Maꞈtehˬ hawˇ-eu Luˇkaꞈ Yeˬsuˇ dehꞈ le ngeh hawˇ-eu Yeˬsuˇ yaw zaˬ ngeh-euˬ gaˇ kawˆ-ahˇ boꞈ-euˬ maˬ duˇ leˇ-eu heu naˇ aˬ yawꞈ nyaꞈ tiˬ g’aˬ tiˬ pyawˬ-ahˇ haw-awˇ tsawˇ haˬ aˬ yawꞈ tiˬ g’aˬ-euˬ gaˇ kawˆ-ahˇ tehꞈ-ehˇ boꞈ-euˬ maˬ ngeuˇ-eu miˇ neh meh.

Maꞈtehˬ naˇ myaˬ myaˬ ni Yoˇsehˆ-euˬ gaˇ kawˆ-ahˇ boꞈ-euˬ meh. Yoˇsehˆ Maˬliˇ zaˬ tsehˆ leˇ-euˬ lehˇ ya siˬ ngeh aˬ joˆ-ehˇ noeˬ-awˇ aˬ yawꞈ yuꞈ maˆ maˆ ngeh mˬ taˆ g’aˬ k’ehˇ aˬ jeˬ ehˇ nehˬ le-euˬ aˬ yawꞈ aˬ joˆ-ehˇ mˇ caw-eu gaˇ kawˆ boꞈ taˬ-euˬ meh. (Maꞈtehˬ 1:19-25) K’oeˇ naˇ Iˇjiˇtuˆ miˇ k’ahˬ-ahˇ cehˆ iˇ-eu g’aˇ duˬ mˬ taˆ g’aˬ k’ehˇ Yoˇsehˇ-ahˇ aˬ joˆ-ehˇ ehˇ nehˬ le-awˇ Yoˇsehˆ aˬ joˆ-ehˇ mˇ caw-euˬ gaˇ kawˆ jiˇ boꞈ taˬ-euˬ meh. K’oeˇ tehꞈ-ehˇ maˬ g’aˬ ni yuꞈ maˆ maˆ-eu laꞈ k’oeˇ mˬ taˆ g’aˬ k’ehˇ Yoˇsehˆ-ahˇ Iˇsaˬleˬlaˆ miˇ k’ahˬ-ahˇ g’oꞈ leˇ lehˇ ehˇ nehˬ-awˇ Yoˇsehˆ g’oꞈ keuˆ leˇ g’aˬ naˇ Naˬzaˬlehˇ meuˬ-ahˇ jawˇ-euˬ meh lehˇ paˇ boꞈ taˬ-euˬ meh. (Maꞈtehˬ 2:13, 14, 19-23) Maꞈtehˬ neh boꞈ-euˬ sahˬ boꞈ gaˬ naˇ yaw huiˬ 1-2-ahˇ Yoˇsehˆ-ahˇ 8 poˆ ngehˬ keuˆ taˬ-euˬ k’awꞈ Maˬliˇ-ahˇ naˇ 4 poˆ ngehˬ keuˆ taˬ-euˬ tehꞈ meh.

Ehˇ k’awꞈ Luˇkaꞈ naˇ myaˬ myaˬ ni Maˬliˇ-ahˇ ngehˬ keuˆ taˬ-euˬ meh. Luˇkaꞈ mˬ taˆ g’aˬ k’ehˇ Gaˬbeˬlaˇ Maˬliˇ jawˇ gaˇ oe-euˬ gaˇ kawˆ Maˬliˇ Eˇliˇsaˬbehˆ jawˇ gaˇ g’aˬ iˇ-euˬ gaˇ kawˆ hawˇ-eu Maˬliˇ neh Yeˬhawˇbaˬ-ahˇ ja ceuˬ-eu dawˬ boꞈ taˬ-euˬ meh. (Luˇkaꞈ 1:26-56) K’oeˇ naˇ Suˇmoˬ Maˬliˇ-ahˇ Yeˬsuˇ mehˬ hu paw shaˬ-eu zahˬ-eu jeˬ-ahˇ ya tahˬ puˬ meh lehˇ ehˇ nehˬ-eu gaˇ kawˆ jiˇ boꞈ-awˇ Yeˬsuˇ 12 k’oꞈ k’awˆ ngeh aˬ yawꞈ pehˬ uˬ duˬ tahˬ nymˇ-ahˇ iˇ-euˬ gaˇ kawˆ jiˇ boꞈ taˬ-euˬ meh. Luˇkaꞈ gaˇ kawˆ heu boꞈ ngeh jiˇ Yoˇsehꞈ neh ngehˬ dawˬ-eu maˬ ngeuˇ-eu Maˬliˇ neh ngehˬ-euˬ dawˬ-ahˇ boꞈ taˬ-awˇ Maˬliˇ gaˇ kawˆ heu deuˬ-ahˇ ya leˇ dui dui-eu meh lehˇ boꞈ taˬ-euˬ meh. (Luˇkaꞈ 2:19, 34, 35, 48, 51) Luˇkaꞈ neh boꞈ-euˬ gaˬ naˇ yaw huiˬ 1-2-ahˇ Maˬliˇ-euˬ tsawˇ myahˇ 12 poˆ boꞈ taˬ-euˬ k’awꞈ Yoˇsehˆ-euˬ tsawˇ myahˇ 3 poˆ ahˇ tehꞈ meh. Teu miˇ neh Maꞈtehˬ naˇ Yoˇsehˆ neh noeˬ-awˇ mˇ-eu jeˬ boꞈ taˬ-awˇ Luˇkaꞈ naˇ Maˬliˇ neh noeˬ-awˇ ya tahˬ puˬ-euˬ jeˬ-ahˇ boꞈ taˬ-euˬ meh.

Guiˬ lahˬ dawˬ heu nyiˬ dmˬ-ahˇ Yeˬsuˇ pehˬ-euˬ tsuiꞈ boꞈ taˬ-euˬ maˬ duˇ leˇ-a. Maꞈtehˬ Yoˇsehˆ pehˬ-euˬ tsuiꞈ-ahˇ ngehˬ keuˆ-awˇ Yeˬsuˇ Yoˇsehˆ neh cu-eu zaˬ pyeuꞈ-eu miˇ neh zahˇ sahˇ k’oꞈ paw neh ehˇ naˇ sahˬ paˬ Daˬbiˇ-euˬ dzoeˬ dzaˬ nuiˇ mahˬ-ahˇ nuiˇ-eu aˬ kawˬ-aˬ jaˆ ngaˇ lehˇ siˬ laˇ-eu meh. Aˬ jeˬ miˇ neh? Yoˇsehˆ sahˬ paˬ Daˬbiˇ-euˬ aˬ li Sawˇlaˬmoˬ-euˬ oeˬ paˬ oeˬ ma pyeuꞈ-eu miˇ neh meh. (Maꞈtehˬ 1:6, 16) Luˇ kaꞈ naˇ Maˬliˇ pehˬ-euˬ tsuiꞈ-ahˇ ngehˬ keuˆ taˬ-awˇ Yeˬsuˇ aˇ jeuˬ aˇ ca paw neh Daˬbiˇ-euˬ nuiˇ mahˬ-ahˇ nuiˇ leˇ-eu aˬ kawˬ-aˬ jaˆ-eu lehˇ bi siˬ laˇ-eu meh. Aˬ jeˬ miˇ neh? Maˬliˇ Daˬbiˇ-euˬ aˬ li Naˬdaˬ-euˬ oeˬ paˬ oeˬ ma pyeuꞈ-eu miˇ neh meh. (Luˇkaꞈ 3:31) Yeˬsuˇ-aˬ “Daˬbiˇ-euˬ zaˬ deuˬ uˆ deuˬ laꞈ k’oeˇ dehꞈ le-euˬ meh” (Loˇmaˆ 1:3) K’oeˇ naˇ Yoˇsehˆ-aˬ Iˇliˇ-euˬ aˬ li meh lehˇ Luˇkaꞈ paˇ ehˇ-eu meh. Aˬ yawꞈ aˬ jeˬ miˇ neh toˆ-ehˇ ehˇ-eu nga maˇ diˇ naˇ Iˇliˇ Maˬliˇ-euˬ aˬ daˬ pyeuꞈ gaˇ neh? Aˬ jeˬ miˇ neh ehˇ naˇ aˬ myah myah luꞈ naˇ poeˬ piˬ deuˬ-euˬ tsuiꞈ-ahˇ k’aˬ dzeˇ zaˬ deuˬ-euˬ tsawˇ myahˇ tehꞈ-ehˇ ahˇ-eu miˇ neh meh. Teu miˇ neh Yoˇsehˇ Iˇliˇ-euˬ aˬ li-a lehˇ Luˇkaꞈ ehˇ ngeh maˇ diˇ naˇ Yoˇsheˆ-aˬ Iˇliˇ-euˬ aˬ zaˬ pyeuꞈ-eu lehˇ ehˇ mawꞈ-eu lehˇ yawˬ g’aˬ na luꞈ siˬ nya-eu meh.—Luˇkaꞈ 3:23.

Maꞈtehˬ hawˇ-eu Luˇkaꞈ-euˬ sahˬ boꞈ laꞈ k’oeˇ ahˇ-eu Yeˬsuˇ-euˬ poeˬ piˬ deuˬ-euˬ tsuiꞈ heu naˇ Yeˬsuˇ-aˬ Miˬyehˇ neh saˇ jaˇ dzaˬ taˬ-euˬ Meˬsiˇya ngaˇ lehˇ maˇ jawˆ ni siˬ laˇ-eu meh. Maˇ maˇ ni k’awꞈ Yeˬsuˇ-aˬ tsawˇ haˬ zaˬ deuˬ siˬ nya-eu loꞈ-ehˇ Daˬbiˇ-euˬ oeˬ paˬ oeˬ ma pyeuꞈ meh. Paˬliˬsehˇ hawˇ-eu Saˬduˬgehˇ deuˬ k’awꞈ gaˇ kawˆ heu ahˇ laꞈ daˬ-eu meh. Maꞈtehˬ hawˇ-eu Luˇkaꞈ-euˬ sahˬ boꞈ laꞈ k’oeˇ ahˇ-eu Yeˬsuˇ-euˬ poeˬ piˬ deuˬ-euˬ tsuiꞈ-ahˇ gui-eu heu naˇ aˬ dui-ahˇ jah-eu jeˬ ziꞈ laˇ ni caw ba nehˬ laꞈ-awˇ Miˬyehˇ-euˬ dawˬ maˬ saˇ jaˇ maˇ diˇ pyeuꞈ laˇ meh lehˇ jah coeˇ ni jiˇ caw ba nehˬ-eu meh.