Miˬyehˇ-euˬ Miˇk’ahˬ keuˆ le ngeh, aˬ jeˬ byoˆ iˇ-eu nga?
“Miˇ tsaˬ heu hawˇ-eu miˇ tsaˬ heu k’oeˇ taˆ tsawˇ haˬ zaˬ nui k’ahˇ k’aˇ jaˆ-eu jeˬ dawˬ tawˆ luꞈ ya byoˆ-iˇ jiˇ tehꞈ-a. Ehˇ k’awꞈ Miˬyehˇ-euˬ nui k’ahˇ mˇ-eu tsawˇ haˬ-aˬ mˬ maˬ maˬ byaˆ zaˇ ziˇ ya dehꞈ tehꞈ-a.”—1 Yoˇhaˬ 2:17.
1, 2. (a) Haiˬ-eu miˇ tsaˬ heu siˬ hawˇ-eu sehꞈ-eu lehˇ daˇ tsehˆ dzeuˇ-euˬ haiˬ-eu heu g’aˬ aˬ jeˬ duˇ leˇ-eu nga? (Dahˬ beh-eu baˇ-ahˇ haw.) (b) Haiˬ-eu miˇ tsaˬ-ahˇ laˆ cawˆ g’aˬ ngeh jawˇ mˬ hawˇ-eu miˇ-ahˇ jawˇ-eu deuˬ aˬ joˆ-ehˇ ehˇ-eu nga?
Haiˬ-eu tiˬ g’aˬ tawˬ-euˬ kuˆ lawˆ-ahˇ neh oe doˆ luꞈ ngeh loꞈ-eu g’aˬ “Tsawˇ shiˇ cah luꞈ nga” lehˇ guˇ-eu aˇ baˇ-ahˇ shaˇ noeˬ haw sheˇ. Aˬ yawꞈ aˬ jeˬ miˇ neh teu loꞈ-ehˇ guˇ-eu nga? Haiˬ-eu heu g’aˬ loˆ ga ni dehꞈ luꞈ k’awꞈ sehꞈ-eu lehˇ daˇ tsehˆ dzeuˇ-euˬ miˇ neh meh. Heu naˇ shiˇ-euˬ gaˇ duˇ-eu meh. *—Ehˇ lahˬ-ahˇ haw.
2 Nymˇ aˬ dui jawˇ luꞈ-eu haiˬ-eu miˇ tsaˬ heu siˬ k’awꞈ sehꞈ-eu lehˇ daˇ tsehˆ dzeuˇ-euˬ haiˬ-eu heu g’aˬ-ahˇ duˇ-eu meh. Jaˇliꞈ “miˇ tsaˬ heu . . . ya byoˆ-iˇ jiˇ tehꞈ-a” lehˇ ehˇ-eu meh. (1 Yoˇhaˬ 2:17) Yeˬhawˇbaˬ miˇ tsaˬ heu-ahˇ g’awˬ myahˇ maˬ g’eh-ehˇ laˆ cawˆ-eu lehˇ daˇ tsehˆ dzeuˇ-euˬ meh. Teu miˇ neh aˇ saˇ saˇ-eu aˇ nah jaˆ-eu yaw duˬ baw meh. Ehˇ k’awꞈ miˇ tsaˬ heu siˬ hawˇ-eu sehꞈ-eu lehˇ daˇ tsehˆ dzeuˇ-euˬ heu g’aˬ beu gaˇ-eu jeˬ jaˆ meh. Tiˬ deuˬ na yaˇ k’aˬ daˇ-eu g’aˬ daˇ bahˬ-euˬ k’awꞈ pyeuꞈ nya-awˇ haiˬ-eu g’aˬ shiˇ gaˇ maˬ keuˆ paˬ lehˇ noeˬ-eu meh. Ehˇ k’awꞈ Yeˬhawˇbaˬ byah kuꞈ-eu yaˇ k’aˬ daˇ-eu g’aˬ pyeuꞈ-eu miˇ neh miˇ tsaˬ heu siˬ-ahˇ yaˇ k’aˬ daˇ-eu tsaˬ-eu dawˇ-eu yaw duˬ baw meh. (Dawˬmehˬmehˬ-eu. 32:4) Yaˇ k’aˬ daˇ-eu heu g’awˬ myahˇ maˬ paˇ ga meh. Haiˬ-eu miˇ tsaˬ-ahˇ laˆ cawˆ g’aˬ ngeh jawˇ mˬ hawˇ-eu miˇ-ahˇ jawˇ-eu deuˬ Yeˬhawˇbaˬ-euˬ yaˇ k’aˬ daˇ-eu jeˬ-aˬ yaw tsaˬ yaw dawˇ jeˬ law hawˇ nga lehˇ ehˇ-eu meh. Heu-aˬ huiˬ dui dui-eu buˬ iˇ law iˇ-eu poˆ pyeuꞈ meh.
3. Miˬyehˇ-euˬ Miˇk’ahˬ uˆ lahˇ le ngeh byoˆ iˇ-eu oeˬ jeˬ aˬ geu nga?
3 “Ya byoˆ-iˇ jiˇ”-eu “miˇ tsaˬ” heu aˬ jeˬ-ahˇ ehˇ mawꞈ-eu nga? Nymˇ iˬ nah dehꞈ ziˇ laꞈ k’oeˇ pyeuꞈ luꞈ-eu maˬ muiˬ-eu jeˬ-ahˇ ehˇ mawꞈ-eu meh. G’awˬ myahˇ maˬ g’eh-ehˇ maˬ muiˬ-eu jeˬ dawˬ tawˆ luꞈ ya byoˆ iˇ jiˇ meh. Heu-aˬ “Miˬyehˇ Miˇk’ahˬ gaˇ kawˆ laꞈ k’aˬ cehˇ-eu guiˬ lahˬ dawˬ” pyeuꞈ meh. (Maꞈtehˬ 24:14) Heu kawˆ-ahˇ Miˬyehˇ Miˇk’ahˬ uˆ lahˇ le ngeh byoˆ iˇ-eu oeˬ jeˬ-ahˇ ja sawˇ ma. Heu naˇ haiˬ-eu tsawˇ haˬ myawꞈ dzaˬ shuiˇ dzaˬ-eu aˇ maꞈ mˇ bahˬ shaˇ muˆ-eu gaˇ dahˬ gaˇ dzeˇ yaw jawꞈ heu deuˬ pyeuꞈ meh. Aˬ yawꞈ kawˆ aˬ yawꞈ-ahˇ (1) nymˇ gaˇ kawˆ heu aˬ dui-ahˇ aˬ joˆ-ehˇ coeˬ laˇ-eu nga? (2) heu-ahˇ Yeˬhawˇbaˬ aˬ jeˬ jahˇ-eu nga? (3) heu-euˬ dah zaˇ aˬ jeˬ jaˆ le-eu nga?
Haiˬ-eu tsawˇ haˬ
4. Haiˬ-eu tsawˇ haˬ deuˬ aˬ dui-ahˇ aˬ joˆ-ehˇ coeˬ laˇ nya-eu nga?
4 Haiˬ-eu tsawˇ haˬ aˬ dui-ahˇ aˬ joˆ-ehˇ coeˬ-eu nga? Kuiˇ laꞈ Pawˇluˆ “aˇ saˬ saˬ-eu aˇ nah a yamˬ laꞈ k’oeˇ shaˬ dui dui-eu aˇ yamˬ keuˆ le tehꞈ-a” lehˇ ehˇ-awˇ “haiˬ-eu tsawˇ haˬ deuˬ hawˇ-eu jaˬ myawꞈ mehˇ shuiˇ deuˬ-aˬ ngehˬ jawˇ ngehˬ doeˇ dzehˬ laˇ” tehꞈ-a lehˇ ehˇ-eu meh. (2 Tiˆmoˇseˬ 3:1-5, 13) Nawˇ heu loꞈ-ehˇ tahˬ puˬ haw maˬ loˇ? Aˬ dui haiˬ-eu deuˬ neh bi behˬ dzaˬ haw-euˬ paˬ. Yaw jeˬ ma jeˬ yaw k’aˆ-ehˇ k’ehˬ-eu bye-eu aˇ jeuˬ aˇ ca-ahˇ haw teˬ-eu yaw haiˬ yaw doeˇ jahˇ laˇ-eu. Behˬ dzaˬ-eu heu deuˬ naˇ bya cehˆ ni mˇ doˆ laꞈ-eu deuˬ jawˇ-eu loꞈ-ehˇ caw ba-eu jahˇ geuꞈ-awˇ shuiˇ dzaˬ-eu deuˬ jiˇ jawˇ-eu meh. Gaˇ kawˆ heu aˬ dui k’oeˇ taˆ do lehˇ maˬ keuˆ le k’awꞈ haiˬ-eu tsawˇ haˬ neh mˇ-euˬ jeˬ aˬ dui-ahˇ coeˬ laˇ nya meh. Zaˬ tsawˇ mawˬ hawˇ-eu uˬ k’awˇ maˬ piˇ-euˬ deuˬ-ahˇ yaw doeˇ jahˇ-eu lehˇ ya gaˬ ngeh aˬ dui nui ma-ahˇ g’awˬ shaˬ-ehˇ g’eh laˇ-eu meh. Haiˬ-eu heu deuˬ naˇ bawˇ tsahˬ jeˬ zaˬ hawˇ-eu nehꞈ loꞈ-ehˇ duˇ-eu meh. (Yaˬkoˆ 3:15) Ehˇ k’awꞈ Yeˬhawˇbaˬ-euˬ dawˬ aˬ dui-ahˇ noeˬ tmˬ-eu jeˬ biꞈ-eu meh.
5. (a) Haiˬ-eu tsawˇ haˬ deuˬ aˬ jeˬ-euˬ aˇ yamˬ jaˆ luꞈ nga siˬ? (b) Maˬ noeˬ paˇ-eu deuˬ-euˬ k’oeˇ taˆ aˬ jeˬ keuˆ le-eu nga?
5 Gaˇ kawˆ heu-ahˇ Yeˬhawˇbaˬ aˬ jeˬ jahˇ-eu nga? Nymˇ Yeˬhawˇbaˬ yaw haiˬ deuˬ-ahˇ noeˬ poˆ noeˬ paˇ-eu aˇ yamˬ biꞈ nehˬ taˬ-euˬ meh. (Iˇsaˬyaˇ 55:7) G’awˬ myahˇ maˬ g’eh-ehˇ haiˬ-eu miˇ tsaˬ-ahˇ laˆ cawˆ k’awꞈ aˬ yawꞈ maꞈ-ahˇ bi shiˇ-eu lehˇ maˬ daˇ tsehˆ saˬ-a siˬ. Huiˬ dui dui-eu shaˬ zahˬ oe ngeh keuˆ ni maˬ noeˬ paˇ ni haiˬ-eu miˇ tsaˬ-ahˇ g’aˬ biꞈ luꞈ-eu deuˬ k’oeˇ taˆ aˬ jeˬ keuˆ le-eu nga? Yeˬhawˇbaˬ haiˬ-eu tsawˇ haˬ-ahˇ miˇ tsaˬ k’oeˇ taˆ neh laˆ byoˆ jiˇ ma lehˇ saˇ jaˇ dzaˬ taˬ-euˬ meh. (Ja ceuˬ 37:10-ahˇ gui.) Nymˇ iˬ nah g’awˬ mya g’aˬ yawˬ ha yaw lehˬ jeˬ-ahˇ laˆ zaꞈ-eu miˇ neh tiˬ jeˬ maˬ ngeuˇ-eu loꞈ-ehˇ dehꞈ nya-eu meh. (Yawˇbaˆ 21:7, 9) Ehˇ k’awꞈ Jaˇliꞈ “tsawˇ haˬ zaˬ-euˬ kuiˇ toꞈ yawˬ toꞈ na luꞈ-ahˇ aˬ yawꞈ haw luꞈ-eu meh. Miˬyehˇ maˬ bi mawˇ nya ni iˬ baˇ zaˬ deuˬ cehˆ zaꞈ nya paˬ-ehˇ jawˇ duˬ yaw zahˇ maˬ jaˆ-a” lehˇ ehˇ-eu meh. (Yawˇbaˆ 34:21, 22) Teu miˇ neh Yeˬhawˇbaˬ-ahˇ tiˬ jeˬ-iˬ maˬ zaꞈ nya-a. Aˬ yawꞈ haiˬ-eu deuˬ neh mˇ-euˬ yawˬ jeˬ na luꞈ-ahˇ mawˇ jiˇ nya meh. Aˬmaˬgeˬdoˬ jiˇ ngeh aˬ dui aˬ yawꞈ maꞈ-ahˇ maˬ paˇ poˆ mawˇ nya meh. Aˬ yawꞈ maꞈ mˬ maˬ maˬ byaˆ zaˇ ziˇ bi laˆ byoˆ jiˇ-euˬ meh.—Ja ceuˬ 37:12-15.
6. Haiˬ-eu deuˬ byoˆ jiˇ ngeh aˬ geu deuˬ dzeˇ yaꞈ-eu nga heu aˬ jeˬ miˇ neh muiˬ-eu gaˇ kawˆ pyeuꞈ-eu nga?
6 Haiˬ-eu deuˬ byoˆ jiˇ ngeh aˬ geu deuˬ dzeˇ yaꞈ-eu nga? Yeˬhawˇbaˬ “nui nahˬ nui yu ahˇ-eu deuˬ-aˬ miˇ k’ahˬ jeˬ biˇ oꞈ-eu laꞈ k’oeˇ shiˬ keuˇ ni laꞈ k’aˬ cehˇ nui saˇ ya oꞈ” meh lehˇ saˇ jaˇ dzaˬ-awˇ “tsawˇ muiˬ deuˬ-ahˇ miˇ k’ahˬ oꞈ-awˇ mˬ maˬ maˬ byaˆ ya jawˇ tehꞈ-a” lehˇ jiˇ paˇ ehˇ taˬ-euˬ meh. (Ja ceuˬ 37:11, 29) “Nui nahˬ nui yu ahˇ-eu deuˬ” hawˇ-eu “tsawˇ muiˬ” deuˬ aˬ geu deuˬ nga? Nui yu ahˇ-eu deuˬ naˇ taˬ aw-eu laꞈ k’oeˇ Yeˬhawˇbaˬ-euˬ gaˇ kawˆ-ahˇ dzaw-awˇ ehˇ dawˬ naˇ haˬ-eu deuˬ meh. Tsawˇ muiˬ deuˬ naˇ Miˬyehˇ mehˬ shi tsaˬ-eu jeˬ-ahˇ gaˬ-eu deuˬ pyeuꞈ meh. Nymˇ miˇ tsaˬ-ahˇ haiˬ-eu deuˬ tsawˇ muiˬ deuˬ naˆ maˬ tseˇ myaˬ dzehˬ-eu meh. Ehˇ k’awꞈ miˇ shuiꞈ-ahˇ nui yu ahˇ-eu deuˬ hawˇ-eu tsawˇ muiˬ deuˬ tehꞈ-ehˇ jawˇ-awˇ miˇ tsaˬ heu baˬlaˬdiˇsuˆ pyeuꞈ laˇ ni mˇ-eu meh.
Myawꞈ dzaˬ shuiˇ dzaˬ-eu aˇ maꞈ
7. Myawꞈ dzaˬ shuiˇ dzaˬ-eu aˇ maꞈ aˬ dui-ahˇ aˬ joˆ-ehˇ coeˬ nga?
7 Myawꞈ dzaˬ shuiˇ dzaˬ-eu aˇ maꞈ aˬ dui-ahˇ aˬ joˆ-ehˇ coeˬ nga? Nymˇ iˬ nah shaˬ zahˬ g’awˬ mya jeˬ yawˬ ha-ahˇ neh tehꞈ-ehˇ pyeuꞈ-eu maˬ ngeuˇ-a aˇ maꞈ neh mˇ-euˬ jeˬ-ahˇ neh pyeuꞈ meh. Zahˇ paw-euˬ aˇ maꞈ deuˬ g’awˬ mya lam g’aˬ-ahˇ sheuˬ bahˬ-eu meh. Yaw jeˬ ma jeˬ aˬ yawꞈ maꞈ Miˬyehˇ gaˇ kawˆ-ahˇ mehˬ bahˬ-eu uˬ taꞈ Jaˇliꞈ-ahˇ nui ma maˬ taˬ nya-a lehˇ ehˇ-awˇ miˇ tsaˬ hawˇ-eu tsawˇ haˬ-euˬ mehˬ hu paw gaˇ kawˆ-ahˇ k’awꞈ mehˬ bahˬ-eu meh. Shuiˇ dzaˬ-eu uˆ lahˇ-eu aˇ maꞈ guiˬ deuˆ gaˇ hawˇ-eu yaw haiˬ mˇ gaˇ g’aˬ biꞈ-awˇ iˇ shaˬ zaˬ hawˇ-eu yawˬ ha uˬ k’awˇ maˬ piˇ-eu deuˬ-ahˇ behˬ dzaˬ-eu meh. Aˬ yawꞈ maꞈ laꞈ nmꞈ pyuˆ-ahˇ ha geuꞈ-eu miˇ neh smˇ muiˬ muiˬ laˇ-awˇ baoˬ yaw shehꞈ myaˬ laˇ-eu meh. Nui k’ahˇ huiˬ-eu baw leˬ deuˬ bawˇ tsahˬ sahˬ lahˬ-ahˇ laˆ cawˆ-awˇ tsawˇ haˬ-ahˇ neh jiˇ jeuˬ poˆ-eu miˇ neh iˇ shaˬ zaˬ deuˬ myaˬ-eu meh. Teu miˇ neh nymˇ iˬ nah-euˬ shaˬ zahˬ pyeuꞈ-eu heu aˬ yawꞈ maꞈ-ahˇ doˇ-eu meh.
8. Tsawˇ haˬ mehˬ shi ziꞈ dah g’eh-eu aˇ maꞈ-ahˇ aˬ jeˬ keuˆ le-eu nga?
8 Gaˇ kawˆ heu-ahˇ Yeˬhawˇbaˬ aˬ jeˬ jahˇ-eu nga? Miˇ k’ahˬ-euˬ guiˇ maꞈ zahˇ k’awꞈ deuˬ-ahˇ laˆ cawˆ ngeh huiˬ dui dui-eu shaˬ zahˬ dahˬ beh-eu jeˬ pyeuꞈ meh. (Pah mehˬ-eu 17:1, 2, 16; 18:1-4) Zahˇ paw-euˬ aˇ maꞈ deuˬ dawˬ tawˆ luꞈ bi laˆ cawˆ jiˇ ngeh myawꞈ dzaˬ shuiˇ dzaˬ-eu aˇ maꞈ nui deuˬ-ahˇ aˬ jeˬ keuˆ le-eu nga? Aˬ yawꞈ maꞈ-ahˇ haw ngeh g’aˬ k’aˆ-awˇ ziꞈ dah ni g’eh gaˇ duˇ-eu miˇ neh Jaˇliꞈ aˬ yawꞈ maꞈ-ahˇ gawˬ jawˬ hawˇ-eu iˇ jaw lahˇ nehˬ-ehˇ sheu tsehˆ taˬ-euˬ meh. (Pah mehˬ-eu 6:14-ahˇ gui.) Ehˇ k’awꞈ Miˬyehˇ Miˇk’ahˬ-ahˇ g’aˬ maˬ biꞈ-eu uˆ lahˇ-eu aˇ maꞈ hawˇ-eu aˇ maꞈ nui deuˬ bi laˆ cawˆ jiˇ-eu meh. Teu ngeh huiˬ dui dui-eu shaˬ zahˬ aˇ saˬ saˬ-eu poˆ pyeuꞈ meh. (Yeˬlaˬmiˇ 25:31-33) Teu gaˇ neh naˇ myawꞈ dzaˬ shuiˇ dzaˬ-eu aˇ maꞈ maˬ paˇ jawˇ meh.
9. Miˇ shuiꞈ-ahˇ aˬ yawꞈ jeˬ aˬ yawꞈ-ehˇ baw meh lehˇ aˬ dui aˬ jeˬ miˇ neh ehˇ nya-eu nga?
9 Myawꞈ dzaˬ shuiˇ dzaˬ-eu aˇ maꞈ-euˬ dah zaˇ aˬ jeˬ jaˆ le-eu nga? Aˬmaˬgeˬdoˬ jiˇ naˇ tiˬ jeˬ-iˬ aˇ maꞈ maˬ paˇ jaˆ nga laˬ? Jaˇliꞈ-ahˇ “aˬ dui-aˬ Miˬyehˇ neh saˇ jaˇ dzaˬ taˬ-euˬ jeˬ-ahˇ dawˬ luꞈ-eu ma. Iˇ kahˇ laꞈ k’oeˇ yaw tsaˬ yaw dawˇ jeˬ jaˆ-eu mˬ yaw shuiꞈ miˇ yaw shuiꞈ-ahˇ dawˬ luꞈ-eu ma” lehˇ ehˇ taˬ-euˬ meh. (2 Beˬtuˆluˆ 3:13) Mˬ oeˇ miˇ oeˇ heu naˇ myawꞈ dzaˬ shuiˇ dzaˬ-eu uˆ lahˇ-eu aˇ maꞈ hawˇ-eu aˬ yawꞈ maꞈ laꞈ k’oeˇ jawˇ-eu tsawˇ haˬ deuˬ-ahˇ ehˇ-eu meh. Heu deuˬ byoˆ jiˇ naˇ heu-euˬ dah zaˇ aˬ jeˬ jaˆ le-eu nga? “Mˬ yaw shuiꞈ miˇ yaw shuiꞈ” meh. Mˬ yaw shuiꞈ heu naˇ Yeˬsuˇ hawˇ-eu 144000 uˆ lahˇ-eu Miˇk’ahˬ-ahˇ ehˇ-eu meh. Miˇ yaw shuiꞈ heu naˇ Miˬyehˇ-euˬ Miˇk’ahˬ uˬ moˆ jawˇ-eu deuˬ-ahˇ ehˇ-eu meh. Yeˬsuˇ hawˇ-eu aˬ yawꞈ-euˬ uˆ lahˇ-eu aˇ maꞈ aˬ yawꞈ jeˬ aˬ yawꞈ-ehˇ baw-eu Yeˬhawˇbaˬ Miˬyehˇ-ahˇ tiˬ byah dzaw geuꞈ-eu meh. (1 Gawˇliˬtu 14:33) Teu miˇ neh “miˇ yaw shuiꞈ”-ahˇ aˬ yawꞈ jeˬ aˬ yawꞈ-ehˇ baw-eu meh. Yawˬ jeˬ na-ahˇ muiˬ-eu deuˬ haw piˇ-eu meh. (Ja ceuˬ 45:15, 16) Muiˬ-eu tsawˇ haˬ heu deuˬ Yeˬsuˇ hawˇ-eu 144000 g’aˬ neh bi sheuˬ g’eh-eu meh. Myawˬ dzaˬ shuiˇ dzaˬ-eu aˇ maꞈ deuˬ bi laˆ cawˆ jiˇ-awˇ tiˬ jawˇ-iˬ maˬ myawꞈ dzaˬ-eu aˇ maꞈ tiˬ maꞈ tehꞈ-ehˇ jaˆ-eu aˇ yamˬ-ahˇ shaˇ noeˬ haw sheˇ.
Mˇ bahˬ shaˇ muˆ-eu jeˬ
10. Nawˇ jawˇ gaˇ tiˬ jeˬ maˬ ngeuˇ-eu loꞈ-ehˇ mˇ bahˬ-eu aˬ jeˬ jeˇ jaˆ-eu nga heu nawˬ-euˬ nymˇ jiˇ-ahˇ aˬ joˆ-ehˇ coeˬ nga?
10 Mˇ bahˬ shaˇ muˆ-eu jeˬ aˬ dui-ahˇ aˬ joˆ-ehˇ coeˬ-eu nga? Aˬ dui tiˬ jeˬ maˬ ngeuˇ-eu loꞈ-ehˇ dehꞈ bahˬ dehꞈ muˆ-eu myawꞈ dzaˬ shuiˇ dzaˬ-eu haiˬ-eu muiˇ-eu jeˬ tehꞈ-ehˇ jaˆ-eu miˇ tsaˬ-ahˇ jawˇ luꞈ-eu meh. Miˇ tsaˬ byawˬ g’aˬ mo g’aˬ-eu jeˬ heu naˇ nui ma ahˇ laˇ paˬ-ehˇ g’eh-awˇ Yeˬhawˇbaˬ neh mehˬ-euˬ tsaˬ-eu dawˇ-eu jeˬ-ahˇ uiˇ yoeˇ laˇ paˬ-ehˇ g’eh-eu jeˬ bi pyeuꞈ-eu meh. (Iˇsaˬyaˇ 5:20) Aˬ da aˬ ma deuˬ zaˬ-ahˇ maˬ muiˬ-eu nui noeˬ heu maˬ bi nyawˬ laˇ ni ya leh jeh-eu meh. Maˇ diˇ naˇ Ka li zaˬ maˇ diˇ deuˬ Miˬyehˇ-euˬ zahˇ dawˬ-ahˇ yaw zeu maˬ baw-eu miˇ tsaˬ heu laꞈ k’oeˇ yawˬ ha Yeˬhawˇbaˬ nehˬ-ehˇ cawˬ cawˬ-eu jeˬ-ahˇ ya bo saˆ-eu meh.
11. Yeˬhawˇbaˬ neh Sawˇdoˬ meuˬ hawˇ-eu Gawˇmawˇlaˆ meuˬ-ahˇ yaˇ k’aˬ daˇ-euˬ gaˇ neh aˬ dui aˬ jeˬ dzaw geuꞈ nya-eu nga?
11 Yeˬhawˇbaˬ mˇ bahˬ shaˇ muˆ-eu jeˬ-ahˇ aˬ jeˬ jahˇ-eu lehˇ g’eh nga? Sawˇdoˬ meuˬ hawˇ-eu Gawˇmawˇlaˆ meuˬ yaw haiˬ jeˬ mˇ gaˇ Yeˬhawˇbaˬ neh mˇ nehˬ-euˬ jeˬ-ahˇ shaˇ noeˬ haw. (2 Beˬtuˆluˆ 2:6-8-ahˇ gui.) Lawˇtaˬ muiˬ-eu tiˬ g’aˬ pyeuꞈ k’awꞈ aˬ yawꞈ tiˬ jawˬ maˬ muiˬ-eu jeˬ tehꞈ-ehˇ mˇ-eu miˇ neh aˬ yawꞈ pehˬ shaˬ zahˬ mˇ dui dui-eu meh. Yeˬhawˇbaˬ teu gaˇ jaˆ-eu yaw haiˬ jeˬ dawˬ tawˆ luꞈ-ahˇ laˆ cawˆ jiˇ-euˬ meh. Heu naˇ nymˇ iˬ nah haiˬ-eu deuˬ bi “dzaw geuꞈ-eu” g’aˇ duˬ pyeuꞈ meh. Yeˬhawˇbaˬ yaw beh mˇ bahˬ shaˇ muˆ-eu jeˬ-ahˇ laˆ byoˆ-euˬ loꞈ-ehˇ haiˬ-eu miˇ tsaˬ-ahˇ laˆ cawˆ le ngeh nymˇ jaˆ luꞈ-eu mˇ bahˬ shaˇ muˆ-eu jeˬ-ahˇ k’awꞈ laˆ cawˆ jiˇ meh.
12. Haiˬ-eu miˇ tsaˬ heu dzeuˇ iˇ ngeh nawˇ aˬ jeˬ mˇ jeˬ shaˇ kawˆ-ahˇ loꞈ luꞈ le?
12 Mˇ bahˬ shaˇ muˆ-eu jeˬ dahˬ zaˇ aˬ jeˬ jaˆ le-eu nga? Miˇ shuiꞈ laꞈ k’oeˇ aˬ dui byawˬ-eu cehˇ-eu mˇ jeˬ shaˇ kawˆ-ahˇ kaꞈ g’a-eu meh. Yaw jeˬ ma jeˬ aˬ dui miˇ tsaˬ heu siˬ baˬlaˬdiˇsuˆ pyeuꞈ laˇ ni mˇ-awˇ aˬ dui hawˇ-eu aˬ dui gaˬ-eu deuˬ-euˬ g’aˇ duˬ iˇ kahˇ tsoˆ-eu meh. K’oeˇ naˇ aˬ dui g’oꞈ dehꞈ laˇ-eu g’awˬ mya lam g’aˬ-ahˇ ha geuꞈ-awˇ Yeˬhawˇbaˬ-euˬ gaˇ kawˆ hawˇ-eu aˬ yawꞈ neh tsawˇ haˬ zaˬ-euˬ g’aˇ duˬ mˇ nehˬ-euˬ jeˬ-ahˇ ya mehˬ nehˬ-eu meh. (Iˇsaˬyaˇ 65:21, 22; G’aˬk’ehˇ 24:15) Teu ngeh yamˬ-ahˇ aˬ dui-ahˇ laꞈ k’aˬ cehˇ-eu jeˬ hawˇ-eu Yeˬhawˇbaˬ-ahˇ ja ceuˬ-eu jeˬ mˇ gaˇ kaꞈ g’a-eu meh.
Gaˇ dahˬ gaˇ dzeˇ yaw jawꞈ
13. Eˬdeˬ yaˇ kmˇ-ahˇ saˇ jaˇ peuˬ gaˇ neh naˇ aˬ jeˬ pyeuꞈ laˇ-euˬ nga?
13 Gaˇ dahˬ gaˇ dzeˇ yaw jawꞈ heu nymˇ aˬ dui-ahˇ aˬ joˆ-ehˇ coeˬ nga? Miˇ tsaˬ-ahˇ haiˬ-eu deuˬ shuiˇ dzaˬ-eu aˇ maꞈ deuˬ mˇ bahˬ shaˇ muˆ-eu deuˬ tehꞈ-ehˇ byah jiˇ taˬ-euˬ miˇ neh gaˇ dahˬ gaˇ dzeˇ yaw jawꞈ jeˬ tehꞈ-ehˇ jaˆ-eu meh. Aˬ dui yawˬ g’aˬ na luꞈ guiˇ deuˆ-eu shaˬ-eu tsawˇ jeuˬ biˇ paˆ-eu naˇ-eu shiˇ-eu heu deuˬ baˬ da neh ya shaˬ-eu meh. Heu naˇ Saˬdaˬ hawˇ-eu Aˬdaˬ Eˇbaˆ Yeˬhawˇbaˬ-ahˇ saˇ jaˇ peuˬ gaˇ neh naˇ pyeuꞈ laˇ-euˬ meh. Aˬ yawꞈ maꞈ neh mˇ-euˬ teu aˬ dui-ahˇ shaˬ-eu jeˬ keuˆ le-euˬ meh.
14. Gaˇ dahˬ gaˇ dzeˇ yaw jawꞈ jeˬ-ahˇ Yeˬhawˇbaˬ aˬ jeˬ jahˇ-eu nga?
14 Gaˇ dahˬ gaˇ dzeˇ yaw jawꞈ jeˬ-ahˇ Yeˬhawˇbaˬ aˬ jeˬ jahˇ-eu nga? Yaw jeˬ ma jeˬ tiˬ hmˬ na-ahˇ ja sawˇ ma. Yeˬhawˇbaˬ guiˇ deuˆ-eu jeˬ-ahˇ maˬ paˇ bi jaˆ ma lehˇ saˇ jaˇ dzaˬ taˬ-euˬ meh. (Ja ceuˬ 46:8, 9-ahˇ gui.) Aˬ yawꞈ naˇ-eu gawˇ-eu jeˬ-ahˇ laˆ byoˆ-eu meh. (Iˇsaˬyaˇ 33:24) Shiˇ-eu jeˬ-ahˇ k’awꞈ mˬ maˬ maˬ byaˆ zaˇ ziˇ laꞈ cawˆ-eu meh. (Iˇsaˬyaˇ 25:8) K’oeˇ naˇ iˇ shaˬ shaˬ-eu jeˬ maˬ paˇ jaˆ meh. (Ja ceuˬ 72:12-16) Yeˬhawˇbaˬ nymˇ iˬ nah dehꞈ-eu jeˬ-ahˇ laˆ kaꞈ laˆ siˇ laˇ-eu yaw jawꞈ jeˬ-ahˇ laˆ cawˆ-awˇ Saˬdaˬ hawˇ-eu nehꞈ deuˬ-ahˇ neh doˆ laˇ-euˬ jeˬ dawˬ tawˆ luꞈ-ahˇ jiˇ ni laˆ byoˆ jiˇ-eu meh.—Eˇpeˇsuˆ 2:2.
Guiˇ deuˆ-eu jeˬ naˇ-eu gawˇ-eu jeˬ hawˇ-eu shiˇ-eu jeˬ maˬ jaˆ-eu miˇ tsaˬ-ahˇ shaˇ noeˬ haw sheˇ (Aˇ deuˆ 15-ahˇ haw)
15. Aˬmaˬgeˬdoˬ guiˇ jiˇ ngeh aˬ jeˬ jeˇ byoˆ iˇ jiˇ-eu nga?
15 Guiˇ deuˆ-eu hawˇ-eu naˇ-eu gawˇ-eu jeˬ shiˇ-eu jeˬ maˬ jaˆ-eu miˇ tsaˬ-ahˇ ya dehꞈ naˇ aˬ joˆ-ehˇ g’eh-eu nga lehˇ shaˇ noeˬ haw sheˇ. Teu gaˇ guiˇ maꞈ miˬ beuˆ mi cehˇ hawˇ-eu guiˇ deuˆ gaˇ g’aˬ biꞈ-eu mawˇ kawˇ jiˇ maˬ paˇ jaˆ meh. Aˬ dui naˇ gawˇ laˆ saˆ duˬ saˬ laˬ g’oˬ tsawˇ shiˇ baꞈ taˬ duˬ maˬ ngeuˇ naˇ lmˬ bymˇ jiˇ maˬ paˇ loˬ meh. K’oeˇ naˇ yaw haiˬ jeˬ maˬ paˇ jaˆ-euˬ miˇ neh yehˇ hawˇ-eu tahˇ joe laˇ gaˇ guˇ gaˬ-eu keu ka k’oeˇ naˇ sawˇ jiˇ maˬ paˇ zmˬ meh. Aˬ dui-ahˇ shaˬ zahˬ bi naꞈ-eu yaw jawꞈ jeˬ dawˬ tawˆ luꞈ mˬ maˬ maˬ byaˆ zaˇ ziˇ byoˆ iˇ jiˇ meh.
16, 17. (a) Aˬmaˬgeˬdoˬ guiˇ-ahˇ neh bu iˇ-euˬ deuˬ aˬ joˆ-ehˇ g’eh-eu nga? Yaw jeˬ maˬ jeˬ ehˇ haw sheˇ. (b) Miˇ yaw oeˇ heu byoˆ iˇ k’awꞈ aˬ dui jawˇ luꞈ-a siˬ lehˇ aˬ jeˬ miˇ neh ehˇ nya-eu nga?
16 Gaˇ dahˬ gaˇ dzeˇ yaw jawꞈ jeˬ byoˆ iˇ naˇ aˬ joˆ-ehˇ g’eh-eu nga? Aˇ baˇ heu-ahˇ shaˇ noeˬ-eu yaw awˬ maˬ ngeuˇ-a. Aˬ dui gaˇ dahˬ gaˇ dzeˇ yaw jawꞈ jeˬ tehꞈ-ehˇ jaˆ gaˇ jawˇ dzaw taˬ-euˬ miˇ neh heu deuˬ aˬ dui-ahˇ aˬ joˆ-ehˇ coeˬ-eu lehˇ maˬ siˬ laˇ ni pyeuꞈ iˇ nya-eu meh. Yaw jeˬ ma jeˬ teˇ saˇ k’aˆ-eu miˬ dzaˬ laˆ lawˬ dawˬ peh jawˇ-eu deuˬ myahˇ laˇ naˇ teˇ saˇ k’aˆ-eu lehˇ maˬ siˬ laˇ ni pyeuꞈ iˇ nya-eu meh. K’oeˇ naˇ jaˆ guˆ jaˆ meuˬ dawˬ peh jawˇ-eu deuˬ k’awꞈ myahˇ laˇ ngeh maˬ paˇ behꞈ laꞈ ni pyeuꞈ iˇ nya meh. Yeˬhawˇbaˬ gaˇ dahˬ gaˇ dzeˇ jaˆ-eu yaw jawꞈ jeˬ-ahˇ laˆ cawˆ jiˇ ngeh huiˬ dui dui-eu caw ba-eu poˆ pyeuꞈ meh.
17 Nymˇ aˬ dui-ahˇ shaˬ zahˬ laˆ naꞈ-eu jeˬ-euˬ dah zaˇ aˬ jeˬ jaˆ laˇ-eu nga? “Nui nahˬ nui yu ahˇ-eu deuˬ-aˬ miˇ k’ahˬ jeˬ biˇ oꞈ-eu laꞈ k’oeˇ shiˬ keuˇ ni laꞈ k’aˬ cehˇ nui saˇ ya oꞈ” meh lehˇ ehˇ taˬ-euˬ meh. (Ja ceuˬ 37:11 MS) Yeˬhawˇbaˬ aˬ dui-ahˇ teu loꞈ-ehˇ bi dehꞈ mawꞈ-eu lehˇ ya siˬ-euˬ heu aˇ naˆ ni g’aˬ za laˇ paˬ-ehˇ g’eh-eu nga. Shaˬ zahˬ aˇ yamˬ heu laꞈ k’oeˇ Yeˬhawˇbaˬ hawˇ-eu aˬ yawꞈ-euˬ aˇ maꞈ aˇ muˇ dawˬ peh jawˇ nya ni k’aˇ g’eh nya gaˇ neh leh jeh-awˬ. Nawˬ-euˬ mehˬ hu paw noeˬ tmˬ-euˬ jeˬ gaˇ kawˆ heu aˇ poeˬ baw dui dui-eu miˇ neh gaˇ kawˆ heu-ahˇ yaw muiˬ-ehˇ shaˇ noeˬ-awˇ aˬ cawˬ-ahˇ jiˇ ni ehˇ nehˬ-awˬ. (1 Tiˆmoˇseˬ 4:15, 16; 1 Beˬtuˆluˆ 3:15) Aˬ dui teu loꞈ-ehˇ jahˇ naˇ haiˬ-eu miˇ tsaˬ heu aˇ saˬ saˬ k’awꞈ aˬ dui laꞈ k’aˬ tiˬ cehˇ mˬ maˬ maˬ byaˆ zaˇ ziˇ ya dehꞈ meh.
^ Aˇ baˇ heu hmˬ naˇ dzeuˇ laꞈ ngehˬ Aˬmeˬliˇkaˬ miˇ k’ahˬ-euˬ tawˬ tiˬ gaˇ na-ahˇ aˬ myah myah luꞈ jahˇ-eu tiˬ jeˬ pyeuꞈ meh.