Dawˬmehˬmehˬ˗eu 22:25-27-ahˇ˗euˬ zahˇ dawˬ heu naˇ, kʼaˬ dzeˇ zaˬ gʼaˬ bahˬ ngaˇ laˬ lehˇ pyehˆ tseˇ˗eu gʼaˇ duˬ maˬ ngeuˇ˗a. Aˬ yawꞈ mˇ bahˬ˗euˬ yaw duˬ baw meh. Zahˇ dawˬ heu naˇ, zaˬ miˬ aˬ buˇ gʼaˬ maˬ bahˬ˗a lehˇ ehˇ˗eu gʼaˇ duˬ meh. Aˬ dui gaˇ kawˆ heu˗euˬ dawˬ pehˬ uˬ duˬ˗ahˇ pyehˆ tseˇ haw ma.

Dawˬmehˬmehˬ˗eu 22:23, 24-ahˇ naˇ, kʼaˬ dzeˇ zaˬ tiˬ gʼaˬ aˬ cawˬ˗ahˇ ngehˬ cawˬ tsehˆ taˬ˗euˬ zaˬ miˬ aˬ buˇ tiˬ gʼaˬ nehˬ˗ehˇ “meuˬ laꞈ kʼoeˇ” yuꞈ taꞈ˗eu gaˇ kawˆ˗ahˇ ngehˬ keuˆ taˬ˗euˬ meh. Teu˗aˬ, dehꞈ bahˬ˗euˬ jeˬ pyeuꞈ meh. Aˬ jeˬ miˇ neh ehˇ naˇ, aˬ cawˬ˗ahˇ ngehˬ cawˬ tsehˆ taˬ˗euˬ zaˬ miˬ aˬ buˇ˗ahˇ oeˇ mˇ baˇ dzeuˇ˗euˬ lehˇ sawˇ˗eu miˇ neh meh. Toˆ˗ehˇ naˇ zaˬ miˬ aˬ buˇ gʼaˬ bahˬ ngaˇ loˇ? Aˬ yawꞈ caw ba le nehˬ laꞈ lehˇ guˇ law nmˇ˗aˬ, aˬ cawˬ jiˇ caw ba le˗eu paˬ. Ehˇ kʼawꞈ aˬ yawꞈ ‘aˬ cawˬ˗ahˇ guˇ gaˬ nya˗eu meuˬ laꞈ kʼoeˇ kʼoeˇ loꞈ˗ehˇ pyeuꞈ laˇ˗euˬ kʼawꞈ, caw ba le˗awˬ lehˇ maˬ guˇ’˗euˬ miˇ neh, aˬ yawꞈ jiˇ bahˬ˗eu meh.

Ehˇ kʼawꞈ, Dawˬmehˬmehˬ˗eu 22:25-27 laꞈ kʼoeˇ˗euˬ gaˇ kawˆ naˇ teu nehˬ˗ehˇ maˬ duˇ˗a. Teu gaˇ ehˇ˗eu, “Tsawˇ haˬ tiˬ gʼaˬ na, aˬ cawˬ˗ahˇ ngehˬ cawˬ tsehˆ taˬ˗euˬ zaˬ miˬ aˬ buˇ tiˬ gʼaˬ˗ahˇ, bawˇ tsahˬ˗ahˇ tahˬ puˬ˗awˇ, dawꞈ˗awˇ yehˬ bawˬ sehˇ lu˗ehˇ gʼeh nehˬ˗euˬ ehˇ˗awˬ. Kʼoeˇ loꞈ˗ehˇ pyeuꞈ laˇ naˇ, kʼaˬ dzeˇ zaˬ gʼaˬ˗ahˇ tehꞈ˗ehˇ ya sehꞈ meh. Zaˬ miˬ aˬ buˇ kʼoeˇ gʼaˬ˗ahˇ tiˬ jeˬ˗iˬ maˬ ya jahˇ˗a. Aˬ jeˬ miˇ neh ehˇ naˇ, ya shiˇ gaˇ keuˆ ni aˬ yawꞈ neh mˇ lehˬ taˬ˗euˬ jeˬ maˬ jaˆ˗a. Gaˇ kawˆ heu hmˬ˗aˬ, tsawˇ haˬ tiˬ gʼaˬ neh yawˬ gʼaˬ yawˬ˗ahˇ dawꞈ˗awˇ sehꞈ˗euˬ gaˇ kawˆ˗ahˇ duˇ˗eu meh. Kʼaˬ dzeˇ zaˬ kʼoeˇ gʼaˬ bawˇ tsahˬ˗ahˇ aˬ yawꞈ˗ahˇ yehˬ bawˬ sehˇ lu˗ehˇ jahˇ˗euˬ miˇ neh, caw ba le˗awˬ lehˇ aˬ yawꞈ guˇ kʼawꞈ, caw ba nehˬ˗eu gʼaˬ maˬ jawˇ˗a.”

Heu loꞈ˗ehˇ pyeuꞈ ngeh, yaˇ kʼaˬ daˇ˗eu deuˬ zaˬ miˬ aˬ buˇ gʼaˬ˗ahˇ jah˗eu meh. Aˬ yawꞈ ‘caw ba le˗awˬ lehˇ guˇ kʼawꞈ, caw ba nehˬ˗eu gʼaˬ maˬ jawˇ’˗eu miˇ neh, aˬ yawꞈ dehꞈ bahˬ˗euˬ lehˇ maˬ sawˇ nya˗a. Ehˇ kʼawꞈ kʼaˬ dzeˇ zaˬ gʼaˬ naˇ aˬ cawˬ˗ahˇ ngehˬ cawˬ tsehˆ taˬ˗euˬ zaˬ miˬ aˬ buˇ˗ahˇ “dawꞈ˗awˇ yehˬ bawˬ sehˇ lu˗ehˇ gʼeh nehˬ˗euˬ” miˇ neh, dawꞈ˗eu hawˇ˗eu dehꞈ bahˬ˗euˬ lehˇ sawˇ˗eu meh.

Teu miˇ neh zahˇ dawˬ heu hmˬ zaˬ miˬ aˬ buˇ gʼaˬ maˬ bahˬ˗a lehˇ ehˇ mawꞈ˗awˇ, kʼaˬ dzeˇ zaˬ gʼaˬ naˇ dawꞈ˗eu hawˇ˗eu dehꞈ bahˬ˗euˬ lehˇ ehˇ taˬ˗euˬ meh. Yaˇ kʼaˬ daˇ˗eu deuˬ, “yaw muiˬ paˬ˗ehˇ pyehˆ tseˇ haw”˗awˇ, Miˬyehˇ neh yaw duˬ yaw ciˇ ciˇ lehˇ gʼawˬ mya poˆ ehˇ nehˬ taˬ˗euˬ tsaˬ˗eu dawˇ˗eu zahˇ kʼaˇ jaˆ˗eu loꞈ˗ehˇ daˇ meh lehˇ aˬ dui jah˗eu ma.—Dawˬmehˬmehˬ˗eu 13:14; 17:4; Doˆ˗iˇ˗eu 20:14.