Nawˇ shaˇ noeˬ ngeh, nawˇ guiˬ lahˬ huiˬ˗eu siˬ nya˗awˇ aˬ cawˬ˗euˬ guiˬ lahˬ˗ahˇ maˬ ngehˇ˗eu tiˬ gʼaˬ pyeuꞈ˗eu lehˇ noeˬ miˇ˗a loˇ? Aˬ dui gaˇ kawˆ heu˗ahˇ yaw muiˬ˗ehˇ ya shaˇ noeˬ˗eu meh. Jaˇliꞈ laꞈ kʼoeˇ aˬ dui˗euˬ saˇ ka˗ahˇ˗euˬ tsawˇ haˬ deuˬ, “guiˬ lahˬ˗ahˇ maˬ siˬ nya˗eu” tsawˇ haˬ pyeuꞈ laˇ meh lehˇ maˬ keuˆ laˇ miˇ ehˇ taˬ˗euˬ meh. (2 Tiˆmoˇseˬ 3:2) Nawˇ tiˬ gʼaˬ˗ahˇ˗iˬ guiˬ lahˬ huiˬ˗eu maˬ loˬ˗a lehˇ noeˬ˗eu tsawˇ haˬ˗ahˇ mawˇ haw maˬ loˇ? Toˆ˗ehˇ gʼeh˗eu tsawˇ haˬ aˬ suˇ gʼaˬ kʼawꞈ aˬ yawꞈ˗ahˇ guiˬ lahˬ˗euˬ dziˇ dzoˆ daˆ˗eu loꞈ˗ehˇ ya mˇ kʼoꞈ nehˬ˗eu lehˇ noeˬ˗eu meh. Nawˇ teu loꞈ˗ehˇ gʼeh˗eu tsawˇ haˬ nehˬ˗ehˇ maˬ jawˇ mawꞈ˗eu paˬ.

Jaˇliꞈ Yeˬhawˇbaˬ˗euˬ gaˇ mˇ zaˬ deuˬ˗ahˇ “guiˬ lahˬ˗ahˇ ngehˇ˗eu maˬ tsaˬ˗a” lehˇ ehˇ˗eu meh. Aˬ dui yawˬ jeˬ na luꞈ˗euˬ laꞈ kʼoeˇ ‘Miˬyehˇ˗euˬ guiˬ lahˬ˗ahˇ ya ja ceuˬ˗eu’ meh. (Gawˇlawˇsehˇ 3:15; 1 Teˇsaˬloˇni 5:18) Guiˬ lahˬ huiˬ˗eu siˬ nya˗eu heu naˇ, aˬ dui˗ahˇ gaˇ dahˇ tsoeˬ˗eu meh. Aˬ dui aˬ jeˬ miˇ neh teu loꞈ˗ehˇ ehˇ nya nga lehˇ haw ma.

Aˬ dui guiˬ lahˬ huiˬ paˬ˗ehˇ gʼeh˗eu aˇ yeˇ huiˬ˗eu tiˬ kawˆ naˇ, heu loꞈ˗ehˇ jahˇ˗eu heu aˬ dui˗ahˇ nui saˇ oꞈ˗eu meh. Aˬ cawˬ˗ahˇ guiˬ lahˬ huiˬ˗eu tsawˇ haˬ yawˬ ha˗ahˇ nui saˇ oꞈ˗awˇ, aˬ cawˬ˗ahˇ jiˇ nui saˇ oꞈ˗eu meh. Aˬ jeˬ miˇ neh nyiˬ paw luꞈ˗ahˇ gaˇ dahˇ tsoeˬ˗eu nga? Yaw jeˬ ma jeˬ, nawˇ tiˬ gʼaˬ paˬ nawˬ˗ahˇ nui ma keuˆ˗eu laꞈ kʼoeˇ tiˬ jeˬ na mˇ nehˬ˗euˬ lehˇ ya siˬ ngeh, laˬ kʼaˬ cehˇ˗eu maˬ ngeuˇ nya loˇ? Teu naˇ aˬ yawꞈ nawˬ˗ahˇ kʼahˬ lahˇ˗awˇ aˇ poeˬ taˬ baw˗eu lehˇ bi siˬ˗eu jeˬ pyeuꞈ˗eu miˇ neh, nawˇ nui saˇ oꞈ˗eu meh. Luˇta jiˇ Bawˇza aˬ yawꞈ˗ahˇ nui ma muiˬ nehˬ ngeh teu loꞈ˗ehˇ gʼeh leˇ˗eu paˬ. Luˇta aˬ yawꞈ˗ahˇ kʼahˬ lahˇ˗awˇ aˇ poeˬ taˬ baw˗eu tsawˇ haˬ jawˇ ngaˇ lehˇ ya siˬ ngeh, laˬ kʼaˬ cehˇ dui dui˗eu yaw duˬ baw meh.—Luˇta 2:10-13.

Aˬ dui Miˬyehˇ˗ahˇ ngehˬ˗ehˇ dzehˬ guiˬ lahˬ huiˬ paˬ˗ehˇ gʼeh˗eu meh. Yaw myaˬ poˆ aˬ dui Yeˬhawˇbaˬ neh aˬ dui˗ahˇ nui jah paw hawˇ˗eu shiˬ shaˬ paw biꞈ nehˬ laꞈ˗euˬ gʼawˬ mya jeˬ˗ahˇ maˬ ehˇ, mehˬ hu paw biꞈ˗eu lehˇ gʼeh˗eu jeˬ˗ahˇ maˬ ehˇ, noeˬ mawˇ˗eu yaw duˬ baw meh. (Dawˬmehˬmehˬ˗eu 8:17, 18) Ehˇ kʼawꞈ aˬ dui teu loꞈ˗ehˇ shaˇ noeˬ˗awˇ bi jiˇ ngeh toˬ˗aˬ, Miˬyehˇ neh aˬ dui hawˇ˗eu aˬ dui gaˬ˗eu deuˬ˗euˬ gʼaˇ duˬ, biꞈ nehˬ laꞈ˗euˬ yaw muiˬ jeˬ˗ahˇ yaw muiˬ˗ehˇ ya shaˇ noeˬ ya shaˇ sawˇ˗eu meh. Aˬ dui Yeˬhawˇbaˬ aˬ dui˗ahˇ aˇ naˆ ni mˇ muiˬ˗euˬ lehˇ ngehˬ˗ehˇ shaˇ noeˬ naˇ ngehˬ˗ehˇ, aˬ yawꞈ˗ahˇ guiˬ lahˬ huiˬ˗awˇ, aˬ yawꞈ aˬ dui˗ahˇ gaˬ˗awˇ aˇ poeˬ taˬ baw˗eu lehˇ noeˬ laˇ˗eu meh.—1 Yoˇhaˬ 4:9.

Yeˬhawˇbaˬ aˬ dui˗ahˇ nui ma muiˬ nehˬ˗awˇ yaw muiˬ jeˬ gʼawˬ mya ni biꞈ nehˬ laꞈ˗euˬ lehˇ shaˇ noeˬ˗eu tehꞈ˗ehˇ maˬ gʼaˬ ni, aˬ yawꞈ˗ahˇ guiˬ lahˬ jiˇ ya huiˬ˗eu meh. (Ja ceuˬ 100:4, 5) “Guiˬ lahˬ huiˬ˗eu heu naˇ, tsawˇ haˬ zaˬ˗ahˇ laˬ kʼaˬ bi cehˇ˗eu aˇ yeˇ huiˬ˗eu jeˬ pyeuꞈ meh” lehˇ paˇ dmˬ tiˬ dmˬ ehˇ taˬ˗euˬ dawˬ jaˆ meh.

Aˬ dui guiˬ lahˬ huiˬ paˬ˗ehˇ gʼeh˗eu aˇ yeˇ huiˬ˗eu dzaˇ˗iˬ tiˬ kawˆ naˇ, tiˬ gʼaˬ tiˇ gʼaˬ bi gʼoeˇ dzehˬ laˇ˗eu miˇ neh meh. Aˬ dui yawˬ gʼaˬ na luꞈ yawˬ ha aˇ poeˬ baw nya lehˇ noeˬ mawꞈ˗eu meh. Aˬ cawˬ aˬ dui˗ahˇ yaw muiˬ jeˬ mˇ nehˬ laꞈ ngeh, aˬ dui aˇ poeˬ taˬ baw˗awˇ nui ma laꞈ kʼoeˇ neh guiˬ lahˬ huiˬ ma lehˇ ehˇ nehˬ naˇ, tiˬ gʼaˬ tiˇ gʼaˬ gʼoeˇ dzehˬ leˇ˗eu meh. (Loˇmaˆ 16:3, 4) Kʼoeˇ uˬ taꞈ, guiˬ lahˬ huiˬ˗eu siˬ nya˗eu tsawˇ haˬ aˬ cawˬ˗ahˇ caw ba˗eu meh. Aˬ yawꞈ aˬ cawˬ aˬ yawꞈ˗ahˇ mˇ muiˬ nehˬ laꞈ gaˇ ya mawˇ ngeh, aˬ yawꞈ jiˇ aˬ cawˬ˗ahˇ mˇ muiˬ nehˬ mawꞈ˗eu meh. Aˬ cawˬ˗ahˇ caw ba˗eu heu naˇ aˬ dui˗ahˇ laˬ kʼaˬ bi cehˇ˗eu meh. Yeˬsuˇ “Za˗eu naˆ maˬ tseˇ biꞈ˗eu guiˬ lahˬ huiˬ dzehˬ meh” lehˇ ehˇ taˬ˗euˬ meh.—Gʼaˬkʼehˇ 20:35.

Kehˇliˬpawˇniˬ˗yaˬ˗ahˇ dzaw goˇ˗eu sahˬ boꞈ dzaw nymˇ tiˬ tsahˇ˗ahˇ˗euˬ, guiˬ lahˬ huiˬ˗eu gaˇ kawˆ nehˬ˗ehˇ taꞈ leˇ˗awˇ pyehˆ tseˇ˗eu aˬ yuiꞈ tiˬ gʼaˬ pyeuꞈ˗eu Lawˇbeuꞈ Ehˇmehˬsuiꞈ ehˇ˗eu, “Aˬ dui guiˬ lahˬ huiˬ˗eu siˬ nya˗eu gʼaˇ duˬ, yawˬ gʼaˬ na luꞈ tiˬ gʼaˬ tiˇ gʼaˬ taꞈ˗awˇ tiˬ gʼaˬ tiˇ gʼaˬ ya gʼoe˗eu meh lehˇ  ya gʼoˆ shaw˗eu meh. Tiˬ poˆ na biꞈ˗eu gʼaˬ pyeuꞈ˗awˇ, tiˬ poˆ na naˇ yuˇ˗eu gʼaˬ ya pyeuꞈ˗eu meh.” Yaw jeˬ ma jeˬ, aˬ cawˬ aˬ dui˗ahˇ dzaˬ dzaˬ dawˇ dawˇ maˬ ehˇ, jaˆ gʼaˬ laˆ saˆ˗eu paw maˬ ehˇ, caw ba˗eu meh. (1 Gawˇliˬtu 12:21) Heu gaˇ haw ngeh guiˬ lahˬ huiˬ˗eu siˬ nya˗eu tsawˇ haˬ naˇ, aˬ cawˬ neh mˇ nehˬ laꞈ˗euˬ jeˬ˗ahˇ aˇ poeˬ taˬ baw ngaˇ lehˇ siˬ laˇ˗eu meh. Nawˇ teuˇ neh, aˬ cawˬ nawˬ˗ahˇ tiˬ jeˬ na mˇ nehˬ laꞈ ngeh, aˬ myah luꞈ guiˬ lahˬ huiˬ ma loˇ?

Kʼoeˇ uˬ taꞈ guiˬ lahˬ huiˬ˗eu siˬ nya˗eu heu naˇ, maˬ muiˬ˗eu paw maˬ ngeuˇ˗eu, yaw muiˬ paw shaˇ noeˬ ni caw ba nehˬ˗eu meh. Aˬ dui˗euˬ nui noeˬ naˇ dzeˇ doˆ dzeh˗eu jeˬ˗ahˇ duˇ˗eu meh. Aˬ dui maˬ shaˇ noeˬ mawꞈ˗eu jeˬ˗ahˇ dzeˇ doˆ dzeh˗awˇ, shaˇ noeˬ mawꞈ˗eu jeˬ˗ahˇ tehꞈ˗ehˇ bi dzeˇ yaꞈ˗eu meh. Aˬ dui guiˬ lahˬ huiˬ˗eu siˬ nya naˇ, yaw muiˬ paw tehꞈ˗ehˇ haw˗eu uˬ taꞈ, shaˬ zahˬ gaˇ kawˆ˗ahˇ jiˇ yaw kʼaˆ˗ehˇ maˬ shaˇ noeˬ˗a. Aˬ dui guiˬ lahˬ huiˬ˗eu siˬ nya naˇ, yaw muiˬ jeˬ˗ahˇ mawˇ laˇ˗awˇ, guiˬ lahˬ huiˬ˗eu jiˇ ngehˬ˗ehˇ paˇ siˬ nya dzehˬ laˇ˗eu meh. Dehꞈ ziˇ laꞈ kʼoeˇ yawˬ jeˬ na luꞈ˗ahˇ guiˬ lahˬ huiˬ˗eu laꞈ kʼoeˇ haw˗eu heu naˇ, gʼaˬ kʼehˇ Pawˇluˆ neh “Aˬ myah luꞈ Sahˬpaˬ Yeˬsuˇ laꞈ kʼoeˇ laˬ kʼaˬ cehˇ˗awˬ” lehˇ ehˇ˗eu dawˬ˗ahˇ mˇ caw nya ni caw ba nehˬ˗eu meh.—Piˇliˇpiˆ 4:4.

Guiˬ lahˬ huiˬ˗eu siˬ nya˗eu heu naˇ, maˬ muiˬ˗eu paw maˬ bi shaˇ noeˬ ni caw ba nehˬ˗eu meh. Aˬ dui guiˬ lahˬ huiˬ naˇ, myaˆ naˆ˗eu, noeˬ shaˬ˗eu, nui ma pehˇ˗eu, nui noeˬ heu deuˬ maˬ ahˇ˗a lehˇ nawˇ nui ma tsaˬ maˇ loˇ? Kʼoeˇ uˬ taꞈ, guiˬ lahˬ huiˬ˗eu siˬ nya˗eu tsawˇ haˬ, pyuˇ shuiˇ myawˬ gahˬ˗ahˇ maˬ gaˬ˗a. Aˬ yawꞈ yawˬ ha jaˆ˗eu jeˬ˗ahˇ aˇ poeˬ taˬ baw˗awˇ, teu myaˆ maˬ tseˇ jaˆ laˇ ni maˬ leh jeh˗a.—Piˇliˇpiˆ 4:12.

Aˬ dui Ka li zaˬ deuˬ, Saˬdaˬ aˬ dui˗ahˇ aˇ saˬ saˬ˗eu saˇ ka˗ahˇ ya tahˬ puˬ˗eu shaˬ zahˬ baˬ da neh, nui ma bi cawˆ mawꞈ˗awˇ gʼaˬ bi baˬ mawꞈ˗eu meh lehˇ aˬ dui siˬ nya ma. Aˬ yawꞈ aˬ dui˗ahˇ maˬ muiˬ˗eu paw bi shaˇ noeˬ mawꞈ˗awˇ, aˬ geu jeˬ˗ahˇ kʼawꞈ dawˬ oꞈ bi doˆ mawꞈ˗eu meh. Aˬ dui toˆ˗ehˇ gʼeh naˇ, tsaꞈ gaˬ˗eu gaˇ˗ahˇ deuˬ laˇ nya meh. Ehˇ kʼawꞈ, guiˬ lahˬ huiˬ˗eu siˬ nya˗eu heu naˇ, Miˬyehˇ˗euˬ yaw sahˇ laꞈ kʼoeˇ siˬ le˗eu aˇ siˬ nehˬ˗ehˇ taꞈ˗eu meh. Yaw jeˬ ma jeˬ, Miˬyehˇ neh biꞈ˗euˬ yaw muiˬ jeˬ˗ahˇ laˬ kʼaˬ cehˇ˗eu jeˬ hawˇ˗eu Miˬyehˇ˗euˬ saˇ jaˇ dawˬ deuˬ˗ahˇ jah˗eu jeˬ nehˬ˗ehˇ taꞈ˗eu meh.—Gaˬlaˬtiˆ 5:22, 23.

Aˬ dui Yeˬhawˇbaˬ˗euˬ tsawˇ haˬ pyeuꞈ˗eu deuˬ heu kawˆ laꞈ kʼoeˇ ngehˬ keuˆ taˬ˗euˬ guiˬ lahˬ huiˬ˗eu gaˇ kawˆ˗ahˇ nui ma tsaˬ˗eu paˬ. Ehˇ kʼawꞈ aˬ dui guiˬ lahˬ huiˬ˗eu siˬ nya˗awˇ yaw muiˬ jeˬ shaˇ noeˬ˗eu heu naˇ, yaw awˬ maˬ ngeuˇ˗a lehˇ siˬ nya ma. Toˆ˗ehˇ kʼawꞈ gʼaˬ taˬ baˬ, aˬ dui guiˬ lahˬ huiˬ˗eu siˬ nya laˇ ni leh jeh nya meh. Yaw jeˬ ma jeˬ, yawˬ nah na luꞈ aˬ dui˗euˬ dehꞈ ziˇ laꞈ kʼoeˇ guiˬ lahˬ huiˬ nya˗eu yaw muiˬ jeˬ˗ahˇ shaˇ noeˬ˗eu aˇ yamˬ laˆ baw taˬ. Aˬ dui heu loꞈ˗ehˇ ngehˬ˗ehˇ jahˇ naˇ ngehˬ˗ehˇ guiˬ lahˬ huiˬ˗eu siˬ nya laˇ˗awˇ, shaˬ˗eu zahˬ˗eu gaˇ kawˆ˗ahˇ shaˇ noeˬ˗eu deuˬ naˆ maˬ tseˇ laˬ kʼaˬ cehˇ dzehˬ laˇ˗eu meh. Aˬ dui˗ahˇ gʼaˬ biꞈ˗awˇ laˬ kʼaˬ bi cehˇ laˇ˗eu Miˬyehˇ hawˇ˗eu aˬ cawˬ nehˬ mˇ nehˬ˗euˬ jeˬ˗ahˇ noeˬ mawˇ˗awˇ, boꞈ doˆ leꞈ nya meh. Aˬ yawꞈ nah yawꞈ aˬ dui guiˬ lahˬ huiˬ mawꞈ˗eu nyiˬ jeˬ smˇ jeˬ˗ahˇ boꞈ doˆ laꞈ haw˗awˬ tawˇ.

Gaˇ kawˆ heu pyehˆ tseˇ˗eu tiˬ gʼaˬ na, “Yawˬ ha˗ahˇ guiˬ lahˬ huiˬ˗eu siˬ nya ni aˬ myah luꞈ dzaw˗eu heu naˇ, iˇ nmꞈ laꞈ kʼoeˇ˗euˬ sehˇ˗uˬ gaˇ mˇ˗eu jeˬ˗ahˇ yaw muiˬ paw shaˇ noeˬ ni laˆ paˇ nya meh” lehˇ ehˇ˗eu meh. Guiˬ lahˬ huiˬ˗eu siˬ nya˗eu tsawˇ haˬ laˬ kʼaˬ cehˇ dzehˬ˗eu meh. Teu miˇ neh, aˬ dui yawˬ ha neh za˗euˬ guiˬ lahˬ˗ahˇ gui haw, ya mawˇ˗euˬ jeˬ˗ahˇ laˬ kʼaˬ cehˇ, guiˬ lahˬ huiˬ˗eu siˬ nya laˇ ni dzaw luꞈ˗uˇ. Aˬ dui neh za˗euˬ yaw muiˬ jeˬ˗ahˇ haw dzeuˇ ngeh to˗aˬ, ‘Yeˬhawˇbaˬ˗ahˇ ja ceuˬ˗awˬ. Aˬ yawꞈ muiˬ dui dui˗eu gʼaˬ meh.’ Yawˬ jeˬ na luꞈ˗euˬ gʼaˇ duˬ, “Miˬyehˇ˗euˬ guiˬ lahˬ˗ahˇ ja ceuˬ” luꞈ˗uˇ.—1 Laˬsaˬbaˬ 16:34; 1 Teˇsaˬloˇni 5:18.