Toˆ˗ehˇ pyeuꞈ gaˇ maˬ duˇ˗a. Saˬdaˬ Eˇbaˆ˗ahˇ Miˬyehˇ neh taˬ dzaˬ lehˇ ehˇ˗euˬ aˇ siˬ˗ahˇ dzaˬ naˇ, mawˇ do tehꞈ˗ehˇ shiˇ˗awˇ dehꞈ yaꞈ˗a siˬ lehˇ ehˇ nehˬ˗euˬ maˬ ngeuˇ˗a. (Nymˬ˗mˇ iˬ nah tiˬ gʼaˬ na maˬ shiˇ nya˗eu saꞈ laˇ lehˇ kuˇ˗eu meh.) Saˬdaˬ aˇ lawˇ˗ahˇ zmˬ˗awˇ Eˇbaˆ aˇ bawˇ kʼoeˇ bawˇ˗euˬ aˇ siˬ ‘dzaˬ kʼawꞈ maˬ ya shiˇ˗a’ lehˇ ehˇ˗eu meh. Teu naˇ aˬ yawꞈ Eˇbaˆ maˬ shiˇ ni ya dehꞈ˗eu uˬ taꞈ, miˇ tsaˬ kʼoeˇ taꞈ Miˬyehˇ˗ahˇ maˬ gʼoe ni dehꞈ˗eu˗aˬ muiˬ dzehˬ˗awˇ laˬ kʼaˬ cehˇ dzehˬ meh lehˇ ehˇ mawꞈ˗eu meh.—Aˇdahˬbeh˗eu 2:17; 3:3-5.

Toˆ˗ehˇ naˇ maˬ shiˇ nya˗eu saꞈ laˇ gaˇ kawˆ˗ahˇ mehˬ bahˬ˗eu jeˬ Eˬdeˬ yaˇ kʼmˇ˗ahˇ neh doˆ dahˬ beh laˇ˗euˬ maˬ ngeuˇ˗eu jeˬ maˇ˗iˬ, aˬ gaˇ neh doˆ laˇ˗euˬ nga? Aˬ dui maˬ siˬ duˬ˗a. Ehˇ kʼawꞈ, zahˇ kʼawꞈ deuˬ Noˇaˬ˗euˬ saˇ ka˗ahˇ iˇ cuꞈ dahˬ pymˬ ngeh bi laˆ cawˆ jiˇ˗euˬ meh lehˇ aˬ dui siˬ nya ma. Zahˇ kʼawꞈ deuˬ mehˬ bahˬ˗eu jeˬ maˬ paˇ dzeˇ yaꞈ mehˬ. Aˬ jeˬ miˇ neh ehˇ naˇ, teu ngeh Miˬyehˇ˗ahˇ uˬ duˬ tahˬ˗eu Noˇaˬ pehˬ tehꞈ˗ehˇ ya buˬ˗iˇ˗euˬ miˇ neh meh.

Teu miˇ neh, nymˬ˗mˇ iˬ nah mehˬ luꞈ˗eu maˬ shiˇ nya˗eu saꞈ laˇ gaˇ kawˆ heu naˇ, miˇ tsaˬ kʼoeˇ taˆ iˇ cuꞈ dahˬ pymˬ dzeuˇ gʼaˬ˗awˇ neh tehꞈ˗ehˇ doˆ laˇ˗euˬ meh. Miˬyehˇ Baˬbuˇloˬ˗ahˇ tsawˇ haˬ deuˬ˗euˬ dawˬ˗ahˇ laˆ bahˬ laˆ baˆ nehˬ˗awˇ, tsawˇ haˬ deuˬ ‘miˇ kʼahˬ doe ni jawˇ byaˆ iˇ jiˇ’ ngeh, maˬ shiˇ nya˗eu saꞈ laˇ nehˬ˗ehˇ taꞈ leˇ˗awˇ jah˗eu jeˬ jiˇ iˇ byaˆ gʼeh˗euˬ gaˇ duˇ˗eu meh. (Aˇdahˬbeh˗eu 11:8, 9) Mehˬ bahˬ˗eu jeˬ heu aˬ geu ngeh dahˬ beh laˇ˗euˬ kʼawꞈ, “jaˬ myawꞈ myawꞈ˗eu deuˬ dawˬ tawˆ luꞈ˗euˬ aˬ da yaw dzahˇ gʼaˬ” pyeuꞈ˗eu Saˬdaˬ, toˆ˗ehˇ jah gaˇ gʼaˬ biꞈ˗awˇ, miˇ tsaˬ kʼoeˇ taˆ˗euˬ tsawˇ haˇ deuˬ toˆ˗ehˇ jah luꞈ gaˇ ya mawˇ ngeh laˬ kʼaˬ cehˇ dui dui˗eu yaw duˬ baw meh.—Yoˇhaˬ 8:44.