Yuˇdaˆ tsawˇ haˬ deuˬ-euˬ bawˬ dzaˬ duˬ aˬ joˆ-ehˇ dahˬ beh laꞈ-euˬ nga?

“Yuˇdaˆ deuˬ-euˬ bawˬ dzaˬ duˬ” lehˇ ehˇ-eu heu dawˬ, “bawˬ dzaˬ-eu” maˬ ngeuˇ naˇ “uiˬ laˇ-eu” lehˇ Gaˬliˇ dawˬ-ahˇ neh oe-euˬ meh. Tsawˇ myahˇ heu naˇ tsaˬ leˇ dui dui-eu meh. Aˬ jeˬ miˇ neh ehˇ naˇ, jawˇ duˬ teu-ahˇ Yuˇdaˆ deuˬ Miˬyehˇ dawˬ kawˬ naˇ haˬ le-eu g’aˇ duˬ hawˇ-eu Miˬyehˇ-ahˇ uˬ duˬ tahˬ-eu g’aˇ duˬ, uiˬ le-eu jawˇ duˬ pyeuꞈ-eu miˇ neh meh. Teu naˇ gaˇ hu ba neh jaˆ ka leꞈ-euˬ meh. Heˬbyehˇ Jaˇliꞈ laꞈ k’oeˇ Yuˇdaˆ deuˬ-euˬ bawˬ dzaˬ duˬ-euˬ gaˇ kawˆ-ahˇ maˬ ngehˬ keuˆ taˬ-aˬ. Ehˇ k’awꞈ Gaˬliˇ Ka li zaˬ Jaˇliꞈ laꞈ k’oeˇ Yuˇdaˆ deuˬ-euˬ bawˬ dzaˬ duˬ dahˬ beh-eu Ka li zaˬ-euˬ saˇ ka-ahˇ jaˆ ngaˇ lehˇ maˇ jawˆ ni siˬ laˇ-eu meh.

Nui gahˇ ahˇ-eu deuˬ myaˬ tiˬ paˆ Yuˇdaˆ deuˬ-euˬ bawˬ dzaˬ duˬ heu naˇ, Yuˇdaˆ tsawˇ haˬ deuˬ Baˬbuˇloˬ-ahˇ bi nyehꞈ g’eh ngeh neh naˇ dahˬ beh laˇ nga lehˇ ehˇ-eu meh. Juˬdeˇkaꞈ lehˇ kuˇ-eu dawˬ tsuiꞈ puiˇ k’awˬ-eu paˇ dmˬ tiˬ dmˬ-ahˇ “Yuˇdaˆ tsawˇ haˬ deuˬ uˬ duˬ tahˬ nymˇ nehˬ-ehˇ gaˇ mahˇ kaˬ gaˇ bi nyehꞈ g’eh-awˇ, aˬ cawˬ-euˬ tsawˇ jeuˬ deuˬ nehˬ-ehˇ ya jawˇ-eu miˇ neh, aˬ yawꞈ maꞈ-euˬ shaˬ zahˬ-ahˇ bi ngehˬ g’eh-eu g’aˇ duˬ, aˬ yawꞈ maꞈ tiˬ k’ehˬ maˬ taˬ uiˬ leˇ-awˇ, Jaˇliꞈ gui-eu meh. Teu nah naˇ jawˇ nah ngeh nah pyeuꞈ gaˇ duˇ-eu meh.” Aˬ yawꞈ maꞈ Baˬbuˇloˬ-ahˇ neh ya g’oꞈ laˇ-euˬ k’awꞈ, aˬ yawꞈ maꞈ guiˬ lahˬ shaˇ-awˇ Jaˇliꞈ gui-eu g’aˇ duˬ, uiˬ leˇ-awˇ bawˬ dzaˬ luꞈ gaˇ duˇ nga siˬ. K’oeˇ naˇ aˬ yawꞈ maꞈ k’aˇ jawˇ-iˇ gaˇ bawˬ dzaˬ duˬ teu tsoˆ-eu meh.

Dahˬ beh-euˬ Ka li zaˬ deuˬ-euˬ saˇ ka-ahˇ oe keuˆ ngeh, Yuˇdaˆ deuˬ-euˬ bawˬ dzaˬ duˬ, Yuˇdaˆ zahˇ-euˬ hawˇ-eu Gahˇ ceh-euˬ iˬ ma laˆ shaˆ-euˬ nahˇ ma doˆ k’ehˬ paw jawˇ-eu Yuˇdaˆ tsawˇ haˬ deuˬ uˬ taꞈ, Iˇsaˬleˬlaˆ miˇ k’ahˬ-ahˇ jawˇ-eu Yuˇdaˆ deuˬ-euˬ uiˬ laˇ-eu duˬ pyeuꞈ laˇ-euˬ meh. Yeˬluˇsaˬlehˬ meuˬ-euˬ huiˬ-eu dzaw nymˇ-euˬ nui gahˇ ahˇ-eu Li Leˬg’oiˇ lehˇ kuˇ-eu tiˬ g’aˬ “Yuˇdaˆ-euˬ bawˬ dzaˬ duˬ heu naˇ, poˆ tseˇ-eu pyehˆ tseˇ-eu g’aˇ duˬ maˬ ehˇ, zahˇ paw taꞈ-eu dzaˇ g’aˇ duˬ maˬ ehˇ, gaˇ kawˆ deuˬ-ahˇ laˆ piˇ-eu g’aˇ duˬ maˬ ehˇ, pu-euˬ jeˬ taꞈ jeˬ ka hawˇ-eu uˆ lahˇ-eu gaˇ kawˆ g’aˇ duˬ maˬ ehˇ, heu deuˬ-euˬ g’aˇ duˬ pyeuꞈ meh” lehˇ ehˇ-eu meh. Heu gaˇ haw ngeh Yeˬsuˇ Yuˇdaˆ deuˬ-euˬ bawˬ dzaˬ duˬ-ahˇ aˬ jeˬ miˇ neh iˇ-eu lehˇ siˬ laˇ-eu meh. (Maˬkuˆ 1:21; 6:2; Luˇkaꞈ 4:16) Yeˬsuˇ teu gaˇ iˇ-eu teu naˇ, bawˬ dzaˬ laˇ-euˬ deuˬ-ahˇ mehˬ-awˇ, g’aˬ biꞈ-eu g’aˇ duˬ meh. Ka li zaˬ aˇ muˇ jaˆ laˇ-euˬ miˇ tsa, kuiˇ laꞈ Pawˇluˆ k’awꞈ Yuˇdaˆ deuˬ-euˬ bawˬ dzaˬ duˬ-ahˇ tiˬ k’ehˬ maˬ kaˬ tsaꞈ gaˬ iˇ-eu meh. Teu gaˇ iˇ-eu deuˬ naˇ Miˬyehˇ nehˬ-ehˇ g’oeˇ mawꞈ-eu miˇ neh meh. Teu miˇ neh Pawˇluˆ meuˬ tiˬ meuˬ-ahˇ k’aˇ iˇ ngeh, Yuˇdaˆ deuˬ-euˬ bawˬ dzaˬ duˬ-ahˇ jeˬ hu ahˇ iˇ-awˇ teu gaˇ tsaꞈ gaˬ-eu meh.—G’aˬk’ehˇ 17:1, 2; 18:4.