Jaˇliꞈ laꞈ kʼoeˇ, saˇ jaˇ ziꞈ˗awˇ “aˬ dui loꞈ˗ehˇ gʼeh˗eu tsawˇ haˬ” deuˬ˗euˬ dawˬ, gʼawˬ mya ni boꞈ ahˇ taˬ˗euˬ meh. (Yaˬkoˆ 5:17) Yaw jeˬ ma jeˬ, aˬ dui Loˇmaˆ 7:21-24-ahˇ “Yaw muiˬ jeˬ˗ahˇ ngaˇ mˇ mawꞈ ngeh, maˬ muiˬ˗eu jeˬ˗ahˇ tehꞈ˗ehˇ ngaˇ tseˇ geuꞈ ni zahˇ tiˬ zahˇ ngaˬ˗euˬ laꞈ kʼoeˇ gaˇ mˇ luꞈ˗eu nya lehˇ ngaˇ ya siˬ˗euˬ ma. . . . Ngaˬ˗ahˇ shaˬ zahˬ naꞈ dui dui nya” ehˇ taˬ˗euˬ gaˇ gui ngeh, aˬ dui Pawˇluˆ˗euˬ nui ma˗ahˇ gʼoˆ shaw˗eu ma. Pawˇluˆ loꞈ˗ehˇ gʼeh˗eu saˇ jaˇ ziꞈ˗eu tsawˇ haˬ kʼawꞈ toˆ˗ehˇ gʼeh leˇ˗eu miˇ neh, dawˬ heu naˇ aˬ dui yawˬ ha˗euˬ gʼaˬ baˬ˗eu jeˬ nehˬ˗ehˇ ya deuˆ ceh ceh ngeh aˬ dui˗ahˇ gʼaˬ biꞈ dui dui˗eu meh.

Pawˇluˆ aˬ yawꞈ˗euˬ nui noeˬ nyaˆ taꞈ tiˬ jeˬ˗ahˇ paˇ ehˇ taˬ˗aˬ siˬ. Gaˬlaˬtiˆ 2:20-ahˇ Pawˇluˆ Yeˬsuˇ ‘aˬ yawꞈ˗ahˇ gaˬ˗awˇ aˬ yawꞈ˗euˬ gʼaˇ duˬ gʼawˇ mawˇ damˬ nehˬ le˗euˬ’ lehˇ jah˗eu meh. Nawˇ jiˇ ‘aˬ yawꞈ loꞈ˗ehˇ noeˬ’ miˇ˗a loˇ? Tiˬ poˆ na maˬ noeˬ ni gʼeh nya laˬ?

Aˬ dui dzeuˇ yaꞈ ngeh mˇ lehˬ˗euˬ baˬ da neh yawˬ ha aˇ poeˬ maˬ baw nya lehˇ noeˬ laˇ naˇ, Yeˬhawˇbaˬ aˬ dui˗ahˇ gaˬ˗awˇ, iˬ baˇ pyehˬ nehˬ dzeuˇ mehˬ lehˇ noeˬ˗eu heu naˇ tiˬ poˆ na shaˬ˗eu jeˬ pyeuꞈ˗awˇ, Yeˬsuˇ˗euˬ ka kʼoꞈ˗eu jeˬ jiˇ aˬ dui aˬ yawꞈ gʼaˬ yawꞈ˗ahˇ biꞈ˗euˬ laꞈ sawˬ pyeuꞈ˗eu lehˇ noeˬ˗eu heu yaw shaˬ meh. Yeˬsuˇ aˬ yawꞈ˗euˬ ka kʼoꞈ˗eu jeˬ aˬ dui aˬ yawꞈ gʼaˬ yawꞈ˗ahˇ biꞈ˗euˬ laꞈ sawˬ pyeuꞈ˗eu lehˇ bi noeˬ mawꞈ ngaˇ loˇ? Ngeuˇ naˇ, aˬ dui˗ahˇ teu loꞈ˗ehˇ noeˬ nya ni caw ba nehˬ˗eu aˬ jeˬ nga? Aˬ dui naˇ haˬ˗eu jeˬ nyiꞈ kawˆ˗ahˇ ja sawˇ ma.

Yeˬsuˇ aˬ dui˗ahˇ aˬ yawꞈ˗euˬ ka kʼoꞈ˗eu jeˬ heu naˇ, aˬ dui aˬ yawꞈ gʼaˬ yawꞈ˗ahˇ biꞈ˗euˬ aˇ poeˬ baw˗eu laꞈ sawˬ pyeuꞈ˗eu lehˇ bi haw mawꞈ˗eu yaw duˬ baw meh. Aˬ dui aˬ joˆ˗ehˇ siˬ duˬ nya˗eu nga? Luˇkaꞈ 23:39-43-ahˇ boꞈ taˬ˗euˬ gaˇ kawˆ˗ahˇ shaˇ noeˬ haw sheˇ. Zaˬ yo aˬ li tiˬ gʼaˬ Yeˬsuˇ˗euˬ gaˇ dzeˇ zeuˇ liˬ kʼoeˇ taˆ bi taꞈ tehˬ˗euˬ meh. Aˬ yawꞈ mˇ lehˬ˗euˬ ma lehˇ ehˇ˗eu meh. Zaˬ yo aˬ li heu gʼaˬ naˇ, zeuˇ liˬ kʼoeˇ taˆ bi taꞈ˗euˬ miˇ neh, mˇ lehˬ dui dui˗euˬ gaˇ duˇ˗eu meh. Aˬ yawꞈ nui ma cawˆ dui dui˗eu miˇ neh Yeˬsuˇ˗ahˇ, “Nawˇ Sahˬ paˬ loꞈ˗ehˇ zaꞈ le ngeh, ngaˬ˗ahˇ taˬ ngehˇ nehˬ laꞈ” lehˇ shaˇ˗eu meh.

Yeˬsuˇ aˬ joˆ˗ehˇ jahˇ˗euˬ nga? Yeˬsuˇ zaˬ yo aˬ li teu gʼaˬ˗euˬ myaˆ nuiˆ haw cawˬ ngeh, nui ma˗ahˇ aˇ naˆ ni deuˬ leˇ paˬ nga lehˇ shaˇ noeˬ haw sheˇ. Aˬ yawꞈ nui ma naˇ kʼawꞈ, zaˬ yo aˬ li teu gʼaˬ˗ahˇ uiˇ cawˬ nehˬ˗awˇ, “Nawˇ ngaˬ nehˬ˗ehˇ Baˬlaˬdiˇsuˆ˗ahˇ ya jawˇ tehꞈ˗a” lehˇ ehˇ nehˬ˗awˇ gʼaˬ biꞈ nehˬ˗euˬ meh. Maˇ diˇ naˇ, Yeˬsuˇ aˬ yawꞈ neh “tsawˇ haˬ gʼawˬ mya ni˗ahˇ ka kʼoꞈ˗eu gʼaˇ duˬ shiˇ dah le˗eu” ma lehˇ ehˇ˗eu dawˬ˗ahˇ bi noeˬ mawˇ˗eu tehꞈ kʼawꞈ pyeuꞈ nya meh. (Maꞈtehˬ 20:28) Ehˇ kʼawꞈ nawˇ mawˇ maˬ loˇ? Yeˬsuˇ lmˇ boˬ ni “nawˇ” hawˇ˗eu ‘ngaˇ’ lehˇ ngehˬ˗awˇ, zaˬ yo aˬ li teu gʼaˬ˗ahˇ miˇ tsaˬ kʼoeˇ taˆ baˬlaˬdiˇsuˆ˗ahˇ ya jawˇ meh lehˇ ehˇ nehˬ gaˇ. Heu gaˇ haw ngeh, Yeˬsuˇ ka kʼoꞈ˗eu jeˬ heu naˇ, zaˬ yo aˬ li teu gʼaˬ˗euˬ gʼaˇ duˬ pyeuꞈ meh lehˇ ehˇ luꞈ˗eu meh.

Yeˬsuˇ zaˬ yo aˬ li teu gʼaˬ˗ahˇ ka kʼoꞈ˗eu jeˬ heu naˇ, aˬ yawꞈ˗euˬ gʼaˇ duˬ gaˇ dahˇ tsoeˬ˗eu meh lehˇ bi siˬ nya mawꞈ˗eu meh. Yeˬsuˇ Miˬyehˇ gaˇ maˬ mˇ˗euˬ haiˬ˗eu tsawˇ haˬ teu gʼaˬ˗ahˇ laꞈ sawˬ teu bi za mawꞈ˗eu jeˬ maˇ˗iˬ, iˇ cuꞈ shawˇ˗awˇ Yeˬhawˇbaˬ˗euˬ gaˇ mˇ luꞈ˗eu Ka li zaˬ deuˬ˗ahˇ ngehˬ˗ehˇ dzehˬ aˇ naˆ ni bi za mawꞈ˗eu nga? Aˬ dui dzeuˇ yaꞈ ngeh mˇ lehˬ˗euˬ kʼawꞈ, Yeˬsuˇ˗euˬ ka kʼoꞈ˗eu jeˬ heu naˇ, aˬ dui˗euˬ gʼaˇ duˬ gaˇ dahˇ tsoeˬ˗eu lehˇ aˬ joˆ˗ehˇ siˬ nya˗eu nga?

Pawˇluˆ Miˬyehˇ gaˇ ya mˇ˗euˬ miˇ neh, Yeˬsuˇ aˬ yawꞈ˗euˬ gʼaˇ duˬ shiˇ˗euˬ ngaˇ lehˇ jah˗eu meh. Pawˇluˆ ehˇ˗eu, “Ngaˇ gaˇ mˇ nya ni gʼaˬ biꞈ nehˬ laꞈ˗euˬ gʼaˬ pyeuꞈ˗eu aˬ dui˗euˬ Sahˬpaˬ Yeˬsuˇ Ka li˗euˬ guiˬ lahˬ˗ahˇ ja ceuˬ˗eu ma. Aˬ yawꞈ˗euˬ gaˇ mˇ˗eu tsawˇ haˬ lehˇ sawˇ˗awˇ bi mˇ bi shaˇ laꞈ˗euˬ miˇ neh, aˬ yawꞈ˗euˬ guiˬ lahˬ˗ahˇ ngaˇ ja ceuˬ˗eu ma. Dzeuˇ laˇ ngeh aˬ yawꞈ˗ahˇ ngaˇ ja doeˇ˗awˇ, kʼehˬ nehˬ kʼaˆ nehˬ˗awˇ, yehˬ bawˬ sehˇ lu˗ehˇ ehˇ nehˬ˗euˬ ma.” (1 Tiˆmoˇseˬ 1:12-14) Pawˇluˆ dzeuˇ yaꞈ ngeh maˬ muiˬ˗eu gʼawˬ mya jeˬ mˇ˗euˬ kʼawꞈ, Yeˬsuˇ aˬ yawꞈ˗ahˇ Miˬyehˇ gaˇ bi mˇ˗euˬ miˇ neh, Yeˬsuˇ aˬ yawꞈ˗ahˇ gaˬ˗awˇ nui ma taˬ˗eu uˬ taꞈ, gʼawˬ shaˬ gaˬ ngaˇ lehˇ jah˗eu meh. Nymˬ˗mˇ iˬ nah Yeˬsuˇ aˬ dui˗ahˇ jiˇ Miˬyehˇ gaˇ bi mˇ nehˬ laꞈ˗euˬ meh. (Maꞈtehˬ 28:19, 20) Gaˇ heu naˇ, aˬ dui˗ahˇ Pawˇluˆ loꞈ˗ehˇ bi noeˬ laˇ ngaˇ loˇ?

34 kʼoꞈ dawˬ peh aˇ muˇ˗ahˇ neh bi teh doˆ˗awˇ, Yeˬhawˇbaˬ jawˇ gaˇ gʼoꞈ kʼoꞈ laˇ˗euˬ Ehˇbeuˬ ehˇ˗eu “Dzeuˇ yaꞈ ngeh ngaˬ neh mˇ lehˬ˗euˬ jeˬ aˬ myah luꞈ ngaˬ˗euˬ mehˬ shi jaˆ luꞈ nya siˬ. Ehˇ kʼawꞈ ngaˇ Miˬyehˇ gaˇ ya mˇ ngeh, Yeˬsuˇ neh ngaˬ˗ahˇ biˇ doˇ˗euˬ gaˇ˗ahˇ mˇ luꞈ˗eu miˇ neh, Pawˇluˆ loꞈ˗ehˇ noeˬ laˇ miˇ˗a. Heu naˇ ngaˬ˗ahˇ gʼaˬ biꞈ˗eu jeˬ pyeuꞈ˗awˇ, ngaˇ yawˬ ha˗euˬ dehꞈ ziˇ˗ahˇ hawˇ˗eu yawˬ ha˗euˬ mehˬ hu paw˗euˬ gaˇ kawˆ˗ahˇ maˬ ehˇ, yaw muiˬ paw haw nya ni caw ba nehˬ laꞈ˗eu meh” lehˇ ehˇ˗eu meh.—Ja ceuˬ 51:3.

Jaˇliꞈ maˬ dzaw laˇ ngeh, yaw haiˬ yaw doeˇ jeˬ tehꞈ˗ehˇ mˇ yaꞈ˗euˬ mehˇ nmˇ Aˇlaˬ ehˇ˗eu, “Ngaˇ tsawˇ haˬ deuˬ˗ahˇ yaw doeˇ jahˇ nehˬ˗euˬ gaˇ tehꞈ˗ehˇ shaˇ noeˬ luꞈ nya siˬ. Gaˇ kawˆ heu tiˬ poˆ na ngaˬ˗ahˇ, maˬ sa maˇ saˇ˗ehˇ bi gʼeh laˇ˗eu meh. Ehˇ kʼawꞈ Yeˬhawˇbaˬ ngaˇ loꞈ˗ehˇ gʼeh˗eu iˬ baˇ zaˬ˗ahˇ zmˬ˗awˇ, aˬ cawˬ˗ahˇ guiˬ lahˬ dawˬ bi tsaꞈ gaˬ˗eu miˇ neh guiˬ lahˬ huiˬ˗eu lehˇ miˇ˗a. Tsawˇ haˬ deuˬ guiˬ lahˬ dawˬ˗ahˇ ha geuꞈ gaˇ ya mawˇ ngeh, Yeˬhawˇbaˬ naˇ, yawˬ gʼaˬ na luꞈ˗ahˇ aˇ naˆ ni gaˬ˗awˇ, aˇ naˆ ni mˇ muiˬ nehˬ nga lehˇ siˬ laˇ nya. Aˬ yawꞈ ngaˬ˗ahˇ zmˬ˗awˇ, dzeuˇ yaꞈ ngeh ngaˇ loꞈ˗ehˇ maˬ muiˬ˗eu tsawˇ haˬ deuˬ˗ahˇ bi caw ba nga lehˇ noeˬ laˇ nya.”

Miˬyehˇ gaˇ mˇ˗eu heu naˇ, aˬ dui˗ahˇ yaw muiˬ jeˬ mˇ˗awˇ, yaw muiˬ jeˬ˗ahˇ shaˇ noeˬ ni caw ba nehˬ˗eu uˬ taꞈ, Yeˬsuˇ aˬ dui˗ahˇ gaˬ˗awˇ, nui ma taˬ˗eu laꞈ kʼoeˇ gʼawˬ shaˬ gaˬ ngaˇ lehˇ jah laˇ ni jiˇ caw ba nehˬ˗eu meh.

Saˬdaˬ˗euˬ miˇ tsaˬ maˬ laˆ cawˆ˗euˬ kʼoeˇ keuˆ ni, aˬ dui mˇ lehˬ haw˗euˬ baˬ da neh yawˬ haˇ yawˬ ha iˬ baˇ taˬ˗awˇ, nui ma cawˆ luꞈ˗a siˬ. Aˬ dui nui noeˬ heu˗ahˇ aˬ joˆ˗ehˇ gʼaˬ leˇ nya˗eu nga?

Mehˇ nmˇ Jiˬ, zaˬ guˬ guˬ ngeh mehˬ shi naˇ kʼah tiˬ jeˬ lehˇ dehꞈ yaꞈ˗euˬ gaˇ noeˬ mawˇ ngeh, nui ma cawˆ˗eu meh. Aˬ yawꞈ “Ngaˬ˗ahˇ ‘Miˬyehˇ˗aˬ, aˬ dui˗euˬ nui ma naˆ maˬ tseˇ huiˬ dzehˬ mahˇ dzehˬ’ meh lehˇ ehˇ˗eu Jaˇliꞈ aˇ deuˆ˗ahˇ ya leˇ nya” lehˇ ehˇ˗eu meh. (1 Yoˇhaˬ 3:19, 20) Aˬ dui˗ahˇ kʼawꞈ, Yeˬhawˇbaˬ hawˇ˗eu Yeˬsuˇ aˬ dui iˬ baˇ zaˬ pyeuꞈ˗eu lehˇ gʼoˆ shaw nehˬ laꞈ meh lehˇ ya siˬ˗euˬ miˇ neh gʼaˬ ahˇ laˇ nya˗eu meh. Aˬ yawꞈ nyaꞈ ka kʼoꞈ˗eu jeˬ biꞈ nehˬ laꞈ˗euˬ heu naˇ, byah kuꞈ˗eu tsawˇ haˬ˗euˬ gʼaˇ duˬ maˬ ngeuˇ˗eu, iˬ baˇ noeˬ poˆ noeˬ paˇ deuˬ˗euˬ gʼaˇ duˬ pyeuꞈ˗eu lehˇ ya noeˬ taˬ˗eu meh.—1 Tiˆmoˇseˬ 1:15.

Aˬ dui Yeˬsuˇ maˬ byah kuꞈ˗eu tsawˇ haˬ deuˬ˗ahˇ aˬ joˆ˗ehˇ mˇ nehˬ˗euˬ nga lehˇ shaˇ noeˬ shaˇ sawˇ˗awˇ, aˬ yawꞈ neh biꞈ laꞈ˗euˬ Miˬyehˇ gaˇ˗ahˇ kʼaˇ gʼeh nya gaˇ neh mˇ naˇ, Yeˬsuˇ shiˇ˗euˬ heu naˇ aˬ dui˗ahˇ ka kʼoꞈ˗eu gʼaˇ duˬ meh lehˇ jah laˇ˗eu meh. Aˬ dui heu loꞈ˗ehˇ jahˇ ngeh, Pawˇluˆ loꞈ˗ehˇ, Yeˬsuˇ “Ngaˬ˗ahˇ gaˬ˗awˇ ngaˬ˗euˬ gʼaˇ duˬ gʼawˇ mawˇ damˬ nehˬ le˗euˬ” meh lehˇ ehˇ nya˗eu meh.