Gaˇ hu heu loꞈ˗ehˇ jah haw˗euˬ gaˇ duˇ˗eu meh. Aˬ jeˬ miˇ neh ehˇ naˇ, Iˇsawˇ “aˬ li aˬ yuiꞈ˗ahˇ oꞈ˗eu aˇ yaˬ˗ahˇ hawˬ tiˬ byawˇ neh paˇ dzeh”˗awˇ “yaw zeu maˬ baw” ni Yaˬkoˆ˗ahˇ biꞈ nehˬ˗euˬ meh lehˇ ehˇ˗eu Heˬbyehˇ 12:16 nehˬ˗ehˇ tsaˬ leˇ gaˇ duˇ˗eu meh. Teu miˇ neh, Yaˬkoˆ “zaˬ yo aˬ yuiꞈ˗ahˇ oꞈ˗eu aˇ yaˬ” za ngeh, Meˬsiˇya˗euˬ aˬ poeˬ aˬ bawˇ jiˇ za pyeuꞈ nga lehˇ gʼoˆ shaw˗euˬ ma.—Maꞈtehˬ 1:2, 16; Luˇkaꞈ 3:23, 34.

Ehˇ kʼawꞈ, Jaˇliꞈ laꞈ kʼoeˇ˗euˬ gaˇ kawˆ gui ngeh, Meˬsiˇya˗euˬ aˬ poeˬ aˬ bawˇ zaˬ yo aˬ yuiꞈ maˬ pyeuꞈ kʼawꞈ, geuꞈ nya ngaˇ lehˇ za siˬ˗euˬ ma. Aˬ dui yaw jeˬ maˬ jeˬ tiˬ kawˆ na˗ahˇ haw ma:

Leˇaˬ o neh jawˇ le˗euˬ Yaˬkoˆ˗euˬ zaˬ yo aˬ yuiꞈ gʼaˬ naˇ, Luˇbeˬ pyeuꞈ˗awˇ, Laˬkeˬlaˇ o neh jawˇ le˗euˬ zaˬ yo aˬ yuiꞈ gʼaˬ naˇ, Yoˇsehˆ pyeuꞈ meh. Ehˇ kʼawꞈ, Luˇbeˬ aˬ cawˬ nehˬ˗ehˇ dehꞈ bahˬ ngeh, zaˬ yo aˬ yuiꞈ˗ahˇ oꞈ˗eu aˇ yaˬ Yoˇsehˆ˗ahˇ doˇ iˇ˗euˬ gaˇ duˇ˗eu meh. (Aˇdahˬbeh˗eu 29:31-35; 30:22-25; 35:22-26; 49:22-26; 1 Laˬsaˬbaˬ 5:1, 2) Aˬ jeˬ lehˇ gʼeh˗eu kʼawꞈ, zaˬ yo aˬ yuiꞈ˗ahˇ oꞈ˗eu aˇ yaˬ Luˇdeˬ hawˇ˗eu Yoˇsehˆ nyaꞈ˗ahˇ maˬ oꞈ ni, Leˇaˬ˗euˬ zaˬ yo oeˬ gʼaˬ aˬ yawꞈ gʼaˬ pyeuꞈ˗eu Yuˇdaˆ˗ahˇ oꞈ˗euˬ meh.—Aˇdahˬbeh˗eu 49:10.

Luˇkaꞈ 3:32-ahˇ zaˬ yo aˬ yuiꞈ pyeuꞈ gaˇ duˇ˗eu Meˬsiˇya˗euˬ aˬ poeˬ aˬ bawˇ ngaˬ gʼaˬ˗ahˇ ngehˬ keuˆ taˬ˗euˬ meh. Yaw jeˬ ma jeˬ, Awˇbehˆ˗euˬ aˬ da Bawˇza, Yeˬshehˇ˗euˬ aˬ da Awˇbehˆ.—Luˇta 4:17, 20-22; 1 Laˬsaˬbaˬ 2:10-12.

Yeˬshehˇ˗euˬ aˬ li Daˬbiˇ˗aˬ, zaˬ yo aˬ yuiꞈ gʼaˬ maˬ ngeuˇ˗a. Zaˬ yehꞈ gʼaˬ laꞈ kʼoeˇ neh aˬ nyiˇ nyiˇ saˬ gʼaˬ meh. Ehˇ kʼawꞈ, aˬ yawꞈ naˇ Meˬsiˇya˗euˬ aˬ poeˬ aˬ bawˇ ya pyeuꞈ˗euˬ meh. (1 Saˬmeuˬlaˆ 16:10, 11; 17:12; Maꞈtehˬ 1:5, 6) Teu gaˇ duˇ ni, nyaˆ taꞈ Meˬsiˇya˗euˬ aˬ poeˬ aˬ bawˇ ya pyeuꞈ˗eu Sawˇlaˬmoˬ kʼawꞈ, zaˬ yo aˬ yuiꞈ gʼaˬ maˬ ngeuˇ˗a.—2 Saˬmeuˬlaˆ 3:2-5.

 Ehˇ kʼawꞈ, zaˬ yo aˬ yuiꞈ gʼaˬ ya pyeuꞈ˗eu heu naˇ, aˇ poeˬ maˬ baw gaˇ ehˇ mawꞈ˗eu maˬ ngeuˇ˗a. Zaˬ yo aˬ yuiꞈ gʼaˬ˗euˬ aˇ yaˬ aˇ yeˇ huiˬ˗awˇ, tsawˇ jeuˬ laꞈ kʼoeˇ˗euˬ aˬ yuiꞈ ya geuꞈ daˆ leꞈ˗eu uˬ taꞈ, jeˬ biˇ˗euˬ shaˬ bymˇ jiˇ 2 bymˇ za˗eu meh.—Aˇdahˬbeh˗eu 43:33; Dawˬmehˬmehˬ˗eu 21:17; Yawˇshuˆ 17:1.

Zaˬ yo aˬ yuiꞈ gʼaˬ˗euˬ aˇ yaˬ aˬ cawˬ˗ahˇ biꞈ nya meh. Yaw jeˬ ma jeˬ, Aˬbyaˬhaˬ Aˬzeˬlaˇ˗ahˇ iˇ kahˇ˗ahˇ neh teh doˆ ngeh, aˬ yawꞈ˗euˬ zaˬ yo aˬ yuiꞈ gʼaˬ˗euˬ aˇ yaˬ Iˇtsaˆ˗euˬ pyeuꞈ iˇ˗euˬ meh. (Aˇdahˬbeh˗eu 21:14-21; 22:2) Kʼoeˇ naˇ, aˬ dui neh uˬ coe ja sawˇ dzeuˇ˗euˬ loꞈ˗ehˇ Luˇbeˬ˗euˬ aˇ yaˬ Yoˇsehˆ˗euˬ pyeuꞈ iˇ˗euˬ meh.

Nymˇ aˬ dui Heˬbyehˇ 12:16-ahˇ tiˬ poˆ paˇ haw iˇ ma. Teu gaˇ ehˇ˗eu: “Aˬ li aˬ yuiꞈ˗ahˇ oꞈ˗eu aˇ yaˬ˗ahˇ hawˬ tiˬ byawˇ neh paˇ dzeh˗euˬ Iˇsawˇ loꞈ˗ehˇ, tsawˇ haˬ tiˬ gʼaˬ˗iˬ kʼaˬ miˬ sheu˗awˇ Miˬyehˇ˗ahˇ yaw zeu maˬ baw˗eu tsawˇ haˬ maˬ ya bi pyeuꞈ ni yahˇ˗awˬ.” Gaˇ kawˆ heu aˬ jeˬ˗ahˇ ehˇ mawꞈ˗eu nga?

Heu deuˆ˗ahˇ Pawˇluˆ Meˬsiˇya˗euˬ aˬ poeˬ aˬ bawˇ˗euˬ gaˇ kawˆ˗ahˇ ja sawˇ luꞈ˗eu maˬ ngeuˇ˗a. Aˬ yawꞈ Ka li zaˬ deuˬ˗ahˇ saˇ tiˇ biꞈ˗eu tehꞈ meh. Pawˇluˆ “Yaw tsaˬ yaw dawˇ gaˇ ma˗ahˇ cah˗awˬ” tiˬ gʼaˬ˗iˬ “Miˬyehˇ˗euˬ guiˬ lahˬ˗ahˇ maˬ ya byehˇ dzeh ni yahˇ”˗eu gʼaˇ duˬ lehˇ ehˇ˗eu meh. Ehˇ kʼawꞈ, Ka li zaˬ tiˬ gʼaˬ na dehꞈ bahˬ naˇ, gaˇ kawˆ heu pyeuꞈ laˇ nya meh. (Heˬbyehˇ 12:12-16) Aˬ yawꞈ maꞈ Iˇsawˇ loꞈ˗ehˇ “Miˬyehˇ˗ahˇ yaw zeu maˬ baw˗eu tsawˇ haˬ” pyeuꞈ iˇ nya meh.

Teu ngeh˗euˬ zahˇ sahˇ kʼoꞈ baˬ da neh, Iˇsawˇ Yeˬhawˇbaˬ˗ahˇ lawˇ nehˬ nya˗eu zawˇ muiˬ˗eu aˬ kawˬ˗aˬ jaˆ gaˇ duˇ˗eu meh. (Aˇdahˬbeh˗eu 8:20, 21; 12:7, 8; Yawˇbaˆ 1:4, 5) Ehˇ kʼawꞈ, Iˇsawˇ yawˬ ha geuꞈ mawꞈ˗eu jeˬ˗ahˇ tehꞈ˗ehˇ shaˇ noeˬ˗awˇ, aˬ yawꞈ˗euˬ zaˬ yo aˬ yuiꞈ˗euˬ aˇ yaˬ aˇ behˆ aˇ nuiˆ puꞈ˗euˬ tiˬ ma˗ahˇ neh paˇ dzaˬ˗euˬ meh. Aˬ yawꞈ Yeˬhawˇbaˬ neh Aˬbyaˬhaˬ˗ahˇ aˬ yawꞈ˗euˬ oeˬ paˬ oeˬ ma deuˬ shaˬ zahˬ˗ahˇ yaˬ tahˬ puˬ meh lehˇ ehˇ taˬ˗euˬ kʼoeˇ˗ahˇ yahˇ mawꞈ miˇ neh kʼawꞈ pyeuꞈ nya meh. (Aˇdahˬbeh˗eu 15:13) Kʼoeˇ naˇ, aˬ yawꞈ Yeˬhawˇbaˬ˗ahˇ uˬ duˬ tahˬ maˬ tahˬ˗euˬ miˬ zaˬ nyiˬ gʼaˬ sheuˬ ngeh, muiˬ˗eu shawˇ˗eu jeˬ˗ahˇ aˇ poeˬ maˬ taˬ baw˗eu lehˇ mˇ mawˇ˗euˬ meh. Heu naˇ, aˬ yawꞈ˗euˬ aˬ da aˬ ma˗ahˇ nui ma laˆ cawˆ nehˬ˗euˬ meh. (Aˇdahˬbeh˗eu 26:34, 35) Iˇsawˇ naˇ, Yaˬkoˆ nehˬ˗ehˇ aˬ naˆ ni beu gaˇ nga. Yaˬkoˆ˗aˬ, maˇ diˇ Miˬyehˇ˗ahˇ uˬ duˬ tahˬ˗eu gʼaˬ nehˬ˗ehˇ tehꞈ˗ehˇ oeˇ mˇ baˇ ma lehˇ noeˬ tsehˆ taˬ˗euˬ meh.—Aˇdahˬbeh˗eu 28:6, 7; 29:10-12, 18.

Toˆ˗ehˇ naˇ, Jaˇliꞈ Meˬsiˇya˗euˬ aˬ poeˬ aˬ bawˇ nehˬ˗ehˇ taꞈ leˇ˗awˇ aˬ jeˬ mehˬ˗eu nga? Meˬsiˇyaˆ˗euˬ aˬ poeˬ aˬ bawˇ zaˬ yo aˬ yuiꞈ gʼaˬ maˬ ngeuˇ˗eu kʼawꞈ geuꞈ nya meh. Heu naˇ Yuˇdaˆ tsawˇ haˬ deuˬ ha geuꞈ˗awˇ gʼoˆ shaw˗eu jeˬ pyeuꞈ meh. Aˬ dui aˬ joˆ˗ehˇ siˬ nya nga? Aˬ yawꞈ maꞈ Ka li Yeˬshehˇ˗euˬ aˬ li aˬ nyiˇ nyiˇ saˬ gʼaˬ pyeuꞈ˗eu Daˬbiˇ˗euˬ poeˬ paˬ oeˬ ma meh lehˇ ha geuꞈ˗eu miˇ neh za siˬ˗euˬ ma.—Maꞈtehˬ 22:42.