Sahˬ boꞈ dzaw luꞈ ngeh tiˬ jeˬ˗iˬ maˬ poˆ maˬ paˇ laˇ˗aˬ siˬ. Nyiˇ ngeh˗euˬ sahˬ boꞈ dzaw cawˬ deuˬ hawˇ˗eu huiˬ laˇ ngeh˗euˬ dzaw cawˬ deuˬ aˬ yawꞈ tiˬ deuˬ tehꞈ meh. Meuˬ laꞈ kʼoeˇ jawˇ˗eu deuˬ myaˬ ni tiˬ gʼaˬ tiˇ gʼaˬ siˬ nya meh.

Liˇbaˬtiˬ meuˬ˗euˬ tiˬ jaw yaˇ ngeh jaˆ byah taˬ˗awˇ myaˬ tiˬ paˆ aˇ du ka˗eu meh. Ngaˇ dehꞈ le ngeh ngaˬ da yaˇ mˇ zaˬ pyeuꞈ˗miˇ neh ngaˇ zaˬ guˬ ngeh yaˇ tsehˬ˗eu lawˬ liˬ yeuꞈ dzaw˗awˇ yaˇ mˇ˗euˬ ma.

Ngaˇ aˬ da zaˬ guˬ maˬ jawˇ haw˗aˬ. Ngaˇ dehꞈ le ngeh˗aˬ ngaˬ da 56 kʼoꞈ byah laˇ˗awˇ ngaˬ ma 35 kʼoꞈ byah laˇ˗euˬ meh. Ngaˬ da jawˇ saˇ doˆ˗awˇ loˆ ga ni gʼeh˗eu meh. Ngaˬ da gaˇ mˇ gaˇ gaˬ˗awˇ zaˬ deuˬ˗ahˇ kʼawꞈ yaw bym bym ni mehˬ˗eu meh. Ngaˬ da pyuˇ gʼawˬ mya ni maˬ poˆ nya kʼawꞈ nga maꞈ bi jawˇ˗eu iˇ kahˇ nga maꞈ bi dm˗eu moeˬ tsoeˬ nga maꞈ bi dzaˬ˗eu dzaˇ loꞈ ni jaˆ˗eu uˬ taꞈ aˬ myah luꞈ nga maꞈ˗ahˇ aˇ yamˬ biꞈ nya˗eu meh. Ngaˬ da 93 kʼoꞈ˗ahˇ shiˇ˗awˇ ngaˬ ma 86 kʼoꞈ˗ahˇ shiˇ˗euˬ meh. Ngaˬ da ngaˬ ma Yeˬhawˇbaˬ˗euˬ Saˇ kiˇ maˬ ngeuˇ kʼawꞈ ngaˬ nyiˇ tiˬ gʼaˬ Saˇ kiˇ pyeuꞈ˗awˇ 1972 kʼoꞈ˗ahˇ neh naˇ saˇ jaˇ ziꞈ˗eu sheuˬ gʼeh˗eu gʼaˬ pyeuꞈ˗euˬ meh.

Ngaˬ ma zahˇ paw yaw muiˬ˗ehˇ tawˬ˗awˇ nga maꞈ˗ahˇ jawˇ nah yawˬ jaw na luꞈ uˬ duˬ tahˬ nymˇ˗ahˇ sheuˬ sheuˬ˗ehˇ iˇ˗eu meh. Ngaˇ tseˇ nyiꞈ kʼoꞈ kʼawˆ laˇ ngeh smˇ gʼaˬ tiˬ poeˬ miˬ yehˇ˗euˬ gaˇ kawˆ ya gaˬ dahˬ beh˗euˬ ma. Teu miˇ neh ngaˇ aˬ ma˗ahˇ “Aˇ yamˬ tiˬ yamˬ laꞈ kʼoeˇ tehꞈ˗ehˇ Yeˬsuˇ zaˬ hawˇ˗eu Aˬda aˬ joˆ˗ehˇ pyeuꞈ nya˗a”  lehˇ naˇ haˬ˗euˬ ma. “Gaˇ kawˆ heu˗aˬ maˬ siˬ jiˇ nya˗eu jeˬ pyeuꞈ˗a li˗oˇ aˬ dui gʼoˆ shaw˗eu maˬ loˬ˗a” lehˇ ngaˬ ma ehˇ˗eu meh. Gaˇ kawˆ heu naˇ ngaˬ˗euˬ gʼaˇ duˬ maˬ gʼoˆ shaw laˇ˗eu jeˬ pyeuꞈ luꞈ˗a siˬ. Ngaˇ 14 kʼoꞈ laˇ ngeh puˬ dahˬ puˬ dzeˇ jaˆ˗eu lawˇ gawˆ˗ahˇ iˇ cuꞈ shawˇ˗euˬ ma. Teu ngeh ngaˇ iˇ cuꞈ˗ahˇ smˬ poˆ bi dehˬ nuiꞈ˗euˬ ma. Heu naˇ Aˬda˗euˬ gʼaˇ duˬ Zaˬmaˇ˗euˬ gʼaˇ duˬ muiˬ˗eu shawˇ˗eu yaw sahˇ gʼaˇ duˬ pyeuꞈ meh.

Ngaˇ tseˇ daˇ teu kaˬ˗ahˇ dzaw ngeh ngaˬ˗euˬ cawˬ bawˇsiˬ teˇ zaˬ pyeuꞈ˗awˇ ngaˬ˗ahˇ jiˇ teˇ laˇ lehˇ cawˬ˗eu meh. Ngaˇ Goˇdeˇ Ga˗la˗suiꞈ bawˇsiˬ aˇ muˇ˗ahˇ uˇ iˇ˗awˇ teu naˆ naˆ˗ehˇ maˬ nya miˇ neh nyiˬ poˆ smˬ poˆ teˇ naˇ naˬ˗euˬ ma. Tiˬ kʼehˬ naˇ ngaˇ yehˇ ya geuꞈ iˇ˗awˇ Jeˬmaˬni miˇ kʼahˬ˗ahˇ bi sha gʼeh˗euˬ ma. Yehˇ˗euˬ aˬ yuiꞈ ngaˇ muiˬ˗eu sheuˬ gʼeh˗eu gʼaˬ pyeuꞈ nya˗eu jeˬ nga lehˇ noeˬ˗eu miˇ neh yehˇ˗euˬ dzaw nymˇ˗ahˇ bi dzaw tawꞈ iˇ˗euˬ meh. Aˬ yawꞈ maꞈ ngaˬ˗ahˇ aˬ myah luꞈ yehˇ bi geuꞈ mawꞈ kʼawꞈ ngaˬ˗ahˇ maˬ geuꞈ mawꞈ˗eu miˇ neh yehˇ nyiˬ kʼoꞈ geuꞈ naˇ 1956 kʼoꞈ˗ahˇ naˬ˗euˬ ma. Kʼoeˇ gaˇ neh naˇ beu gaˇ dui dui˗eu yehˇ tiˬ muˇ˗ahˇ paˇ ahˇ iˇ˗euˬ ma.

Yaw tsaˬ yaw dawˇ˗ahˇ maˬ siˬ nya ngeh ngaˇ zaˬ yo aˬ li maˇ diˇ deuˬ aˬ joˆ˗ehˇ gʼeh˗eu lehˇ jah bahˬ taˬ˗euˬ ma. Tiˬbiˬ laꞈ kʼoeˇ hawˇ˗eu ngaˬ˗euˬ tiˬ jawˬ jawˇ˗eu tsawˇ haˬ deuˬ loꞈ˗ehˇ noeˬ caw˗eu miˇ neh Jaˇliꞈ gaˇ kawˆ ja˗eu aˬ li deuˬ naˇ zaˬ yo aˬ li˗ahˇ maˬ duˇ nga lehˇ ngaˇ noeˬ˗euˬ ma. Ehˇ kʼawꞈ ngaˬ˗euˬ dehꞈ ziˇ˗ahˇ poˆ laˇ paˇ laˇ˗eu tiˬ jeˬ na˗ahˇ ya dzaw˗euˬ ma. Tiˬ nah ngaˇ lawˬ liˬ yaw neˇ yeuꞈ˗awˇ meuˬ˗ahˇ le ngeh aˬ buˇ zaˬ guˬ nyiˬ gʼaˬ deh naˬ laˇ˗eu meh. Aˬ yawꞈ nyaꞈ ngaˬ shahˬ˗euˬ aˬ nyiˇ pyeuꞈ˗awˇ Yeˬhawˇbaˬ˗euˬ Saˇ kiˇ pyeuꞈ˗eu meh. Ngaˇ aˬ yawꞈ nyaꞈ neh biꞈ˗euˬ Loꞈ˗eu nymˇgoˇ Noeˬlaˇ˗awꞈ! paˇ dmˬ gui haw˗euˬ kʼawꞈ teu naˆ naˆ˗ehˇ maˬ siˬ laˇ nya. Nymˬ˗mˇ poˆ naˇ aˬ yawꞈ nyaꞈ ngaˬ˗ahˇ aˇ muˇ Jaˇliꞈ dzaw gaˇ iˇ ma lehˇ caw ngeh shaˇ noeˬ haw ma lehˇ ehˇ nehˬ˗euˬ ma. Aˬ yawꞈ nyaꞈ uiˇ uiˇ˗ehˇ “Ehˇ taˬ˗euˬ loꞈ˗ehˇ bi jaˆ de” lehˇ ehˇ ngeh “Euˬ za meh” lehˇ ehˇ nehˬ˗euˬ ma.

Ngaˇ oe ma lehˇ ehˇ nehˬ˗euˬ lehˬ iˇ˗euˬ lehˇ miˇ˗a. Ehˇ kʼawꞈ ehˇ dzeuˇ taˬ˗euˬ miˇ neh maˬ iˇ maˬ geuꞈ nya. Teu miˇ neh ngaˇ bawˬ dzaˬ gaˇ iˇ˗euˬ ma. Teu gaˇ zaˬ deuˬ Jaˇliꞈ gaˇ kawˆ˗ahˇ siˬ nya dui dui gaˇ ya mawˇ ngeh ngaˬ˗ahˇ zahˬ leˇ˗eu lehˇ miˇ˗a. Ngaˇ yawˬ jaw na luꞈ ngaˬ ma nehˬ˗ehˇ uˬ duˬ tahˬ nymˇ˗ahˇ iˇ˗euˬ kʼawꞈ tiˬ jeˬ˗iˬ maˬ siˬ nya nya. Teu loꞈ˗ehˇ gʼeh gaˇ ya mawˇ˗euˬ miˇ neh ngaˬ˗ahˇ Jaˇliꞈ dzaw mawꞈ laˇ˗awˇ Jaˇliꞈ dzaw ma lehˇ ehˇ nehˬ˗euˬ ma. Ngaˬ neh ya dzaw beh beh˗euˬ jeˬ naˇ huiˬ dzehˬ dzehˬ˗eu Miˬyehˇ˗euˬ tsawˇ myahˇ naˇ Yeˬhawˇbaˬ lehˇ ya siˬ˗euˬ ma. Gaˇ hu ngaˇ ngaˬ ma˗ahˇ Yeˬhawˇbaˬ˗euˬ Saˇ kiˇ aˬ suˇ gʼaˬ˗a lehˇ naˇ haˬ haw˗euˬ ma. “Teu deuˬ laˬ aˬ yawꞈ maꞈ Yeˬhawˇbaˬ lehˇ kuˇ˗eu tsawˇ mawˬ tiˬ gʼaˬ˗ahˇ uˬ duˬ tahˬ˗eu meh” lehˇ ngaˬ ma ehˇ˗eu meh. Ehˇ kʼawꞈ nymˬ˗mˇ naˇ ngaˬ˗ahˇ myaˆ nuiˆ byeh laˇ shaw miˇ˗a.

Ngaˇ yaw tsaˬ yaw dawˇ˗ahˇ ya mawˇ maˬ lehˇ siˬ nya˗eu miˇ neh kawˇ ma˗ehˇ huiˬ laˇ mahˇ laˇ˗euˬ ma. 1957 Smˇ siˬ siˬ˗ahˇ bawˬ dzaˬ dahˬ beh iˇ˗euˬ poˆ˗ahˇ neh baˬ la 9 siˬ naˇ iˇ cuꞈ shawˇ˗euˬ ma. Teu gaˇ neh naˇ ngaˬ˗euˬ nui noeˬ paˇ iˇ˗euˬ meh. Ngaˬ˗ahˇ laꞈ kʼaˬ cehˇ dui dui miˇ˗a Jaˇliꞈ maˇ diˇ zaˬ yo aˬ li˗euˬ gaˇ kawˆ˗ahˇ mehˬ˗eu lehˇ ya siˬ˗euˬ miˇ neh. Yeˬsuˇ maˇ diˇ zaˬ yo aˬ li tiˬ gʼaˬ meh. Aˬ yawꞈ aˬ cawˬ naˆ maˬ tseˇ gʼaˬ kʼaˆ˗awˇ baoˬ ahˇ kʼawꞈ tiˬ gʼaˬ nehˬ˗ehˇ˗iˬ maˬ diˬ ceh ceh˗a. Maˬ keuˆ laˇ miˇ ehˇ taˬ loꞈ˗ehˇ aˬ yawꞈ “kʼehˬ˗eu jeˬ˗ahˇ . . . dawˬ gʼoꞈ maˬ doˆ ni daˬ˗euˬ meh.” (Iˇsaˬyaˇ 53:2 7) Yeˬsuˇ˗euˬ gʼaˬ kʼehˇ maˇ diˇ deuˬ naˇ “tsawˇ haˬ yawˬ gʼaˬ na luꞈ˗ahˇ gʼawˬ shaˬ ya gaˬ” nga lehˇ ngaˇ ya siˬ˗euˬ ma.—2 Tiˆmoˇseˬ 2:24.

Kʼoeˇ gaˇ neh tiˬ kʼoꞈ naˇ 1958 kʼoꞈ˗ahˇ ngaˇ huˬ mehˬ mehˬ˗eu gʼaˬ geuꞈ˗euˬ ma. Ehˇ kʼawꞈ tiˬ kʼehˬ naˬ˗euˬ ma. Aˬ jeˬ miˇ neh nga? Ngaˬ˗ahˇ aˇ muˇ Jaˇliꞈ dzaw˗iˇ ma lehˇ cawˬ laˇ˗euˬ kʼoeˇ nyiˬ gʼaˬ laꞈ kʼoeˇ neh tiˬ gʼaˬ  pyeuꞈ˗eu Gawˇliˬ˗yaˬ nehˬ˗ehˇ sheuˬ dahˬ dzaˬ˗euˬ miˇ neh ma. Aˬ yawꞈ˗ahˇ ya yuˇ˗euˬ tiˬ pawˬ˗iˬ nui ma maˬ cawˆ nya. Teu ngeh aˬ yawꞈ poeˬ dui dui˗eu sehˇ pyeuꞈ˗eu loꞈ˗ehˇ nymˬ˗mˇ keuˆ ni pyeuꞈ luꞈ˗a siˬ. Ngaˬ˗euˬ gʼaˇ duˬ naˇ Gawˇliˬ˗yaˬ miˇ tsaˬ kʼoeˇ taˆ˗euˬ sehˇ deuˬ laꞈ kʼoeˇ neh kʼaˇ poeˬ˗eu hmˬ pyeuꞈ meh. Aˬ yawꞈ nehˬ˗ehˇ oeˇ mˇ ya baˇ˗euˬ laˬ kʼaˬ cehˇ˗eu lehˇ miˇ˗a. Nymˬ˗mˇ poˆ˗aˬ Gawˇliˬ˗yaˬ aˬ yawꞈ˗euˬ gaˇ kawˆ ja gaˇ naˇ haˬ kaˇ˗euˇ.

“Ngaˬ peh mehˇ nmˇ 16 gʼaˬ jawˇ˗awˇ ngaˬ ma naˇ Yeˬhawˇbaˬ˗euˬ Saˇ kiˇ pyeuꞈ˗eu meh. Ngaˇ 14 kʼoꞈ kʼawˆ ngeh ngaˬ ma shiˇ˗awˇ teu gaˇ neh naˇ ngaˬ da Jaˇliꞈ dzaw laˇ˗euˬ meh. Ngaˬ ma maˬ paˇ jawˇ˗eu miˇ neh ngaˬ˗euˬ aˇ yuiꞈ 12 daˇ dzaw ngeh aˬ nyiˇ deuˬ˗ahˇ cu˗awˇ gʼawˬ nyoeˇ dzaˇ saꞈ mˇ˗awˇ ngaˬ da gʼoꞈ laˇ ngeh tiˬ kawˆ loꞈ˗ehˇ dzaˬ nya˗eu gʼaˇ duˬ nga nyaꞈ mehˇ nmˇ˗ahˇ sahˬ boꞈ tiˬ nah tiˬ gʼaˬ˗ehˇ bi dzaw le˗eu za meh laˬ lehˇ ngaˬ da saˬ laˬ˗ahˇ shaˇ iˇ˗euˬ meh. Saˬ laˬ nui ma tsaˬ˗eu miˇ neh nga nyaꞈ mehˇ nmˇ ngaˬ˗euˬ aˇ yuiꞈ dzaw gʼaˬ ngeh keuˆ ni heu loꞈ˗ehˇ jahˇ˗euˬ ma. Saˇ kiˇ 2 gʼaˬ nga pehˬ nymˇ˗ahˇ mehˬ laˇ˗euˬ miˇ neh nga pehˬ 11 gʼaˬ Saˇ kiˇ pyeuꞈ laˇ˗euˬ ma. Ngaˬ˗ahˇ tsaꞈ gaˬ iˇ˗eu ya leˇ˗eu lehˇ miˇ˗a. Ehˇ kʼawꞈ zawˇ˗ehˇ shaꞈ dawˇ baw˗eu miˇ neh ngaˬ˗euˬ kʼaˬ dzeˇ zaˬ gʼawˬ mya kʼoꞈ caw ba nehˬ˗euˬ meh.”

Gawˇliˬ˗yaˬ nga nyaꞈ 1959 kʼoꞈ Nyiˬ siˬ ba la˗ahˇ oeˇ mˇ baˇ˗awˇ tiˬ kawˆ loꞈ˗ehˇ huˬ mehˬ mehˬ˗eu gaˇ mˇ˗euˬ ma. Teu ngeh kʼoꞈ Shiꞈ siˬ siˬ˗ahˇ Beˬdeˬlaˇ˗ahˇ mˇ iˇ˗eu lehˇ sahˬ boꞈ aˇ taꞈ shaˬ gʼeh˗euˬ ma. Nga nyaꞈ saˇ naˇ dawˬ pehˬ hmˬ˗ahˇ mˇ iˇ mawꞈ˗eu lehˇ miˇ˗a. Mehˇ nmˇ Saiˇmoˬ Keˇ˗leˇkeuˬ nga nyaꞈ˗ahˇ naˇ haˬ tseˇ ngeh Beˬdeˬlaˇ˗ahˇ nymˇ dahˬ baw˗eu deuˬ maˬ geuꞈ˗a lehˇ ehˇ˗eu meh. Kʼoeˇ ngeh yamˬ˗ahˇ teu loꞈ˗ehˇ gʼeh˗eu meh. Ehˇ kʼawꞈ nga nyaꞈ Beˬdeˬlaˇ˗ahˇ mˇ mawꞈ nya siˬ. Gʼawˬ mya kʼoꞈ byah laˇ ngeh noeˬ taˬ˗euˬ loꞈ˗ehˇ pyeuꞈ laˇ˗euˬ meh.

Tsaꞈ gaˬ˗eu deuˬ loˬ˗eu aˬ geu tsahˇ˗ahˇ iˇ paˬ nga lehˇ saˇ naˇ dawˬ pehˬ hmˬ˗ahˇ sahˬ boꞈ boꞈ gʼeh˗euˬ ma. Aˬ yawꞈ maꞈ tiˬ tsahˇ toeˬ mehˬ˗eu tehꞈ meh. Teu naˇ Aˇkeˬsaˬ gahˬ kaˬ Paiˇ Baˬ˗laˬ meuˬ teu gaˇ pyeuꞈ meh. Teu ngeh yamˬ˗ahˇ aˇ muˇ nyiˬ muˇ jaˆ˗eu tehꞈ meh. Tiˬ muˇ naˇ tsawˇ haˬ yaw ba deuˬ˗euˬ laꞈ taꞈ pyeuꞈ˗awˇ nyaˆ taꞈ tiˬ muˇ naˇ yaw naˆ deuˬ˗euˬ gʼaˇ duˬ meh. Nga nyaꞈ tsaꞈ gaˬ˗eu deuˬ 14 gʼaˬ jawˇ˗eu yaw naˆ deuˬ˗euˬ aˇ muˇ˗ahˇ ya jawˇ iˇ˗euˬ ma.

Yeˬhawˇbaˬ˗euˬ Saˇ kiˇ deuˬ tsaꞈ gaˬ˗eu deuˬ yaw naˆ yaw ba lehˇ aˬ jeˬ miˇ neh biˇ paˆ nga lehˇ nawˇ noeˬ tehꞈ˗a. Teu naˇ teu ngeh yamˬ˗ahˇ toˆ˗ehˇ maˬ biˇ paˆ naˇ maˬ geuꞈ nya˗eu miˇ neh meh. Teu ngeh yamˬ˗ahˇ yaw naˆ yaw ba tiˬ gaˇ bi jawˇ keuˬ naˇ zahˇ sahˇ kʼoꞈ˗ahˇ bahˬ˗awˇ suˬ saˬ laˇ nya meh. Yaw myaˬ gaˇ˗euˬ mehˇ nmˇ deuˬ shaˬ jiˇ maˬ duˇ leˇ˗eu deuˬ tiˬ kawˆ loꞈ˗ehˇ uiˬ leˇ˗awˇ bawˬ dzaˬ naˇ Bawˬdzaˬnymˇ laˆ cawˆ laˇ gaˇ guˆ˗eu meh. Kʼoeˇ naˇ mehˇ nmˇ yaw naˆ deuˬ yaw ba deuˬ˗euˬ iˇ kahˇ˗ahˇ tsaꞈ gaˬ iˇ naˇ diˬ laˇ˗eu meh. Yaw muiˬ˗ehˇ tsaꞈ gaˬ daˆ leꞈ nya˗eu gʼaˇ duˬ zahˇ sahˇ kʼoꞈ˗ahˇ ya caw teh˗awˇ gʼawˬ myahˇ maˬ gʼeh˗ehˇ muiˬ daˆ laˇ tehꞈ˗a lehˇ noeˬ tmˬ˗euˬ ma.

Teu ngeh yamˬ˗ahˇ tsaꞈ gaˬ˗eu yaw awˬ maˬ ngeuˇ˗a. Tsawˇ haˬ yaw naˆ deuˬ jawˇ gaˇ tsaꞈ gaˬ iˇ ngeh maˬ yehˆ maˇ yehˆ˗ehˇ tsawˇ haˬ yaw ba deuˬ˗euˬ nymˇ˗ahˇ zaˬ leˇ naˇ yaw nymˇ nymˇ lehˇ tsaꞈ gaˬ˗eu laˬ maˬ ngeuˇ naˇ seuˆ maꞈ ma lehˇ ehˇ nehˬ˗awˇ yawˬ nymˇ yawˬ˗ahˇ iˇ de laˬ lehˇ yaw kawˇ˗ehˇ ya noeˬ tsehˆ˗eu meh. Teu ngeh yamˬ˗ahˇ tsaꞈ gaˬ˗eu naˇ heu loꞈ˗ehˇ gʼeh˗eu meh.

Gawˇliˬ˗yaˬ nga nyaꞈ huˬ mehˬ mehˬ ngeh gaˇ mˇ˗awˇ yawˬ haˇ yawˬ ha ya cu˗eu meh. Nga nyaꞈ˗euˬ gaˇ myaˬ˗eu tiˬ paˆ pyuˇ ui cuiˆ za˗eu tehꞈ meh. Gawˇliˬ˗yaˬ iˇ kahˇ˗euˬ gaˇ ui cuiˆ na mˇ˗eu meh. Iˇ kahˇ tiˬ kahˇ naˇ ngaˬ˗ahˇ bi caw ba˗eu miˇ neh Gawˇliˬ˗yaˬ aˇ yamˬ tiˬ kʼehˆ tehꞈ˗ehˇ mˇ luiˆ jiˇ nya meh. Heu pehˬ nah gʼahˇ hawˬ byawˇ jiˇ biꞈ˗eu meh. Nga nyaꞈ iˇ kahˇ˗ahˇ maˬ gʼoꞈ iˇ mi na˗ehˇ biˇ dzaˬ˗eu ma. Yawˬ jaw na luꞈ iˇ kahˇ tiˬ kahˇ˗ahˇ mˇ iˇ ngeh Gawˇliˬ˗yaˬ moeˬ tsoeˬ jeˬ˗awˇ ngaˇ naˇ yaˇ kmˇ mˇ˗awˇ laˇ gʼoˆ zaˬ siˆ shawˇ˗eu uˬ taꞈ iˇ kahˇ tiˬ jawˬ laˆ buˇ˗eu ma. Kʼoeˇ naˇ tsawˇ haˬ yaw ba˗euˬ iˇ kahˇ tiˬ kahˇ˗ahˇ nga nyaꞈ laˇ gʼoˆ zaˬ siˆ shawˇ˗eu ma. Nah ga ni Gawˇliˬ˗yaˬ laꞈ kʼoeˇ siꞈ˗awˇ ngaˇ naˇ laꞈ nyiˇ siꞈ˗eu ma. Aˬ yawꞈ pehˬ nah gʼahˇ haw byawˇ bi dzaˬ˗eu meh. Gawˇliˬ˗yaˬ laꞈ kʼoeˇ ya dzaˬ kʼawꞈ aˬ yawꞈ pehˬ nehˬ˗ehˇ maˬ dzaˬ˗a. Ngaˇ naˇ lawˬ liˬ naˬ duˬ˗ahˇ dzaˬ˗eu ma. Teu naˇ ngaˬ˗euˬ gʼaˇ duˬ tiˬ jeˬ˗iˬ maˬ gʼeh˗a. Gʼawˬ nyoeˇ jiˇ kuiˇ˗eu lehˇ miˇ˗a. Aˬ yawꞈ pehˬ muiˬ˗eu nymˇ jiˇ tiˬ jiˇ pyeuꞈ kʼawꞈ dawˬ peh jawˇ˗eu deuˬ˗euˬ nui noeˬ ahˇ˗eu meh. Tiˬ poˆ lawˬ liˬ yaꞈ tsiˇ dawˆ duˬ˗ahˇ iˇ ngeh pyeuꞈ laˇ˗euˬ gaˇ kawˆ˗ahˇ noeˬ nya siˬ. Yaꞈ tsiˇ dawˆ gʼaˬ˗awˇ Gawˇliˬ˗yaˬ gaˇ nyiˇ tiˬ poˆ iˇ˗eu za meh laˬ lehˇ aˬ li yaw ba tiˬ gʼaˬ˗ahˇ naˇ haˬ ngeh aˬ yawꞈ nui ma pehˇ˗eu laꞈ kʼoeˇ ngaˬ˗ahˇ haw tsoˆ taˬ˗awˇ “Piˬ tehˬ taˬ nga.” lehˇ ehˇ˗eu meh.

Ehˇ kʼawꞈ nga nyaꞈ mehˇ nmˇ deuˬ nehˬ˗ehˇ muiˬ˗eu aˇ yamˬ jaˆ˗awˇ tsaꞈ gaˬ˗eu gaˇ˗ahˇ ya leˇ˗eu lehˇ miˇ˗a. Nga nyaꞈ Paiˇ Baˬ˗laˬ meuˬ˗ahˇ oe keuˆ beh beh ngeh aˇ muˇ˗euˬ gaˇ mˇ˗eu gʼaˬ lehˇ kuˇ˗eu mehˇ nmˇ nehˬ˗ehˇ  yaꞈ˗euˬ ma. Aˬ yawꞈ˗euˬ miˬ zaˬ Saˇ kiˇ maˬ pyeuꞈ laˇ˗euˬ siˬ miˇ neh Gawˇliˬ˗yaˬ Jaˇliꞈ mehˬ nehˬ˗euˬ meh. Ngaˇ naˇ aˬ yawꞈ˗euˬ aˬ buˇ hawˇ˗eu aˬ yawꞈ˗euˬ oeˬ paˬ˗ahˇ mehˬ˗euˬ ma. Aˬ ma gʼaˬ hawˇ˗eu aˬ buˇ gʼaˬ Yeˬhawˇbaˬ˗euˬ gaˇ mˇ˗eu lehˇ noeˬ tsehˆ˗awˇ iˇ cuꞈ shawˇ˗euˬ meh.

Nga nyaꞈ tsawˇ haˬ yaw ba deuˬ˗euˬ aˇ muˇ˗ahˇ gʼoeˇ˗eu cawˬ yaw myaˬ gʼaˬ jawˇ˗eu ma. Aˬ yawꞈ maꞈ hawˬ dzaˬ laˇ lehˇ tiˬ kʼehˬ maˬ taˬ kuˇ meh. Ehˇ kʼawꞈ nga maꞈ tiˬ kawˆ loꞈ˗ehˇ jawˇ gaˇ aˬ cawˬ maˬ bi mawˇ˗eu gʼaˇ duˬ uˬ ciꞈ paw ya iˇ˗eu meh. Kuˇ Kehˇ Kehˬ (KKK) aˇ muˇ teu naˇ teu ngeh yamˬ˗ahˇ yaw ba yaw naˆ tseˇ paˆ gaˇ gʼaˬ biꞈ˗awˇ yaw haiˬ jeˬ mˇ˗eu paw tsawˇ myahˇ doˆ dui dui˗eu meh. Ngaˇ Haˇloˬgʼoiˬ tiˬ miˇ˗ahˇ aˬ li tiˬ gʼaˬ KKK aˇ muˇ˗euˬ moeˬ tsoeˬ dmˬ˗awˇ guiˇ ga˗ahˇ nuiˇ luꞈ˗eu gaˇ kawˆ nymˬ˗mˇ keuˆ noeˬ nya siˬ. Ehˇ kʼawꞈ maˬ muiˬ˗eu gaˇ kawˆ heu mehˇ nmˇ yaw kaˬ gaˬ˗eu jeˬ˗ahˇ maˬ laˆ naˬ nya˗aˬ. Jawˇ la yamˬ tiˬ kʼoꞈ˗ahˇ nga nyaꞈ huiˬ˗eu mehˬ bawˬ smˬ nah˗ahˇ iˇ˗eu gʼaˇ duˬ pyuˇ loˬ laˇ taˬ ngeh mehˇ nmˇ tiˬ gʼaˬ 1950 kʼoꞈ˗ahˇ˗euˬ ngaˬ˗euˬ lawˬ liˬ zeuˇ ma lehˇ ehˇ˗euˬ meh. Kʼoeˇ gaˇ neh ba la tiˬ siˬ naˇ tiˬ nah ngaˬ nyaꞈ uˬ tsaˇ tsoˆ tsoˆ˗ehˇ tsaꞈ gaˬ iˇ˗awˇ yaw myaˬ gʼaˬ˗ahˇ Jaˇliꞈ mehˬ˗awˇ iˇ kahˇ˗ahˇ oꞈ keuˆ laˇ ngeh tsawˬ guˆ˗iˇ dui dui˗euˬ ma. Nga nyaꞈ˗euˬ lawˬ liˬ iˇ kahˇ mehˬ shi naˬ taˬ laˇ˗awˇ seuˬ gʼaˬ tiˬ taꞈ dawˆ tehˬ taˬ˗euˬ meh. Sahˬ boꞈ teu laꞈ kʼoeˇ “Ngaˇ nawˬ˗ahˇ lawˬ liˬ biꞈ kʼoꞈ nehˬ ma. Heu naˇ ngaˬ˗euˬ laꞈ sawˬ ma. Nawˬ˗euˬ mehˇ nmˇ.” lehˇ boꞈ taˬ˗euˬ meh.

Ya puˬ˗euˬ nyaˆ taꞈ tiˬ kawˆ naˇ ngaˬ˗euˬ nui ma˗ahˇ zaw laˇ dui dui˗eu mehˇ nmˇ deuˬ˗euˬ nui ma muiˬ˗eu jeˬ pyeuꞈ meh. 1962 kʼoꞈ˗ahˇ ngaˇ˗ahˇ Niˬ˗yuˬ Yawˇ Saˇ˗uˇ Lehˇsiˬ meuˬ˗ahˇ Miˬyehˇ gaˇ mˇ˗eu sahˬ boꞈ dzaw nymˇ˗ahˇ dzaw laˇ lehˇ kuˇ˗eu meh. Dzaw nymˇ teu naˇ ba la tiˬ siˬ byah ni ya dzaw˗awˇ aˇ muˇ˗ahˇ sheuˬ gʼeh˗eu deuˬ aˇ maꞈ˗ahˇ sheuˬ gʼeh˗eu deuˬ gahˬ kaˬ˗ahˇ sheuˬ gʼeh˗eu deuˬ˗ahˇ mehˬ˗eu jeˬ pyeuꞈ meh. Teu ngeh ngaˇ gaˇ maˬ jaˆ pyuˇ jiˇ yaw kʼaˆ˗ehˇ maˬ ahˇ Paiˇ Baˬ˗laˬ meuˬ˗ahˇ jaˆ˗eu naˬ gaˬ nehˬ˗ehˇ taꞈ leˇ˗eu jeˬ mˇ˗eu gaˇ mˇ duˬ tiˬ tsahˇ ngaˇ jawˇ gaˇ naˬ gaˬ ngehˬ laꞈ˗awˇ gaˇ˗euˬ gaˇ kawˆ naˇ haˬ tseˇ˗eu gʼaˇ duˬ oe lehˇ kuˇ˗eu meh. Ngaˇ gaˇ teu ya mˇ naˇ tsawˇ haˬ yaw naˆ deuˬ laꞈ koeˇ gaˇ mˇ duˬ teu laꞈ kʼoeˇ dahˬ beh˗eu gʼaˬ pyeuꞈ meh. Ehˇ kʼawꞈ aˬ yawꞈ maꞈ ngaˬ˗ahˇ maˇ diˇ mˇ laˇ˗awˬ lehˇ kuˇ naˇ ngaˇ aˬ joˆ˗ehˇ jahˇ paˬ nga? Ngaˇ Niˬ˗yuˬ Yawˇ˗ahˇ iˇ˗eu pyuˇ jiˇ maˬ ahˇ dzaw nymˇ˗ahˇ iˇ paˬ ngaˇ laˬ gaˇ mˇ˗iˇ paˬ nga laˬ lehˇ ngaˬ˗ahˇ shaˇ noeˬ maˬ doˆ nya. Gaˇ kawˆ heu nehˬ˗ehˇ taꞈ leˇ˗awˇ Beˬdeˬlaˇ˗ahˇ sahˬ boꞈ boꞈ gʼeh˗eu lehˇ gʼeh ngeh ngaˬ˗euˬ tiˬ ziˇ maˬ ngehˇ leˇ coeˇ˗eu gaˇ kawˆ tiˬ jeˬ pyeuꞈ laˇ˗euˬ meh.

Aˇ muˇ laꞈ kʼoeˇ˗euˬ aˬ yawꞈ˗euˬ kʼaˬ dzeˇ zaˬ Saˇ kiˇ maˬ ngeuˇ˗eu mehˇ nmˇ aˬ buˇ tiˬ gʼaˬ uˬ shawˬ yaw naˆ˗ehˇ nga pehˬ˗euˬ laˇ gʼoˆ˗ahˇ kʼoˆ laˇ˗awˇ sahˬ boꞈ tiˬ taꞈ biꞈ laˇ˗euˬ meh. Teu laꞈ kʼoeˇ pyuˇ tiˬ byah ni ahˇ˗eu meh. Aˬ yawꞈ hawˇ˗eu zaˬ deuˬ jawˇ nah yaw myaˬ jaw yaw naꞈ˗ehˇ tuˇ tuˇ˗ehˇ sa laˬ yaˇ˗ahˇ ya moꞈ gʼeu iˇ˗euˬ meh. Teu naˇ ngaˬ˗ahˇ Niˬ˗yuˬ Yawˇ˗ahˇ bi iˇ˗eu lehˇ pyuˇ poˆ˗eu jeˬ pyeuꞈ meh. Aˬ yawꞈ ehˇ˗eu “Dzaw nymˇ˗ahˇ iˇ˗awˬ yaw kʼaˆ kʼaˆ˗ehˇ dzaw iˇ˗awˇ nga maꞈ˗ahˇ mehˬ laˇ lawˬ” lehˇ ehˇ˗eu meh. Kʼoeˇ gaˇ neh naˇ ngaˇ kʼawꞈ naˬ gaˬ nehˬ˗ehˇ taꞈ leˇ˗eu jeˬ mˇ˗eu gaˇ mˇ duˬ˗ahˇ jaw nah ngaˬ jaw dawˬ nehˬ laꞈ˗eu za meh laˬ lehˇ naˇ haˬ˗euˬ ma. Aˬ yawꞈ maꞈ maˬ za˗a lehˇ ehˇ˗eu meh. Ehˇ kʼawꞈ teu naˇ ngaˬ˗euˬ gʼaˇ duˬ tiˬ jeˬ˗iˬ maˬ paˇ ngeuˇ meh ngaˇ Niˬ˗yuˬ Yawˇ˗ahˇ iˇ˗eu lehˇ noeˬ tsehˆ taˬ dzeuˇ˗euˬ miˇ neh. Maˬ gaˇ˗a siˬ ngaˇ gaˇ teu maˬ ya mˇ˗euˬ miˇ neh.

Nymˬ˗mˇ poˆ˗aˬ Gawˇliˬ˗yaˬ Paiˇ Baˬ˗laˬ meuˬ˗ahˇ jawˇ ngeh aˬ joˆ˗ehˇ gʼeh nya lehˇ ja nehˬ laꞈ meh. Aˬ yawꞈ ehˇ˗eu “Ngaˬ˗ahˇ heu gaˇ˗euˬ tsaꞈ gaˬ duˬ˗ahˇ ya leˇ˗eu  lehˇ miˇ˗a. Ngaˇ Jaˇliꞈ dzaw zaˬ 15 gʼaˬ˗ahˇ neh 20 gʼaˬ˗ahˇ keuˆ ni jawˇ˗eu ma. Nga nyaꞈ uˬ shaw paw tsaꞈ gaˬ iˇ˗awˇ nah gʼahˇ paw˗ahˇ neh uˬ ciꞈ taw paw keuˆ ni Jaˇliꞈ mehˬ iˇ˗eu ma. Tiˬ poˆ na uˬ ciꞈ paw naˬ liˬ 11 laꞈ˗ahˇ keuˆ ni mehˬ keuˆ˗euˬ ma. Heu gaˇ Miˬyehˇ gaˇ mˇ˗eu zawˇ˗ehˇ byawˬ nya. Ngaˬ˗ahˇ gaˇ nui jeˬ maˬ mˇ paˇ iˇ mawꞈ nya aˇ maꞈ˗ahˇ sheuˬ gʼeh˗eu gaˇ jiˇ maˬ mˇ˗iˇ mawꞈ nya. Ehˇ kʼawꞈ Yeˬhawˇbaˬ ngaˬ˗ahˇ aˬ jeˬ bi mˇ˗eu lehˇ noeˬ taˬ dzeuˇ˗awˇ” aˬ yawꞈ neh noeˬ taˬ˗euˬ loꞈ˗ehˇ mˇ˗euˬ meh.

Nga nyaꞈ Paiˇ Baˬ˗laˬ meuˬ˗ahˇ huˬ mehˬ mehˬ˗eu gaˇ mˇ luꞈ ngeh dzehˬ˗eu huˬ mehˬ mehˬ˗eu gʼaˬ geuꞈ˗eu lehˇ jiˇ jaˇ laˇ dawˆ˗euˬ ma. Nga nyaꞈ˗ahˇ dzehˬ˗eu huˬ mehˬ mehˬ˗eu gaˇ mˇ mawꞈ dui dui nya. Aˬ jeˬ miˇ neh nga? Gahˬ kaˬ˗ahˇ sheuˬ gʼeh˗eu gʼaˬ nga nyaꞈ˗ahˇ Teˇsaˬ˗suiꞈ laꞈ kʼoeˇ jaˆ˗eu aˇ muˇ tiˬ muˇ˗ahˇ dzehˬ˗eu huˬ mehˬ mehˬ˗eu gʼaˬ bi geuꞈ iˇ mawꞈ˗eu loꞈ˗ehˇ nga nyaꞈ kʼawꞈ nui ma tsaˬ˗eu miˇ neh ma. Nga nyaꞈ sahˬ boꞈ aˇ myah oe nga lehˇ yawˬ nah na luꞈ dawˬ kʼawꞈ bawˬ keuˆ laꞈ kʼoeˇ sahˬ boꞈ tiˬ jawˇ˗iˬ maˬ ya mawˇ˗a. Uˬ duˬ duˬ leˇ ngeh˗aˬ sahˬ boꞈ oe keuˆ˗awˇ haw ngeh ngaˇ hawˇ˗eu mehˇ nmˇ Liˇahˬ Gʼoiˇbeuˬ˗ahˇ Tiˬ siˬ ba la 1965 kʼoꞈ˗ahˇ neh naˇ aˇ maꞈ˗ahˇ sheuˬ gʼeh˗eu gʼaˬ biꞈ geuꞈ˗eu lehˇ boꞈ taˬ˗euˬ meh. Nymˬ˗mˇ mehˇ nmˇ Liˇahˬ Aˬmeˬliˇkaˬ saˇ naˇ laꞈ kʼoeˇ ja uˇ˗eu gawˬmiˬtiꞈ geuꞈ luꞈ meh.

Aˇ maꞈ˗ahˇ sheuˬ gʼeh˗eu gʼaˬ ya geuꞈ˗eu ngaˬ˗ahˇ uˬ duˬ gawꞈ˗eu lehˇ miˇ˗a. Teu kʼoꞈ˗euˬ jeˬ hu mehˇ nmˇ Je˗suiˬ Eˇ Tamˇsahˬ gahˬ kaˬ˗ahˇ sheuˬ gʼeh˗eu gʼaˬ geuꞈ luꞈ meh. Aˬ yawꞈ ngaˬ˗ahˇ geuꞈ nya paˬ˗ehˇ gʼeh ngaˇ laˬ lehˇ tseˇ˗eu meh. Aˬ yawꞈ ngaˬ˗ahˇ nahˬ yu ni aˬ jeˬ jeˇ ya laˆ paˇ˗eu lehˇ ehˇ nehˬ˗awˇ aˇ maꞈ˗ahˇ sheuˬ gʼeh˗eu deuˬ ya mˇ nya˗eu jeˬ˗ahˇ jiˇ ngehˬ keuˆ˗eu meh. Ngaˇ sheuˬ gʼeh˗eu gʼaˬ geuꞈ iˇ˗euˬ yaw myaˬ jaw maˬ byah laˇ mi na˗ehˇ nui noeˬ nui duˇ loˬ nya lehˇ siˬ laˇ nya. Ngaˇ sheuˬ gʼeh˗eu gʼaˬ ya geuꞈ laˇ˗euˬ taꞈ naˇ gahˬ kaˬ˗ahˇ sheuˬ gʼeh˗eu gʼaˬ pyeuꞈ˗eu mehˇ nmˇ Tamˇsahˬ nehˬ˗ehˇ mˇ dahˬ beh˗awˇ saˇ jaˇ ziꞈ˗eu mehˇ nmˇ teu gʼaˬ laꞈ kʼoeˇ neh yaw myaˬ jeˬ ya dzaw ma.

Teu ngeh yamˬ˗ahˇ aˇ maꞈ˗ahˇ sheuˬ gʼeh˗eu deuˬ˗ahˇ dzaw nehˬ˗eu jeˬ yaw kʼaˆ˗ehˇ maˬ jaˆ˗a. Yaw jeˬ ma jeˬ ngaˇ hawˇ˗eu aˇ maꞈ˗ahˇ sheuˬ gʼeh˗eu tiˬ gʼaˬ tiˬ kawˆ loꞈ˗ehˇ aˇ muˇ tiˬ muˇ˗ahˇ gʼaˬ iˇ˗awˇ dahˬ beh˗eu muˇ˗ahˇ naˇ aˬ yawꞈ mˇ gaˇ ngaˇ haw˗awˇ nyaˆ taꞈ muˇ˗ahˇ naˇ ngaˇ mˇ ngeh aˬ yawꞈ haw˗eu meh. Jiˇ ngeh tiˬ gʼaˬ tiˬ muˇ˗ahˇ gʼaˬ iˇ˗eu ma. Gawˇliˬ˗yaˬ ngaˬ˗ahˇ “Aˬ yawꞈ iˇ shaw meh loˇ?” lehˇ naˇ haˬ˗eu meh. Tiˬ kʼehˬ naˇ ngaˇ aˇ yeˇ huiˬ˗eu tiˬ jeˬ˗ahˇ ya siˬ nya˗euˬ ma. Teu naˇ aˬ dui˗ahˇ aˬ myah luꞈ caw ba nehˬ˗eu muiˬ˗eu mehˇ nmˇ jawˇ meh. Ehˇ kʼawꞈ aˬ dui aˬ yawꞈ maꞈ neh bi caw ba ma laˬ. Noeˬ dahˇ doe laˇ˗euˬ mehˇ nmˇ aˬ li yaw myaˬ gʼaˬ ngaˬ˗ahˇ caw ba nehˬ˗eu miˇ neh laˬ kʼaˬ cehˇ˗eu lehˇ miˇ˗a. Yaw jeˬ ma jeˬ teu ngeh aˇ maꞈ˗ahˇ sheuˬ gʼeh˗eu gʼaˬ pyeuꞈ˗eu mehˇ nmˇ Jeˬ Aˬ Baˬ˗laoˬ hawˇ˗eu Beˬdeˬlaˇ˗ahˇ jawˇ˗eu Peˇ Laˬ˗suiˬ meh.

Teu ngeh yamˬ˗ahˇ yawˬ gaˇ na luꞈ tsawˇ haˬ yaw ba yaw naˆ tseˇ paˆ˗eu meh. Tiˬ poˆ KKK aˇ muˇ nga nyaꞈ gʼa luꞈ˗eu Tehˇneˇsiˬ meuˬ doe doe˗ehˇ cah˗eu meh. Kʼoeˇ naˇ tiˬ poˆ nga nyaꞈ tsaꞈ gaˬ iˇ ngeh siˬ daˬ˗ahˇ iˇ cuꞈ dawˇ gʼaˬ˗awˇ gaˇ nyiˇ kuˆ˗ahˇ iˇ˗eu lehˇ gʼeh ngeh yaw ba yaw  naˆ tseˇ paˆ˗eu sahˬ tsawˆ taˬ˗euˬ aˬ li tiˬ gʼaˬ nui ma pehˇ pehˇ˗ehˇ ngaˬ˗eu jeˬ nah caw teh le˗eu meh. Teu gaˇ teu gʼaˬ naˆ maˬ tseˇ mawˇ doˆ loˆ˗eu mehˇ nmˇ yaw ba tiˬ gʼaˬ mawˇ˗awˇ aˬ yawꞈ jiˇ caw teh le˗euˬ meh. Aˬ yawꞈ “Mehˇ nmˇ Heuˇ˗teuˬ˗oˇ yawˬ jeˬ na ok miˇ˗a laˬ?” lehˇ naˇ haˬ˗eu meh. Aˬ li teu gʼaˬ gaˇ nyiˇ kuˆ˗ahˇ jiˇ maˬ laˇ ahˇ ni kawˇ ma˗ehˇ cehˆ doˆ gʼeh˗euˬ meh. Yaw myaˬ kʼoꞈ laꞈ kʼoeˇ tsawˇ haˬ yaw ba yaw naˆ tseˇ paˆ˗eu heu naˇ shaˬ jiˇ yaw ba yaw naˆ˗euˬ gaˇ kawˆ tehꞈ˗ehˇ maˬ ngeuˇ˗a. Aˬ dui yawˬ gʼaˬ na luꞈ pi luꞈ˗eu iˬ baˇ baˬ da neh meh. Kʼoeˇ naˇ aˬ dui˗euˬ mehˇ nmˇ deuˬ shaˬ jiˇ yaw ba yaw naˆ kʼawꞈ aˬ dui˗euˬ mehˇ nmˇ pyeuꞈ˗awˇ aˬ yawꞈ maꞈ aˬ dui˗euˬ gʼaˇ duˬ shiˇ dah peuˬ meh lehˇ ngaˇ ya siˬ˗euˬ ma.

Ngaˇ aˇ maꞈ˗ahˇ sheuˬ gʼeh˗eu gʼaˬ 12 kʼoꞈ geuꞈ˗awˇ gahˬ kaˬ˗ahˇ sheuˬ gʼeh˗eu gʼaˬ 21 kʼoꞈ geuꞈ˗euˬ ma. Teu ngeh nga nyaꞈ muiˬ˗eu gaˇ kawˆ hawˇ˗eu gʼaˬ ahˇ laˇ˗eu gaˇ kawˆ yaw myaˬ jeˬ˗ahˇ ya puˬ˗euˬ ma. Kʼoeˇ naˇ nga nyaꞈ˗euˬ gʼaˇ duˬ muiˬ dui dui˗eu gaˇ kawˆ tiˬ hmˬ dawˬ luꞈ˗a siˬ. Teu naˇ Yehꞈ siˬ ba la 1997 kʼoꞈ˗ahˇ nga nyaꞈ neh yuꞈ maˆ maˆ taˬ˗euˬ jeˬ maˇ diˇ pyeuꞈ laˇ˗euˬ teu meh. Nga nyaꞈ˗ahˇ Aˬmeˬliˇkaˬ˗euˬ Beˬdeˬlaˇ˗ahˇ mˇ laˇ lehˇ kuˇ˗eu meh. Nga nyaꞈ heu˗ahˇ sahˬ boꞈ boꞈ gʼeh˗euˬ gaˇ neh naˇ 38 kʼoꞈ keuˆ ni dawˬ˗euˬ ma. Gʼoeˬ siˬ ba la 1997 kʼoꞈ˗ahˇ nga nyaꞈ Beˬdeˬlaˇ˗ahˇ mˇ dahˬ beh iˇ˗euˬ ma. Yaw beh nga nyaꞈ Beˬdeˬlaˇ˗ahˇ tiˬ kʼehˇ laˇ kʼehˬ bi caw ba le˗eu tehꞈ paˬ lehˇ noeˬ˗euˬ ma. Ehˇ kʼawꞈ noeˬ˗euˬ loꞈ˗ehˇ maˬ ngeuˇ˗a.

Mˇ dah beh iˇ ngeh ngaˇ Tsaꞈ gaˬ˗eu paw haw piˇ˗eu gaˇ mˇ˗euˬ ma. Heu paw mˇ˗eu mehˇ nmˇ deuˬ miˇ kʼahˬ doe ni jawˇ˗eu aˇ muˇ˗ahˇ sheuˬ gʼeh˗eu deuˬ˗ahˇ neh maˬ ehˇ aˇ maꞈ˗ahˇ sheuˬ gʼeh˗eu deuˬ˗ahˇ neh maˬ ehˇ heu deuˬ˗ahˇ neh sahˬ boꞈ za˗eu meh. Aˬ yawꞈ maꞈ naˇ haˬ˗eu jeˬ teu naˇ coi loeˆ tsehˆ lehˆ gaˇ kawˆ deuˬ hawˇ˗eu shaˬ˗eu gaˇ kawˆ deuˬ pyeuꞈ˗eu meh. Heu paw mˇ˗eu mehˇ nmˇ deuˬ nui ma gʼawˬ mahˇ ni taˬ˗awˇ ngaˬ˗ahˇ dzaw nehˬ laꞈ˗eu miˇ neh guiˬ lahˬ huiˬ dui dui miˇ˗a. Ngaˇ teu gaˇ paˇ ya mˇ iˇ˗euˬ naˇ kʼawꞈ mehˇ nmˇ teu deuˬ˗ahˇ neh dzaw paˬ˗ehˇ gʼeh˗eu gʼawˬ mya jeˬ jaˆ˗a siˬ.

Gawˇliˬ˗yaˬ hawˇ˗eu ngaˇ Beˬdeˬlaˇ dehꞈ ziˇ˗ahˇ gaˬ dui dui nya. Nga nyaꞈ uˬ shaw yaw naꞈ˗ehˇ tuˇ dzaw taˬ˗euˬ heu naˇ Beˬdeˬlaˇ˗ahˇ mˇ ngeh gaˇ dahˇ tsoeˬ dui dui˗eu meh. Ngaˇ Tsaꞈ gaˬ˗eu paw haw piˇ˗eu gaˇ˗ahˇ tiˬ kʼoꞈ mˇ gʼaˬ naˇ Uˆ lahˇ aˇ muˇ˗euˬ tsaꞈ gaˬ˗eu gaˇ˗ahˇ caw ba˗eu gawˬmiˬtiꞈ ya geuꞈ˗awˇ 1999 kʼoꞈ˗ahˇ ngaˇ Uˆ lahˇ˗eu aˇ muˇ ya geuꞈ˗euˬ ma. Ngaˇ gaˇ heu laꞈ kʼoeˇ neh gʼawˬ mya jeˬ ya dzaw˗euˬ ma. Aˇ yeˇ huiˬ dui dui˗eu tiˬ jeˬ naˇ aˇ muˇ˗ahˇ sheuˬ gʼeh˗eu gʼaˬ tsawˇ haˬ maˬ ngeuˇ˗a Yeˬsuˇ Ka li meh lehˇ ya siˬ˗euˬ heu meh.

Gaˇ hu dehꞈ dzeuˇ laꞈ˗euˬ gaˇ shaˇ noeˬ haw ngeh ngaˬ˗ahˇ yawˬ haˇ yawˬ ha Miˬyehˇ gʼaˇ duˬ ngehˬ dah˗eu Aˬmoˆ˗ahˇ duˇ leˇ nya. Yeˬhawˇbaˬ taˬ aw˗eu yawˇ bo zaˬ Aˬmoˆ˗ahˇ haw mawˇ˗euˬ meh. Aˬmoˆ iˇ shaˬ zaˬ˗euˬ dzaˇ pyeuꞈ˗eu siˬ guˬ yaˇ kmˇ mˇ dzaˬ˗eu tsawˇ haˬ pyeuꞈ kʼawꞈ Yeˬhawˇbaˬ aˬ yawꞈ˗ahˇ ngehˬ dah˗eu gʼaˬ bi geuꞈ˗awˇ gaˇ heu mˇ ngeh guiˬ lahˬ gʼawˬ mya ni biꞈ˗euˬ meh. (Aˬmoˆ 7:14 15) Teu gaˇ duˇ ni Yeˬhawˇbaˬ ngaˇ loꞈ˗ehˇ gʼeh˗eu Eˇdiˬ˗yaˇnaˬ gahˬ kaˬ Liˇbaˬtiˬ meuˬ˗ahˇ jawˇ˗eu iˇ shaˬ shaˬ˗eu yaˇ mˇ zaˬ˗euˬ aˬ li˗ahˇ haw mawˇ˗euˬ meh. Yeˬhawˇbaˬ ngaˬ˗ahˇ guiˬ lahˬ biꞈ dui dui˗euˬ meh. Heu gaˇ ehˇ taˬ˗euˬ heu kʼawꞈ maˬ jiˇ˗aˬ siˬ. (Dawˬdaˬ 10:22) Dahˬ beh ngeh ngaˬ˗euˬ dehꞈ ziˇ tiˬ jeˬ˗iˬ maˬ jaˆ kʼawꞈ aˇ saˬ saˬ leˇ ngeh˗aˬ maˬ noeˬ˗euˬ gaˇ keuˆ ni jaˆ dui dui laˇ˗euˬ meh.