Nawˇ 2019 kʼoꞈ˗euˬ Loˬ˗eu nymˇgoˇ laꞈ kʼoeˇ neh yuˇ leꞈ˗euˬ gaˇ kawˆ heu deuˬ˗ahˇ dawˬ kʼoꞈ biꞈ nya miˇ˗a loˇ?

“Nawˬ˗ahˇ laˆ tahˬ laˆ naˇ nya˗eu, guiˇ deuˆ˗eu keu ka maˬ jaˆ˗a” lehˇ ehˇ˗eu Miˬyehˇ˗euˬ saˇ jaˇ dawˬ heu naˇ, aˬ jeˬ˗ahˇ ehˇ mawꞈ˗eu nga? (Iˇsaˬyaˇ 54:17)

Aˬ dui Yeˬhawˇbaˬ aˬ dui˗ahˇ “haiˬ˗eu tsawˇ haˬ deuˬ”˗ahˇ neh buˬ˗iˇ ni uˆ kaˬ uˆ lahˇ nehˬ meh lehˇ nui ma taˬ nya meh. (Iˇsaˬyaˇ 25:4, 5) Muiˇ˗eu deuˬ aˬ dui˗ahˇ mˬ maˬ maˬ byaˆ zaˇ ziˇ maˬ laˆ cawˆ nya˗a.—w19.01, myaˆ pyawˬ 6-7.

Miˬyehˇ neh Kaˬnaˬ tsawˇ jeuˬ hawˇ˗eu saˇ jaˇ maˬ ziꞈ˗euˬ Iˇsaˬleˬlaˆ deuˬ˗ahˇ mˇ nehˬ˗euˬ jeˬ˗ahˇ haw ngeh, aˬ yawꞈ˗euˬ yaw tsaˬ yaw dawˇ jeˬ˗ahˇ aˬ joˆ˗ehˇ bi mawˇ laꞈ˗eu nga?

Miˬyehˇ jawꞈ laˇ paˬ˗ehˇ yuꞈ taꞈ˗eu deuˬ˗ahˇ maˬ ehˇ, zaˬ hawˇ˗eu zaˬ miˬ aˬ buˇ deuˬ˗ahˇ yaw doeˇ jahˇ˗eu deuˬ˗ahˇ maˬ ehˇ, yaˇ kʼaˬ daˇ˗eu meh. Ehˇ kʼawꞈ, aˬ yawꞈ˗euˬ ehˇ dawˬ naˇ haˬ˗awˇ, aˬ cawˬ˗ahˇ yaw tsaˬ yaw dawˇ dawˇ˗ehˇ mˇ nehˬ˗eu deuˬ˗ahˇ guiˬ lahˬ biꞈ˗eu meh.—w19.02, myaˆ pyawˬ 22-23.

Yeˬhawˇbaˬ˗ahˇ uˬ duˬ maˬ tahˬ˗eu tiˬ gʼaˬ guiˬ lahˬ shaˇ ngeh, aˬ dui teu gaˇ jawˇ luꞈ naˇ aˬ joˆ˗ehˇ ya jahˇ˗eu nga?

Aˬ dui ciˬ cuˇ ni yaw zeu baw˗eu laꞈ kʼoeˇ ya jawˇ˗eu meh. Aˬ dui “Aˬmiˬ” lehˇ maˬ ehˇ˗eu uˬ taꞈ, kʼoeˇ gaˇ jawˇ˗eu deuˬ˗euˬ aˬ laꞈ˗ahˇ jiˇ maˬ nyehꞈ tehˬ. Aˬ dui nui ma laꞈ kʼoeˇ guiˬ lahˬ shaˇ nya meh.—w19.03, myaˆ pyawˬ 31.

Zaˬ˗ahˇ dawꞈ˗eu heu naˇ, aˇ naˆ ni doeˇ˗eu nga?

Zaˬ˗ahˇ dawꞈ˗eu jeˬ heu naˇ, bi dawꞈ˗euˬ gʼaˬ˗ahˇ maˬ ehˇ, aˇ muˇ˗ahˇ maˬ ehˇ, miˇ kʼahˬ˗euˬ zahˇ sahˇ kʼoꞈ˗ahˇ maˬ ehˇ, Miˬyehˇ˗ahˇ maˬ ehˇ, bahˬ˗eu jeˬ pyeuꞈ meh. Sheuˬ gʼeh˗eu deuˬ zaˬ˗ahˇ dawꞈ˗eu gaˇ kawˆ ya gaˬ ngeh, miˇ kʼahˬ sahˬ paˬ sahˬ ma˗ahˇ ya tsaꞈ gaˬ iˇ˗eu lehˇ zahˇ sahˇ kʼoꞈ jaˆ˗euˬ naˇ, ya mˇ caw˗eu meh.—w19.05, myaˆ pyawˬ 9-10.

Aˬ dui nui ma laꞈ kʼoeˇ nui noeˬ aˬ joˆ˗ehˇ laˆ paˇ nya˗eu nga?

Aˇ yeˇ huiˬ˗eu jeˬ naˇ Yeˬhawˇbaˬ˗ahˇ guiˬ lahˬ shaˇ˗awˇ, aˬ dui yawˬ ha˗ahˇ pyehˆ tseˇ˗eu gʼaˇ duˬ, ya shaˇ noeˬ ya shaˇ sawˇ˗eu uˬ taꞈ, tsawˇ muiˬ deuˬ nehˬ˗ehˇ ya cawˬ˗eu meh.—w19.06, myaˆ pyawˬ 11.

Aˬ dui kʼehˬ˗eu kʼaˆ˗eu jeˬ˗ahˇ kamˬ coeˇ˗eu gʼaˇ duˬ, nymˬ˗mˇ neh aˬ joˆ˗ehˇ ya lehˬ hmˬ taˬ˗eu nga?

Aˬ dui Yeˬhawˇbaˬ nehˬ˗ehˇ ya gʼoeˇ˗eu meh. Aˬ yawꞈ aˬ dui˗ahˇ gaˬ˗awˇ aˬ dui˗ahˇ maˬ byehˇ dzeh˗a lehˇ ya jah˗eu uˬ taꞈ, yawˬ nah na luꞈ Jaˇliꞈ ya gui˗awˇ, tiˬ kʼehˬ maˬ taˬ guiˬ lahˬ ya shaˇ˗eu meh. Kʼoeˇ naˇ, Miˬyehˇ Miˇkʼahˬ nehˬ˗ehˇ taꞈ leˇ˗eu saˇ jaˇ dawˬ deuˬ maˇ diˇ pyeuꞈ laˇ meh lehˇ jah˗awˇ aˬ dui ya leˇ˗eu Jaˇliꞈ aˇ deuˆ deuˬ˗ahˇ noeˬ taˬ nya ni leh jeh˗eu uˬ taꞈ, aˬ dui˗euˬ dawˬ caˇ deuˬ˗ahˇ jiˇ ya caˇ dzaw taˬ˗euˬ meh.—w19.07, myaˆ pyawˬ 2-4.

Nymˇ jiˇ laꞈ kʼoeˇ˗euˬ deuˬ˗ahˇ buˬ˗iˇ lawˬ˗iˇ nya ni aˬ joˆ˗ehˇ caw ba nehˬ nya˗eu nga?

Aˬ dui aˬ yawꞈ maꞈ˗euˬ nui ma˗ahˇ ya noeˬ keuˆ nehˬ˗awˇ, yaw muiˬ˗ehˇ ya dehꞈ mehˬ˗eu uˬ taꞈ, nui ma gʼawˬ mahˇ ni jiˇ ya taˬ˗awˇ, aˬ yawꞈ jeˬ aˬ yawꞈ˗ahˇ haw haw˗ehˇ ya laˆ tsaˬ nehˬ˗eu meh.—w19.08, myaˆ pyawˬ 15-17.

Maꞈtehˬ 11:28-ahˇ Yeˬsuˇ neh saˇ jaˇ dzaˬ taˬ˗euˬ loꞈ˗ehˇ, aˬ dui aˬ jeˬ miˇ neh shiˬ keuˇ ni gʼeh laˇ nya˗eu nga?

Aˬ dui aˬ dui˗ahˇ gaˬ˗eu sheuˬ gʼeh˗eu deuˬ jawˇ˗awˇ, muiˬ dui dui˗eu cawˬ jawˇ˗eu uˬ taꞈ, muiˬ dui dui˗eu gaˇ jiˇ ya mˇ˗euˬ ma.—w19.09, myaˆ pyawˬ 23.

Miˬyehˇ aˬ dui˗ahˇ mˇ mawꞈ˗eu nui ma bi ahˇ˗awˇ mˇ nya ni aˬ joˆ˗ehˇ caw ba nehˬ˗eu nga? (Piˇliˇpiˆ 2:13)

Aˬ dui Jaˇliꞈ gui˗awˇ shaˇ noeˬ shaˇ sawˇ ngeh, Miˬyehˇ aˬ dui˗ahˇ aˬ yawꞈ nui ma tsaˬ˗eu jeˬ˗ahˇ mˇ mawꞈ˗eu nui ma ahˇ˗awˇ mˇ nya ni caw ba nehˬ˗eu meh. Aˬ yawꞈ˗euˬ muiˬ˗eu shawˇ˗eu yaw sahˇ, aˬ dui bym˗eu byehˆ˗eu jeˬ˗ahˇ bi huiˬ bi mahˇ laˇ ni caw ba nehˬ nya meh.—w19.10, myaˆ pyawˬ 21.

Aˬ dui aˇ yeˇ huiˬ˗eu gaˇ kawˆ˗ahˇ maˬ noeˬ tsehˆ mi naˆ˗ehˇ aˬ jeˬ jeˇ ya jahˇ˗eu nga?

Aˬ dui ya jahˇ˗eu ngaˬ jeˬ jaˆ meh. Zaˬ siˬ nui gahˇ za˗eu gʼaˇ duˬ guiˬ lahˬ shaˇ, yaw muiˬ˗ehˇ poˆ tseˇ, aˬ jeˬ baˬ da neh jahˇ de lehˇ shaˇ noeˬ, aˬ jeˬ jahˇ˗eu lehˇ laˆ duˬ taˬ, kʼaˇ pyeuꞈ˗eu loꞈ˗ehˇ haw.—w19.11, myaˆ pyawˬ 27-29.

Maˬ shiˇ nya˗eu saꞈ laˇ gaˇ kawˆ mehˬ˗eu jeˬ, Saˬdaˬ neh Eˇbaˆ˗ahˇ ehˇ nehˬ˗euˬ dawˬ˗ahˇ neh dahˬ beh laˇ˗euˬ nga laˬ?

Toˆ˗ehˇ pyeuꞈ gaˇ maˇ duˇ˗a. Saˬdaˬ Eˇbaˆ˗ahˇ maˬ ya shiˇ˗a lehˇ ehˇ nehˬ˗eu teu naˇ, aˬ yawꞈ mawˇ do shiˇ kʼawꞈ maˬ mawˇ nya˗eu saꞈ laˇ dehꞈ yaꞈ˗a siˬ lehˇ ehˇ mawꞈ˗eu maˬ ngeuˇ˗a. Zahˇ kʼawꞈ deuˬ Noˇaˬ˗euˬ saˇ ka˗ahˇ iˇ cuꞈ dahˬ pymˬ ngeh bi laˆ cawˆ jiˇ˗euˬ meh. Teu miˇ neh, maˬ shiˇ nya˗eu saꞈ laˇ gaˇ kawˆ˗ahˇ jah˗eu jeˬ heu naˇ, Miˬyehˇ Baˬbuˇloˬ˗euˬ nymˇ nymˇ ma gawˬ˗eu tsawˇ haˬ deuˬ˗ahˇ miˇ kʼahˬ doe ni jawˇ byaˆ iˇ jiˇ ni maˬ jahˇ mi naˆ˗ehˇ pyeuꞈ laˇ˗euˬ gaˇ duˇ˗eu meh.—w19.12, myaˆ pyawˬ 15.