“Tsawˇ haˬ yawˬ gʼaˬ na luꞈ”˗ahˇ gʼawˬ shaˬ gaˬ˗eu jeˬ ka dehꞈ
Yeˬsuˇ aˬ yawꞈ˗euˬ gʼaˬ kʼehˇ˗ahˇ aˬ joˆ˗ehˇ ya tsaꞈ gaˬ˗eu gaˇ kawˆ mehˬ ngeh, tiˬ poˆ na tsawˇ haˬ deuˬ aˬ yawꞈ maꞈ˗ahˇ maˬ ha geuꞈ mawꞈ ni gʼeh meh lehˇ saˇ tiˇ biꞈ˗euˬ meh. (Luˇkaꞈ 10:3, 5, 6) Nymˬ˗mˇ iˬ nah aˬ dui Miˬyehˇ˗euˬ gaˇ mˇ ngeh kʼawꞈ teu loꞈ˗ehˇ duˇ meh. Tiˬ gʼaˬ na aˬ dui˗ahˇ yehˬ bawˬ sehˇ lu˗ehˇ ngehˬ laˇ jahˇ laˇ˗awˇ, guˇ laˇ˗eu meh. Teu miˇ neh, aˬ dui aˬ yawꞈ maꞈ˗ahˇ gʼawˬ shaˬ gaˬ˗awˇ, tsaꞈ gaˬ nehˬ mawꞈ˗eu nui ma ahˇ˗eu yaw shaˬ meh.
Gʼawˬ shaˬ gaˬ nya˗eu tsawˇ haˬ˗aˬ, aˬ caw˗euˬ shaˬ zahˬ hawˇ˗eu loˬ˗eu jeˬ˗ahˇ haw mawˇ˗awˇ, caw ba nehˬ mawꞈ˗eu meh. Ehˇ kʼawꞈ, aˬ dui tsaꞈ gaˬ duˬ˗ahˇ jawˇ˗eu deuˬ˗ahˇ gʼawˬ shaˬ gaˬ˗eu jeˬ maˬ ahˇ ni pyeuꞈ iˇ naˇ tawˇ neh? Aˬ dui˗euˬ nui ma shaˬ dehꞈ yaw kʼaˆ˗ehˇ maˬ dehꞈ ni pyeuꞈ laˇ˗awˇ, aˬ yawꞈ maꞈ˗ahˇ maˬ paˇ tsaꞈ gaˬ mawꞈ˗eu uˬ taꞈ, caw jiˇ maˬ paˇ caw ba nehˬ nya˗eu meh. Aˬ dui nui ma shaˬ dehꞈ dehꞈ˗eu jeˬ miˬ dzaˬ nehˬ˗ehˇ sheu cehˆ nya meh. Miˬ dzaˬ miˬ luˇ paˇ bi nyehˆ laˇ˗eu gʼaˇ duˬ miˬ dzaˬ miˬ kawˬ ya dawˆ lahˬ˗eu meh. Teu gaˇ duˇ ni, aˬ dui aˬ myah luꞈ nui ma shaˬ dehꞈ bi dehꞈ mawꞈ naˇ, gʼawˬ shaˬ gaˬ˗eu jeˬ ya bi ahˇ˗eu meh.—1 Teˇsaˬloˇni 5:19.
Aˬ cawˬ˗ahˇ gʼawˬ shaˬ gaˬ˗eu heu yaw awˬ maˬ ngeuˇ kʼawꞈ, aˬ dui aˬ joˆ˗ehˇ bi myaˬ daˆ laˇ nya˗eu nga? Aˬ dui dzaw geuꞈ nya˗eu yaw jeˬ ma jeˬ smˬ kawˆ˗ahˇ haw kaˇ˗euˇ. Teu naˇ Yeˬhawˇbaˬ, Yeˬsuˇ hawˇ˗eu kuiˇ laꞈ Pawˇluˆ meh.
Yeˬhawˇbaˬ˗euˬ gʼawˬ shaˬ gaˬ˗eu jeˬ˗ahˇ dzaw geuꞈ
Tsawˇ haˬ deuˬ Yeˬhawˇbaˬ˗euˬ gaˇ kawˆ˗ahˇ maˬ ngeuˇ˗eu jeˬ˗ehˇ ja bu ja doeˇ˗eu gʼawˬ mya heˇ kʼoꞈ byah laˇ˗euˬ meh. Ehˇ kʼawꞈ Miˬyehˇ naˇ, “guiˬ lahˬ˗ahˇ maˬ noeˬ mawˇ nya˗eu tsawˇ haˬ hawˇ˗eu haiˬ˗eu tsawˇ haˬ deuˬ˗ahˇ, aˬ yawꞈ gʼawˬ shaˬ gaˬ” luꞈ˗a siˬ. (Luˇkaꞈ 6:35) Yeˬhawˇbaˬ gʼawˬ shaˬ gaˬ˗eu jeˬ aˬ joˆ˗ehˇ mˇ mawˇ nehˬ˗euˬ nga? Aˬ yawꞈ oˇ oꞈ˗awˇ, “yawˬ gʼaˬ na luꞈ”˗ahˇ ka kʼoꞈ˗eu jeˬ bi za mawꞈ˗eu meh. (1 Tiˆmoˇseˬ 2:3, 4) Yeˬhawˇbaˬ yaw haiˬ jeˬ˗ahˇ bye kʼawꞈ, tsawˇ haˬ zaˬ deuˬ aˬ yawꞈ˗euˬ mehˬ shi aˇ poeˬ baw˗eu miˇ neh, tiˬ gʼaˬ˗ahˇ˗iˬ maˬ bi shiˇ mawꞈ˗a.—2 Beˬtuˆluˆ 3:9
Yeˬhawˇbaˬ naˇ, Saˬdaˬ˗aˬ tsawˇ haˬ deuˬ˗ahˇ jaˬ myawꞈ meh suiˇ gaˇ kawˆ˗ahˇ jah ni, jahˇ˗eu bym dui nya dui dui meh lehˇ siˬ nya˗eu meh. (2 Gawˇliˬtu 4:3, 4) Tsawˇ haˬ gʼawˬ mya gʼaˬ nyiˇ ngeh neh, Miˬyehˇ˗euˬ gaˇ kawˆ maˬ ngeuˇ˗eu jeˬ˗ehˇ bi mehˬ ahˇ taˬ˗euˬ miˇ neh, Jaˇliꞈ˗euˬ yaw tsaˬ yaw dawˇ˗ahˇ ha geuꞈ˗eu yaw shaˬ nya lehˇ noeˬ˗eu meh. Ehˇ kʼawꞈ, Yeˬhawˇbaˬ aˬ yawꞈ maꞈ˗ahˇ caw ba nehˬ mawꞈ meh siˬ. Aˬ dui aˬ joˆ˗ehˇ siˬ nya˗eu nga?
Aˬ dui yaw haiˬ jeˬ tehꞈ˗ehˇ mˇ˗eu Niˇnaˬbeˬ meuˬ zaˬ deuˬ˗ahˇ, Yeˬhawˇbaˬ aˬ joˆ˗ehˇ noeˬ nga lehˇ haw kaˇ˗euˇ. Yeˬhawˇbaˬ Yawˇnaˆ˗ahˇ, “Toˆ˗ehˇ ngeuˇ naˇ, huiˬ dui dui˗eu Niˇnaˬbeˬ meuˬ kʼoeˇ meuˬ˗ahˇ ngaˇ aˇ naˆ ni gʼawˬ shaˬ gaˬ paˬ˗ehˇ gʼeh˗eu nga. Meuˬ kʼoeˇ meuˬ laꞈ kʼoeˇ iˬ baˇ maˬ ahˇ˗eu zaˬ yaw nyiˇ tiˬ seh nyiˬ muiˇ gʼaˬ dzehˬ ni jawˇ˗awˇ, jeˬ zaˬ kʼawꞈ myaˬ dui dui˗eu meh” lehˇ ehˇ nehˬ˗euˬ meh. (Yawˇnaˆ 4:11) Yeˬhawˇbaˬ aˬ yawꞈ˗euˬ gaˇ kawˆ˗ahˇ yaw muiˬ˗ehˇ maˬ siˬ nya˗eu tsawˇ haˬ deuˬ˗ahˇ gʼawˬ shaˬ gaˬ˗eu miˇ neh, Yawˇnaˆ˗ahˇ kʼehˇ gʼeh˗awˇ saˇ tiˇ bi biꞈ˗iˇ˗euˬ meh.
Aˬ dui Yeˬhawˇbaˬ tsawˇ haˬ aˇ poeˬ baw˗eu lehˇ haw˗eu loꞈ˗ehˇ aˬ dui jiˇ haw˗awˇ, aˬ yawꞈ maꞈ Jaˇliꞈ˗euˬ yaw tsaˬ yaw dawˇ˗ahˇ nui ma ahˇ gaˇ maˬ duˇ kʼawꞈ, aˬ dui aˬ yawꞈ maꞈ˗ahˇ Miˬyehˇ˗euˬ gaˇ kawˆ maˇ maˇ ni gʼeh˗eu jeˬ˗ahˇ bi siˬ nya mawꞈ˗eu ma.
Yeˬsuˇ˗euˬ gʼawˬ shaˬ gaˬ˗eu jeˬ˗ahˇ dzaw geuꞈ
Yeˬsuˇ kʼawꞈ aˬ yawꞈ˗euˬ Aˬda Yeˬhawˇbaˬ˗ahˇ duˇ ni, tsawˇ haˬ deuˬ˗ahˇ gʼawˬ shaˬ gaˬ˗eu meh. “Aˬ jeˬ miˇ neh ehˇ naˇ, aˬ yawꞈ maꞈ˗aˬ, yawˇ bo˗eu yaw sahˇ maˬ baw˗eu yawˇ deuˬ loꞈ˗ehˇ, guˆ˗awˇ gʼaˬ baˬ luꞈ˗eu meh.” (Maꞈtehˬ 9:36) Yeˬsuˇ tsawˇ haˬ deuˬ teu loꞈ˗ehˇ pyeuꞈ luꞈ˗eu teu naˇ, zahˇ˗euˬ aˬ yuiꞈ deuˬ aˬ yawꞈ maꞈ˗ahˇ jaˬ myawꞈ mehˇ shuiˇ gaˇ kawˆ mehˬ˗awˇ, aˬ yawꞈ maꞈ˗ahˇ yaw doeˇ jahˇ˗eu miˇ neh meh lehˇ siˬ nya˗eu meh. Yeˬsuˇ aˬ yawꞈ mehˬ gaˇ naˇ haˬ le˗euˬ deuˬ gʼawˬ myaˬ gʼaˬ, gʼaˬ kʼehˇ geuꞈ˗eu gʼaˇ duˬ naˇ haˬ le˗euˬ maˬ ngeuˇ˗eu lehˇ siˬ nya kʼawꞈ, Yeˬsuˇ aˬ yawꞈ maꞈ˗ahˇ gaˇ kawˆ gʼawˬ mya jeˬ mehˬ nehˬ˗euˬ meh.—Maˬkuˆ 4:1-9.
Tiˬ gʼaˬ na aˬ dui˗ahˇ aˇ dahˬ beh ngeh neh maˬ ha geuꞈ kʼawꞈ nui ma gʼaˬ taˬ baˬ
Aˬ yawꞈ maꞈ˗euˬ dehꞈ ziˇ poˆ laˇ paˇ ngeh, ha geuꞈ laˇ˗eu kʼawꞈ pyeuꞈ nya
Tsawˇ haˬ deuˬ aˬ dui tsaꞈ gaˬ˗eu gaˇ kawˆ˗ahˇ nui ma maˬ tsaˬ˗eu lehˇ siˬ laˇ ngeh, aˬ dui aˬ yawꞈ maꞈ aˬ jeˬ miˇ neh toˆ˗ehˇ gʼeh˗eu nga lehˇ, leh jeh˗awˇ ya gʼoˆ shaw nehˬ meh. Aˬ yawꞈ maꞈ Ka li zaˬ deuˬ hawˇ˗eu Jaˇliꞈ˗ahˇ nui ma baw˗eu miˇ neh kʼawꞈ pyeuꞈ nya meh. Aˬ jeˬ miˇ neh ehˇ naˇ, Ka li zaˬ ma lehˇ ehˇ gaˇ neh maˬ muiˬ˗eu yaw myaˬ jeˬ mˇ˗eu deuˬ˗ahˇ ya mawˇ˗eu miˇ neh meh. Tiˬ gʼaˬ na aˬ dui˗ahˇ ja bu˗eu jaˬ myawꞈ dawˬ˗ahˇ jah leˇ˗awˇ gʼoˆ shaw bahˬ taˬ˗euˬ loꞈ˗ehˇ, tiˬ gʼaˬ na naˇ, aˬ yawꞈ maꞈ aˬ dui nehˬ˗ehˇ ngehˬ cawˬ naˇ, yuiꞈ nyiˇ deuˬ hawˇ˗eu nymˇ kaˬ taꞈ˗eu deuˬ, naˬ gʼa laˇ gaˇ guˆ˗eu meh.
Tsawˇ haˬ tiˬ deuˬ na˗aˬ, nui ma˗ahˇ naˇ dui dui laˇ paˬ˗ehˇ gʼeh˗eu gaˇ kawˆ˗ahˇ ya tahˬ puˬ haw˗euˬ meh. Miˇshaˬnaˬliˬ pyeuꞈ˗eu Ki˗mˬ ehˇ˗eu aˬ yawꞈ maꞈ˗euˬ tsaꞈ gaˬ duˬ˗ahˇ˗euˬ tsawˇ haˬ gʼawˬ mya gʼaˬ, guiˇ deuˆ˗eu jeˬ˗ahˇ ya tahˬ puˬ yaꞈ˗awˇ, tiˬ jeˬ˗iˬ maˬ dzeˇ ni pyeuꞈ haw˗euˬ meh. Aˬ yawꞈ maꞈ noeˬ tmˬ˗eu jeˬ maˬ jaˆ˗eu uˬ taꞈ, nui ma nyiˇ nui ma cawˆ˗awˇ, tiˬ gʼaˬ˗ahˇ˗iˬ nui ma ma taˬ coeˇ ni pyeuꞈ luꞈ˗eu meh. Tsaꞈ gaˬ duˬ teu gaˇ yaw myaˬ poˆ maˬ bi tsaꞈ gaˬ ni laˆ tsoeˬ˗awˇ, tiˬ poˆ naˇ ngehˬ˗ehˇ dzehˬ, mehˇ nmˇ Ki˗mˬ tsaꞈ gaˬ luꞈ ngeh bi diˬ˗euˬ meh.
Ki˗mˬ tsawˇ haˬ deuˬ aˬ yawꞈ˗ahˇ yaw doeˇ jahˇ laˇ kʼawꞈ, aˬ yawꞈ aˬ cawˬ˗ahˇ gʼawˬ shaˬ aˬ joˆ˗ehˇ gaˬ˗eu nga? Aˬ yawꞈ Dawˬdaˬ 19:11-ahˇ “Nui ma˗ahˇ noeˬ˗eu tsawˇ haˬ nui pehˇ laꞈ nyiˇ maˬ bi mawˇ˗ehˇ (nui ma pehˇ˗eu maˬ kawˇ˗a, MS)” lehˇ ehˇ taˬ˗euˬ dawˬ˗ahˇ leh jeh˗awˇ noeˬ taˬ˗euˬ meh. Aˬ yawꞈ tsaꞈ gaˬ duˬ teu gaˇ˗euˬ tsawˇ haˬ deuˬ aˬ jeˬ jeˇ ya tahˬ puˬ˗euˬ gaˇ kawˆ˗ahˇ shaˇ sawˇ˗euˬ miˇ neh, tsawˇ haˬ teu deuˬ˗ahˇ gʼawˬ shaˬ paˇ gaˬ˗eu meh. Aˬ yawꞈ teu gaˇ˗euˬ yawˬ gʼaˬ na luꞈ yaw doeˇ maˬ ngeuˇ nga lehˇ haw mawˇ˗awˇ, teu gaˇ aˬ yawꞈ gʼa kʼoꞈ iˇ nya˗eu gʼawˬ mya gʼaˬ jawˇ˗eu meh.
Aˬ dui aˬ cawˬ˗ahˇ gʼawˬ shaˬ gaˬ˗eu gʼaˇ duˬ, aˬ dui yawˬ ha˗ahˇ ‘Ngaˇ Saˇ kiˇ maˬ ngeuˇ law nmˇ˗aˬ, Saˇ kiˇ deuˬ ngaˬ˗ahˇ tsaꞈ gaˬ laˇ ngeh, ngaˇ aˬ joˆ˗ehˇ jahˇ nehˬ˗eu nga?’ lehˇ naˇ haˬ haw. Yaw jeˬ ma jeˬ aˬ dui Saˇ kiˇ deuˬ˗ahˇ ja bu˗eu jaˬ myawꞈ dawˬ˗ahˇ yaw myaˬ ya gaˬ ahˇ taˬ˗euˬ naˇ, aˬ dui kʼawꞈ Saˇ kiˇ deuˬ tsaꞈ gaˬ laˇ ngeh, nui ma maˬ uˇ ni kʼawꞈ pyeuꞈ nya˗awˇ, yaw doeˇ kʼawꞈ paˇ jahˇ nya˗eu meh. Teu ngeh aˬ dui jiˇ aˬ cawˬ neh gʼawˬ shaˬ gaˬ nehˬ laꞈ˗euˬ jeˬ˗ahˇ loˬ meh. Yeˬsuˇ aˬ dui˗ahˇ aˬ cawˬ neh yawˬ ha˗ahˇ kʼaˇ bi mˇ nehˬ mawꞈ˗eu loꞈ˗ehˇ, aˬ cawˬ˗ahˇ mˇ nehˬ˗awˬ lehˇ ehˇ˗eu meh. Teu miˇ neh aˬ dui aˬ cawˬ˗euˬ nui ma˗ahˇ leh jeh˗awˇ ya gʼoˆ shaw nehˬ˗awˇ, yaw awˬ maˬ ngeuˇ kʼawꞈ aˬ yawꞈ maꞈ˗ahˇ ya oˇ oꞈ nehˬ meh.—Maꞈtehˬ 7:12.
Pawˇluˆ˗euˬ gʼawˬ shaˬ gaˬ˗eu jeˬ˗ahˇ dzaw geuꞈ
Kuiˇ laꞈ Pawˇluˆ aˬ yawꞈ˗euˬ tsaꞈ gaˬ˗eu gaˇ˗ahˇ laˆ tsoeˬ laˇ˗eu deuˬ˗ahˇ kʼawꞈ, gʼawˬ shaˬ gaˬ˗eu meh. Aˬ jeˬ miˇ neh nga? Aˬ jeˬ miˇ neh ehˇ naˇ, aˬ yawꞈ kʼawꞈ kʼoeˇ ngeh toˆ˗ehˇ gʼeh˗eu tsawˇ haˬ pyeuꞈ haw˗eu miˇ neh meh. Aˬ yawꞈ ehˇ˗eu “Dzeuˇ laˇ ngeh aˬ yawꞈ˗ahˇ ngaˇ ja doeˇ˗awˇ, kʼehˬ nehˬ kʼaˆ nehˬ˗awˇ, yehˬ bawˬ sehˇlu˗ehˇ ehˇ nehˬ˗euˬ ma. Ehˇ kʼawꞈ, ngaˇ jah˗eu jeˬ maˬ ahˇ laˇ dah˗ehˇ yawˬ ha mˇ luꞈ˗eu jeˬ˗ahˇ maˬ tseˇ paˆ nya˗euˬ baˬ da neh, Miˬyehˇ ngaˬ˗ahˇ gʼawˬ shaˬ gaˬ nehˬ laꞈ˗euˬ meh.” (1 Tiˆmoˇseˬ 1:13) Pawˇluˆ Yeˬhawˇbaˬ hawˇ˗eu Yeˬsuˇ aˬ yawꞈ˗ahˇ gʼawˬ shaˬ aˇ naˆ ni gaˬ˗eu lehˇ siˬ nya˗eu meh. Aˬ yawꞈ tsaꞈ gaˬ˗eu gaˇ˗ahˇ laˆ tsoeˬ laˇ˗eu deuˬ˗ahˇ gʼoˆ shawˬ nehˬ nya˗eu teu naˇ, aˬ yawꞈ kʼawꞈ toˆ˗ehˇ gʼeh˗eu tsawˇ haˬ pyeuꞈ haw˗euˬ miˇ neh meh.
Pawˇluˆ tiˬ poˆ na mehˬ bahˬ˗eu jeˬ˗ahˇ jah dui dui˗eu deuˬ˗ahˇ ya tahˬ puˬ˗euˬ meh. Aˬ yawꞈ˗euˬ nui ma˗ahˇ aˬ joˆ˗ehˇ gʼeh leˇ˗euˬ nga? Gʼaˬkʼehˇ 17:16-ahˇ Pawˇluˆ Aˬteˬ meuˬ˗ahˇ jawˇ ngeh, “meuˬ kʼoeˇ meuˬ laꞈ kʼoeˇ tahˬ pahˬ aˬ ma mawˇ kawˇ tiˬ byah jaˆ gaˇ ya mawˇ˗awˇ, nui ma maˬ saˇ˗a” lehˇ ehˇ˗eu meh. Ehˇ kʼawꞈ, aˬ yawꞈ tsawˇ haˬ deuˬ˗ahˇ mehˬ˗eu gʼaˇ duˬ, aˬ yawꞈ˗euˬ nui ma˗ahˇ maˬ saˇ˗eu jeˬ pyeuꞈ˗eu teu˗ahˇ zmˬ˗euˬ meh. (Gʼaˬkʼehˇ 17:22, 23) Pawˇluˆ dehꞈ jeˬ dehꞈ kawˆ beu gaˇ˗eu deuˬ nehˬ˗ehˇ ya mawˇ ngeh, mehˬ jeˬ mehˬ kawˆ teu nehˬ˗ehˇ tsaˬ leˇ ni laˆ paˇ˗euˬ meh. Teu naˇ “tiˬ paˆ na deuˬ˗ahˇ aˬ joˆ˗ehˇ jahˇ˗awˇ ka kʼoꞈ paˬ nga lehˇ, kʼaˇ gʼeh nya˗eu loꞈ˗ehˇ leh jeh doe”˗eu gʼaˇ duˬ meh.—1 Gawˇliˬtu 9:20-23.
Aˬ dui, aˬ dui˗ahˇ maˬ muiˬ˗eu jeˬ˗ehˇ noeˬ˗eu deuˬ˗ahˇ maˬ ehˇ, jah bahˬ taˬ˗euˬ deuˬ˗ahˇ maˬ ehˇ, ya tsaꞈ gaˬ iˇ ngeh, Pawˇluˆ loꞈ˗ehˇ jahˇ nya meh. Aˬ dui aˬ yawꞈ maꞈ˗ahˇ ‘muiˬ dzehˬ˗eu guiˬ lahˬ dawˬ’ gaˇ kawˆ˗ahˇ bi dzaw˗eu gʼaˇ duˬ, aˬ dui siˬ nya˗eu aˬ yawꞈ maꞈ˗euˬ gaˇ kawˆ˗ahˇ zmˬ nya meh. (Iˇsaˬyaˇ 52:7) Doˬlawˬtiˬ lehˇ kuˇ˗eu mehˇ nmˇ aˬ buˇ tiˬ gʼaˬ ehˇ˗eu “Ngaˬ˗euˬ tsaꞈ gaˬ˗eu duˬ˗ahˇ˗euˬ tsawˇ haˬ deuˬ gʼawˬ mya gʼaˬ, Miˬyehˇ˗aˬ kʼaˬ dui dui˗awˇ, yaˇ kʼaˬ daˇ˗eu gʼaˇ duˬ yaw lehˬ˗ahˇ tehꞈ˗ehˇ poˆ˗eu meh lehˇ bi mehˬ jah taˬ˗euˬ meh. Ngaˇ aˬ myah luꞈ teu loꞈ˗ehˇ ehˇ gaˇ kʼaˇ ya gaˬ ngeh, ngaˇ aˬ yawꞈ maꞈ Miˬyehˇ jawˇ˗eu lehˇ jah gaˇ ja ceuˬ nehˬ˗awˇ, maˇ diˇ naˇ Jaˇliꞈ Yeˬhawˇbaˬ˗euˬ muiˬ˗eu seu dzeuꞈ gaˇ kawˆ˗ahˇ hawˇ˗eu, mehˬ hu paw saˇ jaˇ dzaˬ taˬ˗euˬ jeˬ˗ahˇ aˬ joˆ˗ehˇ ehˇ˗eu nga lehˇ bi haw˗eu ma.”
‘Yaw haiˬ jeˬ˗ahˇ yaw muiˬ jeˬ neh bi gʼaˬ leˇ’
Aˇ saˬ saˬ˗eu aˇ nah ngehˬ˗ehˇ peh laˇ naˇ ngehˬ˗ehˇ, aˬ dui tsawˇ haˬ tiˬ deuˬ na˗euˬ nui noeˬ “ngehˬ jawˇ ngehˬ doeˇ dzehˬ laˇ” meh lehˇ noeˬ tmˬ nya meh. (2 Tiˆmoˇseˬ 3:1, 13) Aˬ cawˬ maˬ naˇ haˬ˗eu teu hawˇ˗eu yaw doeˇ jahˇ laˇ˗eu teu baˬ da neh, laꞈ kʼaˬ maˬ cehˇ ni maˬ ehˇ, aˬ cawˬ˗ahˇ gʼawˬ shaˬ maˬ gaˬ nya ni maˬ ehˇ taˬ bi pyeuꞈ. Yeˬhawˇbaˬ aˬ dui˗ahˇ, “yaw muiˬ jeˬ mˇ˗awˇ yaw haiˬ jeˬ˗ahˇ bi gʼaˬ leˇ” ni gʼaˬ biꞈ nehˬ meh. (Loˇmaˆ 12:21) Huˬ mehˬ mehˬ˗eu mehˇ nmˇ Jehˇsiˬkaꞈ aˬ yawꞈ maˬ gaˇ˗eu jahˇ geuꞈ˗eu tsawˇ haˬ hawˇ˗eu aˬ dui˗ahˇ maˬ ehˇ, guiˬ lahˬ dawˬ˗ahˇ maˬ ehˇ, cehꞈ lehꞈ ka˗eu deuˬ˗ahˇ ya mawˇ meh lehˇ ehˇ˗awˇ, “Toˆ˗ehˇ gʼeh˗eu deuˬ˗ahˇ ya mawˇ ngeh, nui ma cawˆ laˇ nya, ehˇ kʼawꞈ ngaˇ maˬ ngehˬ mi na˗ehˇ, Yeˬhawˇbaˬ˗ahˇ nui ma laꞈ kʼoeˇ neh teu gʼaˬ˗ahˇ nawˇ haw˗eu loꞈ˗ehˇ haw nya ni caw ba nehˬ laꞈ lehˇ guiˬ lahˬ shaˇ˗eu ma” lehˇ ehˇ˗eu meh. Heu loꞈ˗ehˇ jahˇ˗eu heu naˇ, Jehˇsiˬkaꞈ˗ahˇ yawˬ ha˗euˬ nui ma˗ahˇ tehꞈ˗ehˇ maˬ noeˬ keuˆ ni, teu gʼaˬ˗ahˇ aˬ joˆ˗ehˇ caw ba paˬ nga lehˇ shaˇ noeˬ ni caw ba nehˬ˗eu meh.
Aˬ dui yaw tsaˬ yaw dawˇ jeˬ˗ahˇ siˬ nya mawꞈ˗eu deuˬ˗ahˇ leh jeh˗awˇ poˆ daˆ leꞈ
Aˇ yamˬ tsaˬ laˇ ngeh, tiˬ gʼaˬ na ha geuꞈ laˇ˗awˇ Jaˇliꞈ dzaw laˇ nya
Kʼoeˇ uˬ taꞈ, aˬ dui tsaꞈ gaˬ iˇ ngeh mehˇ nmˇ deuˬ˗ahˇ gʼaˬ ya biꞈ˗eu meh. Jehˇsiˬkaꞈ tsaꞈ gaˬ iˇ ngeh, mehˇ nmˇ tiˬ gʼaˬ maˬ muiˬ˗eu gaˇ kawˆ˗ahˇ ya tahˬ puˬ˗euˬ naˇ, aˬ yawꞈ gaˇ kawˆ teu˗ahˇ maˬ ja gahˇ gʼeh ni, gʼaˬ ahˇ laˇ paˬ˗ehˇ gʼeh˗eu nui jeˬ˗ahˇ ja pyawˇ gʼeh˗eu ma lehˇ ehˇ˗eu meh. Yaw jeˬ ma jeˬ, tsaꞈ gaˬ duˬ˗ahˇ tiˬ gʼaˬ na yaw doeˇ jahˇ laˇ kʼawꞈ, yaw muiˬ jeˬ nui jeˬ jiˇ jaˆ˗eu gaˇ kawˆ ja˗eu meh.
Tiˬ poˆ na aˬ dui˗euˬ gʼaˇ duˬ tsaꞈ gaˬ jeˬ kʼawꞈ shaˬ dui dui meh lehˇ, Yeˬhawˇbaˬ siˬ nya˗eu meh. Ehˇ kʼawꞈ aˬ dui aˬ yawꞈ˗euˬ gʼawˬ shaˬ gaˬ˗eu jeˬ˗ahˇ dzaw geuꞈ gaˇ aˬ yawꞈ ya mawˇ ngeh, laꞈ kʼaˬ cehˇ dui dui˗eu meh. (Luˇkaꞈ 6:36) Yeˬhawˇbaˬ miˇ tsaˬ kʼoeˇ taˆ˗euˬ tsawˇ haˬ deuˬ˗ahˇ aˬ myah luꞈ maˬ oˇ oꞈ gʼeh˗eu yaw duˬ baw meh. Aˇ saˬ saˬ˗eu aˇ nah aˬ geu ngeh bi oe˗eu gaˇ kawˆ Miˬyehˇ siˬ nya˗eu lehˇ aˬ dui jah nya meh. Ehˇ kʼawꞈ aˇ nah teu maˬ keuˆ le siˬ kʼoeˇ, tsaꞈ gaˬ˗eu gaˇ heu naˇ, tehˬ dui dui˗eu jeˬ pyeuꞈ meh. (2 Tiˆmoˇseˬ 4:2) Teu miˇ neh, aˬ dui nui ma shaˬ dehꞈ dehꞈ˗eu laꞈ kʼoeˇ tsaꞈ gaˬ daˆ leꞈ˗awˇ, “tsawˇ haˬ yawˬ gʼaˬ na luꞈ˗ahˇ” gʼawˬ shaˬ gaˬ nehˬ kaˇ˗euˇ.
