1950 k’oꞈ jiˇ leˇ ngeh Iˇdiˬ-yaˬ miˇ k’ahˬ Guˇlaꞈ meuˬ-euˬ pu pu zaˬ tiˬ pu-ahˇ Jawˬ-euˬ aˬ da iˇ cuꞈ shawˇ-awˇ Yeˬhawˇbaˬ-euˬ Saˇ kiˇ pyeuꞈ laˇ-euˬ meh. Ehˇ k’awꞈ Jawˬ-euˬ aˬ ma hawˇ-eu aˬ yawꞈ-euˬ mehˇ nmˇ 5 g’aˬ naˇ Koꞈ dawˬ zaˬ lahˇ pyeuꞈ-awˇ zahˇ ziꞈ dah ni tawˬ-eu miˇ neh aˬ yawꞈ-euˬ aˬ da neh jah-eu jeˬ-ahˇ laˆ tsoeˬ-eu meh.

Tiˬ nah keuˆ laˇ ngeh Jawˬ-euˬ aˬ da aˇ muˇ-ahˇ jawˇ-eu mehˇ nmˇ tiˬ g’aˬ-ahˇ sahˬ boꞈ tiˬ poˆ bi ha iˇ nehˬ laꞈ lehˇ Jawˬ-ahˇ shaˇ-euˬ meh. Ehˇ k’awꞈ uˬ shawˬ paw Jawˬ iˇ cuꞈ bawˬ keuˆ pah ngeh laꞈ noeˇ-ahˇ zawˇ-ehˇ laˆ naˇ-euˬ meh. Teu loꞈ-ehˇ g’eh k’awꞈ aˬ yawꞈ aˬ da-euˬ ehˇ dawˬ naˇ haˬ mawꞈ-eu miˇ neh shiˬ yoeˇ luꞈ-eu laꞈ noeˇ-ahˇ saˬ paˇ paꞈ tawꞈ-awˇ sahˬ boꞈ biꞈ ha iˇ-euˬ meh.

Jawˬ aˬ yawꞈ da-euˬ cawˬ pehˬ kahˇ iˇ keuˆ ngeh aˬ yawꞈ-euˬ aˬ da-euˬ cawˬ maˬ jawˇ-a miˬ zaˬ g’aˬ tehꞈ-ehˇ jawˇ-eu meh. Teu g’aˬ k’awꞈ ni Yeˬhawˇbaˬ-euˬ Saˇ kiˇ tiˬ g’aˬ pyeuꞈ meh. Aˇ yuiꞈ heu g’aˬ Jawˬ laꞈ noeˇ naˇ luꞈ gaˇ ya mawˇ-awˇ caw ba nehˬ-euˬ meh. Aˬ yawꞈ jaˆ g’aˬ yuˇ laꞈ-awˇ maˇ naˇ-ahˇ tsiˬ shawˇ nehˬ-awˇ saˬ paˇ neh paꞈ tawꞈ nehˬ-eu meh. K’oeˇ naˇ lawˇ bawˬ caꞈ nehˬ-awˇ Jawˬ k’aˇ jawˇ-euˬ k’oeˇ keuˆ ni Jaˇliꞈ-euˬ gaˇ kawˆ yaw g’oeˇ g’oeˇ lehˇ ja nehˬ-euˬ meh.

Aˇ yuiꞈ heu g’aˬ nahˬ yu ni g’eh-eu miˇ neh Jawˬ neh Yeˬhawˇbaˬ-euˬ Saˇ kiˇ deuˬ-ahˇ noeˬ taˬ-euˬ jeˬ paˇ iˇ-euˬ meh. Teu miˇ neh Koꞈ dawˬ zaˬ lahˇ deuˬ jah-eu jeˬ nehˬ-ehˇ beu gaˇ-eu Yeˬhawˇbaˬ-euˬ Saˇ kiˇ deuˬ jah-eu jeˬ nyiˬ kawˆ naˇ haˬ-euˬ meh. Aˬ yawꞈ Yeˬsuˇ Miˬyehˇ pyeuꞈ meh laˬ? Maˬliˇ-ahˇ uˬ duˬ ya tahˬ meh laˬ? lehˇ naˇ haˬ-euˬ meh. Aˇ yuiꞈ g’aˬ Jawˬ-ahˇ Jaˇliꞈ neh dawˬ k’oꞈ biꞈ-awˇ “Miˬyehˇ Miˇk’ahˬ-euˬ guiˬ lahˬ dawˬ” lehˇ kuˇ-eu paˇ dmˬ biꞈ nehˬ-euˬ meh.

Jawˬ paˇ dmˬ heu-ahˇ ya gui ngeh maˇ maˇ ni g’eh-eu jeˬ pyeuꞈ nya lehˇ siˬ leˇ-euˬ miˇ neh aˬ da koꞈ dawˬ jawˇ gaˇ iˇ-awˇ gaˇ kawˆ nyiˬ kawˆ naˇ haˬ iˇ-eu meh. Koꞈ dawˬ nui ma pehˇ dui dui-awˇ aˬ yawꞈ-ahˇ Jaˇliꞈ neh biˬ-euˬ uˬ taꞈ “Nawˇ-aˬ Saˬdaˬ nga! Yeˬsuˇ Miˬyehˇ maˬ pyeuꞈ-eu lehˇ Jaˇliꞈ aˬ geu deuˆ ehˇ nga lehˇ bi haw laꞈ sheˇ Maˬliˇ-ahˇ uˬ duˬ taˬ tahˬ lehˇ aˬ geu gaˇ ehˇ taˬ nga lehˇ bi haw sheˇ” lehˇ guˇ-eu meh. Aˬ da koꞈ dawˬ teu loꞈ-ehˇ jahˇ gaˇ Jawˬ tsawˬ guˆ iˇ-awˇ nyaˆ taꞈ naˇ Koꞈ dawˬ-euˬ Uˬ duˬ tahˬ nymˇ-ahˇ maˬ paˇ laˇ ma lehˇ ehˇ nehˬ-euˬ meh. K’oeˇ gaˇ neh naˇ maˬ paˇ iˇ tsehˆ-euˬ meh.

Jawˬ Yeˬhawˇbaˬ-euˬ Saˇ kiˇ deuˬ nehˬ-ehˇ Jaˇliꞈ dzaw laˇ-awˇ yaw tsaˬ yaw dawˇ-ahˇ ha geuꞈ-awˇ Yeˬhawˇbaˬ-euˬ gaˇ mˇ laˇ-euˬ meh. Teu ngeh nymˇ jiˇ laꞈ k’oeˇ jawˇ-eu deuˬ k’awꞈ teu loꞈ-ehˇ jahˇ-euˬ meh. 60 k’oꞈ byah laˇ ngeh Jawˬ-euˬ aˬ laꞈ-ahˇ jaˆ-eu maˇ byawꞈ aˬ yawꞈ Yeˬhawˇbaˬ-ahˇ a nehˬ-awˇ aˬ yawꞈ-euˬ gaˇ mˇ laˇ ni laˆ noeˬ nehˬ-euˬ Ka li zaˬ-euˬ nahˬ yu ni g’eh-eu jeˬ-ahˇ noeˬ luꞈ-a siˬ.—2 Gawˇliˬtu 6:4, 6.