngeh, teu loꞈ˗ehˇ gʼeh˗eu deuˬ nehˬ˗ehˇ “cawˬ maˬ cawˬ” lehˇ yawˬ ha tseˇ˗eu kʼawꞈ pyeuꞈ nya meh.

Heu naˇ aˬ yawꞈ˗ahˇ aˇ muˇ˗ahˇ neh bi teh doˆ˗euˬ tiˬ gʼaˬ loꞈ˗ehˇ ya mˇ nehˬ gaˇ ehˇ mawꞈ ngaˇ laˬ? Maˬ, maˬ ngeuˇ˗a. Aˬ jeˬ miˇ neh ehˇ naˇ, aˬ yawꞈ˗ahˇ “mehˇ nmˇ tiˬ gʼaˬ loꞈ˗ehˇ sawˇ˗awˇ yaw kʼaˆ kʼaˆ˗ehˇ mehˬ nehˬ˗awˬ” lehˇ Pawˇluˆ ehˇ˗eu meh. Teu miˇ neh Ka li zaˬ mehˇ nmˇ deuˬ aˬ yawꞈ gʼaˬ yawꞈ, bi noeˬ taˬ˗euˬ gʼaˬ˗ahˇ mehˬ bawˬ˗ahˇ hawˇ˗eu tsaꞈ gaˬ˗eu gaˇ˗ahˇ maˬ ngeuˇ naˇ, laꞈ nyiˇ paw cawˬ maˬ cawˬ taꞈ lehˇ yawˬ haˇ yawˬ ha noeˬ tsehˆ nya˗eu meh. Aˬ jeˬ miˇ neh nga? Pawˇluˆ aˬ yawꞈ˗ahˇ “bi shaꞈ dawˇ”˗eu gʼaˇ duˬ, lehˇ ehˇ taˬ˗euˬ meh. Teu loꞈ˗ehˇ jahˇ˗eu teu naˇ, maˬ mˇ maˬ shaˇ nahˇ˗eu Ka li zaˬ deuˬ˗ahˇ bi shaꞈ dawˇ leˇ˗awˇ, dehꞈ poˆ dehꞈ paˇ ni laˆ noeˬ nehˬ nya˗eu meh.—2 Teˇsaˬloˇni 3:14, 15.

Nymˬ˗mˇ iˬ nah˗euˬ Ka li zaˬ deuˬ nui noeˬ nui duˇ teu˗ahˇ aˬ joˆ˗ehˇ mˇ caw nya˗eu nga? Aˬ dui mehˇ nmˇ heu gʼaˬ naˇ, “maˬ mˇ maˬ shaˇ nahˇ˗eu” Pawˇluˆ neh ehˇ˗euˬ deuˬ pyeuꞈ˗eu lehˇ jeˬ hu yaw duˬ ya laˆ baw˗eu meh. Pawˇluˆ yawˬ ha˗euˬ siˬ nya˗eu nui ma˗ahˇ zmˬ˗awˇ noeˬ tsehˆ˗eu jeˬ aˬ dui˗ahˇ maˬ duˇ leˇ˗eu deuˬ˗ahˇ maˬ ehˇ, ya leˇ˗eu jeˬ aˬ dui nehˬ˗ehˇ maˬ duˇ leˇ˗eu deuˬ˗ahˇ maˬ ehˇ, ehˇ mawꞈ˗eu maˬ ngeuˇ˗a. Kʼoeˇ naˇ aˬ dui˗ahˇ nui ma laˆ cawˆ nehˬ laꞈ˗euˬ deuˬ˗ahˇ jiˇ ehˇ mawꞈ˗eu maˬ ngeuˇ˗a. Pawˇluˆ Miˬyehˇ˗euˬ nui noeˬ nui duˇ˗ahˇ diˇ daˬ˗ehˇ maˬ naˇ haˬ geuꞈ˗eu deuˬ˗ahˇ ngehˬ keuˆ luꞈ˗eu meh.

Aˬ dui Ka li zaˬ mehˇ nmˇ tiˬ gʼaˬ na tiˬ kʼehˬ maˬ kaˬ Miˬyehˇ˗euˬ dawˬ˗ahˇ maˬ naˇ haˬ geuꞈ gaˇ ya mawˇ ngeh, a aˬ dui aˬ yawꞈ nehˬ˗ehˇ cawˬ maˬ cawˬ taꞈ lehˇ yawˬ haˇ yawˬ ha noeˬ tsehˆ nya˗eu meh. Heu naˇ yawˬ haˇ yawˬ ha noeˬ tsehˆ˗eu jeˬ pyeuꞈ˗eu miˇ neh, yawˬ ha˗euˬ nymˇ jiˇ laꞈ kʼoeˇ˗euˬ deuˬ nehˬ˗ehˇ maˬ ngeuˇ naˇ nui deuˬ nehˬ˗ehˇ maˬ ja uˇ. Aˬ dui teu gʼaˬ nehˬ˗ehˇ mehˬ bawˬ˗ahˇ maˬ ehˇ, tsaꞈ gaˬ˗iˇ gaˇ maˬ ehˇ, iˇ luꞈ ma siˬ. Tiˬ nah aˬ yawꞈ noeˬ poˆ noeˬ paˇ laˇ ngeh aˬ dui aˬ yawꞈ nehˬ˗ehˇ aˬ yawꞈ yaw oeˇ loꞈ˗ehˇ cawˬ cawˬ kʼoꞈ iˇ˗eu ma.