Jaˇliꞈ saˇ ka˗ahˇ nymˇ˗ahˇ myawˬ jeˬ hmˬ˗eu gʼaˬ, nymˇ hawˇ˗eu baw leˬ˗euˬ pyuˇ shuiˇ myawˬ gahˬ˗ahˇ ya haw teˬ˗eu meh. Heˬbyehˇ dawˬ hawˇ˗eu Gaˬliˇ dawˬ “myawˬ jeˬ hmˬ˗eu gʼaˬ”˗ahˇ tiˬ poˆ na˗aˬ, nymˇ˗ahˇ haw˗eu pyaˆ˗eu gʼaˬ maˬ ngeuˇ naˇ, zaˬ kʼaˆ lehˇ jiˇ zmˬ˗eu meh.

Yaˬkoˆ˗euˬ aˬ li Yoˇsehˆ Iˇjiˇtuˆ miˇ kʼahˬ˗ahˇ zaˬ kʼaˆ pyeuꞈ ngeh, Yoˇsehˆ Iˇjiˇtuˆ tsawˇ haˬ yaw huiˬ yaw mahˇ kʼoeˇ gʼaˬ˗euˬ nymˇ˗ahˇ myawˬ jeˬ hmˬ˗eu gʼaˬ pyeuꞈ laˇ˗awˇ, yaw huiˬ yaw mahˇ kʼoeˇ gʼaˬ “aˬ yawꞈ kʼaˇ jaˆ˗eu jeˬ dawˬ tawˆ luꞈ Yoˇsehˆ neh bi haw bi pyaˆ”˗euˬ meh. (Aˇdahˬbeh˗eu 39:2-6) Aˇ nah˗ahˇ Yoˇsehˆ jiˇ Iˇjiˇtuˆ miˇ kʼahˬ˗ahˇ yaw huiˬ yaw mahˇ geuꞈ ngeh, aˬ yawꞈ jiˇ myawˬ jeˬ hmˬ˗eu gʼaˬ cu˗euˬ meh.—Aˇdahˬbeh˗eu 44:4.

Yeˬsuˇ˗euˬ saˇ ka˗ahˇ miˇ tsaˬ˗euˬ yaw sahˇ yaˇ kmˇ nehˬ˗ehˇ gaˇ mahˇ kaˬ˗eu meuˬ˗ahˇ jawˇ˗eu miˇ neh, yaˇ kmˇ˗ahˇ jawˇ˗eu gaˇ mˇ zaˬ deuˬ˗ahˇ bi haw teˬ˗eu gʼaˇ duˬ, myawˬ jeˬ hmˬ˗eu gʼaˬ cu˗eu meh.

Myawˬ jeˬ hmˬ˗eu gʼaˬ aˬ joˆ˗ehˇ gʼeh˗eu tsawˇ haˬ ya pyeuꞈ nga? A.D. 100 teu ngeh jawˇ˗euˬ Loˇmaˆ tsawˇ haˬ pyeuꞈ˗awˇ sahˬ boꞈ boꞈ˗eu tsawˇ haˬ pyeuꞈ˗eu Koˬ˗luˬmehˇlaˬ ehˇ˗eu, nymˇ˗ahˇ haw˗eu pyaˆ˗eu gʼaˬ maˬ ngeuˇ naˇ myawˬ jeˬ hmˬ˗eu gʼaˬ geuꞈ laˇ˗eu zaˬ kʼaˆ gʼaˬ naˇ, “noeˬ dahˇ doe”˗awˇ, yaˇ kmˇ˗ahˇ mˇ laꞈ haw˗euˬ tiˬ gʼaˬ ya pyeuꞈ˗eu uˬ taꞈ, “gaˇ mˇ zaˬ deuˬ˗ahˇ yaw muiˬ˗ehˇ nyehꞈ tehˬ nya˗eu tiˬ gʼaˬ ya pyeuꞈ meh. Ehˇ kʼawꞈ yaw haiˬ yaw doeˇ jeˬ paw neh maˬ ya bi pyeuꞈ˗a” lehˇ ehˇ˗awˇ, “Myawˬ jeˬ hmˬ˗eu gʼaˬ˗euˬ gʼaˇ duˬ aˇ yeˇ kʼaˇ huiˬ˗eu jeˬ naˇ, aˬ yawꞈ yawˬ jeˬ na luꞈ˗ahˇ siˬ nya jiˇ ma lehˇ maˬ noeˬ ni, yaw shuiꞈ jeˬ˗ahˇ aˬ myah luꞈ dzaw geuꞈ mawꞈ˗eu nui ma ahˇ˗eu tiˬ gʼaˬ ya bi pyeuꞈ˗eu heu meh” lehˇ jiˇ paˇ ehˇ˗eu meh.

Jaˇliꞈ˗ahˇ myawˬ jeˬ hmˬ˗eu gʼaˬ˗euˬ yaw jeˬ ma jeˬ˗ahˇ zmˬ˗awˇ, Ka li zaˬ aˇ muˇ laꞈ kʼoeˇ pyeuꞈ laˇ˗eu gaˇ kawˆ nehˬ˗ehˇ sheu cehˆ taˬ˗euˬ meh. Yaw jeˬ ma jeˬ, gʼaˬ kʼehˇ Beˬtuˆluˆ Ka li zaˬ deuˬ˗ahˇ “Miˬyehˇ neh biꞈ laꞈ˗euˬ laꞈ sawˬ deuˬ˗ahˇ yaw muiˬ paˬ˗ehˇ jeˬ hmˬ˗awˇ, aˬ cawˬ gʼaˇ duˬ gaˇ dahˇ tsoeˬ ni zmˬ˗awˬ” lehˇ ehˇ˗eu meh.—1 Beˬtuˆluˆ 4:10.

Yeˬsuˇ kʼawꞈ Luˇkaꞈ 16:1-8 laꞈ kʼoeˇ˗euˬ yaw jeˬ ma jeˬ˗ahˇ myawˬ jeˬ hmˬ˗eu gʼaˬ˗euˬ gaˇ kawˆ˗ahˇ ngehˬ keuˆ taˬ˗euˬ meh. Kʼoeˇ uˬ taꞈ, Yeˬsuˇ Sahˬ paˬ keuˆ leˇ˗euˬ lehˇ siˬ laˇ˗eu gaˇ kawˆ nehˬ˗ehˇ taꞈ leˇ˗eu maˬ keuˆ laˇ miˇ ehˇ taˬ dawˬ laꞈ kʼoeˇ, aˬ yawꞈ zaˬ lahˇ deuˬ˗ahˇ “saˇ jaˇ ziꞈ˗awˇ noeˬ dahˇ doe˗eu zaˬ kʼaˆ” maˬ ngeuˇ naˇ, ‘saˇ jaˇ ziꞈ˗eu haw˗eu pyaˆ˗eu gʼaˬ’ bi jawˇ maˬ lehˇ saˇ jaˇ dzaˬ˗euˬ meh. Aˬ yawꞈ maꞈ˗euˬ gaˇ daˬ ma hmˬ naˇ, Yeˬsuˇ˗euˬ zaˬ lahˇ deuˬ, aˇ saˬ saˬ˗eu saˇ ka˗ahˇ maˬ jaˆ˗ehˇ maˬ geuꞈ nya˗eu nui jah paw˗euˬ dzaˇ biˇ nehˬ˗eu heu meh. (Maꞈtehˬ 24:45-47; Luˇkaꞈ 12:42) Aˬ dui saˇ jaˇ ziꞈ˗eu haw˗eu pyaˆ˗eu gʼaˬ neh miˇ kʼahˬ doe ni˗ahˇ biˇ nehˬ˗eu boꞈ doˆ jahˇ doˆ taˬ˗euˬ jeˬ˗ahˇ za˗eu miˇ neh guiˬ lahˬ huiˬ dui dui miˇ˗a.