1. Nymˬ˗mˇ iˬ nah˗euˬ tsawˇ haˬ deuˬ myaˬ tiˬ paˆ aˬ jeˬ˗ahˇ tehꞈ˗ehˇ kaꞈ gʼa˗eu nga?

 Nymˬ˗mˇ iˬ nah˗euˬ tsawˇ haˬ deuˬ myaˬ tiˬ paˆ yawˬ ha˗euˬ gaˇ kawˆ tehꞈ˗ehˇ kaꞈ gʼa luꞈ˗eu maˬ ngeuˇ nga loˇ? Yaw jeˬ ma jeˬ, Soˇsho miˇdiˬ˗yaˬ laꞈ kʼoeˇ tiˬ gʼaˬ na yawˬ ha neh mˇ pyeuꞈ˗euˬ jeˬ aˬ cawˬ bi haw mawˇ˗eu gʼaˇ duˬ, kʼahˬ sehˇ jehˆ˗eu gʼaˇ duˬ leh jeh˗eu meh. Ehˇ kʼawꞈ Yeˬhawˇbaˬ˗ahˇ ja ceuˬ˗eu deuˬ naˇ ui cuiˆ tehꞈ meh. Heu kawˆ laꞈ kʼoeˇ aˬ dui Yeˬhawˇbaˬ˗ahˇ ja ceuˬ˗eu lehˇ ehˇ˗eu heu naˇ, aˬ jeˬ˗ahˇ ehˇ˗eu nga? Aˬ dui Yeˬhawˇbaˬ˗ahˇ aˬ jeˬ baˬ da neh ja ceuˬ˗eu nga? lehˇ ja sawˇ˗awˇ, Yeˬhawˇbaˬ za geuˇ˗eu ja ceuˬ˗eu jeˬ˗ahˇ aˬ joˆ˗ehˇ biꞈ nya˗eu nga? Gʼawˬ myahˇ maˬ gʼeh˗ehˇ Yeˬhawˇbaˬ aˬ yawꞈ˗euˬ tsawˇ myahˇ ja ceuˬ˗eu jeˬ aˬ joˆ˗ehˇ bi za˗eu nga? lehˇ jiˇ ja sawˇ ma.

Yeˬhawˇbaˬ˗ahˇ ja ceuˬ˗eu lehˇ ehˇ˗eu heu naˇ aˬ jeˬ˗ahˇ ehˇ˗eu nga?

 2. Yeˬhawˇbaˬ Siˇnaˆ gawˬ jawˬ˗ahˇ aˬ yawꞈ˗euˬ baoˬ yaw shehꞈ aˬ joˆ˗ehˇ bi mawˇ˗euˬ nga? (Sahˬ boꞈ baˆ kʼoˆ˗euˬ aˇ baˇ˗ahˇ jiˇ haw.)

² Ja ceuˬ˗eu lehˇ ehˇ˗eu heu naˇ aˬ jeˬ nga? Jaˇliꞈ˗ahˇ “ja ceuˬ” lehˇ ehˇ˗eu heu naˇ, tiˬ gʼaˬ gʼaˬ˗ahˇ ciˬ poeˬ˗eu aˬ jeˬ˗ahˇ maˬ kaˬ ehˇ mawꞈ˗eu meh. Yeˬhawˇbaˬ Iˇsaˬleˬlaˆ tsawˇ haˬ deuˬ˗ahˇ zaˬ kʼaˆ geuꞈ luꞈ˗eu Iˇjiˇtuˆ˗ahˇ neh sheuˬ doˆ laꞈ˗euˬ tiˬ kʼehˬ naˇ, aˬ yawꞈ˗euˬ baoˬ hawˇ˗eu yaw shehꞈ kʼahˬ sehˇ bi mawˇ˗euˬ meh. Miˬyehˇ˗ahˇ mawˇ dzoeˇ˗eu gʼaˇ duˬ Iˇsaˬleˬlaˆ tsawˇ haˬ aˇ lam aˇ lam gʼaˬ˗ahˇ neh, Siˇnaˆ gawˬ jawˬ dawˬ dah˗ahˇ uiˬ laˇ taˬ˗euˬ aˇ baˇ˗ahˇ noeˬ mawˇ haw sheˇ. Mˬ jeˬ jeˬ jeˬ˗ehˇ mˬ myawꞈ myawꞈ myawꞈ˗ehˇ zahˇ tsui ni gʼeh le˗awˇ, mˬ dmˇ deuˬ gawˬ jawˬ kʼoeˇ taˆ ja le˗euˬ meh. Kʼaˆ dui dui˗eu daˇ kʼeh baw˗eu teˇ saˇ gaˬ doˆ le˗awˇ, gawˬ jawˬ tiˬ jawˬ jawˬ lah ni mˬ kʼoeˬ tahˬ byah jiˇ˗awˇ miˇ luˆ luˆ ma luˆ laˇ˗euˬ meh. (Doˆ˗iˇ˗eu 19:16-18; 24:17; Ja ceuˬ 68:8) Shaˇ noeˬ haw sheˇ, Iˇsaˬleˬlaˆ tsawˇ haˬ deuˬ Yeˬhawˇbaˬ˗euˬ baoˬ yaw shehꞈ˗ahˇ ya mawˇ ngeh, aˇ naˆ ni zahˬ leˇ paˬ nga?

 3. Yeˬhawˇbaˬ˗ahˇ aˬ jeˬ lehˇ ja ceuˬ nya˗eu nga?

³ Aˬ dui maꞈ loꞈ˗ehˇ gʼeh˗eu tsawˇ haˬ Yeˬhawˇbaˬ˗ahˇ ja ceuˬ nya ngaˇ laˬ? Ja ceuˬ nya meh. Ja ceuˬ nya˗eu tiˬ jeˬ naˇ, aˬ cawˬ deuˬ˗ahˇ Yeˬhawˇbaˬ˗euˬ baoˬ yaw shehꞈ kʼahˬ sehˇ gaˇ kawˆ ja nehˬ˗awˬ. Dzaˇ˗iˬ tiˬ jeˬ naˇ, Yeˬhawˇbaˬ baˬ da neh mˇ pyeuꞈ nya˗euˬ yawˬ jeˬ na luꞈ gʼaˇ duˬ  ja ceuˬ˗eu heu pyeuꞈ meh. (Iˇsaˬyaˇ 26:12) Yeˬhawˇbaˬ˗ahˇ ja ceuˬ˗awˇ ciˬ huiˬ ciˬ mahˇ˗eu tiˬ gʼaˬ naˇ, Daˬbiˇ pyeuꞈ meh. Daˬbiˇ Iˇsaˬleˬlaˆ deuˬ˗euˬ mehˬ shi “Baoˬ maˬ ehˇ, yaw shehꞈ kʼahˬ sehˇ maˬ ehˇ, huiˬ dui mahˇ dui dui˗eu jeˬ maˬ ehˇ, gʼaˬ leˇ˗eu jeˬ maˬ ehˇ, zahˬ dui dui leˇ paˬ˗ehˇ gʼeh˗eu jeˬ maˬ ehˇ, dawˬ tawˆ luꞈ nawˬ˗euˬ laꞈ kʼoeˇ byah luꞈ meh. Mˬ hawˇ˗eu miˇ kʼoeˇ taˆ kʼaˇ jaˆ˗eu yawˬ jeˬ na luꞈ nawˬ˗euˬ pyeuꞈ˗awˇ, dawˬ tawˆ luꞈ kʼoeˇ taˆ uˆ lahˇ˗eu huiˬ dzehˬ˗eu Sahˬpaˬ nawˇ meh” lehˇ guiˬ lahˬ shaˇ˗euˬ meh. Daˬbiˇ guiˬ lahˬ shaˇ gʼaˬ ngeh, “tsawˇ haˬ aˇ maꞈ dawˬ tawˆ luꞈ. . . . Sahˬpaˬ Miˬyehˇ˗ahˇ ja ceuˬ˗euˬ meh.”—1 Laˬsaˬbaˬ 29:11, 20.

 4. Yeˬsuˇ Yeˬhawˇbaˬ˗ahˇ aˬ joˆ˗ehˇ ciˬ huiˬ ciˬ mahˇ˗euˬ nga?

⁴ Yeˬsuˇ miˇ tsaˬ kʼoeˇ taˆ jawˇ ngeh, aˬ yawꞈ zahˬ leˇ paˬ˗ehˇ gʼeh˗eu jeˬ jahˇ˗euˬ heu˗aˬ, aˬ yawꞈ˗euˬ Aˬda neh biꞈ˗euˬ baoˬ baˬ da neh meh lehˇ tsawˇ haˬ deuˬ˗ahˇ ehˇ nehˬ˗eu heu neh Yeˬhawˇbaˬ˗ahˇ ciˬ huiˬ ciˬ mahˇ˗euˬ meh. (Maˬkuˆ 5:18-20) Kʼoeˇ naˇ Yeˬsuˇ aˬ yawꞈ˗euˬ Aˬda˗euˬ gaˇ kawˆ ngehˬ˗eu jeˬ hawˇ˗eu aˬ cawˬ deuˬ˗ahˇ mˇ nehˬ˗eu jeˬ heu neh maˬ ehˇ, Yeˬhawˇbaˬ˗ahˇ ciˬ huiˬ ciˬ mahˇ˗euˬ meh. Yaw jeˬ ma jeˬ tiˬ poˆ Yeˬsuˇ Yuˇdaˆ tsawˇ haˬ˗euˬ uˬ duˬ tahˬ nymˇ laꞈ kʼoeˇ mehˬ nehˬ tsoˆ nehˬ luꞈ gaˇ, tseˇ yehꞈ kʼoꞈ byah ni nehꞈ uˇ˗euˬ zaˬ miˬ zaˬ tiˬ gʼaˬ jawˇ˗eu meh. Nehꞈ aˬ yawꞈ˗ahˇ uˇ leˇ taˬ˗euˬ miˇ neh aˬ yawꞈ daˇ tsuiꞈ kʼoꞈ˗iˇ˗awˇ, maˬ mˇ dawˇ nya ni pyeuꞈ˗iˇ˗euˬ meh. Aˬ yawꞈ shaˬ zahˬ naꞈ dui dui luꞈ˗eu meh. Yeˬsuˇ aˬ yawꞈ˗ahˇ gʼawˬ shaˬ haw gaˬ˗awˇ, aˬ yawꞈ jawˇ gaˇ˗iˇ˗awˇ nahˬ yu ni “Zaˬ miˬ zaˬ˗oˇ, nawˬ˗euˬ naˇ gawˇ˗ahˇ nawˇ buˬ˗iˇ˗euˬ meh” lehˇ ehˇ nehˬ˗euˬ meh. Kʼoeˇ naˇ Yeˬsuˇ zaˬ miˬ zaˬ teu gʼaˬ kʼoeˇ taˆ aˬ laꞈ cawˬ daˆ nehˬ ngeh, tiˬ poˆ tehꞈ˗ehˇ daˇ tsuiꞈ paˇ dawˇ kʼoꞈ laˇ˗awˇ, zaˬ miˬ zaˬ teu gʼaˬ “Miˬyehˇ˗ahˇ ja ceuˬ˗euˬ meh.” (Luˇkaꞈ 13:10-13) Zaˬ miˬ zaˬ teu gʼaˬ loꞈ˗ehˇ duˇ ni aˬ dui jiˇ Yeˬhawˇbaˬ˗ahˇ ciˬ huiˬ ciˬ mahˇ˗awˇ ja ceuˬ paˬ˗ehˇ gʼeh˗eu gaˇ kawˆ gʼawˬ mya ni jaˆ˗eu meh.

Aˬ dui Yeˬhawˇbaˬ˗ahˇ aˬ jeˬ baˬ da neh ja ceuˬ˗eu nga?

 5. Aˬ jeˬ jeˇ baˬ da neh aˬ dui Yeˬhawˇbaˬ˗ahˇ yaw zeu baw˗eu nga?

⁵ Aˬ dui Yeˬhawˇbaˬ˗ahˇ yaw zeu baw dui dui˗eu miˇ neh, aˬ yawꞈ˗ahˇ ciˬ huiˬ˗awˇ ja ceuˬ˗eu ma. Yeˬhawˇbaˬ˗ahˇ yaw zeu baw paˬ˗ehˇ gʼeh˗eu gaˇ kawˆ gʼawˬ mya ni jaˆ˗eu meh. Yaw jeˬ ma jeˬ, Yeˬhawˇbaˬ˗aˬ, dawˬ tawˆ luꞈ˗euˬ kʼoeˇ taˆ baoˬ hui˗eu Miˬyehˇ pyeuꞈ meh. (Ja ceuˬ 96:4-7) Kʼoeˇ naˇ beh taˬ˗euˬ jeˬ˗ahˇ haw˗awˇ neh aˬ yawꞈ˗aˬ, aˇ naˆ ni zaˬ siˬ nui gahˇ ahˇ˗eu lehˇ siˬ laˇ˗eu meh. Aˬ yawꞈ dehꞈ˗eu jeˬ biꞈ˗eu gʼaˬ pyeuꞈ˗awˇ, yaw dehꞈ dehꞈ daˆ leꞈ nya ni lehˬ hmˬ nehˬ˗euˬ gʼaˬ jiˇ pyeuꞈ meh. (Pah mehˬ˗eu 4:11) Aˬ yawꞈ saˇ jaˇ ziꞈ˗eu meh. (Pah mehˬ˗eu 15:4) Kʼaˇ mˇ kʼaˇ shaˇ˗eu jeˬ mˇ pyeuꞈ jiˇ nya˗awˇ, saˇ jaˇ dzaˬ taˬ˗euˬ tiˬ hmˬ˗iˬ maˬ bi dzeuˇ˗iˇ ni mˇ byah nehˬ jiˇ˗eu meh. (Yawˇshuˆ 23:14) Teu baˬ da neh bawˇlawˇpeh Yeˬlaˬmiˇ Yeˬhawˇbaˬ nehˬ˗ehˇ taꞈ leˇ˗awˇ, “Tsawˇ jeuˬ heu myaˆ kʼoeˇ taˆ tsawˇ gahˇ dzehˬ˗eu tsawˇ haˬ maˬ ehˇ, miˇ kʼahˬ sahˬ paˬ kʼaˇ ngeuˇ˗eu deuˬ maˬ ehˇ, nawˬ˗ahˇ duˇ˗eu tiˬ gʼaˬ˗iˬ maˬ jawˇ˗a” lehˇ ehˇ taˬ˗euˬ meh. (Yeˬlaˬmiˇ 10:6, 7) Teu miˇ neh mˬ taˆ Aˬda Yeˬhawˇbaˬ˗ahˇ yaw zeu baw paˬ˗ehˇ gʼeh˗eu gaˇ kawˆ gʼawˬ mya ni jaˆ˗eu meh. Yeˬhawˇbaˬ aˬ dui˗euˬ yaw zeu baw˗eu jeˬ tehꞈ˗ehˇ maˬ ngeuˇ˗eu aˬ dui˗euˬ nui gaˬ jiˇ za geuˇ˗eu meh.

 6. Aˬ dui Yeˬhawˇbaˬ˗ahˇ aˬ jeˬ baˬ da neh gaˬ˗eu nga?

⁶ Aˬ dui Yeˬhawˇbaˬ˗ahˇ gaˬ dui dui˗eu miˇ neh, aˬ yawꞈ˗ahˇ ja ceuˬ˗eu ma. Aˬ dui Yeˬhawˇbaˬ˗ahˇ aˬ jeˬ˗euˬ seuˆ dzeuꞈ aˇ gʼehˇ baˬ da neh gaˬ˗eu nga? Yeˬhawˇbaˬ naˇ, gʼawˬ shaˬ gaˬ nya˗eu Miˬyehˇ pyeuꞈ˗eu miˇ neh ma. (Ja ceuˬ 103:13; Iˇsaˬyaˇ 49:15) Aˬ yawꞈ˗euˬ gaˇ mˇ zaˬ deuˬ˗ahˇ deuˬ leˇ naˇ leˇ ngeh, aˬ yawꞈ˗ahˇ jiˇ teu loꞈ˗ehˇ gʼeh leˇ˗eu meh. (Zaˬkaˬliˇ 2:8) Aˬ dui aˬ yawꞈ nehˬ˗ehˇ yaw awˬ awˬ˗ehˇ cawˬ cawˬ laˇ nya ni gaˇ ma shaˇ dahˇ nehˬ taˬ˗euˬ meh. (Ja ceuˬ 25:14; Gʼaˬkʼehˇ 17:27) Aˬ yawꞈ naˇ taˬ aw˗awˇ “mˬ hawˇ˗eu miˇ tsaˬ˗ahˇ ya mawˇ ni, aˬ yawꞈ awˆ kʼoꞈ˗awˇ haw˗eu meh. Shaˬ˗eu zahˬ˗eu tsawˇ haˬ deuˬ˗ahˇ, kʼaˬ lehˇ tsahˬ˗ahˇ neh aˬ yawꞈ gʼeu tuˇ” nehˬ˗eu meh. (Ja ceuˬ 113:6, 7) Heu naˆ naˆ˗ehˇ muiˬ˗eu Miˬyehˇ˗ahˇ maˬ ja ceuˬ mawꞈ˗eu aˬ suˇ gʼaˬ paˇ jawˇ nmˇ—Ja ceuˬ 86:12.

 7. Aˬ dui aˬ jeˬ˗euˬ aˬ kawˬ˗aˬ za taˬ˗euˬ nga?

⁷ Aˬ dui aˬ cawˬ deuˬ˗ahˇ Yeˬhawˇbaˬ˗euˬ gaˇ kawˆ bi siˬ mawꞈ˗eu miˇ neh aˬ yawꞈ˗ahˇ ja ceuˬ˗eu ma. Tsawˇ haˬ myaˬ tiˬ paˆ Yeˬhawˇbaˬ nehˬ˗ehˇ taꞈ leˇ˗awˇ maˇ maˇ ni gʼeh˗eu gaˇ kawˆ˗ahˇ maˬ siˬ  nya˗a. Aˬ jeˬ miˇ neh ehˇ naˇ, tsawˇ haˬ deuˬ Saˬdaˬ neh Yeˬhawˇbaˬ˗euˬ gaˇ kawˆ ja bu taˬ˗euˬ jeˬ˗ahˇ jah˗eu miˇ neh meh. (2 Gawˇliˬtu 4:4) Saˬdaˬ tsawˇ haˬ deuˬ˗ahˇ Yeˬhawˇbaˬ naˇ nui ma jaˆ˗eu Miˬyehˇ pyeuꞈ˗awˇ, tsawˇ haˬ deuˬ˗ahˇ maˬ ngehˬ gʼeh˗eu uˬ taꞈ, miˇ tsaˬ kʼoeˇ taˆ˗euˬ shaˬ zahˬ deuˬ jiˇ aˬ yawꞈ neh bi pyeuꞈ laˇ˗euˬ meh lehˇ noeˬ leˇ ni jahˇ˗eu meh. Ehˇ kʼawꞈ aˬ dui naˇ, aˬ dui˗euˬ Miˬyehˇ nehˬ˗ehˇ taꞈ leˇ˗eu maˇ maˇ ni gʼeh˗eu gaˇ kawˆ˗ahˇ yaw muiˬ˗ehˇ siˬ nya taˬ˗euˬ ma. Aˬ dui naˇ tsawˇ haˬ deuˬ˗ahˇ Yeˬhawˇbaˬ˗euˬ gaˇ kawˆ bi siˬ nya laˇ˗awˇ, ja ceuˬ laˇ nya ni caw ba nehˬ˗eu aˬ kawˬ˗aˬ za taˬ˗euˬ ma. (Iˇsaˬyaˇ 43:10) Ja ceuˬ 96-ahˇ Yeˬhawˇbaˬ˗ahˇ ja ceuˬ˗eu gaˇ kawˆ nehˬ˗ehˇ taꞈ leˇ˗awˇ, kʼaˆ kʼaˆ ni ngehˬ keuˆ taˬ˗euˬ meh. Aˬ dui Ja ceuˬ yaw huiˬ 96 laꞈ kʼoeˇ˗euˬ Jaˇliꞈ aˇ deuˆ tiˬ deuˆ na˗ahˇ ja sawˇ ngeh, Yeˬhawˇbaˬ˗ahˇ aˬ joˇ joˆ˗ehˇ ja ceuˬ nya˗eu nga lehˇ shaˇ noeˬ.

Aˬ dui Yeˬhawˇbaˬ za geuˇ˗eu ja ceuˬ˗eu jeˬ˗ahˇ aˬ joˆ˗ehˇ biꞈ nya˗eu nga?

 8. Aˬ dui Yeˬhawˇbaˬ˗ahˇ ja ceuˬ nya˗eu tiˬ jeˬ naˇ, aˬ jeˬ nga? (Ja ceuˬ 96:1-3)

⁸ Ja ceuˬ 96:1-3-ahˇ gui. Aˬ dui Yeˬhawˇbaˬ˗euˬ gaˇ kawˆ ja˗eu heu neh, aˬ yawꞈ˗ahˇ ja ceuˬ nya. Jaˇliꞈ aˇ deuˆ heu deuˬ˗ahˇ ‘Sahˬpaˬ Miˬyehˇ˗ahˇ caˇ˗awˇ ja ceuˬ˗awˬ,’ “aˬ yawꞈ˗euˬ tsawˇ myahˇ˗ahˇ ciˬ huiˬ ciˬ mahˇ˗awˬ,” “aˬ yawꞈ ka kʼoꞈ nehˬ laꞈ˗euˬ laˬ kʼaˬ cehˇ˗eu guiˬ lahˬ dawˬ ja gaˬ˗awˬ,” “aˬ yawꞈ˗euˬ yaw shehꞈ kʼahˬ sehˇ gaˇ kawˆ, tsawˇ jeuˬ dawˬ tawˆ luꞈ˗ahˇ dzawˇ nehˬ” lehˇ ehˇ taˬ˗euˬ meh. Heu dawˬ tawˆ luꞈ mˬ taˆ Aˬda˗ahˇ ja ceuˬ nya˗eu jeˬ pyeuꞈ meh. Saˇ jaˇ ziꞈ˗eu Yuˇdaˆ tsawˇ haˬ deuˬ hawˇ˗eu dahˬ beh˗euˬ Ka li zaˬ deuˬ Yeˬhawˇbaˬ neh aˬ yawꞈ maꞈ˗euˬ gʼaˇ duˬ mˇ nehˬ laꞈ˗euˬ jeˬ gaˇ kawˆ aˬ cawˬ deuˬ˗ahˇ dzawˇ gaˬ˗eu gʼaˇ duˬ hawˇ˗eu Yeˬhawˇbaˬ˗euˬ tsawˇ myahˇ˗ahˇ laˆ piˇ˗eu gʼaˇ duˬ nyi naˬ nyi naˬ˗ehˇ maˬ jawˇ˗aˬ. (Daˬyeˬlaˇ 3:16-18; Gʼaˬkʼehˇ 4:29) Aˬ dui jiˇ teu loꞈ˗ehˇ aˬ joˆ˗ehˇ jahˇ nya˗eu nga?

9-10. Aˬ dui Ehˇjeˬliˬnaˬ neh ya puˬ ya mawˇ˗euˬ jeˬ˗ahˇ neh aˬ jeˬ ya siˬ˗euˬ nga? (Aˇ baˇ˗ahˇ jiˇ haw.)

⁹ Aˬmeˬliˇkaˬ miˇ kʼahˬ˗ahˇ jawˇ˗eu Ehˇjeˬliˬnaˬ a lehˇ kuˇ˗eu mehˇ nmˇ aˬ baˇ tiˬ gʼaˬ neh ya puˬ ya mawˇ˗euˬ gaˇ kawˆ˗ahˇ haw ma. Ehˇjeˬliˬnaˬ gaˇ mˇ duˬ˗ahˇ Yeˬhawˇbaˬ˗euˬ tsawˇ myahˇ˗ahˇ kʼaˬ duˬ ni ngehˬ piˇ˗euˬ meh. Aˬ yawꞈ gaˇ mˇ duˬ tiˬ tsahˇ˗ahˇ gaˇ mˇ dahˬ beh˗iˇ ngeh, gaˇ mˇ laˇ˗eu yaw shuiꞈ deuˬ yawˬ ha˗euˬ gaˇ kawˆ ya ehˇ nehˬ˗eu mehˬ bawˬ jahˇ˗eu aˇ nah lehˇ jaˆ˗eu meh. Teu miˇ neh aˬ yawꞈ Yeˬhawˇbaˬ˗euˬ Saˇ kiˇ tiˬ gʼaˬ ya pyeuꞈ˗eu aˇ naˆ ni laˬ kʼaˬ cehˇ˗eu lehˇ gaˇ mˇ cawˬ deuˬ˗ahˇ bi siˬ˗eu gʼaˇ duˬ aˇ baˇ lawˬ muˇ lehˬ hmˬ taˬ˗euˬ meh. Ehˇ kʼawꞈ aˬ yawꞈ˗euˬ jeˬ hu ngehˬ˗iˇ˗euˬ aˬ li tiˬ gʼaˬ, aˬ yawꞈ˗euˬ aˬ da aˬ ma Yeˬhawˇbaˬ˗euˬ Saˇ kiˇ pyeuꞈ˗a lehˇ ehˇ˗awˇ, Yeˬhawˇbaˬ Saˇ kiˇ deuˬ˗euˬ jah jeˬ jah kawˆ˗ahˇ cehꞈ lehꞈ ka niˇ gʼa˗eu meh. Ehˇjeˬliˬnaˬ “Aˬ yawꞈ ehˇ gaˇ ya gaˬ ngeh, ngaˬ˗ahˇ yaw dzuˬ dzuˬ laˇ nyaˬ. Ehˇ kʼawꞈ ngaˇ yawˬ ha˗ahˇ ‘Yeˬhawˇbaˬ˗euˬ gaˇ  kawˆ maˬ ngeuˇ˗eu jeˬ˗ehˇ ngehˬ gaˇ ngaˇ ciˬ cuˇ ni maˬ jawˇ nya nga. Ngaˇ Miˬyehˇ˗euˬ tsawˇ myahˇ˗ahˇ ya ngehˬ piˇ nga’ lehˇ shaˇ noeˬ˗euˬ ma” lehˇ ehˇ˗eu meh.

¹⁰ Aˬ li kʼoeˇ gʼaˬ ngehˬ gʼaˬ ngeh, Ehˇjeˬliˬnaˬ kawˇ ma˗ehˇ nui ma laꞈ kʼoeˇ neh guiˬ lahˬ shaˇ˗awˇ, aˬ li kʼoeˇ gʼaˬ˗ahˇ nahˬ yu ni heu loꞈ˗ehˇ ehˇ nehˬ˗euˬ meh. “Ngaˇ jiˇ ni nawˇ loꞈ˗ehˇ Yeˬhawˇbaˬ Saˇ kiˇ˗euˬ nymˇ jiˇ laꞈ kʼoeˇ huiˬ laˇ˗awˇ, nymˬ˗mˇ keuˆ ni Yeˬhawˇbaˬ˗euˬ Saˇ kiˇ tiˬ gʼaˬ pyeuꞈ luꞈ ma.” Teu ngeh tiˬ gʼaˬ˗iˬ tiˬ jeˬ˗iˬ maˬ ngehˬ ni ciˬ cuˇ ni gʼeh˗iˇ˗euˬ meh. Teu ngeh jawˇ tsaˬ maˬ siˬ ni pyeuꞈ laˇ˗euˬ kʼawꞈ, Ehˇjeˬliˬnaˬ mehˇ nmˇ deuˬ nehˬ˗ehˇ Miˬyehˇ˗euˬ gaˇ laˬ kʼaˬ tiˬ cehˇ mˇ˗euˬ aˇ baˇ deuˬ bi haw˗awˇ, yawˬ ha˗euˬ jah jeˬ jah kawˆ nahˬ yu ni ja nehˬ˗euˬ meh. (1 Beˬtuˆluˆ 3:15) Ehˇjeˬliˬnaˬ ngehˬ gʼaˬ ngeh, aˬ li kʼoeˇ gʼaˬ˗euˬ teˇ saˇ ga aw le˗awˇ, ngaˇ jiˇ yaw nyiˇ ngeh Saˇ kiˇ pyeuꞈ˗eu aˬ da aˬ ma nehˬ˗ehˇ laˬ kʼaˬ tiˬ cehˇ ya jawˇ˗euˬ gaˇ noeˬ luꞈ nya siˬ lehˇ ehˇ˗eu meh. Ehˇjeˬliˬnaˬ “Miˬyehˇ˗euˬ tsawˇ myahˇ˗ahˇ ngehˬ piˇ˗eu heu˗aˬ, mˇ paˬ˗ehˇ gʼeh˗eu jeˬ pyeuꞈ˗awˇ, aˇ poeˬ baw dui dui miˇ˗a” lehˇ ehˇ˗eu meh. Aˬ cawˬ deuˬ Miˬyehˇ˗ahˇ yaw zeu maˬ baw kʼawꞈ, aˬ dui Miˬyehˇ˗ahˇ ya ciˬ huiˬ ya ciˬ mahˇ˗eu miˇ neh aˇ poeˬ baw dui dui miˇ˗a.

11. Yeˬhawˇbaˬ˗euˬ gaˇ mˇ zaˬ deuˬ Ja ceuˬ 96:8 laꞈ kʼoeˇ˗euˬ Jaˇliꞈ zahˇ˗ahˇ aˬ joˆ˗ehˇ mˇ caw laꞈ˗euˬ nga?

¹¹ Ja ceuˬ 96:8-ahˇ gui. Aˬ dui yawˬ ha jaˆ˗eu jeˬ damˬ˗awˇ Yeˬhawˇbaˬ˗ahˇ ja ceuˬ nya. Yeˬhawˇbaˬ˗ahˇ uˬ duˬ tahˬ˗eu deuˬ gaˇ hu ba neh Miˬyehˇ˗ahˇ heu loꞈ˗ehˇ ja ceuˬ laꞈ˗euˬ meh. (Dawˬdaˬ 3:9) Yaw jeˬ ma jeˬ, Iˇsaˬleˬlaˆ tsawˇ haˬ deuˬ uˬ duˬ tahˬ nymˇ nymˇ ma tsoˆ˗eu gʼaˇ duˬ hawˇ˗eu laˆ saˆ˗eu gʼaˇ duˬ pyuˇ damˬ nehˬ˗euˬ meh. (2 Sahˬpaˬ 12:4, 5; 1 Laˬsaˬbaˬ 29:3-9) Yeˬsuˇ˗euˬ zaˬ lahˇ deuˬ jiˇ “yawˬ ha kʼaˇ jaˆ˗eu jeˬ yuˇ doˆ˗awˇ” Yeˬsuˇ hawˇ˗eu gʼaˬ kʼehˇ deuˬ˗ahˇ caw ba˗euˬ meh. (Luˇkaꞈ 8:1-3) Dahˬ beh˗euˬ Ka li zaˬ deuˬ jiˇ pyuˇ damˬ nehˬ˗awˇ, uˬ jeˬ jaˬ lehˇ˗euˬ shaˬ zahˬ˗ahˇ ya puˬ˗eu mehˇ nmˇ deuˬ˗ahˇ caw ba nehˬ˗euˬ meh. (Gʼaˬkʼehˇ 11:27-29) Nymˬ˗mˇ iˬ nah aˬ dui jiˇ nui ma keuˆ˗awˇ damˬ nehˬ˗eu heu neh Yeˬhawˇbaˬ˗ahˇ ja ceuˬ nya˗eu meh.

12. Aˬ dui neh damˬ nehˬ˗eu jeˬ Yeˬhawˇbaˬ˗ahˇ ja ceuˬ˗eu jeˬ aˬ joˆ˗ehˇ pyeuꞈ˗eu nga? (Aˇ baˇ˗ahˇ jiˇ haw.)

¹² Aˬ dui neh damˬ˗euˬ jeˬ Yeˬhawˇbaˬ˗ahˇ ja ceuˬ˗eu jeˬ aˬ joˆ˗ehˇ pyeuꞈ˗eu nga lehˇ yaw jeˬ ma jeˬ tiˬ kawˆ˗ahˇ haw ma. 2020 kʼoꞈ˗ahˇ Ziˬbaˇboeˬ miˇ kʼahˬ˗ahˇ uˬ yehˇ maˬ yehˇ ni gʼawˬ myahˇ ni jaˆ˗euˬ miˇ neh, tsawˇ haˬ aˇ lam gʼaˬ˗ahˇ mehꞈ˗eu shuꞈ˗eu jeˬ keuˆ le˗euˬ meh. Pa˗liˇsaꞈ˗kaꞈ lehˇ kuˇ˗eu mehˇ nmˇ aˬ buˇ tiˬ gʼaˬ jiˇ dzaˬ˗eu maˬ jaˆ ni ya shaˬ˗euˬ meh. Toˆ˗ehˇ gʼeh˗eu shaˬ zahˬ˗ahˇ ya puˬ˗euˬ kʼawꞈ, aˬ yawꞈ jawˇ nah dzeuˇ smˬ nah hawˇ˗eu ngaˬ nah ngeh nah˗ahˇ Miˬyehˇ˗euˬ gaˇ mˇ˗eu lehˇ aˇ yamˬ biˇ doˆ taˬ˗euˬ meh. Deh ma tsoˆ˗eu aˇ yamˬ˗ahˇ kʼawꞈ maˬ tsaꞈ gaˬ˗iˇ ni tiˬ jawˇ˗iˬ maˬ byehˇ˗aˬ. Teu miˇ neh pu zaˬ deuˬ “Nawˇ nmˇ hawˬ ya dzahˬ sehꞈ˗eu ngaˇ de” lehˇ ehˇ˗eu meh. Pa˗liˇsaꞈ˗kaꞈ aˬ yawꞈ maꞈ˗ahˇ  “Yeˬhawˇbaˬ aˬ yawꞈ˗euˬ gaˇ mˇ zaˬ deuˬ˗ahˇ tiˬ jawˇ˗iˬ maˬ byehˇ˗a” lehˇ ehˇ nehˬ˗euˬ meh. Teu gaˇ neh tiˬ kʼehˬ naˇ, aˬ yawꞈ aˬ dui˗euˬ aˇ maꞈ aˇ muˇ neh caw ba nehˬ laꞈ˗euˬ jeˬ˗ahˇ za˗euˬ meh. Aˬ dui neh damˬ nehˬ˗euˬ jeˬ baˬ da neh, aˇ maꞈ aˇ muˇ loˬ˗eu mehˇ nmˇ deuˬ˗ahˇ caw ba nehˬ nya˗euˬ meh. Pu zaˬ deuˬ teu loꞈ˗ehˇ caw ba nehˬ gaˇ ya mawˇ ngeh, aˬ yawꞈ maꞈ˗euˬ nui ma˗ahˇ zaw leˇ˗awˇ, Pa˗liˇsaꞈ˗kaꞈ˗ahˇ “Nawˬ˗euˬ Miˬyehˇ˗aˬ, nawˬ˗ahˇ tiˬ jawˇ˗iˬ maˬ byehˇ dzeh nga. Nga maꞈ jiˇ aˬ yawꞈ˗euˬ gaˇ kawˆ˗ahˇ siˬ nya mawꞈ miˇ˗a” lehˇ ehˇ˗eu meh. Nymˬ˗mˇ naˇ gaˇ dahˬ gaˇ dzeˇ jawˇ˗eu shiꞈ gʼaˬ aˬ yawꞈ nehˬ˗ehˇ mehˬ bawˬ˗ahˇ iˇ luꞈ meh.

13. Aˬ dui˗euˬ mˇ jeˬ shaˇ kawˆ neh Yeˬhawˇbaˬ˗ahˇ ja ceuˬ nya (Ja ceuˬ 96:9)

¹³ Ja ceuˬ 96:9-ahˇ gui. Aˬ dui˗euˬ mˇ jeˬ shaˇ kawˆ neh Yeˬhawˇbaˬ˗ahˇ ja ceuˬ nya. Yeˬhawˇbaˬ˗euˬ uˬ duˬ tahˬ nymˇ nymˇ ma˗ahˇ mˇ˗eu piˇ ma deuˬ naˇ, gʼawˇ mawˇ shawˇ jehˆ ni ya bi gʼeh˗eu meh. (Doˆ˗iˇ˗eu 40:30-32) Ehˇ kʼawꞈ teu naˆ maˬ tseˇ aˇ yeˇ huiˬ˗eu jeˬ naˇ, mˇ jeˬ shaˇ kawˆ shawˇ jehˆ ni ya bi gʼeh˗eu heu meh. (Ja ceuˬ 24:3, 4; 1 Beˬtuˆluˆ 1:15, 16) Aˬ dui maˬ muiˬ maˬ shawˇ˗eu nui noeˬ hawˇ˗eu mˇ jeˬ shaˇ kawˆ pyeuꞈ˗eu “nui ma yaw oeˇ˗ahˇ” byehˇ dzeh nya ni ya leh jeh˗awˇ, Yeˬhawˇbaˬ loꞈ˗ehˇ noeˬ nya ni hawˇ˗eu aˬ yawꞈ˗euˬ seuˆ dzeuꞈ aˇ gʼehˇ deuˬ˗ahˇ jiˇ dzaw geuꞈ˗eu jeˬ pyeuꞈ˗eu “nui ma yaw shuiꞈ” ahˇ laˇ ni ya leh jeh˗eu meh. (Gawˇlawˇsehˇ 3:9, 10) Yeˬhawˇbaˬ caw ba˗eu miˇ neh, haiˬ dui doeˇ dui dui˗eu kʼawꞈ ni dehꞈ poˆ dehꞈ paˇ nya˗awˇ, nui ma yaw shuiꞈ beˬ paˇ laˇ nya˗eu meh.

14. Jehˇ˗kuiˬ˗euˬ gaˇ kawˆ˗ahˇ neh aˬ dui aˬ jeˬ ya siˬ˗euˬ nga? (Aˇ baˇ˗ahˇ jiˇ haw.)

¹⁴ Jehˇ˗kuiˬ lehˇ kuˇ˗eu aˬ li tiˬ gʼaˬ haiˬ dui doeˇ dui dui˗eu miˇ neh, aˬ cawˬ deuˬ aˬ yawꞈ˗ahˇ nehꞈ lehˇ tsawˇ myahˇ myahˇ nehˬ˗euˬ meh. Aˬ yawꞈ˗ahˇ sehꞈ˗eu lehˇ yaˇ kʼaˬ daˇ dzeuˇ taˬ˗euˬ meh. Ehˇ kʼawꞈ aˬ yawꞈ ya shiˇ˗eu lehˇ dawˬ luꞈ˗eu aˇ yamˬ˗ahˇ tawˬ˗ahˇ tsaꞈ gaˬ laˇ˗euˬ mehˇ nmˇ aˬ li tiˬ gʼaˬ˗ahˇ Jaˇliꞈ dzaw ma lehˇ ehˇ nehˬ˗euˬ meh. Jehˇ˗kuiˬ haiˬ dui doeˇ dui dui˗eu tiˬ gʼaˬ pyeuꞈ kʼawꞈ, dehꞈ poˆ dehꞈ paˇ nya˗awˇ, iˇ cuꞈ shawˇ nya˗eu aˇ tiˆ˗ahˇ laˇ keuˆ nya˗euˬ meh. Jehˇ˗kuiˬ gʼawˬ naˆ ni paˇ˗iˇ˗euˬ miˇ neh, aˬ yawꞈ bi sehꞈ ngeh nah tawˬ˗ahˇ haw˗eu gʼawˬ mya gʼaˬ ngoeˇ˗eu meh. Tawˬ laꞈ kʼoeˇ gaˇ mˇ luꞈ˗eu yehˇ tiˬ gʼaˬ heu loꞈ˗ehˇ ehˇ˗eu meh. “Jehˇ˗kuiˬ naˇ heu gaˇ neh kʼaˇ doeˇ˗eu gʼaˬ pyeuꞈ haw˗euˬ kʼawꞈ, nymˬ˗mˇ naˇ kʼaˇ muiˬ˗eu gʼaˬ pyeuꞈ laˇ˗euˬ meh.” Jehˇ˗kuiˬ shiˇ dzeuˇ˗euˬ tiˬ jaw byah laˇ˗awˇ mehˇ nmˇ deuˬ tawˬ˗ahˇ mehˬ bawˬ jahˇ˗iˇ ngeh, mehˬ bawˬ˗ahˇ laˇ beh beh˗euˬ tawˬ zaˬ tiˬ gʼaˬ˗ahˇ ya mawˇ˗euˬ meh. Tawˬ zaˬ teu gʼaˬ mehˬ bawˬ˗ahˇ aˬ jeˬ baˬ da neh laˇ mawꞈ˗eu nga? Aˬ yawꞈ Jehˇ˗kuiˬ dehꞈ poˆ dehꞈ paˇ gaˇ ya mawˇ ngeh, aˬ yawꞈ˗euˬ nui ma˗ahˇ zaw leˇ˗awˇ, Miˬyehˇ˗euˬ gaˇ mˇ˗eu gʼaˇ duˬ aˬ jeˬ ya jahˇ˗eu nga lehˇ siˬ nya mawꞈ˗eu miˇ neh meh. Heu gaˇ haw  ngeh, aˬ dui˗euˬ mˇ jeˬ shaˇ kawˆ neh Yeˬhawˇbaˬ˗ahˇ ciˬ huiˬ ciˬ mahˇ nya˗eu lehˇ maˇ jawˆ ni siˬ laˇ˗eu meh.—1 Beˬtuˆluˆ 2:12.

Gʼawˬ myahˇ maˬ gʼeh˗ehˇ Yeˬhawˇbaˬ aˬ yawꞈ˗euˬ tsawˇ myahˇ ja ceuˬ˗eu jeˬ aˬ joˆ˗ehˇ bi za˗eu nga?

15. Gʼawˬ myahˇ maˬ gʼeh˗ehˇ Yeˬhawˇbaˬ aˬ yawꞈ˗euˬ tsawˇ myahˇ ciˬ huiˬ ciˬ mahˇ˗eu jeˬ za ni aˬ jeˬ jahˇ˗eu nga? (Ja ceuˬ 96:10-13)

¹⁵ Ja ceuˬ 96:10-13-ahˇ gui. Ja ceuˬ 96 jiˇ leˇ dzaˬ˗ahˇ Yeˬhawˇbaˬ naˇ dawˇ coe ni yaˇ kʼaˬ daˇ˗eu gʼaˬ pyeuꞈ˗awˇ, tsaˬ˗eu dawˇ˗eu Sahˬpaˬ pyeuꞈ˗eu lehˇ bi siˬ laꞈ˗eu meh. Gʼawˬ myahˇ maˬ gʼeh˗ehˇ Yeˬhawˇbaˬ aˬ yawꞈ˗euˬ tsawˇ myahˇ ja ceuˬ˗eu jeˬ aˬ joˆ˗ehˇ bi za˗eu nga? Dawˇ coe ni yaˇ kʼaˬ daˇ˗eu heu neh meh. Gʼawˬ myahˇ maˬ gʼeh˗ehˇ Yeˬhawˇbaˬ aˬ yawꞈ˗euˬ tsawˇ myahˇ laˆ cawˆ˗eu huiˬ dui dui˗euˬ Baˬbuˇloˬ˗ahˇ yaˇ kʼaˬ daˇ˗eu meh. (Pah mehˬ˗eu 17:5, 16; 19:1, 2) Huiˬ dui dui˗eu Baˬbuˇloˬ bi laˆ cawˆ gaˇ ya mawˇ˗eu tiˬ gʼaˬ na, aˬ dui nehˬ˗ehˇ Yeˬhawˇbaˬ˗ahˇ uˬ duˬ tahˬ laˇ˗eu kʼawꞈ pyeuꞈ nya meh. Kʼoeˇ naˇ Aˬmaˬgeˬdoˬ˗ahˇ Yeˬhawˇbaˬ Saˬdaˬ uˆ lahˇ˗eu jeˬ hawˇ˗eu aˬ yawꞈ˗euˬ tsawˇ myahˇ˗ahˇ yehˬ bawˬ sehˇ lu˗ehˇ ehˇ˗awˇ, laˆ tsoeˬ˗eu yawˬ gʼaˬ na luꞈ˗ahˇ laˆ cawˆ jiˇ˗eu meh. Ehˇ kʼawꞈ aˬ yawꞈ˗euˬ dawˬ naˇ haˬ˗awˇ, aˬ yawꞈ˗ahˇ ciˬ huiˬ ciˬ mahˇ˗eu yawˬ gʼaˬ na luꞈ˗ahˇ ka kʼoꞈ nehˬ˗eu meh. (Maˬkuˆ 8:38; 2 Teˇsaˬloˇni 1:6-10) Ka li uˆ lahˇ˗eu tiˬ heˇ kʼoꞈ jiˇ˗awˇ, aˇ saˬ saˬ˗eu lawˬ haw poˆ jiˇ ngeh, Yeˬhawˇbaˬ aˬ yawꞈ˗euˬ tsawˇ myahˇ muiˬ ni shawˇ ni tiˬ byah tiˬ loꞈ jahˇ˗eu meh. (Pah mehˬ˗eu 20:7-10) Teu ngeh “Sahˬpaˬ Miˬyehˇ yaw shehꞈ kʼahˬ sehˇ, huiˬ˗eu meh lehˇ siˬ nya˗eu jeˬ, laˆ shaˆ iˇ cuꞈ byah˗eu loꞈ˗ehˇ, miˇ tsaˬ kʼoeˇ taˆ byah˗iˇ tehꞈ˗a.”—Haˬbaˬkuˆ 2:14.

16. Nawˇ aˬ jeˬ jahˇ˗eu lehˇ noeˬ tsehˆ taˬ le? (Aˇ baˇ˗ahˇ jiˇ haw.)

¹⁶ Mehˬ hu paw kʼaˇ dehꞈ kʼaˇ jawˇ˗eu yawˬ gʼaˬ na luꞈ Yeˬhawˇbaˬ˗euˬ tsawˇ myahˇ˗ahˇ ciˬ huiˬ ciˬ mahˇ laˇ gaˇ ya mawˇ ngeh, aˇ naˆ ni laˬ kʼaˬ cehˇ laˇ paˬ˗ehˇ gʼeh˗eu nga? Ehˇ kʼawꞈ teu nah maˬ keuˆ le˗euˬ siˬ kʼoeˇ aˬ dui yawˬ gʼaˬ na luꞈ Miˬyehˇ˗ahˇ ciˬ huiˬ ciˬ mahˇ˗eu gʼaˇ duˬ, yawˬ ha˗ahˇ doˇ˗eu jeˬ kʼaˇ gʼeh nya gaˇ neh leh jeh˗awˇ mˇ˗eu ma. Teu miˇ neh gaˇ kawˆ heu˗ahˇ aˇ yeˇ taˬ huiˬ˗eu gʼaˇ duˬ, uˆ lahˇ˗eu aˇ muˇ 2025 kʼoꞈ˗euˬ kʼoꞈ lah˗euˬ Jaˇliꞈ aˇ deuˆ Ja ceuˬ 96:8-ahˇ tseˇ˗euˬ meh. Teu gaˇ ‘Yaw shehꞈ kʼahˬ sehˇ huiˬ˗eu Yeˬhawˇbaˬ Miˬyehˇ˗euˬ tsawˇ myahˇ˗ahˇ ja ceuˬ˗awˬ’ lehˇ ehˇ taˬ˗euˬ meh.