Maꞈtehˬ-euˬ guiˬ lahˬ dawˬ sahˬ boꞈ-ahˇ heu loꞈ-ehˇ boꞈ taˬ-euˬ meh. “Uˬ duˬ tahˬ nymˇ nymˇ ma laꞈ k’oeˇ Yeˬsuˇ uˇ leˇ-awˇ ahˬ taꞈ zeuˇ taꞈ luꞈ-eu tsawˇ haˬ dawˬ tawˆ luꞈ-ahˇ teh doˆ-euˬ meh. Pyuˇ dawˬ paˇ-eu tsawˇ haˬ deuˬ-euˬ hawˬ jeh hawˇ-eu lawˇ-eu shehˇ-eu yaˇ miˇ k’aˬ k’oeˬ ahˬ-eu tsawˇ haˬ deuˬ-euˬ nuiˇ mahˬ deuˬ aˬ yawꞈ ngawˬ dzeh nehˬ-euˬ meh. Tsawˇ haˬ k’oeˇ deuˬ-ahˇ aˬ yawꞈ ehˇ nehˬ-eu “Ngaˬ-euˬ Uˬ duˬ tahˬ nymˇ nymˇ ma-ahˇ guiˬ lahˬ shaˇ-eu nymˇ lehˇ kuˇ tehꞈ-a” lehˇ Miˬyehˇ neh ehˇ taˬ-euˬ gaˇ kawˆ Jaˇliꞈ laꞈ k’oeˇ boꞈ taˬ-euˬ meh. Ehˇ k’awꞈ uˬ duˬ tahˬ nymˇ nymˇ ma heu smˇ k’oeˬ tahˇ joe-euˬ baˇ shmˇ duˬ pyeuꞈ-iˇ ni naw maꞈ jahˇ luꞈ-eu ngaˇ.”—Maꞈtehˬ 21:12, 13.

Gaˇ hu-euˬ gaˇ kawˆ-ahˇ haw ngeh uˬ duˬ tahˬ nymˇ laꞈ k’oeˇ ahˬ taꞈ zeuˇ taꞈ-eu deuˬ aˇ poeˬ aˇ dzehˬ-ehˇ sawˇ k’aˆ dzeuˇ-eu miˇ neh maˬ tsaˬ maˬ dawˇ nga lehˇ siˬ laˇ-eu meh. Yaw jeˬ ma jeˬ k’aˬ k’oeˬ aˇ poeˬ tiˬ pawˬ-iˬ maˬ k’aˆ-a lawˇ-eu g’aˬ duˬ iˇ shaˬ zaˬ deuˬ jiˇ zeuˇ nya meh. Ehˇ k’awꞈ A.D. 100 k’oꞈ heu kaˬ-ahˇ k’aˬ k’oeˬ nyiˬ mawˇ zeuˇ-eu g’aˇ duˬ shuiˇ maˇ byaˆ tiˬ byaˆ ya biꞈ-eu meh lehˇ Yuˇdaˆ tsawˇ haˬ-euˬ gaˇ kawˆ-ahˇ boꞈ-eu deuˬ ehˇ-eu meh. Pyuˇ heu myaˆ ni za-eu g’aˇ duˬ gaˇ mˇ zaˬ tiˬ g’aˬ 25 nah ya mˇ-eu meh. K’aˬ k’oeˬ aˬ dzehˬ-ehˇ poeˬ-eu miˇ neh iˇ shaˬ zaˬ deuˬ maˬ zeuˇ nya-a. (Uˬduˬtahˬ-eu 1:14; 5:7; 12:6-8) Teu miˇ neh saˬ laˬ Siˇmiˬawˬ beˬ Kaꞈmeˇli-aˬ gaˇ kawˆ heu-ahˇ nui ma pehˇ dui dui-awˇ Yuˇdaˬ tsawˇ haˬ deuˬ ya lawˇ-eu jeˬ laˆ cuiˆ nehˬ-euˬ meh. Teu ngeh k’aˬ k’oeˬ nyiˬ mawˇ-euˬ aˇ poeˬ shuiˇ maˇ byaˆ tiˬ byaˆ-ahˇ g’oeˬ tseˇ g’oeˬ bymˇ ga le-euˬ meh.

Aˬ dui heu gaˇ haw ngeh uˬ duˬ tahˬ nymˇ-ahˇ ahˬ taꞈ zeuˇ taꞈ-eu deuˬ nui k’ahˇ huiˬ-awˇ zeuˇ-eu deuˬ-ahˇ neh jiˇ jeuˬ poˆ gaˇ ya mawˇ-euˬ ma. Teu miˇ neh Yeˬsuˇ aˬ yawꞈ maꞈ-ahˇ “smˇ k’oeˬ” lehˇ kuˇ-eu meh.