Yeˬhawˇbaˬ Pawˇluˆ-ahˇ bi noeˬ doˆ leˇ-awˇ yaw sahˇ neh bi pyeuꞈ laˇ-eu seu dzeuꞈ aˇ g’eh g’oeˬ jeˬ bi boꞈ taˬ-euˬ meh. (Gaˬlaˬtiˆ 5:22, 23) Muiˬ-eu aˇ g’ehˇ heu dawˬ tawˆ luꞈ-ahˇ “yaw sahˇ . . . laꞈ k’oeˇ siˬ le-eu aˇ siˬ” lehˇ kuˇ-eu meh. * (Ehˇ lahˬ-ahˇ haw.) Heu naˇ Ka li zaˬ deuˬ ya dm-eu “nui ma yaw shuiꞈ” pyeuꞈ meh. (Gawˇlawˇsehˇ 3:10) Iˇ cuꞈ tsaˬ tsaˬ ni za-eu aˇ bawˇ-ahˇ aˇ siˬ siˬ le-eu loꞈ-ehˇ tsawˇ haˬ tiˬ g’aˬ-euˬ dehꞈ ziˇ-ahˇ muiˬ-eu shawˇ-eu yaw sahˇ ahˇ naˇ muiˬ-eu seu dzeuꞈ deuˬ ahˇ-eu meh.—Ja ceuˬ 1:1-3.

Pawˇluˆ neh ngehˬ keuˆ dahˬ beh-eu aˇ g’ehˇ naˇ nui gaˬ pyeuꞈ meh. Nui gaˬ aˇ poeˬ aˇ naˆ ni baw-eu nga? Nui gaˬ maˬ ahˇ naˇ “tiˬ jeˬ-iˬ gaˇ dahˇ maˬ tsoeˬ-a” lehˇ Pawˇluˆ ehˇ-eu meh. (1 Gawˇliˬtu 13:2) Toˆ-ehˇ naˇ nui gaˬ heu aˬ jeˬ nga? Yawˬ nah na luꞈ nui gaˬ aˬ joˆ-ehˇ bi myaˬ laˇ nya-awˇ aˬ joˆ-ehˇ mˇ mawˇ nya-eu nga?

Nui gaˬ heu dawˬ-euˬ dawˬ tsuiꞈ puiˇ k’awˬ-eu shaˬ dui dui k’awꞈ Jaˇliꞈ laꞈ k’oeˇ nui gaˬ ahˇ-eu tsawˇ haˬ aˬ joˆ-ehˇ noeˬ-awˇ aˬ joˆ-ehˇ mˇ-eu lehˇ ehˇ taˬ-euˬ meh. Yaw jeˬ ma jeˬ nui gaˬ ahˇ-eu tsawˇ haˬ “nui ma g’awˬ mahˇ ni taˬ-awˇ aˬ cawˬ-ahˇ g’awˬ shaˬ gaˬ nya-eu” uˬ taꞈ “yaw tsaˬ yaw dawˇ jeˬ-ahˇ laˬ k’aˬ cehˇ-eu” meh. Tsawˇ haˬ tiˬ g’aˬ nui gaˬ ahˇ naˇ “dawˬ tawˆ luꞈ-ahˇ daˬ coeˇ-eu meh. Dawˬ tawˆ luꞈ-ahˇ jah coeˇ-eu meh. Dawˬ tawˆ luꞈ-ahˇ noeˬ tmˬ coeˇ-eu meh. Dawˬ tawˆ luꞈ-ahˇ oˇ coeˇ-eu meh.” Aˬ cawˬ-ahˇ maˇ diˇ gaˬ-awˇ ngehˬ g’eh-eu uˬ taꞈ saˇ jaˇ ziꞈ-eu cawˬ jiˇ pyeuꞈ meh. Ehˇ k’awꞈ nui gaˬ maˬ ahˇ naˇ myaˆ naˆ-eu jahˇ g’eh-eu yaw doeˇ ngehˬ-eu mˇ-eu yawˬ ha g’aˇ duˬ tehꞈ-ehˇ shaˇ noeˬ-eu aˬ cawˬ-ahˇ iˬ baˇ maˬ pyehˬ nehˬ-eu heu deuˬ mˇ-eu meh. Aˬ dui heu loꞈ-ehˇ g’eh ngeh to-aˬ “yawˬ ha-euˬ nui k’ahˇ maˬ poˆ”-eu nui gaˬ mˇ mawˇ kaˇ-euˇ.—1 Gawˇliˬtu 13:4-8.

“Miˬyehˇ-aˬ g’oeˇ-eu gaˬ-eu jeˬ pyeuꞈ-eu meh.” (1 Yoˇhaˬ 4:8) Gaˇ kawˆ heu aˬ yawꞈ neh k’aˇ beh k’aˇ mˇ taˬ-euˬ jeˬ-ahˇ haw ngeh siˬ laˇ-eu meh. Aˬ yawꞈ-euˬ huiˬ dzehˬ-eu nui gaˬ naˇ Yeˬsuˇ miˇ tsaˬ-ahˇ bi oe-awˇ naˇ dui dui-eu laꞈ k’oeˇ aˬ dui g’aˇ duˬ bi shiˇ dah le-euˬ heu meh. “Miˬyehˇ-aˬ aˬ yawꞈ-euˬ Zaˬmaˇ tiˬ g’aˬ tehꞈ-ehˇ jawˇ-eu k’awꞈ Zaˬmaˇ baˬ da neh aˬ dui dehꞈ-eu jeˬ za nya ni miˇ tsaˬ k’oeˇ taˆ k’ehˇ g’eh le-awˇ aˬ yawꞈ-euˬ g’oeˇ-eu gaˬ-eu jeˬ aˬ dui-ahˇ bi mawˇ laꞈ-euˬ meh. G’oeˇ-eu gaˬ-eu jeˬ-aˬ heu loꞈ-ehˇ meh. Aˬ dui Miˬyehˇ-ahˇ gaˬ-euˬ maˬ ngeuˇ. Aˬ yawꞈ aˬ dui-ahˇ gaˬ-awˇ aˬ dui-euˬ iˬ baˇ bi pi dzeh le-eu g’aˇ duˬ aˬ yawꞈ-euˬ Zaˬmaˇ-ahˇ k’ehˇ g’eh leꞈ-euˬ meh” lehˇ Yoˇhaˬ ehˇ-eu meh. (1 Yoˇhaˬ 4:9, 10) Miˬyehˇ-euˬ gaˬ-eu jeˬ baˬ da neh aˬ dui-euˬ iˬ baˇ-ahˇ pyehˬ nehˬ-awˇ noeˬ tmˬ-eu jeˬ jaˆ laˇ-euˬ uˬ taꞈ dehꞈ-eu jeˬ jiˇ za-euˬ meh.

Miˬyehˇ neh noeˬ taˬ-euˬ jeˬ mˇ byah-eu g’aˇ duˬ Yeˬsuˇ aˬ yawꞈ-euˬ dehꞈ ziˇ lawˇ nehˬ-euˬ heu naˇ tsawˇ haˬ zaˬ-ahˇ nui gaˬ mˇ mawˇ-eu jeˬ pyeuꞈ meh. “Yeˬsuˇ Ka li-aˬ Miˬyehˇ bi mˇ mawꞈ-eu jeˬ-ahˇ mˇ byah-euˬ miˇ neh aˬ dui iˬ baˇ-ahˇ law-iˇ-euˬ ma. . . . aˬ yawꞈ-euˬ g’awˇ mawˇ lawˇ dah-euˬ miˇ neh aˬ dui-euˬ iˬ baˇ shawˇ laˇ g’aˬ-euˬ meh” lehˇ Pawˇluˆ ehˇ-eu meh. (Heˬbyehˇ 10:9, 10) Tsawˇ haˬ tiˬ g’aˬ-iˬ heu naˆ ni huiˬ-eu nui gaˬ maˬ mˇ nya-a. “Yawˬ ha-euˬ cawˬ g’aˇ duˬ shiˇ dah nehˬ-eu naˆ maˬ tseˇ huiˬ dzehˬ-eu g’oeˇ-eu gaˬ-eu jeˬ maˬ paˇ jaˆ meh” lehˇ Yeˬsuˇ ehˇ-eu meh. (Yoˇhaˬ 15:13) Aˬ dui maˬ byah kuꞈ-eu tsawˇ haˬ Yeˬhawˇbaˬ hawˇ-eu Yeˬsuˇ-euˬ nui gaˬ-ahˇ aˬ joˆ-ehˇ  mˇ caw nya-eu nga? Aˬ joˆ-ehˇ mˇ caw nya nga lehˇ ja sawˇ kaˇ-euˇ.

Pawˇluˆ “Miˬyehˇ gaˬ dui dui-eu zaˬ deuˬ pyeuꞈ-eu loꞈ-ehˇ aˬ yawꞈ-ahˇ duˇ laˇ ni leh jeh-awˬ. Ka li . . . aˬ yawꞈ-euˬ g’awˇ mawˇ aˬ dui g’aˇ duˬ lawˇ nehˬ-euˬ gaˇ duˇ ni g’oeˇ-eu gaˬ-eu jeˬ laꞈ k’oeˇ dehꞈ g’eh-awˬ” lehˇ g’aˬ biꞈ-eu meh. (Eˇpeˇsu 5:1, 2) “G’oeˇ-eu gaˬ-eu jeˬ laꞈ k’oeˇ dehꞈ g’eh” lehˇ ehˇ-eu heu aˬ jeˬ nga? Aˬ myah luꞈ nui gaˬ mˇ mawˇ gaˇ ehˇ-eu meh. Aˬ cawˬ-ahˇ gaˬ ma lehˇ tehꞈ-ehˇ maˬ ehˇ ni ya mˇ doˆ laꞈ-eu meh. Yoˇhaˬ “Ngaˇ gaˬ dui dui-eu zaˬ deuˬ-oˇ aˬ dui-euˬ g’oeˇ-eu gaˬ-eu heu-aˬ mehˬ boeˬ neh tehꞈ-ehˇ gaˬ-eu jeˬ taˬ bi pyeuꞈ. Maˇ jawˆ ni g’eh-eu g’oeˇ-eu gaˬ-eu jeˬ bi pyeuꞈ-awˇ mˇ-eu shaˇ-eu laꞈ k’oeˇ bi doˆ laˇ-awˬ” lehˇ ehˇ-eu meh. (1 Yoˇhaˬ 3:18) Aˬ dui Yeˬhawˇbaˬ hawˇ-eu tsawˇ haˬ-ahˇ gaˬ-eu miˇ neh “Miˬyehˇ Miˇk’ahˬ gaˇ kawˆ laꞈ k’aˬ cehˇ-eu guiˬ lahˬ dawˬ” tsaꞈ gaˬ iˇ-eu ma. (Maꞈtehˬ 24:14; Luˇkaꞈ 10:27) K’oeˇ naˇ oˇ-awˇ g’awˬ shaˬ gaˬ-eu laꞈ k’oeˇ iˬ baˇ pyehˬ nehˬ naˇ jiˇ “g’oeˇ-eu gaˬ-eu jeˬ laꞈ k’oeˇ dehꞈ g’eh”-eu jeˬ pyeuꞈ meh. Yeˬhawˇbaˬ aˬ dui-ahˇ “iˬ baˇ pyehˬ nehˬ laꞈ-euˬ loꞈ-ehˇ tiˬ g’aˬ tiˇ g’aˬ iˬ baˇ pyehˬ-awˬ” lehˇ ehˇ-eu dawˬ-ahˇ aˬ dui mˇ caw ma.—Gawˇlawˇsehˇ 3:13.

Aˬ dui aˬ cawˬ-ahˇ mehˬ-awˇ yaw lehˬ tiˬ jeˬ na toeˬ ceh nehˬ-eu heu naˇ nui gaˬ maˬ ahˇ-eu miˇ neh maˬ ngeuˇ-a. Yaw jeˬ ma jeˬ zaˬ ngoeˇ gaˇ laˆ naˬ-eu g’aˇ duˬ aˬ da aˬ ma tiˬ deuˬ na zaˬ k’aˇ shaˇ-eu jeˬ biꞈ-eu meh. Ehˇ k’awꞈ nui gaˬ ahˇ-eu aˬ da aˬ ma naˇ zaˬ neh shaˇ-euˬ yaw bahˬ-eu jeˬ-ahˇg’aˬ maˬ biꞈ-a. Teu gaˇ duˇ ni Yeˬhawˇbaˬ nui gaˬ ahˇ-eu k’awꞈ aˬ yawꞈ “gaˬ-eu g’aˬ-ahˇ aˬ yawꞈ mehˬ paˇ tsoˆ paˇ nehˬ”-eu meh. (Heˬbyehˇ 12:6) Teu miˇ neh loˬ ngeh tsaˬ tsaˬ ni ehˇ nehˬ-eu heu naˇ nui gaˬ mˇ mawˇ-eu jeˬ pyeuꞈ meh. (Dawˬdaˬ 3:11, 12) Ehˇ k’awꞈ aˬ dui yawˬ g’aˬ na luꞈ iˇ baˇ zaˬ pyeuꞈ-eu miˇ neh tiˬ k’ehˬ maˬ taˬ nui gaˬ maˬ mˇ mawˇ nehˬ-a lehˇ taˬ ngehˇ. Aˬ dui nui gaˬ mˇ mawˇ-eu paw bi muiˬ daˆ laˇ nya meh. Aˬ joˆ-ehˇ ya jahˇ-eu nga? Mˇ nya-eu smˬ kawˆ-ahˇ ja sawˇ ma.

Tiꞈ nui gaˬ ahˇ-eu g’aˇ duˬ Miˬyehˇ-ahˇ yaw sahˇ ya shaˇ meh. Yeˬhawˇbaˬ “aˬ yawꞈ-ahˇ k’aˇ shaˇ-eu tsawˇ haˬ deuˬ-ahˇ muiˬ-eu shawˇ-eu yaw sahˇ” biꞈ meh lehˇ Yeˬsuˇ ehˇ-eu meh. (Luˇkaꞈ 11:13) Teu miˇ neh aˬ dui muiˬ-eu shawˇ-eu yaw sahˇ shaˇ-awˇ bi caw ba naˇ aˬ dui-euˬ nui gaˬ myaˬ dzehˬ laˇ-eu meh. (Gaˬlaˬtiˆ 5:16) Yaw jeˬ ma jeˬ nawˇ aˇ muˇ-ahˇ sheuˬ g’eh-eu g’aˬ pyeuꞈ naˇ Jaˇliꞈ-ahˇ g’oe-awˇ mehˇ nmˇ deuˬ-ahˇ nui noeˬ nui duˇ biꞈ ngeh nui gaˬ bi ahˇ nehˬ laꞈ lehˇ muiˬ-eu shawˇ-eu yaw sahˇ shaˇ nya meh. K’oeˇ naˇ aˬ da aˬ ma pyeuꞈ naˇ k’awꞈ zaˬ-ahˇ nui pehˇ neh maˬ ngeuˇ-eu nui gaˬ neh bi mehˬ laꞈ lehˇ Miˬyehˇ-euˬ yaw sahˇ shaˇ nya meh.

Nyiꞈ Yeˬsuˇ aˬ cawˬ yehˬ baw sehˇ lu-ehˇ jahˇ laˇ k’awꞈ nui gaˬ aˬ joˆ-ehˇ mˇ mawˇ nga lehˇ shaˇ noeˬ. (1 Beˬtuˆluˆ 2:21, 23) Tiˬ g’aˬ na nawˬ-ahˇ nui ma laˆ pehˇ laˇ-eu maˬ ngeuˇ naˇ maˬ tsaˬ maˬ dawˇ-eu jeˬ jahˇ laˇ ngeh ‘Yeˬsuˇ law nmˇ-aˬ aˬ joˆ-ehˇ jahˇ nga?’ lehˇ yawˬ haˇ yawˬ ha naˇ haˬ. Heu loꞈ-ehˇ jeˬ hu naˇ haˬ naˇ maˬ mˇ doˆ mi na-ehˇ jeˬ hu shaˇ noeˬ ni caw ba nehˬ miˇ-a lehˇ mehˇ nmˇ Li ehˇ-eu meh. “Tiˬ poˆ ngaˬ-euˬ gaˇ mˇ cawˬ tiˬ g’aˬ ngaˬ-euˬ gaˇ kawˆ hawˇ-eu ngaˬ neh mˇ-euˬ gaˇ-ahˇ maˬ muiˬ jeˬ-ehˇ boꞈ-awˇ aˬ cawˬ-ahˇ sha nehˬ-euˬ meh. Ngaˇ-ahˇ nui ma naˇ-eu lehˇ miˇ-a. Ehˇ k’awꞈ ‘Cawˬ teu g’aˬ-ahˇ Yeˬsuˇ mˇ k’oꞈ nehˬ-eu jeˬ-ahˇ ngaˇ aˬ joˆ-ehˇ dzaw geuꞈ paˬ nga?’ lehˇ ngaˇ yawˬ haˬ-ahˇ naˇ haˬ-awˇ Yeˬsuˇ mˇ paˬ-ehˇ g’eh-eu jeˬ-ahˇ shaˇ noeˬ g’aˬ naˇ tiˬ jeˬ maˬ ngeuˇ-a lehˇ bi dzeuˇ iˇ-euˬ ma. Myahˇ laˇ ngeh ngaˬ-euˬ cawˬ teu g’aˬ naˇ dui dui-awˇ nui ma cawˆ dui dui luꞈ nga lehˇ ngaˇ ya siˬ-awˇ aˬ yawꞈ yawˬ ha neh boꞈ-euˬ loꞈ-ehˇ maˇ diˇ ehˇ mawꞈ-eu maˬ ngeuˇ paˬ lehˇ ngaˇ noeˬ-euˬ ma. Aˬ cawˬ nui ma laˆ pehˇ laˇ k’awꞈ Yeˬsuˇ-euˬ nuiˬ gaˬ-ahˇ noeˬ mawˇ-eu heu naˇ aˬ cawˬ-ahˇ nui gaˬ mˇ nya ni caw ba nehˬ miˇ-a.” Aˬ dui Yeˬsuˇ-ahˇ dzaw geuꞈ naˇ aˬ myah luꞈ nui gaˬ mˇ mawˇ nya-eu meh.

Smˇ yawˬ ha nui k’ahˇ maˬ geuꞈ-eu nui gaˬ dzaw. Heu naˇ Yeˬsuˇ-euˬ zaˬ lahˇ pyeuꞈ-eu lehˇ siˬ laˇ-eu tiˬ jeˬ pyeuꞈ meh. (Yoˇhaˬ 13:34, 35) Yeˬsuˇ k’awꞈ ni heu loꞈ-ehˇ g’eh-eu nui gaˬ ahˇ-awˇ aˬ dui-ahˇ mˇ mehˬ nehˬ yaꞈ-euˬ meh. Aˬ joˆ-ehˇ nga? Aˬ yawꞈ mˬ k’oeˇ taˆ neh oe ka-awˇ “dawˬ tawˆ luꞈ byehˇ dzeh yaꞈ jiˇ-awˇ” aˬ dui-euˬ g’aˇ duˬ “shiˇ gaˇ keuˆ ni” lawˇ nehˬ le-euˬ meh. (Piˇliˇpiˆ 2:5-8) Aˬ dui Yeˬsuˇ neh yawˬ ha nui k’ahˇ lawˇ nehˬ-euˬ nui gaˬ-ahˇ dzaw geuꞈ naˇ  aˬ dui-euˬ nui noeˬ hawˇ-eu nui ma aˬ yawꞈ-ahˇ duˇ leˇ-awˇ aˬ cawˬ loˬ-eu jeˬ-ahˇ jeˬ hu taˬ-eu meh.

Aˬ dui nui gaˬ mˇ mawˇ naˇ gaˇ dahˇ tsoeˬ dui dui-eu meh. Yaw jeˬ ma jeˬ nyiˬ hmˬ-ahˇ haw ma.

• Miˇ k’ahˬ doe ni jawˇ-eu mehˇ nmˇ deuˬ: Aˬ dui tiˬ g’aˬ-ahˇ tiˬ g’aˬ gaˬ-eu miˇ neh miˇ k’ahˬ doe ni jawˇ-eu aˬ geu muˇ-ahˇ iˇ k’awꞈ mehˇ nmˇ deuˬ aˬ dui-ahˇ lmˇ buˬ ni ha geuꞈ nehˬ laꞈ meh lehˇ siˬ nya-eu ma. “Miˇ tsaˬ k’oeˇ taˆ k’aˇ jawˇ-eu Ka li-ahˇ jah-eu” mehˇ nmˇ deuˬ nawˬ-ahˇ gaˬ meh lehˇ ya siˬ-eu heu naˇ yaw-ehˇ muiˬ-eu tiˬ jeˬ pyeuꞈ meh. (1 Beˬtuˆluˆ 5:9) Heu loꞈ-ehˇ g’eh-eu nui gaˬ aˬ dui Miˬyehˇ-euˬ tsawˇ haˬ yaw kaˬ-ahˇ maˬ ngeuˇ naˇ maˬ mawˇ nya-a.

• Tsaˬ leˇ dzoeˇ leˇ-eu jeˬ: “Goeˇ-eu gaˬ-eu laꞈ k’oeˇ tiˬ g’aˬ tiˇ g’aˬ oˇ”-eu heu naˇ “tsaˬ leˇ dzoeˇ leˇ-eu jeˬ neh gahˇ dzahˬ” taˬ-eu meh. (Eˇpeˇsu 4:2, 3) Aˬ dui heu loꞈ-ehˇ g’eh-eu nui saˇ oꞈ-eu jeˬ bawˬ dzaˬ gaˇ maˬ ehˇ huiˬ-eu mehˬ bawˬ tiˬ nah hawˇ-eu smˬ nah-ahˇ maˬ ehˇ ya mawˇ-euˬ ma. Nui saˇ heu nymˇ iˬ nah maˬ tsaˬ maˬ dzoeˇ leˇ-eu miˇ tsaˬ nehˬ-ehˇ beu gaˇ ngaˇ lehˇ nawˇ noeˬ miˇ-a loˇ? (Ja ceuˬ 119:165; Iˇsaˬyaˇ 54:13) Aˬ dui aˬ cawˬ nehˬ-ehˇ tsaˬ leˇ naˇ aˬ yawꞈ maꞈ-ahˇ maˇ diˇ gaˬ-awˇ mˬ taˆ jawˇ-eu Aˬda-ahˇ jiˇ laꞈ k’aˬ bi cehˇ-eu meh.—Ja ceuˬ 133:1-3; Maꞈtehˬ 5:9.

“G’oeˇ-eu gaˬ-eu jeˬ-aˬ tsawˇ haˬ zaˬ-ahˇ bi huiˬ bi mahˇ laˇ” meh lehˇ Pawˇluˆ ehˇ meh. (1 Gawˇliˬtu 8:1) Heu aˬ jeˬ-ahˇ ehˇ mawꞈ-eu nga? “Nui gaˬ-eu dawˬ caˇ” lehˇ kuˇ-eu 1 Gawˇliˬtu yaw huiˬ 13-ahˇ nui gaˬ aˬ joˆ-ehˇ bi huiˬ bi mahˇ laˇ nga lehˇ ja sawˇ taˬ-euˬ meh. Gaˬ-eu jeˬ-aˬ aˬ cawˬ-ahˇ muiˬ-eu jeˬ-ahˇ noeˬ keuˆ-awˇ loˬ-eu jeˬ-ahˇ ngehˬ g’eh nehˬ-eu meh. (1 Gawˇliˬtu 10:24; 13:5) K’oeˇ naˇ aˬ cawˬ g’aˇ duˬ noeˬ mawˇ-eu oˇ oˬ-eu g’awˬ shaˬ gaˬ-eu heu deuˬ baˬ da neh nymˇ jiˇ laꞈ k’oeˇ muiˬ daˆ laˇ-awˇ aˇ muˇ laꞈ k’oeˇ jiˇ mehˬ bawˬ gm laˇ meh.—Gawˇlawˇsehˇ 3:14.

Aˬ cawˬ-ahˇ nui gaˬ yaw myaˬ paw neh mˇ nya k’awꞈ Miˬyehˇ-ahˇ gaˬ-eu heu naˇ aˇ poeˬ baw dzehˬ-awˇ aˬ dui-euˬ nui gaˬ-ahˇ bi myaˬ dzehˬ laˇ-eu meh. Aˬ jeˬ miˇ neh nga? Miˬyehˇ-ahˇ gaˬ-eu jeˬ aˬ dui-ahˇ nui ma tiˬ siˬ tehꞈ-ehˇ biꞈ taꞈ-eu miˇ neh. Dehꞈ-eu jeˬ tsawˇ jeuˬ dawˬ beu gaˇ-eu tsawˇ haˬ deuˬ Yeˬhawˇbaˬ-ahˇ uˬ duˬ tahˬ-awˇ aˬ yawꞈ “ehˇ dawˬ naˇ haˬ” luꞈ-eu meh. (Zeˬpaˬniˇ 3:9) Aˬ dui Miˬyehˇ-euˬ yaw sahˇ neh siˬ le-euˬ aˇ g’ehˇ heu yawˬ nah na luꞈ mˇ mawˇ kaˇ-euˇ.