1913 k’oꞈ-ahˇ ngaˬ da Jawˇ Mye-suiꞈ 25 k’oꞈ k’awꞈ ngeh, Neˬ-yuˇ Yawˬ meuˬ-ahˇ iˇ cuꞈ shawˇ-euˬ meh. Teu ngeh iˇ cuꞈ shawˇ-eu dawˬ mehˬ mehˬ-eu g’aˬ naˇ, Mehˇ nmˇ Laˇseuˬ pyeuꞈ meh. K’oeˇ gaˇ neh tiˬ k’ehˬ naˇ ngaˬ da Taˬ-leˇniˬdaˬ-ahˇ pawˇ iˇ-awˇ, Jaˇliꞈ dzaw-eu leh jeh-eu Kawˇsaꞈteꞈ Paˇmeuꞈ-ahˇ sheuˬ-euˬ meh. Ngaˬ da aˬ yawꞈ-euˬ cawˬ G’oiˇliˬ-yaˬ Aˬ Ba-laoˬ-ahˇ “Mˬ miˇ beh-euˬ gaˇ kawˆ biˬdiˬoˬ” byaˬ gaˇ caw ba-euˬ meh. Ngaˬ da aˬ yawꞈ nyaꞈ 1923 k’oꞈ-ahˇ mehˇ nmˇ G’oiˇliˬ-yaˬ Ehˇpa-li kaˆ nahˇ ma gaˬ k’ehˬ paw pawˇ iˇ ngeh keuˆ ni gaˇ tiˬ kawˆ loꞈ-ehˇ mˇ-awˇ, mˬ taˆ ya le-eu deuˬ pyeuꞈ-eu ngaˬ da ngaˬ ma jiˇ ni, Taˬ-leˇniˬdaˬ-ahˇ gaˇ mˇ daˆ leꞈ-euˬ meh.

Ngaˬ da ngaˬ ma zaˬ 9 g’aˬ jawˇ-awˇ, dehꞈ beh beh le-euˬ g’aˬ-ahˇ, teu ngeh-euˬ aˬ dui-euˬ aˇ maꞈ aˇ muˇ-euˬ yaw huiˬ g’aˬ-euˬ tsawˇ myahˇ loꞈ-ehˇ Laˇdeuˇpawˬ lehˇ myahˇ nehˬ-euˬ meh. 1922 k’oꞈ, Tseˇ nyiꞈ siˬ ba la 30 nah-ahˇ, ngaˇ dehꞈ le-awˇ, G’uˇg’oꞈ lehˇ myahˇ nehˬ-euˬ meh. Tsawˇ myahˇ heu naˇ, teu ngeh-euˬ Deuˬ Goˇdeuˇ Eꞈ (nymˬ-mˇ naˇ, Noeˬlaˇ-awˬ!) maˬgaˬziˇ paˇ dmˬ paw haw luꞈ-eu, Ka-le tamꞈ Jeˬ G’uˇg’oꞈ yaw huiˬ g’aˬ-euˬ tsawˇ myahˇ meh. Ngaˬ da ngaˬ ma zaˬ yawˬ g’aˬ na luꞈ-ahˇ, sahˬ boꞈ daˬ ma deuˬ mehˬ k’awꞈ, myaˬ tiˬ paˆ naˇ nui jah paw aˇ pyaˇ daˬ taˬ-eu jeˬ-ahˇ mehˬ-eu meh. Ngaˬ ma naˇ Jaˇliꞈ gaˇ kawˆ zawˇ-ehˇ ja sawˇ nehˬ nya-awˇ, ngaˬ da naˇ Jaˇliꞈ laꞈ k’oeˇ-euˬ gaˇ kawˆ deuˬ-ahˇ ja nehˬ-eu meh. Ngaˬ da gaˇ kawˆ teu ja ngeh, g’awˇ mawˇ mawˇ lah ni luˆ laˇ-eu miˇ neh, zawˇ-ehˇ naˇ haˬ muiˬ nya.

Ngaˬ da ngaˬ ma neh leh jeh-euˬ heu gaˇ dahˇ tsoeˬ-eu lehˇ-aˬ. Aˬ li 5 g’aˬ laꞈ k’oeˇ neh 3 g’aˬ naˇ, Giˇliˆ dzaw nymˇ-ahˇ ya iˇ-awˇ, aˬ buˇ deuˬ naˇ, Taˬ-leˇniˬdaˬ hawˇ-eu Tuˬbaˇgoˬ-ahˇ huˬ mehˬ mehˬ-eu g’aˬ g’awˬ mya k’oꞈ geuꞈ-euˬ meh. Ngaˬ da ngaˬ ma neh mehˬ-awˇ, dehꞈ mehˬ yaꞈ-eu jeˬ heu naˇ, nga maꞈ-ahˇ ‘Yeˬhawˇbaˬ-euˬ nymˇ laꞈ k’oeˇ’ ka taˬ-awˇ, aˬ yawꞈ maꞈ neh g’aˬ biꞈ-eu jeˬ nymˬ-mˇ iˬ nah keuˆ ni Miˬyehˇ-euˬ gaˇ bi mˇ nya laꞈ-awˇ, “Miˬyehˇ-euˬ uˬ duˬ tahˬ nymˇ nymˇ ma laꞈ k’oeˇ mehˇ laˇ” luꞈ-eu meh.—Ja ceuˬ 92:13.

Nga pehˬ kahˇ naˇ, tsaꞈ gaˬ iˇ-eu deuˬ uiˬ laˇ-euˬ duˬ pyeuꞈ-awˇ, laˇ uiˬ taˬ-euˬ huˬ mehˬ mehˬ-eu deuˬ tiˬ k’ehˬ maˬ kaˬ, mehˇ nmˇ Jawˇ-cuiˬ Yamˬ-euˬ gaˇ kawˆ ja-eu meh. Mehˇ nmˇ heu g’aˬ naˇ Kehˇneˬdaˬ tsawˇ haˬ miˇshaˬnaˬliˬ pyeuꞈ-awˇ, Taˬ-leˇniˬdaˬ-ahˇ jiˇ mˇ laˇ haw-euˬ meh. K’oeˇ naˇ ngaˬ da ngaˬ ma k’awꞈ, aˬ yawꞈ maꞈ nehˬ-ehˇ gaˇ tiˬ kawˆ loꞈ-ehˇ mˇ laꞈ haw-euˬ mehˇ nmˇ Ba-laoˬ-euˬ gaˇ kawˆ tiˬ k’ehˬ maˬ taˬ ja-eu meh. Teu  ngeh mehˇ nmˇ Ba-laoˬ naˇ Ehˇpa-li kaˆ nahˇ ma gaˬ k’ehˬ paw jawˇ-eu meh. Aˬ yawꞈ maꞈ neh ja-euˬ gaˇ kawˆ heu naˇ, ngaˬ-ahˇ aˇ k’oꞈ 10 k’oꞈ ngeh neh, Miˬyehˇ gaˇ mˇ ni laˆ noeˬ nehˬ laꞈ-euˬ meh.

Teu ngeh aˬ dui-euˬ maˬgaˬziˇ paˇ dmˬ deuˬ-ahˇ, zahˇ k’awꞈ deuˬ neh laˆ zaꞈ taˬ-euˬ jeˬ-ahˇ pah mehˬ-awˇ, nui k’ahˇ huiˬ-eu jeˬ gaꞈ jeˬ ka mˇ-eu gaˇ kawˆ-ahˇ maˬ ehˇ, jawꞈ dui dui-eu uˆ lahˇ-eu jeˬ-euˬ gaˇ kawˆ-ahˇ maˬ ehˇ, boꞈ taˬ-euˬ meh. Teu miˇ neh 1936 k’oꞈ-ahˇ, Taˬ-leˇniˬdaˬ-ahˇ uˆ lahˇ-eu deuˬ-ahˇ, aˬ bawˇ dawˬ neh ehˇ nehˬ-awˇ, G’awˇ-ciˬtaoˬbeuˇ paˇ dmˬ deuˬ-ahˇ laˆ naˬ jiˇ-euˬ meh. Nga maꞈ paˇ dmˬ deuˬ yuˇ yaꞈ taˬ-awˇ, tiˬ poˆ cuiˆ cuiˆ-ehˇ zmˬ jiˇ-euˬ ma. Nga maꞈ yaw cehˆ yaw cehˆ-ehˇ cah cah-ehˇ jiˇ tsaꞈ gaˬ-eu uˬ taꞈ, liˇ yehˬ dziˬ-awˇ sahˬ boꞈ mehˬ shi naˇ k’ah dah taˬ-awˇ, sahˬ boꞈ aˇ taꞈ deuˬ biˇ biˇ-ehˇ jiˇ tsaꞈ gaˬ-eu ma. K’oeˇ uˬ taꞈ, Taˬ-leˇniˬdaˬ-ahˇ gaˇ mahˇ kaˬ dui dui gaˇ Tuˬnaˬpuˇnaˬ-ahˇ-euˬ daˇ heh neh guˇ gaˬ-eu lawˬ liˬ neh tsaꞈ gaˬ iˇ-euˬ ma. Nui ma cehˇ tahˬ tahˬ laˇ paˬ-ehˇ g’eh-eu lehˇ meh. Ngaˇ teu loꞈ-ehˇ mˇ gaˇ ya gm leˇ-euˬ miˇ neh, 16 k’oꞈ-ahˇ g’eh ngeh neh iˇ cuꞈ ya shawˇ-euˬ ma.

Nga pehˬ nymˇ jiˇ-ahˇ neh za-euˬ nui jah jeˬ biˇ hawˇ-eu puˬ haw laꞈ-euˬ jeˬ heu baˬ da neh, ngaˬ-ahˇ nyiˇ ngeh neh miˇshaˬnaˬliˬ geuꞈ mawꞈ-eu meh. 1944 k’oꞈ-ahˇ ngaˇ Aˬluˇbaˬ iˇ jawˇ lah-ahˇ iˇ ngeh jiˇ ngaˬ-ahˇ toˆ-ehˇ paˇ noeˬ luꞈ-awˇ, mehˇ nmˇ Eˇmaꞈ Daˬbaˬ-yuˬ Kamˬmeˬ-suiꞈ nehˬ-ehˇ tiˬ kawˆ loꞈ-ehˇ Miˬyehˇ gaˇ mˇ-euˬ ma. 1945 k’oꞈ-ahˇ Yeˬsuˇ shiˇ gaˇ noeˬ mawˇ-eu mehˬ bawˬ-ahˇ 10 g’aˬ oe ngeh, nga maꞈ-ahˇ laˬ k’aˬ cehˇ-eu lehˇ-a. Nyaˆ taꞈ tiˬ k’oꞈ naˇ, teu gaˇ aˇ muˇ jaˆ laˇ-euˬ meh.

Teu gaˇ neh tiˬ k’ehˬ naˇ, ngaˇ Oˇliꞈ-suiꞈ G’oiˇliˬ-amˬ lehˇ kuˇ-eu gaˇ mˇ cawˬ tiˬ g’aˬ-ahˇ k’aˇ yehꞈ laˇ-eu loꞈ-ehˇ ya tsaꞈ gaˬ-euˬ ma. Oˇliꞈ-suiꞈ aˬ yawꞈ-euˬ nui jah-ahˇ laˆ piˇ-eu g’aˇ duˬ, pyehˇ dui dui-eu meh. Ehˇ k’awꞈ aˬ yawꞈ Jaˇliꞈ ya dzaw ngeh tiˬ jawˇ, Jaˇliꞈ-ahˇ maˇ diˇ siˬ nya laˇ-awˇ 1947 k’oꞈ, Tiˬ siˬ ba la Ngaˬ nah-ahˇ iˇ cuꞈ shawˇ-euˬ meh. Tiˬ k’ehˬ naˇ nga nyaꞈ zaˬ k’aˬ pyeuꞈ laˇ-awˇ, oeˇ mˇ baˇ-euˬ ma. Oˇliꞈ-suiꞈ 1950 k’oꞈ, Tseˇ tiꞈ siˬ ba la-ahˇ, huˬ mehˬ mehˬ-eu g’aˬ geuꞈ-euˬ meh. Oˇliꞈ-suiꞈ ngaˬ-ahˇ laˬ k’aˬ bi cehˇ laꞈ dui dui-eu meh.

1955 k’oꞈ-ahˇ nga nyaꞈ-ahˇ Giˇliˆ dzaw nymˇ-ahˇ dzaw le lehˇ kuˇ-eu meh. Aˇ yeˇ huiˬ-eu gaˇ teu-ahˇ iˇ-eu g’aˇ du, nga nyaꞈ gaˇ-ahˇ neh doˆ iˇ-euˬ uˬ taꞈ, iˇ kahˇ hawˇ-eu myawˬ gahˬ deuˬ ahˬ-awˇ, Aˬluˇbaˬ-ahˇ jawˇ-eu mehˇ nmˇ deuˬ-ahˇ ehˇ gaˬ nehˬ-euˬ ma. Nga nyaꞈ 1956 k’oꞈ, Shiꞈ siˬ ba la, 29 nah-ahˇ, Giˇliˆ dzaw nymˇ 27 poˆ aˬ yawꞈ poˆ-ahˇ dzaw g’aˬ-awˇ, Naiˬjiˇliˬ-yaˬ-ahˇ bi iˇ nehˬ laꞈ-euˬ meh.

Teu ngeh-euˬ gaˇ kawˆ-ahˇ noeˬ doˆ laˇ ngeh, Oˇliꞈ-suiꞈ ehˇ-eu “Miˬyehˇ-euˬ baoˬ aˬ myah luꞈ poˆ laˇ paˇ laˇ-eu miˇshaˬnaˬliˬ-euˬ dehꞈ ziˇ nehˬ-ehˇ, dehꞈ tsaˬ nya ni caw ba nehˬ laꞈ-eu meh. Ngaˇ ngaˬ-euˬ k’aˬ dzeˇ zaˬ nehˬ-ehˇ maˬ duˇ, gaˇ hu ngaˬ-ahˇ miˇshaˬnaˬliˬ gaˇ-ahˇ yaw k’aˆ-ehˇ nui ma maˬ ahˇ nya. Ngaˬ-ahˇ naˇ iˇ kahˇ hawˇ-eu zaˬ geuꞈ mawꞈ-eu meh. Ehˇ k’awꞈ guiˬ lahˬ dawˬ tsaꞈ gaˬ-eu heu aˇ naˆ ni aˇ yeˇ huiˬ-eu gaˇ kawˆ-ahˇ ya siˬ ngeh, ngaˬ-euˬ nui noeˬ teu paˇ laˇ-awˇ, Giˇliˆ dzaw nymˇ dzaw g’aˬ ngeh miˇshaˬnaˬliˬ gaˇ mˇ-eu g’aˇ duˬ, dah laˇ taˬ-euˬ meh. Nga nyaꞈ Koiˆ Mehˇliˬ saˇ baoˬ-ahˇ daˆ leˇ ngeh, mehˇ nmˇ Naw-euˬ gaˇ mˇ duˬ-ahˇ, gaˇ mˇ luꞈ-eu mehˇ nmˇ G’oˆ Toˆtawꞈ nga nyaꞈ-ahˇ sheuˬ ha nehˬ le-awˇ, ‘Aˬ lawˆ lawˆ-ehˇ iˇ de’ lehˇ ehˇ-eu meh. Aˬ yawꞈ nga nyaꞈ-ahˇ Naiˬjiˇliˬ-yaˬ Beˬdeˬlaˇ-ahˇ ya mˇ iˇ nga lehˇ ehˇ-eu meh. Ngaˇ uiˇ huiˬ ka-awˇ, ‘Oˇ-oˬ’ lehˇ ehˇ-euˬ ma. Ehˇ k’awꞈ tiˬ k’ehˬ naˇ, Beˬdeˬlaˇ-ahˇ jawˇ-eu laˬ k’aˬ cehˇ laˇ-euˬ meh. Teu gaˇ ngaˇ gaˇ g’awˬ mya jeˬ ya mˇ-euˬ ma. Gaˇ teu laꞈ k’oeˇ ngaˇ ya leˇ-eu tiˬ jeˬ naˇ, daˬ yah-ahˇ ya ha-eu teu meh. Ngaˇ tsawˇ haˬ deuˬ-ahˇ gaˬ-eu ma. Gaˇ heu baˬ da neh Naiˬjiˇliˬ-yaˬ-ahˇ-euˬ mehˇ nmˇ g’awˬ mya g’aˬ nehˬ-ehˇ ya ngehˬ cawˬ-euˬ ma. Beˬdeˬlaˇ-ahˇ oe-eu deuˬ tiˬ deuˬ na-aˬ, k’aˬ lehˇ tehꞈ meh, tiˬ deuˬ na-aˬ, g’aˬ doeˇ doeˇ dui dui-awˇ, tiˬ deuˬ na naˇ, iˇ cuꞈ hawˇ-eu hawˬ mehꞈ-eu meh. Aˬ yawꞈ maꞈ-ahˇ g’aˬ doeˇ dah laˇ ni tiˬ jeˬ na ya bi dzaˬ-eu teu naˇ, laˬ k’aˬ cehˇ laˇ-eu lehˇ miˇ-a. Gaˇ heu dawˬ tawˆ luꞈ Yeˬhawˇbaˬ-euˬ g’aˇ duˬ mˇ-eu aˇ yeˇ huiˬ-eu gaˇ pyeuꞈ-awˇ, ngaˬ-ahˇ jiˇ laˬ k’aˬ cehˇ-eu lehˇ miˇ-a.” Ngeuˇ meh, Miˬyehˇ-euˬ gaˇ yawˬ jeˬ na luꞈ nga nyaꞈ-ahˇ laˬ k’aˬ bi cehˇ dui dui-awˇ, bi mˇ byah nehˬ laꞈ-euˬ meh.

Nga pehˬ-euˬ nymˇ jiˇ 1961 k’oꞈ-ahˇ Taˬ-leˇniˬdaˬ-ahˇ mawˇ dzoeˇ-euˬ ma. Mehˇ nmˇ Ba-laoˬ Ehˇpa-li kaˆ paw-euˬ ya puˬ haw laꞈ-euˬ jeˬ ja-eu meh. Ngaˇ naˇ Naiˬjiˇliˬ-yaˬ-ahˇ huiˬ laˇ mahˇ laˇ-eu gaˇ kawˆ ja-euˬ ma. Mehˇ nmˇ Ba-laoˬ ngaˬ-ahˇ byaˇ tawꞈ-awˇ, ngaˬ da-ahˇ “Jawˇniˬ nawˇ Ehˇpa-li kaˆ-ahˇ maˬ iˇ haw-eu k’awꞈ, G’uˇg’oꞈ teu gaˇ Miˬyehˇ-euˬ gaˇ ya mˇ iˇ keuˆ haw ngaˇ de” lehˇ ehˇ nehˬ-awˇ, ngaˬ da k’awꞈ “Yaw muiˬ ngaˇ-a, mˇ daˆ leꞈ-awˬ” lehˇ ehˇ-eu meh. Noeˬ dahˇ doe laˇ-euˬ heu nyiˬ g’aˬ neh g’aˬ biꞈ-euˬ heu naˇ, nui jah g’aˬ k’aˆ laˇ-awˇ Miˬyehˇ-euˬ gaˇ heu naˆ maˬ tseˇ paˇ mˇ mawꞈ laˇ-euˬ meh.

1962 k’oꞈ-ahˇ, ngaˇ aˇ yeˇ huiˬ-eu Giˇliˆ dzaw nymˇ 37 poˆ aˬ yawꞈ poˆ-ahˇ ya iˇ-euˬ ma. Heu poˆ naˇ, ba la 10 siˬ ga leˇ-eu, doˆ saˬ saˬ laˇ-euˬ jeˬ pyeuꞈ meh. K’oeˇ naˇ Naiˬjiˇliˬ-yaˬ Beˬdeˬlaˇ-ahˇ haw luꞈ-eu Mehˇ nmˇ G’oeˇpeˬ Guˇ-ciˬ Giˇliˆ dzaw nymˇ 38 poˆ aˬ yawꞈ poˆ-ahˇ dzaw iˇ-awˇ,  Eˬgaˬlamˬ miˇ k’ahˬ-ahˇ ya jawˇ paˇ iˇ-euˬ meh. Teu miˇ neh ngaˇ Naiˬjiˇliˬ-yaˬ Beˬdeˬlaˇ-ahˇ sheuˬ g’eh-eu g’aˬ ya geuꞈ-euˬ ma. Ngaˇ mehˇ nmˇ Ba-laoˬ loꞈ-ehˇ Naiˬjiˇliˬ-yaˬ miˇ k’ahˬ-ahˇ jawˇ-eu gaˬ laˇ paˬ-ehˇ g’eh-eu mehˇ nmˇ deuˬ-ahˇ siˬ nya-eu g’aˇ duˬ, Naiˬjiˇliˬ-yaˬ doe ni iˇ-eu ma. Teu gaˇ-euˬ mehˇ nmˇ deuˬ dehꞈ dzaˬ laˇ taˬ-euˬ miˇ k’ahˬ deuˬ naˆ maˬ tseˇ yaw shaˬ shaˬ k’awꞈ yawˬ g’aˬ na luꞈ laˬ k’aˬ cehˇ-eu meh. Heu gaˇ haw ngeh tiˬ jawˇ aˇ poeˬ baw-eu dehꞈ ziˇ naˇ, pyuˇ shuiˇ myawˬ gahˬ nehˬ-ehˇ maˬ taꞈ nga lehˇ siˬ laˇ-eu meh. Aˬ yawꞈ maꞈ dehꞈ-eu aˇ tiˆ-ahˇ haw naˇ, ngaˬ-ahˇ zahˬ leˇ dui dui miˇ-a. Aˬ yawꞈ maꞈ Bawˬdzaˬnymˇ-ahˇ oe ngeh, moeˬ tsoeˬ buˇ coeˆ ni dmˬ-awˇ yaw shehꞈ k’aˆ laˇ paˬ-ehˇ g’eh-eu meh. Smˬ nah mehˬ bawˬ jaˆ ngeh aˬ yawꞈ maꞈ myawˬ tawˬ-eu lawˬ liˬ maˬ ngeuˇ naˇ, boˬleˬkaˇjaˬ * lawˬ liˬ dziˬ-awˇ iˇ-eu meh. (Yawˬ haˇ yawˬ ha jahˇ-eu lawˬ liˬ) Lawˬ liˬ teu-ahˇ “Nyiˇ-eu iˇ cuꞈ iˇ dzaˆ laˆ uiˬ leꞈ ngeh, huiˬ-eu iꞈ ma laˆ shaˆ pyeuꞈ laˇ” lehˇ maˬ siˬ-ehˇ, nui ma ahˇ laˇ paˬ-ehˇ g’ehˬ-eu dawˬ boꞈ taˬ-euˬ meh.

Dawˬ heu dawˬ naˇ tsaˬ leˇ dui dui miˇ-a. Nga maꞈ yawˬ g’aˬ na luꞈ neh leh jeh-awˇ mˇ-euˬ jeˬ baˬ da neh, dawˬ heu dawˬ maˇ diˇ byah laˇ-euˬ meh. 1974 k’oꞈ-ahˇ Aˬmeˬliˇkaˬ miˇ k’ahˬ maˬ gui ahˇ ni ehˇ naˇ, Naiˬjiˇliˬ-yaˬ miˇ k’ahˬ meh, tsaꞈ gaˬ-eu deuˬ tiˬ sehˬ g’aˬ byah dahˬ beh laˇ-euˬ. Nga maꞈ-euˬ gaˇ huiˬ laˇ mahˇ laˇ luꞈ meh.

Nga maꞈ-euˬ gaˇ huiˬ laˇ mahˇ laˇ luꞈ ngeh, 1967-1970 k’oꞈ-ahˇ keuˆ ni, Naiˬjiˇliˬ-yaˬ miˇ k’ahˬ-ahˇ guiˇ deuˆ-eu jeˬ jaˆ laˇ-euˬ meh. Teu miˇ neh ba la g’awˬ mya siˬ byah ni Baiˇpeˬ-leˬ gahˬ kaˬ paw jaˆ-eu Naiˇjeuˬ lawˇ baˬ-ahˇ jawˇ-eu mehˇ nmˇ deuˬ, Beˬdeˬlaˇ-ahˇ maˬ ngehˬ cawˬ laꞈ nya ni shaˬ-eu meh. Teu miˇ neh, nga maꞈ aˬ yawꞈ maꞈ-euˬ nui jah-ahˇ g’aˬ biꞈ-eu Jaˇliꞈ-euˬ nui gahˇ biꞈ nehˬ iˇ-eu g’aˇ duˬ, uˬ soe dahˬ beh gaˇ ehˇ taˬ-euˬ loꞈ-ehˇ ngaˇ jawˇ duˬ teu gaˇ iˇ keuˆ taˬ-euˬ ma. Nga maꞈ Yeˬhawˇbaˬ-ahˇ guiˬ lahˬ shaˇ-awˇ, nui ma taˬ-eu laꞈ k’oeˇ, mehˇ nmˇ deuˬ jawˇ gaˇ iˇ-eu g’aˇ duˬ lawˇ baˬ heu-ahˇ g’awˬ mya poˆ ya tsehˆ-eu meh.

Ngaˬ-ahˇ nga maꞈ neh Naiˇjeuˬ lawˇ baˬ-ahˇ guˆ guˆ tsi tsi-ehˇ yaw myaˬ poˆ tsehˆ-euˬ gaˇ noeˬ nya siˬ. Nga maꞈ yehˇ deuˬ beuˆ laˇ gaˇ maˬ ehˇ, naˇ gawˇ nyawˬ laˇ gaˇ maˬ ehˇ, shaˬ zahˬ nui deuˬ-ahˇ maˬ ehˇ, ya tahˬ puˬ-eu ma. Ngaˬ maꞈ-ahˇ maˬ ngeuˇ-eu jeˬ-ahˇ noeˬ-eu yehˇ deuˬ jawˇ gaˇ neh iˇ dzeuˇ-eu shaˬ nya lehˇ noeˬ-aˬ, miˇ kaˬ-ahˇ loꞈ-eu yehˇ deuˬ-ahˇ iˇ dzeuˇ-eu paˇ shaˬ dzehˬ nya siˬ. Tiˬ poˆ ngaˇ iˇ hawˇ k’aˆ-eu Naiˇjeuˬ lawˇ baˬ-ahˇ uˬ ciꞈ paw Aˆsaˇbaˬ meuˬ-ahˇ neh keh nuˇ lehˇ kuˇ-eu lawˬ dziˬ-awˇ, Aˇniˇshaˬ meuˬ-ahˇ iˇ-awˇ, Eˬnuˇguˬ meuˬ-ahˇ jawˇ-eu aˇ muˇ-ahˇ sheuˬ g’eh-eu g’aˬ-ahˇ g’aˬ biꞈ iˇ-euˬ ma. Tiˬ poˆ ngaˇ Aˬbaˬ meuˬ-ahˇ miˬ dzaˬ bi deuˆ tsehˆ taˬ-awˇ jawˇ luꞈ-eu aˇ maꞈ-ahˇ sheuˬ g’eh-eu g’aˬ-ahˇ g’aˬ ya biꞈ iˇ-eu meh. Nyaˆ taꞈ tiˬ poˆ jiˇ, Paw Haˇkawˬ meuˬ-ahˇ jaˆ-eu aˬ dui-euˬ mehˬ bawˬ-ahˇ, yehˇ deuˬ laˇ luꞈ-eu miˇ neh, yaw kawˇ ma-ehˇ bawˬ dzaˬ g’aˬ-euˬ ma.

Teu ngeh Yeˬhawˇbaˬ aˬ yawꞈ maꞈ-ahˇ gaˬ-awˇ, k’ahˬ lahˇ meh lehˇ mehˇ nmˇ deuˬ-ahˇ jah ziꞈ leˇ ni caw ba nehˬ-eu g’aˇ duˬ, mehˇ nmˇ deuˬ nehˬ-ehˇ bawˬ dzaˬ-eu heu naˇ aˇ yeˇ huiˬ dui dui-eu meh. Nga maꞈ g’aˬ baꞈ maˬ baꞈ-eu gaˇ kawˆ hawˇ-eu, mehˬ bawˬ gm-eu gaˇ kawˆ nui noeˬ nui duˇ biꞈ nehˬ-euˬ ma. Naiˬjiˇliˬ-yaˬ-ahˇ-euˬ mehˇ nmˇ deuˬ, tseˇ paˆ biˇ paˆ-eu gaˇ kawˆ-ahˇ law nmˇ-aˬ, tiˬ jeˬ ehˇ k’aˇ maˬ za-eu uˬ taꞈ, tsawˇ jeuˬ tsawˇ ca deuˬ-ahˇ gaˬ-eu meh. Aˬ yawꞈ maꞈ Ka li zaˬ-euˬ nui ma tiˬ siˬ-ahˇ taꞈ-eu jeˬ-ahˇ bo saˆ-euˬ meh. Teu ngeh ngaˬ-ahˇ aˬ yawꞈ maꞈ nehˬ-ehˇ ya jawˇ-eu muiˬ-eu lehˇ miˇ-a.

1969 k’oꞈ, mehˇ nmˇ Meˇ-oˬtamˬ Jiˬ Hehˇsahˬ “Miˇ k’ahˬ saˇ laˇ mehˬ” lehˇ ehˇ-eu Miˇ k’ahˬ-euˬ mehˬ bawˬ heu poˆ-ahˇ sheuˬ g’eh-eu g’aˬ pyeuꞈ meh. Mehˬ bawˬ heu poˆ naˇ Niˬ-yuˬ Yawˇ meuˬ Yahˬki niˇ g’a duˬ-ahˇ jahˇ-euˬ meh. Ngaˇ mehˇ nmˇ Meˇ-oˬtamˬ Jiˬ Hehˇsahˬ-euˬ caw ba-eu g’aˬ ya geuꞈ-awˇ, g’awˬ mya jeˬ za-euˬ ma. Teu naˇ ngaˇ loˬ-eu nehˬ-ehˇ tsaˬ-eu meh. Aˬ jeˬ miˇ neh ehˇ naˇ, 1970 k’oꞈ-ahˇ miˇ k’ahˬ maˬ paˇ suˬ saˬ ni pyeuꞈ iˇ-euˬ tiˬ k’ehˬ naˇ, Naiˬjiˇliˬ-yaˬ miˇ k’ahˬ Laˇgawꞈ-suiꞈ meuˬ-ahˇ, “Miˬyehˇ ha geuꞈ-eu tsawˇ haˬ deuˬ” lehˇ ehˇ-eu miˇ k’ahˬ mehˬ bawˬ ya jahˇ-euˬ ma. Mehˬ bawˬ heu poˆ Yeˬhawˇbaˬ guiˬ lahˬ biꞈ-eu miˇ neh yaw muiˬ-ehˇ mˇ luiˆ shaˇ luiˆ nya-euˬ ma. Mehˬ bawˬ heu poˆ-ahˇ 17 jeˬ-euˬ dawˬ neh jahˇ-awˇ, mehˬ bawˬ heu poˆ-ahˇ laˇ-euˬ deuˬ naˇ, 121,128 g’aˬ byah-eu meh. Mehˇ nmˇ Naw hawˇ-eu Hehˇsahˬ uˬ taꞈ, Aˬmeˬliˇkaˬ miˇ k’ahˬ hawˇ-eu Eˬgaˬlamˬ-ahˇ neh laˇ-euˬ mehˇ nmˇ nui deuˬ jiˇ huiˬ dui dui-eu iˇ cuꞈ shawˇ-eu poˆ-ahˇ ya mawˇ-euˬ meh. Beˬdeˬgoˇdeˬ ngeh poˆ-ahˇ neh naˇ, nymˬ-mˇ poˆ meh k’aˇ huiˬ-eu poˆ Naiˬjiˇliˬ-yaˬ miˇ k’ahˬ mehˬ bawˬ heu poˆ-ahˇ iˇ cuꞈ shawˇ-eu deuˬ naˇ, 3,775 g’aˬ byah-eu meh. Ngaˇ mehˬ bawˬ heu poˆ-ahˇ ya caw ba-euˬ heu naˇ, nga-euˬ dehꞈ ziˇ laꞈ k’oeˇ neh k’aˇ suˬ saˬ-eu poˆ miˇ-a. Naiˬjiˇliˬ-yaˬ-ahˇ tsaˬ gaˬ-eu deuˬ myaˬ laˇ-eu heu naˇ, tiˬ poˆ cuiˆ cuiˆ-ehˇ maˬ ngeuˇ ni, duiˬ lehˇ myaˬ laˇ-euˬ meh.

Naiˬjiˇliˬ-yaˬ miˇ k’ahˬ-ahˇ 30 k’oꞈ dzeh ni jawˇ ngeh, tiˬ poˆ na-aˬ, aˇ maꞈ-ahˇ sheuˬ g’eh-eu g’aˬ geuꞈ-eu uˬ taꞈ, Ehˇpa-li kaˆ nahˇ ma ga k’ehˬ paw jiˇ ya haw-euˬ ma. Mehˇ nmˇ miˇshaˬnaˬliˬ deuˬ heu loꞈ-ehˇ g’aˬ biꞈ nehˬ laꞈ-eu jeˬ-ahˇ aˇ poeˬ taˬ baw dui dui-eu meh. Aˬ yawꞈ maꞈ-ahˇ ya ngehˬ g’eh nehˬ-eu ngaˬ-ahˇ laˬ k’aˬ cehˇ miˇ-a. Ngaˇ gaˇ heu-ahˇ neh mehˇ nmˇ yawˬ g’aˬ na luꞈ-ahˇ yaw muiˬ-ehˇ ngehˬ g’eh nehˬ-eu heu naˇ, aˬ yawꞈ maꞈ-ahˇ huiˬ laˇ-awˇ  g’aˬ k’aˆ laˇ ni maˬ ehˇ, aˇ maꞈ aˇ muˇ nehˬ-ehˇ mehˬ bawˬ gm ni maˬ ehˇ, caw ba nehˬ ngaˇ-a lehˇ ya siˬ-euˬ ma.

Guiˇ deuˆ-eu hawˇ-eu naˇ-eu gawˇ-eu jeˬ-ahˇ kamˬ daˬ coeˇ-eu heu naˇ, Yeˬhawˇbaˬ caw ba-eu miˇ neh meh. Yeˬhawˇbaˬ nga maꞈ-ahˇ aˬ myah luꞈ guiˬ lahˬ biꞈ meh. Aˬ joˆ-ehˇ biꞈ-eu nga lehˇ, nymˬ-mˇ Oˇliꞈ-suiꞈ ja nehˬ laꞈ tehꞈ-a.

“Nga nyaꞈ miˇ hiˬ yaw myaˬ poˆ pyaˬ haw-euˬ ma. Tiˬ poˆ naˇ ngaˬ-euˬ k’aˬ dzeˇ zaˬ maˬ noeˬ ni pyeuꞈ-iˇ gaˇ keuˆ ni pyaˬ-awˇ, naˇ gawˇ laˆ saˆ duˬ-ahˇ yuꞈ iˇ-euˬ ma. Saˬ laˬ g’oˬ aˬ yawꞈ maˬ paˇ dehꞈ-iˇ ngaˇ-a lehˇ ehˇ-eu meh. Ehˇ k’awꞈ aˬ yawꞈ beuˇ laˇ-euˬ miˇ neh laˬ k’aˬ cehˇ dui dui miˇ-a. Aˬ yawꞈ maˬ gaˇ laˇ nehˬ-ehˇ, aˬ yawꞈ-ahˇ ngehˬ g’eh luꞈ-eu G’amˇbiˬg’oiˬ-ahˇ Miˬyehˇ Miˇk’ahˬ gaˇ kawˆ tsaꞈ gaˬ-eu meh. Tiˬ k’ehˬ naˇ, nga nyaꞈ teu g’aˬ jawˇ gaˇ g’a k’oꞈ iˇ-euˬ ma. Nga nyaꞈ aˬ yawꞈ nehˬ-ehˇ Jaˇliꞈ-euˬ gaˇ kawˆ ja sawˇ-awˇ, aˬ yawꞈ yaw tsaˬ yaw dawˇ-ahˇ ya siˬ-euˬ meh. Myahˇ laˇ ngeh aˬ yawꞈ Aˬbaˬ meuˬ-ahˇ-euˬ sheuˬ g’eh-eu g’aˬ pyeuꞈ laˇ-euˬ meh. Ngaˇ k’awꞈ g’awˬ mya g’aˬ-ahˇ yaw tsaˬ yaw dawˇ jeˬ-ahˇ siˬ nya laˇ ni caw ba nehˬ-euˬ ma. Muˇsaˬ-liˬ zahˇ-ahˇ ziꞈ dah ni tawˬ taˬ-eu deuˬ-ahˇ k’awꞈ, Yeˬhawˇbaˬ-ahˇ a nehˬ-awˇ, aˬ yawꞈ-euˬ gaˇ-ahˇ mˇ laˇ ni jiˇ caw ba nehˬ-euˬ ma. Nga nyaꞈ-ahˇ laˬ k’aˬ k’aˇ cehˇ-eu jeˬ naˇ, Naiˬjiˇliˬ-yaˬ tsawˇ haˬ-ahˇ ya siˬ nya-awˇ, ya gaˬ-eu uˬ taꞈ, aˬ yawꞈ maꞈ-euˬ zahˇ sahˇ k’oꞈ hawˇ-eu aˬ yawꞈ maꞈ-euˬ dawˬ-ahˇ ya siˬ-eu heu miˇ-a.”

Ngaˬ neh paˇ ya siˬ-euˬ jeˬ naˇ, aˬ cawˬ-euˬ miˇ k’ahˬ-ahˇ Miˬyehˇ gaˇ mˇ byah-eu lehˇ ehˇ-eu heu naˇ, aˬ yawꞈ maꞈ-euˬ zahˇ sahˇ k’oꞈ aˬ dui nehˬ-ehˇ aˇ naˆ ni beu gaˇ k’awꞈ, aˬ yawꞈ maꞈ-ahˇ gaˬ-eu loˬ nga lehˇ ya siˬ-euˬ ma.

1987 k’oꞈ-ahˇ Naiˬjiˇliˬ-yaˬ-ahˇ Miˬyehˇ gaˇ mˇ g’aˬ miˇ tsa, Kehˇ-leˇbi-yamˬ iˬ ma laˆ shaˆ-ahˇ jaˆ-eu Seˇ Luˬsiˇ-yaˬ iˇ jaw lahˇ-ahˇ miˇshaˬnaˬliˬ ya geuꞈ paˇ iˇ-euˬ ma. Gaˇ heu-ahˇ ya mˇ-euˬ nga nyaꞈ-ahˇ laꞈ k’aˬ cehˇ lehˇ miˇ-a. Ehˇ k’awꞈ nga maꞈ neh ya tahˬ puˬ-euˬ shaˬ zahˬ tiˬ jeˬ naˇ, Ehˇpa-li kaˆ miˇ k’ahˬ-ahˇ miˬ zaˬ g’awˬ mya g’aˬ sheuˬ-eu heu naˇ, tiˬ jeˬ maˬ ngeuˇ-eu loꞈ-ehˇ pyeuꞈ meh. Ehˇ k’awꞈ iˇ jaw lahˇ heu gaˇ ngehˬ-ehˇ dzehˬ oeˇ mˇ maˬ baˇ ni dahˬ dzaˬ-eu meh. Jaˇliꞈ-euˬ baoˬ Jaˇliꞈ dzaw zaˬ deuˬ-ahˇ dehꞈ ziˇ dehꞈ poˆ dehꞈ paˇ ni caw ba nehˬ-euˬ meh.

Nga nyaꞈ tsawˇ mawˬ mawˬ le ngeh, uˆ lahˇ-eu aˇ muˇ nga nyaꞈ-ahˇ g’awˬ shaˬ gaˬ-eu laꞈ k’oeˇ, 2005 k’oꞈ-ahˇ Aˬmeˬliˇkaˬ Niˬ-yuˬ Yawˇ meuˬ Buˇkiˬ-liˬ saˇ naˇ-ahˇ dawˬ pehˬ-ahˇ bi jawˇ le-euˬ meh. Ngaˇ Yeˬhawˇbaˬ-ahˇ ngaˬ-euˬ miˬ zaˬ Oˇliꞈ-suiꞈ biꞈ nehˬ laꞈ-euˬ yawˬ nah na luꞈ guiˬ lahˬ huiˬ-eu ma. Ehˇ k’awꞈ aˬ yawꞈ 2015 k’oꞈ-ahˇ shiˇ-euˬ meh. Heu poˆ ngaˬ-ahˇ aˬ yawꞈ nehˬ-ehˇ ya g’awˬ iˇ-eu heu naˇ, nui ma cawˆ-eu lehˇ miˇ-a. Aˬ yawꞈ naˇ ngaˬ-euˬ zawˇ-ehˇ muiˬ-eu cawˬ pyeuꞈ-awˇ, gaˬ dui dui laˇ paˬ-ehˇ g’eh-eu miˬ zaˬ tiˬ g’aˬ pyeuꞈ meh. Nga nyaꞈ 68 k’oꞈ tiˬ kawˆ loꞈ-ehˇ jawˇ-awˇ, aˬ yawꞈ-ahˇ gaˬ dui dui-eu ma. Nga nyaꞈ aˬ myah luꞈ laˬ k’aˬ cehˇ nya-eu heu naˇ, nymˇ jiˇ-euˬ gaˇ kawˆ-ahˇ hawˇ-eu aˇ muˇ-euˬ gaˇ kawˆ-ahˇ maˬ ehˇ, yaw zeu taˬ-awˇ, tiˬ g’aˬ tiˇ g’aˬ nui ma laꞈ k’oeˇ neh iˬ baˇ pyehˬ-eu laꞈ k’oeˇ aˬ myah luꞈ taˬ aw-awˇ, Miˬyehˇ-euˬ yaw sahˇ aˇ siˬ aˬ myah luꞈ mˇ mawˇ-euˬ ma.

Nga nyaꞈ g’aˬ baˬ laˇ-awˇ nui ma cawˆ ngeh, nui ma keuˆ-eu laꞈ k’oeˇ mˇ daˆ leꞈ nya ni Yeˬhawˇbaˬ neh bi caw ba-eu ma. Nga nyaꞈ yawˬ poˆ na luꞈ poˆ laˇ paˇ laˇ ngeh, yaw jeˬ na luꞈ muiˬ daˆ laˇ luꞈ gaˇ ya mawˇ-euˬ ma. K’aˇ muiˬ dzehˬ-eu jeˬ naˇ, mehˬ hu paw jaˆ luꞈ meh lehˇ ngaˇ ehˇ peuˬ ma.—Iˇsaˬyaˇ 60:17; 2 Gawˇliˬtu 13:11.

Taˬ-leˇniˬdaˬ haw-eu Tuˬbaˇgoˬ-ahˇ Yeˬhawˇbaˬ ngaˬ da ngaˬ ma hawˇ-eu mehˇ nmˇ nui deuˬ-euˬ gaˇ-ahˇ guiˬ lahˬ biꞈ luꞈ meh. Nymˬ-mˇ teu gaˇ mehˇ nmˇ 9,892 g’aˬ byah laˇ-euˬ mehˬ lehˇ ehˇ gaˇ ya gaˬ-euˬ ma. Aˬluˇbaˬ iˇ jaw lahˇ-ahˇ k’awꞈ mehˇ nmˇ g’awˬ mya g’aˬ mehˬ bawˬ gm-eu miˇ neh, nymˬ-mˇ naˇ aˇ muˇ 14 muˇ jaˆ laˇ taˬ-awˇ, Naiˬjiˇliˬ-yaˬ miˇ k’ahˬ-ahˇ k’awꞈ, tsaꞈ gaˬ-eu deuˬ 381,398 g’aˬ byah laˇ taˬ-euˬ meh. K’oeˇ naˇ Seˇ Luˬsiˇ-yaˬ iˇ jaw lahˇ-ahˇ k’awꞈ, Yeˬhawˇbaˬ-euˬ Miˇk’ahˬ-ahˇ g’aˬ biꞈ-eu mehˇ nmˇ 783 g’aˬ jawˇ laˇ taˬ-euˬ meh.

Nymˬ-mˇ naˇ ngaˇ 90 k’oꞈ dzehˬ-iˇ taˬ-euˬ ma. Ja ceuˬ 92:14-ahˇ Yeˬhawˇbaˬ-euˬ uˬ duˬ tahˬ nymˇ laꞈ k’oeˇ bi ka dehꞈ-euˬ tsawˇ haˬ, “Aˬ myah luꞈ nyoeˇ jawꞈ ni jaˆ-awˇ, bawˇ mawˬ mawˬ laˇ ngeh keuˆ ni aˇ siˬ siˬ-eu aˇ bawˇ k’oeˇ deuˬ-ahˇ duˇ tehꞈ-a” lehˇ ehˇ taˬ-euˬ meh. Ngaˬ-euˬ dehꞈ ziˇ Yeˬhawˇbaˬ-euˬ gaˇ g’aˇ duˬ ya zmˬ-euˬ miˇ neh guiˬ lahˬ huiˬ-eu lehˇ miˇ-a. Ngaˬ neh za-euˬ Ka li zaˬ-euˬ jeˬ biˇ deuˬ, ngaˬ-ahˇ Miˬyehˇ-euˬ gaˇ nui k’ahˇ tiˬ shiˇ mˇ nya ni caw ba nehˬ-euˬ meh. Miˬyehˇ ngaˬ-ahˇ ziꞈ dah ni gaˬ-awˇ, “Miˬyehˇ-euˬ uˬ duˬ tahˬ nymˇ nymˇ ma laꞈ k’oeˇ mehˇ laˇ” ni caw ba nehˬ laꞈ-euˬ meh.—Ja ceuˬ 92:13.